꧙. ꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦱꦶꦏ꧀ꦑꦴꦥꦢꦁ

꧗꧘. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦖꦧ꧀ꦧꦒ꧀ꦒꦶꦪꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦨꦟ꧀ꦝꦤꦏꦠꦺꦴ ꦲꦺꦴꦠꦶ. ꦱꦺꦴ ꦱꦚ꧀ꦕꦺꦠꦤꦶꦏꦁ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦱꦔ꧀ꦓꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦁ ꦪꦴꦕꦶ. ꦠꦱ꧀ꦱ ꦱꦔ꧀ꦓꦺꦴ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦁ ꦄꦢꦴꦱꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦴꦮꦠ꧀ꦡꦶꦪꦁ ꦄꦚ꧀ꦚꦠꦫꦱ꧀ꦱ ꦥꦹꦒꦱ꧀ꦱ ꦱꦔ꧀ꦓꦨꦠ꧀ꦠꦁ ꦲꦺꦴꦠꦶ. ꦱꦺꦴ ꦥꦫꦶꦮꦱꦤ꧀ꦠꦺꦴ ꦨꦠ꧀ꦠꦒ꧀ꦒꦺ ꦄꦴꦱꦤꦥꦫꦶꦪꦤ꧀ꦠꦺ ꦤꦶꦱꦷꦢꦶ. ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦠꦺ ꦈꦥꦴꦱꦏꦺ ꦌꦠꦢꦮꦺꦴꦕꦸꦁ – ‘‘ꦌꦱꦺꦴ, ꦄꦴꦮꦸꦱꦺꦴ, ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦠꦸꦩ꧀ꦲꦴꦏꦁ ꦱꦩ꧀ꦨꦴꦮꦶꦠꦺꦴ ꦏꦸꦭꦹꦥꦏꦺꦴ; ꦪꦺꦤꦺꦮ ꦲꦠ꧀ꦡꦺꦤ ꦱꦢ꧀ꦣꦴꦢꦺꦪ꧀ꦪꦁ ꦨꦸꦚ꧀ꦗꦠꦶ ꦠꦺꦤꦺꦮ ꦲꦠ꧀ꦡꦺꦤ ꦈꦥꦏ꧀ꦏꦩꦶꦠ꧀ꦮꦴ ꦄꦱꦸꦕꦶꦁ ꦩꦺꦴꦕꦺꦱꦶ. ꦱꦺꦴ ꦱꦚ꧀ꦕꦺꦠꦤꦶꦏꦁ ꦱꦸꦏ꧀ꦏꦮꦶꦱ꧀ꦱꦛ꧀ꦜꦶꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦶꦠ꧀ꦮꦴ ꦱꦔ꧀ꦓꦁ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦁ ꦪꦴꦕꦶ. ꦠꦱ꧀ꦱ ꦱꦔ꧀ꦓꦺꦴ ꦠꦱ꧀ꦱꦴ ꦄꦴꦥꦠ꧀ꦠꦶꦪꦴ ꦥꦫꦶꦮꦴꦱꦁ ꦄꦢꦴꦱꦶ. ꦱꦺꦴ ꦥꦫꦶꦮꦱꦤ꧀ꦠꦺꦴ ꦄꦴꦱꦤꦥꦫꦶꦪꦤ꧀ꦠꦺ ꦤꦶꦱꦶꦤ꧀ꦤꦺꦴ’’ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦱ꧀ꦱꦤ꧀ꦠꦷ’’ꦠꦶ…ꦥꦺ… ‘‘ꦱꦕ꧀ꦕꦁ ꦏꦶꦫ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦡꦴ’’ꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ, ꦩꦺꦴꦓꦥꦸꦫꦶꦱꦴ, ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦱ꧀ꦱꦡ! ꦤꦺꦠꦁ, ꦩꦺꦴꦓꦥꦸꦫꦶꦱꦴ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧗꧙. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦪ꧀ꦪ, ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ [ꦨꦶꦏ꧀ꦑꦸꦱꦩ꧀ꦩꦠꦶꦪꦴ (ꦱ꧀ꦪꦴ.)], ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧘꧐. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦨꦶꦏ꧀ꦑꦸꦱ꧀ꦱꦴꦠꦶ ꦄꦚ꧀ꦚꦱ꧀ꦱ ꦨꦶꦏ꧀ꦑꦸꦱ꧀ꦱ.

ꦢꦸꦛ꧀ꦜꦸꦭ꧀ꦭꦴ ꦤꦴꦩ ꦄꦴꦥꦠ꧀ꦠꦶ – ꦕꦠ꧀ꦠꦴꦫꦶ ꦕ ꦥꦴꦫꦴꦗꦶꦏꦴꦤꦶ, ꦠꦺꦫꦱ ꦕ ꦱꦔ꧀ꦓꦴꦢꦶꦱꦺꦱꦴ.

ꦄꦤꦸꦥꦱꦩ꧀ꦥꦤ꧀ꦤꦺꦴ ꦤꦴꦩ ꦨꦶꦏ꧀ꦑꦸꦚ꧀ꦕ ꦨꦶꦏ꧀ꦑꦸꦤꦶꦚ꧀ꦕ ꦜꦥꦺꦠ꧀ꦮꦴ ꦄꦮꦱꦺꦱꦺꦴ ꦄꦤꦸꦥꦱꦩ꧀ꦥꦤ꧀ꦤꦺꦴ ꦤꦴꦩ.

ꦄꦴꦫꦺꦴꦕꦺꦪ꧀ꦪꦴꦠꦶ ꦄꦴꦫꦺꦴꦕꦺꦪ꧀ꦪ ꦆꦠ꧀ꦡꦶꦪꦴ ꦮꦴ ꦥꦸꦫꦶꦱꦱ꧀ꦱ ꦮꦴ ꦒꦲꦛ꧀ꦜꦱ꧀ꦱ ꦮꦴ ꦥꦧ꧀ꦧꦗꦶꦠꦱ꧀ꦱ ꦮꦴ.

ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴꦠꦶ ꦜꦥꦺꦠ꧀ꦮꦴ ꦨꦶꦏ꧀ꦑꦸꦱꦩ꧀ꦩꦸꦠꦶꦁ.

ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ, ꦤ ꦏꦸꦭꦥꦫꦶꦪꦤ꧀ꦠꦴ. ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦏꦸꦭꦥꦫꦶꦪꦤ꧀ꦠꦴ, ꦤ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ, ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦕ ꦏꦸꦭꦥꦫꦶꦪꦤ꧀ꦠꦴ ꦕ, ꦄꦠ꧀ꦡꦶ ꦨꦶꦏ꧀ꦑꦸꦱꦩ꧀ꦩꦸꦠꦶ ꦤꦺꦮ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦤ ꦏꦸꦭꦥꦫꦶꦪꦤ꧀ꦠꦴ.

ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦤꦴꦩ ꦄꦴꦥꦠ꧀ꦠꦶꦪꦺꦴ ꦥꦫꦶꦒ꧀ꦒꦲꦶꦠꦴꦪꦺꦴ ꦲꦺꦴꦤ꧀ꦠꦶ – ‘‘ꦌꦠ꧀ꦠꦏꦴꦲꦶ ꦄꦴꦥꦠ꧀ꦠꦷꦲꦶ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ.

ꦏꦸꦭꦥꦫꦶꦪꦤ꧀ꦠꦴ ꦤꦴꦩ ꦏꦸꦭꦴꦤꦶ ꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ – ‘‘ꦌꦠ꧀ꦠꦏꦺꦱꦸ ꦏꦸꦭꦺꦱꦸ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ. ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦕ ꦏꦸꦭꦥꦫꦶꦪꦤ꧀ꦠꦴ ꦕ ꦤꦴꦩ ꦄꦴꦥꦠ꧀ꦠꦶꦪꦺꦴ ꦕ ꦥꦫꦶꦒ꧀ꦒꦲꦶꦠꦴꦪꦺꦴ ꦲꦺꦴꦤ꧀ꦠꦶ, ꦏꦸꦭꦴꦤꦶ ꦕ ꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ – ‘‘ꦌꦠ꧀ꦠꦏꦴꦲꦶ ꦄꦴꦥꦠ꧀ꦠꦷꦲꦶ ꦌꦠ꧀ꦠꦏꦺꦱꦸ ꦏꦸꦭꦺꦱꦸ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ. ꦤꦺꦮ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦴ ꦤ ꦏꦸꦭꦥꦫꦶꦪꦤ꧀ꦠꦴ ꦤꦴꦩ ꦄꦴꦥꦠ꧀ꦠꦶꦪꦺꦴ ꦕ ꦄꦥꦫꦶꦒ꧀ꦒꦲꦶꦠꦴꦪꦺꦴ ꦲꦺꦴꦤ꧀ꦠꦶ, ꦏꦸꦭꦴꦤꦶ ꦕ ꦄꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ – ‘‘ꦌꦠ꧀ꦠꦏꦴꦲꦶ ꦄꦴꦥꦠ꧀ꦠꦷꦲꦶ ꦌꦠ꧀ꦠꦏꦺꦱꦸ ꦏꦸꦭꦺꦱꦸ ꦄꦴꦫꦺꦴꦕꦺꦠꦧ꧀ꦧꦺꦴ’’ꦠꦶ.

꧘꧑. ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦪꦴ ꦄꦴꦥꦠ꧀ꦠꦶꦪꦺꦴ ꦥꦫꦶꦒ꧀ꦒꦲꦶꦠꦴꦪꦺꦴ ꦲꦺꦴꦤ꧀ꦠꦶ, ꦠꦴ ꦄꦴꦥꦠ꧀ꦠꦶꦪꦺꦴ ꦜꦥꦺꦠ꧀ꦮꦴ ꦄꦚ꧀ꦚꦴꦲꦶ ꦄꦴꦥꦠ꧀ꦠꦷꦲꦶ ꦄꦴꦫꦺꦴꦕꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦏꦸꦭꦥꦫꦶꦪꦤ꧀ꦠꦺ ꦪꦴꦤꦶ ꦏꦸꦭꦴꦤꦶ ꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ, ꦠꦴꦤꦶ ꦏꦸꦭꦴꦤꦶ ꦜꦥꦺꦠ꧀ꦮꦴ ꦄꦚ꧀ꦚꦺꦱꦸ ꦏꦸꦭꦺꦱꦸ ꦄꦴꦫꦺꦴꦕꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦕ ꦏꦸꦭꦥꦫꦶꦪꦤ꧀ꦠꦺ ꦕ ꦪꦴ ꦄꦴꦥꦠ꧀ꦠꦶꦪꦺꦴ ꦥꦫꦶꦒ꧀ꦒꦲꦶꦠꦴꦪꦺꦴ ꦲꦺꦴꦤ꧀ꦠꦶ, ꦠꦴ ꦄꦴꦥꦠ꧀ꦠꦶꦪꦺꦴ ꦜꦥꦺꦠ꧀ꦮꦴ ꦪꦴꦤꦶ ꦏꦸꦭꦴꦤꦶ ꦥꦫꦶꦒ꧀ꦒꦲꦶꦠꦴꦤꦶ ꦲꦺꦴꦤ꧀ꦠꦶ, ꦠꦴꦤꦶ ꦏꦸꦭꦴꦤꦶ ꦜꦥꦺꦠ꧀ꦮꦴ ꦄꦚ꧀ꦚꦴꦲꦶ ꦄꦴꦥꦠ꧀ꦠꦷꦲꦶ ꦄꦚ꧀ꦚꦺꦱꦸ ꦏꦸꦭꦺꦱꦸ ꦄꦴꦫꦺꦴꦕꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦤꦺꦮ ꦄꦴꦥꦠ꧀ꦠꦶꦥꦫꦶꦪꦤ꧀ꦠꦺ ꦤ ꦏꦸꦭꦥꦫꦶꦪꦤ꧀ꦠꦺ, ꦄꦤꦴꦥꦠ꧀ꦠꦶ.

꧘꧒. ꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶꦱꦚ꧀ꦚꦷ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦠꦶ, ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦮꦺꦩꦠꦶꦏꦺꦴ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦠꦶ, ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦄꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶꦱꦚ꧀ꦚꦷ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦠꦶ, ꦄꦚ꧀ꦚꦠ꧀ꦫ ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦮꦴ ꦄꦢꦸꦛ꧀ꦜꦸꦭ꧀ꦭꦁ ꦮꦴ ꦄꦗ꧀ꦙꦴꦕꦴꦫꦁ ꦄꦴꦫꦺꦴꦕꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦄꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦄꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦄꦢꦸꦛ꧀ꦜꦸꦭ꧀ꦭꦴꦪ ꦄꦴꦥꦠ꧀ꦠꦶꦪꦴ ꦄꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧘꧓. ꦄꦤꦴꦥꦠ꧀ꦠꦶ ꦮꦠ꧀ꦡꦸꦁ ꦄꦴꦫꦺꦴꦕꦺꦠꦶ ꦤꦺꦴ ꦄꦴꦥꦠ꧀ꦠꦶꦁ, ꦄꦴꦥꦠ꧀ꦠꦶꦁ ꦄꦴꦫꦺꦴꦕꦺꦠꦶ ꦤꦺꦴ ꦮꦠ꧀ꦡꦸꦁ, ꦨꦶꦏ꧀ꦑꦸꦱꦩ꧀ꦩꦸꦠꦶꦪꦴ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦤꦮꦩꦁ.