꧗. ꦠꦠꦸꦠ꧀ꦠꦫꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

꧕꧒꧒. ꦱꦠ꧀ꦠꦩꦺ ꦥꦴꦭ꦳ꦶꦪꦁ ꦥꦒ꧀ꦒꦴꦲꦶꦏꦱꦴꦭꦤ꧀ꦠꦶ ꦢꦸꦱ꧀ꦱꦮꦴꦟꦶꦗꦏꦴꦤꦁ ꦄꦴꦥꦟꦁ. ‘‘ꦥꦒ꧀ꦒꦴꦲꦶꦠꦱꦴꦭ’’ꦤ꧀ꦠꦶꦥꦶ ꦥꦜꦤ꧀ꦠꦶ.

꧕꧒꧓-꧕꧒꧔. ꦄꦨꦷꦠꦶ ꦈꦥꦱꦒ꧀ꦒꦺꦴꦠꦶ ꦠꦱ꧀ꦱ ꦮꦶꦱꦺꦱꦠ꧀ꦡꦴꦨꦴꦮꦁ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦲꦫꦶꦠꦸꦤ꧀ꦠꦶ ꦄꦠ꧀ꦡꦺꦴ’’ꦠꦶ. ꦮꦫ-ꦱꦢ꧀ꦢꦱ꧀ꦱ ꦆꦕ꧀ꦖꦴꦪꦁ ꦮꦠ꧀ꦠꦩꦴꦤꦠ꧀ꦠꦴ ꦄꦴꦲ ‘‘ꦆꦕ꧀ꦖꦴꦥꦺꦪ꧀ꦪꦴ’’ꦠꦶ. ꦢꦛ꧀ꦜꦸ ꦑꦺꦩꦠꦺꦴꦠꦶ ꦌꦠ꧀ꦡ ꦒꦴꦡꦴꦧꦤ꧀ꦣꦮꦱꦺꦤ ꦄꦤꦸꦤꦴꦱꦶꦏꦭꦺꦴꦥꦺꦴ ꦢꦛ꧀ꦜꦧ꧀ꦧꦺꦴ. ꦱꦄꦤ꧀ꦠꦫꦤ꧀ꦠꦶ ꦄꦤ꧀ꦠꦫꦮꦴꦱꦏꦱꦲꦶꦠꦁ. ꦈꦠ꧀ꦠꦫꦤ꧀ꦠꦶ ꦈꦠ꧀ꦠꦫꦴꦱꦔ꧀ꦒꦁ. ꦄꦱ꧀ꦱ ꦕꦷꦮꦫꦱ꧀ꦱꦴꦠꦶ ꦱꦴꦢꦶꦠꦧ꧀ꦧꦕꦷꦮꦫꦱ꧀ꦱ. ꦄꦕ꧀ꦖꦶꦤ꧀ꦤꦱꦧ꧀ꦧꦕꦷꦮꦫꦺꦤꦴꦠꦶ ꦄꦕ꧀ꦖꦶꦤ꧀ꦤꦴꦤꦶ ꦱꦧ꧀ꦧꦴꦤꦶ ꦠꦷꦟꦶ ꦕꦷꦮꦫꦴꦤꦶ ꦄꦱ꧀ꦱꦴꦠꦶ ꦄꦕ꧀ꦖꦶꦤ꧀ꦤꦱꦧ꧀ꦧꦕꦷꦮꦫꦺꦴ, ꦠꦺꦤꦴꦠꦶ ꦄꦠ꧀ꦡꦺꦴ. ꦪꦱ꧀ꦱ ꦲꦶ ꦄꦕ꧀ꦖꦶꦤ꧀ꦢꦤꦱꦩꦪꦺ ꦠꦷꦟꦶ ꦕꦷꦮꦫꦴꦤꦶ ꦱꦤ꧀ꦤꦶꦲꦶꦠꦴꦤꦶ ꦲꦺꦴꦤ꧀ꦠꦶ, ꦠꦴꦤꦶ ꦱꦧ꧀ꦧꦴꦤꦶ ꦄꦕ꧀ꦖꦶꦤ꧀ꦤꦴꦤꦷꦠꦶ ꦱꦺꦴ ‘‘ꦄꦕ꧀ꦖꦶꦤ꧀ꦤꦱꦧ꧀ꦧꦕꦷꦮꦫꦺꦴ’’ꦠꦶ ꦮꦸꦕ꧀ꦕꦠꦶ. ꦠꦺꦤꦺꦮ ‘‘ꦄꦕ꧀ꦖꦶꦤ꧀ꦤꦱꦧ꧀ꦧꦕꦷꦮꦫꦺꦤ ꦠꦶꦕꦷꦮꦫꦏꦺꦤꦴ’’ꦠꦶ ꦮꦸꦠ꧀ꦠꦁ. ꦠꦶꦕꦷꦮꦫꦏꦺꦤꦴꦠꦶ ꦲꦶ ꦄꦕ꧀ꦖꦶꦤ꧀ꦢꦤꦱꦩꦪꦺ ꦠꦶꦕꦷꦮꦫꦱ꧀ꦱ ꦱꦤ꧀ꦤꦶꦲꦶꦠꦨꦴꦮꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦥꦤ ꦮꦶꦤꦪꦠꦺꦕꦷꦮꦫꦶꦏꦨꦴꦮꦁ ꦣꦸꦠꦔ꧀ꦒꦠꦺꦕꦷꦮꦫꦶꦏꦨꦴꦮꦁ ꦮꦴ ꦱꦤ꧀ꦣꦴꦪ. ꦌꦮꦁ ꦥꦛꦶꦥꦗ꧀ꦗꦶꦠꦧ꧀ꦧꦤ꧀ꦠꦶ ‘‘ꦱꦤ꧀ꦠꦫꦸꦠ꧀ꦠꦫꦥꦫꦩꦁ ꦠꦺꦤ ꦨꦶꦏ꧀ꦑꦸꦤꦴ ꦠꦠꦺꦴ ꦕꦷꦮꦫꦁ ꦱꦴꦢꦶꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦮꦶꦣꦶꦤꦴ ꦥꦛꦶꦥꦗ꧀ꦗꦶꦠꦧ꧀ꦧꦁ. ꦄꦚ꧀ꦚꦺꦤꦴꦠꦶ ꦄꦕ꧀ꦖꦶꦤ꧀ꦤꦄꦱꦧ꧀ꦧꦕꦷꦮꦫꦺꦤ. ꦪꦱ꧀ꦱ ꦠꦷꦱꦸ ꦕꦷꦮꦫꦺꦱꦸ ꦌꦏꦁ ꦮꦴ ꦢ꧀ꦮꦺ ꦮꦴ ꦕꦷꦮꦫꦴꦤꦶ ꦄꦕ꧀ꦖꦶꦤ꧀ꦤꦴꦤꦶ ꦲꦺꦴꦤ꧀ꦠꦶ, ꦠꦺꦤꦴꦠꦶ ꦄꦠ꧀ꦡꦺꦴ. ꦄꦚ꧀ꦚꦡꦴꦥꦷꦠꦶ ‘‘ꦱꦤ꧀ꦠꦫꦸꦠ꧀ꦠꦫꦥꦫꦩ’’ꦤ꧀ꦠꦶ ꦮꦸꦠ꧀ꦠꦮꦶꦣꦴꦤꦠꦺꦴ ꦄꦚ꧀ꦚꦡꦴꦥꦶ. ꦪꦱ꧀ꦱ ꦲꦶ ꦠꦷꦱꦸ ꦢ꧀ꦮꦺ ꦕꦷꦮꦫꦴꦤꦶ ꦄꦕ꧀ꦖꦶꦤ꧀ꦤꦴꦤꦶ ꦲꦺꦴꦤ꧀ꦠꦶ, ꦌꦏꦁ ꦱꦴꦢꦶꦠꦧ꧀ꦧꦁ. ꦌꦏꦱ꧀ꦩꦶꦁ ꦄꦕ꧀ꦖꦶꦤ꧀ꦤꦺ ꦤ ꦱꦴꦢꦶꦠꦧ꧀ꦧꦤ꧀ꦠꦶ ꦤ ꦠꦱ꧀ꦱ ꦱꦤ꧀ꦠꦫꦸꦠ꧀ꦠꦫꦥꦫꦩꦱꦴꦢꦶꦪꦤꦁ ꦱꦩ꧀ꦨꦮꦠꦶ, ꦄꦪꦩꦺꦮ ꦕ ꦄꦠ꧀ꦡꦺꦴ ꦥꦢꦨꦴꦗꦤꦺꦤ ꦮꦶꦨꦴꦮꦶꦠꦺꦴ. ꦠꦺꦤꦴꦲ ‘‘ꦠꦁ ꦮꦶꦨꦴꦒꦁ ꦢꦱ꧀ꦱꦺꦠꦸ’’ꦤ꧀ꦠꦶ.

ꦏꦺꦕꦶ ꦥꦤ ‘‘ꦠꦶꦕꦷꦮꦫꦏꦺꦤꦴꦠꦶ ꦮꦸꦠ꧀ꦠꦠ꧀ꦠꦴ ꦠꦶꦕꦷꦮꦫꦁ ꦥꦫꦶꦏ꧀ꦑꦴꦫꦕꦺꦴꦭ꦳ꦮꦱꦺꦤ ꦄꦣꦶꦛ꧀ꦜꦲꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦺꦴ ꦠꦱ꧀ꦩꦶꦁ ꦤꦛ꧀ꦜꦺ ꦧꦲꦹꦤꦶꦥꦶ ꦒꦲꦺꦠꦸꦁ ꦭꦨꦠꦷ’’ꦠꦶ ꦮꦢꦤ꧀ꦠꦶ, ꦠꦁ ꦤ ꦒꦲꦺꦠꦧ꧀ꦧꦁ. ꦥꦢꦨꦴꦗꦤꦱ꧀ꦱ ꦲꦶ ꦄꦣꦶꦥ꧀ꦥꦴꦪꦁ ꦢꦱ꧀ꦱꦺꦤ꧀ꦠꦺꦤ ꦪꦱ꧀ꦩꦴ ꦥꦤ ‘‘ꦄꦕ꧀ꦖꦶꦤ꧀ꦤꦱꦧ꧀ꦧꦕꦷꦮꦫꦺꦤ…ꦥꦺ… ꦠꦁ ꦮꦶꦨꦴꦒꦁ ꦢꦱ꧀ꦱꦺꦠꦸ’’ꦤ꧀ꦠꦶ ꦮꦸꦠ꧀ꦠꦁ, ꦥꦢꦨꦴꦗꦤꦺ ꦕ ꦤ ꦠꦴꦢꦶꦱꦺꦴ ꦄꦠ꧀ꦡꦺꦴ ꦈꦥꦭꦧ꧀ꦨꦠꦶ, ꦠꦱ꧀ꦩꦴ ꦠꦁ ꦤ ꦒꦲꦺꦠꦧ꧀ꦧꦩꦺꦮ. ꦪꦩ꧀ꦥꦶ ꦩꦴꦠꦶꦏꦴꦛ꧀ꦜꦏꦡꦴꦪꦁ (ꦏꦔ꧀ꦑꦴ. ꦄꦛ꧀ꦜ. ꦠꦠꦸꦠ꧀ꦠꦫꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ) ꦮꦸꦠ꧀ꦠꦁ ‘‘ꦪꦱ꧀ꦱ ꦄꦣꦶꦛ꧀ꦜꦶꦠꦕꦷꦮꦫꦱ꧀ꦱ ꦠꦷꦟꦶ ꦤꦛ꧀ꦜꦴꦤꦷ’’ꦠꦶ, ꦠꦠ꧀ꦡꦴꦥꦶ ꦄꦣꦶꦛ꧀ꦜꦶꦠꦒ꧀ꦒꦲꦟꦁ ꦱꦫꦹꦥꦏꦡꦤꦩꦠ꧀ꦠꦤ꧀ꦠꦶ ꦒꦲꦺꦠꦧ꧀ꦧꦁ, ꦤ ꦥꦤ ꦠꦶꦕꦷꦮꦫꦴꦣꦶꦛ꧀ꦜꦴꦤꦺꦤ ꦄꦣꦶꦛ꧀ꦜꦶꦠꦕꦷꦮꦫꦱ꧀ꦱꦺꦮꦴꦠꦶ ꦌꦮꦩꦠ꧀ꦡꦺꦴ ꦒꦲꦺꦠꦧ꧀ꦧꦺꦴ ꦥꦴꦭ꦳ꦶꦪꦁ ꦄꦛ꧀ꦜꦏꦡꦴꦪꦚ꧀ꦕ ꦠꦡꦴ ꦄꦠ꧀ꦡꦱ꧀ꦱ ꦄꦱꦩ꧀ꦨꦮꦠꦺꦴ. ꦤ ꦲꦶ ꦠꦶꦕꦷꦮꦫꦴꦣꦶꦛ꧀ꦜꦴꦤꦺꦤ ꦄꦣꦶꦛ꧀ꦜꦶꦠꦕꦷꦮꦫꦱ꧀ꦱꦺꦮ ꦆꦢꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦤ꧀ꦠꦶ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ. ꦥꦸꦫꦶꦩꦱꦶꦏ꧀ꦑꦴꦥꦢꦺꦤ ꦲꦶ ꦄꦕ꧀ꦖꦶꦤ꧀ꦤꦕꦷꦮꦫꦱ꧀ꦱ ꦄꦚ꧀ꦚꦴꦠꦏꦮꦶꦚ꧀ꦚꦠ꧀ꦠꦶꦪꦴ ꦄꦤꦸꦚ꧀ꦚꦴꦠꦠ꧀ꦠꦴ ꦥꦩꦴꦟꦁ ꦄꦗꦴꦤꦶꦠ꧀ꦮꦴ ꦮꦶꦚ꧀ꦚꦴꦥꦤꦮꦠ꧀ꦡꦸꦱ꧀ꦩꦶꦁ ꦥꦩꦴꦟꦠꦺꦴ ꦱꦴꦢꦶꦪꦤꦁ ꦄꦤꦸꦗꦴꦤꦤ꧀ꦠꦺꦤ ꦨꦒꦮꦠꦴ ꦆꦢꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ, ꦠꦱ꧀ꦩꦴ ‘‘ꦥꦫꦶꦏ꧀ꦑꦴꦫꦕꦺꦴꦭ꦳ꦶꦏꦱ꧀ꦱ ꦧꦲꦸꦩ꧀ꦥꦶ ꦱꦴꦢꦶꦠꦸꦁ ꦮꦛ꧀ꦛꦠꦷ’’ꦠꦶ ꦄꦪꦩꦠ꧀ꦡꦺꦴ ꦤꦺꦮ ꦥꦴꦭ꦳ꦶꦪꦴ ꦱꦩꦺꦠꦶ, ꦤ ꦕ ꦨꦒꦮꦠꦺꦴ ꦄꦣꦶꦥ꧀ꦥꦴꦪꦁ ꦄꦤꦸꦭꦺꦴꦩꦺꦠꦶ.

ꦪꦱ꧀ꦱ ꦠꦷꦟꦶ ꦤꦛ꧀ꦜꦴꦤꦶ, ꦠꦺꦤ ꦢ꧀ꦮꦺ ꦱꦴꦢꦶꦠꦧ꧀ꦧꦴꦤꦷꦠꦶ ꦌꦠ꧀ꦡ ꦪꦱ꧀ꦱ ꦠꦶꦕꦷꦮꦫꦠꦺꦴ ꦄꦣꦶꦏꦩ꧀ꦥꦶ ꦕꦷꦮꦫꦁ ꦄꦚ꧀ꦚꦠ꧀ꦡ ꦜꦶꦠꦁ ꦄꦠ꧀ꦡꦶ, ꦠꦢꦴꦠꦱ꧀ꦱ ꦕꦷꦮꦫꦱ꧀ꦱ ꦄꦭꦧ꧀ꦨꦤꦷꦪꦨꦴꦮꦠꦺꦴ ꦠꦺꦤꦥꦶ ꦱꦴꦢꦶꦠꦸꦁ ꦮꦛ꧀ꦛꦠꦷꦠꦶ ꦮꦺꦢꦶꦠꦧ꧀ꦧꦁ. ꦥꦏꦠꦶꦪꦴꦮ ꦱꦤ꧀ꦠꦫꦸꦠ꧀ꦠꦫꦺꦤ ꦕꦫꦠꦷꦠꦶ ꦱꦴꦱꦔ꧀ꦏꦱꦶꦏ꧀ꦑꦴꦥꦢꦮꦱꦺꦤ ꦮꦴ ꦄꦮꦶꦥ꧀ꦥꦮꦴꦱꦱꦩ꧀ꦩꦸꦠꦶꦮꦱꦺꦤ ꦮꦴ ꦠꦠꦶꦪꦱ꧀ꦱ ꦄꦭꦴꦨꦺꦤ ꦮꦴ ꦕꦫꦠꦶ. ‘‘ꦢ꧀ꦮꦺ ꦤꦛ꧀ꦜꦴꦤꦷ’’ꦠꦶ ꦄꦣꦶꦏꦴꦫꦠ꧀ꦠꦴ ꦮꦸꦠ꧀ꦠꦁ ‘‘ꦢ꧀ꦮꦺ ꦱꦴꦢꦶꦠꦧ꧀ꦧꦴꦤꦷ’’ꦠꦶ. ꦌꦏꦁ ꦱꦴꦢꦶꦪꦤ꧀ꦠꦺꦤꦺꦮ ꦱꦩꦺꦴ ꦨꦮꦶꦱ꧀ꦱꦠꦷꦠꦶ ꦠꦶꦟ꧀ꦟꦁ ꦕꦷꦮꦫꦴꦤꦁ ꦢ꧀ꦮꦷꦱꦸ ꦤꦛ꧀ꦜꦺꦱꦸ ꦌꦏꦁ ꦱꦴꦢꦶꦪꦤ꧀ꦠꦺꦤ ꦱꦩꦺꦴ ꦨꦮꦶꦱ꧀ꦱꦠꦶ ꦈꦨꦶꦤ꧀ꦤꦩ꧀ꦥꦶ ꦱꦤ꧀ꦠꦫꦸꦠ꧀ꦠꦫꦥꦫꦩꦠꦴꦪ ꦄꦮꦛ꧀ꦜꦴꦤꦠꦺꦴ. ꦪꦱ꧀ꦱ ꦌꦏꦁꦪꦺꦮ ꦲꦺꦴꦠꦷꦠꦶ ꦄꦚ꧀ꦚꦺꦤ ꦏꦺꦤꦕꦶ ꦏꦴꦫꦟꦺꦤ ꦮꦶꦤꦛ꧀ꦜꦱꦺꦱꦕꦷꦮꦫꦁ ꦱꦤ꧀ꦣꦴꦪ ꦮꦸꦠ꧀ꦠꦁ.

꧕꧒꧖. ‘‘ꦱꦺꦱꦏꦁ ꦠꦸꦪ꧀ꦲꦺꦮ ꦲꦺꦴꦠꦹꦠꦶ ꦢꦺꦤ꧀ꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ ‘‘ꦥꦩꦴꦟꦪꦸꦠ꧀ꦠꦁ ꦒꦟ꧀ꦲꦶꦱ꧀ꦱꦴꦩ, ꦱꦺꦱꦏꦁ ꦄꦴꦲꦫꦶꦱ꧀ꦱꦴꦩꦴ’’ꦠꦶ ꦮꦠ꧀ꦮꦴ ꦒꦲꦺꦠ꧀ꦮꦴ ꦒꦩꦤꦱꦩꦪꦺꦥꦶ ‘‘ꦱꦺꦱꦏꦩ꧀ꦥꦶ ꦠꦸꦩ꧀ꦲꦴꦏꦚ꧀ꦚꦺꦮ ꦲꦺꦴꦠꦹ’’ꦠꦶ ꦮꦢꦤ꧀ꦠꦶ, ꦭꦢ꧀ꦣꦏꦥ꧀ꦥꦶꦪꦩꦺꦮ. ꦥꦮꦴꦫꦶꦠꦴꦤꦤ꧀ꦠꦶ ꦄꦕ꧀ꦖꦶꦤ꧀ꦤꦏꦴꦭꦠꦺꦴ ꦥꦸꦧ꧀ꦧꦺꦪꦺꦮ ꦥꦮꦴꦫꦶꦠꦴꦤꦁ. ꦥꦴꦭ꦳ꦶꦪꦴ ꦤ ꦱꦩꦺꦠꦷꦠꦶ ꦱꦤ꧀ꦠꦫꦸꦠ꧀ꦠꦫꦥꦫꦩꦠꦺꦴ ꦈꦠ꧀ꦠꦫꦶ ꦱꦴꦢꦶꦪꦤꦺ ꦄꦤꦴꦥꦠ꧀ꦠꦶꦢꦱ꧀ꦱꦤꦠ꧀ꦡꦁ ‘‘ꦄꦤꦴꦥꦠ꧀ꦠꦶ ꦚꦴꦠꦏꦴꦤꦁ ꦥꦮꦴꦫꦶꦠꦴꦤ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦤ ꦱꦩꦺꦠꦶ. ꦱꦤ꧀ꦠꦫꦸꦠ꧀ꦠꦫꦥꦫꦩꦁ ꦱꦴꦢꦶꦪꦤ꧀ꦠꦱ꧀ꦱ ꦲꦶ ꦄꦴꦥꦠ꧀ꦠꦶꦥ꧀ꦥꦱꦔ꧀ꦒꦺꦴꦪꦺꦮ ꦤꦠ꧀ꦡꦶ, ꦱꦠꦶ ꦕ ꦱꦶꦏ꧀ꦑꦴꦥꦢꦺꦤ ꦄꦴꦥꦠ꧀ꦠꦶꦥ꧀ꦥꦱꦔ꧀ꦒꦺ ꦄꦤꦴꦥꦠ꧀ꦠꦶ ꦪꦸꦠ꧀ꦠꦴ ꦢꦱ꧀ꦱꦺꦠꦸꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦏꦺꦕꦶ ꦥꦤ ‘‘ꦥꦩꦴꦟꦩꦺꦮ ꦮꦛ꧀ꦛꦠꦷꦠꦶ ꦆꦢꦁ ꦱꦭ꧀ꦭꦺꦑꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠ’’ꦤ꧀ꦠꦶ ꦮꦢꦤ꧀ꦠꦶ.

ꦪꦱ꧀ꦩꦴ ꦥꦤꦶꦢꦁ…ꦥꦺ… ꦤ ꦮꦸꦠ꧀ꦠꦤ꧀ꦠꦶ ꦌꦠ꧀ꦡꦴꦪꦩꦣꦶꦥ꧀ꦥꦴꦪꦺꦴ – ‘‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’’ꦠꦶ ꦮꦸꦕ꧀ꦕꦩꦴꦤꦺ ꦄꦚ꧀ꦚꦺꦱꦁ ꦄꦠ꧀ꦡꦴꦪ ꦥꦩꦴꦟꦁ ꦄꦠꦶꦏ꧀ꦏꦩꦶꦠ꧀ꦮꦴꦥꦶ ꦒꦟ꧀ꦲꦶꦠꦸꦁ ꦮꦛ꧀ꦛꦠꦷꦠꦶ ꦄꦴꦥꦗ꧀ꦗꦠꦶ, ꦠꦚ꧀ꦕ ꦄꦚ꧀ꦚꦱ꧀ꦱꦠ꧀ꦡꦴꦪ ꦮꦶꦚ꧀ꦚꦴꦥꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦠ꧀ꦠꦴ ꦮꦠ꧀ꦡꦸꦤꦴ ꦱꦁꦱꦤ꧀ꦢꦶꦪꦩꦴꦤꦁ ꦤ ꦱꦩꦺꦠꦶ. ꦤ ꦲꦶ ꦪꦁ ꦮꦠ꧀ꦡꦸꦁ ꦤꦶꦱ꧀ꦱꦴꦪ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ, ꦠꦱ꧀ꦩꦶꦁꦪꦺꦮ ꦄꦤꦴꦥꦠ꧀ꦠꦶꦮꦕꦤꦁ ꦪꦸꦠ꧀ꦠꦤ꧀ꦠꦶ. ꦒꦟ꧀ꦜꦶꦥꦢꦺꦱꦸ ꦥꦤ ꦠꦷꦱꦸꦥꦶ ‘‘ꦆꦩꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ ꦄꦠ꧀ꦠꦤꦺꦴ ꦱꦴꦢꦶꦪꦤꦥꦛꦶꦧꦢ꧀ꦣꦠꦴꦮꦱꦺꦤ ꦥꦮꦠ꧀ꦠꦠ꧀ꦠꦴ ‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’ꦠꦶ ꦮꦠ꧀ꦠꦸꦁ ꦎꦏꦴꦱꦺꦴꦪꦺꦮ ꦤꦠ꧀ꦡꦶ, ꦠꦱ꧀ꦩꦴ ꦤ ꦮꦸꦠ꧀ꦠ’’ꦤ꧀ꦠꦶ ꦏꦡꦶꦠꦁ. ꦆꦣ ‘‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’’ꦠꦶ ꦄꦮꦸꦠ꧀ꦠꦠ꧀ꦠꦴ ꦄꦚ꧀ꦚꦺꦱꦁ ꦄꦠ꧀ꦡꦴꦪ ꦚꦴꦠꦏꦥꦮꦴꦫꦶꦠꦺꦱꦸ ꦄꦣꦶꦏꦁ ꦮꦶꦚ꧀ꦚꦴꦥꦺꦤ꧀ꦠꦱ꧀ꦱ ꦄꦴꦥꦠ꧀ꦠꦷꦠꦶ ꦕꦺ? ꦤ, ꦠꦠ꧀ꦡ ꦥꦸꦫꦶꦩꦱꦶꦏ꧀ꦑꦴꦥꦢꦺꦤꦺꦮ ꦄꦤꦴꦥꦠ꧀ꦠꦶꦱꦶꦢ꧀ꦣꦶꦠꦺꦴ. ꦠꦠꦸꦠ꧀ꦠꦫꦶꦠꦴ, ꦄꦕ꧀ꦖꦶꦤ꧀ꦤꦴꦢꦶꦏꦴꦫꦟꦠꦴ, ꦄꦚ꧀ꦚꦴꦠꦏꦮꦶꦚ꧀ꦚꦠ꧀ꦠꦶ, ꦠꦴꦪ ꦕ ꦥꦛꦶꦭꦴꦨꦺꦴꦠꦶ ꦆꦩꦴꦤꦺꦠ꧀ꦡ ꦕꦠ꧀ꦠꦴꦫꦶ ꦄꦔ꧀ꦒꦴꦤꦶ.

ꦠꦠꦸꦠ꧀ꦠꦫꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.