១០. តតិយអភព្ពដ្ឋានសុត្តំ

៩៤. ‘‘ឆយិមានិ, ភិក្ខវេ, អភព្ពដ្ឋានានិ. កតមានិ ឆ? អភព្ពោ ទិដ្ឋិសម្បន្នោ បុគ្គលោ មាតរំ ជីវិតា វោរោបេតុំ, អភព្ពោ ទិដ្ឋិសម្បន្នោ បុគ្គលោ បិតរំ ជីវិតា វោរោបេតុំ, អភព្ពោ ទិដ្ឋិសម្បន្នោ បុគ្គលោ អរហន្តំ ជីវិតា វោរោបេតុំ, អភព្ពោ ទិដ្ឋិសម្បន្នោ បុគ្គលោ តថាគតស្ស ទុដ្ឋេន ចិត្តេន លោហិតំ ឧប្បាទេតុំ, អភព្ពោ ទិដ្ឋិសម្បន្នោ បុគ្គលោ សង្ឃំ ភិន្ទិតុំ, អភព្ពោ ទិដ្ឋិសម្បន្នោ បុគ្គលោ អញ្ញំ សត្ថារំ ឧទ្ទិសិតុំ. ឥមានិ ខោ, ភិក្ខវេ, ឆ អភព្ពដ្ឋានានី’’តិ. ទសមំ.