៤. ខេត្តសុត្តំ

៣៤. ‘‘អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ ន មហប្ផលំ ហោតិ ន មហស្សាទំ ន ផាតិសេយ្យំ [ន ផាតិសេយ្យន្តិ (សី. ស្យា. ក.), ន ផាតិសេយ្យា (កត្ថចិ)]. កថំ អដ្ឋង្គសមន្នាគតេ? ឥធ, ភិក្ខវេ, ខេត្តំ ឧន្នាមនិន្នាមិ ច ហោតិ, បាសាណសក្ខរិកញ្ច ហោតិ, ឩសរញ្ច ហោតិ, ន ច គម្ភីរសិតំ ហោតិ, ន អាយសម្បន្នំ ហោតិ, ន អបាយសម្បន្នំ ហោតិ, ន មាតិកាសម្បន្នំ ហោតិ, ន មរិយាទសម្បន្នំ ហោតិ. ឯវំ អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ ន មហប្ផលំ ហោតិ ន មហស្សាទំ ន ផាតិសេយ្យំ.

‘‘ឯវមេវំ ខោ, ភិក្ខវេ, អដ្ឋង្គសមន្នាគតេសុ សមណព្រាហ្មណេសុ ទានំ ទិន្នំ ន មហប្ផលំ ហោតិ ន មហានិសំសំ ន មហាជុតិកំ ន មហាវិប្ផារំ. កថំ អដ្ឋង្គសមន្នាគតេសុ? ឥធ, ភិក្ខវេ, សមណព្រាហ្មណា មិច្ឆាទិដ្ឋិកា ហោន្តិ, មិច្ឆាសង្កប្បា, មិច្ឆាវាចា, មិច្ឆាកម្មន្តា, មិច្ឆាអាជីវា, មិច្ឆាវាយាមា, មិច្ឆាសតិនោ, មិច្ឆាសមាធិនោ. ឯវំ អដ្ឋង្គសមន្នាគតេសុ, ភិក្ខវេ, សមណព្រាហ្មណេសុ ទានំ ទិន្នំ ន មហប្ផលំ ហោតិ ន មហានិសំសំ ន មហាជុតិកំ ន មហាវិប្ផារំ.

‘‘អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ មហប្ផលំ ហោតិ មហស្សាទំ ផាតិសេយ្យំ. កថំ អដ្ឋង្គសមន្នាគតេ? ឥធ, ភិក្ខវេ, ខេត្តំ អនុន្នាមានិន្នាមិ ច ហោតិ, អបាសាណសក្ខរិកញ្ច ហោតិ, អនូសរញ្ច ហោតិ, គម្ភីរសិតំ ហោតិ, អាយសម្បន្នំ ហោតិ, អបាយសម្បន្នំ ហោតិ, មាតិកាសម្បន្នំ ហោតិ, មរិយាទសម្បន្នំ ហោតិ. ឯវំ អដ្ឋង្គសមន្នាគតេ, ភិក្ខវេ, ខេត្តេ ពីជំ វុត្តំ មហប្ផលំ ហោតិ មហស្សាទំ ផាតិសេយ្យំ.

‘‘ឯវមេវំ ខោ, ភិក្ខវេ, អដ្ឋង្គសមន្នាគតេសុ សមណព្រាហ្មណេសុ ទានំ ទិន្នំ មហប្ផលំ ហោតិ មហានិសំសំ មហាជុតិកំ មហាវិប្ផារំ. កថំ អដ្ឋង្គសមន្នាគតេសុ? ឥធ, ភិក្ខវេ, សមណព្រាហ្មណា សម្មាទិដ្ឋិកា ហោន្តិ, សម្មាសង្កប្បា, សម្មាវាចា, សម្មាកម្មន្តា, សម្មាអាជីវា, សម្មាវាយាមា, សម្មាសតិនោ, សម្មាសមាធិនោ. ឯវំ អដ្ឋង្គសមន្នាគតេសុ, ភិក្ខវេ, សមណព្រាហ្មណេសុ ទានំ ទិន្នំ មហប្ផលំ ហោតិ មហានិសំសំ មហាជុតិកំ មហាវិប្ផារ’’ន្តិ.

‘‘យថាបិ ខេត្តេ សម្បន្នេ, បវុត្តា ពីជសម្បទា;

ទេវេ សម្បាទយន្តម្ហិ [សញ្ជាយន្តម្ហិ (ក.)], ហោតិ ធញ្ញស្ស សម្បទា.

‘‘អនីតិសម្បទា ហោតិ, វិរូឡ្ហី ភវតិ សម្បទា;

វេបុល្លសម្បទា ហោតិ, ផលំ វេ ហោតិ សម្បទា.

‘‘ឯវំ សម្បន្នសីលេសុ, ទិន្នា ភោជនសម្បទា;

សម្បទានំ ឧបនេតិ, សម្បន្នំ ហិស្ស តំ កតំ.

‘‘តស្មា សម្បទមាកង្ខី, សម្បន្នត្ថូធ បុគ្គលោ;

សម្បន្នបញ្ញេ សេវេថ, ឯវំ ឥជ្ឈន្តិ សម្បទា.

‘‘វិជ្ជាចរណសម្បន្នេ, លទ្ធា ចិត្តស្ស សម្បទំ;

ករោតិ កម្មសម្បទំ, លភតិ ចត្ថសម្បទំ.

‘‘លោកំ ញត្វា យថាភូតំ, បប្បុយ្យ ទិដ្ឋិសម្បទំ;

មគ្គសម្បទមាគម្ម, យាតិ សម្បន្នមានសោ.

‘‘ឱធុនិត្វា មលំ សព្ពំ, បត្វា និព្ពានសម្បទំ;

មុច្ចតិ សព្ពទុក្ខេហិ, សា ហោតិ សព្ពសម្បទា’’តិ. ចតុត្ថំ;