(១៦) ១. បុគ្គលវគ្គោ

១. សេវិតព្ពសុត្តំ

១៥៥. ‘‘ទសហិ, ភិក្ខវេ, ធម្មេហិ សមន្នាគតោ បុគ្គលោ ន សេវិតព្ពោ. កតមេហិ ទសហិ? មិច្ឆាទិដ្ឋិកោ ហោតិ, មិច្ឆាសង្កប្បោ ហោតិ, មិច្ឆាវាចោ ហោតិ, មិច្ឆាកម្មន្តោ ហោតិ, មិច្ឆាអាជីវោ ហោតិ, មិច្ឆាវាយាមោ ហោតិ, មិច្ឆាសតិ ហោតិ, មិច្ឆាសមាធិ ហោតិ, មិច្ឆាញាណី ហោតិ, មិច្ឆាវិមុត្តិ ហោតិ – ឥមេហិ ខោ, ភិក្ខវេ, ទសហិ ធម្មេហិ សមន្នាគតោ បុគ្គលោ ន សេវិតព្ពោ.

‘‘ទសហិ, ភិក្ខវេ, ធម្មេហិ សមន្នាគតោ បុគ្គលោ សេវិតព្ពោ. កតមេហិ ទសហិ? សម្មាទិដ្ឋិកោ ហោតិ, សម្មាសង្កប្បោ ហោតិ, សម្មាវាចោ ហោតិ, សម្មាកម្មន្តោ ហោតិ, សម្មាអាជីវោ ហោតិ, សម្មាវាយាមោ ហោតិ, សម្មាសតិ ហោតិ, សម្មាសមាធិ ហោតិ, សម្មាញាណី ហោតិ, សម្មាវិមុត្តិ ហោតិ – ឥមេហិ ខោ, ភិក្ខវេ, ទសហិ ធម្មេហិ សមន្នាគតោ បុគ្គលោ សេវិតព្ពោ’’តិ.

២-១២. ភជិតព្ពាទិសុត្តានិ

១៥៦-១៦៦. ‘‘ទសហិ, ភិក្ខវេ, ធម្មេហិ សមន្នាគតោ បុគ្គលោ ន ភជិតព្ពោ…បេ… ភជិតព្ពោ…បេ… ន បយិរុបាសិតព្ពោ… បយិរុបាសិតព្ពោ…បេ… ន បុជ្ជោ ហោតិ… បុជ្ជោ ហោតិ…បេ… ន បាសំសោ ហោតិ… បាសំសោ ហោតិ…បេ… អគារវោ ហោតិ… សគារវោ ហោតិ…បេ… អប្បតិស្សោ ហោតិ… សប្បតិស្សោ ហោតិ…បេ… ន អារាធកោ ហោតិ … អារាធកោ ហោតិ…បេ… ន វិសុជ្ឈតិ… វិសុជ្ឈតិ…បេ… មានំ នាធិភោតិ… មានំ អធិភោតិ…បេ. … បញ្ញាយ ន វឌ្ឍតិ… បញ្ញាយ វឌ្ឍតិ…បេ….

‘‘ពហុំ អបុញ្ញំ បសវតិ… ពហុំ បុញ្ញំ បសវតិ. កតមេហិ ទសហិ? សម្មាទិដ្ឋិកោ ហោតិ, សម្មាសង្កប្បោ ហោតិ, សម្មាវាចោ ហោតិ, សម្មាកម្មន្តោ ហោតិ, សម្មាអាជីវោ ហោតិ, សម្មាវាយាមោ ហោតិ, សម្មាសតិ ហោតិ, សម្មាសមាធិ ហោតិ, សម្មាញាណី ហោតិ, សម្មាវិមុត្តិ ហោតិ – ឥមេហិ ខោ, ភិក្ខវេ, ទសហិ ធម្មេហិ សមន្នាគតោ បុគ្គលោ ពហុំ បុញ្ញំ បសវតី’’តិ.

បុគ្គលវគ្គោ បឋមោ.