៣. តតិយបណ្ណាសកំ

(១១) ១. អាសាទុប្បជហវគ្គោ

១១៩. ‘‘ទ្វេមា, ភិក្ខវេ, អាសា ទុប្បជហា. កតមា ទ្វេ? លាភាសា ច ជីវិតាសា ច. ឥមា ខោ, ភិក្ខវេ, ទ្វេ អាសា ទុប្បជហា’’តិ.

១២០. ‘‘ទ្វេមេ, ភិក្ខវេ, បុគ្គលា ទុល្លភា លោកស្មិំ. កតមេ ទ្វេ? យោ ច បុព្ពការី, យោ ច កតញ្ញូ កតវេទី. ឥមេ ខោ, ភិក្ខវេ, ទ្វេ បុគ្គលា ទុល្លភា លោកស្មិ’’ន្តិ.

១២១. ‘‘ទ្វេមេ, ភិក្ខវេ, បុគ្គលា ទុល្លភា លោកស្មិំ. កតមេ ទ្វេ? តិត្តោ ច តប្បេតា ច. ឥមេ ខោ, ភិក្ខវេ, ទ្វេ បុគ្គលា ទុល្លភា លោកស្មិ’’ន្តិ.

១២២. ‘‘ទ្វេមេ, ភិក្ខវេ, បុគ្គលា ទុត្តប្បយា. កតមេ ទ្វេ? យោ ច លទ្ធំ លទ្ធំ និក្ខិបតិ, យោ ច លទ្ធំ លទ្ធំ វិស្សជ្ជេតិ. ឥមេ ខោ, ភិក្ខវេ, ទ្វេ បុគ្គលា ទុត្តប្បយា’’តិ.

១២៣. ‘‘ទ្វេមេ, ភិក្ខវេ, បុគ្គលា សុតប្បយា. កតមេ ទ្វេ? យោ ច លទ្ធំ លទ្ធំ ន និក្ខិបតិ, យោ ច លទ្ធំ លទ្ធំ ន វិស្សជ្ជេតិ. ឥមេ ខោ, ភិក្ខវេ, ទ្វេ បុគ្គលា សុតប្បយា’’តិ.

១២៤. ‘‘ទ្វេមេ, ភិក្ខវេ, បច្ចយា រាគស្ស ឧប្បាទាយ. កតមេ ទ្វេ? សុភនិមិត្តញ្ច អយោនិសោ ច មនសិការោ. ឥមេ ខោ, ភិក្ខវេ, ទ្វេ បច្ចយា រាគស្ស ឧប្បាទាយា’’តិ.

១២៥. ‘‘ទ្វេមេ, ភិក្ខវេ, បច្ចយា ទោសស្ស ឧប្បាទាយ. កតមេ ទ្វេ? បដិឃនិមិត្តញ្ច អយោនិសោ ច មនសិការោ. ឥមេ ខោ, ភិក្ខវេ, ទ្វេ បច្ចយា ទោសស្ស ឧប្បាទាយា’’តិ.

១២៦. ‘‘ទ្វេមេ, ភិក្ខវេ, បច្ចយា មិច្ឆាទិដ្ឋិយា ឧប្បាទាយ. កតមេ ទ្វេ? បរតោ ច ឃោសោ អយោនិសោ ច មនសិការោ. ឥមេ ខោ, ភិក្ខវេ, ទ្វេ បច្ចយា មិច្ឆាទិដ្ឋិយា ឧប្បាទាយា’’តិ.

១២៧. ‘‘ទ្វេមេ, ភិក្ខវេ, បច្ចយា សម្មាទិដ្ឋិយា ឧប្បាទាយ. កតមេ ទ្វេ? បរតោ ច ឃោសោ, យោនិសោ ច មនសិការោ. ឥមេ ខោ, ភិក្ខវេ, ទ្វេ បច្ចយា សម្មាទិដ្ឋិយា ឧប្បាទាយា’’តិ.

១២៨. ‘‘ទ្វេមា, ភិក្ខវេ, អាបត្តិយោ. កតមា ទ្វេ? លហុកា ច អាបត្តិ, គរុកា ច អាបត្តិ. ឥមា ខោ, ភិក្ខវេ, ទ្វេ អាបត្តិយោ’’តិ.

១២៩. ‘‘ទ្វេមា, ភិក្ខវេ, អាបត្តិយោ. កតមា ទ្វេ? ទុដ្ឋុល្លា ច អាបត្តិ, អទុដ្ឋុល្លា ច អាបត្តិ. ឥមា ខោ, ភិក្ខវេ, ទ្វេ អាបត្តិយោ’’តិ.

១៣០. ‘‘ទ្វេមា, ភិក្ខវេ, អាបត្តិយោ. កតមា ទ្វេ? សាវសេសា ច អាបត្តិ, អនវសេសា ច អាបត្តិ. ឥមា ខោ, ភិក្ខវេ, ទ្វេ អាបត្តិយោ’’តិ.

អាសាទុប្បជហវគ្គោ បឋមោ.

(១២) ២. អាយាចនវគ្គោ

១៣១. ‘‘សទ្ធោ, ភិក្ខវេ, ភិក្ខុ ឯវំ សម្មា អាយាចមានោ អាយាចេយ្យ – ‘តាទិសោ ហោមិ យាទិសា សារិបុត្តមោគ្គល្លានា’តិ. ឯសា, ភិក្ខវេ, តុលា ឯតំ បមាណំ មម សាវកានំ ភិក្ខូនំ យទិទំ សារិបុត្តមោគ្គល្លានា’’តិ.

១៣២. ‘‘សទ្ធា, ភិក្ខវេ, ភិក្ខុនី ឯវំ សម្មា អាយាចមានា អាយាចេយ្យ – ‘តាទិសី ហោមិ យាទិសី ខេមា ច ភិក្ខុនី ឧប្បលវណ្ណា ចា’តិ. ឯសា, ភិក្ខវេ, តុលា ឯតំ បមាណំ មម សាវិកានំ ភិក្ខុនីនំ យទិទំ ខេមា ច ភិក្ខុនី ឧប្បលវណ្ណា ចា’’តិ.

១៣៣. ‘‘សទ្ធោ, ភិក្ខវេ, ឧបាសកោ ឯវំ សម្មា អាយាចមានោ អាយាចេយ្យ – ‘តាទិសោ ហោមិ យាទិសោ ចិត្តោ ច គហបតិ ហត្ថកោ ច អាឡវកោ’តិ. ឯសា, ភិក្ខវេ, តុលា ឯតំ បមាណំ មម សាវកានំ ឧបាសកានំ យទិទំ ចិត្តោ ច គហបតិ ហត្ថកោ ច អាឡវកោ’’តិ.

១៣៤. ‘‘សទ្ធា, ភិក្ខវេ, ឧបាសិកា ឯវំ សម្មា អាយាចមានា អាយាចេយ្យ – ‘តាទិសី ហោមិ យាទិសី ខុជ្ជុត្តរា ច ឧបាសិកា វេឡុកណ្ឌកិយា [វេឡុកណ្ឌកី (អ. និ. ៦.៣៧; អ. និ. ៤.១៧៦ អាគតំ] ច នន្ទមាតា’តិ. ឯសា, ភិក្ខវេ, តុលា ឯតំ បមាណំ មម សាវិកានំ ឧបាសិកានំ យទិទំ ខុជ្ជុត្តរា ច ឧបាសិកា វេឡុកណ្ឌកិយា ច នន្ទមាតា’’តិ.

១៣៥. ‘‘ទ្វីហិ, ភិក្ខវេ, ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ. កតមេហិ ទ្វីហិ? អននុវិច្ច អបរិយោគាហេត្វា អវណ្ណារហស្ស វណ្ណំ ភាសតិ, អននុវិច្ច អបរិយោគាហេត្វា វណ្ណារហស្ស អវណ្ណំ ភាសតិ. ឥមេហិ ខោ, ភិក្ខវេ, ទ្វីហិ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតីតិ.

‘‘ទ្វីហិ, ភិក្ខវេ, ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតិ. កតមេហិ ទ្វីហិ? អនុវិច្ច បរិយោគាហេត្វា អវណ្ណារហស្ស អវណ្ណំ ភាសតិ, អនុវិច្ច បរិយោគាហេត្វា វណ្ណារហស្ស វណ្ណំ ភាសតិ. ឥមេហិ ខោ, ភិក្ខវេ, ទ្វីហិ ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតី’’តិ.

១៣៦. ‘‘ទ្វីហិ, ភិក្ខវេ, ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ. កតមេហិ ទ្វីហិ? អននុវិច្ច អបរិយោគាហេត្វា អប្បសាទនីយេ ឋានេ បសាទំ ឧបទំសេតិ, អននុវិច្ច អបរិយោគាហេត្វា បសាទនីយេ ឋានេ អប្បសាទំ ឧបទំសេតិ. ឥមេហិ ខោ, ភិក្ខវេ, ទ្វីហិ ធម្មេហិ សមន្នាគតោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតីតិ.

‘‘ទ្វីហិ, ភិក្ខវេ, ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតិ. កតមេហិ ទ្វីហិ? អនុវិច្ច បរិយោគាហេត្វា អប្បសាទនីយេ ឋានេ អប្បសាទំ ឧបទំសេតិ, អនុវិច្ច បរិយោគាហេត្វា បសាទនីយេ ឋានេ បសាទំ ឧបទំសេតិ. ឥមេហិ ខោ, ភិក្ខវេ, ទ្វីហិ ធម្មេហិ សមន្នាគតោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតី’’តិ.

១៣៧. ‘‘ទ្វីសុ, ភិក្ខវេ, មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ. កតមេសុ ទ្វីសុ? មាតរិ ច បិតរិ ច. ឥមេសុ ខោ, ភិក្ខវេ, ទ្វីសុ មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតីតិ.

‘‘ទ្វីសុ, ភិក្ខវេ, សម្មាបដិបជ្ជមានោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតិ. កតមេសុ ទ្វីសុ? មាតរិ ច បិតរិ ច. ឥមេសុ ខោ, ភិក្ខវេ, ទ្វីសុ សម្មាបដិបជ្ជមានោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតី’’តិ.

១៣៨. ‘‘ទ្វីសុ, ភិក្ខវេ, មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតិ. កតមេសុ ទ្វីសុ? តថាគតេ ច តថាគតសាវកេ ច. ឥមេសុ ខោ, ភិក្ខវេ, មិច្ឆាបដិបជ្ជមានោ ពាលោ អព្យត្តោ អសប្បុរិសោ ខតំ ឧបហតំ អត្តានំ បរិហរតិ, សាវជ្ជោ ច ហោតិ សានុវជ្ជោ ច វិញ្ញូនំ, ពហុញ្ច អបុញ្ញំ បសវតីតិ.

‘‘ទ្វីសុ, ភិក្ខវេ, សម្មាបដិបជ្ជមានោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតិ. កតមេសុ ទ្វីសុ? តថាគតេ ច តថាគតសាវកេ ច. ឥមេសុ ខោ, ភិក្ខវេ, ទ្វីសុ សម្មាបដិបជ្ជមានោ បណ្ឌិតោ វិយត្តោ សប្បុរិសោ អក្ខតំ អនុបហតំ អត្តានំ បរិហរតិ, អនវជ្ជោ ច ហោតិ អននុវជ្ជោ ច វិញ្ញូនំ, ពហុញ្ច បុញ្ញំ បសវតី’’តិ.

១៣៩. ‘‘ទ្វេមេ, ភិក្ខវេ, ធម្មា. កតមេ ទ្វេ? សចិត្តវោទានញ្ច ន ច កិញ្ចិ លោកេ ឧបាទិយតិ. ឥមេ ខោ, ភិក្ខវេ, ទ្វេ ធម្មា’’តិ.

១៤០. ‘‘ទ្វេមេ, ភិក្ខវេ, ធម្មា. កតមេ ទ្វេ? កោធោ ច ឧបនាហោ ច. ឥមេ ខោ, ភិក្ខវេ, ទ្វេ ធម្មា’’តិ.

១៤១. ‘‘ទ្វេមេ, ភិក្ខវេ, ធម្មា. កតមេ ទ្វេ? កោធវិនយោ ច ឧបនាហវិនយោ ច. ឥមេ ខោ, ភិក្ខវេ, ទ្វេ ធម្មា’’តិ.

អាយាចនវគ្គោ ទុតិយោ.

(១៣) ៣. ទានវគ្គោ

១៤២. ‘‘ទ្វេមានិ, ភិក្ខវេ, ទានានិ. កតមានិ ទ្វេ? អាមិសទានញ្ច ធម្មទានញ្ច. ឥមានិ ខោ, ភិក្ខវេ, ទ្វេ ទានានិ. ឯតទគ្គំ, ភិក្ខវេ, ឥមេសំ ទ្វិន្នំ ទានានំ យទិទំ ធម្មទាន’’ន្តិ.

១៤៣. ‘‘ទ្វេមេ, ភិក្ខវេ, យាគា. កតមេ ទ្វេ? អាមិសយាគោ ច ធម្មយាគោ ច. ឥមេ ខោ, ភិក្ខវេ, ទ្វេ យាគា. ឯតទគ្គំ, ភិក្ខវេ, ឥមេសំ ទ្វិន្នំ យាគានំ យទិទំ ធម្មយាគោ’’តិ.

១៤៤. ‘‘ទ្វេមេ, ភិក្ខវេ, ចាគា. កតមេ ទ្វេ? អាមិសចាគោ ច ធម្មចាគោ ច. ឥមេ ខោ, ភិក្ខវេ, ទ្វេ ចាគា. ឯតទគ្គំ, ភិក្ខវេ, ឥមេសំ ទ្វិន្នំ ចាគានំ យទិទំ ធម្មចាគោ’’តិ.

១៤៥. ‘‘ទ្វេមេ, ភិក្ខវេ, បរិច្ចាគា. កតមេ ទ្វេ? អាមិសបរិច្ចាគោ ច ធម្មបរិច្ចាគោ ច. ឥមេ ខោ, ភិក្ខវេ, ទ្វេ បរិច្ចាគា. ឯតទគ្គំ, ភិក្ខវេ, ឥមេសំ ទ្វិន្នំ បរិច្ចាគានំ យទិទំ ធម្មបរិច្ចាគោ’’តិ.

១៤៦. ‘‘ទ្វេមេ, ភិក្ខវេ, ភោគា. កតមេ ទ្វេ? អាមិសភោគោ ច ធម្មភោគោ ច. ឥមេ ខោ, ភិក្ខវេ, ទ្វេ ភោគា. ឯតទគ្គំ, ភិក្ខវេ, ឥមេសំ ទ្វិន្នំ ភោគានំ យទិទំ ធម្មភោគោ’’តិ.

១៤៧. ‘‘ទ្វេមេ, ភិក្ខវេ, សម្ភោគា. កតមេ ទ្វេ? អាមិសសម្ភោគោ ច ធម្មសម្ភោគោ ច. ឥមេ ខោ, ភិក្ខវេ, ទ្វេ សម្ភោគា. ឯតទគ្គំ, ភិក្ខវេ, ឥមេសំ ទ្វិន្នំ សម្ភោគានំ យទិទំ ធម្មសម្ភោគោ’’តិ.

១៤៨. ‘‘ទ្វេមេ, ភិក្ខវេ, សំវិភាគា. កតមេ ទ្វេ? អាមិសសំវិភាគោ ច ធម្មសំវិភាគោ ច. ឥមេ ខោ, ភិក្ខវេ, ទ្វេ សំវិភាគា. ឯតទគ្គំ, ភិក្ខវេ, ឥមេសំ ទ្វិន្នំ សំវិភាគានំ យទិទំ ធម្មសំវិភាគោ’’តិ.

១៤៩. ‘‘ទ្វេមេ, ភិក្ខវេ, សង្គហា. កតមេ ទ្វេ? អាមិសសង្គហោ ច ធម្មសង្គហោ ច. ឥមេ ខោ, ភិក្ខវេ, ទ្វេ សង្គហា. ឯតទគ្គំ, ភិក្ខវេ, ឥមេសំ ទ្វិន្នំ សង្គហានំ យទិទំ ធម្មសង្គហោ’’តិ.

១៥០. ‘‘ទ្វេមេ, ភិក្ខវេ, អនុគ្គហា. កតមេ ទ្វេ? អាមិសានុគ្គហោ ច ធម្មានុគ្គហោ ច. ឥមេ ខោ, ភិក្ខវេ, ទ្វេ អនុគ្គហា. ឯតទគ្គំ, ភិក្ខវេ, ឥមេសំ ទ្វិន្នំ អនុគ្គហានំ យទិទំ ធម្មានុគ្គហោ’’តិ.

១៥១. ‘‘ទ្វេមា, ភិក្ខវេ, អនុកម្បា. កតមា ទ្វេ? អាមិសានុកម្បា ច ធម្មានុកម្បា ច. ឥមា ខោ, ភិក្ខវេ, ទ្វេ អនុកម្បា. ឯតទគ្គំ, ភិក្ខវេ, ឥមាសំ ទ្វិន្នំ អនុកម្បានំ យទិទំ ធម្មានុកម្បា’’តិ.

ទានវគ្គោ តតិយោ.

(១៤) ៤. សន្ថារវគ្គោ

១៥២. ‘‘ទ្វេមេ, ភិក្ខវេ, សន្ថារា [សន្ធារា (ក.)]. កតមេ ទ្វេ? អាមិសសន្ថារោ ច ធម្មសន្ថារោ ច. ឥមេ ខោ, ភិក្ខវេ, ទ្វេ សន្ថារា. ឯតទគ្គំ, ភិក្ខវេ, ឥមេសំ ទ្វិន្នំ សន្ថារានំ យទិទំ ធម្មសន្ថារោ’’តិ.

១៥៣. ‘‘ទ្វេមេ, ភិក្ខវេ, បដិសន្ថារា [បដិសន្ធារា (ក.)]. កតមេ ទ្វេ? អាមិសបដិសន្ថារោ ច ធម្មបដិសន្ថារោ ច. ឥមេ ខោ, ភិក្ខវេ, ទ្វេ បដិសន្ថារា. ឯតទគ្គំ, ភិក្ខវេ, ឥមេសំ ទ្វិន្នំ បដិសន្ថារានំ យទិទំ ធម្មបដិសន្ថារោ’’តិ.

១៥៤. ‘‘ទ្វេមា, ភិក្ខវេ, ឯសនា. កតមា ទ្វេ? អាមិសេសនា ច ធម្មេសនា ច. ឥមា ខោ, ភិក្ខវេ, ទ្វេ ឯសនា. ឯតទគ្គំ, ភិក្ខវេ, ឥមាសំ ទ្វិន្នំ ឯសនានំ យទិទំ ធម្មេសនា’’តិ.

១៥៥. ‘‘ទ្វេមា, ភិក្ខវេ, បរិយេសនា. កតមា ទ្វេ? អាមិសបរិយេសនា ច ធម្មបរិយេសនា ច. ឥមា ខោ, ភិក្ខវេ, ទ្វេ បរិយេសនា. ឯតទគ្គំ, ភិក្ខវេ, ឥមាសំ ទ្វិន្នំ បរិយេសនានំ យទិទំ ធម្មបរិយេសនា’’តិ.

១៥៦. ‘‘ទ្វេមា, ភិក្ខវេ, បរិយេដ្ឋិយោ. កតមា ទ្វេ? អាមិសបរិយេដ្ឋិ ច ធម្មបរិយេដ្ឋិ ច. ឥមា ខោ, ភិក្ខវេ, ទ្វេ បរិយេដ្ឋិយោ. ឯតទគ្គំ, ភិក្ខវេ, ឥមាសំ ទ្វិន្នំ បរិយេដ្ឋីនំ យទិទំ ធម្មបរិយេដ្ឋី’’តិ.

១៥៧. ‘‘ទ្វេមា, ភិក្ខវេ, បូជា. កតមា ទ្វេ? អាមិសបូជា ច ធម្មបូជា ច. ឥមា ខោ ភិក្ខវេ, ទ្វេ បូជា. ឯតទគ្គំ, ភិក្ខវេ, ឥមាសំ ទ្វិន្នំ បូជានំ យទិទំ ធម្មបូជា’’តិ.

១៥៨. ‘‘ទ្វេមានិ, ភិក្ខវេ, អាតិថេយ្យានិ. កតមានិ ទ្វេ? អាមិសាតិថេយ្យញ្ច ធម្មាតិថេយ្យញ្ច. ឥមានិ ខោ, ភិក្ខវេ, ទ្វេ អាតិថេយ្យានិ. ឯតទគ្គំ, ភិក្ខវេ, ឥមេសំ ទ្វិន្នំ អាតិថេយ្យានំ យទិទំ ធម្មាតិថេយ្យ’’ន្តិ.

១៥៩. ‘‘ទ្វេមា, ភិក្ខវេ, ឥទ្ធិយោ. កតមា ទ្វេ? អាមិសិទ្ធិ ច ធម្មិទ្ធិ ច. ឥមា ខោ, ភិក្ខវេ, ទ្វេ ឥទ្ធិយោ. ឯតទគ្គំ, ភិក្ខវេ, ឥមាសំ ទ្វិន្នំ ឥទ្ធីនំ យទិទំ ធម្មិទ្ធី’’តិ.

១៦០. ‘‘ទ្វេមា, ភិក្ខវេ, វុទ្ធិយោ. កតមា ទ្វេ? អាមិសវុទ្ធិ ច ធម្មវុទ្ធិ ច. ឥមា ខោ, ភិក្ខវេ, ទ្វេ វុទ្ធិយោ. ឯតទគ្គំ, ភិក្ខវេ, ឥមាសំ ទ្វិន្នំ វុទ្ធីនំ យទិទំ ធម្មវុទ្ធី’’តិ.

១៦១. ‘‘ទ្វេមានិ, ភិក្ខវេ, រតនានិ. កតមានិ ទ្វេ? អាមិសរតនញ្ច ធម្មរតនញ្ច. ឥមានិ ខោ, ភិក្ខវេ, ទ្វេ រតនានិ. ឯតទគ្គំ, ភិក្ខវេ, ឥមេសំ ទ្វិន្នំ រតនានំ យទិទំ ធម្មរតន’’ន្តិ.

១៦២. ‘‘ទ្វេមេ, ភិក្ខវេ, សន្និចយា. កតមេ ទ្វេ? អាមិសសន្និចយោ ច ធម្មសន្និចយោ ច. ឥមេ ខោ, ភិក្ខវេ, ទ្វេ សន្និចយា. ឯតទគ្គំ, ភិក្ខវេ, ឥមេសំ ទ្វិន្នំ សន្និចយានំ យទិទំ ធម្មសន្និចយោ’’តិ.

១៦៣. ‘‘ទ្វេមានិ, ភិក្ខវេ, វេបុល្លានិ. កតមានិ ទ្វេ? អាមិសវេបុល្លញ្ច ធម្មវេបុល្លញ្ច. ឥមានិ ខោ, ភិក្ខវេ, ទ្វេ វេបុល្លានិ. ឯតទគ្គំ, ភិក្ខវេ, ឥមេសំ ទ្វិន្នំ វេបុល្លានំ យទិទំ ធម្មវេបុល្ល’’ន្តិ.

សន្ថារវគ្គោ ចតុត្ថោ.

(១៥) ៥. សមាបត្តិវគ្គោ

១៦៤. ‘‘ទ្វេមេ, ភិក្ខវេ, ធម្មា. កតមេ ទ្វេ? សមាបត្តិកុសលតា ច សមាបត្តិវុដ្ឋានកុសលតា ច. ឥមេ ខោ, ភិក្ខវេ, ទ្វេ ធម្មា’’តិ.

១៦៥. ‘‘ទ្វេមេ, ភិក្ខវេ, ធម្មា. កតមេ ទ្វេ? អជ្ជវញ្ច មទ្ទវញ្ច. ឥមេ ខោ, ភិក្ខវេ, ទ្វេ ធម្មា’’.

១៦៦. ‘‘ទ្វេមេ, ភិក្ខវេ, ធម្មា. កតមេ ទ្វេ? ខន្តិ ច សោរច្ចញ្ច. ឥមេ ខោ, ភិក្ខវេ, ទ្វេ ធម្មា’’.

១៦៧. ‘‘ទ្វេមេ, ភិក្ខវេ, ធម្មា. កតមេ ទ្វេ? សាខល្យញ្ច បដិសន្ថារោ ច. ឥមេ ខោ, ភិក្ខវេ, ទ្វេ ធម្មា’’.

១៦៨. ‘ទ្វេមេ, ភិក្ខវេ, ធម្មា. កតមេ ទ្វេ? អវិហិំសា ច សោចេយ្យញ្ច. ឥមេ ខោ, ភិក្ខវេ, ទ្វេ ធម្មា’’.

១៦៩. ‘‘ទ្វេមេ, ភិក្ខវេ, ធម្មា. កតមេ ទ្វេ? ឥន្ទ្រិយេសុ អគុត្តទ្វារតា ច ភោជនេ អមត្តញ្ញុតា ច. ឥមេ ខោ, ភិក្ខវេ, ទ្វេ ធម្មា’’.

១៧០. ‘‘ទ្វេមេ, ភិក្ខវេ, ធម្មា. កតមេ ទ្វេ? ឥន្ទ្រិយេសុ គុត្តទ្វារតា ច ភោជនេ មត្តញ្ញុតា ច. ឥមេ ខោ, ភិក្ខវេ, ទ្វេ ធម្មា’’.

១៧១. ‘‘ទ្វេមេ, ភិក្ខវេ, ធម្មា. កតមេ ទ្វេ? បដិសង្ខានពលញ្ច ភាវនាពលញ្ច. ឥមេ ខោ, ភិក្ខវេ, ទ្វេ ធម្មា’’.

១៧២. ‘‘ទ្វេមេ, ភិក្ខវេ, ធម្មា. កតមេ ទ្វេ? សតិពលញ្ច សមាធិពលញ្ច. ឥមេ ខោ, ភិក្ខវេ, ទ្វេ ធម្មា’’.

១៧៣. ‘‘ទ្វេមេ, ភិក្ខវេ, ធម្មា. កតមេ ទ្វេ? សមថោ ច វិបស្សនា ច. ឥមេ ខោ, ភិក្ខវេ, ទ្វេ ធម្មា’’.

១៧៤. ‘‘ទ្វេមេ, ភិក្ខវេ, ធម្មា. កតមេ ទ្វេ? សីលវិបត្តិ ច ទិដ្ឋិវិបត្តិ ច. ឥមេ ខោ, ភិក្ខវេ, ទ្វេ ធម្មា’’.

១៧៥. ‘‘ទ្វេមេ, ភិក្ខវេ, ធម្មា. កតមេ ទ្វេ? សីលសម្បទា ច ទិដ្ឋិសម្បទា ច. ឥមេ ខោ, ភិក្ខវេ, ទ្វេ ធម្មា’’.

១៧៦. ‘‘ទ្វេមេ, ភិក្ខវេ, ធម្មា. កតមេ ទ្វេ? សីលវិសុទ្ធិ ច ទិដ្ឋិវិសុទ្ធិ ច. ឥមេ ខោ, ភិក្ខវេ, ទ្វេ ធម្មា’’.

១៧៧. ‘‘ទ្វេមេ, ភិក្ខវេ, ធម្មា. កតមេ ទ្វេ? ទិដ្ឋិវិសុទ្ធិ ច យថាទិដ្ឋិស្ស ច បធានំ. ឥមេ ខោ, ភិក្ខវេ, ទ្វេ ធម្មា’’.

១៧៨. ‘‘ទ្វេមេ, ភិក្ខវេ, ធម្មា. កតមេ ទ្វេ? អសន្តុដ្ឋិតា ច កុសលេសុ ធម្មេសុ, អប្បដិវានិតា ច បធានស្មិំ. ឥមេ ខោ, ភិក្ខវេ, ទ្វេ ធម្មា’’.

១៧៩. ‘‘ទ្វេមេ, ភិក្ខវេ, ធម្មា. កតមេ ទ្វេ? មុដ្ឋស្សច្ចញ្ច អសម្បជញ្ញញ្ច. ឥមេ ខោ, ភិក្ខវេ, ទ្វេ ធម្មា’’.

១៨០. ‘‘ទ្វេមេ, ភិក្ខវេ, ធម្មា. កតមេ ទ្វេ? សតិ ច សម្បជញ្ញញ្ច. ឥមេ ខោ, ភិក្ខវេ, ទ្វេ ធម្មា’’តិ.

សមាបត្តិវគ្គោ បញ្ចមោ.

តតិយោ បណ្ណាសកោ សមត្តោ.