៣. ទានវត្ថុសុត្តំ

៣៣. ‘‘អដ្ឋិមានិ, ភិក្ខវេ, ទានវត្ថូនិ. កតមានិ អដ្ឋ? ឆន្ទា ទានំ ទេតិ, ទោសា ទានំ ទេតិ, មោហា ទានំ ទេតិ, ភយា ទានំ ទេតិ, ‘ទិន្នបុព្ពំ កតបុព្ពំ បិតុបិតាមហេហិ, នារហាមិ បោរាណំ កុលវំសំ ហាបេតុ’ន្តិ ទានំ ទេតិ, ‘ឥមាហំ ទានំ ទត្វា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជិស្សាមី’តិ ទានំ ទេតិ, ‘ឥមំ មេ ទានំ ទទតោ ចិត្តំ បសីទតិ, អត្តមនតា សោមនស្សំ ឧបជាយតី’តិ ទានំ ទេតិ, ចិត្តាលង្ការចិត្តបរិក្ខារត្ថំ ទានំ ទេតិ. ឥមានិ ខោ, ភិក្ខវេ, អដ្ឋ ទានវត្ថូនី’’តិ. តតិយំ.