(២២) ២. បរិសាវគ្គោ

១. បរិសាសុត្តំ

២១១. ‘‘ចត្តារោមេ, ភិក្ខវេ, បរិសទូសនា. កតមេ ចត្តារោ? ភិក្ខុ, ភិក្ខវេ [ឥធ ភិក្ខវេ ភិក្ខុ (បី. ក.)], ទុស្សីលោ បាបធម្មោ បរិសទូសនោ; ភិក្ខុនី, ភិក្ខវេ, ទុស្សីលា បាបធម្មា បរិសទូសនា; ឧបាសកោ, ភិក្ខវេ, ទុស្សីលោ បាបធម្មោ បរិសទូសនោ; ឧបាសិកា, ភិក្ខវេ, ទុស្សីលា បាបធម្មា បរិសទូសនា. ឥមេ ខោ, ភិក្ខវេ, ចត្តារោ បរិសទូសនា.

‘‘ចត្តារោមេ, ភិក្ខវេ, បរិសសោភនា. កតមេ ចត្តារោ? ភិក្ខុ, ភិក្ខវេ, សីលវា កល្យាណធម្មោ បរិសសោភនោ; ភិក្ខុនី, ភិក្ខវេ, សីលវតី កល្យាណធម្មា បរិសសោភនា; ឧបាសកោ, ភិក្ខវេ, សីលវា កល្យាណធម្មោ បរិសសោភនោ; ឧបាសិកា, ភិក្ខវេ, សីលវតី កល្យាណធម្មា បរិសសោភនា. ឥមេ ខោ, ភិក្ខវេ, ចត្តារោ បរិសសោភនា’’តិ. បឋមំ.

២. ទិដ្ឋិសុត្តំ

២១២. ‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ និរយេ. កតមេហិ ចតូហិ? កាយទុច្ចរិតេន, វចីទុច្ចរិតេន, មនោទុច្ចរិតេន, មិច្ឆាទិដ្ឋិយា – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេ.

‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ. កតមេហិ ចតូហិ? កាយសុចរិតេន, វចីសុចរិតេន, មនោសុចរិតេន, សម្មាទិដ្ឋិយា – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ’’តិ. ទុតិយំ.

៣. អកតញ្ញុតាសុត្តំ

២១៣. ‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ និរយេ. កតមេហិ ចតូហិ? កាយទុច្ចរិតេន, វចីទុច្ចរិតេន, មនោទុច្ចរិតេន, អកតញ្ញុតា អកតវេទិតា [អកតញ្ញុតាអកតវេទិតាយ (សី.)] – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេ.

‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ. កតមេហិ ចតូហិ? កាយសុចរិតេន, វចីសុចរិតេន, មនោសុចរិតេន, កតញ្ញុតាកតវេទិតា [កតញ្ញុតាកតវេទិតាយ (សី.)] – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ’’តិ. តតិយំ.

៤. បាណាតិបាតីសុត្តំ

២១៤. …បេ… បាណាតិបាតី ហោតិ, អទិន្នាទាយី ហោតិ, កាមេសុមិច្ឆាចារី ហោតិ, មុសាវាទី ហោតិ…បេ… បាណាតិបាតា បដិវិរតោ ហោតិ, អទិន្នាទានា បដិវិរតោ ហោតិ, កាមេសុមិច្ឆាចារា បដិវិរតោ ហោតិ, មុសាវាទា បដិវិរតោ ហោតិ. ចតុត្ថំ.

៥. បឋមមគ្គសុត្តំ

២១៥. …បេ… មិច្ឆាទិដ្ឋិកោ ហោតិ, មិច្ឆាសង្កប្បោ ហោតិ, មិច្ឆាវាចោ ហោតិ, មិច្ឆាកម្មន្តោ ហោតិ…បេ… សម្មាទិដ្ឋិកោ ហោតិ, សម្មាសង្កប្បោ ហោតិ, សម្មាវាចោ ហោតិ, សម្មាកម្មន្តោ ហោតិ. បញ្ចមំ.

៦. ទុតិយមគ្គសុត្តំ

២១៦. …បេ… មិច្ឆាអាជីវោ ហោតិ, មិច្ឆាវាយាមោ ហោតិ, មិច្ឆាសតិ ហោតិ, មិច្ឆាសមាធិ ហោតិ…បេ… សម្មាអាជីវោ ហោតិ, សម្មាវាយាមោ ហោតិ, សម្មាសតិ ហោតិ, សម្មាសមាធិ ហោតិ. ឆដ្ឋំ.

៧. បឋមវោហារបថសុត្តំ

២១៧. …បេ… អទិដ្ឋេ ទិដ្ឋវាទី ហោតិ, អសុតេ សុតវាទី ហោតិ, អមុតេ មុតវាទី ហោតិ, អវិញ្ញាតេ វិញ្ញាតវាទី ហោតិ…បេ… អទិដ្ឋេ អទិដ្ឋវាទី ហោតិ, អសុតេ អសុតវាទី ហោតិ, អមុតេ អមុតវាទី ហោតិ, អវិញ្ញាតេ អវិញ្ញាតវាទី ហោតិ. សត្តមំ.

៨. ទុតិយវោហារបថសុត្តំ

២១៨. …បេ… ទិដ្ឋេ អទិដ្ឋវាទី ហោតិ, សុតេ អសុតវាទី ហោតិ, មុតេ អមុតវាទី ហោតិ, វិញ្ញាតេ អវិញ្ញាតវាទី ហោតិ…បេ… ទិដ្ឋេ ទិដ្ឋវាទី ហោតិ, សុតេ សុតវាទី ហោតិ, មុតេ មុតវាទី ហោតិ, វិញ្ញាតេ វិញ្ញាតវាទី ហោតិ. អដ្ឋមំ.

៩. អហិរិកសុត្តំ

២១៩. …បេ… អស្សទ្ធោ ហោតិ, ទុស្សីលោ ហោតិ, អហិរិកោ ហោតិ, អនោត្តប្បី ហោតិ…បេ… សទ្ធោ ហោតិ, សីលវា ហោតិ, ហិរិមា ហោតិ, ឱត្តប្បី ហោតិ. នវមំ.

១០. ទុស្សីលសុត្តំ

២២០. ‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ និរយេ. កតមេហិ ចតូហិ? អស្សទ្ធោ ហោតិ, ទុស្សីលោ ហោតិ, កុសីតោ ហោតិ, ទុប្បញ្ញោ ហោតិ – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ និរយេ.

‘‘ចតូហិ, ភិក្ខវេ, ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ. កតមេហិ ចតូហិ? សទ្ធោ ហោតិ, សីលវា ហោតិ, អារទ្ធវីរិយោ ហោតិ, បញ្ញវា ហោតិ – ឥមេហិ ខោ, ភិក្ខវេ, ចតូហិ ធម្មេហិ សមន្នាគតោ យថាភតំ និក្ខិត្តោ ឯវំ សគ្គេ’’តិ. ទសមំ.

បរិសាវគ្គោ [សោភនវគ្គោ (សី. ស្យា. កំ. បី.)] ទុតិយោ.