២. ទុតិយបណ្ណាសកំ

(៦) ១. បុគ្គលវគ្គោ

៥៣. ‘‘ទ្វេមេ, ភិក្ខវេ, បុគ្គលា លោកេ ឧប្បជ្ជមានា ឧប្បជ្ជន្តិ ពហុជនហិតាយ ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. កតមេ ទ្វេ? តថាគតោ ច អរហំ សម្មាសម្ពុទ្ធោ, រាជា ច ចក្កវត្តី. ឥមេ ខោ, ភិក្ខវេ, ទ្វេ បុគ្គលា លោកេ ឧប្បជ្ជមានា ឧប្បជ្ជន្តិ ពហុជនហិតាយ ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សាន’’ន្តិ.

៥៤. ‘‘ទ្វេមេ, ភិក្ខវេ, បុគ្គលា លោកេ ឧប្បជ្ជមានា ឧប្បជ្ជន្តិ អច្ឆរិយមនុស្សា. កតមេ ទ្វេ? តថាគតោ ច អរហំ សម្មាសម្ពុទ្ធោ, រាជា ច ចក្កវត្តី. ឥមេ ខោ, ភិក្ខវេ, ទ្វេ បុគ្គលា លោកេ ឧប្បជ្ជមានា ឧប្បជ្ជន្តិ អច្ឆរិយមនុស្សា’’តិ.

៥៥. ‘‘ទ្វិន្នំ, ភិក្ខវេ, បុគ្គលានំ កាលកិរិយា ពហុនោ ជនស្ស អនុតប្បា ហោតិ. កតមេសំ ទ្វិន្នំ? តថាគតស្ស ច អរហតោ សម្មាសម្ពុទ្ធស្ស, រញ្ញោ ច ចក្កវត្តិស្ស. ឥមេសំ ខោ, ភិក្ខវេ, ទ្វិន្នំ បុគ្គលានំ កាលកិរិយា ពហុនោ ជនស្ស អនុតប្បា ហោតី’’តិ.

៥៦. ‘‘ទ្វេមេ, ភិក្ខវេ, ថូបារហា. កតមេ ទ្វេ? តថាគតោ ច អរហំ សម្មាសម្ពុទ្ធោ, រាជា ច ចក្កវត្តី. ឥមេ ខោ, ភិក្ខវេ, ទ្វេ ថូបារហា’’តិ.

៥៧. ‘‘ទ្វេមេ, ភិក្ខវេ, ពុទ្ធា. កតមេ ទ្វេ? តថាគតោ ច អរហំ សម្មាសម្ពុទ្ធោ, បច្ចេកពុទ្ធោ ច. ឥមេ ខោ, ភិក្ខវេ, ទ្វេ ពុទ្ធា’’តិ.

៥៨. ‘‘ទ្វេមេ, ភិក្ខវេ, អសនិយា ផលន្តិយា ន សន្តសន្តិ. កតមេ ទ្វេ? ភិក្ខុ ច ខីណាសវោ, ហត្ថាជានីយោ ច. ឥមេ ខោ, ភិក្ខវេ, ទ្វេ អសនិយា ផលន្តិយា ន សន្តសន្តី’’តិ.

៥៩. ‘‘ទ្វេមេ, ភិក្ខវេ, អសនិយា ផលន្តិយា ន សន្តសន្តិ. កតមេ ទ្វេ? ភិក្ខុ ច ខីណាសវោ, អស្សាជានីយោ ច. ឥមេ ខោ, ភិក្ខវេ, ទ្វេ អសនិយា ផលន្តិយា ន សន្តសន្តី’’តិ.

៦០. ‘‘ទ្វេមេ, ភិក្ខវេ, អសនិយា ផលន្តិយា ន សន្តសន្តិ. កតមេ ទ្វេ? ភិក្ខុ ច ខីណាសវោ, សីហោ ច មិគរាជា. ឥមេ ខោ, ភិក្ខវេ, ទ្វេ អសនិយា ផលន្តិយា ន សន្តសន្តី’’តិ.

៦១. ‘‘ទ្វេមេ, ភិក្ខវេ, អត្ថវសេ សម្បស្សមានា កិំបុរិសា មានុសិំ វាចំ ន ភាសន្តិ. កតមេ ទ្វេ? មា ច មុសា ភណិម្ហា, មា ច បរំ អភូតេន អព្ភាចិក្ខិម្ហាតិ. ឥមេ ខោ, ភិក្ខវេ, ទ្វេ អត្ថវសេ សម្បស្សមានា កិំបុរិសា មានុសិំ វាចំ ន ភាសន្តី’’តិ.

៦២. ‘‘ទ្វិន្នំ ធម្មានំ, ភិក្ខវេ, អតិត្តោ អប្បដិវានោ មាតុគាមោ កាលំ ករោតិ. កតមេសំ ទ្វិន្នំ? មេថុនសមាបត្តិយា ច វិជាយនស្ស ច. ឥមេសំ ខោ, ភិក្ខវេ, ទ្វិន្នំ ធម្មានំ អតិត្តោ អប្បដិវានោ មាតុគាមោ កាលំ ករោតី’’តិ.

៦៣. ‘‘អសន្តសន្និវាសញ្ច វោ, ភិក្ខវេ, ទេសេស្សាមិ សន្តសន្និវាសញ្ច. តំ សុណាថ, សាធុកំ មនសិ ករោថ; ភាសិស្សាមី’’តិ. ‘‘ឯវំ, ភន្តេ’’តិ ខោ តេ ភិក្ខូ ភគវតោ បច្ចស្សោសុំ. ភគវា ឯតទវោច –

‘‘កថញ្ច, ភិក្ខវេ, អសន្តសន្និវាសោ ហោតិ, កថញ្ច អសន្តោ សន្និវសន្តិ? ឥធ, ភិក្ខវេ, ថេរស្ស ភិក្ខុនោ ឯវំ ហោតិ – ‘ថេរោបិ មំ ន វទេយ្យ, មជ្ឈិមោបិ មំ ន វទេយ្យ, នវោបិ មំ ន វទេយ្យ; ថេរម្បាហំ ន វទេយ្យំ, មជ្ឈិមម្បាហំ ន វទេយ្យំ, នវម្បាហំ ន វទេយ្យំ. ថេរោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី, នោតិ នំ វទេយ្យំ វិហេឋេយ្យំ [វិហេសេយ្យំ (សី. ស្យា. កំ. បី.)] បស្សម្បិស្ស នប្បដិករេយ្យំ. មជ្ឈិមោ ចេបិ មំ វទេយ្យ…បេ… នវោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី, នោតិ នំ វទេយ្យំ វិហេឋេយ្យំ បស្សម្បិស្ស នប្បដិករេយ្យំ’. មជ្ឈិមស្សបិ ភិក្ខុនោ ឯវំ ហោតិ…បេ… នវស្សបិ ភិក្ខុនោ ឯវំ ហោតិ – ‘ថេរោបិ មំ ន វទេយ្យ, មជ្ឈិមោបិ មំ ន វទេយ្យ, នវោបិ មំ ន វទេយ្យ; ថេរម្បាហំ ន វទេយ្យំ, មជ្ឈិមម្បាហំ ន វទេយ្យំ, នវម្បាហំ ន វទេយ្យំ. ថេរោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី នោតិ នំ វទេយ្យំ វិហេឋេយ្យំ បស្សម្បិស្ស នប្បដិករេយ្យំ. មជ្ឈិមោ ចេបិ មំ វទេយ្យ…បេ… នវោ ចេបិ មំ វទេយ្យ អហិតានុកម្បី មំ វទេយ្យ នោ ហិតានុកម្បី, នោតិ នំ វទេយ្យំ វិហេឋេយ្យំ បស្សម្បិស្ស នប្បដិករេយ្យំ’. ឯវំ ខោ, ភិក្ខវេ, អសន្តសន្និវាសោ ហោតិ, ឯវញ្ច អសន្តោ សន្និវសន្តិ.

‘‘កថញ្ច, ភិក្ខវេ, សន្តសន្និវាសោ ហោតិ, កថញ្ច សន្តោ សន្និវសន្តិ? ឥធ, ភិក្ខវេ, ថេរស្ស ភិក្ខុនោ ឯវំ ហោតិ – ‘ថេរោបិ មំ វទេយ្យ, មជ្ឈិមោបិ មំ វទេយ្យ, នវោបិ មំ វទេយ្យ; ថេរម្បាហំ វទេយ្យំ, មជ្ឈិមម្បាហំ វទេយ្យំ, នវម្បាហំ វទេយ្យំ. ថេរោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី, សាធូតិ នំ វទេយ្យំ ន វិហេឋេយ្យំ បស្សម្បិស្ស បដិករេយ្យំ. មជ្ឈិមោ ចេបិ មំ វទេយ្យ…បេ… នវោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី, សាធូតិ នំ វទេយ្យំ ន នំ វិហេឋេយ្យំ បស្សម្បិស្ស បដិករេយ្យំ’. មជ្ឈិមស្សបិ ភិក្ខុនោ ឯវំ ហោតិ…បេ… នវស្សបិ ភិក្ខុនោ ឯវំ ហោតិ – ‘ថេរោបិ មំ វទេយ្យ, មជ្ឈិមោបិ មំ វទេយ្យ, នវោបិ មំ វទេយ្យ; ថេរម្បាហំ វទេយ្យំ, មជ្ឈិមម្បាហំ វទេយ្យំ, នវម្បាហំ វទេយ្យំ. ថេរោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី, សាធូតិ នំ វទេយ្យំ ន នំ វិហេឋេយ្យំ បស្សម្បិស្ស បដិករេយ្យំ. មជ្ឈិមោ ចេបិ មំ វទេយ្យ…បេ… នវោ ចេបិ មំ វទេយ្យ ហិតានុកម្បី មំ វទេយ្យ នោ អហិតានុកម្បី, សាធូតិ នំ វទេយ្យំ ន នំ វិហេឋេយ្យំ បស្សម្បិស្ស បដិករេយ្យំ’. ឯវំ ខោ, ភិក្ខវេ, សន្តសន្និវាសោ ហោតិ, ឯវញ្ច សន្តោ សន្និវសន្តី’’តិ.

៦៤. ‘‘យស្មិំ, ភិក្ខវេ, អធិករណេ ឧភតោ វចីសំសារោ ទិដ្ឋិបឡាសោ ចេតសោ អាឃាតោ អប្បច្ចយោ អនភិរទ្ធិ អជ្ឈត្តំ អវូបសន្តំ ហោតិ, តស្មេតំ, ភិក្ខវេ, អធិករណេ បាដិកង្ខំ – ‘ទីឃត្តាយ ខរត្តាយ វាឡត្តាយ សំវត្តិស្សតិ, ភិក្ខូ ច ន ផាសុំ [ផាសុ (ក.)] វិហរិស្សន្តិ’. យស្មិញ្ច ខោ, ភិក្ខវេ, អធិករណេ ឧភតោ វចីសំសារោ ទិដ្ឋិបឡាសោ ចេតសោ អាឃាតោ អប្បច្ចយោ អនភិរទ្ធិ អជ្ឈត្តំ សុវូបសន្តំ ហោតិ, តស្មេតំ, ភិក្ខវេ, អធិករណេ បាដិកង្ខំ – ‘ន ទីឃត្តាយ ខរត្តាយ វាឡត្តាយ សំវត្តិស្សតិ, ភិក្ខូ ច ផាសុំ វិហរិស្សន្តី’’’តិ.

បុគ្គលវគ្គោ បឋមោ.

(៧) ២. សុខវគ្គោ

៦៥. ‘‘ទ្វេមានិ, ភិក្ខវេ, សុខានិ. កតមានិ ទ្វេ? គិហិសុខញ្ច បព្ពជិតសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ បព្ពជិតសុខ’’ន្តិ.

៦៦. ‘‘ទ្វេមានិ, ភិក្ខវេ, សុខានិ. កតមានិ ទ្វេ? កាមសុខញ្ច នេក្ខម្មសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ នេក្ខម្មសុខ’’ន្តិ.

៦៧. ‘‘ទ្វេមានិ, ភិក្ខវេ, សុខានិ. កតមានិ ទ្វេ? ឧបធិសុខញ្ច និរុបធិសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ និរុបធិសុខ’’ន្តិ.

៦៨. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សាសវសុខញ្ច អនាសវសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ អនាសវសុខ’’ន្តិ.

៦៩. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សាមិសញ្ច សុខំ និរាមិសញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ និរាមិសំ សុខ’’ន្តិ.

៧០. ‘‘ទ្វេមានិ, ភិក្ខវេ, សុខានិ. កតមានិ ទ្វេ? អរិយសុខញ្ច អនរិយសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ អរិយសុខ’’ន្តិ.

៧១. ‘‘ទ្វេមានិ, ភិក្ខវេ, សុខានិ. កតមានិ ទ្វេ? កាយិកញ្ច សុខំ ចេតសិកញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ ចេតសិកំ សុខ’’ន្តិ.

៧២. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សប្បីតិកញ្ច សុខំ និប្បីតិកញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ និប្បីតិកំ សុខ’’ន្តិ.

៧៣. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សាតសុខញ្ច ឧបេក្ខាសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ ឧបេក្ខាសុខ’’ន្តិ.

៧៤. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សមាធិសុខញ្ច អសមាធិសុខញ្ច. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ សមាធិសុខ’’ន្តិ.

៧៥. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សប្បីតិការម្មណញ្ច សុខំ និប្បីតិការម្មណញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ និប្បីតិការម្មណំ សុខ’’ន្តិ.

៧៦. ‘‘ទ្វេមានិ, ភិក្ខវេ, សុខានិ. កតមានិ ទ្វេ? សាតារម្មណញ្ច សុខំ ឧបេក្ខារម្មណញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ ឧបេក្ខារម្មណំ សុខ’’ន្តិ.

៧៧. ‘‘ទ្វេមានិ, ភិក្ខវេ, សុខានិ. កតមានិ ទ្វេ? រូបារម្មណញ្ច សុខំ អរូបារម្មណញ្ច សុខំ. ឥមានិ ខោ, ភិក្ខវេ, ទ្វេ សុខានិ. ឯតទគ្គំ, ភិក្ខវេ, ឥមេសំ ទ្វិន្នំ សុខានំ យទិទំ អរូបារម្មណំ សុខ’’ន្តិ.

សុខវគ្គោ ទុតិយោ.

(៨) ៣. សនិមិត្តវគ្គោ

៧៨. ‘‘សនិមិត្តា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អនិមិត្តា. តស្សេវ និមិត្តស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៧៩. ‘‘សនិទានា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អនិទានា. តស្សេវ និទានស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៨០. ‘‘សហេតុកា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អហេតុកា. តស្សេវ ហេតុស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៨១. ‘‘សសង្ខារា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អសង្ខារា. តេសំយេវ សង្ខារានំ បហានា ឯវំ តេ បាបកា អកុសលា ធម្មា ន ហោន្តី’’តិ.

៨២. ‘‘សប្បច្ចយា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អប្បច្ចយា. តស្សេវ បច្ចយស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៨៣. ‘‘សរូបា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អរូបា. តស្សេវ រូបស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៨៤. ‘‘សវេទនា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អវេទនា. តស្សាយេវ វេទនាយ បហានា ឯវំ តេ បាបកា អកុសលា ធម្មា ន ហោន្តី’’តិ.

៨៥. ‘‘សសញ្ញា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អសញ្ញា. តស្សាយេវ សញ្ញាយ បហានា ឯវំ តេ បាបកា អកុសលា ធម្មា ន ហោន្តី’’តិ.

៨៦. ‘‘សវិញ្ញាណា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អវិញ្ញាណា. តស្សេវ វិញ្ញាណស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

៨៧. ‘‘សង្ខតារម្មណា, ភិក្ខវេ, ឧប្បជ្ជន្តិ បាបកា អកុសលា ធម្មា, នោ អសង្ខតារម្មណា. តស្សេវ សង្ខតស្ស បហានា ឯវំ តេ បាបកា អកុសលា ធម្មា ន ហោន្តី’’តិ.

សនិមិត្តវគ្គោ តតិយោ.

(៩) ៤. ធម្មវគ្គោ

៨៨. ‘‘ទ្វេមេ, ភិក្ខវេ, ធម្មា. កតមេ ទ្វេ? ចេតោវិមុត្តិ ច បញ្ញាវិមុត្តិ ច. ឥមេ ខោ, ភិក្ខវេ, ទ្វេ ធម្មា’’តិ.

៨៩. ‘‘ទ្វេមេ, ភិក្ខវេ, ធម្មា. កតមេ ទ្វេ? បគ្គាហោ ច អវិក្ខេបោ ច. ឥមេ ខោ, ភិក្ខវេ, ទ្វេ ធម្មា’’តិ.

៩០. ‘‘ទ្វេមេ, ភិក្ខវេ, ធម្មា. កតមេ ទ្វេ? នាមញ្ច រូបញ្ច. ឥមេ ខោ, ភិក្ខវេ, ទ្វេ ធម្មា’’តិ.

៩១. ‘‘ទ្វេមេ, ភិក្ខវេ, ធម្មា. កតមេ ទ្វេ? វិជ្ជា ច វិមុត្តិ ច. ឥមេ ខោ, ភិក្ខវេ, ទ្វេ ធម្មា’’តិ.

៩២. ‘‘ទ្វេមេ, ភិក្ខវេ, ធម្មា. កតមេ ទ្វេ? ភវទិដ្ឋិ ច វិភវទិដ្ឋិ ច. ឥមេ ខោ, ភិក្ខវេ, ទ្វេ ធម្មា’’តិ.

៩៣. ‘‘ទ្វេមេ, ភិក្ខវេ, ធម្មា. កតមេ ទ្វេ? អហិរិកញ្ច អនោត្តប្បញ្ច. ឥមេ ខោ, ភិក្ខវេ, ទ្វេ ធម្មា’’តិ.

៩៤. ‘‘ទ្វេមេ, ភិក្ខវេ, ធម្មា. កតមេ ទ្វេ? ហិរី ច ឱត្តប្បញ្ច. ឥមេ ខោ, ភិក្ខវេ, ទ្វេ ធម្មា’’តិ.

៩៥. ‘‘ទ្វេមេ, ភិក្ខវេ, ធម្មា. កតមេ ទ្វេ? ទោវចស្សតា ច បាបមិត្តតា ច. ឥមេ ខោ, ភិក្ខវេ, ទ្វេ ធម្មា’’តិ.

៩៦. ‘‘ទ្វេមេ, ភិក្ខវេ, ធម្មា. កតមេ ទ្វេ? សោវចស្សតា ច កល្យាណមិត្តតា ច. ឥមេ ខោ, ភិក្ខវេ, ទ្វេ ធម្មា’’តិ.

៩៧. ‘‘ទ្វេមេ, ភិក្ខវេ, ធម្មា. កតមេ ទ្វេ? ធាតុកុសលតា ច មនសិការកុសលតា ច. ឥមេ ខោ, ភិក្ខវេ, ទ្វេ ធម្មា’’តិ.

៩៨. ‘‘ទ្វេមេ, ភិក្ខវេ, ធម្មា. កតមេ ទ្វេ? អាបត្តិកុសលតា ច អាបត្តិវុដ្ឋានកុសលតា ច. ឥមេ ខោ, ភិក្ខវេ, ទ្វេ ធម្មា’’តិ.

ធម្មវគ្គោ ចតុត្ថោ.

(១០) ៥. ពាលវគ្គោ

៩៩. ‘‘ទ្វេមេ, ភិក្ខវេ, ពាលា. កតមេ ទ្វេ? យោ ច អនាគតំ ភារំ វហតិ, យោ ច អាគតំ ភារំ ន វហតិ. ឥមេ ខោ, ភិក្ខវេ, ទ្វេ ពាលា’’តិ.

១០០. ‘‘ទ្វេមេ, ភិក្ខវេ, បណ្ឌិតា. កតមេ ទ្វេ? យោ ច អនាគតំ ភារំ ន វហតិ, យោ ច អាគតំ ភារំ វហតិ. ឥមេ ខោ, ភិក្ខវេ, ទ្វេ បណ្ឌិតា’’តិ.

១០១. ‘‘ទ្វេមេ, ភិក្ខវេ, ពាលា. កតមេ ទ្វេ? យោ ច អកប្បិយេ កប្បិយសញ្ញី, យោ ច កប្បិយេ អកប្បិយសញ្ញី. ឥមេ ខោ, ភិក្ខវេ, ទ្វេ ពាលា’’តិ.

១០២. ‘‘ទ្វេមេ, ភិក្ខវេ, បណ្ឌិតា. កតមេ ទ្វេ? យោ ច អកប្បិយេ អកប្បិយសញ្ញី, យោ ច កប្បិយេ កប្បិយសញ្ញី. ឥមេ ខោ, ភិក្ខវេ, ទ្វេ បណ្ឌិតា’’តិ.

១០៣. ‘‘ទ្វេមេ, ភិក្ខវេ, ពាលា. កតមេ ទ្វេ? យោ ច អនាបត្តិយា អាបត្តិសញ្ញី, យោ ច អាបត្តិយា អនាបត្តិសញ្ញី. ឥមេ ខោ, ភិក្ខវេ, ទ្វេ ពាលា’’តិ.

១០៤. ‘‘ទ្វេមេ, ភិក្ខវេ, បណ្ឌិតា. កតមេ ទ្វេ? យោ ច អនាបត្តិយា អនាបត្តិសញ្ញី, យោ ច អាបត្តិយា អាបត្តិសញ្ញី. ឥមេ ខោ, ភិក្ខវេ, ទ្វេ បណ្ឌិតា’’តិ.

១០៥. ‘‘ទ្វេមេ, ភិក្ខវេ, ពាលា. កតមេ ទ្វេ? យោ ច អធម្មេ ធម្មសញ្ញី, យោ ច ធម្មេ អធម្មសញ្ញី. ឥមេ ខោ, ភិក្ខវេ, ទ្វេ ពាលា’’តិ.

១០៦. ‘‘ទ្វេមេ, ភិក្ខវេ, បណ្ឌិតា. កតមេ ទ្វេ? យោ ច ធម្មេ ធម្មសញ្ញី, យោ ច អធម្មេ អធម្មសញ្ញី. ឥមេ ខោ, ភិក្ខវេ, ទ្វេ បណ្ឌិតា’’តិ.

១០៧. ‘‘ទ្វេមេ, ភិក្ខវេ, ពាលា. កតមេ ទ្វេ? យោ ច អវិនយេ វិនយសញ្ញី, យោ ច វិនយេ អវិនយសញ្ញី. ឥមេ ខោ, ភិក្ខវេ, ទ្វេ ពាលា’’តិ.

១០៨. ‘‘ទ្វេមេ, ភិក្ខវេ, បណ្ឌិតា. កតមេ ទ្វេ? យោ ច អវិនយេ អវិនយសញ្ញី, យោ ច វិនយេ វិនយសញ្ញី. ឥមេ ខោ, ភិក្ខវេ, ទ្វេ បណ្ឌិតា’’តិ.

១០៩. ‘‘ទ្វិន្នំ, ភិក្ខវេ, អាសវា វឌ្ឍន្តិ. កតមេសំ ទ្វិន្នំ? យោ ច ន កុក្កុច្ចាយិតព្ពំ កុក្កុច្ចាយតិ, យោ ច កុក្កុច្ចាយិតព្ពំ ន កុក្កុច្ចាយតិ. ឥមេសំ ខោ, ភិក្ខវេ, ទ្វិន្នំ អាសវា វឌ្ឍន្តី’’តិ.

១១០. ‘‘ទ្វិន្នំ, ភិក្ខវេ, អាសវា ន វឌ្ឍន្តិ. កតមេសំ ទ្វិន្នំ? យោ ច ន កុក្កុច្ចាយិតព្ពំ ន កុក្កុច្ចាយតិ, យោ ច កុក្កុច្ចាយិតព្ពំ កុក្កុច្ចាយតិ. ឥមេសំ ខោ, ភិក្ខវេ, ទ្វិន្នំ អាសវា ន វឌ្ឍន្តី’’តិ.

១១១. ‘‘ទ្វិន្នំ, ភិក្ខវេ, អាសវា វឌ្ឍន្តិ. កតមេសំ ទ្វិន្នំ? យោ ច អកប្បិយេ កប្បិយសញ្ញី, យោ ច កប្បិយេ អកប្បិយសញ្ញី. ឥមេសំ ខោ, ភិក្ខវេ, ទ្វិន្នំ អាសវា វឌ្ឍន្តី’’តិ.

១១២. ‘‘ទ្វិន្នំ, ភិក្ខវេ, អាសវា ន វឌ្ឍន្តិ. កតមេសំ ទ្វិន្នំ? យោ ច អកប្បិយេ អកប្បិយសញ្ញី, យោ ច កប្បិយេ កប្បិយសញ្ញី. ឥមេសំ ខោ, ភិក្ខវេ, ទ្វិន្នំ អាសវា ន វឌ្ឍន្តី’’តិ.

១១៣. ‘‘ទ្វិន្នំ, ភិក្ខវេ, អាសវា វឌ្ឍន្តិ. កតមេសំ ទ្វិន្នំ? យោ ច អាបត្តិយា អនាបត្តិសញ្ញី, យោ ច អនាបត្តិយា អាបត្តិសញ្ញី. ឥមេសំ ខោ, ភិក្ខវេ, ទ្វិន្នំ អាសវា វឌ្ឍន្តី’’តិ.

១១៤. ‘‘ទ្វិន្នំ, ភិក្ខវេ, អាសវា ន វឌ្ឍន្តិ. កតមេសំ ទ្វិន្នំ? យោ ច អាបត្តិយា អាបត្តិសញ្ញី, យោ ច អនាបត្តិយា អនាបត្តិសញ្ញី. ឥមេសំ ខោ, ភិក្ខវេ, ទ្វិន្នំ អាសវា ន វឌ្ឍន្តី’’តិ.

១១៥. ‘‘ទ្វិន្នំ, ភិក្ខវេ, អាសវា វឌ្ឍន្តិ. កតមេសំ ទ្វិន្នំ? យោ ច អធម្មេ ធម្មសញ្ញី, យោ ច ធម្មេ អធម្មសញ្ញី. ឥមេសំ ខោ, ភិក្ខវេ, ទ្វិន្នំ អាសវា វឌ្ឍន្តី’’តិ.

១១៦. ‘‘ទ្វិន្នំ, ភិក្ខវេ, អាសវា ន វឌ្ឍន្តិ. កតមេសំ ទ្វិន្នំ? យោ ច ធម្មេ ធម្មសញ្ញី, យោ ច អធម្មេ អធម្មសញ្ញី. ឥមេសំ ខោ, ភិក្ខវេ, ទ្វិន្នំ អាសវា ន វឌ្ឍន្តី’’តិ.

១១៧. ‘‘ទ្វិន្នំ, ភិក្ខវេ, អាសវា វឌ្ឍន្តិ. កតមេសំ ទ្វិន្នំ? យោ ច អវិនយេ វិនយសញ្ញី, យោ ច វិនយេ អវិនយសញ្ញី. ឥមេសំ ខោ, ភិក្ខវេ, ទ្វិន្នំ អាសវា វឌ្ឍន្តី’’តិ.

១១៨. ‘‘ទ្វិន្នំ, ភិក្ខវេ, អាសវា ន វឌ្ឍន្តិ. កតមេសំ ទ្វិន្នំ? យោ ច អវិនយេ អវិនយសញ្ញី, យោ ច វិនយេ វិនយសញ្ញី. ឥមេសំ ខោ, ភិក្ខវេ, ទ្វិន្នំ អាសវា ន វឌ្ឍន្តី’’តិ.

ពាលវគ្គោ បញ្ចមោ.

ទុតិយោ បណ្ណាសកោ សមត្តោ.