៨. សប្បុរិសសុត្តំ

៣៨. ‘‘សប្បុរិសោ, ភិក្ខវេ, កុលេ ជាយមានោ ពហុនោ ជនស្ស អត្ថាយ ហិតាយ សុខាយ ហោតិ – មាតាបិតូនំ អត្ថាយ ហិតាយ សុខាយ ហោតិ, បុត្តទារស្ស អត្ថាយ ហិតាយ សុខាយ ហោតិ, ទាសកម្មករបោរិសស្ស អត្ថាយ ហិតាយ សុខាយ ហោតិ, មិត្តាមច្ចានំ អត្ថាយ ហិតាយ សុខាយ ហោតិ, បុព្ពបេតានំ អត្ថាយ ហិតាយ សុខាយ ហោតិ, រញ្ញោ អត្ថាយ ហិតាយ សុខាយ ហោតិ, ទេវតានំ អត្ថាយ ហិតាយ សុខាយ ហោតិ, សមណព្រាហ្មណានំ អត្ថាយ ហិតាយ សុខាយ ហោតិ.

‘‘សេយ្យថាបិ, ភិក្ខវេ, មហាមេឃោ សព្ពសស្សានិ សម្បាទេន្តោ ពហុនោ ជនស្ស អត្ថាយ ហិតាយ សុខាយ [ហិតាយ…បេ… (ស្យា. ក.)] ហោតិ; ឯវមេវំ ខោ, ភិក្ខវេ, សប្បុរិសោ កុលេ ជាយមានោ ពហុនោ ជនស្ស អត្ថាយ ហិតាយ សុខាយ ហោតិ – មាតាបិតូនំ អត្ថាយ ហិតាយ សុខាយ ហោតិ, បុត្តទារស្ស អត្ថាយ ហិតាយ សុខាយ ហោតិ, ទាសកម្មករបោរិសស្ស អត្ថាយ ហិតាយ សុខាយ ហោតិ, មិត្តាមច្ចានំ អត្ថាយ ហិតាយ សុខាយ ហោតិ, បុព្ពបេតានំ អត្ថាយ ហិតាយ សុខាយ ហោតិ, រញ្ញោ អត្ថាយ ហិតាយ សុខាយ ហោតិ, ទេវតានំ អត្ថាយ ហិតាយ សុខាយ ហោតិ, សមណព្រាហ្មណានំ អត្ថាយ ហិតាយ សុខាយ ហោតី’’តិ.

‘‘ពហូនំ [ពហុន្នំ (សី. បី.)] វត អត្ថាយ, សប្បញ្ញោ ឃរមាវសំ;

មាតរំ បិតរំ បុព្ពេ, រត្តិន្ទិវមតន្ទិតោ.

‘‘បូជេតិ សហធម្មេន, បុព្ពេកតមនុស្សរំ;

អនាគារេ បព្ពជិតេ, អបចេ ព្រហ្មចារយោ [ព្រហ្មចារិនោ (ស្យា.)].

‘‘និវិដ្ឋសទ្ធោ បូជេតិ, ញត្វា ធម្មេ ច បេសលោ [បេសលេ (ក.)];

រញ្ញោ ហិតោ ទេវហិតោ, ញាតីនំ សខិនំ ហិតោ.

‘‘សព្ពេសំ [សព្ពេសុ (ក.)] សោ [ស (ស្យា. បី. ក.)] ហិតោ ហោតិ, សទ្ធម្មេ សុប្បតិដ្ឋិតោ;

វិនេយ្យ មច្ឆេរមលំ, ស លោកំ ភជតេ សិវ’’ន្តិ. អដ្ឋមំ;