꧑꧐. ꦢꦱꦏꦤꦶꦢ꧀ꦢꦺꦱꦺꦴ

ꦥꦜꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧐꧙. ꦤ ꦜꦴꦤꦤ꧀ꦠꦶ ꦄꦛ꧀ꦜꦴꦤꦁ, ꦄꦤꦸꦥꦭꦧ꧀ꦨꦤꦠ꧀ꦡꦺꦴ ꦄꦪꦩꦏꦴꦫꦺꦴꦠꦶ ꦄꦴꦲ ‘‘ꦄꦮꦶꦗ꧀ꦗꦩꦴꦤꦁ ꦜꦴꦤꦁ ꦄꦛ꧀ꦜꦴꦤ’’ꦤ꧀ꦠꦶ. ꦄꦨꦴꦮꦠ꧀ꦡꦺꦴ ꦮꦴ, ꦤ ꦄꦚ꧀ꦚꦥꦛꦶꦥꦏ꧀ꦑꦴꦢꦶꦄꦠ꧀ꦡꦺꦴꦠꦶ ꦄꦴꦲ ‘‘ꦤꦠ꧀ꦡꦶ ꦜꦴꦤꦤ꧀ꦠꦶ ꦮꦴ ꦄꦛ꧀ꦜꦴꦤ’’ꦤ꧀ꦠꦶ. ꦏꦺꦴ ꦥꦤꦺꦠꦱ꧀ꦱ ꦄꦠ꧀ꦡꦢ꧀ꦮꦪꦱ꧀ꦱ ꦮꦶꦱꦺꦱꦺꦴꦠꦶ? ꦥꦜꦩꦺꦴ ꦲꦺꦠꦸꦥꦕ꧀ꦕꦪꦺꦲꦶ ꦄꦤꦸꦥꦭꦧ꧀ꦨꦩꦴꦤꦠꦁ ꦮꦢꦠꦶ, ꦢꦸꦠꦶꦪꦺꦴ ꦱꦧ꧀ꦧꦺꦤ ꦱꦧ꧀ꦧꦁ ꦄꦨꦴꦮꦤ꧀ꦠꦶ ꦄꦪꦩꦺꦠꦺꦱꦁ ꦮꦶꦱꦺꦱꦺꦴ. ꦠꦟ꧀ꦲꦸꦥꦴꦢꦴꦤꦴꦢꦷꦤꦩ꧀ꦥꦶ ꦱꦸꦑꦠꦺꦴ ꦈꦥꦒꦩꦤꦱ꧀ꦱ ꦲꦺꦠꦸꦨꦴꦮꦺ ꦢꦶꦛ꧀ꦜꦶꦮꦶꦥꦭ꧀ꦭꦴꦱꦱ꧀ꦱ ꦱꦺꦴ ꦱꦴꦠꦶꦱꦪꦺꦴ ꦄꦱꦸꦑꦺꦥꦶ ꦢꦭ꦳꧀ꦲꦁ ꦥꦮꦠ꧀ꦠꦴꦥꦤꦠꦺꦴꦠꦶ ꦄꦴꦲ ‘‘ꦢꦶꦛ꧀ꦜꦶꦮꦶꦥꦭ꧀ꦭꦴꦱꦺꦴꦮ…ꦥꦺ… ꦄꦣꦶꦥ꧀ꦥꦺꦠ’’ꦤ꧀ꦠꦶ. ‘‘ꦄꦠ꧀ꦠꦢꦶꦛ꧀ꦜꦶꦮꦱꦺꦤꦴ’’ꦠꦶ ꦏꦱ꧀ꦩꦴ ꦮꦶꦱꦺꦱꦺꦠ꧀ꦮꦴ ꦮꦸꦠ꧀ꦠꦁ, ꦤꦤꦸ ꦄꦫꦶꦪꦱꦴꦮꦏꦱ꧀ꦱ ꦱꦧ꧀ꦧꦴꦥꦶ ꦢꦶꦛ꧀ꦜꦶꦪꦺꦴ ꦤꦠ꧀ꦡꦷꦠꦶ? ꦱꦕ꧀ꦕꦁ ꦤꦠ꧀ꦡꦶ, ꦄꦠ꧀ꦠꦢꦶꦛ꧀ꦜꦶꦱꦤ꧀ꦤꦶꦱ꧀ꦱꦪꦴ ꦥꦤ ꦱꦧ꧀ꦧꦢꦶꦛ꧀ꦜꦶꦪꦺꦴꦠꦶ ꦢꦱ꧀ꦱꦺꦠꦸꦁ ‘‘ꦄꦠ꧀ꦠꦢꦶꦛ꧀ꦜꦶꦮꦱꦺꦤꦴꦠꦶ ꦥꦣꦴꦤꦢꦶꦛ꧀ꦜꦶꦩꦴꦲꦴ’’ꦠꦶ ꦮꦸꦠ꧀ꦠꦁ. ꦨꦺꦢꦴꦤꦸꦫꦹꦥꦱ꧀ꦱ ꦮꦠ꧀ꦡꦸꦤꦺꦴ. ꦨꦺꦢꦴꦤꦸꦫꦹꦥꦺꦤ ‘‘ꦄꦣꦩ꧀ꦩꦺ ꦣꦩ꧀ꦩꦺꦴ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦺꦤ.

ꦱꦺꦴ ꦌꦮꦴꦠꦶ ꦪꦺꦴ ꦭꦶꦔ꧀ꦒꦺ ꦄꦥꦫꦶꦮꦠ꧀ꦠꦺ ꦠꦱ꧀ꦩꦶꦁ ꦄꦠ꧀ꦠꦨꦴꦮꦺ ꦨꦮꦔ꧀ꦒꦗꦷꦮꦶꦠꦶꦤ꧀ꦢ꧀ꦫꦶꦪꦥ꧀ꦥꦧꦤ꧀ꦣꦺꦴ, ꦱꦺꦴ ꦌꦮ. ꦠꦚ꧀ꦲꦶ ꦈꦥꦴꦢꦴꦪ ꦌꦏꦗꦴꦠꦶꦱꦩꦚ꧀ꦚꦴ, ꦤ ꦕꦺꦠ꧀ꦡ ꦨꦴꦮꦏꦭꦴꦥꦗꦷꦮꦶꦠꦶꦤ꧀ꦢ꧀ꦫꦶꦪꦱ꧀ꦱ ꦮꦱꦺꦤ ꦕꦺꦴꦢꦤꦴ ꦏꦴꦠꦧ꧀ꦧꦴ ꦠꦢꦚ꧀ꦚꦱ꧀ꦱꦺꦮ ꦄꦣꦶꦥ꧀ꦥꦺꦠꦠ꧀ꦠꦴ. ꦠꦚ꧀ꦲꦶ ꦠꦠ꧀ꦡ ꦄꦮꦶꦕ꧀ꦖꦺꦢꦮꦸꦠ꧀ꦠꦶꦪꦴ ꦥꦧꦤ꧀ꦣꦮꦺꦴꦲꦴꦫꦁ ꦭꦨꦠꦶ, ꦆꦠꦫꦩ꧀ꦥꦶ ꦮꦴ ꦨꦴꦮꦴꦤꦸꦥꦴꦭꦤꦠꦴꦱꦴꦩꦚ꧀ꦚꦺꦤꦴꦠꦶ ꦄꦤꦺꦴꦏꦴꦱꦴꦮ ꦕꦺꦴꦢꦤꦴ.

ꦱꦥꦠ꧀ꦠꦮꦱꦺꦤ ꦪꦺꦴꦗꦺꦠꦧ꧀ꦧꦤ꧀ꦠꦶ ‘‘ꦱꦥꦠ꧀ꦠꦁ ꦩꦴꦫꦺꦩꦷꦠꦶ ꦄꦨꦶꦱꦤ꧀ꦣꦶꦤꦴ ꦱꦥꦠ꧀ꦠꦺꦤ ꦤꦶꦥꦤ꧀ꦤꦛ꧀ꦜꦴꦤꦺ ꦤꦶꦥꦤ꧀ꦤꦁ ꦩꦤꦸꦱ꧀ꦱꦨꦹꦠꦺꦴ ꦩꦤꦸꦱ꧀ꦱꦨꦹꦠꦁ ꦩꦴꦠꦫꦁ ꦥꦶꦠꦫꦁ ꦮꦴ ꦩꦴꦫꦺꦤ꧀ꦠꦺꦴ’’ꦠꦶꦄꦴꦢꦶꦤꦴ ꦪꦺꦴꦗꦺꦠꦧ꧀ꦧꦁ. ꦱꦧ꧀ꦧꦠ꧀ꦡꦴꦠꦶ ꦕꦠꦹꦱꦸꦥꦶ ꦮꦶꦏꦥ꧀ꦥꦺꦱꦸ. ꦥꦸꦫꦶꦩꦁ ꦄꦨꦶꦱꦤ꧀ꦣꦶꦕꦶꦠ꧀ꦠꦤ꧀ꦠꦶ ꦥꦸꦧ꧀ꦧꦨꦴꦒꦶꦪꦺꦴ ꦩꦫꦟꦴꦣꦶꦥ꧀ꦥꦴꦪꦺꦴ. ꦄꦥ꧀ꦥꦩꦴꦟꦁ ꦠꦺꦤ ꦄꦠ꧀ꦡꦱꦶꦢ꧀ꦣꦶꦪꦴ ꦄꦨꦴꦮꦠꦺꦴ. ꦥꦸꦡꦸꦗ꧀ꦗꦤꦱ꧀ꦱꦺꦮ ꦠꦁ ꦢꦶꦤ꧀ꦤꦁ ꦲꦺꦴꦠꦷꦠꦶ ꦌꦠ꧀ꦡ ꦪꦡꦴ ꦄꦫꦲꦠ꧀ꦠꦁ ꦥꦠ꧀ꦮꦴ ꦥꦫꦶꦨꦸꦠ꧀ꦠꦩ꧀ꦥꦶ ꦥꦸꦡꦸꦗ꧀ꦗꦤꦏꦴꦭꦺ ꦢꦶꦤ꧀ꦤꦁ ꦥꦸꦡꦸꦗ꧀ꦗꦤꦢꦴꦤꦩꦺꦮ ꦲꦺꦴꦠꦶ, ꦌꦮꦁ ꦩꦫꦟꦴꦣꦶꦥ꧀ꦥꦴꦪꦺꦤ ꦥꦸꦡꦸꦗ꧀ꦗꦤꦏꦴꦭꦺ ꦥꦲꦴꦫꦺ ꦢꦶꦤ꧀ꦤꦺ ꦄꦫꦲꦠ꧀ꦠꦁ ꦥꦠ꧀ꦮꦴ ꦠꦺꦤꦺꦮ ꦥꦲꦴꦫꦺꦤ ꦩꦠꦺ ꦏꦱ꧀ꦩꦴ ꦄꦫꦲꦤ꧀ꦠꦓꦴꦠꦺꦴꦪꦺꦮ ꦲꦺꦴꦠꦶ, ꦤ ꦥꦸꦡꦸꦗ꧀ꦗꦤꦓꦴꦠꦺꦴꦠꦶ? ꦮꦶꦱꦺꦱꦱꦩ꧀ꦨꦮꦠꦺꦴ. ꦪꦡꦴ ꦲꦶ ꦢꦴꦤꦁ ꦢꦺꦪ꧀ꦪꦣꦩ꧀ꦩꦱ꧀ꦱ ꦥꦫꦶꦕ꧀ꦕꦴꦒꦩꦠ꧀ꦠꦺꦤ ꦲꦺꦴꦠꦶ, ꦤ ꦌꦮꦁ ꦮꦣꦺꦴ. ꦱꦺꦴ ꦲꦶ ꦥꦴꦟꦺꦴ, ꦥꦴꦟꦱꦚ꧀ꦚꦶꦠꦴ, ꦮꦣꦏꦕꦺꦠꦤꦴ, ꦈꦥꦏ꧀ꦏꦩꦺꦴ, ꦠꦺꦤ ꦩꦫꦟꦤ꧀ꦠꦶ ꦆꦩꦺꦱꦁ ꦥꦚ꧀ꦕꦤ꧀ꦤꦁ ꦄꦔ꧀ꦒꦴꦤꦁ ꦥꦴꦫꦶꦥꦹꦫꦶꦪꦴꦮ ꦲꦺꦴꦠꦶ, ꦤ ꦄꦥꦴꦫꦶꦥꦹꦫꦶꦪꦴ. ꦠꦱ꧀ꦩꦴ ꦄꦫꦲꦠ꧀ꦠꦁ ꦥꦠ꧀ꦠꦱ꧀ꦱꦺꦮ ꦩꦫꦟꦤ꧀ꦠꦶ ꦄꦫꦲꦤ꧀ꦠꦓꦴꦠꦺꦴꦪꦺꦮ ꦲꦺꦴꦠꦶ, ꦤ ꦥꦸꦡꦸꦗ꧀ꦗꦤꦓꦴꦠꦺꦴ. ꦪꦱ꧀ꦩꦴ ꦥꦤ ‘‘ꦆꦩꦁ ꦩꦴꦫꦺꦩꦷ’’ꦠꦶ ꦪꦁ ꦱꦤ꧀ꦠꦴꦤꦁ ꦄꦴꦫꦧ꧀ꦨ ꦩꦴꦫꦟꦶꦕ꧀ꦖꦴ, ꦠꦱ꧀ꦱ ꦥꦸꦡꦸꦗ꧀ꦗꦤꦑꦷꦟꦴꦱꦮꦨꦴꦮꦺꦤ ꦥꦪꦺꦴꦒꦩꦫꦟꦏ꧀ꦑꦟꦴꦤꦁ ꦮꦱꦺꦤ ꦱꦠꦶꦥꦶ ꦱꦤ꧀ꦠꦴꦤꦨꦺꦢꦺ ꦄꦨꦺꦢꦺꦴꦪꦺꦮ. ꦪꦢꦴ ꦕ ꦄꦠ꧀ꦡꦱꦶꦢ꧀ꦣꦶ, ꦠꦢꦴ ꦑꦷꦟꦴꦱꦮꦨꦴꦮꦺꦴ. ꦠꦱ꧀ꦩꦴ ꦄꦫꦲꦤ꧀ꦠꦓꦴꦠꦺꦴꦮ ꦲꦺꦴꦠꦷꦠꦶ ꦤꦶꦕ꧀ꦖꦶꦠꦁ. ꦏꦡꦁ ꦥꦤꦺꦠ꧀ꦡ ꦮꦣꦏꦕꦺꦠꦤꦴ ꦮꦠ꧀ꦠꦩꦴꦤꦮꦶꦱꦪꦴ ꦱꦶꦪꦴꦠꦶ ꦄꦴꦲ ‘‘ꦮꦣꦏꦕꦶꦠ꧀ꦠꦁ ꦥꦕ꧀ꦕꦸꦥ꧀ꦥꦤ꧀ꦤꦴꦫꦩ꧀ꦩꦟꦩ꧀ꦥꦶ…ꦥꦺ… ꦥꦮꦠ꧀ꦠꦠꦷ’’ꦠꦶ. ꦠꦠ꧀ꦡ ꦥꦧꦤ꧀ꦣꦮꦶꦕ꧀ꦖꦺꦢꦮꦱꦺꦤꦴꦠꦶ ꦪꦺꦤ ꦥꦧꦤ꧀ꦣꦺꦴ ꦮꦶꦕ꧀ꦖꦶꦗ꧀ꦗꦠꦶ, ꦠꦴꦢꦶꦱꦁ ꦥꦪꦺꦴꦒꦁ ꦤꦶꦧ꧀ꦧꦠ꧀ꦠꦺꦠꦷꦠꦶ ꦄꦠ꧀ꦡꦺꦴ. ꦠꦺꦤ ꦪꦢꦴ ꦥꦧꦤ꧀ꦣꦮꦶꦕ꧀ꦖꦺꦢꦺꦴ, ꦠꦢꦴ ꦄꦫꦲꦴꦠꦶ ꦪꦡꦴꦮꦸꦠ꧀ꦠꦁ ꦄꦫꦲꦤ꧀ꦠꦓꦴꦠꦁ ꦥꦠꦶꦛ꧀ꦜꦴꦥꦺꦠꦶ. ꦤ ꦌꦮꦤ꧀ꦠꦶ ꦪꦡꦴ ꦏꦴꦭꦤ꧀ꦠꦫꦴꦥꦺꦏ꧀ꦑꦏꦶꦕ꧀ꦕꦱꦶꦢ꧀ꦣꦁ ꦮꦣꦏꦕꦶꦠ꧀ꦠꦁ, ꦤ ꦌꦮꦁ ꦕꦴꦒꦕꦺꦠꦤꦴ. ‘‘ꦱꦴ ꦲꦷ’’ꦠꦶꦄꦴꦢꦶꦤꦴ ꦕꦴꦒꦕꦺꦠꦤꦴꦪ ꦏꦴꦭꦤ꧀ꦠꦫꦴꦤꦥꦺꦏ꧀ꦑꦏꦶꦕ꧀ꦕꦱꦶꦢ꧀ꦣꦶꦠꦁꦪꦺꦮ ꦮꦶꦨꦴꦮꦺꦠꦶ. ꦄꦚ꧀ꦚꦱꦏꦏꦫꦟꦤ꧀ꦠꦶ ꦄꦠ꧀ꦠꦠꦺꦴ ꦮꦶꦤꦶꦩꦺꦴꦕꦺꦠ꧀ꦮꦴ ꦄꦚ꧀ꦚꦱ꧀ꦱ ꦢꦏ꧀ꦑꦶꦟꦺꦪ꧀ꦪꦱ꧀ꦱ ꦱꦤ꧀ꦠꦏꦨꦴꦮꦏꦫꦟꦁ. ꦠꦱ꧀ꦱꦴꦠꦶ ꦕꦗꦶꦠꦧ꧀ꦧꦱ꧀ꦱ ꦮꦠ꧀ꦡꦸꦤꦺꦴ. ꦪꦱ꧀ꦱꦴꦠꦶ ꦪꦱ꧀ꦱ ꦥꦸꦡꦸꦗ꧀ꦗꦤꦱ꧀ꦱ. ꦠꦱ꧀ꦱꦺꦮ ꦠꦁ ꦢꦶꦤ꧀ꦤꦁ ꦲꦺꦴꦠꦶ, ꦱꦕꦺꦥꦶ ꦄꦫꦲꦠ꧀ꦠꦁ ꦥꦠ꧀ꦮꦴ ꦠꦺꦤ ꦥꦫꦶꦨꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ.

‘‘ꦏꦥ꧀ꦥꦮꦶꦤꦴꦱꦺ’’ꦠꦶ ꦆꦢꦁ ‘‘ꦱꦟ꧀ꦜꦲꦤ꧀ꦠꦺ ꦏꦥ꧀ꦥꦺ’’ꦠꦶ ꦮꦸꦠ꧀ꦠꦠ꧀ꦠꦴ ꦩꦲꦴꦏꦥ꧀ꦥꦮꦶꦤꦴꦱꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦏꦥ꧀ꦥꦛ꧀ꦜꦏꦡꦴꦪ ꦤ ꦱꦩꦺꦠꦷ’’ꦠꦶ ꦌꦠ꧀ꦡ ꦄꦴꦪꦸꦏꦥ꧀ꦥꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦄꦴꦪꦸꦏꦥ꧀ꦥꦺꦴ ꦕꦺꦠ꧀ꦡ ꦄꦮꦷꦕꦶꦪꦁ ꦤꦶꦧ꧀ꦧꦠ꧀ꦠꦱꦠ꧀ꦠꦴꦤꦁ ꦄꦤ꧀ꦠꦫꦏꦥ꧀ꦥꦥꦫꦶꦩꦴꦟꦁ ꦥꦫꦩꦴꦪꦸ ꦮꦺꦢꦶꦠꦧ꧀ꦧꦁ. ꦠꦚ꧀ꦲꦶ ꦱꦤ꧀ꦣꦴꦪ ‘‘ꦌꦏꦁ ꦏꦥ꧀ꦥꦁ ꦄꦱꦷꦠꦶꦨꦴꦒꦺ ꦏꦠ꧀ꦮꦴ ꦠꦠꦺꦴ ꦌꦏꦨꦴꦒꦩꦠ꧀ꦠꦁ ꦏꦴꦭ’’ꦤ꧀ꦠꦶ (ꦏꦡꦴ. ꦄꦛ꧀ꦜ. ꧖꧕꧔-꧖꧕꧗) ꦮꦸꦠ꧀ꦠꦁ. ꦠꦪꦶꦢꦁ ‘‘ꦌꦏꦁ ꦏꦥ꧀ꦥ’’ꦤ꧀ꦠꦶ ꦪꦢꦶ ꦌꦏꦁ ꦩꦲꦴꦏꦥ꧀ꦥꦤ꧀ꦠꦶ ꦄꦠ꧀ꦡꦺꦴ, ꦠꦡꦴ ꦱꦠꦶ ꦮꦷꦱꦠꦶꦄꦤ꧀ꦠꦫꦏꦥ꧀ꦥꦥꦫꦶꦩꦴꦟꦺꦴ ꦌꦏꦺꦴ ꦄꦱꦔ꧀ꦑ꧀ꦪꦺꦪ꧀ꦪꦏꦥ꧀ꦥꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦡ ꦌꦏꦁ ꦄꦱꦔ꧀ꦑ꧀ꦪꦺꦪ꧀ꦪꦏꦥ꧀ꦥꦤ꧀ꦠꦶ ꦄꦠ꧀ꦡꦺꦴ, ꦱꦧ꧀ꦧꦡꦴꦥꦶ ‘‘ꦕꦠꦸꦱꦛ꧀ꦜꦶ ꦄꦤ꧀ꦠꦫꦏꦥ꧀ꦥꦴ’’ꦠꦶ ꦮꦕꦤꦺꦤ ꦮꦶꦫꦸꦗ꧀ꦙꦠꦷꦠꦶ ꦮꦷꦩꦁꦱꦶꦠꦧ꧀ꦧꦁ. ꦪꦡꦴ ꦥꦤ ꦏꦥ꧀ꦥꦛ꧀ꦜꦏꦡꦴꦪ ꦄꦪꦁ ꦄꦛ꧀ꦜꦏꦡꦴ ꦱꦩꦺꦠꦶ, ꦠꦁ ꦢꦱ꧀ꦱꦺꦠꦸꦁ ‘‘ꦏꦥ꧀ꦥꦮꦶꦤꦴꦱꦺꦪꦺꦮꦴꦠꦶ ꦥꦤꦴ’’ꦠꦶꦄꦴꦢꦶꦩꦴꦲ.

ꦥꦏꦠꦠ꧀ꦠꦺꦴ ꦮꦴ ꦄꦥꦴꦫꦴꦗꦶꦏꦺꦴ. ꦱꦩꦴꦤꦱꦁꦮꦴꦱꦏꦺꦴ ꦏꦩ꧀ꦩꦭꦢ꧀ꦣꦷꦤꦁ ꦮꦱꦺꦤ ꦄꦤꦴꦤꦴꦱꦁꦮꦴꦱꦏꦺꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦤꦶꦪꦠꦱ꧀ꦱ ꦥꦸꦒ꧀ꦒꦭꦱ꧀ꦱ ꦮꦶꦗ꧀ꦗꦩꦴꦤꦠꦁ ꦥꦛꦶꦱꦺꦣꦺꦠ꧀ꦮꦴꦠꦶ ꦪꦺꦴꦗꦤꦴ. ꦠꦠ꧀ꦡ ꦥꦛꦶꦱꦺꦣꦺꦠ꧀ꦮꦴꦠꦶ ‘‘ꦥꦸꦒ꧀ꦒꦭꦺꦴ ꦥꦤ ꦤꦶꦪꦠꦺꦴ ꦤꦴꦩ ꦤꦠ꧀ꦡꦷ’’ꦠꦶ ꦌꦮꦁ ꦥꦛꦶꦱꦺꦣꦺꦠ꧀ꦮꦴ. ꦠꦠ꧀ꦡ ꦏꦴꦫꦟꦩꦴꦲ ‘‘ꦩꦶꦕ꧀ꦖꦠ꧀ꦠꦱꦩ꧀ꦩꦠ꧀ꦠꦤꦶꦪꦠꦣꦩ꧀ꦩꦴꦤꦁ ꦮꦶꦪ ꦱꦨꦴꦮꦠꦺꦴ’’ꦠꦶ. ꦥꦚ꧀ꦚꦠ꧀ꦠꦶꦩꦠ꧀ꦠꦚ꧀ꦲꦺꦠꦁ ꦩꦶꦕ꧀ꦖꦠ꧀ꦠꦱꦩ꧀ꦩꦠ꧀ꦠꦤꦶꦪꦠꦣꦩ꧀ꦩꦤꦶꦱ꧀ꦱꦪꦁ, ꦪꦢꦶꦢꦁ ꦤꦶꦪꦠꦺꦴ ꦥꦸꦒ꧀ꦒꦭꦺꦴꦠꦶ. ꦪꦡꦴꦥꦸꦕ꧀ꦖꦶꦠꦤ꧀ꦠꦶ ‘‘ꦏꦶꦁ ꦥꦸꦧ꧀ꦧꦲꦺꦠꦸ ꦤꦶꦪꦩꦺꦠꦷ’’ꦠꦶꦄꦴꦢꦶꦤꦴ ꦥꦸꦕ꧀ꦖꦶꦠꦥ꧀ꦥꦏꦴꦫꦁ ꦤꦶꦪꦴꦩꦏꦲꦺꦠꦸꦁ. ꦪꦺꦤꦴꦠꦶ ꦪꦺꦤ ꦈꦥꦫꦶꦩꦒ꧀ꦒꦠ꧀ꦠꦪꦮꦶꦥꦱ꧀ꦱꦤꦴꦚꦴꦟꦺꦤ. ꦤꦶꦪꦠꦴꦤꦶꦪꦠꦨꦺꦢꦤ꧀ꦠꦶ ꦱꦺꦴꦠꦴꦥꦤ꧀ꦤꦴꦢꦶꦤꦶꦪꦠꦨꦺꦢꦁ, ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦴꦢꦶꦄꦤꦶꦪꦠꦨꦺꦢꦚ꧀ꦕ. ꦱꦺꦴꦠꦴꦥꦤ꧀ꦤꦺꦴ ꦌꦮ ꦲꦶ ꦌꦏꦺꦴ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦺꦴ ꦤꦴꦩ ꦲꦺꦴꦠꦶ, ꦌꦏꦺꦴ ꦏꦺꦴꦭꦁꦏꦺꦴꦭꦺꦴ ꦤꦴꦩ, ꦌꦏꦺꦴ ꦌꦏꦧꦷꦗꦷ ꦤꦴꦩꦴꦠꦶ ꦱꦺꦴꦠꦴꦥꦤ꧀ꦤꦱ꧀ꦱ ꦤꦶꦪꦠꦨꦴꦮꦺꦴ ꦮꦸꦠ꧀ꦠꦺꦴꦠꦶ ꦄꦴꦲ ‘‘ꦱꦺꦴꦠꦴꦥꦤ꧀ꦤꦺꦴ ꦕ ꦤꦶꦪꦠꦺꦴ’’ꦠꦶ. ꦧ꧀ꦪꦠꦶꦫꦺꦏꦠ꧀ꦡꦺꦴ ꦲꦶ ꦄꦪꦁ ꦕ-ꦱꦢ꧀ꦢꦺꦴ. ꦠꦠꦺꦴ ꦥꦸꦧ꧀ꦧꦺꦠꦶ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦠꦺꦴ ꦥꦸꦧ꧀ꦧꦺ. ‘‘ꦥꦸꦧ꧀ꦧꦲꦺꦠꦸꦏꦶꦕ꧀ꦕꦁ ꦤꦠ꧀ꦡꦷ’’ꦠꦶ ꦆꦢꦁ ꦱꦺꦴꦠꦴꦥꦤ꧀ꦤꦱ꧀ꦱ ꦤꦶꦪꦠꦠꦴꦪ ꦮꦸꦠ꧀ꦠꦠ꧀ꦠꦴ ꦮꦏ꧀ꦑꦩꦴꦤꦚ꧀ꦕ ꦢꦺꦴꦱꦁ ꦲꦢꦪꦺ ꦜꦥꦺꦠ꧀ꦮꦴ ꦮꦸꦠ꧀ꦠꦁ. ꦈꦥꦫꦶꦩꦒ꧀ꦒꦴꦤꦁ ꦱꦈꦥꦤꦶꦱ꧀ꦱꦪꦠ꧀ꦠꦺ ꦥꦜꦩꦩꦒ꧀ꦒꦱ꧀ꦱꦴꦥꦶ ꦱꦈꦥꦤꦶꦱ꧀ꦱꦪꦠꦴ ꦱꦶꦢ꧀ꦣꦴ ꦌꦮꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦪꦢꦶ ꦲꦷ’’ꦠꦶꦄꦴꦢꦶ. ꦠꦚ꧀ꦕ ꦤꦶꦪꦠꦠ꧀ꦠꦁ. ꦄꦱ꧀ꦱꦴꦠꦶ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱ꧀ꦱ.

ꦠꦺꦤꦺꦮ ꦑꦷꦟꦴꦠꦶ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦤꦺꦮ ꦑꦷꦟꦴ. ꦏꦴꦫꦟꦸꦥꦕ꧀ꦖꦺꦢꦺꦤ ꦲꦶ ꦦꦭꦸꦥꦕ꧀ꦖꦺꦢꦺꦴ ꦱꦶꦪꦴ. ꦠꦠꦺꦴꦠꦶ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦴꦢꦶꦠꦺꦴ. ꦱꦴꦠꦶ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦴꦢꦶꦠꦴ. ꦥꦮꦠ꧀ꦠꦶꦠꦺꦴꦠꦶ ꦮꦶꦥꦴꦏꦥ꧀ꦥꦧꦤ꧀ꦣꦠꦺꦴ. ꦠꦺꦤꦴꦠꦶ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦤ. ꦮꦸꦛ꧀ꦜꦴꦤꦺꦠꦶ ꦮꦸꦛ꧀ꦜꦴꦤꦺ ꦱꦠꦶ. ꦏꦴꦫꦟꦺꦤ ꦮꦶꦤꦴ ꦦꦭꦁ ꦤꦠ꧀ꦡꦷꦠꦶ ꦄꦴꦲ ‘‘ꦱꦏ꧀ꦏꦴꦪ…ꦥꦺ… ꦨꦮꦶꦠꦧ꧀ꦧ’’ꦤ꧀ꦠꦶ. ‘‘ꦤꦴꦩꦏꦫꦟꦤꦶꦩꦶꦠ꧀ꦠꦠꦺꦴ’’ꦠꦶ ꦆꦩꦶꦤꦴ ꦤꦴꦩꦏꦫꦟꦲꦺꦠꦸꦠꦴꦪ ꦤꦶꦪꦴꦩꦏꦠꦁ ꦮꦶꦨꦴꦮꦺꦠꦶ ꦌꦏꦧꦷꦗꦶꦄꦴꦢꦶꦱꦩꦚ꧀ꦚꦴꦤꦁ ꦄꦤ꧀ꦮꦠ꧀ꦡꦱꦚ꧀ꦚꦴꦨꦴꦮꦠꦺꦴ. ꦠꦺꦤꦴꦲ ‘‘ꦮꦶꦥꦱ꧀ꦱꦤꦴ…ꦥꦺ… ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ.

ꦄꦴꦢꦶ-ꦱꦢ꧀ꦢꦺꦤ ‘‘ꦌꦏꦺꦴꦩ꧀ꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦱꦷꦠꦷꦨꦹꦠꦺꦴꦱ꧀ꦩꦶ ꦤꦶꦧ꧀ꦧꦸꦠꦺꦴ’’ꦠꦶꦄꦴꦢꦷꦤꦶ (ꦩꦲꦴꦮ. ꧑꧑; ꦏꦡꦴ. ꧔꧐꧕; ꦩ. ꦤꦶ. ꧑.꧒꧘꧕) ꦱꦔ꧀ꦒꦪ꧀ꦲꦤ꧀ꦠꦶ. ꦌꦠ꧀ꦡ ꦕ ‘‘ꦱꦢꦶꦱꦺꦴ ꦩꦺ ꦤ ꦮꦶꦗ꧀ꦗꦠꦶ, ꦌꦏꦺꦴꦩ꧀ꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ (ꦩꦲꦴꦮ. ꧑꧑; ꦏꦡꦴ. ꧔꧐꧕; ꦩ. ꦤꦶ. ꧑.꧒꧘꧕). ‘ꦄꦠ꧀ꦡꦺꦠꦫꦲꦶ ꦄꦚ꧀ꦚꦺ ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ꦨꦒꦮꦠꦴ ꦱꦩꦱꦩꦴ ꦱꦩ꧀ꦧꦺꦴꦣꦶꦪ’ꦤ꧀ꦠꦶ ꦌꦮꦁ ꦥꦸꦛ꧀ꦜꦺꦴ ꦄꦲꦁ, ꦨꦤ꧀ꦠꦺ, ‘ꦤꦺꦴ’ꦠꦶ ꦮꦢꦺꦪ꧀ꦪ’’ꦤ꧀ꦠꦶꦄꦴꦢꦶ (ꦢꦷ. ꦤꦶ. ꧓.꧑꧖꧑) ꦮꦕꦤꦺꦲꦶ ꦆꦩꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦮꦶꦪ ꦄꦚ꧀ꦚꦱ꧀ꦱ ꦧꦸꦢ꧀ꦣꦱ꧀ꦱ ꦄꦚ꧀ꦚꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦈꦥ꧀ꦥꦴꦢꦺꦴ ꦤꦶꦮꦴꦫꦶꦠꦺꦴꦠꦶ ꦢꦛ꧀ꦜꦧ꧀ꦧꦁ. ꦤ ꦲꦶ ꦮꦶꦗ꧀ꦗꦩꦴꦤꦺ ‘‘ꦱꦢꦶꦱꦺꦴ ꦩꦺ ꦤ ꦮꦶꦗ꧀ꦗꦠꦷ’’ꦠꦶꦄꦴꦢꦶ ꦱꦏ꧀ꦏꦴ ꦮꦠ꧀ꦠꦸꦁ. ꦪꦁ ꦥꦤ ꦮꦢꦤ꧀ꦠꦶ ‘‘ꦭꦺꦴꦏꦣꦴꦠꦸꦮꦶꦱꦺꦱꦴꦥꦺꦏ꧀ꦑꦴꦪ ꦮꦸꦠ꧀ꦠ’’ꦤ꧀ꦠꦶ, ꦠꦩ꧀ꦥꦶ ꦤꦠ꧀ꦡꦶ ꦠꦡꦴ ꦮꦶꦱꦺꦱꦤꦱ꧀ꦱ ꦄꦨꦴꦮꦠꦺꦴ, ꦧꦸꦢ꧀ꦣꦴꦤꦸꦨꦴꦮꦱ꧀ꦱ ꦕ ꦄꦱꦩꦠ꧀ꦡꦨꦴꦮꦮꦶꦨꦴꦮꦤꦠꦺꦴ. ꦄꦴꦟꦴꦑꦺꦠ꧀ꦠꦏꦶꦠ꧀ꦠꦤꦚ꧀ꦕꦺꦠ꧀ꦡ ꦣꦩ꧀ꦩꦠꦴꦢꦱ꧀ꦱꦤꦠ꧀ꦡꦁ. ꦱꦏ꧀ꦏꦺꦴꦠꦶ ꦲꦶ ꦨꦒꦮꦴ ꦪꦠ꧀ꦡ ꦪꦠ꧀ꦡ ꦆꦕ꧀ꦖꦠꦶ, ꦠꦠ꧀ꦡ ꦠꦠ꧀ꦡ ꦄꦴꦟꦁ ꦮꦠ꧀ꦠꦺꦠꦸꦁ. ‘‘ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ’’ꦠꦶ ꦕ ꦆꦢꦁ ꦧꦸꦢ꧀ꦣꦑꦺꦠ꧀ꦠꦨꦹꦠꦴꦪ ꦭꦺꦴꦏꦣꦴꦠꦸꦪꦴ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦁ. ꦠꦠ꧀ꦡꦴꦪꦩꦠ꧀ꦡꦺꦴ – ꦧꦸꦢ꧀ꦣꦑꦺꦠ꧀ꦠꦨꦹꦠꦴ ꦌꦏꦴꦮꦴꦪꦁ ꦭꦺꦴꦏꦣꦴꦠꦸ. ꦠꦠ꧀ꦡ ꦌꦏꦱ꧀ꦩꦶꦁ ꦏꦴꦭꦺ ꦌꦏꦺꦴ ꦌꦮ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦈꦥ꧀ꦥꦗ꧀ꦗꦠꦷꦠꦶ. ꦠꦺꦤꦴꦲ ‘‘ꦧꦸꦢ꧀ꦣꦑꦺꦠ꧀ꦠ…ꦥꦺ… ꦄꦣꦶꦥ꧀ꦥꦴꦪꦺꦴ’’ꦠꦶ.

ꦠꦱ꧀ꦩꦴꦠꦶ ꦪꦱ꧀ꦩꦴ ꦈꦥꦱꦩ꧀ꦥꦢꦴꦣꦷꦤꦁ ꦥꦴꦠꦶꦩꦺꦴꦏ꧀ꦑꦁ, ꦈꦥꦱꦩ꧀ꦥꦢꦴ ꦕ ꦥꦧ꧀ꦧꦗ꧀ꦗꦴꦣꦷꦤꦴ, ꦠꦱ꧀ꦩꦴ. ꦥꦴꦠꦶꦩꦺꦴꦏ꧀ꦑꦺ ꦱꦶꦢ꧀ꦣꦺ, ꦱꦶꦢ꧀ꦣꦴꦱꦸ ꦠꦴꦱꦸ ꦥꦧ꧀ꦧꦗ꧀ꦗꦹꦥꦱꦩ꧀ꦥꦢꦴꦱꦸ. ꦠꦠꦺꦴ ꦥꦫꦁ ꦮꦶꦤꦛ꧀ꦜꦁ ꦤꦴꦩ ꦲꦺꦴꦠꦷꦠꦶ ꦥꦕ꧀ꦖꦶꦩꦥꦛꦶꦮꦺꦣꦠꦺꦴ ꦥꦫꦁ ꦥꦛꦶꦮꦺꦣꦱꦴꦱꦤꦁ, ꦥꦕ꧀ꦖꦶꦩꦱꦷꦭꦨꦺꦢꦠꦺꦴ ꦕ ꦥꦫꦁ ꦥꦛꦶꦥꦠ꧀ꦠꦶꦱꦴꦱꦤꦁ ꦮꦶꦤꦛ꧀ꦜꦁ ꦤꦴꦩ ꦲꦺꦴꦠꦷꦠꦶ ꦱꦴꦱꦤꦨꦴꦮꦱꦴꦩꦚ꧀ꦚꦺꦤ ꦥꦤ ꦈꦨꦪꦁ ꦌꦏꦗ꧀ꦙꦁ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ ‘‘ꦥꦕ꧀ꦖꦶꦩ…ꦥꦺ… ꦌꦏꦠꦺꦴ ꦏꦠ꧀ꦮꦴ’’ꦠꦶ ꦄꦴꦲ.

ꦥꦫꦶꦢꦺꦮꦤꦏꦴꦫꦸꦚ꧀ꦚꦤ꧀ꦠꦶ ꦥꦫꦶꦢꦺꦮꦤꦺꦤ ꦏꦫꦸꦟꦴꦪꦶꦠꦧ꧀ꦧꦠꦴ ꦏꦫꦸꦟꦴꦪꦤꦴ.

ꦣꦩ꧀ꦩꦴꦤꦁ ꦱꦨꦴꦮꦮꦶꦱꦺꦱꦺꦴ ꦤ ꦱꦏ꧀ꦏꦴ ꦣꦴꦫꦺꦠꦸꦁ, ꦪꦠꦺꦴ ꦥꦴꦫꦩꦷꦥꦮꦶꦕꦪꦴꦢꦷꦱꦸ ꦈꦢꦏꦥꦫꦶꦪꦤ꧀ꦠꦁ ꦏꦠ꧀ꦮꦴ ꦩꦲꦴꦥꦡꦮꦷꦏꦩ꧀ꦥꦺꦴ ꦄꦲꦺꦴꦱꦶ, ꦄꦨꦶꦱꦩ꧀ꦧꦺꦴꦣꦶꦢꦶꦮꦱꦺ ꦕ ꦜꦥꦺꦠ꧀ꦮꦴ ꦥꦸꦧ꧀ꦧꦸꦠ꧀ꦠꦫꦢꦶꦱꦴꦨꦴꦒꦺ ꦧꦺꦴꦣꦶꦫꦸꦏ꧀ꦑꦩꦹꦭꦺ ꦨꦹꦩꦶꦨꦴꦒꦺꦴ ꦩꦲꦴꦥꦸꦫꦶꦱꦁ ꦣꦴꦫꦺꦠꦸꦁ ꦤꦴꦱꦏ꧀ꦑꦶ, ꦄꦚ꧀ꦚꦢꦠ꧀ꦡꦸ ꦌꦏꦥꦱ꧀ꦱꦺ ꦥꦏ꧀ꦑꦶꦠ꧀ꦠꦄꦠꦶꦨꦴꦫꦨꦫꦶꦠꦤꦴꦮꦴ ꦮꦶꦪ ꦕꦏ꧀ꦏꦮꦴꦭ꦳ꦒꦧ꧀ꦨꦺꦴ ꦮꦶꦥꦫꦶꦮꦠ꧀ꦠꦺꦴ. ‘‘ꦱꦩꦸꦥ꧀ꦥꦴꦢꦶꦏꦴ’’ꦠꦶ ꦮꦠ꧀ꦠꦧ꧀ꦧꦺ ꦱ-ꦏꦴꦫꦺ ꦄ-ꦏꦴꦫꦱ꧀ꦱ ꦄꦴ-ꦏꦴꦫꦺꦴ, ꦌꦏꦱ꧀ꦱ ꦕ ꦥ-ꦏꦴꦫꦱ꧀ꦱ ꦭꦺꦴꦥꦺꦴ ꦏꦠꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦩꦁ ꦈꦢ꧀ꦣꦁ ꦥꦗ꧀ꦗꦠꦷꦠꦶ ꦱꦴꦩꦸꦥꦴꦢꦶꦏꦴ’’ꦠꦶ. ꦱꦩꦁ ꦈꦥꦴꦢꦶꦪꦠꦷꦠꦶ ꦮꦴ ꦱꦩꦸꦥꦴꦢꦴ, ꦱꦩꦸꦥꦴꦢꦴ ꦌꦮ ꦱꦴꦩꦸꦥꦴꦢꦶꦏꦴ, ꦱꦩꦸꦥꦴꦲꦶꦤꦷꦠꦶ ꦄꦠ꧀ꦡꦺꦴ.

ꦱꦤ꧀ꦠꦠꦶꦑꦟꦮꦱꦺꦤꦴꦠꦶ ꦱꦤ꧀ꦠꦠꦶꦮꦱꦺꦤ ꦄꦴꦪꦹꦲꦤꦱꦩꦔ꧀ꦒꦶꦠꦴ, ꦱꦥꦸꦧ꧀ꦧꦥꦕ꧀ꦖꦴꦨꦴꦒꦱ꧀ꦱ ꦒꦲꦟꦮꦱꦺꦤ ꦕꦺꦠꦤꦴꦏ꧀ꦑꦟꦮꦱꦺꦤ ꦕꦺꦠꦤꦴꦱꦩꦔ꧀ꦒꦶꦠꦴꦠꦶ ꦪꦺꦴꦗꦺꦠꦧ꧀ꦧꦴ. ꦌꦏꦱ꧀ꦩꦶꦁ ꦈꦥꦛ꧀ꦜꦶꦠꦺ ꦥꦕ꧀ꦕꦪꦮꦱꦺꦤ ꦠꦢꦚ꧀ꦚꦱ꧀ꦱ ꦈꦥꦛ꧀ꦜꦴꦤꦁ ꦥꦫꦶꦮꦠ꧀ꦠꦤꦁ.

ꦥꦜꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦸꦠꦶꦪꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧑꧐. ꦨꦺꦴꦒꦺ ꦨꦸꦚ꧀ꦗꦶꦠꦸꦁ ꦤ ꦗꦴꦤꦴꦠꦶ, ꦮꦶꦤꦴꦱꦺꦠꦷꦠꦶ ꦪꦺꦴꦗꦤꦴ.

ꦭꦲꦸꦥꦫꦶꦮꦠ꧀ꦠꦶꦠꦴꦪ ꦗꦷꦮꦶꦠꦱ꧀ꦱꦴꦠꦶ ꦄꦣꦶꦥ꧀ꦥꦴꦪꦺꦴ.

ꦤ ꦄꦢꦴꦱꦶ ꦥꦪꦸꦠ꧀ꦠꦮꦴꦕꦴꦪ ꦈꦥ꧀ꦥꦤ꧀ꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦤ.

ꦱꦩ꧀ꦩꦴꦥꦪꦺꦴꦒꦺꦤꦴꦠꦶ ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ.

ꦢꦸꦠꦶꦪꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦚ꧀ꦕꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧑꧓. ꦣꦴꦠꦸꦱꦨꦴꦮꦺꦴꦠꦶ ꦨꦹꦠꦴꦢꦶꦱꦔ꧀ꦑꦴꦠꦣꦴꦠꦹꦤꦁ ꦱꦨꦴꦮꦺꦴ. ꦱꦨꦴꦒꦮꦱꦺꦤ ꦦꦭꦨꦹꦠꦺꦤ. ꦄꦗ꧀ꦙꦴꦱꦪꦣꦴꦠꦸꦥꦫꦶꦕ꧀ꦖꦶꦤ꧀ꦢꦤꦠꦺꦴꦠꦶ ꦄꦗ꧀ꦙꦴꦱꦪꦱꦨꦴꦮꦱ꧀ꦱ ‘‘ꦲꦷꦤꦁ, ꦥꦟꦷꦠ’’ꦤ꧀ꦠꦶ ꦮꦴ ꦥꦫꦶꦕ꧀ꦖꦶꦗ꧀ꦗ ꦗꦴꦤꦤꦠꦺꦴ, ꦮꦸꦛ꧀ꦜꦶꦤꦶꦩꦶꦠ꧀ꦠꦺꦤ ꦮꦶꦪ ꦩꦲꦺꦴꦓꦺꦤ ꦈꦥꦫꦶꦩꦺꦓꦮꦸꦛ꧀ꦜꦶꦪꦴ.

ꦥꦚ꧀ꦕꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦖꦛ꧀ꦜꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

ꦱꦢ꧀ꦢꦠ꧀ꦡꦺꦴ ꦱꦩ꧀ꦨꦮꦠꦶ ꦱꦩꦴꦱꦤ꧀ꦠꦺꦤꦺꦮ ꦠꦡꦴ ꦱꦢ꧀ꦢꦱꦶꦢ꧀ꦣꦶꦠꦺꦴ. ꦠꦺꦱꦤ꧀ꦠꦶ ꦥꦫꦺꦴꦥꦫꦴꦤꦁ ꦮꦶꦱꦢꦴꦮꦶꦱꦢꦴꦤꦁ ꦱꦢ꧀ꦣꦴꦢꦶꦆꦤ꧀ꦢ꧀ꦫꦶꦪꦴꦤꦁ. ꦌꦮꦚ꧀ꦕ ꦏꦠ꧀ꦮꦴꦠꦶ ꦄꦴꦱꦪꦴꦢꦶꦠꦺꦴ ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦱ꧀ꦱ, ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦠꦺꦴ ꦕ ꦄꦣꦶꦩꦸꦠ꧀ꦠꦶꦨꦺꦢꦱ꧀ꦱ ꦮꦶꦱꦶꦛ꧀ꦜꦱꦨꦴꦮꦠ꧀ꦠꦴ ꦌꦮ.

꧘꧑꧕. ‘‘ꦏꦺ ꦥꦤ ꦠꦺ ꦄꦫꦶꦪꦴꦮꦴꦱꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦺ ꦱꦸꦠ꧀ꦠꦺꦤꦺꦮ ꦢꦱ꧀ꦱꦺꦤ꧀ꦠꦺꦴ ‘‘ꦆꦣ, ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦴꦭ꦳ꦶꦁ ꦄꦴꦲꦫꦶꦠ꧀ꦮꦴ ‘‘ꦌꦮꦁ ꦮꦸꦠ꧀ꦠꦴ’’ꦠꦶ ꦤꦶꦒꦩꦺꦠ꧀ꦮꦴ ꦥꦸꦤ ꦩꦒ꧀ꦒꦴꦣꦶꦒꦩꦺꦤꦺꦮ ꦠꦺꦱꦁ ꦄꦣꦶꦒꦩꦁ ꦢꦱ꧀ꦱꦺꦤ꧀ꦠꦺꦴ ‘‘ꦌꦠꦺꦱꦹ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦆꦠꦫꦺꦠꦶ ꦖꦭ꦳ꦔ꧀ꦒꦱꦩꦤ꧀ꦤꦴꦒꦩꦌꦏꦴꦫꦏ꧀ꦑꦴꦱꦔ꧀ꦑꦴꦪꦥꦛꦶꦱꦺꦮꦤꦴꦢꦪꦺꦴ.

꧘꧑꧖. ꦄꦴꦫꦩ꧀ꦩꦟꦱꦤ꧀ꦠꦴꦤꦴꦤꦸꦱꦪꦤꦺꦱꦹꦠꦶ ꦄꦴꦫꦩ꧀ꦩꦟꦴꦤꦸꦱꦪꦤꦁ, ꦱꦤ꧀ꦠꦴꦤꦴꦤꦸꦱꦪꦤꦤ꧀ꦠꦶ ꦢ꧀ꦮꦷꦱꦸ ꦄꦤꦸꦱꦪꦤꦺꦱꦸ. ꦪꦡꦴ ꦲꦶ ꦩꦒ꧀ꦒꦺꦤ ꦄꦱꦩꦸꦕ꧀ꦖꦶꦤ꧀ꦤꦺꦴ ꦫꦴꦒꦺꦴ ꦏꦴꦫꦟꦭꦴꦨꦺ ꦈꦥ꧀ꦥꦗ꧀ꦗꦤꦴꦫꦲꦺꦴ ꦡꦴꦩꦒꦠꦛ꧀ꦜꦺꦤ ꦱꦤ꧀ꦠꦴꦤꦺ ꦄꦤꦸꦱꦺꦠꦷꦠꦶ ꦮꦸꦕ꧀ꦕꦠꦶ, ꦌꦮꦁ ꦆꦛ꧀ꦜꦴꦫꦩ꧀ꦩꦟꦺꦥꦷꦠꦶ ꦠꦱ꧀ꦱ ꦄꦴꦫꦩ꧀ꦩꦟꦴꦤꦸꦱꦪꦤꦁ ꦢꦛ꧀ꦜꦧ꧀ꦧꦁ. ꦠꦁ ꦥꦤꦱ꧀ꦱ ꦄꦤꦸꦱꦪꦤꦁ ꦈꦥ꧀ꦥꦠ꧀ꦠꦶꦪꦴ ꦥꦴꦏꦛꦁ ꦲꦺꦴꦠꦷꦠꦶ ꦢꦱ꧀ꦱꦺꦠꦸꦁ ꦄꦛ꧀ꦜꦏꦡꦴꦪꦁ ‘‘ꦪꦡꦴ ꦤꦴꦩꦴ’’ꦠꦶꦄꦴꦢꦶ (ꦮꦶꦨ. ꦄꦛ꧀ꦜ. ꧘꧑꧖) ꦮꦸꦠ꧀ꦠꦁ. ‘‘ꦄꦴꦕꦶꦟ꧀ꦟꦱꦩꦴꦕꦶꦟ꧀ꦟꦴ’’ꦠꦶ ꦌꦠꦺꦤ ꦆꦛ꧀ꦜꦴꦫꦩ꧀ꦩꦟꦺ ꦫꦴꦒꦱ꧀ꦱ ꦕꦶꦫꦥꦫꦶꦨꦴꦮꦤꦁ ꦮꦶꦨꦴꦮꦺꦠꦶ. ꦪꦱ꧀ꦩꦴ ꦥꦤ ꦌꦮꦁ ꦕꦶꦫꦥꦫꦶꦨꦴꦮꦶꦠꦁ ꦥꦫꦶꦮꦺꦜꦺꦠ꧀ꦮꦴ ꦮꦶꦪ ꦜꦶꦠꦁ ꦲꦺꦴꦠꦶ, ꦠꦱ꧀ꦩꦴ ‘‘ꦱꦩꦤ꧀ꦠꦠꦺꦴ ꦮꦺꦜꦺꦠ꧀ꦮꦴ ꦮꦶꦪ ꦜꦶꦠꦨꦴꦮꦺꦤ ꦄꦤꦸꦱꦪꦶꦠꦠꦁ ꦢꦱ꧀ꦱꦺꦠꦷ’’ꦠꦶ ꦮꦸꦠ꧀ꦠꦁ. ꦠꦡꦴ ꦲꦶ ꦈꦢꦏꦺ ꦤꦶꦩꦸꦒ꧀ꦒꦱꦢꦶꦱꦺꦴ ꦈꦢꦴꦲꦛꦺꦴ. ‘‘ꦱꦧ꧀ꦧꦺꦥꦶ ꦠꦺꦨꦹꦩꦏꦴ ꦣꦩ꧀ꦩꦴ ꦏꦴꦩꦤꦷꦪꦛ꧀ꦜꦺꦤ ꦏꦴꦩꦴ’’ꦠꦶꦄꦴꦢꦶꦥꦴꦭ꦳ꦶꦮꦱꦺꦤ ꦨꦮꦫꦴꦒꦱ꧀ꦱꦴꦥꦶ ꦮꦠ꧀ꦡꦸꦏꦴꦩꦠꦴ ꦮꦺꦢꦶꦠꦧ꧀ꦧꦴ. ꦫꦴꦒꦮꦱꦺꦤꦴꦠꦶ ꦄꦴꦫꦩ꧀ꦩꦟꦫꦗ꧀ꦗꦤꦮꦱꦺꦤ.

꧘꧑꧘. ꦆꦤ꧀ꦢ꧀ꦫꦶꦪꦮꦶꦱꦺꦱꦺꦴ ꦮꦶꦤꦺꦪ꧀ꦪꦴꦤꦁ ꦆꦤ꧀ꦢ꧀ꦫꦶꦪꦥꦫꦺꦴꦥꦫꦶꦪꦠ꧀ꦠꦁ.

꧘꧑꧙. ꦥꦲꦴꦠꦧ꧀ꦧꦺꦤ ꦈꦥꦢ꧀ꦢꦸꦠꦤꦶꦫꦺꦴꦣꦤꦠ꧀ꦡꦁ ꦥꦲꦴꦪꦏꦁ ꦥꦫꦶꦪꦺꦱꦠꦷꦠꦶ ꦥꦜꦩꦁ ꦥꦲꦴꦠꦧ꧀ꦧꦁ, ꦥꦕ꧀ꦖꦴ ꦥꦲꦴꦪꦏꦤ꧀ꦠꦶ ꦄꦪꦁ ꦥꦲꦴꦠꦧ꧀ꦧꦥꦗꦲꦤꦏ꧀ꦏꦩꦺꦴ ꦥꦲꦴꦤꦏ꧀ꦏꦩꦥꦢꦺꦤ ꦮꦸꦠ꧀ꦠꦺꦴ. ꦪꦱ꧀ꦱꦴꦠꦶ ꦥꦲꦴꦠꦧ꧀ꦧꦱ꧀ꦱ. ꦠꦤ꧀ꦠꦶ ꦥꦲꦴꦠꦧ꧀ꦧꦁ. ꦥꦜꦩꦁ ꦮꦸꦕ꧀ꦕꦠꦷꦠꦶ ꦥꦲꦴꦤꦮꦶꦕꦴꦫꦟꦴꦤꦁ ꦥꦜꦩꦁ ꦮꦸꦕ꧀ꦕꦠꦶ. ꦠꦠꦺꦴ ꦥꦕ꧀ꦖꦴ ꦄꦥ꧀ꦥꦲꦴꦠꦧ꧀ꦧꦁ ꦪꦡꦴ ꦠꦁ ꦢꦱ꧀ꦱꦤꦠ꧀ꦠꦶꦏꦴꦢꦷꦱꦸ.

꧘꧒꧖. ꦠꦤ꧀ꦠꦶ ꦨꦮꦔ꧀ꦒꦁ. ꦠꦱ꧀ꦱꦴꦠꦶ ꦭꦺꦴꦏꦸꦠ꧀ꦠꦫꦱ꧀ꦱ. ꦥꦴꦢꦏꦤ꧀ꦠꦶ ꦄꦤ꧀ꦠꦶꦩꦨꦮꦶꦏꦱ꧀ꦱ ꦨꦮꦔ꧀ꦒꦁ ꦱꦤ꧀ꦣꦴꦪꦴꦲ.

ꦖꦛ꧀ꦜꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦠ꧀ꦠꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧒꧘. ꦱꦩꦴꦥꦤ꧀ꦤꦺꦴꦩ꧀ꦲꦷꦠꦶ ꦩꦚ꧀ꦚꦠꦷꦠꦶ ꦄꦠ꧀ꦡꦺꦴ.

ꦱꦩꦴꦣꦶ ꦮꦴ ꦠꦱ꧀ꦱ ꦄꦴꦫꦩ꧀ꦩꦟꦨꦹꦠꦁ ꦏꦩ꧀ꦩꦛ꧀ꦜꦴꦤꦁ ꦮꦴ ꦕꦶꦠ꧀ꦠꦩꦚ꧀ꦗꦹꦱꦴꦠꦶ ꦪꦺꦴꦗꦤꦴ. ꦜꦥꦺꦠꦸꦤ꧀ꦠꦶ ꦪꦡꦴꦥꦫꦶꦕ꧀ꦖꦶꦤ꧀ꦤꦁ ꦏꦴꦭꦁ ꦱꦩꦴꦥꦠ꧀ꦠꦶꦕꦶꦠ꧀ꦠꦁ ꦥꦮꦠ꧀ꦠꦺꦠꦸꦁ.

ꦠꦺꦲꦷꦠꦶ ꦱꦚ꧀ꦚꦴꦩꦤꦱꦶꦏꦴꦫꦺꦲꦶ. ꦠꦁꦱꦨꦴꦮꦠꦴꦠꦶ ꦏꦴꦩꦴꦢꦶꦢꦸꦠꦶꦪꦗ꧀ꦙꦴꦤꦴꦢꦶꦄꦤꦸꦥꦏ꧀ꦑꦤ꧀ꦢꦤꦱꦨꦴꦮꦠꦴ. ꦥꦒꦸꦟꦮꦺꦴꦢꦴꦤꦁ ꦥꦒꦸꦟꦨꦴꦮꦱꦶꦢ꧀ꦣꦴ ꦙꦴꦤꦱ꧀ꦱ ꦥꦛꦶꦥꦏ꧀ꦑꦠꦺꦴ ꦮꦶꦱꦸꦢ꧀ꦣꦶ.

ꦱꦠ꧀ꦠꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦱꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧓꧑. ꦥꦚ꧀ꦚꦴꦮ ꦮꦶꦩꦸꦠ꧀ꦠꦷꦠꦶ ꦫꦴꦒꦴꦢꦷꦲꦶ ꦮꦶꦩꦸꦠ꧀ꦠꦶꦨꦹꦠꦴ ꦥꦚ꧀ꦚꦴꦮ ꦮꦶꦩꦸꦠ꧀ꦠꦷꦠꦶ ꦪꦺꦴꦗꦤꦴ. ꦏꦩ꧀ꦩꦤ꧀ꦠꦫꦱ꧀ꦱ ꦮꦶꦥꦴꦏꦤ꧀ꦠꦫꦩꦺꦮꦴꦠꦶ ꦄꦠ꧀ꦡꦺꦴ ꦮꦶꦥꦴꦏꦤ꧀ꦠꦫꦗꦴꦤꦤꦱ꧀ꦱꦺꦮ ꦢꦸꦠꦶꦪꦧꦭꦏꦶꦕ꧀ꦕꦠ꧀ꦠꦴ, ꦏꦩ꧀ꦩꦤ꧀ꦠꦫꦗꦴꦤꦤꦱ꧀ꦱ ꦕ ꦠꦠꦶꦪꦧꦭꦏꦶꦕ꧀ꦕꦠ꧀ꦠꦴ. ꦧꦭꦱꦢꦶꦱꦠꦤ꧀ꦠꦶ ꦌꦏꦕ꧀ꦕꦧꦭꦱꦢꦶꦱꦠꦁ. ꦏꦱ꧀ꦩꦴ ꦥꦤꦺꦠ꧀ꦡ ꦧꦭꦚꦴꦟꦏꦶꦕ꧀ꦕꦺ ꦮꦸꦕ꧀ꦕꦩꦴꦤꦺ ꦙꦴꦤꦴꦢꦶꦄꦧꦭꦚꦴꦟꦁ ꦈꦢꦴꦲꦛꦤ꧀ꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦪꦢꦶꦥꦷ’’ꦠꦶꦄꦴꦢꦶ. ꦠꦢꦤ꧀ꦠꦺꦴꦒꦣꦤ꧀ꦠꦶ ꦠꦱ꧀ꦩꦶꦁ ꦙꦴꦤꦴꦢꦶꦥꦕ꧀ꦕꦮꦺꦏ꧀ꦑꦟꦴꦱꦨꦴꦮꦺ ꦱꦠ꧀ꦠꦩꦧꦭꦚꦴꦟꦺ ꦄꦤ꧀ꦠꦺꦴꦒꦣꦁ. ꦌꦮꦤ꧀ꦠꦶ ꦙꦴꦤꦴꦢꦶꦚꦴꦟꦁ ꦮꦶꦪ. ꦄꦥ꧀ꦥꦺꦠꦸꦁ, ꦮꦶꦏꦸꦧ꧀ꦧꦶꦠꦸꦚ꧀ꦕꦴꦠꦶ ꦄꦠ꧀ꦠꦤꦴ ꦮꦸꦠ꧀ꦠꦴꦏꦴꦫꦁ ꦱꦤ꧀ꦣꦴꦪꦴꦲ. ꦱꦩꦸꦢꦪꦥ꧀ꦥꦲꦴꦤꦴꦢꦶꦌꦏꦕ꧀ꦕꦚꦴꦟꦏꦶꦕ꧀ꦕꦩ꧀ꦥꦶ ꦄꦏꦫꦺꦴꦤ꧀ꦠꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦏꦡꦩꦥ꧀ꦥꦤꦴꦢꦶꦏꦁ ꦙꦴꦤꦴꦢꦶꦏꦶꦕ꧀ꦕꦁ ꦏꦫꦺꦪ꧀ꦪ, ꦧꦭꦚꦴꦟꦺꦲꦶ ꦥꦤ ꦗꦴꦤꦶꦠꦧ꧀ꦧꦁ, ꦠꦠꦺꦴ ꦈꦠ꧀ꦠꦫꦶꦚ꧀ꦕ ꦗꦴꦤꦤ꧀ꦠꦩ꧀ꦥꦶ ꦪꦱ꧀ꦩꦴ ꦌꦏꦕ꧀ꦕꦧꦭꦏꦶꦕ꧀ꦕꦁ ꦤ ꦏꦫꦺꦴꦠꦶ, ꦠꦱ꧀ꦩꦴ ꦄꦚ꧀ꦚꦴꦤꦺꦮ ꦧꦭꦚꦴꦟꦴꦤꦶ, ꦄꦚ꧀ꦚꦁ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦤ꧀ꦠꦶ ꦢꦱ꧀ꦱꦤꦠ꧀ꦡꦁ ‘‘ꦌꦠꦺꦱꦁ ꦥꦤ ꦏꦶꦕ꧀ꦕꦁ ꦤ ꦱꦧ꧀ꦧꦁ ꦏꦫꦺꦴꦠꦷ’’ꦠꦶꦄꦴꦢꦶ (ꦮꦶꦨ. ꦄꦛ꧀ꦜ. ꧘꧓꧑) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ. ꦠꦠ꧀ꦡ ꦪꦡꦴ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦄꦧꦭꦏꦶꦕ꧀ꦕꦁ ꦌꦏꦕ꧀ꦕꦁ ꦤ ꦏꦫꦺꦴꦠꦶ, ꦌꦮꦁ ꦧꦭꦏꦶꦕ꧀ꦕꦩ꧀ꦥꦷꦠꦶ ꦈꦢꦴꦲꦫꦟꦢꦱ꧀ꦱꦤꦮꦱꦺꦤ ‘‘ꦠꦚ꧀ꦲꦶ ꦙꦴꦤꦁ ꦲꦸꦠ꧀ꦮꦴ ꦄꦥ꧀ꦥꦺꦠꦸ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦄꦡ ꦮꦴ…ꦥꦺ… ꦢꦛ꧀ꦜꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ.

ꦢꦱꦩꦧꦭꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦚꦴꦟꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.