២. បច្ឆាសមណសុត្តំ

១១២. ‘‘បញ្ចហិ, ភិក្ខវេ, ធម្មេហិ សមន្នាគតោ បច្ឆាសមណោ ន អាទាតព្ពោ. កតមេហិ បញ្ចហិ? អតិទូរេ វា គច្ឆតិ អច្ចាសន្នេ វា, ន បត្តបរិយាបន្នំ គណ្ហតិ, អាបត្តិសាមន្តា ភណមានំ ន និវារេតិ, ភណមានស្ស អន្តរន្តរា កថំ ឱបាតេតិ, ទុប្បញ្ញោ ហោតិ ជឡោ ឯឡមូគោ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតោ បច្ឆាសមណោ ន អាទាតព្ពោ.

‘‘បញ្ចហិ, ភិក្ខវេ, ធម្មេហិ សមន្នាគតោ បច្ឆាសមណោ អាទាតព្ពោ. កតមេហិ បញ្ចហិ? នាតិទូរេ គច្ឆតិ ន អច្ចាសន្នេ, បត្តបរិយាបន្នំ គណ្ហតិ, អាបត្តិសាមន្តា ភណមានំ និវារេតិ, ភណមានស្ស ន អន្តរន្តរា កថំ ឱបាតេតិ, បញ្ញវា ហោតិ អជឡោ អនេឡមូគោ. ឥមេហិ ខោ, ភិក្ខវេ, បញ្ចហិ ធម្មេហិ សមន្នាគតោ បច្ឆាសមណោ អាទាតព្ពោ’’តិ. ទុតិយំ.