៥. មច្ឆរិនីសុត្តំ

១១៥. ‘‘បញ្ចហិ, ភិក្ខវេ, ធម្មេហិ សមន្នាគតា ភិក្ខុនី យថាភតំ និក្ខិត្តា ឯវំ និរយេ. កតមេហិ បញ្ចហិ? អាវាសមច្ឆរិនី ហោតិ, កុលមច្ឆរិនី ហោតិ, លាភមច្ឆរិនី ហោតិ, វណ្ណមច្ឆរិនី ហោតិ, ធម្មមច្ឆរិនី ហោតិ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតា ភិក្ខុនី យថាភតំ និក្ខិត្តា ឯវំ និរយេ.

‘‘បញ្ចហិ, ភិក្ខវេ, ធម្មេហិ សមន្នាគតា ភិក្ខុនី យថាភតំ និក្ខិត្តា ឯវំ សគ្គេ. កតមេហិ បញ្ចហិ? ន អាវាសមច្ឆរិនី ហោតិ, ន កុលមច្ឆរិនី ហោតិ, ន លាភមច្ឆរិនី ហោតិ, ន វណ្ណមច្ឆរិនី ហោតិ, ន ធម្មមច្ឆរិនី ហោតិ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតា ភិក្ខុនី យថាភតំ និក្ខិត្តា ឯវំ សគ្គេ’’តិ. បញ្ចមំ.