៤. វឌ្ឍិសុត្តំ

៧៤. ‘‘ទសហិ, ភិក្ខវេ, វឌ្ឍីហិ វឌ្ឍមានោ អរិយសាវកោ អរិយាយ វឌ្ឍិយា វឌ្ឍតិ, សារាទាយី ច ហោតិ វរាទាយី កាយស្ស. កតមេហិ ទសហិ? ខេត្តវត្ថូហិ វឌ្ឍតិ, ធនធញ្ញេន វឌ្ឍតិ, បុត្តទារេហិ វឌ្ឍតិ, ទាសកម្មករបោរិសេហិ វឌ្ឍតិ, ចតុប្បទេហិ វឌ្ឍតិ, សទ្ធាយ វឌ្ឍតិ, សីលេន វឌ្ឍតិ, សុតេន វឌ្ឍតិ, ចាគេន វឌ្ឍតិ, បញ្ញាយ វឌ្ឍតិ – ឥមេហិ ខោ, ភិក្ខវេ, ទសហិ វឌ្ឍីហិ វឌ្ឍមានោ អរិយសាវកោ អរិយាយ វឌ្ឍិយា វឌ្ឍតិ, សារាទាយី ច ហោតិ វរាទាយី កាយស្សាតិ.

‘‘ធនេន ធញ្ញេន ច យោធ វឌ្ឍតិ,

បុត្តេហិ ទារេហិ ចតុប្បទេហិ ច;

ស ភោគវា ហោតិ យសស្សិ បូជិតោ,

ញាតីហិ មិត្តេហិ អថោបិ រាជុភិ.

‘‘សទ្ធាយ សីលេន ច យោធ វឌ្ឍតិ,

បញ្ញាយ ចាគេន សុតេន ចូភយំ;

សោ តាទិសោ សប្បុរិសោ វិចក្ខណោ,

ទិដ្ឋេវ ធម្មេ ឧភយេន វឌ្ឍតី’’តិ. ចតុត្ថំ;