៩. ភោជនសុត្តំ

៣៧. ‘‘ភោជនំ, ភិក្ខវេ, ទទមានោ ទាយកោ បដិគ្គាហកានំ បញ្ច ឋានានិ ទេតិ. កតមានិ បញ្ច? អាយុំ ទេតិ, វណ្ណំ ទេតិ, សុខំ ទេតិ, ពលំ ទេតិ, បដិភានំ [បដិភាណំ (សី.)] ទេតិ. អាយុំ ខោ បន ទត្វា អាយុស្ស ភាគី ហោតិ ទិព្ពស្ស វា មានុសស្ស វា; វណ្ណំ ទត្វា វណ្ណស្ស ភាគី ហោតិ ទិព្ពស្ស វា មានុសស្ស វា; សុខំ ទត្វា សុខស្ស ភាគី ហោតិ ទិព្ពស្ស វា មានុសស្ស វា; ពលំ ទត្វា ពលស្ស ភាគី ហោតិ ទិព្ពស្ស វា មានុសស្ស វា; បដិភានំ ទត្វា បដិភានស្ស ភាគី ហោតិ ទិព្ពស្ស វា មានុសស្ស វា. ភោជនំ, ភិក្ខវេ, ទទមានោ ទាយកោ បដិគ្គាហកានំ ឥមានិ បញ្ច ឋានានិ ទេតី’’តិ.

‘‘អាយុទោ ពលទោ ធីរោ, វណ្ណទោ បដិភានទោ;

សុខស្ស ទាតា មេធាវី, សុខំ សោ អធិគច្ឆតិ.

‘‘អាយុំ ទត្វា ពលំ វណ្ណំ, សុខញ្ច បដិភានកំ [បដិភាណកំ (សី.), បដិភានទោ (ស្យា. កំ. បី. ក.)];

ទីឃាយុ យសវា ហោតិ, យត្ថ យត្ថូបបជ្ជតី’’តិ. សត្តមំ;