꧑꧕. ꦈꦥꦗ꧀ꦙꦴꦕꦫꦶꦪꦮꦠ꧀ꦠꦤꦶꦢ꧀ꦢꦺꦱꦮꦟ꧀ꦟꦤꦴ

꧑꧔꧕. ꦈꦥꦗ꧀ꦙꦴꦕꦫꦶꦪꦺꦠꦶ ꦌꦠ꧀ꦡ (ꦩꦲꦴꦮ. ꧖꧔, ꧖꧗, ꧗꧔, ꧗꧘-꧗꧙; ꦕꦹꦭ꦳ꦮ. ꧓꧗꧕, ꧓꧗꧗; ꧓꧗꧙-꧓꧘꧒; ꦩꦲꦴꦮ. ꦄꦛ꧀ꦜ. ꧖꧔, ꧖꧗, ꧗꧕, ꧗꧖, ꧗꧗) ꦄꦴꦕꦫꦶꦪꦺꦴ ꦤꦴꦩ ꦤꦶꦱ꧀ꦱꦪꦴꦕꦫꦶꦪꦺꦴ ꦥꦧ꧀ꦧꦗ꧀ꦗꦴꦕꦫꦶꦪꦺꦴ ꦈꦥꦱꦩ꧀ꦥꦢꦴꦕꦫꦶꦪꦺꦴ ꦣꦩ꧀ꦩꦴꦕꦫꦶꦪꦺꦴꦠꦶ ꦕꦠꦸꦧ꧀ꦧꦶꦣꦺꦴ. ꦌꦠꦺꦱꦸ ꦲꦶ ꦤꦶꦱ꧀ꦱꦪꦤ꧀ꦠꦺꦮꦴꦱꦶꦏꦺꦤ ꦪꦴꦮ ꦄꦴꦕꦫꦶꦪꦁ ꦤꦶꦱ꧀ꦱꦴꦪ ꦮꦱꦠꦶ, ꦠꦴꦮ ꦱꦧ꧀ꦧꦩꦴꦕꦫꦶꦪꦮꦠ꧀ꦠꦁ ꦏꦴꦠꦧ꧀ꦧꦁ. ꦥꦧ꧀ꦧꦗ꧀ꦗꦴꦈꦥꦱꦩ꧀ꦥꦢꦴꦣꦩ꧀ꦩꦤ꧀ꦠꦺꦮꦴꦱꦶꦏꦺꦲꦶ ꦥꦤ ꦤꦶꦱ꧀ꦱꦪꦩꦸꦠ꧀ꦠꦏꦺꦲꦶꦥꦶ ꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦴꦮ ꦕꦷꦮꦫꦫꦗꦤꦁ, ꦠꦴꦮ ꦮꦠ꧀ꦠꦁ ꦏꦴꦠꦧ꧀ꦧꦁ. ꦄꦤꦴꦥꦸꦕ꧀ꦖꦶꦠ꧀ꦮꦴ ꦥꦠ꧀ꦠꦢꦴꦤꦴꦢꦶꦩ꧀ꦲꦶ ꦥꦤ ꦌꦠꦺꦱꦁ ꦄꦤꦴꦥꦠ꧀ꦠꦶ. ꦌꦠꦺꦱꦸ ꦕ ꦥꦧ꧀ꦧꦗ꧀ꦗꦤ꧀ꦠꦺꦮꦴꦱꦶꦏꦺꦴ ꦕ ꦈꦥꦱꦩ꧀ꦥꦢꦤ꧀ꦠꦺꦮꦴꦱꦶꦏꦺꦴ ꦕ ꦄꦴꦕꦫꦶꦪꦱ꧀ꦱ ꦪꦴꦮꦗꦷꦮꦁ ꦨꦴꦫꦺꦴ, ꦤꦶꦱ꧀ꦱꦪꦤ꧀ꦠꦺꦮꦴꦱꦶꦏꦺꦴ ꦕ ꦣꦩ꧀ꦩꦤ꧀ꦠꦺꦮꦴꦱꦶꦏꦺꦴ ꦕ ꦪꦴꦮ ꦱꦩꦷꦥꦺ ꦮꦱꦠꦶ, ꦠꦴꦮꦢꦺꦮ. ꦱꦸꦛ꧀ꦜꦸ ꦥꦶꦪꦱꦷꦭꦺꦴ ꦱꦸꦥꦺꦱꦭꦺꦴ, ꦱꦶꦏ꧀ꦑꦴꦏꦴꦩꦺꦴꦠꦶ ꦄꦠ꧀ꦡꦺꦴ. ꦢꦤ꧀ꦠꦏꦛ꧀ꦜꦁ ꦢꦺꦤ꧀ꦠꦺꦤ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦩꦲꦤ꧀ꦠꦁ ꦩꦗ꧀ꦙꦶꦩꦁ ꦑꦸꦢ꧀ꦢꦏꦤ꧀ꦠꦶ ꦠꦷꦟꦶ ꦢꦤ꧀ꦠꦏꦛ꧀ꦜꦴꦤꦶ ꦈꦥꦤꦺꦠꦧ꧀ꦧꦴꦤꦶ. ꦠꦺꦱꦸ ꦪꦁ ꦠꦷꦟꦶ ꦢꦶꦮꦱꦴꦤꦶ ꦒꦟ꧀ꦲꦴꦠꦶ, ꦠꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦠꦴꦢꦶꦱꦁꦪꦺꦮ ꦱꦩ꧀ꦩꦴ ꦈꦨꦺꦴꦲꦶ ꦲꦠ꧀ꦡꦺꦲꦶ ꦢꦴꦠꦧ꧀ꦧꦁ. ꦱꦕꦺ ꦪꦁ ꦮꦴ ꦠꦁ ꦮꦴ ꦒꦟ꧀ꦲꦴꦠꦶ, ꦪꦡꦴꦭꦢ꧀ꦣꦁ ꦈꦥꦤꦺꦠꦧ꧀ꦧꦁ. ꦠꦺꦴꦪꦤ꧀ꦠꦶ ꦱꦷꦠꦚ꧀ꦕ ꦈꦟ꧀ꦲꦚ꧀ꦕ ꦈꦢꦏꦁ ꦈꦥꦤꦺꦠ꧀ꦮꦴ ꦪꦁ ꦠꦷꦟꦶ ꦢꦶꦮꦱꦴꦤꦶ ꦮꦭ꦳ꦚ꧀ꦗꦺꦠꦶ, ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦠꦴꦢꦶꦱꦁ ꦈꦥꦤꦺꦠꦧ꧀ꦧꦁ. ꦱꦕꦺ ꦢ꧀ꦮꦺꦥꦶ ꦮꦭ꦳ꦚ꧀ꦗꦺꦠꦶ, ꦢꦸꦮꦶꦣꦩ꧀ꦥꦶ ꦈꦥꦤꦺꦠꦧ꧀ꦧꦁ. ꦱꦕꦺ ꦪꦴꦒꦸ ꦲꦺꦴꦠꦶ, ꦨꦴꦗꦤꦁ ꦣꦺꦴꦮꦶꦠ꧀ꦮꦴ ꦈꦥꦤꦺꦠꦧ꧀ꦧꦁ.

꧑꧔꧖. ꦥꦠ꧀ꦠꦺ ꦮꦠ꧀ꦠꦁ ꦕꦫꦺꦠꦶ ‘‘ꦪꦴꦒꦸꦁ ꦥꦷꦠꦱ꧀ꦱ ꦈꦢꦏꦁ ꦢꦠ꧀ꦮꦴ ꦨꦴꦗꦤꦁ ꦥꦛꦶꦒ꧀ꦒꦲꦺꦠ꧀ꦮꦴ ꦤꦷꦕꦁ ꦏꦠ꧀ꦮꦴ ꦱꦴꦣꦸꦏꦁ ꦄꦥꦫꦶꦓꦁꦱꦤ꧀ꦠꦺꦤ ꦣꦺꦴꦮꦶꦠ꧀ꦮꦴ ꦥꦛꦶꦱꦴꦩꦺꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ ꦥꦠ꧀ꦠꦺ ꦮꦠ꧀ꦠꦁ ꦕꦫꦺꦠꦶ ꦄꦠ꧀ꦡꦺꦴ. ꦒꦴꦩꦥ꧀ꦥꦮꦺꦱꦺ ꦮꦠ꧀ꦠꦁ ꦕꦫꦺꦠꦶ ꦌꦮꦁ ꦱꦧ꧀ꦧꦠ꧀ꦡ. ‘‘ꦱꦕꦺ ꦈꦥꦗ꧀ꦙꦴꦪꦺꦴ ꦮꦴ ꦄꦴꦕꦫꦶꦪꦺꦴ ꦮꦴ ꦒꦴꦩꦁ ꦥꦮꦶꦱꦶꦠꦸꦏꦴꦩꦺꦴ ꦲꦺꦴꦠꦶ, ꦤꦶꦮꦴꦱꦤꦁ ꦢꦴꦠꦧ꧀ꦧꦁ, ꦥꦛꦶꦤꦶꦮꦴꦱꦤꦁ ꦥꦛꦶꦒ꧀ꦒꦲꦺꦠꦧ꧀ꦧꦁ, ꦏꦴꦪꦧꦤ꧀ꦣꦤꦁ ꦢꦴꦠꦧ꧀ꦧꦁ, ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦢꦴꦠꦧ꧀ꦧꦴ, ꦣꦺꦴꦮꦶꦠ꧀ꦮꦴ ꦥꦠ꧀ꦠꦺꦴ ꦱꦺꦴꦢꦏꦺꦴ ꦢꦴꦠꦧ꧀ꦧꦺꦴ’’ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦆꦢꦁ ꦒꦴꦩꦥ꧀ꦥꦮꦺꦱꦤꦺ ꦮꦠ꧀ꦠꦁ ꦤꦴꦩ. ‘‘ꦱꦕꦺ ꦈꦥꦗ꧀ꦙꦴꦪꦺꦴ ꦮꦴ ꦄꦴꦕꦫꦶꦪꦺꦴ ꦮꦴ ꦥꦕ꧀ꦖꦴꦱꦩꦟꦁ ꦄꦴꦏꦔ꧀ꦑꦠꦶ, ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦤ ꦥꦫꦶꦩꦟ꧀ꦝꦭꦁ ꦤꦶꦮꦴꦱꦺꦠ꧀ꦮꦴ ꦏꦴꦪꦧꦤ꧀ꦣꦤꦁ ꦧꦤ꧀ꦣꦶꦠ꧀ꦮꦴ ꦱꦒꦸꦟꦁ ꦏꦠ꧀ꦮꦴ ꦱꦔ꧀ꦓꦴꦛꦶꦪꦺꦴ ꦥꦴꦫꦸꦥꦶꦠ꧀ꦮꦴ ꦒꦟ꧀ꦜꦶꦏꦁ ꦥꦛꦶꦩꦸꦚ꧀ꦕꦶꦠ꧀ꦮꦴ ꦣꦺꦴꦮꦶꦠ꧀ꦮꦴ ꦥꦠ꧀ꦠꦁ ꦒꦲꦺꦠ꧀ꦮꦴ ꦈꦥꦗ꧀ꦙꦴꦪꦱ꧀ꦱ ꦮꦴ ꦄꦴꦕꦫꦶꦪꦱ꧀ꦱ ꦮꦴ ꦥꦕ꧀ꦖꦴꦱꦩꦟꦺꦤ ꦲꦺꦴꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦤꦪꦺꦤ ꦮꦸꦠ꧀ꦠꦁ ꦒꦩꦤꦺ ꦮꦠ꧀ꦠꦁ ꦤꦴꦩ. ‘‘ꦤꦶꦮꦠ꧀ꦠꦤ꧀ꦠꦺꦤ ꦥꦜꦩꦠꦫꦁ ꦄꦴꦒꦤ꧀ꦠ꧀ꦮꦴ ꦄꦴꦱꦤꦁ ꦥꦚ꧀ꦚꦴꦥꦺꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦤꦪꦺꦤ ꦮꦸꦠ꧀ꦠꦁ ꦄꦴꦒꦩꦺ ꦮꦠ꧀ꦠꦁ ꦤꦴꦩ. ‘‘ꦈꦥꦗ꧀ꦙꦴꦪꦩ꧀ꦲꦶ ꦮꦸꦛ꧀ꦜꦶꦠꦺ ꦄꦴꦱꦤꦁ ꦈꦢ꧀ꦣꦫꦶꦠꦧ꧀ꦧꦁ, ꦥꦴꦢꦺꦴꦢꦏꦁ ꦥꦴꦢꦥꦷꦜꦁ ꦥꦴꦢꦏꦡꦭꦶꦏꦁ ꦥꦛꦶꦱꦴꦩꦺꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦌꦮꦁ ꦮꦸꦠ꧀ꦠꦁ ꦄꦴꦱꦤꦴꦢꦷꦱꦸ ꦮꦠ꧀ꦠꦁ ꦤꦴꦩ. ꦈꦥꦴꦲꦤꦴꦪ ꦮꦠ꧀ꦠꦁ ꦤꦴꦩ ‘‘ꦈꦥꦴꦲꦤꦴ ꦥꦸꦚ꧀ꦖꦶꦠꦧ꧀ꦧꦴ, ꦈꦥꦴꦲꦤꦴ ꦥꦸꦚ꧀ꦖꦤ꧀ꦠꦺꦤ ꦥꦜꦩꦁ ꦱꦸꦏ꧀ꦑꦺꦤ ꦕꦺꦴꦭ꦳ꦏꦺꦤ ꦥꦸꦚ꧀ꦖꦶꦠꦧ꧀ꦧꦴ, ꦥꦕ꧀ꦖꦴ ꦄꦭ꧀ꦭꦺꦤꦴ’’ꦠꦶꦄꦴꦢꦶꦤꦴ (ꦕꦹꦭ꦳ꦮ. ꧓꧕꧗, ꧓꧕꧙) ꦮꦸꦠ꧀ꦠꦁ. ꦕꦷꦮꦫꦺ ꦮꦠ꧀ꦠꦁ ꦤꦴꦩ ‘‘ꦱꦕꦺ ꦕꦷꦮꦫꦁ ꦱꦶꦤ꧀ꦤꦁ ꦲꦺꦴꦠꦶ, ꦩꦸꦲꦸꦠ꧀ꦠꦁ ꦈꦟ꧀ꦲꦺ ꦎꦠꦴꦥꦺꦠꦧ꧀ꦧꦁ, ꦤ ꦕ ꦈꦟ꧀ꦲꦺ ꦕꦷꦮꦫꦁ ꦤꦶꦢꦲꦶꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ.

꧑꧔꧗. ꦥꦫꦶꦨꦺꦴꦗꦤꦷꦪꦥꦴꦤꦷꦪ-ꦮꦕ꧀ꦕꦥ꧀ꦥꦱ꧀ꦱꦴꦮꦜꦴꦤꦶꦱꦹꦠꦶ ꦌꦠ꧀ꦡ ꦱꦕꦺ ꦥꦴꦤꦷꦪꦁ ꦤ ꦲꦺꦴꦠꦶ, ꦥꦴꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦱꦕꦺ ꦥꦫꦶꦨꦺꦴꦗꦤꦷꦪꦁ ꦤ ꦲꦺꦴꦠꦶ, ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦴꦥꦺꦠꦧ꧀ꦧꦁ. ꦱꦕꦺ ꦮꦕ꧀ꦕꦏꦸꦛꦶ ꦈꦏ꧀ꦭꦴꦥꦴ ꦲꦺꦴꦠꦶ, ꦮꦕ꧀ꦕꦏꦸꦛꦶ ꦱꦩ꧀ꦩꦗ꧀ꦗꦶꦠꦧ꧀ꦧꦴ. ꦠꦡꦴ ꦥꦱ꧀ꦱꦴꦮꦛ꧀ꦜꦴꦤꦺ ꦌꦮꦁ ꦮꦠ꧀ꦠꦁ ꦕꦫꦶꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ‘‘ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦥꦜꦩꦁ ꦥꦠ꧀ꦠꦕꦷꦮꦫꦁ ꦤꦷꦲꦫꦶꦠ꧀ꦮꦴ ꦌꦏꦩꦤ꧀ꦠꦁ ꦤꦶꦏ꧀ꦑꦶꦥꦶꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦮꦸꦠ꧀ꦠꦁ ꦮꦶꦲꦴꦫꦱꦺꦴꦣꦤꦺ ꦮꦠ꧀ꦠꦁ ꦤꦴꦩ. ‘‘ꦨꦹꦩꦠ꧀ꦡꦫꦟꦁ ꦎꦠꦴꦥꦺꦠ꧀ꦮꦴ ꦱꦺꦴꦣꦺꦠ꧀ꦮꦴ ꦥꦥ꧀ꦦꦺꦴꦛꦺꦠ꧀ꦮꦴ ꦄꦠꦶꦲꦫꦶꦠ꧀ꦮꦴ ꦪꦡꦴꦥꦚ꧀ꦚꦠ꧀ꦠꦁ ꦥꦚ꧀ꦚꦴꦥꦺꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ ꦥꦸꦤ ꦥꦚ꧀ꦚꦴꦥꦤꦺ ꦮꦠ꧀ꦠꦁ ꦤꦴꦩ.

꧑꧔꧘. ꦆꦢꦴꦤꦶ ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦤ ꦌꦮꦁ ꦱꦺꦴꦣꦺꦠꦧ꧀ꦧꦤ꧀ꦠꦶ ꦠꦁ ꦢꦱ꧀ꦱꦺꦠꦸꦁ ‘‘ꦤ ꦥꦥ꧀ꦦꦺꦴꦛꦺꦪ꧀ꦪꦴ’’ꦠꦶꦄꦴꦢꦶꦩꦴꦲ. ꦠꦱ꧀ꦱꦠ꧀ꦡꦺꦴ – ꦮꦶꦲꦴꦫꦁ ꦱꦺꦴꦣꦺꦤ꧀ꦠꦺꦴ ꦨꦶꦏ꧀ꦑꦸ ꦨꦹꦩꦠ꧀ꦡꦫꦟꦴꦢꦶꦱꦪꦤꦴꦱꦤꦁ ꦥꦛꦶꦮꦴꦠꦺ ꦮꦴ ꦥꦔ꧀ꦒꦟꦺ ꦮꦴ ꦥꦴꦤꦷꦪꦱꦴꦩꦤ꧀ꦠꦴ ꦮꦴ ꦤ ꦥꦥ꧀ꦦꦺꦴꦛꦺꦪ꧀ꦪꦴꦠꦶ. ꦥꦔ꧀ꦒꦟꦺꦠꦶ ꦧꦲꦹꦤꦁ ꦱꦤ꧀ꦤꦶꦥꦴꦠꦺ ꦜꦴꦤꦺ.

꧑꧔꧙. ꦤ꧀ꦲꦴꦤꦺꦠꦶ ‘‘ꦱꦕꦺ ꦈꦥꦗ꧀ꦙꦴꦪꦺꦴ ꦤꦲꦴꦪꦶꦠꦸꦏꦴꦩꦺꦴ ꦲꦺꦴꦠꦶ, ꦤꦲꦴꦤꦁ ꦥꦛꦶꦪꦴꦢꦺꦠꦧ꧀ꦧꦁ. ꦱꦕꦺ ꦱꦷꦠꦺꦤ ꦄꦠ꧀ꦡꦺꦴ ꦲꦺꦴꦠꦶ, ꦱꦷꦠꦁ ꦥꦛꦶꦪꦴꦢꦺꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖; ꦕꦹꦭ꦳ꦮ. ꧓꧗꧖) ꦮꦸꦠ꧀ꦠꦁ ꦤꦲꦴꦤꦺ ꦮꦠ꧀ꦠꦁ ꦤꦴꦩ, ‘‘ꦈꦥꦗ꧀ꦙꦴꦪꦱ꧀ꦱ ꦒꦠ꧀ꦠꦠꦺꦴ ꦈꦢꦏꦁ ꦱꦩ꧀ꦩꦗ꧀ꦗꦶꦠꦧ꧀ꦧꦁ, ꦤꦶꦮꦴꦱꦤꦁ ꦢꦴꦠꦧ꧀ꦧ’’ꦤ꧀ꦠꦶꦄꦴꦢꦶꦤꦴ (ꦩꦲꦴꦮ. ꧖꧖; ꦕꦹꦭ꦳ꦮ. ꧓꧗꧖) ꦮꦸꦠ꧀ꦠꦁ ꦤꦲꦴꦠꦱ꧀ꦱ ꦏꦴꦠꦧ꧀ꦧꦁ ꦤꦴꦩ. ꦫꦔ꧀ꦒꦥꦴꦏꦺꦠꦶ ‘‘ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦄꦴꦕꦫꦶꦪꦱ꧀ꦱ ꦫꦗꦤꦁ ꦥꦕꦶꦠꦧ꧀ꦧꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦄꦤ꧀ꦠꦺꦮꦴꦱꦶꦏꦺꦤ ꦥꦕꦶꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ. ꦣꦺꦴꦮꦤꦺꦠꦶ ‘‘ꦱꦕꦺ ꦈꦥꦗ꧀ꦙꦴꦪꦱ꧀ꦱ ꦄꦴꦕꦫꦶꦪꦱ꧀ꦱ ꦕꦷꦮꦫꦁ ꦣꦺꦴꦮꦶꦠꦧ꧀ꦧꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦄꦤ꧀ꦠꦺꦮꦴꦱꦶꦏꦺꦤ ꦣꦺꦴꦮꦶꦠꦧ꧀ꦧꦁ, ꦈꦱ꧀ꦱꦸꦏ꧀ꦏꦁ ꦮꦴ ꦏꦴꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ. ꦱꦶꦧ꧀ꦧꦤꦺꦠꦶ ‘‘ꦱꦕꦺ ꦈꦥꦗ꧀ꦙꦴꦪꦺꦤ ꦄꦴꦕꦫꦶꦪꦺꦤ ꦕꦷꦮꦫꦁ ꦏꦴꦠꦧ꧀ꦧꦁ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦄꦤ꧀ꦠꦺꦮꦴꦱꦶꦏꦺꦤ ꦏꦴꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦮꦸꦠ꧀ꦠꦁ. ꦕꦷꦮꦫꦺ ꦡꦺꦮꦺ ꦜꦶꦠꦺ ꦫꦗꦤ꧀ꦠꦺꦴ ꦤ ꦮꦗꦺ ꦤ ꦥꦏ꧀ꦏꦩꦺꦪ꧀ꦪꦴꦠꦶ ꦄꦠ꧀ꦡꦺꦴ. ‘‘ꦕꦷꦮꦫꦁ ꦫꦗꦤ꧀ꦠꦺꦤ ꦱꦴꦣꦸꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦱꦩ꧀ꦥꦫꦶꦮꦠ꧀ꦠꦏꦁ ꦫꦗꦶꦠꦧ꧀ꦧꦁ, ꦤ ꦕ ꦄꦕ꧀ꦖꦶꦤ꧀ꦤꦺ ꦡꦺꦮꦺ ꦥꦏ꧀ꦏꦩꦶꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖, ꧗꧘; ꦕꦹꦭ꦳ꦮ. ꧓꧗꧖, ꧓꧘꧐) ꦲꦶ ꦮꦸꦠ꧀ꦠꦁ.

꧑꧕꧐. ꦌꦏꦕ꧀ꦕꦱ꧀ꦱꦴꦠꦶ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦮꦶꦱꦨꦴꦒꦱ꧀ꦱ ꦄꦤꦠ꧀ꦡꦏꦴꦩꦱ꧀ꦱ ꦮꦺꦫꦶꦥꦸꦒ꧀ꦒꦭꦱ꧀ꦱ. ꦄꦤꦴꦥꦸꦕ꧀ꦖꦴꦠꦶ ꦄꦴꦕꦫꦶꦪꦸꦥꦗ꧀ꦙꦴꦪꦴꦤꦁ ꦄꦤꦴꦫꦺꦴꦕꦺꦠ꧀ꦮꦴ. ꦏꦶꦚ꧀ꦕꦤꦤ꧀ꦠꦶ ꦪꦁ ꦏꦶꦚ꧀ꦕꦶ.

꧑꧕꧑-꧒. ꦠꦱ꧀ꦱꦴꦠꦶ ꦌꦏꦕ꧀ꦕꦱ꧀ꦱ. ꦤꦶꦤ꧀ꦤꦺꦠꦸꦤ꧀ꦠꦶ ꦤꦷꦲꦫꦶꦠꦸꦁ. ꦏꦶꦕ꧀ꦕꦪꦁ ꦥꦫꦶꦏꦩ꧀ꦩꦁ ꦮꦴꦠꦶ ꦮꦺꦪ꧀ꦪꦴꦮꦕ꧀ꦕꦁ ꦮꦴ ꦥꦶꦛ꧀ꦜꦶꦥꦫꦶꦏꦩ꧀ꦩꦴꦢꦶꦥꦫꦶꦏꦩ꧀ꦩꦁ ꦮꦴ ꦄꦠ꧀ꦠꦤꦴ ꦠꦱ꧀ꦱ ꦏꦴꦠꦸꦁ ꦮꦴ ꦠꦺꦤ ꦄꦠ꧀ꦠꦤꦺꦴ ꦏꦴꦫꦴꦥꦺꦠꦸꦁ ꦮꦴꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

꧑꧕꧓. ꦱꦕꦺ ꦄꦴꦕꦫꦶꦪꦸꦥꦗ꧀ꦙꦴꦪꦴ ꦄꦚ꧀ꦚꦠ꧀ꦡ ꦒꦠꦴ ꦲꦺꦴꦤ꧀ꦠꦶ, ꦥꦫꦶꦮꦺꦟꦁ ꦒꦤ꧀ꦠ꧀ꦮꦴ ꦄꦥꦱ꧀ꦱꦤ꧀ꦠꦺꦲꦶ ꦒꦴꦩꦁ ꦥꦮꦶꦱꦶꦠꦸꦁ ꦮꦛ꧀ꦛꦠꦶ. ꦒꦴꦩꦁ ꦥꦮꦶꦱꦤ꧀ꦠꦺꦴ ꦱꦕꦺ ꦥꦱ꧀ꦱꦠꦶ, ꦄꦴꦥꦸꦕ꧀ꦖꦶꦠꦧ꧀ꦧꦩꦺꦮꦴꦠꦶ ꦮꦢꦤ꧀ꦠꦶ. ‘‘ꦈꦥꦗ꧀ꦙꦴꦪꦁ ꦄꦤꦴꦥꦸꦕ꧀ꦖꦴ ꦤ ꦢꦶꦱꦴ ꦥꦏ꧀ꦏꦩꦶꦠꦧ꧀ꦧꦴ’’ꦠꦶ (ꦩꦲꦴꦮ. ꧖꧖, ꦕꦹꦭ꦳ꦮ. ꧓꧗꧖) ꦲꦶ ꦮꦸꦠ꧀ꦠꦁ. ꦄꦠ꧀ꦠꦤꦺꦴ ꦏꦶꦕ꧀ꦕꦪꦁ ꦤꦴꦩ ꦄꦤ꧀ꦠꦺꦴꦮꦶꦲꦴꦫꦺꦥꦶ ꦄꦠ꧀ꦠꦤꦺꦴ ꦥꦠ꧀ꦠꦥꦕꦤꦕꦷꦮꦫꦏꦩ꧀ꦩꦏꦺꦱꦕ꧀ꦖꦺꦢꦤꦴꦢꦶ.

꧑꧕꧔. ꦱꦔ꧀ꦓꦴꦪꦠ꧀ꦠꦏꦩ꧀ꦩꦴꦤꦶ ꦤꦴꦩ ꦥꦫꦶꦮꦴꦱꦩꦴꦤꦠ꧀ꦠꦄꦧ꧀ꦨꦴꦤꦠꦗ꧀ꦗꦤꦷꦪꦤꦶꦪꦱ꧀ꦱꦥꦧ꧀ꦧꦴꦗꦤꦷꦪꦥꦛꦶꦱꦴꦫꦟꦷꦪꦈꦏ꧀ꦑꦺꦥꦤꦴꦢꦪꦺꦴ.

꧑꧕꧕. ꦮꦸꦛ꧀ꦜꦴꦤꦁ ꦤꦺꦱꦩꦴꦒꦩꦺꦠꦶ ‘‘ꦱꦕꦺ ꦈꦥꦗ꧀ꦙꦴꦪꦺꦴ ꦮꦴ ꦄꦴꦕꦫꦶꦪꦺꦴ ꦮꦴ ꦒꦶꦭꦴꦤꦺꦴ ꦲꦺꦴꦠꦶ, ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ, ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧ’’ꦤ꧀ꦠꦶ (ꦩꦲꦴꦮ. ꧖꧖; ꦕꦹꦭ꦳ꦮ. ꧓꧗꧖) ꦲꦶ ꦮꦸꦠ꧀ꦠꦁ. ꦈꦥꦗ꧀ꦙꦴꦕꦫꦶꦪꦮꦠ꧀ꦠꦮꦶꦤꦶꦕ꧀ꦖꦪꦺꦴ.

ꦈꦥꦗ꧀ꦙꦴꦕꦫꦶꦪꦮꦠ꧀ꦠꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.