៣. ទុតិយវិវាទមូលសុត្តំ

៤៣. ‘‘កតិ នុ ខោ, ភន្តេ, វិវាទមូលានី’’តិ? ‘‘ទស ខោ, ឧបាលិ, វិវាទមូលានិ. កតមានិ ទស? ឥធុបាលិ, ភិក្ខូ អនាបត្តិំ អាបត្តីតិ ទីបេន្តិ, អាបត្តិំ អនាបត្តីតិ ទីបេន្តិ, លហុកំ អាបត្តិំ គរុកាបត្តីតិ ទីបេន្តិ, គរុកំ អាបត្តិំ លហុកាបត្តីតិ ទីបេន្តិ, ទុដ្ឋុល្លំ អាបត្តិំ អទុដ្ឋុល្លាបត្តីតិ ទីបេន្តិ, អទុដ្ឋុល្លំ អាបត្តិំ ទុដ្ឋុល្លាបត្តីតិ ទីបេន្តិ, សាវសេសំ អាបត្តិំ អនវសេសាបត្តីតិ ទីបេន្តិ, អនវសេសំ អាបត្តិំ សាវសេសាបត្តីតិ ទីបេន្តិ, សប្បដិកម្មំ អាបត្តិំ អប្បដិកម្មាបត្តីតិ ទីបេន្តិ, អប្បដិកម្មំ អាបត្តិំ សប្បដិកម្មាបត្តីតិ ទីបេន្តិ. ឥមានិ ខោ, ឧបាលិ, ទស វិវាទមូលានី’’តិ. តតិយំ.