៨. សមណសុខសុត្តំ

១២៨. ‘‘បញ្ចិមានិ, ភិក្ខវេ, សមណទុក្ខានិ. កតមានិ បញ្ច? ឥធ, ភិក្ខវេ, ភិក្ខុ អសន្តុដ្ឋោ ហោតិ ឥតរីតរេន ចីវរេន, អសន្តុដ្ឋោ ហោតិ ឥតរីតរេន បិណ្ឌបាតេន, អសន្តុដ្ឋោ ហោតិ ឥតរីតរេន សេនាសនេន, អសន្តុដ្ឋោ ហោតិ ឥតរីតរេន គិលានប្បច្ចយភេសជ្ជបរិក្ខារេន, អនភិរតោ ច ព្រហ្មចរិយំ ចរតិ. ឥមានិ ខោ, ភិក្ខវេ, បញ្ច សមណទុក្ខានិ.

‘‘បញ្ចិមានិ, ភិក្ខវេ, សមណសុខានិ. កតមានិ បញ្ច? ឥធ, ភិក្ខវេ, ភិក្ខុ សន្តុដ្ឋោ ហោតិ ឥតរីតរេន ចីវរេន, សន្តុដ្ឋោ ហោតិ ឥតរីតរេន បិណ្ឌបាតេន, សន្តុដ្ឋោ ហោតិ ឥតរីតរេន សេនាសនេន, សន្តុដ្ឋោ ហោតិ ឥតរីតរេន គិលានប្បច្ចយភេសជ្ជបរិក្ខារេន, អភិរតោ ច ព្រហ្មចរិយំ ចរតិ. ឥមានិ ខោ, ភិក្ខវេ, បញ្ច សមណសុខានី’’តិ. អដ្ឋមំ.