៩. ទុតិយបរិហានិសុត្តំ

២៩. ‘‘សត្តិមេ, ភិក្ខវេ, ធម្មា ឧបាសកស្ស បរិហានាយ សំវត្តន្តិ. កតមេ សត្ត? ភិក្ខុទស្សនំ ហាបេតិ, សទ្ធម្មស្សវនំ បមជ្ជតិ, អធិសីលេ ន សិក្ខតិ, អប្បសាទពហុលោ ហោតិ, ភិក្ខូសុ ថេរេសុ ចេវ នវេសុ ច មជ្ឈិមេសុ ច ឧបារម្ភចិត្តោ ធម្មំ សុណាតិ រន្ធគវេសី, ឥតោ ពហិទ្ធា ទក្ខិណេយ្យំ គវេសតិ, តត្ថ ច បុព្ពការំ ករោតិ. ឥមេ ខោ, ភិក្ខវេ, សត្ត ធម្មា ឧបាសកស្ស បរិហានាយ សំវត្តន្តិ.

‘‘សត្តិមេ, ភិក្ខវេ, ធម្មា ឧបាសកស្ស អបរិហានាយ សំវត្តន្តិ. កតមេ សត្ត? ភិក្ខុទស្សនំ ន ហាបេតិ, សទ្ធម្មស្សវនំ នប្បមជ្ជតិ, អធិសីលេ សិក្ខតិ, បសាទពហុលោ ហោតិ, ភិក្ខូសុ ថេរេសុ ចេវ នវេសុ ច មជ្ឈិមេសុ ច អនុបារម្ភចិត្តោ ធម្មំ សុណាតិ ន រន្ធគវេសី, ន ឥតោ ពហិទ្ធា ទក្ខិណេយ្យំ គវេសតិ, ឥធ ច បុព្ពការំ ករោតិ. ឥមេ ខោ, ភិក្ខវេ, សត្ត ធម្មា ឧបាសកស្ស អបរិហានាយ សំវត្តន្តី’’តិ. ឥទមវោច ភគវា. ឥទំ វត្វាន សុគតោ អថាបរំ ឯតទវោច សត្ថា –

‘‘ទស្សនំ ភាវិតត្តានំ, យោ ហាបេតិ ឧបាសកោ;

សវនញ្ច អរិយធម្មានំ, អធិសីលេ ន សិក្ខតិ.

‘‘អប្បសាទោ ច ភិក្ខូសុ, ភិយ្យោ ភិយ្យោ បវឌ្ឍតិ;

ឧបារម្ភកចិត្តោ ច, សទ្ធម្មំ សោតុមិច្ឆតិ.

‘‘ឥតោ ច ពហិទ្ធា អញ្ញំ, ទក្ខិណេយ្យំ គវេសតិ;

តត្ថេវ ច បុព្ពការំ, យោ ករោតិ ឧបាសកោ.

‘‘ឯតេ ខោ បរិហានិយេ, សត្ត ធម្មេ សុទេសិតេ;

ឧបាសកោ សេវមានោ, សទ្ធម្មា បរិហាយតិ.

‘‘ទស្សនំ ភាវិតត្តានំ, យោ ន ហាបេតិ ឧបាសកោ;

សវនញ្ច អរិយធម្មានំ, អធិសីលេ ច សិក្ខតិ.

‘‘បសាទោ ចស្ស ភិក្ខូសុ, ភិយ្យោ ភិយ្យោ បវឌ្ឍតិ;

អនុបារម្ភចិត្តោ ច, សទ្ធម្មំ សោតុមិច្ឆតិ.

‘‘ន ឥតោ ពហិទ្ធា អញ្ញំ, ទក្ខិណេយ្យំ គវេសតិ;

ឥធេវ ច បុព្ពការំ, យោ ករោតិ ឧបាសកោ.

‘‘ឯតេ ខោ អបរិហានិយេ, សត្ត ធម្មេ សុទេសិតេ;

ឧបាសកោ សេវមានោ, សទ្ធម្មា ន បរិហាយតី’’តិ. នវមំ;