꧑꧐. ꦥꦡꦮꦷꦑꦟꦤꦱꦶꦏ꧀ꦑꦴꦥꦢꦁ

꧘꧔. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦄꦴꦭ꦳ꦮꦶꦪꦁ ꦮꦶꦲꦫꦠꦶ ꦄꦒ꧀ꦒꦴꦭ꦳ꦮꦺ ꦕꦺꦠꦶꦪꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦭ꦳ꦮꦏꦴ [ꦄꦴꦭ꦳ꦮꦶꦏꦴ (ꦱ꧀ꦪꦴ.)] ꦨꦶꦏ꧀ꦑꦹ ꦤꦮꦏꦩ꧀ꦩꦁ ꦏꦫꦺꦴꦤ꧀ꦠꦴ ꦥꦡꦮꦶꦁ ꦑꦟꦤ꧀ꦠꦶꦥꦶ ꦑꦟꦴꦥꦺꦤ꧀ꦠꦶꦥꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦥꦡꦮꦶꦁ ꦑꦟꦶꦱ꧀ꦱꦤ꧀ꦠꦶꦥꦶ ꦑꦟꦴꦥꦺꦱ꧀ꦱꦤ꧀ꦠꦶꦥꦶ! ꦌꦏꦶꦤ꧀ꦢ꧀ꦫꦶꦪꦁ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦗꦷꦮꦁ ꦮꦶꦲꦺꦜꦺꦤ꧀ꦠꦷ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦭ꦳ꦮꦏꦴ ꦨꦶꦏ꧀ꦑꦹ ꦥꦡꦮꦶꦁ ꦑꦟꦶꦱ꧀ꦱꦤ꧀ꦠꦶꦥꦶ ꦑꦟꦴꦥꦺꦱ꧀ꦱꦤ꧀ꦠꦶꦥꦷ’’ꦠꦶ…ꦥꦺ… ‘‘ꦱꦕ꧀ꦕꦁ ꦏꦶꦫ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦥꦡꦮꦶꦁ ꦑꦟꦡꦥꦶ ꦑꦟꦴꦥꦺꦡꦥꦷ’’ꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ, ꦩꦺꦴꦓꦥꦸꦫꦶꦱꦴ, ꦥꦡꦮꦶꦁ ꦑꦟꦶꦱ꧀ꦱꦡꦥꦶ ꦑꦟꦴꦥꦺꦱ꧀ꦱꦡꦥꦶ! ꦗꦷꦮꦱꦚ꧀ꦚꦶꦤꦺꦴ ꦲꦶ, ꦩꦺꦴꦓꦥꦸꦫꦶꦱꦴ, ꦩꦤꦸꦱ꧀ꦱꦴ ꦥꦡꦮꦶꦪꦴ. ꦤꦺꦠꦁ, ꦩꦺꦴꦓꦥꦸꦫꦶꦱꦴ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧘꧕. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦥꦡꦮꦶꦁ ꦑꦟꦺꦪ꧀ꦪ ꦮꦴ ꦑꦟꦴꦥꦺꦪ꧀ꦪ ꦮꦴ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧘꧖. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦥꦡꦮꦷ ꦤꦴꦩ ꦢ꧀ꦮꦺ ꦥꦡꦮꦶꦪꦺꦴ – ꦗꦴꦠꦴ ꦕ ꦥꦡꦮꦷ ꦄꦗꦴꦠꦴ ꦕ ꦥꦡꦮꦷ.

ꦗꦴꦠꦴ ꦤꦴꦩ ꦥꦡꦮꦷ – ꦱꦸꦢ꧀ꦣꦥꦁꦱꦸ ꦱꦸꦢ꧀ꦣꦩꦠ꧀ꦠꦶꦏꦴ ꦄꦥ꧀ꦥꦥꦴꦱꦴꦟꦴ ꦄꦥ꧀ꦥꦱꦏ꧀ꦑꦫꦴ ꦄꦥ꧀ꦥꦏꦜꦭꦴ ꦄꦥ꧀ꦥꦩꦫꦸꦩ꧀ꦧꦴ ꦄꦥ꧀ꦥꦮꦴꦭꦶꦏꦴ, ꦪꦺꦨꦸꦪ꧀ꦪꦺꦤꦥꦁꦱꦸꦏꦴ, ꦪꦺꦨꦸꦪ꧀ꦪꦺꦤꦩꦠ꧀ꦠꦶꦏꦴ. ꦄꦢꦝ꧀ꦞꦴꦥꦶ ꦮꦸꦕ꧀ꦕꦠꦶ ꦗꦴꦠꦴ ꦥꦡꦮꦷ. ꦪꦺꦴꦥꦶ ꦥꦁꦱꦸꦥꦸꦚ꧀ꦗꦺꦴ ꦮꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦮꦴ ꦄꦠꦶꦫꦺꦏꦕꦴꦠꦸꦩꦴꦱꦁ ꦎꦮꦛ꧀ꦜꦺꦴ, ꦄꦪꦩ꧀ꦥꦶ ꦮꦸꦕ꧀ꦕꦠꦶ ꦗꦴꦠꦴ ꦥꦡꦮꦷ.

ꦄꦗꦴꦠꦴ ꦤꦴꦩ ꦥꦡꦮꦷ – ꦱꦸꦢ꧀ꦣꦥꦴꦱꦴꦟꦴ ꦱꦸꦢ꧀ꦣꦱꦏ꧀ꦑꦫꦴ ꦱꦸꦢ꧀ꦣꦏꦜꦭꦴ ꦱꦸꦢ꧀ꦣꦩꦫꦸꦩ꧀ꦧꦴ ꦱꦸꦢ꧀ꦣꦮꦴꦭꦶꦏꦴ ꦄꦥ꧀ꦥꦥꦁꦱꦸꦏꦴ ꦄꦥ꧀ꦥꦩꦠ꧀ꦠꦶꦏꦴ, ꦪꦺꦨꦸꦪ꧀ꦪꦺꦤꦥꦴꦱꦴꦟꦴ, ꦪꦺꦨꦸꦪ꧀ꦪꦺꦤꦱꦏ꧀ꦑꦫꦴ, ꦪꦺꦨꦸꦪ꧀ꦪꦺꦤꦏꦜꦭꦴ, ꦪꦺꦨꦸꦪ꧀ꦪꦺꦤꦩꦫꦸꦩ꧀ꦧꦴ, ꦪꦺꦨꦸꦪ꧀ꦪꦺꦤꦮꦴꦭꦶꦏꦴ. ꦢꦝ꧀ꦞꦴꦥꦶ ꦮꦸꦕ꧀ꦕꦠꦶ ꦄꦗꦴꦠꦴ ꦥꦡꦮꦷ. ꦪꦺꦴꦥꦶ ꦥꦁꦱꦸꦥꦸꦚ꧀ꦗꦺꦴ ꦮꦴ ꦩꦠ꧀ꦠꦶꦏꦴꦥꦸꦚ꧀ꦗꦺꦴ ꦮꦴ ꦎꦩꦏꦕꦴꦠꦸꦩꦴꦱꦁ ꦎꦮꦛ꧀ꦜꦺꦴ, ꦄꦪꦩ꧀ꦥꦶ ꦮꦸꦕ꧀ꦕꦠꦶ ꦄꦗꦴꦠꦴ ꦥꦡꦮꦷ.

ꦑꦟꦺꦪ꧀ꦪꦴꦠꦶ ꦱꦪꦁ ꦑꦟꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦑꦟꦴꦥꦺꦪ꧀ꦪꦴꦠꦶ ꦄꦚ꧀ꦚꦁ ꦄꦴꦟꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦱꦏꦶꦁ ꦄꦴꦟꦠ꧀ꦠꦺꦴ ꦧꦲꦸꦏꦩ꧀ꦥꦶ ꦑꦟꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧘꧗. ꦥꦡꦮꦶꦪꦴ ꦥꦡꦮꦶꦱꦚ꧀ꦚꦷ ꦑꦟꦠꦶ ꦮꦴ ꦑꦟꦴꦥꦺꦠꦶ ꦮꦴ, ꦨꦶꦤ꧀ꦢꦠꦶ ꦮꦴ ꦨꦺꦢꦴꦥꦺꦠꦶ ꦮꦴ, ꦢꦲꦠꦶ ꦮꦴ ꦢꦲꦴꦥꦺꦠꦶ ꦮꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦥꦡꦮꦶꦪꦴ ꦮꦺꦩꦠꦶꦏꦺꦴ ꦑꦟꦠꦶ ꦮꦴ ꦑꦟꦴꦥꦺꦠꦶ ꦮꦴ, ꦨꦶꦤ꧀ꦢꦠꦶ ꦮꦴ ꦨꦺꦢꦴꦥꦺꦠꦶ ꦮꦴ, ꦢꦲꦠꦶ ꦮꦴ ꦢꦲꦴꦥꦺꦠꦶ ꦮꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

ꦥꦡꦮꦶꦪꦴ ꦄꦥꦡꦮꦶꦱꦚ꧀ꦚꦷ ꦑꦟꦠꦶ ꦮꦴ ꦑꦟꦴꦥꦺꦠꦶ ꦮꦴ, ꦨꦶꦤ꧀ꦢꦠꦶ ꦮꦴ ꦨꦺꦢꦴꦥꦺꦠꦶ ꦮꦴ, ꦢꦲꦠꦶ ꦮꦴ ꦢꦲꦴꦥꦺꦠꦶ ꦮꦴ, ꦄꦤꦴꦥꦠ꧀ꦠꦶ.

ꦄꦥꦡꦮꦶꦪꦴ ꦥꦡꦮꦶꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦥꦡꦮꦶꦪꦴ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦥꦡꦮꦶꦪꦴ ꦄꦥꦡꦮꦶꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧘꧘. ꦄꦤꦴꦥꦠ꧀ꦠꦶ – ‘‘ꦆꦩꦁ ꦗꦴꦤ, ꦆꦩꦁ ꦢꦺꦲꦶ, ꦆꦩꦁ ꦄꦴꦲꦫ, ꦆꦩꦶꦤꦴ ꦄꦠ꧀ꦡꦺꦴ, ꦆꦩꦁ ꦏꦥ꧀ꦥꦶꦪꦁ ꦏꦫꦺꦴꦲꦷ’’ꦠꦶ ꦨꦟꦠꦶ, ꦄꦱꦚ꧀ꦕꦶꦕ꧀ꦕ, ꦄꦱꦠꦶꦪꦴ, ꦄꦗꦴꦤꦤ꧀ꦠꦱ꧀ꦱ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦥꦡꦮꦷꦑꦟꦤꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦢꦱꦩꦁ.

ꦩꦸꦱꦴꦮꦴꦢꦮꦒ꧀ꦒꦺꦴ ꦥꦜꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦩꦸꦱꦴ ꦎꦩꦱꦥꦺꦱꦸꦚ꧀ꦚꦁ, ꦥꦢꦱꦺꦪ꧀ꦪꦴꦪ ꦮꦺ ꦢꦸꦮꦺ;

ꦄꦚ꧀ꦚꦠ꧀ꦫ ꦮꦶꦚ꧀ꦚꦸꦤꦴ ꦨꦹꦠꦴ, ꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦶ ꦑꦟꦤꦴꦠꦶ.