꧑꧗. ꦑꦸꦢ꧀ꦢꦏꦮꦠ꧀ꦡꦸꦮꦶꦨꦔ꧀ꦒꦺꦴ

꧑. ꦌꦏꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧔꧓-꧔. ꦄꦠ꧀ꦡꦶꦥꦛꦶꦕ꧀ꦕꦁ ꦤꦴꦩꦴꦠꦶ ꦄꦠ꧀ꦡꦶꦠꦴ ꦥꦛꦶꦕ꧀ꦕꦠ꧀ꦡꦺꦴ ꦤꦴꦩ, ꦄꦱꦠꦶꦥꦶ ꦱꦲꦗꦴꦠꦥꦸꦫꦺꦗꦴꦠꦴꦢꦶꦨꦴꦮꦺ ꦪꦱ꧀ꦩꦶꦁ ꦱꦠꦶ ꦪꦁ ꦲꦺꦴꦠꦶ, ꦱꦺꦴ ꦠꦱ꧀ꦱ ꦥꦕ꧀ꦕꦪꦺꦴꦠꦶ ꦏꦠ꧀ꦮꦴ ꦪꦡꦴ ꦠꦡꦴ ꦄꦠ꧀ꦡꦶꦠꦴꦩꦠ꧀ꦠꦁ ꦆꦣ ꦥꦛꦶꦕ꧀ꦕꦠ꧀ꦡꦺꦴꦠꦶ ꦄꦠ꧀ꦡꦺꦴ. ꦠꦁ ꦥꦤ ꦥꦛꦶꦕ꧀ꦕꦠ꧀ꦡꦁ ꦧ꧀ꦪꦠꦶꦫꦺꦏꦩꦸꦑꦺꦤ ꦥꦴꦏꦛꦠꦫꦁ ꦏꦴꦠꦸꦁ ‘‘ꦪꦡꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦤꦶꦱ꧀ꦱꦪꦴꦢꦶꦥꦕ꧀ꦕꦪꦨꦴꦮꦺꦤ ꦥꦛꦶꦕ꧀ꦕꦴꦠꦶ ꦮꦸꦠ꧀ꦠꦤ꧀ꦠꦶ ꦤꦶꦱ꧀ꦱꦪꦴꦢꦶꦥꦕ꧀ꦕꦪꦨꦴꦮꦠꦺꦴ ꦥꦕ꧀ꦕꦪꦨꦹꦠꦁ ꦕꦏ꧀ꦑꦴꦢꦶ ‘‘ꦥꦛꦶꦕ꧀ꦕꦴ’’ꦠꦶ ꦮꦸꦠ꧀ꦠꦁ. ꦌꦏꦶꦱ꧀ꦱꦴ ꦱꦺꦟꦶꦪꦴꦠꦶ ꦄꦛ꧀ꦜꦴꦫꦱꦱꦸ ꦱꦺꦟꦷꦱꦸ ꦩꦪꦁ ꦄꦩꦸꦏꦴꦪ ꦱꦺꦟꦶꦪꦴ ꦗꦴꦠꦴꦩ꧀ꦲ, ꦤ ꦄꦚ꧀ꦚꦺ ꦮꦶꦪ ꦄꦥ꧀ꦥꦚ꧀ꦚꦴꦠꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦁ ꦮꦢꦤ꧀ꦠꦶ.

ꦥꦸꦫꦠꦺꦴ ꦏꦫꦟꦁ ꦥꦩꦸꦑꦨꦴꦮꦏꦫꦟꦁ. ꦤꦶꦣꦴꦤꦫꦴꦱꦷꦠꦶ ꦤꦶꦢꦲꦶꦠ꧀ꦮꦴ ꦜꦥꦶꦠꦣꦤꦤꦶꦕꦪꦺꦴ. ꦪꦱꦺꦴꦠꦶ ꦆꦱ꧀ꦱꦫꦶꦪꦁ. ꦠꦁ ꦥꦤ ꦪꦺꦱꦸ ꦮꦠ꧀ꦠꦠꦶ, ꦠꦺꦱꦸ ꦥꦛ꧀ꦜꦴꦥꦏꦄꦴꦟꦴꦏꦫꦟꦺꦲꦶ ꦥꦴꦏꦛꦺꦴ ꦲꦺꦴꦠꦷꦠꦶ ‘‘ꦥꦛ꧀ꦜꦴꦥꦏꦩꦢꦺꦴ, ꦄꦴꦟꦴꦏꦫꦟꦩꦢꦺꦴ’’ꦠꦶ ꦕ ꦮꦸꦠ꧀ꦠꦁ.

꧘꧔꧕. ꦮꦠ꧀ꦡꦸꦤꦴꦠꦶ ꦗꦴꦠꦶꦄꦴꦢꦶꦥꦮꦠ꧀ꦠꦶꦲꦺꦠꦸꦤꦴ.

꧘꧔꧖. ꦥꦠꦶꦛ꧀ꦜꦴꦨꦴꦮꦺꦴꦠꦶ ꦏꦸꦱꦭꦏꦩ꧀ꦩꦺꦱꦸ ꦥꦠꦶꦛ꧀ꦜꦴꦤꦴꦨꦴꦮꦺꦴ, ꦱꦺꦴ ꦥꦤ ꦪꦱ꧀ꦩꦴ ꦏꦸꦱꦭꦏꦶꦫꦶꦪꦴꦪ ꦜꦴꦤꦁ ꦤ ꦲꦺꦴꦠꦶ, ꦠꦱ꧀ꦩꦴ ‘‘ꦏꦸꦱꦭꦏꦫꦟꦺ ꦄꦛ꧀ꦜꦴꦤ’’ꦤ꧀ꦠꦶ ꦄꦴꦲ. ꦥꦩꦴꦢꦱꦔ꧀ꦑꦴꦠꦱ꧀ꦱ ꦄꦠ꧀ꦡꦱ꧀ꦱ ꦌꦮꦩꦴꦢꦶꦏꦺꦴ ꦥꦫꦶꦪꦴꦪꦺꦴꦠꦶ ꦪꦺꦴꦗꦤꦴ. ꦄꦴꦢꦶ-ꦱꦢ꧀ꦢꦺꦤ ‘‘ꦮꦕꦷꦢꦸꦕ꧀ꦕꦫꦶꦠꦺ, ꦩꦤꦺꦴꦢꦸꦕ꧀ꦕꦫꦶꦠꦺ ꦕꦶꦠ꧀ꦠꦱ꧀ꦱ ꦮꦺꦴꦱ꧀ꦱꦒ꧀ꦒꦺꦴ, ꦩꦏ꧀ꦑꦺꦴ, ꦥꦭ꦳ꦴꦱꦺꦴ’’ꦠꦶ ꦕ ꦌꦮꦩꦴꦢꦶꦏꦱ꧀ꦱ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ‘‘ꦥꦩꦴꦢꦺꦴ ꦥꦩꦗ꧀ꦗꦤꦴꦢꦷ’’ꦠꦶꦄꦴꦢꦶꦏꦺꦴ ꦠꦢꦠ꧀ꦡꦥ꧀ꦥꦏꦴꦱꦏꦺꦴ, ‘‘ꦕꦶꦠ꧀ꦠꦱ꧀ꦱ ꦮꦺꦴꦱ꧀ꦱꦒ꧀ꦒꦺꦴ ꦮꦺꦴꦱ꧀ꦱꦒ꧀ꦒꦴꦤꦸꦥ꧀ꦥꦴꦢꦤ’’ꦤ꧀ꦠꦶꦄꦴꦢꦶꦏꦺꦴ ꦠꦥ꧀ꦥꦫꦶꦪꦴꦪꦥ꧀ꦥꦏꦴꦱꦏꦺꦴ ꦧ꧀ꦪꦚ꧀ꦗꦤꦥꦫꦶꦪꦴꦪꦺꦴ ꦕ ꦄꦥꦫꦶꦪꦤ꧀ꦠꦺꦴꦠꦶ ꦱꦩ꧀ꦧꦤ꧀ꦣꦺꦴ. ‘‘ꦕꦠ꧀ꦠꦴꦫꦺꦴ ꦑꦤ꧀ꦣꦺ ꦢꦱ꧀ꦱꦺꦠꦷ’’ꦠꦶ ꦆꦩꦶꦤꦴ ꦱꦠꦶꦮꦺꦴꦱ꧀ꦱꦒ꧀ꦒꦴꦏꦴꦫꦥ꧀ꦥꦮꦠ꧀ꦠꦴ ꦕꦠ꧀ꦠꦴꦫꦺꦴ ꦄꦏꦸꦱꦭꦏ꧀ꦑꦤ꧀ꦣꦴ ꦥꦩꦴꦢꦺꦴꦠꦶ ꦮꦢꦠꦶ.

꧘꧔꧗. ꦄꦤꦶꦮꦴꦠꦮꦸꦠ꧀ꦠꦶꦠꦴꦪ ꦲꦺꦠꦸꦨꦹꦠꦺꦴ ꦕꦶꦠ꧀ꦠꦱꦩ꧀ꦥꦒ꧀ꦒꦲꦺꦴ ꦩꦴꦤꦮꦶꦱꦺꦱꦺꦴ.

꧘꧔꧘. ꦈꦠ꧀ꦠꦫꦨꦴꦮꦺꦴ ꦈꦠ꧀ꦠꦫꦶꦪꦁ, ꦏꦫꦟꦺꦤ ꦈꦠ꧀ꦠꦫꦶꦪꦁ ꦏꦫꦟꦸꦠ꧀ꦠꦫꦶꦪꦁ, ꦱꦴꦫꦩ꧀ꦨꦺꦤ ꦥꦫꦱ꧀ꦱ ꦏꦶꦫꦶꦪꦠꦺꦴ ꦈꦠ꧀ꦠꦫꦶꦏꦶꦫꦶꦪꦴ.

꧘꧔꧙. ꦤꦺꦫꦸꦠ꧀ꦠꦶꦏꦮꦶꦣꦴꦤꦺꦤꦴꦠꦶ ꦆ-ꦏꦴꦫꦕ꧀ꦕ-ꦏꦴꦫꦴꦤꦚ꧀ꦕ ꦫ-ꦏꦴꦫꦠꦴꦥꦴꦢꦤꦺꦤ.

ꦄꦠ꧀ꦠꦲꦶꦠꦁ ꦄꦠ꧀ꦠꦴꦠꦶ ꦈꦠ꧀ꦠꦫꦥꦢꦭꦺꦴꦥꦺꦤ ꦤꦶꦢ꧀ꦢꦺꦱꦩꦴꦲ ꦪꦡꦴ ‘‘ꦫꦹꦥꦨꦮꦺꦴ ꦫꦹꦥꦁ, ꦨꦷꦩꦱꦺꦤꦺꦴ ꦨꦷꦩꦺꦴ’’ꦠꦶ ꦕ. ꦄꦴꦢꦶꦤ꧀ꦤꦺꦴ, ꦥꦠ꧀ꦠꦺꦴ ꦮꦴ ꦄꦠ꧀ꦡꦺꦴ ꦄꦠ꧀ꦠꦴꦠꦶ ꦤꦶꦫꦸꦠ꧀ꦠꦶꦤꦪꦺꦤ ꦥꦢꦱꦶꦢ꧀ꦣꦶ ꦮꦺꦢꦶꦠꦧ꧀ꦧꦴ.

ꦩꦸꦢ꧀ꦢꦶꦠꦱ꧀ꦱꦴꦠꦶ ꦄꦔ꧀ꦏꦶꦠꦱ꧀ꦱ.

꧘꧕꧐. ꦗꦴꦤꦤ꧀ꦠꦱ꧀ꦱꦺꦮ ꦩꦲꦴꦗꦤꦱ꧀ꦱ. ꦈꦥꦴꦢꦴꦤꦴꦢꦶꦥꦕ꧀ꦕꦪꦺꦠꦶ ꦆꦤ꧀ꦣꦤꦸꦢꦏꦕꦷꦮꦫꦴꦢꦶꦏꦺ ꦥꦴꦫꦶꦥꦹꦫꦶꦲꦺꦠꦸꦏꦺ.

꧘꧕꧑. ꦒꦟ꧀ꦜꦶꦏꦴ ꦱꦪꦁ ꦒꦟ꧀ꦜꦶꦏꦫꦟꦠꦺꦴ. ꦥꦠꦶꦫꦹꦥꦮꦕꦤꦠꦺꦴ, ꦄꦚ꧀ꦚꦺꦱꦁ ꦒꦟ꧀ꦜꦶꦨꦺꦢꦠꦺꦴ ꦕ ꦒꦟ꧀ꦜꦶꦨꦹꦠꦴ.

꧘꧕꧒. ꦄꦨꦺꦗ꧀ꦗꦤ꧀ꦠꦫꦠꦴꦪ ꦱꦩꦴꦱꦺꦮꦶꦠꦠꦴꦪ ꦱꦸꦛ꧀ꦜꦸ ꦄꦴꦱꦺꦮꦶꦠꦠꦴꦪ.

꧘꧕꧓. ꦕꦶꦫꦏꦴꦭꦥꦫꦶꦨꦴꦮꦶꦠꦠ꧀ꦠꦺꦤ ꦠꦺꦩꦤꦏꦫꦟꦁ ꦄꦭ꧀ꦭꦨꦴꦮꦏꦫꦟꦁ, ꦭꦺꦴꦨꦮꦱꦺꦤ ꦄꦮꦱ꧀ꦱꦮꦤꦤ꧀ꦠꦶ ꦄꦠ꧀ꦡꦺꦴ.

ꦌꦮꦁ ꦱꦤ꧀ꦠꦺ ꦏꦡꦁ ꦑꦷꦪꦤꦤ꧀ꦠꦶ ꦤꦶꦢ꧀ꦢꦺꦱꦺꦴꦠꦶ ꦄꦴꦲ ‘‘ꦑꦷꦪꦤꦤ꧀ꦠꦶ ꦕꦴ’’ꦠꦶꦄꦴꦢꦶ.

꧘꧕꧔. ꦕꦷꦮꦫꦩꦟ꧀ꦝꦤꦴꦢꦷꦤꦤ꧀ꦠꦶ ꦕꦷꦮꦫꦩꦟ꧀ꦝꦤꦴ ꦥꦠ꧀ꦠꦩꦟ꧀ꦝꦤꦴ ꦱꦺꦤꦴꦱꦤꦩꦟ꧀ꦝꦤꦴꦠꦶ ꦆꦩꦺꦱꦁ. ꦆꦢꦴꦤꦶ ꦠꦁ ꦮꦶꦱꦺꦱꦤꦨꦴꦮꦁ ꦪꦺꦴꦗꦺꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦕꦷꦮꦫꦺꦤ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ.

꧘꧕꧕. ꦱꦨꦴꦒꦫꦲꦶꦠꦺꦴ, ꦱꦨꦴꦒꦥꦛꦶꦥꦏ꧀ꦑꦺꦴ ꦮꦴ ꦄꦱꦨꦴꦒꦺꦴ, ꦄꦤꦤꦸꦏꦹꦭꦴꦤꦁ ꦥꦛꦶꦏ꧀ꦏꦹꦭꦠꦴ ꦮꦴ. ꦠꦺꦤꦴꦲ ‘‘ꦩꦴꦤꦡꦢ꧀ꦣꦠꦴ, ꦮꦶꦫꦺꦴꦣꦺꦴ ꦮꦴ’’ꦠꦶ.

꧘꧕꧖. ꦱꦔ꧀ꦏꦩ꧀ꦥꦤꦴ ꦈꦏ꧀ꦏꦟ꧀ꦜꦤꦴꦮꦱꦺꦤ ꦄꦤꦮꦛ꧀ꦜꦴꦤꦁ, ꦄꦤꦮꦣꦴꦤꦁ ꦮꦴ. ꦠꦱ꧀ꦱ ꦠꦱ꧀ꦱ ꦄꦴꦫꦩ꧀ꦩꦟꦱ꧀ꦱ ꦠꦟ꧀ꦲꦴꦪꦤꦴ.

꧘꧕꧗. ꦏꦴꦪꦱ꧀ꦱꦴꦠꦶ ꦤꦴꦩꦏꦴꦪꦱ꧀ꦱ. ꦠꦱ꧀ꦩꦶꦚ꧀ꦲꦶ ꦄꦮꦶꦥ꧀ꦦꦴꦫꦶꦏꦺ ꦫꦹꦥꦏꦴꦪꦺꦴꦥꦶ ꦄꦮꦶꦥ꧀ꦦꦴꦫꦶꦏꦺꦴ ꦲꦺꦴꦠꦶ.

꧘꧖꧐. ꦫꦴꦒꦴꦢꦷꦤꦤ꧀ꦠꦶ ꦫꦴꦒꦩꦺꦴꦲꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦮꦶꦕꦶꦏꦶꦕ꧀ꦖꦴꦢꦷꦤꦁ.

꧘꧖꧑. ꦠꦶꦮꦶꦣꦩ꧀ꦥꦶ ꦏꦸꦲꦤꦮꦠ꧀ꦡꦸꦁ ꦢꦱ꧀ꦱꦺꦠꦸꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦠꦠ꧀ꦡꦴꦠꦶ ꦩꦲꦴꦤꦶꦢ꧀ꦢꦺꦱꦺ. ‘‘ꦠꦠ꧀ꦡ ꦏꦠꦩꦴ ꦏꦸꦲꦤꦴ ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦱꦤ꧀ꦤꦶꦱ꧀ꦱꦶꦠꦱ꧀ꦱꦴ’’ꦠꦶꦄꦴꦢꦶꦤꦴ (ꦮꦶꦨ. ꧘꧖꧑) ꦆꦣ ꦑꦸꦢ꧀ꦢꦏꦮꦶꦨꦔ꧀ꦒꦺ ꦄꦴꦒꦠꦁ ꦢꦺꦱꦤꦴꦤꦪꦁ ꦤꦶꦱ꧀ꦱꦴꦪ ꦩꦲꦴꦤꦶꦢ꧀ꦢꦺꦱꦢꦺꦱꦤꦴ ꦥꦮꦠ꧀ꦠꦴꦠꦶ ꦄꦴꦲ ‘‘ꦤꦶꦱ꧀ꦱꦪꦨꦹꦠꦴꦪ ꦆꦩꦴꦪ ꦥꦴꦭ꦳ꦶꦪꦴ’’ꦠꦶ.

ꦄꦤ꧀ꦠꦫꦲꦶꦠꦴꦤꦷꦠꦶ ꦄꦤ꧀ꦠꦮꦶꦏꦭꦴꦤꦶ ꦖꦶꦤ꧀ꦢꦤ꧀ꦠꦴꦤꦶ.

ꦭꦴꦨꦱꦏ꧀ꦏꦴꦫꦱꦶꦭꦺꦴꦏꦲꦺꦠꦸ ꦱꦩ꧀ꦨꦴꦮꦤꦴꦣꦶꦥ꧀ꦥꦴꦪꦺꦤ ꦱꦁꦪꦠꦴꦏꦴꦫꦢꦱ꧀ꦱꦤꦁ ꦏꦺꦴꦲꦚ꧀ꦚꦤ꧀ꦠꦶ ꦄꦴꦲ ‘‘ꦥꦴꦥꦶꦕ꧀ꦖꦠꦴꦪ ꦤꦶꦫꦠ꧀ꦡꦏꦏꦴꦪꦮꦕꦷꦮꦶꦥ꧀ꦦꦤ꧀ꦢꦤꦶꦒ꧀ꦒꦲꦟꦁ ꦏꦺꦴꦫꦗ’’ꦤ꧀ꦠꦶ. ꦪꦺꦴ ꦱꦁꦮꦺꦒꦧꦲꦸꦭꦺꦴ ꦏꦸꦏ꧀ꦏꦸꦕ꧀ꦕꦏꦺꦴ ꦥꦸꦧ꧀ꦧꦺꦤꦴꦥꦫꦁ ꦄꦠ꧀ꦠꦤꦺꦴꦥꦶ ꦏꦶꦫꦶꦪꦁ ꦥꦫꦶꦱꦔ꧀ꦏꦤ꧀ꦠꦺꦴ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦠꦶꦛ꧀ꦜꦠꦶ, ꦠꦴꦢꦶꦱꦁ ꦮꦶꦪ ꦄꦠ꧀ꦠꦴꦤꦁ ꦢꦱ꧀ꦱꦺꦤ꧀ꦠꦺꦴ ‘‘ꦄꦠꦶꦥꦫꦶꦱꦔ꧀ꦏꦶꦠꦺꦴ’’ꦠꦶ ꦮꦸꦠ꧀ꦠꦺꦴ.

꧘꧖꧔. ꦥꦱꦁꦱꦴꦩꦸꦑꦺꦤ ꦤꦶꦤ꧀ꦢꦤꦤ꧀ꦠꦶ ꦥꦱꦁꦱꦴꦮꦠ꧀ꦡꦸꦠꦺꦴ ꦑꦶꦥꦤꦁ ꦧꦲꦶ ꦖꦝ꧀ꦝꦤꦁ ꦪꦡꦴ ‘‘ꦄꦢꦴꦪꦏꦁ ꦄꦲꦺꦴ ꦢꦴꦤꦥꦠꦷ’’ꦠꦶ.

꧘꧖꧕. ꦒꦮꦺꦱꦤꦏꦩ꧀ꦩꦤ꧀ꦠꦶ ꦄꦥ꧀ꦥꦏꦺꦤ ꦭꦴꦨꦺꦤ ꦩꦲꦤ꧀ꦠꦱ꧀ꦱ ꦥꦫꦶꦪꦺꦱꦤꦏꦧ꧀ꦪꦴꦥꦴꦫꦺꦴ.

꧘꧖꧖. ꦥꦺꦴꦏ꧀ꦑꦫꦁ ꦮꦸꦕ꧀ꦕꦠꦶ ꦱꦸꦤ꧀ꦢꦫꦁ, ꦮꦟ꧀ꦟꦱ꧀ꦱ ꦱꦸꦤ꧀ꦢꦫꦨꦴꦮꦺꦴ ꦮꦟ꧀ꦟꦥꦴꦫꦶꦥꦹꦫꦷ ꦲꦺꦴꦠꦷꦠꦶ ꦄꦴꦲ ‘‘ꦮꦟ꧀ꦟꦥꦴꦫꦶꦥꦹꦫꦷ ꦮꦴ ꦮꦟ꧀ꦟꦥꦺꦴꦏ꧀ꦑꦫꦠꦴ’’ꦠꦶ.

꧘꧗꧙. ꦱꦺꦪ꧀ꦪꦩꦴꦤꦴꦢꦶꦤꦶꦢ꧀ꦢꦺꦱꦺꦱꦹꦠꦶ ‘‘ꦠꦠ꧀ꦡ ꦏꦠꦩꦺꦴ ꦱꦺꦪ꧀ꦪꦱ꧀ꦱ ‘ꦱꦺꦪ꧀ꦪꦺꦴꦲꦩꦱ꧀ꦩꦷ’ꦠꦶ ꦩꦴꦤꦺꦴ’’ꦠꦶꦄꦴꦢꦶꦤꦴ (ꦮꦶꦨ. ꧘꧖꧙) ꦤꦶꦢ꧀ꦢꦶꦛ꧀ꦜꦺꦱꦸ ꦤꦮꦱꦸ ꦩꦴꦤꦤꦶꦢ꧀ꦢꦺꦱꦺꦱꦸ. ‘‘ꦱꦺꦪ꧀ꦪꦴꦢꦶꦥꦸꦒ꧀ꦒꦭꦺꦴ’’ꦠꦶ ꦆꦢꦁ ꦠꦠ꧀ꦡ ꦥꦴꦭ꦳ꦶꦪꦁ ꦱꦺꦪ꧀ꦪꦴꦢꦷꦤꦁ ꦤꦮꦤ꧀ꦤꦁ ꦥꦸꦒ꧀ꦒꦭꦴꦤꦁ ꦄꦴꦩꦛ꧀ꦜꦠ꧀ꦠꦴ ꦮꦸꦠ꧀ꦠꦁ. ꦆꦣ ꦥꦤ ꦥꦸꦒ꧀ꦒꦭꦴꦩꦱꦤꦺ ꦱꦠꦶ ꦱꦺꦪ꧀ꦪꦥꦸꦒ꧀ꦒꦭꦺꦴ ꦕ ꦄꦴꦩꦱꦶꦠꦧ꧀ꦧꦺꦴ ꦱꦶꦪꦴ. ꦠꦺꦤꦺꦮꦴꦲ ‘‘ꦱꦺꦪ꧀ꦪꦩꦴꦤꦨꦴꦮꦺꦥꦷ’’ꦠꦶ. ꦱꦺꦪ꧀ꦪꦩꦴꦤꦨꦴꦮꦺꦥꦷꦠꦶ ꦥꦶ-ꦱꦢ꧀ꦢꦺꦴ ꦄꦴꦏꦝ꧀ꦞꦏꦺꦴ ꦄꦱꦺꦪ꧀ꦪꦩꦴꦤꦤꦶꦢ꧀ꦢꦺꦱꦺꦥꦶ ꦥꦸꦒ꧀ꦒꦭꦴꦩꦱꦤꦱ꧀ꦱ ꦏꦠꦠ꧀ꦠꦴ. ꦪꦱ꧀ꦱ ꦏꦱ꧀ꦱꦕꦷꦠꦶ ꦱꦺꦪ꧀ꦪꦴꦢꦷꦱꦸ ꦪꦱ꧀ꦱ ꦏꦱ꧀ꦱꦕꦶ ꦥꦸꦒ꧀ꦒꦭꦱ꧀ꦱ.

꧘꧘꧐. ꦥꦸꦫꦶꦩꦩꦴꦤꦱ꧀ꦱꦴꦠꦶ ꦥꦸꦧ꧀ꦧꦺ ꦥꦮꦠ꧀ꦠꦱ꧀ꦱ ꦱꦢꦶꦱꦩꦴꦤꦱ꧀ꦱ, ꦲꦷꦤꦩꦴꦤꦱ꧀ꦱ ꦮꦴ, ꦱꦢꦶꦱꦩꦴꦤꦮꦱꦺꦤꦺꦮ ꦥꦤ ꦥꦴꦭ꦳ꦶ ꦄꦴꦒꦠꦴ.

꧘꧘꧑. ‘‘ꦩꦶꦒꦴꦤꦁ ꦏꦺꦴꦠ꧀ꦡꦸꦏꦺꦴ ꦄꦤ꧀ꦠꦺꦴ, ꦥꦏ꧀ꦑꦷꦤꦁ ꦥꦤ ꦮꦴꦪꦱꦺꦴ’’ꦠꦶ (ꦗꦴ. ꧑.꧓.꧑꧓꧕) ꦮꦕꦤꦠꦺꦴ ꦄꦴꦲ ‘‘ꦥꦏ꧀ꦑꦶꦗꦴꦠꦷꦱꦸ ꦮꦴꦪꦱꦺꦴ ꦄꦤ꧀ꦠꦺꦴ ꦭꦴꦩꦏꦺꦴ’’ꦠꦶ.

꧘꧘꧒. ꦮꦶꦫꦴꦒꦤ꧀ꦠꦶ ꦄꦫꦲꦠ꧀ꦠꦁ.

꧘꧘꧓. ꦩꦴꦤꦱꦩ꧀ꦥꦪꦸꦠ꧀ꦠꦕ꧀ꦖꦤ꧀ꦢꦺꦴ ꦠꦟ꧀ꦲꦴꦖꦤ꧀ꦢꦺꦴ. ꦩꦴꦤꦱꦨꦴꦮꦁ ꦄꦤꦸꦒꦠꦺꦴ ꦱꦺꦪ꧀ꦪꦴꦢꦶꦠꦺꦴ ꦱꦩ꧀ꦥꦒ꧀ꦒꦟ꧀ꦲꦤꦮꦱꦺꦤ ꦥꦮꦠ꧀ꦠꦺꦴ ꦩꦴꦤꦱꦩ꧀ꦥꦪꦸꦠ꧀ꦠꦏꦠ꧀ꦠꦸꦏꦩ꧀ꦪꦠꦴꦖꦤ꧀ꦢꦺꦴ ꦮꦴ ꦩꦴꦤꦕ꧀ꦖꦤ꧀ꦢꦺꦴ.

꧘꧘꧔. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦮꦶꦭꦩ꧀ꦧꦤꦺ ꦤꦶꦥ꧀ꦦꦴꦢꦺꦠꦧ꧀ꦧꦺ. ꦪꦸꦠ꧀ꦠꦁ ꦄꦤꦸꦕ꧀ꦖꦮꦶꦏꦁ. ꦩꦸꦠ꧀ꦠꦁ ꦮꦶꦱ꧀ꦱꦛ꧀ꦜꦁ. ꦱꦶꦭꦶꦛ꧀ꦜꦁ ꦱꦲꦶꦠꦁ, ꦄꦠ꧀ꦡꦢ꧀ꦮꦪꦮꦶꦨꦴꦮꦏꦁ ꦮꦴ.

꧘꧘꧘. ꦄꦤꦸꦢ꧀ꦢꦪꦱ꧀ꦱꦺꦮꦴꦠꦶ ꦩꦺꦠ꧀ꦠꦴꦪꦤ꧀ꦠꦱ꧀ꦱ ꦮꦶꦪ ꦄꦤꦸꦏꦩ꧀ꦥꦤ꧀ꦠꦱ꧀ꦱ ꦮꦶꦪ ꦮꦶꦏꦥ꧀ꦥꦤꦴꦠꦶ ꦄꦴꦲ ‘‘ꦱꦲꦤꦤ꧀ꦢꦶꦠꦴꦢꦶꦏꦱ꧀ꦱꦴ’’ꦠꦶ, ꦩꦺꦠ꧀ꦠꦴꦢꦶꦥꦠꦶꦫꦹꦥꦺꦤ ꦥꦮꦠ꧀ꦠꦒꦺꦲꦱꦶꦠꦱꦶꦤꦺꦲꦱ꧀ꦱꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦠꦴꦢꦶꦱꦺꦴ ꦫꦴꦒꦺꦴ’’ꦠꦶ. ꦄꦠ꧀ꦡꦺꦴ ꦪꦸꦗ꧀ꦗꦠꦷꦠꦶ ꦌꦮꦩ꧀ꦥꦶ ‘‘ꦠꦠ꧀ꦡꦴ’’ꦠꦶ ꦥꦴꦭ꦳ꦶꦥꦢꦱ꧀ꦱ ꦄꦠ꧀ꦡꦺꦴ ꦪꦸꦗ꧀ꦗꦠꦶ. ꦥꦫꦴꦤꦸꦢ꧀ꦢꦪꦠꦴꦲꦺꦠꦸꦏꦺꦴ ꦲꦶ ꦥꦫꦴꦤꦸꦢ꧀ꦢꦪꦠꦴꦱꦲꦶꦠꦺꦴ ꦱꦺꦴ ꦮꦶꦠꦏ꧀ꦏꦺꦴꦠꦶ.

꧘꧙꧐. ꦏꦴꦩꦒꦸꦟꦥꦴꦫꦶꦥꦹꦫꦶꦪꦴ ꦪꦺꦨꦸꦪ꧀ꦪꦺꦤ ꦭꦺꦴꦏꦺꦴ ꦱꦩ꧀ꦨꦴꦮꦺꦠꦷꦠꦶ ꦄꦴꦲ ‘‘ꦄꦤꦮꦚ꧀ꦚꦠ꧀ꦠꦠ꧀ꦡꦩꦺꦮ ꦏꦴꦩꦒꦸꦟꦺ ꦕ ꦥꦠ꧀ꦡꦺꦠꦷ’’ꦠꦶ.

ꦌꦏꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦢꦸꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧘꧙꧑. ꦧꦤ꧀ꦣꦠꦷꦠꦶ ꦏꦸꦗ꧀ꦙꦤꦴꦏꦴꦫꦁ ꦧꦤ꧀ꦣꦠꦶ ꦓꦛꦺꦠꦶ. ꦈꦥꦤꦴꦲꦺꦴ ꦲꦶ ꦄꦴꦓꦴꦠꦮꦠ꧀ꦡꦸꦤꦴ ꦕꦶꦠ꧀ꦠꦁ ꦧꦤ꧀ꦣꦤ꧀ꦠꦺꦴ ꦮꦶꦪ ꦲꦺꦴꦠꦶ, ꦪꦠꦺꦴ ꦄꦚ꧀ꦚꦡꦴ ꦥꦮꦠ꧀ꦠꦶꦠ꧀ꦮꦴꦥꦶ ꦄꦮꦶꦢꦶꦠꦺ ꦈꦥꦤꦴꦲꦺ ꦄꦴꦓꦴꦠꦮꦠ꧀ꦡꦸꦱꦤ꧀ꦤꦶꦱ꧀ꦱꦶꦠꦺꦴꦮ ꦲꦺꦴꦠꦶ.

꧘꧙꧒. ꦢꦤ꧀ꦠꦺꦲꦶ ꦖꦶꦤ꧀ꦢꦶꦠ꧀ꦮꦴꦠꦶ ꦢꦤ꧀ꦠꦺꦲꦶ ꦖꦶꦤ꧀ꦢꦶꦠ꧀ꦮꦴ ꦮꦶꦪ ꦌꦏꦢꦺꦱꦁ ꦄꦥꦤꦺꦠ꧀ꦮꦴ ꦌꦏꦢꦺꦱꦁ ꦒꦲꦺꦠ꧀ꦮꦴꦠꦶ ꦄꦣꦶꦥ꧀ꦥꦴꦪꦺꦴ.

꧘꧙꧔. ꦄꦕ꧀ꦕꦪꦁ ꦏꦠ꧀ꦮꦴꦠꦶ ꦮꦷꦠꦶꦏ꧀ꦏꦩꦁ ꦏꦠ꧀ꦮꦴ. ꦥꦛꦶꦕ꧀ꦖꦴꦢꦤꦺꦠꦶ ꦄꦠ꧀ꦠꦤꦴ ꦏꦠꦱ꧀ꦱ ꦄꦕ꧀ꦕꦪꦱ꧀ꦱ ꦥꦛꦶꦕ꧀ꦖꦴꦢꦤꦺ. ꦮꦺꦴꦕ꧀ꦖꦶꦤ꧀ꦢꦤꦁ ꦮꦷꦠꦶꦏ꧀ꦏꦩꦏꦶꦫꦶꦪꦴꦪ ꦄꦥ꧀ꦥꦛꦶꦗꦴꦤꦮꦱꦺꦤ ꦈꦥꦕ꧀ꦖꦶꦤ꧀ꦢꦤꦁ, ꦮꦺꦴꦕ꧀ꦖꦶꦤ꧀ꦢꦤꦺꦤ ꦖꦴꦢꦤꦴ ꦮꦺꦴꦕ꧀ꦖꦶꦤ꧀ꦢꦤꦖꦴꦢꦤꦴ.

ꦄꦱꦩ꧀ꦩꦴꦨꦴꦱꦤꦺ ꦱꦜ-ꦱꦢ꧀ꦢꦺꦴ ꦭꦺꦴꦏꦺ ꦤꦶꦫꦸꦭ꦳꧀ꦲꦺꦴꦠꦶ ꦄꦴꦲ ‘‘ꦪꦺꦴ ꦤ ꦱꦩ꧀ꦩꦴ ꦨꦴꦱꦠꦶ, ꦱꦺꦴ ꦱꦜꦺꦴ’’ꦠꦶ. ꦱꦜꦱ꧀ꦱ ꦪꦏ꧀ꦑꦱꦹꦏꦫꦱꦢꦶꦱꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦏꦸꦕ꧀ꦖꦶ ꦮꦴ ꦥꦶꦜꦶ ꦮꦴ ꦗꦴꦤꦶꦠꦸꦁ ꦤ ꦱꦏ꧀ꦏꦴ’’ꦠꦶ ꦄꦴꦲ, ꦆꦤ꧀ꦢꦗꦴꦭꦱꦢꦶꦱꦺꦴ ꦮꦴ ꦌꦱꦺꦴ ꦢꦛ꧀ꦜꦧ꧀ꦧꦺꦴ.

ꦪꦺꦴ ꦱꦧ꧀ꦧꦡꦴ ꦮꦶꦥꦤ꧀ꦤꦗ꧀ꦙꦴꦱꦪꦺꦴꦥꦶ ꦱꦩꦴꦤꦺꦴ ꦏꦴꦪꦮꦕꦷꦨꦺꦢꦩꦠ꧀ꦠꦺꦤ ꦄꦠ꧀ꦠꦴꦤꦁ ꦱꦩ꧀ꦥꦤ꧀ꦤꦁ ꦮꦶꦪ ꦢꦱ꧀ꦱꦺꦠ꧀ꦮꦴ ꦭꦺꦴꦏꦁ ꦮꦚ꧀ꦕꦺꦤ꧀ꦠꦺꦴ ꦄꦚ꧀ꦚꦡꦴ ꦱꦤ꧀ꦠꦁ ꦄꦚ꧀ꦚꦡꦴ ꦥꦮꦺꦢꦺꦠꦶ. ꦠꦺꦤꦴꦲ ‘‘ꦠꦺꦤꦺꦠꦁ ꦱꦴꦜꦺꦪ꧀ꦪꦁ ꦩꦴꦪꦴꦠꦺꦴ ꦧꦭꦮꦠꦫꦴ ꦮꦚ꧀ꦕꦤꦴꦠꦶ ꦢꦛ꧀ꦜꦧ꧀ꦧ’’ꦤ꧀ꦠꦶ. ꦱꦤ꧀ꦠꦢꦺꦴꦱꦥꦛꦶꦕ꧀ꦖꦴꦢꦤꦩꦺꦮ ꦲꦶ ꦩꦴꦪꦴ. ꦠꦺꦤꦺꦮꦴꦠꦶ ꦧꦭꦮꦠꦫꦮꦚ꧀ꦕꦤꦴꦨꦴꦮꦺꦤꦺꦮ. ꦢꦭ꦳꧀ꦲꦏꦺꦫꦴꦛꦶꦪꦚ꧀ꦲꦶ ‘‘ꦥꦫꦶꦏ꧀ꦑꦠꦠꦴ’’ꦠꦶ ꦮꦸꦠ꧀ꦠꦁ.

꧙꧐꧘. ꦄꦨꦴꦮꦺꦥꦷꦠꦶ ꦥꦶ-ꦱꦢ꧀ꦢꦺꦤ ‘‘ꦏꦺꦴ ꦥꦤ ꦮꦴꦢꦺꦴ ꦨꦴꦮꦺ’’ꦠꦶ ꦢꦱ꧀ꦱꦺꦠꦶ. ꦪꦢꦶꦥꦶ ꦲꦶ ꦥꦸꦡꦸꦗ꧀ꦗꦤꦴꦤꦁ, ꦌꦏꦕ꧀ꦕꦴꦤꦚ꧀ꦕ ꦱꦺꦏ꧀ꦑꦴꦤꦁ ꦪꦡꦴꦫꦲꦁ ꦄꦠ꧀ꦠꦴꦨꦶꦤꦶꦮꦺꦱꦴꦢꦷꦲꦶ ꦏꦠꦹꦥꦏꦴꦫꦁ ꦫꦹꦥꦫꦴꦒꦴꦢꦶꦱꦁꦪꦺꦴꦗꦤꦏꦶꦕ꧀ꦕꦁ ꦱꦴꦣꦺꦠꦶ, ꦌꦏꦕ꧀ꦕꦴꦤꦁ ꦥꦤ ꦮꦶꦤꦴ ꦌꦮ ꦠꦺꦲꦷꦠꦶ ꦏꦱ꧀ꦱꦕꦶꦥꦶ ꦏꦶꦭꦺꦱꦱ꧀ꦱ ꦄꦮꦶꦏ꧀ꦑꦩ꧀ꦨꦶꦠꦠ꧀ꦠꦴ ꦏꦡꦚ꧀ꦕꦶꦥꦶ ꦄꦮꦶꦩꦸꦠ꧀ꦠꦺꦴ ꦏꦴꦩꦨꦮꦺꦴ ꦄꦗ꧀ꦙꦠ꧀ꦠꦒ꧀ꦒꦲꦟꦱ꧀ꦱ ꦮꦶꦱꦺꦱꦥꦕ꧀ꦕꦪꦺꦴꦠꦶ ‘‘ꦄꦗ꧀ꦙꦠ꧀ꦠ’’ꦤ꧀ꦠꦶ ꦮꦸꦕ꧀ꦕꦠꦶ, ꦠꦢꦨꦴꦮꦠꦺꦴ ‘‘ꦧꦲꦶꦢ꧀ꦣꦴ’’ꦠꦶ ꦭꦢ꧀ꦣꦮꦺꦴꦲꦴꦫꦺ ꦫꦹꦥꦴꦫꦹꦥꦨꦮꦺ ꦏꦺꦮꦭꦩ꧀ꦥꦶ ꦱꦁꦪꦺꦴꦗꦤꦏꦶꦕ꧀ꦕꦁ ꦱꦴꦣꦺꦤ꧀ꦠꦁ ꦥꦮꦠ꧀ꦠꦠꦷꦠꦶ, ꦠꦠꦺꦴ ꦌꦮ ꦫꦹꦥꦴꦫꦹꦥꦴꦮꦕꦫꦱꦠ꧀ꦠꦴꦤꦁ ꦧꦲꦶꦢ꧀ꦣꦴꦱꦁꦪꦺꦴꦗꦤꦨꦴꦮꦲꦺꦠꦗꦴꦠꦤ꧀ꦠꦶ ꦕ ‘‘ꦧꦲꦶꦢ꧀ꦣꦴꦱꦁꦪꦺꦴꦗꦤ’’ꦤ꧀ꦠꦶ ꦮꦸꦕ꧀ꦕꦠꦷꦠꦶ ꦆꦩꦩꦠ꧀ꦡꦩꦴꦲ ‘‘ꦱꦏ꧀ꦏꦴꦪꦢꦶꦛ꧀ꦜꦴꦢꦷꦤꦁ…ꦥꦺ… ꦪꦺꦴꦗꦤꦁ ꦤꦴꦩꦴ’’ꦠꦶ.

ꦢꦸꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦠꦶꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧐꧙. ꦄꦮꦶꦗ꧀ꦗꦴꦨꦮꦠꦟ꧀ꦲꦴꦲꦶ ꦮꦶꦪ ꦆꦱ꧀ꦱꦴꦩꦕ꧀ꦖꦫꦶꦪꦢꦺꦴꦩꦤꦱ꧀ꦱꦴꦢꦶꦱꦲꦴꦪꦨꦹꦠꦺꦤ ꦢꦺꦴꦱꦺꦤꦥꦶ ꦨꦮꦴꦨꦶꦱꦔ꧀ꦑꦫꦟꦁ ꦲꦺꦴꦠꦷꦠꦶ ‘‘ꦄꦏꦸꦱꦭꦩꦹꦭꦴꦤꦺꦮ ꦮꦛ꧀ꦛꦩꦹꦭꦴꦤꦷ’’ꦠꦶ. ꦠꦺꦤꦴꦲ ‘‘ꦠꦷꦲꦶ…ꦥꦺ… ꦏꦡꦶꦠꦺꦴ’’ꦠꦶ.

꧙꧑꧙. ꦫꦹꦥꦴꦫꦹꦥꦴꦮꦕꦫꦮꦶꦥꦴꦏꦴꦤꦁ ꦱꦤ꧀ꦠꦥꦟꦷꦠꦨꦴꦮꦺꦤ ꦈꦭ꦳ꦴꦫꦠꦩꦠ꧀ꦠꦴ ꦠꦠ꧀ꦡ ꦱꦴꦠꦶꦱꦪꦺꦴ ꦨꦮꦫꦴꦒꦺꦴ ꦮꦸꦠ꧀ꦠꦺꦴ.

꧙꧒꧐. ꦩꦴꦤꦺꦤ ꦜꦥꦤꦴꦠꦶ ꦩꦴꦤꦺꦤ ꦱꦺꦪ꧀ꦪꦴꦢꦶꦮꦱꦺꦤ ꦄꦠ꧀ꦠꦤꦺꦴ ꦜꦥꦤꦴ. ꦜꦥꦤꦴꦠꦶ ꦕ ꦢꦲꦤꦴ, ꦥꦒ꧀ꦒꦟ꧀ꦲꦤꦴ ꦮꦴ.

꧙꧒꧑. ꦠꦁꦱꦩ꧀ꦥꦪꦸꦠ꧀ꦠꦴꦠꦶ ꦢꦺꦴꦱꦱꦩ꧀ꦥꦪꦸꦠ꧀ꦠꦴ.

꧙꧒꧒. ꦠꦺꦱꦁ ꦮꦟ꧀ꦟꦨꦺꦢꦤ꧀ꦠꦶ ꦠꦺꦱꦁ ꦗꦷꦮꦴꦤꦁ ꦮꦟ꧀ꦟꦮꦶꦱꦺꦱꦁ, ꦠꦺꦱꦁ ꦮꦴ ꦠꦡꦴ ꦏꦡꦺꦤ꧀ꦠꦴꦤꦁ ꦱꦸꦠ꧀ꦮꦴ. ꦧ꧀ꦪꦴꦥꦷꦠꦶ ꦱꦏꦭꦭꦺꦴꦏꦧ꧀ꦪꦴꦥꦷ, ꦱꦏꦭꦱꦫꦷꦫꦧ꧀ꦪꦴꦥꦷ ꦮꦴ. ꦥꦫꦶꦩꦟ꧀ꦝꦭꦺꦴꦠꦶ ꦥꦫꦩꦴꦟꦸꦥ꧀ꦥꦩꦴꦟꦺꦴ ꦲꦸꦠ꧀ꦮꦴ ꦥꦫꦶꦩꦟ꧀ꦝꦭꦺꦴ. ꦄꦴꦢꦶ-ꦱꦢ꧀ꦢꦺꦤ ꦄꦔ꧀ꦒꦸꦛ꧀ꦜꦥ꧀ꦥꦩꦴꦟꦺꦴ ꦮꦪꦥ꧀ꦥꦩꦴꦟꦺꦴꦠꦶꦄꦴꦢꦶꦏꦁ ꦱꦔ꧀ꦒꦟ꧀ꦲꦴꦠꦶ.

꧙꧒꧓. ꦈꦠꦸꦮꦶꦥꦫꦶꦟꦴꦩꦗꦺꦴ ꦱꦷꦠꦴꦢꦶꦈꦠꦸꦮꦶꦥꦫꦶꦮꦠ꧀ꦠꦗꦴꦠꦺꦴ. ꦎꦥꦏ꧀ꦏꦩꦶꦏꦺꦴ ꦄꦠ꧀ꦠꦤꦺꦴ, ꦥꦫꦱ꧀ꦱ ꦮꦴ ꦠꦴꦢꦶꦱꦈꦥꦏ꧀ꦏꦩꦤꦶꦧ꧀ꦧꦠ꧀ꦠꦺꦴ. ꦮꦶꦱꦩꦥꦫꦶꦲꦴꦫꦗꦺꦴ ꦕꦶꦫꦴꦱꦤꦕꦶꦫꦛ꧀ꦜꦴꦤꦴꦢꦶꦤꦴ ꦏꦴꦪꦱ꧀ꦱ ꦮꦶꦱꦩꦥꦫꦶꦲꦫꦟꦠꦺꦴ ꦗꦴꦠꦺꦴ. ꦱꦤ꧀ꦤꦶꦥꦴꦠꦗꦺꦴ ꦱꦚ꧀ꦕꦪꦠꦺꦴ ꦥꦛ꧀ꦜꦴꦪ ꦥꦕ꧀ꦕꦺꦏꦁ ꦮꦶꦱꦩꦴꦏꦴꦫꦠꦺꦴ ꦢꦺꦴꦱꦠ꧀ꦠꦪꦱꦩꦺꦴꦣꦴꦤꦠꦺꦴ ꦗꦴꦠꦺꦴ. ꦏꦩ꧀ꦩꦱꦩꦸꦛ꧀ꦜꦴꦤꦺꦴ ꦈꦠꦸꦮꦶꦥꦫꦶꦟꦴꦩꦴꦢꦷꦲꦶ ꦮꦶꦤꦴ ꦏꦩ꧀ꦩꦠꦺꦴ ꦱꦩꦸꦛ꧀ꦜꦶꦠꦺꦴ. ꦥꦶꦠ꧀ꦠꦱꦺꦩ꧀ꦲꦮꦴꦠꦱꦩꦸꦛ꧀ꦜꦴꦤꦴ ꦥꦤ ꦥꦶꦠ꧀ꦠꦴꦢꦷꦤꦁ ꦄꦣꦶꦏꦨꦴꦮꦺꦤꦺꦮ ꦮꦸꦠ꧀ꦠꦴ. ꦱꦧ꧀ꦧꦱ꧀ꦱꦴꦥꦶ ꦲꦶ ꦫꦺꦴꦒꦱ꧀ꦱ ꦢꦺꦴꦱꦠ꧀ꦠꦪꦁ ꦄꦴꦱꦤ꧀ꦤꦏꦴꦫꦟꦁ ꦢꦺꦴꦱꦥ꧀ꦥꦏꦺꦴꦥꦺꦤ ꦮꦶꦤꦴ ꦄꦨꦴꦮꦠꦺꦴ. ꦏꦩ꧀ꦩꦁ ꦥꦣꦴꦤꦏꦴꦫꦟꦁ ꦏꦠꦺꦴꦏꦴꦱꦺ ꦌꦮ ꦠꦱ꧀ꦩꦶꦁ ꦈꦥ꧀ꦥꦗ꧀ꦗꦤꦠꦺꦴ, ꦆꦠꦫꦁ ꦥꦤ ꦠꦱ꧀ꦱ ꦱꦲꦏꦴꦫꦶꦏꦴꦫꦟꦁ ꦢꦛ꧀ꦜꦧ꧀ꦧꦁ. ꦠꦪꦶꦢꦁ ꦥꦸꦧ꧀ꦧꦺꦏꦠꦲꦺꦠꦸꦮꦴꦢꦶꦤꦺꦴ ꦥꦛꦶꦏ꧀ꦑꦶꦥꦤ꧀ꦠꦶ. ꦈꦥꦥꦗ꧀ꦗꦮꦺꦢꦤꦷꦪꦦꦭꦩ꧀ꦥꦶ ꦥꦸꦧ꧀ꦧꦺꦏꦠꦲꦺꦠꦸꦏꦥꦏ꧀ꦑꦶꦏꦩꦺꦮ ꦄꦠꦷꦠꦢ꧀ꦣꦶꦏꦠ꧀ꦠꦴ ꦏꦩ꧀ꦩꦱ꧀ꦱꦴꦠꦶ ꦄꦫꦸꦕꦶꦱꦹꦕꦤꦠ꧀ꦡꦁ ꦏꦶꦫ-ꦱꦢ꧀ꦢꦒ꧀ꦒꦲꦟꦁ ꦏꦫꦺꦴꦠꦶ ‘‘ꦈꦥꦥꦗ꧀ꦗꦮꦺꦢꦤꦷꦪꦚ꧀ꦕ ꦏꦶꦫ ꦥꦛꦶꦏ꧀ꦑꦶꦥꦤ꧀ꦠꦷ’’ꦠꦶ.

꧙꧒꧔. ꦢꦴꦲꦏꦴꦫꦟꦠꦴꦪꦴꦠꦶ ꦫꦴꦒꦴꦢꦶꦢꦱꦮꦶꦣꦒ꧀ꦒꦶꦢꦴꦲꦱ꧀ꦱ, ꦤꦫꦏꦒ꧀ꦒꦶꦢꦴꦲꦱ꧀ꦱ ꦕ ꦏꦴꦫꦟꦠꦴꦪ.

꧙꧒꧖. ꦥꦸꦡꦸꦤꦶꦩꦶꦠ꧀ꦠꦱꦨꦴꦮꦺꦱꦹꦠꦶ ꦥꦸꦡꦸ ꦤꦴꦤꦴꦏꦶꦭꦺꦱꦴꦢꦷꦤꦁ ꦏꦴꦫꦟꦱꦨꦴꦮꦺꦱꦸ.

꧙꧓꧑. ꦄꦢ꧀ꦢꦤꦁ ꦄꦢ꧀ꦢꦴ ꦩꦢ꧀ꦢꦮꦺꦴ, ꦄꦤꦺꦏꦠ꧀ꦡꦠ꧀ꦠꦴ ꦣꦴꦠꦹꦤꦁ ꦠꦥ꧀ꦥꦛꦶꦏ꧀ꦑꦺꦥꦺꦤ ꦄꦤꦢ꧀ꦢꦴꦠꦶ ꦄꦴꦲ ‘‘ꦄꦩꦸꦢꦸꦠꦴ ꦮꦴ ꦄꦤꦢ꧀ꦢꦴ’’ꦠꦶ.

꧙꧓꧖. ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦲꦺꦠꦸꦏꦠ꧀ꦠꦴ ꦄꦴꦮꦗ꧀ꦗꦤꦴꦪ ꦄꦏꦸꦱꦭꦴꦤꦸꦏꦹꦭꦏꦶꦕ꧀ꦕꦠꦴ ꦢꦛ꧀ꦜꦧ꧀ꦧꦴ.

ꦠꦶꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦕꦠꦸꦏ꧀ꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧓꧙. ꦌꦮꦁ-ꦱꦢ꧀ꦢꦺꦤꦴꦠꦶ ꦤꦶꦢꦱ꧀ꦱꦤꦠ꧀ꦡꦺꦤ ꦌꦮꦁ-ꦱꦢ꧀ꦢꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦨꦮꦺꦴ ꦌꦮ ꦄꦨꦶꦮꦸꦢ꧀ꦣꦺꦴ ꦄꦨꦮꦺꦴ ꦪꦡꦴ ‘‘ꦄꦱꦺꦏ꧀ꦑꦴ ꦣꦩ꧀ꦩꦴ’’ꦠꦶ (ꦣ. ꦱ. ꦠꦶꦏꦩꦴꦠꦶꦏꦴ ꧑꧑). ꦢꦸꦠꦶꦪꦱ꧀ꦩꦶꦁ ꦥꦏ꧀ꦑꦺ ꦨꦮꦴꦨꦮꦱꦢ꧀ꦢꦺꦤ ꦱꦩ꧀ꦥꦠ꧀ꦠꦶꦮꦶꦥꦠ꧀ꦠꦶꦪꦺꦴ, ꦮꦸꦢ꧀ꦣꦶꦲꦴꦤꦶꦪꦺꦴ ꦮꦴ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦴ.

ꦄꦒꦠꦶꦪꦴꦠꦶ ꦄꦪꦸꦠ꧀ꦠꦒꦠꦶꦪꦴ, ꦄꦥ꧀ꦥꦠꦶꦫꦹꦥꦏꦶꦫꦶꦪꦴꦪꦴꦠꦶ ꦄꦠ꧀ꦡꦺꦴ.

ꦏꦺꦴꦣꦹꦥꦴꦪꦴꦱ…ꦥꦺ… ꦩꦴꦠꦸꦒꦴꦩꦴ ꦮꦴ ꦈꦴꦩꦶꦄꦴꦢꦶꦨꦪꦤ꧀ꦠꦶ ꦪꦺꦴꦗꦤꦴ. ꦥꦚ꧀ꦕꦏꦴꦩꦒꦸꦟꦩꦴꦠꦸꦒꦴꦩꦒ꧀ꦒꦲꦟꦺꦠꦶ ꦥꦚ꧀ꦕꦏꦴꦩꦒꦸꦟꦒ꧀ꦒꦲꦟꦺ, ꦩꦴꦠꦸꦒꦴꦩꦒ꧀ꦒꦲꦟꦺ ꦕ.

‘‘ꦱꦪꦁꦏꦠꦁ ꦱꦸꦑꦢꦸꦏ꧀ꦑ’’ꦤ꧀ꦠꦶꦄꦴꦢꦶꦏꦴ ꦢꦶꦛ꧀ꦜꦶ ꦪꦢꦶꦥꦶ ꦄꦚ꧀ꦚꦺꦱꦩ꧀ꦥꦶ ꦢꦶꦛ꧀ꦜꦶꦒꦠꦶꦏꦴꦤꦁ ꦄꦠ꧀ꦡꦺꦮ, ꦠꦶꦩ꧀ꦧꦫꦸꦏꦺꦴ ꦥꦤ ꦠꦡꦴꦢꦶꦛ꧀ꦜꦶꦏꦺꦴ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦷꦠꦶ ꦱꦴ ꦢꦶꦛ꧀ꦜꦶ ‘‘ꦠꦶꦩ꧀ꦧꦫꦸꦏꦢꦶꦛ꧀ꦜꦷ’’ꦠꦶ (ꦱꦁ. ꦤꦶ. ꧒.꧑꧘) ꦮꦸꦠ꧀ꦠꦴ. ꦠꦺꦤꦴꦲ ‘‘ꦠꦶꦩ꧀ꦧꦫꦸꦏꦺꦴ…ꦥꦺ… ꦄꦴꦒꦠꦠ꧀ꦠꦴ’’ꦠꦶ.

ꦕꦠꦸꦏ꧀ꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦥꦚ꧀ꦕꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧔꧐. ꦄꦴꦒꦩꦤꦱ꧀ꦱ ꦥꦛꦶꦱꦤ꧀ꦣꦶꦒ꧀ꦒꦲꦟꦮꦱꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ.

꧙꧔꧑. ꦈꦥꦕꦪꦤꦠꦺꦴꦠꦶ ꦮꦝ꧀ꦞꦤꦠꦺꦴ. ꦄꦚ꧀ꦚꦡꦴꦠꦶ ꦭꦴꦨꦠꦺꦴ ꦠꦏ꧀ꦏꦤꦠꦺꦴ ꦕ ꦄꦚ꧀ꦚꦥ꧀ꦥꦏꦴꦫꦺꦴ ꦒꦲꦶꦠꦺꦴꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦢ꧀ꦣꦴꦫꦸꦕꦶꦄꦴꦢꦷꦲꦷ’’ꦠꦶ ꦄꦴꦲ. ꦄꦤꦸꦱ꧀ꦱꦮꦠꦺꦴ ꦲꦶ ꦱꦢ꧀ꦢꦲꦤꦁ, ꦫꦸꦕ꧀ꦕꦤꦁ ꦥꦤ ꦗꦴꦠꦶꦱ꧀ꦱꦫꦚꦴꦟꦠꦺꦴꦥꦶ ꦲꦺꦴꦠꦶ. ꦄꦴꦢꦶ-ꦱꦢ꧀ꦢꦺꦤ ꦑꦤ꧀ꦠꦶꦄꦴꦢꦷꦤꦁ ꦱꦔ꧀ꦒꦲꦺꦴ.

꧙꧔꧒. ꦄꦏ꧀ꦑꦤ꧀ꦠꦶ ꦩꦹꦭꦁ ꦌꦠꦺꦱꦤ꧀ꦠꦶ ꦄꦏ꧀ꦑꦤ꧀ꦠꦶꦩꦹꦭꦏꦴ. ꦢꦸꦏ꧀ꦏꦛꦢꦸꦧ꧀ꦨꦴꦱꦶꦠꦠꦴꦢꦶꦢꦺꦴꦱꦴ ꦠꦴꦢꦶꦱꦴꦤꦶ ꦏꦴꦪꦮꦕꦷꦩꦤꦺꦴꦢꦸꦕ꧀ꦕꦫꦶꦠꦴꦤꦶ.

꧙꧔꧓. ꦈꦢꦒ꧀ꦒꦠꦴꦱꦔ꧀ꦑꦴꦠꦺꦴ ꦄꦮꦹꦥꦱꦩꦺꦴ ꦤ ꦈꦢ꧀ꦣꦕ꧀ꦕꦱꦔ꧀ꦑꦴꦠꦺꦴꦠꦶ ꦥꦷꦠꦶꦪꦴ ꦌꦮ ꦱꦮꦶꦥ꧀ꦦꦴꦫꦶꦏꦠꦴꦱꦔ꧀ꦑꦴꦠꦁ ꦄꦱꦤ꧀ꦠꦱꦨꦴꦮꦁ ꦄꦴꦲ. ꦄꦮꦹꦥꦱꦩꦲꦺꦠꦸꦨꦹꦠꦺꦴꦠꦶ ꦮꦶꦏ꧀ꦑꦺꦥꦲꦺꦠꦸꦨꦹꦠꦺꦴ. ꦥꦷꦠꦶꦪꦴ ꦄꦴꦏꦴꦫꦺꦴꦠꦶ ꦥꦷꦠꦶꦪꦴ ꦥꦮꦠ꧀ꦠꦶꦄꦴꦏꦴꦫꦺꦴ.

ꦥꦚ꧀ꦕꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦖꦏ꧀ꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧔꧔. ꦠꦺꦤꦴꦠꦶ ꦏꦺꦴꦣꦴꦢꦷꦤꦁꦪꦺꦮ ꦮꦶꦮꦴꦢꦩꦹꦭꦠ꧀ꦠꦴ.

꧙꧔꧕. ꦏꦸꦱꦭꦴꦤꦸꦪꦺꦴꦒꦺ ꦱꦴꦠꦕ꧀ꦕꦁ ꦏꦸꦱꦭꦴꦤꦸꦪꦺꦴꦒꦱꦴꦠꦕ꧀ꦕꦁ.

ꦒꦟꦺꦤ ꦱꦠ꧀ꦠꦱꦩꦹꦲꦺꦤ ꦱꦔ꧀ꦒꦟꦶ ꦱꦤ꧀ꦤꦶꦥꦠꦤꦁ ꦪꦺꦤ ꦱꦢ꧀ꦣꦶꦁ, ꦠꦺꦤ ꦱꦔ꧀ꦒꦠꦶ ꦒꦟꦱꦔ꧀ꦒꦟꦶꦏꦴ. ꦏꦱ꧀ꦱꦕꦶ ꦓꦴꦱꦕ꧀ꦖꦴꦢꦤꦴꦢꦶꦏꦱ꧀ꦱ.

꧙꧔꧖. ꦈꦥꦮꦶꦠꦏ꧀ꦏꦺꦠꦷꦠꦶ ꦄꦴꦫꦩ꧀ꦩꦟꦁ ꦈꦥꦺꦕ꧀ꦕ ꦠꦏ꧀ꦏꦺꦠꦶ.

꧙꧔꧘. ꦄꦣꦶꦕ꧀ꦕꦱꦩꦸꦥ꧀ꦥꦤ꧀ꦤꦶꦏꦺꦴꦠꦶ ‘‘ꦄꦣꦶꦕ꧀ꦕꦱꦩꦸꦥ꧀ꦥꦤ꧀ꦤꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦌꦮꦁꦮꦴꦢꦷ.

ꦖꦏ꧀ꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦄꦛ꧀ꦜꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧕꧒. ꦎꦱꦷꦢꦤꦴꦏꦴꦫꦺꦤꦴꦠꦶ ꦏꦠ꧀ꦠꦧ꧀ꦧꦏꦩ꧀ꦩꦺ ꦄꦤꦸꦱ꧀ꦱꦲꦤꦴꦏꦴꦫꦺꦤ.

꧙꧕꧘. ꦠꦺ ꦄꦨꦶꦤꦶꦮꦺꦱꦴ ꦄꦱꦚ꧀ꦚꦷꦮꦴꦢꦴ ꦮꦢꦤ꧀ꦠꦶ ꦌꦠꦺꦲꦷꦠꦶ.

ꦄꦛ꧀ꦜꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦤꦮꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧖꧐-꧙꧖꧓. ꦢꦱꦩꦱ꧀ꦱꦴꦠꦶ ꦄꦛ꧀ꦜꦴꦤꦓꦴꦠꦱ꧀ꦱ.

ꦄꦗ꧀ꦙꦠ꧀ꦠꦤ꧀ꦠꦶ ꦒꦺꦴꦕꦫꦗ꧀ꦙꦠ꧀ꦠꦁ ꦄꦣꦶꦥ꧀ꦥꦺꦠꦁ. ꦌꦠꦱ꧀ꦱ ꦒꦴꦡꦴꦮꦕꦤꦱ꧀ꦱ. ꦤꦶꦛ꧀ꦜꦥꦺꦠ꧀ꦮꦴꦠꦶ ꦄꦨꦶꦤꦶꦮꦶꦱ꧀ꦱ.

꧙꧖꧔. ꦄꦚ꧀ꦚꦺꦱꦁ ꦦꦱ꧀ꦱꦴꦢꦷꦤꦁ ꦱꦔ꧀ꦑꦠꦨꦴꦮꦺ ꦪꦡꦴꦱꦏꦁꦥꦕ꧀ꦕꦪꦺꦲꦶ. ꦪꦺꦤꦴꦏꦴꦫꦺꦤ ꦩꦴꦤꦱ꧀ꦱ ꦱꦴꦠꦶꦱꦪꦴ ꦥꦮꦠ꧀ꦠꦶ, ꦠꦁ ꦢꦱ꧀ꦱꦺꦠꦸꦁ ‘‘ꦄꦲꦤ꧀ꦠꦶ, ꦄꦱ꧀ꦩꦷꦠꦶ ꦕꦴ’’ꦠꦶ ꦮꦸꦠ꧀ꦠꦁ. ꦄꦠ꧀ꦠꦤꦺꦴꦠꦶ ꦢꦶꦛ꧀ꦜꦶꦒꦠꦥꦫꦶꦏꦥ꧀ꦥꦶꦠꦱ꧀ꦱ ꦄꦠ꧀ꦠꦤꦺꦴ. ꦪꦡꦴ ꦩꦴꦤꦱ꧀ꦱ ꦱꦩ꧀ꦥꦒ꧀ꦒꦲꦮꦱꦺꦤ, ꦌꦮꦁ ꦠꦟ꧀ꦲꦴꦪ ꦩꦩꦠ꧀ꦠꦮꦱꦺꦤ, ꦢꦶꦛ꧀ꦜꦶꦪꦴ ꦤꦶꦕ꧀ꦕꦴꦢꦶꦮꦱꦺꦤ ꦥꦮꦠ꧀ꦠꦶ ꦮꦶꦱꦺꦱꦮꦠꦷ ꦱꦩꦴꦤꦺꦥꦶ ꦄꦤꦴꦒꦠꦏꦴꦭꦴꦩꦱꦤꦺꦠꦶ ꦄꦴꦲ ‘‘ꦨꦮꦶꦱ꧀ꦱꦤ꧀ꦠꦷ…ꦥꦺ… ꦮꦸꦠ꧀ꦠꦺꦴ’’ꦠꦶ. ‘‘ꦄꦲꦩꦱ꧀ꦩꦷ’’ꦠꦶ ꦥꦤ ꦥꦮꦠ꧀ꦠꦩꦴꦤꦱ꧀ꦱꦺꦮ ꦨꦮꦠꦷꦠꦶ ꦱꦧ꧀ꦧꦥꦢꦱꦴꦣꦴꦫꦟꦱ꧀ꦱ ꦩꦴꦤꦱ꧀ꦱꦺꦮ ꦮꦱꦺꦤ ꦆꦚ꧀ꦗꦶꦠꦴꦢꦶꦠꦴ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦴ.

ꦤꦮꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦢꦱꦏꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧗꧐. ꦱꦔ꧀ꦏꦥ꧀ꦥꦤꦤ꧀ꦠꦶ ‘‘ꦏꦸꦱꦭꦠꦴ’’ꦠꦶ ꦮꦸꦠ꧀ꦠꦥꦢꦱ꧀ꦱ ꦄꦠ꧀ꦡꦮꦕꦤꦁ. ꦠꦱ꧀ꦱꦴ ꦈꦥꦴꦪꦕꦶꦤ꧀ꦠꦴꦪ. ꦩꦶꦕ꧀ꦖꦴꦨꦴꦮꦺꦴ ꦱꦴꦮꦗ꧀ꦗꦨꦴꦮꦺꦴ. ꦠꦢꦴꦏꦴꦫꦺꦴ ꦩꦺꦴꦲꦺꦴꦠꦶ ꦪꦡꦴꦮꦸꦠ꧀ꦠꦴꦏꦴꦫꦺꦤ ꦥꦮꦠ꧀ꦠꦺ ꦕꦶꦠ꧀ꦠꦸꦥ꧀ꦥꦴꦢꦺ ꦩꦺꦴꦲꦺꦴ. ꦠꦱ꧀ꦱꦴꦥꦶ ꦪꦡꦴꦮꦸꦠ꧀ꦠꦥꦕ꧀ꦕꦮꦺꦏ꧀ꦑꦟꦴꦪꦥꦶ ꦪꦡꦴꦏꦠꦥꦴꦥꦺꦥꦶ. ꦄꦣꦶꦩꦴꦤꦱꦩ꧀ꦥꦪꦸꦠ꧀ꦠꦁ ꦱꦚ꧀ꦗꦴꦤꦤꦁ ꦥꦏꦠꦶꦥꦸꦫꦶꦱꦤ꧀ꦠꦫꦢꦱ꧀ꦱꦤꦴꦢꦶꦮꦱꦺꦤ ꦥꦮꦠ꧀ꦠꦁ ꦢꦶꦛ꧀ꦜꦶꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦁ ꦦꦭꦁ ꦮꦶꦪ ꦮꦶꦩꦸꦠ꧀ꦠꦤ꧀ꦠꦶ ꦒꦲꦶꦠꦁ ꦢꦛ꧀ꦜꦧ꧀ꦧꦁ.

ꦢꦱꦏꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦠꦟ꧀ꦲꦴꦮꦶꦕꦫꦶꦠꦤꦶꦢ꧀ꦢꦺꦱꦮꦟ꧀ꦟꦤꦴ

꧙꧗꧓. ꦮꦶꦱꦺꦱꦁ ꦄꦏꦠ꧀ꦮꦴꦠꦶ ꦄꦤꦸꦥꦤꦶꦣꦴꦤꦁ, ꦱꦩꦠꦺꦴ ꦕ ꦄꦱꦩꦠꦺꦴ ꦕ ꦈꦥꦤꦶꦣꦴꦤꦤ꧀ꦠꦶ ꦆꦩꦁ ꦮꦶꦨꦴꦒꦁ ꦄꦏꦠ꧀ꦮꦴ, ꦪꦺꦴ ‘‘ꦆꦠ꧀ꦡꦁ, ꦌꦮꦁ, ꦄꦚ꧀ꦚꦡꦴ’’ꦠꦶ ꦥꦢꦺꦲꦶ ꦥꦏꦴꦱꦶꦠꦺꦴ.

ꦮꦶꦱꦺꦱꦱ꧀ꦱꦴꦠꦶ ‘‘ꦆꦠ꧀ꦡꦁ, ꦌꦮꦁ, ꦄꦚ꧀ꦚꦡꦴ’’ꦠꦶ ꦪꦡꦴꦮꦸꦠ꧀ꦠꦱ꧀ꦱꦺꦮ ꦮꦶꦱꦺꦱꦱ꧀ꦱ. ꦢꦶꦛ꧀ꦜꦶꦪꦴꦠꦶ ꦢꦶꦛ꧀ꦜꦶꦪꦴ ꦒꦲꦶꦠꦴꦪ ꦠꦢꦮꦶꦤꦴꦨꦴꦮꦶꦤꦷ ꦠꦟ꧀ꦲꦴ ꦢꦱ꧀ꦱꦶꦠꦴ. ꦱꦷꦱꦱꦷꦱꦩꦹꦭꦏꦺꦲꦷꦠꦶ ꦕꦠꦹꦲꦶ ꦱꦷꦱꦺꦲꦶ, ꦢ꧀ꦮꦴꦢꦱꦲꦶ ꦕ ꦱꦷꦱꦩꦹꦭꦏꦺꦲꦶ. ꦱꦪꦩꦺꦮ ꦕ ꦠꦟ꧀ꦲꦴ ꦢꦱ꧀ꦱꦶꦠꦴꦠꦶ ꦪꦺꦴꦗꦤꦴ. ꦪꦢꦶ ꦢꦶꦛ꧀ꦜꦶꦩꦴꦤꦒꦴꦲꦺꦴꦥꦶ ꦆꦣꦴꦣꦶꦥ꧀ꦥꦺꦠꦺꦴ, ꦪꦠꦺꦴ ‘‘ꦠꦟ꧀ꦲꦴꦩꦴꦤꦢꦶꦛ꧀ꦜꦶꦮꦱꦺꦤ ꦱꦩꦹꦲꦒꦴꦲꦠꦺꦴ’’ꦠꦶ (ꦮꦶꦨ. ꦄꦛ꧀ꦜ. ꧙꧗꧓) ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ, ꦏꦡꦁ ‘‘ꦠꦟ꧀ꦲꦴꦮꦶꦕꦫꦶꦠꦴꦤꦷ’’ꦠꦶ ꦮꦕꦤꦤ꧀ꦠꦶ ꦄꦴꦲ ‘‘ꦢꦶꦛ꧀ꦜꦶꦩꦴꦤꦺꦱꦹ’’ꦠꦶꦄꦴꦢꦶ. ꦠꦁꦩꦹꦭꦏꦠ꧀ꦠꦴꦠꦶ ꦠꦟ꧀ꦲꦴꦩꦹꦭꦏꦠ꧀ꦠꦴ.

꧙꧗꧔. ꦤ ꦄꦮꦏ꧀ꦏꦫꦷꦪꦠꦷꦠꦶ ꦄꦤꦮꦏꦴꦫꦷ, ꦠꦁ ꦄꦤꦮꦏꦴꦫꦶꦁ ꦏꦠ꧀ꦮꦴ, ꦠꦁ ꦥꦢꦤ꧀ꦠꦫꦺꦤ ꦮꦶꦨꦴꦮꦺꦤ꧀ꦠꦺꦴ ‘‘ꦄꦤꦮꦏ꧀ꦏꦫꦶ, ꦠꦁ ꦏꦠ꧀ꦮꦴ’’ꦠꦶ ꦄꦴꦲ. ꦮꦶꦏ꧀ꦑꦺꦥꦤꦁ ꦄꦮꦪꦮꦠꦺꦴ ꦮꦶꦨꦴꦒꦺꦴ. ꦄꦠ꧀ꦠꦠꦺꦴ ꦄꦮꦶꦤꦶꦧ꧀ꦨꦸꦗꦶꦠ꧀ꦮꦴꦠꦶ ꦪ꧀ꦮꦴꦪꦁ ꦢꦶꦛ꧀ꦜꦶꦒꦠꦶꦏꦥꦫꦶꦏꦥ꧀ꦥꦶꦠꦺꦴ ꦄꦠ꧀ꦠꦴ, ꦠꦠꦺꦴ ꦄꦮꦶꦱꦸꦁ ꦏꦠ꧀ꦮꦴ.

꧙꧗꧖. ꦧꦲꦶꦏꦠꦴꦤꦶ ꦫꦹꦥꦴꦢꦷꦤꦶ ꦈꦥꦒꦤ꧀ꦠ꧀ꦮꦴ ꦥꦮꦠ꧀ꦠꦴ ꦠꦟ꧀ꦲꦴ ꦈꦥꦴꦢꦴꦪꦴꦠꦶ ꦮꦸꦠ꧀ꦠꦴꦠꦶ ꦪꦺꦴꦗꦤꦴ.

ꦌꦏꦕ꧀ꦕꦱ꧀ꦱ ꦥꦸꦒ꧀ꦒꦭꦱ꧀ꦱ ꦌꦏꦱ꧀ꦩꦶꦁ ꦄꦠ꧀ꦠꦨꦴꦮꦺ ꦏꦱ꧀ꦱꦕꦶ ꦠꦟ꧀ꦲꦴꦮꦶꦕꦫꦶꦠꦱ꧀ꦱ ꦄꦱꦩ꧀ꦨꦮꦺꦴ, ꦏꦱ꧀ꦱꦕꦶꦢꦺꦮ ꦱꦩ꧀ꦨꦮꦺꦴꦠꦶ ꦄꦴꦲ ‘‘ꦏꦱ꧀ꦱꦕꦶ ꦱꦩ꧀ꦨꦮꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠ’’ꦤ꧀ꦠꦶ.

ꦠꦟ꧀ꦲꦴꦮꦶꦕꦫꦶꦠꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦑꦸꦢ꧀ꦢꦏꦮꦠ꧀ꦡꦸꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.