꧓. ꦤꦒꦫꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧖꧗. ꦠꦠꦶꦪꦺ ꦥꦕ꧀ꦕꦤ꧀ꦠꦺ ꦨꦮꦁ ꦥꦕ꧀ꦕꦤ꧀ꦠꦶꦩꦁ. ‘‘ꦫꦡꦺꦴ ꦱꦷꦭꦥꦫꦶꦏ꧀ꦑꦴꦫꦺꦴ, ꦙꦴꦤꦏ꧀ꦑꦺꦴ ꦕꦏ꧀ꦏꦮꦷꦫꦶꦪꦺꦴ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧕.꧔) ꦮꦶꦪ ꦄꦭꦔ꧀ꦏꦴꦫꦮꦕꦤꦺꦴ ꦥꦫꦶꦏ꧀ꦑꦴꦫꦱꦢ꧀ꦢꦺꦴꦠꦶ ꦄꦴꦲ ‘‘ꦤꦒꦫꦴꦭꦔ꧀ꦏꦴꦫꦺꦲꦶ ꦄꦭꦔ꧀ꦏꦠ’’ꦤ꧀ꦠꦶ. ꦥꦫꦶꦮꦴꦫꦮꦕꦤꦺꦴꦥꦶ ꦮꦛ꧀ꦛꦠꦶꦪꦺꦮ ‘‘ꦱꦠ꧀ꦠ ꦱꦩꦴꦣꦶꦥꦫꦶꦏ꧀ꦑꦴꦫꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧓꧓꧐) ꦮꦶꦪ. ꦤꦺꦩꦁ ꦮꦸꦕ꧀ꦕꦠꦶ ꦡꦩ꧀ꦨꦴꦢꦷꦲꦶ ꦄꦤꦸꦥꦠꦨꦹꦩꦶꦥ꧀ꦥꦢꦺꦱꦺꦴꦠꦶ ꦄꦴꦲ ‘‘ꦒꦩ꧀ꦨꦷꦫꦄꦴꦮꦴꦛꦴ’’ꦠꦶ, ꦒꦩ꧀ꦨꦷꦫꦁ ꦨꦹꦩꦶꦁ ꦄꦤꦸꦥ꧀ꦥꦮꦶꦛ꧀ꦜꦴꦠꦶ ꦄꦠ꧀ꦡꦺꦴ. ꦱꦸꦛ꧀ꦜꦸ ꦱꦤ꧀ꦤꦶꦱꦷꦢꦴꦥꦶꦠꦴꦠꦶ ꦨꦹꦩꦶꦁ ꦤꦶꦑꦤꦶꦠ꧀ꦮꦴ ꦱꦩ꧀ꦩꦢꦺꦮ ꦜꦥꦶꦠꦴ.

ꦄꦤꦸꦥꦫꦶꦪꦴꦪꦺꦠꦶ ꦌꦠꦺꦤꦴꦠꦶ ꦄꦤꦸꦥꦫꦶꦪꦴꦪꦺꦴ, ꦱꦺꦴꦪꦺꦮ ꦥꦡꦺꦴꦠꦶ ꦄꦤꦸꦥꦫꦶꦪꦴꦪꦥꦡꦺꦴ, ꦥꦫꦶꦠꦺꦴ ꦥꦴꦏꦴꦫꦱ꧀ꦱ ꦄꦤꦸꦪꦴꦪꦩꦒ꧀ꦒꦺꦴ.

ꦲꦠ꧀ꦡꦶꦁ ꦄꦴꦫꦺꦴꦲꦤ꧀ꦠꦶ ꦄꦴꦫꦺꦴꦲꦴꦥꦪꦤ꧀ꦠꦶ ꦕꦴꦠꦶ ꦲꦠ꧀ꦡꦴꦫꦺꦴꦲꦴ (ꦢꦷ. ꦤꦶ. ꦛꦷ. ꧑.꧑꧖꧓). ꦪꦺꦤ ꦲꦶ ꦥꦪꦺꦴꦒꦺꦤ ꦥꦸꦫꦶꦱꦺꦴ ꦲꦠ꧀ꦡꦶꦤꦺꦴ ꦄꦴꦫꦺꦴꦲꦤꦪꦺꦴꦒ꧀ꦒꦺꦴ ꦲꦺꦴꦠꦶ, ꦲꦠ꧀ꦡꦶꦱ꧀ꦱ ꦠꦁ ꦥꦪꦺꦴꦒꦁ ꦮꦶꦣꦴꦪꦤ꧀ꦠꦴꦤꦁ ꦱꦧ꧀ꦧꦺꦱꦩ꧀ꦥꦺꦠꦺꦱꦁ ꦒꦲꦟꦁ. ꦠꦺꦤꦴꦲ ‘‘ꦱꦧ꧀ꦧꦺꦥꦷ’’ꦠꦶꦄꦴꦢꦶ. ꦠꦠ꧀ꦡ ꦲꦠ꧀ꦡꦴꦕꦫꦶꦪꦴ ꦤꦴꦩ ꦪꦺ ꦲꦠ꧀ꦡꦶꦤꦺꦴ ꦲꦠ꧀ꦡꦴꦫꦺꦴꦲꦏꦴꦤꦚ꧀ꦕ ꦱꦶꦏ꧀ꦑꦴꦥꦏꦴ. ꦲꦠ꧀ꦡꦶꦮꦺꦗ꧀ꦗꦴ ꦤꦴꦩ ꦲꦠ꧀ꦡꦶꦨꦶꦱꦏ꧀ꦏꦴ. ꦲꦠ꧀ꦡꦶꦧꦤ꧀ꦣꦴ ꦤꦴꦩ ꦲꦠ꧀ꦡꦷꦤꦁ ꦥꦴꦢꦫꦏ꧀ꦑꦏꦴ. ꦄꦴꦢꦶ-ꦱꦢ꧀ꦢꦺꦤ ꦲꦠ꧀ꦡꦷꦤꦁ ꦪꦮꦥꦢꦴꦪꦏꦴꦢꦶꦏꦺ ꦱꦔ꧀ꦒꦟ꧀ꦲꦴꦠꦶ. ꦄꦱ꧀ꦱꦴꦫꦺꦴꦲꦴ ꦫꦡꦶꦏꦴꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦫꦡꦺ ꦤꦶꦪꦸꦠ꧀ꦠꦴ ꦫꦡꦶꦏꦴ. ꦫꦡꦫꦏ꧀ꦑꦴ ꦤꦴꦩ ꦫꦡꦱ꧀ꦱ ꦄꦴꦟꦶꦫꦏ꧀ꦑꦏꦴ. ꦣꦤꦸꦁ ꦒꦟ꧀ꦲꦤ꧀ꦠꦶ ꦒꦟ꧀ꦲꦴꦥꦺꦤ꧀ꦠꦶ ꦕꦴꦠꦶ ꦣꦤꦸꦒ꧀ꦒꦲꦴ, ꦆꦱ꧀ꦱꦴꦱꦴ ꦣꦤꦸꦱꦶꦥ꧀ꦥꦱ꧀ꦱ ꦱꦶꦏ꧀ꦑꦴꦥꦏꦴ ꦕ. ꦠꦺꦤꦴꦲ ‘‘ꦣꦤꦸꦄꦴꦕꦫꦶꦪꦴ ꦆꦱ꧀ꦱꦴꦱꦴ’’ꦠꦶ. ꦕꦺꦭꦺꦤ ꦕꦺꦭꦥꦛꦴꦏꦴꦪ ꦪꦸꦢ꧀ꦣꦺ ꦄꦏꦤ꧀ꦠꦶ ꦒꦕ꧀ꦖꦤ꧀ꦠꦷꦠꦶ ꦕꦺꦭꦏꦴꦠꦶ ꦄꦴꦲ – ‘‘ꦪꦺ ꦪꦸꦢ꧀ꦣꦺ ꦗꦪꦢ꧀ꦣꦗꦁ ꦒꦲꦺꦠ꧀ꦮꦴ ꦥꦸꦫꦠꦺꦴ ꦒꦕ꧀ꦖꦤ꧀ꦠꦷ’’ꦠꦶ. ꦪꦡꦴ ꦠꦡꦴ ꦜꦶꦠꦺ ꦱꦺꦤꦶꦏꦺ ꦧ꧀ꦫꦹꦲꦏꦫꦟꦮꦱꦺꦤ ꦠꦠꦺꦴ ꦠꦠꦺꦴ ꦕꦭꦪꦤ꧀ꦠꦶ ꦈꦕ꧀ꦕꦴꦭꦺꦤ꧀ꦠꦷꦠꦶ ꦕꦭꦏꦴ. ꦱꦏꦸꦟꦒ꧀ꦓꦶꦄꦴꦢꦪꦺꦴ ꦮꦶꦪ ꦩꦁꦱꦥꦶꦟ꧀ꦝꦁ ꦥꦫꦱꦺꦤꦴꦱꦩꦹꦲꦁ ꦱꦴꦲꦱꦶꦏꦩꦲꦴꦪꦺꦴꦣꦠꦴꦪ ꦖꦺꦠ꧀ꦮꦴ ꦖꦺꦠ꧀ꦮꦴ ꦢꦪꦤ꧀ꦠꦶ ꦈꦥ꧀ꦥꦠꦶꦠ꧀ꦮꦴ ꦒꦕ꧀ꦖꦤ꧀ꦠꦷꦠꦶ ꦥꦶꦟ꧀ꦝꦢꦴꦪꦏꦴ. ꦢꦸꦠꦶꦪꦮꦶꦏꦥ꧀ꦥꦺ ꦥꦶꦟ꧀ꦝꦺ ꦢꦪꦤ꧀ꦠꦶ ꦗꦤꦱꦩ꧀ꦩꦢ꧀ꦢꦺ ꦈꦥ꧀ꦥꦠꦤ꧀ꦠꦴ ꦮꦶꦪ ꦒꦕ꧀ꦖꦤ꧀ꦠꦷꦠꦶ ꦥꦶꦟ꧀ꦝꦢꦴꦪꦏꦴꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦈꦒ꧀ꦒꦠꦸꦒ꧀ꦒꦠꦴꦠꦶ ꦡꦴꦩꦗꦮꦥꦫꦏ꧀ꦏꦩꦴꦢꦶꦮꦱꦺꦤ ꦄꦠꦶꦮꦶꦪ ꦈꦒ꧀ꦒꦠꦴ, ꦈꦢꦒ꧀ꦒꦴꦠꦶ ꦄꦠ꧀ꦡꦺꦴ. ꦥꦏ꧀ꦑꦤ꧀ꦢꦤ꧀ꦠꦷꦠꦶ ꦄꦠ꧀ꦠꦤꦺꦴ ꦮꦷꦫꦱꦹꦫꦨꦴꦮꦺꦤ ꦄꦱꦗ꧀ꦗꦩꦴꦤꦴ ꦥꦫꦱꦺꦤꦁ ꦄꦤꦸꦥꦮꦶꦱꦤ꧀ꦠꦷꦠꦶ ꦄꦠ꧀ꦡꦺꦴ. ꦡꦴꦩꦗꦮꦧꦭꦥꦫꦏ꧀ꦏꦩꦴꦢꦶꦱꦩ꧀ꦥꦠ꧀ꦠꦶꦪꦴ ꦩꦲꦴꦤꦴꦒꦴ ꦮꦶꦪ ꦩꦲꦴꦤꦴꦒꦴ. ꦌꦏꦱꦹꦫꦴꦠꦶ ꦌꦏꦴꦏꦶꦱꦹꦫꦴ ꦄꦠ꧀ꦠꦤꦺꦴ ꦱꦹꦫꦨꦴꦮꦺꦤꦺꦮ ꦌꦏꦴꦏꦶꦤꦺꦴ ꦲꦸꦠ꧀ꦮꦴ ꦪꦸꦗ꧀ꦙꦤꦏꦴ. ꦱꦗꦴꦭꦶꦏꦴꦠꦶ ꦱꦮꦩ꧀ꦩꦶꦏꦴ. ꦱꦫꦥꦫꦶꦠ꧀ꦠꦴꦟꦤ꧀ꦠꦶ ꦕꦩ꧀ꦩꦥꦫꦶꦱꦶꦧ꧀ꦧꦶꦠꦁ ꦑꦺꦛꦏꦁ, ꦕꦩ꧀ꦩꦩꦪꦁ ꦮꦴ ꦦꦭꦏꦁ. ꦓꦫꦢꦴꦱꦪꦺꦴꦣꦴꦠꦶ ꦄꦠ꧀ꦠꦤꦺꦴ ꦢꦴꦱꦪꦺꦴꦣꦴ.

ꦱꦩ꧀ꦥꦏ꧀ꦑꦤ꧀ꦢꦤꦭꦏ꧀ꦑꦟꦴꦠꦶ ꦱꦢ꧀ꦣꦺꦪ꧀ꦪꦮꦠ꧀ꦡꦸꦤꦺꦴ ꦌꦮꦩꦺꦠꦤ꧀ꦠꦶ ꦱꦩ꧀ꦥꦏ꧀ꦑꦤ꧀ꦢꦤꦭꦏ꧀ꦑꦟꦴ. ꦱꦩ꧀ꦥꦱꦴꦢꦤꦭꦏ꧀ꦑꦟꦴꦠꦶ ꦥꦱꦷꦢꦶꦠꦧ꧀ꦧꦺ ꦮꦠ꧀ꦡꦸꦱ꧀ꦩꦶꦁ ꦥꦱꦷꦢꦤꦭꦏ꧀ꦑꦟꦴ. ꦎꦏꦥ꧀ꦥꦤꦱꦢ꧀ꦣꦴꦠꦶ ꦎꦏ꧀ꦏꦤ꧀ꦠꦶꦠ꧀ꦮꦴ ꦥꦏ꧀ꦑꦤ꧀ꦢꦶꦠ꧀ꦮꦴ ꦄꦣꦶꦩꦸꦕ꧀ꦕꦤꦁ. ꦥꦱꦴꦢꦤꦷꦪꦺ ꦮꦠ꧀ꦡꦸꦱ꧀ꦩꦶꦁ ꦥꦱꦷꦢꦤꦁ ꦥꦱꦴꦢꦱꦢ꧀ꦣꦴ. ꦄꦪꦁ ꦄꦤꦸꦣꦩ꧀ꦩꦺꦴꦠꦶ ꦄꦪꦁ ꦤꦮꦤ꧀ꦤꦁ ꦭꦺꦴꦏꦸꦠ꧀ꦠꦫꦣꦩ꧀ꦩꦴꦤꦁ ꦄꦤꦸꦭꦺꦴꦩꦣꦩ꧀ꦩꦺꦴ. ꦤꦶꦧ꧀ꦧꦶꦢꦴꦧꦲꦸꦭꦺꦴꦠꦶ ꦈꦏ꧀ꦏꦟ꧀ꦜꦤꦴꦧꦲꦸꦭꦺꦴ. ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪꦤ꧀ꦠꦶ ꦱꦢ꧀ꦣꦴ ꦤꦴꦩꦴꦪꦁ ꦱꦠ꧀ꦠꦱ꧀ꦱ ꦩꦫꦟꦮꦱꦺꦤ ꦩꦲꦴꦥꦡꦁ ꦱꦁꦮꦗꦠꦺꦴ ꦩꦲꦴꦏꦤ꧀ꦠꦴꦫꦁ ꦥꦛꦶꦥꦗ꧀ꦗꦠꦺꦴ ꦩꦲꦴꦮꦶꦢꦸꦒ꧀ꦒꦁ ꦥꦏ꧀ꦑꦤ꧀ꦢꦠꦺꦴ ꦥꦴꦡꦺꦪ꧀ꦪꦥꦸꦛꦁ ꦧꦤ꧀ꦣꦠꦶ, ꦱꦩ꧀ꦧꦭꦁ ꦮꦶꦱ꧀ꦱꦗ꧀ꦗꦺꦠꦷꦠꦶ ꦄꦠ꧀ꦡꦺꦴ. ꦱꦢ꧀ꦣꦚ꧀ꦲꦶ ꦈꦥ꧀ꦥꦴꦢꦺꦠ꧀ꦮꦴ ꦢꦴꦤꦁ ꦢꦺꦠꦶ, ꦱꦷꦭꦁ ꦫꦏ꧀ꦑꦠꦶ, ꦈꦥꦺꦴꦱꦡꦏꦩ꧀ꦩꦁ ꦏꦫꦺꦴꦠꦶ. ꦠꦺꦤꦺꦠꦁ ꦮꦸꦠ꧀ꦠꦁ ‘‘ꦱꦢ꧀ꦣꦴ ꦧꦤ꧀ꦣꦠꦶ ꦥꦴꦡꦺꦪ꧀ꦪ’’ꦤ꧀ꦠꦶ. ꦱꦶꦫꦷꦠꦶ ꦆꦱ꧀ꦱꦫꦶꦪꦁ. ꦆꦱ꧀ꦱꦫꦶꦪꦺ ꦲꦶ ꦄꦨꦶꦩꦸꦑꦷꦨꦹꦠꦺ ꦡꦭꦠꦺꦴꦥꦶ ꦗꦭꦠꦺꦴꦥꦶ ꦨꦺꦴꦒꦴ ꦄꦴꦒꦕ꧀ꦖꦤ꧀ꦠꦶꦪꦺꦮ. ꦠꦺꦤꦺꦠꦁ ꦮꦸꦠ꧀ꦠꦁ ‘‘ꦱꦶꦫꦷ ꦨꦺꦴꦒꦴꦤꦩꦴꦱꦪꦺꦴ’’ꦠꦶ. ꦱꦢ꧀ꦣꦴ ꦢꦸꦠꦶꦪꦴ ꦥꦸꦫꦶꦱꦱ꧀ꦱ ꦲꦺꦴꦠꦷꦠꦶ ꦥꦸꦫꦶꦱꦱ꧀ꦱ ꦢꦺꦮꦭꦺꦴꦏꦺ, ꦩꦤꦸꦱ꧀ꦱꦭꦺꦴꦏꦺ ꦕꦺꦮ ꦤꦶꦧ꧀ꦧꦴꦤꦚ꧀ꦕ ꦒꦕ꧀ꦖꦤ꧀ꦠꦱ꧀ꦱ ꦱꦢ꧀ꦣꦴ ꦢꦸꦠꦶꦪꦴ ꦲꦺꦴꦠꦶ, ꦱꦲꦴꦪꦏꦶꦕ꧀ꦕꦁ ꦱꦴꦣꦺꦠꦶ. ꦨꦠ꧀ꦠꦥꦸꦛꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦢꦸꦠꦶꦪꦶꦏꦴꦢꦷꦤꦁ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦄꦤꦺꦏꦱꦫꦱꦠꦴꦠꦶ ꦄꦤꦺꦏꦱꦨꦴꦮꦠꦴ, ꦄꦤꦺꦏꦏꦶꦕ꧀ꦕꦠꦴ ꦮꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦤꦒꦫꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.