១. សារជ្ជសុត្តំ

១០១. ‘‘បញ្ចិមេ, ភិក្ខវេ, សេខវេសារជ្ជករណា ធម្មា. កតមេ បញ្ច? ឥធ, ភិក្ខវេ, ភិក្ខុ សទ្ធោ ហោតិ, សីលវា ហោតិ, ពហុស្សុតោ ហោតិ, អារទ្ធវីរិយោ ហោតិ, បញ្ញវា ហោតិ.

‘‘យំ, ភិក្ខវេ, អស្សទ្ធស្ស សារជ្ជំ ហោតិ, សទ្ធស្ស តំ សារជ្ជំ ន ហោតិ. តស្មាយំ ធម្មោ សេខវេសារជ្ជករណោ.

‘‘យំ, ភិក្ខវេ, ទុស្សីលស្ស សារជ្ជំ ហោតិ, សីលវតោ តំ សារជ្ជំ ន ហោតិ. តស្មាយំ ធម្មោ សេខវេសារជ្ជករណោ.

‘‘យំ, ភិក្ខវេ, អប្បស្សុតស្ស សារជ្ជំ ហោតិ, ពហុស្សុតស្ស តំ សារជ្ជំ ន ហោតិ. តស្មាយំ ធម្មោ សេខវេសារជ្ជករណោ.

‘‘យំ, ភិក្ខវេ, កុសីតស្ស សារជ្ជំ ហោតិ, អារទ្ធវីរិយស្ស តំ សារជ្ជំ ន ហោតិ. តស្មាយំ ធម្មោ សេខវេសារជ្ជករណោ.

‘‘យំ, ភិក្ខវេ, ទុប្បញ្ញស្ស សារជ្ជំ ហោតិ, បញ្ញវតោ តំ សារជ្ជំ ន ហោតិ. តស្មាយំ ធម្មោ សេខវេសារជ្ជករណោ. ឥមេ ខោ, ភិក្ខវេ, បញ្ច សេខវេសារជ្ជករណា ធម្មា’’តិ. បឋមំ.