១០. ទុច្ចរិតវិបាកសុត្តំ

៤០. ‘‘បាណាតិបាតោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ. យោ សព្ពលហុសោ [សព្ពលហុសោតិ សព្ពលហុកោ (ស្យា. អដ្ឋ.)] បាណាតិបាតស្ស វិបាកោ, មនុស្សភូតស្ស អប្បាយុកសំវត្តនិកោ ហោតិ.

‘‘អទិន្នាទានំ, ភិក្ខវេ, អាសេវិតំ ភាវិតំ ពហុលីកតំ និរយសំវត្តនិកំ តិរច្ឆានយោនិសំវត្តនិកំ បេត្តិវិសយសំវត្តនិកំ. យោ សព្ពលហុសោ អទិន្នាទានស្ស វិបាកោ, មនុស្សភូតស្ស ភោគព្យសនសំវត្តនិកោ ហោតិ.

‘‘កាមេសុមិច្ឆាចារោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ. យោ សព្ពលហុសោ កាមេសុមិច្ឆាចារស្ស វិបាកោ, មនុស្សភូតស្ស សបត្តវេរសំវត្តនិកោ ហោតិ.

‘‘មុសាវាទោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ. យោ សព្ពលហុសោ មុសាវាទស្ស វិបាកោ, មនុស្សភូតស្ស អភូតព្ភក្ខានសំវត្តនិកោ ហោតិ.

‘‘បិសុណា, ភិក្ខវេ, វាចា អាសេវិតា ភាវិតា ពហុលីកតា និរយសំវត្តនិកា តិរច្ឆានយោនិសំវត្តនិកា បេត្តិវិសយសំវត្តនិកា. យោ សព្ពលហុសោ បិសុណាយ វាចាយ វិបាកោ, មនុស្សភូតស្ស មិត្តេហិ ភេទនសំវត្តនិកោ ហោតិ.

‘‘ផរុសា, ភិក្ខវេ, វាចា អាសេវិតា ភាវិតា ពហុលីកតា និរយសំវត្តនិកា តិរច្ឆានយោនិសំវត្តនិកា បេត្តិវិសយសំវត្តនិកា. យោ សព្ពលហុសោ ផរុសាយ វាចាយ វិបាកោ, មនុស្សភូតស្ស អមនាបសទ្ទសំវត្តនិកោ ហោតិ.

‘‘សម្ផប្បលាបោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ. យោ សព្ពលហុសោ សម្ផប្បលាបស្ស វិបាកោ, មនុស្សភូតស្ស អនាទេយ្យវាចាសំវត្តនិកោ ហោតិ.

‘‘សុរាមេរយបានំ, ភិក្ខវេ, អាសេវិតំ ភាវិតំ ពហុលីកតំ និរយសំវត្តនិកំ តិរច្ឆានយោនិសំវត្តនិកំ បេត្តិវិសយសំវត្តនិកំ. យោ សព្ពលហុសោ សុរាមេរយបានស្ស វិបាកោ, មនុស្សភូតស្ស ឧម្មត្តកសំវត្តនិកោ ហោតី’’តិ. ទសមំ.

ទានវគ្គោ ចតុត្ថោ.