៨. កល្យាណមិត្តាទិវគ្គោ

៧១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, កល្យាណមិត្តតា. កល្យាណមិត្តស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. បឋមំ.

៧២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, អនុយោគោ អកុសលានំ ធម្មានំ, អននុយោគោ កុសលានំ ធម្មានំ. អនុយោគា, ភិក្ខវេ, អកុសលានំ ធម្មានំ, អននុយោគា កុសលានំ ធម្មានំ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ទុតិយំ.

៧៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, អនុយោគោ កុសលានំ ធម្មានំ, អននុយោគោ អកុសលានំ ធម្មានំ. អនុយោគា, ភិក្ខវេ, កុសលានំ ធម្មានំ, អននុយោគា អកុសលានំ ធម្មានំ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. តតិយំ.

៧៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា ពោជ្ឈង្គា នុប្បជ្ជន្តិ ឧប្បន្នា វា ពោជ្ឈង្គា ន ភាវនាបារិបូរិំ គច្ឆន្តិ យថយិទំ, ភិក្ខវេ, អយោនិសោមនសិការោ. អយោនិសោ, ភិក្ខវេ, មនសិ ករោតោ អនុប្បន្នា ចេវ ពោជ្ឈង្គា នុប្បជ្ជន្តិ ឧប្បន្នា ច ពោជ្ឈង្គា ន ភាវនាបារិបូរិំ គច្ឆន្តី’’តិ. ចតុត្ថំ.

៧៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា ពោជ្ឈង្គា ឧប្បជ្ជន្តិ ឧប្បន្នា វា ពោជ្ឈង្គា ភាវនាបារិបូរិំ គច្ឆន្តិ យថយិទំ, ភិក្ខវេ, យោនិសោមនសិការោ. យោនិសោ, ភិក្ខវេ, មនសិ ករោតោ អនុប្បន្នា ចេវ ពោជ្ឈង្គា ឧប្បជ្ជន្តិ ឧប្បន្នា ច ពោជ្ឈង្គា ភាវនាបារិបូរិំ គច្ឆន្តី’’តិ. បញ្ចមំ.

៧៦. ‘‘អប្បមត្តិកា ឯសា, ភិក្ខវេ, បរិហានិ យទិទំ ញាតិបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. ឆដ្ឋំ.

៧៧. ‘‘អប្បមត្តិកា ឯសា, ភិក្ខវេ, វុទ្ធិ យទិទំ ញាតិវុទ្ធិ. ឯតទគ្គំ, ភិក្ខវេ, វុទ្ធីនំ យទិទំ បញ្ញាវុទ្ធិ. តស្មាតិហ, ភិក្ខវេ, ឯវំ សិក្ខិតព្ពំ – ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. សត្តមំ.

៧៨. ‘‘អប្បមត្តិកា ឯសា, ភិក្ខវេ, បរិហានិ យទិទំ ភោគបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. អដ្ឋមំ.

៧៩. ‘‘អប្បមត្តិកា ឯសា, ភិក្ខវេ, វុទ្ធិ យទិទំ ភោគវុទ្ធិ. ឯតទគ្គំ, ភិក្ខវេ, វុទ្ធីនំ យទិទំ បញ្ញាវុទ្ធិ. តស្មាតិហ, ភិក្ខវេ, ឯវំ សិក្ខិតព្ពំ – ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. នវមំ.

៨០. ‘‘អប្បមត្តិកា ឯសា, ភិក្ខវេ, បរិហានិ យទិទំ យសោបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. ទសមំ.

កល្យាណមិត្តាទិវគ្គោ អដ្ឋមោ.