៩. ទុតិយអភព្ពដ្ឋានសុត្តំ

៩៣. ‘‘ឆយិមានិ, ភិក្ខវេ, អភព្ពដ្ឋានានិ. កតមានិ ឆ? អភព្ពោ ទិដ្ឋិសម្បន្នោ បុគ្គលោ កញ្ចិ [កិញ្ចិ (ក.) វិភ. ៨០៩; ម. និ. ៣.១២៧] សង្ខារំ និច្ចតោ ឧបគន្តុំ, អភព្ពោ ទិដ្ឋិសម្បន្នោ បុគ្គលោ កញ្ចិ សង្ខារំ សុខតោ ឧបគន្តុំ, អភព្ពោ ទិដ្ឋិសម្បន្នោ បុគ្គលោ កញ្ចិ ធម្មំ អត្តតោ ឧបគន្តុំ, អភព្ពោ ទិដ្ឋិសម្បន្នោ បុគ្គលោ អានន្តរិយំ កម្មំ [អានន្តរិយកម្មំ (សី.), អនន្តរិយកម្មំ (ស្យា. បី.) អ. និ. ៤.១៦២ បស្សិតព្ពំ] កាតុំ, អភព្ពោ ទិដ្ឋិសម្បន្នោ បុគ្គលោ កោតូហលមង្គលេន សុទ្ធិំ បច្ចាគន្តុំ, អភព្ពោ ទិដ្ឋិសម្បន្នោ បុគ្គលោ ឥតោ ពហិទ្ធា ទក្ខិណេយ្យំ គវេសិតុំ. ឥមានិ ខោ, ភិក្ខវេ, ឆ អភព្ពដ្ឋានានី’’តិ. នវមំ.