៧. នប្បិយសុត្តំ

៨៧. តត្រ ខោ ភគវា កាលង្កតំ ភិក្ខុំ [កលន្ទកំ ភិក្ខុំ (សី.), កាឡកភិក្ខុំ (ស្យា.)] អារព្ភ ភិក្ខូ អាមន្តេសិ – ‘‘ភិក្ខវោ’’តិ. ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ. ភគវា ឯតទវោច –

‘‘ឥធ, ភិក្ខវេ, ភិក្ខុ អធិករណិកោ ហោតិ, អធិករណសមថស្ស ន វណ្ណវាទី. យម្បិ, ភិក្ខវេ, ភិក្ខុ អធិករណិកោ ហោតិ អធិករណសមថស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ ន សិក្ខាកាមោ ហោតិ, សិក្ខាសមាទានស្ស [សិក្ខាកាមស្ស (ក.)] ន វណ្ណវាទី. យម្បិ, ភិក្ខវេ, ភិក្ខុ ន សិក្ខាកាមោ ហោតិ សិក្ខាសមាទានស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ បាបិច្ឆោ ហោតិ, ឥច្ឆាវិនយស្ស ន វណ្ណវាទី. យម្បិ, ភិក្ខវេ, ភិក្ខុ បាបិច្ឆោ ហោតិ ឥច្ឆាវិនយស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ កោធនោ ហោតិ, កោធវិនយស្ស ន វណ្ណវាទី. យម្បិ, ភិក្ខវេ, ភិក្ខុ កោធនោ ហោតិ កោធវិនយស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ មក្ខី ហោតិ, មក្ខវិនយស្ស ន វណ្ណវាទី. យម្បិ, ភិក្ខវេ, ភិក្ខុ មក្ខី ហោតិ មក្ខវិនយស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ សឋោ ហោតិ, សាឋេយ្យវិនយស្ស ន វណ្ណវាទី. យម្បិ, ភិក្ខវេ, ភិក្ខុ សឋោ ហោតិ សាឋេយ្យវិនយស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ មាយាវី ហោតិ, មាយាវិនយស្ស ន វណ្ណវាទី. យម្បិ, ភិក្ខវេ, ភិក្ខុ មាយាវី ហោតិ មាយាវិនយស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ ធម្មានំ ន និសាមកជាតិកោ ហោតិ, ធម្មនិសន្តិយា ន វណ្ណវាទី. យម្បិ, ភិក្ខវេ, ភិក្ខុ ធម្មានំ ន និសាមកជាតិកោ ហោតិ ធម្មនិសន្តិយា ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ ន បដិសល្លីនោ ហោតិ, បដិសល្លានស្ស ន វណ្ណវាទី. យម្បិ, ភិក្ខវេ, ភិក្ខុ ន បដិសល្លីនោ ហោតិ បដិសល្លានស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ សព្រហ្មចារីនំ ន បដិសន្ថារកោ [បដិសន្ធារកោ (ក.)] ហោតិ, បដិសន្ថារកស្ស ន វណ្ណវាទី. យម្បិ, ភិក្ខវេ, ភិក្ខុ សព្រហ្មចារីនំ ន បដិសន្ថារកោ ហោតិ បដិសន្ថារកស្ស ន វណ្ណវាទី, អយម្បិ ធម្មោ ន បិយតាយ ន គរុតាយ ន ភាវនាយ ន សាមញ្ញាយ ន ឯកីភាវាយ សំវត្តតិ.

‘‘ឯវរូបស្ស, ភិក្ខវេ, ភិក្ខុនោ កិញ្ចាបិ ឯវំ ឥច្ឆា ឧប្បជ្ជេយ្យ – ‘អហោ វត មំ សព្រហ្មចារី សក្ករេយ្យុំ គរុំ ករេយ្យុំ [គរុករេយ្យុំ (សី. ស្យា.)] មានេយ្យុំ បូជេយ្យុ’ន្តិ, អថ ខោ នំ សព្រហ្មចារី ន ចេវ សក្ករោន្តិ ន គរុំ ករោន្តិ [គរុករោន្តិ (សី. ស្យា.)] ន មានេន្តិ ន បូជេន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ សព្រហ្មចារី តេ បាបកេ អកុសលេ ធម្មេ អប្បហីនេ សមនុបស្សន្តិ.

‘‘សេយ្យថាបិ, ភិក្ខវេ, អស្សខឡុង្កស្ស កិញ្ចាបិ ឯវំ ឥច្ឆា ឧប្បជ្ជេយ្យ – ‘អហោ វត មំ មនុស្សា អាជានីយដ្ឋានេ ឋបេយ្យុំ, អាជានីយភោជនញ្ច ភោជេយ្យុំ, អាជានីយបរិមជ្ជនញ្ច បរិមជ្ជេយ្យុ’ន្តិ, អថ ខោ នំ មនុស្សា ន ចេវ អាជានីយដ្ឋានេ ឋបេន្តិ ន ច អាជានីយភោជនំ ភោជេន្តិ ន ច អាជានីយបរិមជ្ជនំ បរិមជ្ជន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ មនុស្សា តានិ សាឋេយ្យានិ កូដេយ្យានិ ជិម្ហេយ្យានិ វង្កេយ្យានិ អប្បហីនានិ សមនុបស្សន្តិ. ឯវមេវំ ខោ, ភិក្ខវេ, ឯវរូបស្ស ភិក្ខុនោ កិញ្ចាបិ ឯវំ ឥច្ឆា ឧប្បជ្ជេយ្យ – ‘អហោ វត មំ សព្រហ្មចារី សក្ករេយ្យុំ គរុំ ករេយ្យុំ មានេយ្យុំ បូជេយ្យុ’ន្តិ, អថ ខោ នំ សព្រហ្មចារី ន ចេវ សក្ករោន្តិ ន គរុំ ករោន្តិ ន មានេន្តិ ន បូជេន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ សព្រហ្មចារី តេ បាបកេ អកុសលេ ធម្មេ អប្បហីនេ សមនុបស្សន្តិ.

‘‘ឥធ បន, ភិក្ខវេ, ភិក្ខុ ន អធិករណិកោ ហោតិ, អធិករណសមថស្ស វណ្ណវាទី. យម្បិ, ភិក្ខវេ, ភិក្ខុ ន អធិករណិកោ ហោតិ អធិករណសមថស្ស វណ្ណវាទី, អយម្បិ ធម្មោ បិយតាយ គរុតាយ ភាវនាយ សាមញ្ញាយ ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ សិក្ខាកាមោ ហោតិ, សិក្ខាសមាទានស្ស វណ្ណវាទី. យម្បិ, ភិក្ខវេ, ភិក្ខុ សិក្ខាកាមោ ហោតិ សិក្ខាសមាទានស្ស វណ្ណវាទី, អយម្បិ ធម្មោ បិយតាយ គរុតាយ ភាវនាយ សាមញ្ញាយ ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ អប្បិច្ឆោ ហោតិ, ឥច្ឆាវិនយស្ស វណ្ណវាទី. យម្បិ, ភិក្ខវេ, ភិក្ខុ អប្បិច្ឆោ ហោតិ ឥច្ឆាវិនយស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ អក្កោធនោ ហោតិ, កោធវិនយស្ស វណ្ណវាទី. យម្បិ, ភិក្ខវេ, ភិក្ខុ អក្កោធនោ ហោតិ កោធវិនយស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ អមក្ខី ហោតិ, មក្ខវិនយស្ស វណ្ណវាទី. យម្បិ, ភិក្ខវេ, ភិក្ខុ អមក្ខី ហោតិ មក្ខវិនយស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ អសឋោ ហោតិ, សាឋេយ្យវិនយស្ស វណ្ណវាទី. យម្បិ, ភិក្ខវេ, ភិក្ខុ អសឋោ ហោតិ សាឋេយ្យវិនយស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ អមាយាវី ហោតិ, មាយាវិនយស្ស វណ្ណវាទី. យម្បិ, ភិក្ខវេ, ភិក្ខុ អមាយាវី ហោតិ មាយាវិនយស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ ធម្មានំ និសាមកជាតិកោ ហោតិ, ធម្មនិសន្តិយា វណ្ណវាទី. យម្បិ, ភិក្ខវេ, ភិក្ខុ ធម្មានំ និសាមកជាតិកោ ហោតិ ធម្មនិសន្តិយា វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ បដិសល្លីនោ ហោតិ, បដិសល្លានស្ស វណ្ណវាទី. យម្បិ, ភិក្ខវេ, ភិក្ខុ បដិសល្លីនោ ហោតិ បដិសល្លានស្ស វណ្ណវាទី, អយម្បិ ធម្មោ…បេ… ឯកីភាវាយ សំវត្តតិ.

‘‘បុន ចបរំ, ភិក្ខវេ, ភិក្ខុ សព្រហ្មចារីនំ បដិសន្ថារកោ ហោតិ, បដិសន្ថារកស្ស វណ្ណវាទី. យម្បិ, ភិក្ខវេ, ភិក្ខុ សព្រហ្មចារីនំ បដិសន្ថារកោ ហោតិ បដិសន្ថារកស្ស វណ្ណវាទី, អយម្បិ ធម្មោ បិយតាយ គរុតាយ ភាវនាយ សាមញ្ញាយ ឯកីភាវាយ សំវត្តតិ.

‘‘ឯវរូបស្ស, ភិក្ខវេ, ភិក្ខុនោ កិញ្ចាបិ ន ឯវំ ឥច្ឆា ឧប្បជ្ជេយ្យ – ‘អហោ វត មំ សព្រហ្មចារី សក្ករេយ្យុំ គរុំ ករេយ្យុំ មានេយ្យុំ បូជេយ្យុ’ន្តិ, អថ ខោ នំ សព្រហ្មចារី សក្ករោន្តិ គរុំ ករោន្តិ មានេន្តិ បូជេន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ សព្រហ្មចារី តេ បាបកេ អកុសលេ ធម្មេ បហីនេ សមនុបស្សន្តិ.

‘‘សេយ្យថាបិ, ភិក្ខវេ, ភទ្ទស្ស អស្សាជានីយស្ស កិញ្ចាបិ ន ឯវំ ឥច្ឆា ឧប្បជ្ជេយ្យ – ‘អហោ វត មំ មនុស្សា អាជានីយដ្ឋានេ ឋបេយ្យុំ, អាជានីយភោជនញ្ច ភោជេយ្យុំ, អាជានីយបរិមជ្ជនញ្ច បរិមជ្ជេយ្យុ’ន្តិ, អថ ខោ នំ មនុស្សា អាជានីយដ្ឋានេ ច ឋបេន្តិ អាជានីយភោជនញ្ច ភោជេន្តិ អាជានីយបរិមជ្ជនញ្ច បរិមជ្ជន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ មនុស្សា តានិ សាឋេយ្យានិ កូដេយ្យានិ ជិម្ហេយ្យានិ វង្កេយ្យានិ បហីនានិ សមនុបស្សន្តិ.

‘‘ឯវមេវំ ខោ, ភិក្ខវេ, ឯវរូបស្ស ភិក្ខុនោ កិញ្ចាបិ ន ឯវំ ឥច្ឆា ឧប្បជ្ជេយ្យ – ‘អហោ វត មំ សព្រហ្មចារី សក្ករេយ្យុំ គរុំ ករេយ្យុំ មានេយ្យុំ បូជេយ្យុ’ន្តិ, អថ ខោ នំ សព្រហ្មចារី សក្ករោន្តិ គរុំ ករោន្តិ មានេន្តិ បូជេន្តិ. តំ កិស្ស ហេតុ? តថាហិស្ស, ភិក្ខវេ, វិញ្ញូ សព្រហ្មចារី តេ បាបកេ អកុសលេ ធម្មេ បហីនេ សមនុបស្សន្តី’’តិ. សត្តមំ.