៩. បព្ពតរាជសុត្តំ

៤៩. ‘‘ហិមវន្តំ, ភិក្ខវេ, បព្ពតរាជំ និស្សាយ មហាសាលា តីហិ វឌ្ឍីហិ វឌ្ឍន្តិ. កតមាហិ តីហិ? សាខាបត្តបលាសេន វឌ្ឍន្តិ, តចបបដិកាយ វឌ្ឍន្តិ, ផេគ្គុសារេន វឌ្ឍន្តិ. ហិមវន្តំ, ភិក្ខវេ, បព្ពតរាជំ និស្សាយ មហាសាលា ឥមាហិ តីហិ វឌ្ឍីហិ វឌ្ឍន្តិ.

‘‘ឯវមេវំ ខោ, ភិក្ខវេ, សទ្ធំ កុលបតិំ និស្សាយ អន្តោ ជនោ តីហិ វឌ្ឍីហិ វឌ្ឍតិ. កតមាហិ តីហិ? សទ្ធាយ វឌ្ឍតិ, សីលេន វឌ្ឍតិ, បញ្ញាយ វឌ្ឍតិ. សទ្ធំ, ភិក្ខវេ, កុលបតិំ និស្សាយ អន្តោ ជនោ ឥមាហិ តីហិ វឌ្ឍីហិ វឌ្ឍតី’’តិ.

‘‘យថាបិ បព្ពតោ សេលោ, អរញ្ញស្មិំ ព្រហាវនេ;

តំ រុក្ខា ឧបនិស្សាយ, វឌ្ឍន្តេ តេ វនប្បតី.

‘‘តថេវ សីលសម្បន្នំ, សទ្ធំ កុលបតិំ ឥធ;

ឧបនិស្សាយ វឌ្ឍន្តិ, បុត្តទារា ច ពន្ធវា;

អមច្ចា ញាតិសង្ឃា ច, យេ ចស្ស អនុជីវិនោ.

‘‘ត្យាស្ស សីលវតោ សីលំ, ចាគំ សុចរិតានិ ច;

បស្សមានានុកុព្ពន្តិ, អត្តមត្ថំ [យេ ភវន្តិ (សី. ស្យា. កំ. បី.)] វិចក្ខណា.

‘‘ឥធ ធម្មំ ចរិត្វាន, មគ្គំ សុគតិគាមិនំ;

នន្ទិនោ ទេវលោកស្មិំ, មោទន្តិ កាមកាមិនោ’’តិ. នវមំ;