១. វាហនសុត្តំ

៨១. ឯកំ សមយំ ភគវា ចម្បាយំ វិហរតិ គគ្គរាយ បោក្ខរណិយា តីរេ. អថ ខោ អាយស្មា វាហនោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ អាយស្មា វាហនោ ភគវន្តំ ឯតទវោច – ‘‘កតិហិ នុ ខោ, ភន្តេ, ធម្មេហិ តថាគតោ និស្សដោ វិសំយុត្តោ វិប្បមុត្តោ វិមរិយាទីកតេន ចេតសា វិហរតី’’តិ?

‘‘ទសហិ ខោ, វាហន, ធម្មេហិ តថាគតោ និស្សដោ វិសំយុត្តោ វិប្បមុត្តោ វិមរិយាទីកតេន ចេតសា វិហរតិ. កតមេហិ ទសហិ? រូបេន ខោ, វាហន, តថាគតោ និស្សដោ វិសំយុត្តោ វិប្បមុត្តោ វិមរិយាទីកតេន ចេតសា វិហរតិ, វេទនាយ ខោ, វាហន…បេ… សញ្ញាយ ខោ, វាហន… សង្ខារេហិ ខោ, វាហន… វិញ្ញាណេន ខោ, វាហន… ជាតិយា ខោ, វាហន… ជរាយ ខោ, វាហន… មរណេន ខោ, វាហន… ទុក្ខេហិ ខោ, វាហន… កិលេសេហិ ខោ, វាហន, តថាគតោ និស្សដោ វិសំយុត្តោ វិប្បមុត្តោ វិមរិយាទីកតេន ចេតសា វិហរតិ. សេយ្យថាបិ, វាហន, ឧប្បលំ វា បទុមំ វា បុណ្ឌរីកំ វា ឧទកេ ជាតំ ឧទកេ សំវឌ្ឍំ ឧទកា បច្ចុគ្គម្ម ឋិតំ អនុបលិត្តំ ឧទកេន; ឯវមេវំ ខោ, វាហន, ឥមេហិ ទសហិ ធម្មេហិ តថាគតោ និស្សដោ វិសំយុត្តោ វិប្បមុត្តោ វិមរិយាទីកតេន ចេតសា វិហរតី’’តិ. បឋមំ.