៥. កុលសុត្តំ

២៥៨. ‘‘យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ន ចិរដ្ឋិតិកានិ ភវន្តិ, សព្ពានិ តានិ ចតូហិ ឋានេហិ, ឯតេសំ វា អញ្ញតរេន. កតមេហិ ចតូហិ? នដ្ឋំ ន គវេសន្តិ, ជិណ្ណំ ន បដិសង្ខរោន្តិ, អបរិមិតបានភោជនា ហោន្តិ, ទុស្សីលំ ឥត្ថិំ វា បុរិសំ វា អាធិបច្ចេ ឋបេន្តិ. យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ន ចិរដ្ឋិតិកានិ ភវន្តិ, សព្ពានិ តានិ ឥមេហិ ចតូហិ ឋានេហិ, ឯតេសំ វា អញ្ញតរេន.

‘‘យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ចិរដ្ឋិតិកានិ ភវន្តិ, សព្ពានិ តានិ ចតូហិ ឋានេហិ, ឯតេសំ វា អញ្ញតរេន. កតមេហិ ចតូហិ? នដ្ឋំ គវេសន្តិ, ជិណ្ណំ បដិសង្ខរោន្តិ, បរិមិតបានភោជនា ហោន្តិ, សីលវន្តំ ឥត្ថិំ វា បុរិសំ វា អាធិបច្ចេ ឋបេន្តិ. យានិ កានិចិ, ភិក្ខវេ, កុលានិ ភោគេសុ មហត្តំ បត្តានិ ចិរដ្ឋិតិកានិ ភវន្តិ, សព្ពានិ តានិ ឥមេហិ ចតូហិ ឋានេហិ, ឯតេសំ វា អញ្ញតរេនា’’តិ. បញ្ចមំ.