.ꦤꦩꦺꦴ ꦠꦱ꧀ꦱ ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ.

ꦄꦔ꧀ꦒꦸꦠ꧀ꦠꦫꦤꦶꦏꦴꦪꦺ

ꦱꦠ꧀ꦠꦏꦤꦶꦥꦴꦠ-ꦛꦷꦏꦴ

꧑. ꦥꦜꦩꦥꦟ꧀ꦟꦴꦱꦏꦁ

꧑. ꦣꦤꦮꦒ꧀ꦒꦮꦟ꧀ꦟꦤꦴ

꧑-꧑꧐. ꦱꦠ꧀ꦠꦏꦤꦶꦥꦴꦠꦱ꧀ꦱ ꦥꦜꦩꦺꦴ ꦮꦒ꧀ꦒꦺꦴ ꦈꦠ꧀ꦠꦴꦤꦠ꧀ꦡꦺꦴ.

꧒. ꦄꦤꦸꦱꦪꦮꦒ꧀ꦒꦺꦴ

꧔.ꦥꦸꦒ꧀ꦒꦭꦱꦸꦠ꧀ꦠꦮꦟ꧀ꦟꦤꦴ

꧑꧔. ꦢꦸꦠꦶꦪꦱ꧀ꦱ ꦕꦠꦸꦠ꧀ꦡꦺ ꦈꦨꦠꦺꦴ ꦈꦨꦪꦡꦴ, ꦈꦨꦠꦺꦴ ꦈꦨꦺꦴꦲꦶ ꦨꦴꦒꦺꦲꦶ ꦮꦶꦩꦸꦠ꧀ꦠꦺꦴꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ ꦌꦏꦢꦺꦱꦱꦫꦹꦥꦺꦏꦱꦺꦱꦤꦪꦺꦤ. ꦢ꧀ꦮꦷꦲꦶ ꦨꦴꦒꦺꦲꦷꦠꦶ ꦏꦫꦟꦺ ꦤꦶꦱ꧀ꦱꦏ꧀ꦏꦺ ꦕꦺꦠꦁ ꦧꦲꦸꦮꦕꦤꦁ. ꦄꦴꦮꦸꦠ꧀ꦠꦶꦄꦴꦢꦶꦮꦱꦺꦤ ꦄꦪꦁ ꦤꦶꦪꦩꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦄꦴꦲ ‘‘ꦄꦫꦹꦥꦱꦩꦴꦥꦠ꧀ꦠꦶꦪꦴ’’ꦠꦶꦄꦴꦢꦶ. ꦌꦠꦺꦤ ‘‘ꦱꦩꦴꦥꦠ꧀ꦠꦶꦪꦴ ꦮꦶꦏ꧀ꦑꦩ꧀ꦨꦤꦮꦶꦩꦺꦴꦏ꧀ꦑꦺꦤ, ꦩꦒ꧀ꦒꦺꦤ ꦱꦩꦸꦕ꧀ꦖꦺꦢꦮꦶꦩꦺꦴꦏ꧀ꦑꦺꦤ ꦮꦶꦩꦸꦠ꧀ꦠꦠ꧀ꦠꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’ꦠꦶ ꦌꦮꦁ ꦥꦮꦠ꧀ꦠꦺꦴ ꦠꦶꦥꦶꦛꦏꦕꦹꦭ꦳ꦤꦴꦒꦠ꧀ꦡꦺꦫꦮꦴꦢꦺꦴ, ‘‘ꦤꦴꦩꦏꦴꦪꦠꦺꦴ ꦫꦹꦥꦏꦴꦪꦠꦺꦴ ꦕ ꦮꦶꦩꦸꦠ꧀ꦠꦠ꧀ꦠꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’ꦠꦶ ꦌꦮꦁ ꦥꦮꦠ꧀ꦠꦺꦴ ꦠꦶꦥꦶꦛꦏꦩꦲꦴꦫꦏ꧀ꦑꦶꦠꦠ꧀ꦡꦺꦫꦮꦴꦢꦺꦴ, ‘‘ꦱꦩꦴꦥꦠ꧀ꦠꦶꦪꦴ ꦮꦶꦏ꧀ꦑꦩ꧀ꦨꦤꦮꦶꦩꦺꦴꦏ꧀ꦑꦺꦤ ꦌꦏꦮꦴꦫꦁ, ꦩꦒ꧀ꦒꦺꦤ ꦱꦩꦸꦕ꧀ꦖꦺꦢꦮꦶꦩꦺꦴꦏ꧀ꦑꦺꦤ ꦌꦏꦮꦴꦫꦁ ꦮꦶꦩꦸꦠ꧀ꦠꦠ꧀ꦠꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’ꦠꦶ ꦌꦮꦁ ꦥꦮꦠ꧀ꦠꦺꦴ ꦠꦶꦥꦶꦛꦏꦕꦹꦭ꦳ꦴꦨꦪꦠ꧀ꦡꦺꦫꦮꦴꦢꦺꦴ ꦕꦴꦠꦶ ꦆꦩꦺꦱꦁ ꦠꦶꦟ꧀ꦟꦩ꧀ꦥꦶ ꦡꦺꦫꦮꦴꦢꦴꦤꦁ ꦌꦏꦗ꧀ꦙꦁ ꦱꦔ꧀ꦒꦲꦺꦴ ꦏꦠꦺꦴꦠꦶ ꦢꦛ꧀ꦜꦧ꧀ꦧꦁ. ꦌꦠ꧀ꦡ ꦕ ꦥꦜꦩꦮꦴꦢꦺ ꦢ꧀ꦮꦷꦲꦶ ꦨꦴꦒꦺꦲꦶ ꦮꦶꦩꦸꦠ꧀ꦠꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ ꦮꦸꦠ꧀ꦠꦺꦴ, ꦢꦸꦠꦶꦪꦮꦴꦢꦺ ꦈꦨꦠꦺꦴ ꦨꦴꦒꦠꦺꦴ ꦮꦶꦩꦸꦠ꧀ꦠꦺꦴꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ, ꦠꦠꦶꦪꦮꦴꦢꦺ ꦢ꧀ꦮꦷꦲꦶ ꦨꦴꦒꦺꦲꦶ ꦢ꧀ꦮꦺ ꦮꦴꦫꦺ ꦮꦶꦩꦸꦠ꧀ꦠꦺꦴꦠꦶ ꦄꦪꦩꦺꦠꦺꦱꦁ ꦮꦶꦱꦺꦱꦺꦴꦠꦶ. ꦮꦶꦩꦸꦠ꧀ꦠꦺꦴꦠꦶ ꦏꦶꦭꦺꦱꦺꦲꦶ ꦮꦶꦩꦸꦠ꧀ꦠꦺꦴ, ꦏꦶꦭꦺꦱꦮꦶꦏ꧀ꦑꦩ꧀ꦨꦤꦱꦩꦸꦕ꧀ꦖꦺꦢꦤꦺꦲꦶ ꦮꦴ ꦏꦴꦪꦠꦺꦴ ꦮꦶꦩꦸꦠ꧀ꦠꦺꦴꦲꦶ ꦄꦠ꧀ꦡꦺꦴ.

ꦱꦺꦴꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ. ꦏꦴꦩꦚ꧀ꦕꦺꦠ꧀ꦡ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦩ꧀ꦥꦶ ꦄꦫꦹꦥꦴꦮꦕꦫꦗ꧀ꦙꦴꦤꦁ ꦮꦶꦪ ꦢꦸꦮꦔ꧀ꦒꦶꦏꦁ ꦄꦴꦤꦺꦚ꧀ꦗꦥ꧀ꦥꦠ꧀ꦠꦤ꧀ꦠꦶ ꦮꦸꦕ꧀ꦕꦠꦶ. ꦠꦁ ꦥꦤ ꦥꦢꦛ꧀ꦜꦴꦤꦁ ꦏꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ ꦤꦴꦩ ꦤ ꦲꦺꦴꦠꦶ ꦫꦹꦥꦏꦴꦪꦠꦺꦴ ꦄꦮꦶꦩꦸꦠ꧀ꦠꦠ꧀ꦠꦴ. ꦠꦚ꧀ꦲꦶ ꦏꦶꦭꦺꦱꦏꦴꦪꦠꦺꦴꦮ ꦮꦶꦩꦸꦠ꧀ꦠꦁ, ꦤ ꦫꦹꦥꦏꦴꦪꦠꦺꦴ, ꦠꦱ꧀ꦩꦴ ꦠꦠꦺꦴ ꦮꦸꦛ꧀ꦜꦴꦪ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ ꦤ ꦲꦺꦴꦠꦷꦠꦶ ꦄꦴꦲ ‘‘ꦕꦠꦸꦤ꧀ꦤꦁ ꦄꦫꦹꦥ…ꦥꦺ… ꦥꦚ꧀ꦕꦮꦶꦣꦺꦴ ꦲꦺꦴꦠꦷ’’ꦠꦶ. ꦄꦫꦹꦥꦱꦩꦴꦥꦠ꧀ꦠꦷꦤꦤ꧀ꦠꦶ ꦤꦶꦢ꧀ꦣꦴꦫꦟꦺ ꦱꦴꦩꦶꦮꦕꦤꦁ. ꦄꦫꦲꦠ꧀ꦠꦁ ꦥꦠ꧀ꦠꦄꦤꦴꦒꦴꦩꦶꦤꦺꦴꦠꦶ ꦨꦹꦠꦥꦸꦧ꧀ꦧꦒꦠꦶꦪꦴ ꦮꦸꦠ꧀ꦠꦁ. ꦤ ꦲꦶ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦄꦤꦴꦒꦴꦩꦷ ꦤꦴꦩ ꦲꦺꦴꦠꦶ. ‘‘ꦫꦹꦥꦷ ꦫꦹꦥꦴꦤꦶ ꦥꦱ꧀ꦱꦠꦷ’’ꦠꦶꦄꦴꦢꦶꦏꦺ ꦤꦶꦫꦺꦴꦣꦱꦩꦴꦥꦠ꧀ꦠꦶꦄꦤ꧀ꦠꦺ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦮꦠ꧀ꦮꦴ –

‘‘ꦪꦠꦺꦴ ꦕ ꦑꦺꦴ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦆꦩꦺ ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦄꦪꦁ ꦮꦸꦕ꧀ꦕꦠꦶ, ꦄꦴꦤꦤ꧀ꦢ, ꦨꦶꦏ꧀ꦑꦸ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’ꦠꦶ –

ꦪꦢꦶꦥꦶ ꦩꦲꦴꦤꦶꦢꦴꦤꦺ (ꦢꦷ. ꦤꦶ. ꧒.꧑꧓꧐) ꦮꦸꦠ꧀ꦠꦁ, ꦠꦁ ꦥꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦱꦺꦛ꧀ꦜꦮꦱꦺꦤ ꦮꦸꦠ꧀ꦠꦤ꧀ꦠꦶ, ꦆꦣ ꦥꦤ ꦱꦧ꧀ꦧꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺ ꦱꦔ꧀ꦒꦲꦟꦠ꧀ꦡꦁ ‘‘ꦥꦚ꧀ꦕꦮꦶꦣꦺꦴ ꦲꦺꦴꦠꦷ’’ꦠꦶ ꦮꦠ꧀ꦮꦴ ‘‘ꦥꦴꦭ꦳ꦶ ꦥꦤꦺꦠ꧀ꦡ…ꦥꦺ… ꦄꦛ꧀ꦜꦮꦶꦩꦺꦴꦏ꧀ꦑꦭꦴꦨꦶꦤꦺꦴ ꦮꦱꦺꦤ ꦄꦴꦒꦠꦴ’’ꦠꦶ ꦄꦴꦲ. ꦩꦗ꧀ꦙꦶꦩꦤꦶꦏꦴꦪꦺ ꦥꦤ ꦏꦷꦛꦴꦒꦶꦫꦶꦱꦸꦠ꧀ꦠꦺ (ꦩ. ꦤꦶ. ꧒.꧑꧘꧒) –

‘‘ꦏꦠꦩꦺꦴ ꦕ, ꦨꦶꦏ꧀ꦑꦮꦺ, ꦥꦸꦒ꧀ꦒꦭꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦪꦺ ꦠꦺ ꦱꦤ꧀ꦠꦴ ꦮꦶꦩꦺꦴꦏ꧀ꦑꦴ ꦄꦠꦶꦏ꧀ꦏꦩ꧀ꦩ ꦫꦹꦥꦺ ꦄꦴꦫꦸꦥ꧀ꦥꦴ, ꦠꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦄꦪꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦥꦸꦒ꧀ꦒꦭꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ’’ꦠꦶ –

ꦄꦫꦹꦥꦱꦩꦴꦥꦠ꧀ꦠꦶꦮꦱꦺꦤ ꦕꦠ꧀ꦠꦴꦫꦺꦴ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦴ, ꦱꦺꦛ꧀ꦜꦺꦴ ꦕ ꦮꦸꦠ꧀ꦠꦺꦴ ꦮꦸꦠ꧀ꦠꦭꦏ꧀ꦑꦟꦹꦥꦥꦠ꧀ꦠꦶꦠꦺꦴ. ꦪꦡꦴꦮꦸꦠ꧀ꦠꦺꦱꦸ ꦲꦶ ꦥꦚ꧀ꦕꦱꦸ ꦥꦸꦫꦶꦩꦴ ꦕꦠ꧀ꦠꦴꦫꦺꦴ ꦱꦩꦴꦥꦠ꧀ꦠꦶꦱꦷꦱꦁ ꦤꦶꦫꦺꦴꦣꦁ ꦤ ꦱꦩꦴꦥꦗ꧀ꦗꦤ꧀ꦠꦷꦠꦶ ꦥꦫꦶꦪꦴꦪꦺꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦴ ꦤꦴꦩ. ꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦷ ꦄꦤꦴꦒꦴꦩꦷ ꦠꦁ ꦱꦩꦴꦥꦗ꧀ꦗꦶꦠ꧀ꦮꦴ ꦠꦠꦺꦴ ꦮꦸꦛ꧀ꦜꦴꦪ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴꦠꦶ ꦤꦶꦥ꧀ꦥꦫꦶꦪꦴꦪꦺꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦱꦺꦛ꧀ꦜꦺꦴ ꦤꦴꦩ.

ꦏꦠꦩꦺꦴ ꦕ ꦥꦸꦒ꧀ꦒꦭꦺꦴꦠꦶꦄꦴꦢꦶ ꦥꦸꦒ꧀ꦒꦭꦥꦚ꧀ꦚꦠ꧀ꦠꦶꦥꦴꦭ꦳ꦶ. ꦠꦠ꧀ꦡ ꦏꦠꦩꦺꦴꦠꦶ ꦥꦸꦕ꧀ꦖꦴꦮꦕꦤꦁ. ꦥꦸꦒ꧀ꦒꦭꦺꦴꦠꦶ ꦄꦱꦴꦣꦴꦫꦟꦠꦺꦴ ꦥꦸꦕ꧀ꦖꦶꦠꦧ꧀ꦧꦮꦕꦤꦁ. ꦆꦣꦴꦠꦶ ꦆꦣꦱ꧀ꦩꦶꦁ ꦱꦴꦱꦤꦺ. ꦌꦏꦕ꧀ꦕꦺꦴꦠꦶ ꦌꦏꦺꦴ. ꦄꦛ꧀ꦜ ꦮꦶꦩꦺꦴꦏ꧀ꦑꦺ ꦏꦴꦪꦺꦤ ꦦꦸꦱꦶꦠ꧀ꦮꦴ ꦮꦶꦲꦫꦠꦷꦠꦶ ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ ꦱꦩꦴꦥꦗ꧀ꦗꦶꦠ꧀ꦮꦴ ꦤꦴꦩꦏꦴꦪꦠꦺꦴ ꦥꦛꦶꦭꦨꦶꦠ꧀ꦮꦴ ꦮꦶꦲꦫꦠꦶ. ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦷꦠꦶ ꦮꦶꦥꦱ꧀ꦱꦤꦴꦥꦚ꧀ꦚꦴꦪ ꦱꦔ꧀ꦑꦴꦫꦒꦠꦁ, ꦩꦒ꧀ꦒꦥꦚ꧀ꦚꦴꦪ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦥꦱ꧀ꦱꦶꦠ꧀ꦮꦴ ꦕꦠ꧀ꦠꦴꦫꦺꦴꦥꦶ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦢꦶꦱ꧀ꦮꦴꦠꦶ ꦢꦱ꧀ꦱꦤꦲꦺꦠꦸ. ꦤ ꦲꦶ ꦄꦴꦱꦮꦺ ꦥꦚ꧀ꦚꦴꦪ ꦥꦱ꧀ꦱꦤ꧀ꦠꦶ, ꦢꦱ꧀ꦱꦤꦏꦴꦫꦟꦴ ꦥꦤ ꦥꦫꦶꦏ꧀ꦑꦷꦟꦴ ꦢꦶꦱ꧀ꦮꦴ ꦥꦫꦶꦏ꧀ꦑꦷꦟꦴꦠꦶ ꦮꦸꦠ꧀ꦠꦴ ꦢꦱ꧀ꦱꦤꦴꦪꦠ꧀ꦠꦥꦫꦶꦏ꧀ꦑꦪꦠ꧀ꦠꦴ. ꦌꦮꦚ꧀ꦲꦶ ꦢꦱ꧀ꦱꦤꦁ ꦄꦴꦱꦮꦴꦤꦁ ꦑꦪꦱ꧀ꦱ ꦥꦸꦫꦶꦩꦏꦶꦫꦶꦪꦴꦨꦴꦮꦺꦤ ꦮꦸꦠ꧀ꦠꦁ.

ꦥꦚ꧀ꦚꦴꦮꦶꦩꦸꦠ꧀ꦠꦺꦴꦠꦶ ꦮꦶꦱꦺꦱꦠꦺꦴ ꦥꦚ꧀ꦚꦴꦪ ꦌꦮ ꦮꦶꦩꦸꦠ꧀ꦠꦺꦴ, ꦤ ꦠꦱ꧀ꦱ ꦄꦣꦶꦛ꧀ꦜꦴꦤꦨꦹꦠꦺꦤ ꦄꦛ꧀ꦜꦮꦶꦩꦺꦴꦏ꧀ꦑꦱꦔ꧀ꦑꦴꦠꦺꦤ ꦱꦴꦠꦶꦱꦪꦺꦤ ꦱꦩꦴꦣꦶꦤꦴꦠꦶ ꦥꦚ꧀ꦚꦴꦮꦶꦩꦸꦠ꧀ꦠꦺꦴ. ꦪꦺꦴ ꦄꦫꦶꦪꦺꦴ ꦄꦤꦣꦶꦒꦠꦄꦛ꧀ꦜꦮꦶꦩꦺꦴꦏ꧀ꦑꦺꦴ ꦱꦧ꧀ꦧꦱꦺꦴ ꦄꦴꦱꦮꦺꦲꦶ ꦮꦶꦩꦸꦠ꧀ꦠꦺꦴ, ꦠꦱ꧀ꦱꦺꦠꦁ ꦄꦣꦶꦮꦕꦤꦁ. ꦄꦣꦶꦒꦠꦺꦥꦶ ꦲꦶ ꦫꦹꦥꦗ꧀ꦙꦴꦤꦮꦶꦩꦺꦴꦏ꧀ꦑꦺ ꦤ ꦱꦺꦴ ꦱꦴꦠꦶꦱꦪꦱꦩꦴꦣꦶꦤꦶꦱ꧀ꦱꦶꦠꦺꦴꦠꦶ ꦤ ꦠꦱ꧀ꦱ ꦮꦱꦺꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦠꦴ ꦲꦺꦴꦠꦷꦠꦶ ꦮꦸꦠ꧀ꦠꦺꦴꦮꦴꦪꦩꦠ꧀ꦡꦺꦴ. ꦄꦫꦹꦥꦗ꧀ꦙꦴꦤꦺꦱꦸ ꦥꦤ ꦌꦏꦱ꧀ꦩꦶꦩ꧀ꦥꦶ ꦱꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴꦪꦺꦮ ꦤꦴꦩ ꦲꦺꦴꦠꦶ. ꦠꦺꦤ ꦲꦶ ꦄꦛ꧀ꦜꦮꦶꦩꦺꦴꦏ꧀ꦑꦺꦏꦢꦺꦱꦺꦤ ꦠꦁꦤꦴꦩꦢꦴꦤꦱꦩꦠ꧀ꦡꦺꦤ ꦄꦛ꧀ꦜꦮꦶꦩꦺꦴꦏ꧀ꦑꦭꦴꦨꦷꦠ꧀ꦮꦺꦮ ꦮꦸꦕ꧀ꦕꦠꦶ. ꦱꦩꦸꦢꦴꦪꦺ ꦲꦶ ꦥꦮꦠ꧀ꦠꦺꦴ ꦮꦺꦴꦲꦴꦫꦺꦴ ꦄꦮꦪꦮꦺꦥꦶ ꦢꦶꦱ꧀ꦱꦠꦶ ꦪꦡꦴ ꦠꦁ ‘‘ꦱꦠ꧀ꦠꦶꦱꦪꦺꦴ’’ꦠꦶ ꦄꦤꦮꦱꦺꦱꦠꦺꦴ ꦄꦴꦱꦮꦴꦤꦁ ꦥꦫꦶꦏ꧀ꦑꦷꦟꦠ꧀ꦠꦴ. ꦄꦛ꧀ꦜꦮꦶꦩꦺꦴꦏ꧀ꦑꦥꦛꦶꦏ꧀ꦑꦺꦥꦮꦱꦺꦤꦺꦮ ꦤ ꦌꦏꦢꦺꦱꦨꦹꦠꦫꦹꦥꦗ꧀ꦙꦴꦤꦥ꧀ꦥꦛꦶꦏ꧀ꦑꦺꦥꦮꦱꦺꦤ. ꦌꦮꦚ꧀ꦲꦶ ꦄꦫꦹꦥꦗ꧀ꦙꦴꦤꦺꦏꦢꦺꦱꦴꦨꦴꦮꦺꦥꦶ ꦄꦛ꧀ꦜꦮꦶꦩꦺꦴꦏ꧀ꦑꦥꦛꦶꦏ꧀ꦑꦺꦥꦺꦴ ꦤ ꦲꦺꦴꦠꦷꦠꦶ ꦱꦶꦢ꧀ꦣꦁ ꦲꦺꦴꦠꦶ. ꦄꦫꦹꦥꦴꦮꦕꦫꦗ꧀ꦙꦴꦤꦺꦱꦸ ꦲꦶ ꦌꦏꦱ꧀ꦩꦶꦩ꧀ꦥꦶ ꦱꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴꦪꦺꦮ ꦤꦴꦩ ꦲꦺꦴꦠꦶ.

ꦦꦸꦛ꧀ꦜꦤ꧀ꦠꦁ ꦱꦕ꧀ꦖꦶꦏꦠꦺꦴꦠꦶ ꦦꦸꦛ꧀ꦜꦴꦤꦁ ꦄꦤ꧀ꦠꦺꦴ ꦦꦸꦛ꧀ꦜꦤ꧀ꦠꦺꦴ, ꦦꦸꦛ꧀ꦜꦴꦤꦁ ꦄꦫꦹꦥꦗ꧀ꦙꦴꦤꦴꦤꦁ ꦄꦤꦤ꧀ꦠꦫꦺꦴ ꦏꦴꦭꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦕ꧀ꦕꦤ꧀ꦠꦱꦁꦪꦺꦴꦒꦺ ꦕꦺꦠꦁ ꦈꦥꦪꦺꦴꦒꦮꦕꦤꦁ. ꦠꦁ ꦦꦸꦛ꧀ꦜꦴꦤꦤ꧀ꦠꦫꦏꦴꦭꦩꦺꦮ ꦱꦕ꧀ꦖꦶꦏꦴꦠꦧ꧀ꦧꦁ ꦱꦕ꧀ꦖꦶꦏꦠꦺꦴ ꦱꦕ꧀ꦖꦶꦏꦫꦟꦹꦥꦴꦪꦺꦤꦴꦠꦶ ꦮꦸꦠ꧀ꦠꦁ ꦲꦺꦴꦠꦶ, ꦨꦴꦮꦤꦥꦸꦁꦱꦏꦁ ꦮꦴ ꦌꦠꦁ ‘‘ꦌꦏꦩꦤ꧀ꦠꦁ ꦤꦶꦱꦷꦢꦷ’’ꦠꦶꦄꦴꦢꦷꦱꦸ ꦮꦶꦪ. ꦪꦺꦴ ꦲꦶ ꦄꦫꦹꦥꦗ꧀ꦙꦴꦤꦺꦤ ꦫꦹꦥꦏꦴꦪꦠꦺꦴ ꦤꦴꦩꦏꦴꦪꦺꦏꦢꦺꦱꦠꦺꦴ ꦕ ꦮꦶꦏ꧀ꦑꦩ꧀ꦨꦤꦮꦶꦩꦺꦴꦏ꧀ꦑꦺꦤ ꦮꦶꦩꦸꦠ꧀ꦠꦺꦴ, ꦠꦺꦤ ꦤꦶꦫꦺꦴꦣꦱꦔ꧀ꦑꦴꦠꦺꦴ ꦮꦶꦩꦺꦴꦏ꧀ꦑꦺꦴ ꦄꦴꦭꦺꦴꦕꦶꦠꦺꦴ ꦥꦏꦴꦱꦶꦠꦺꦴ ꦮꦶꦪ ꦲꦺꦴꦠꦶ, ꦤ ꦥꦤ ꦏꦴꦪꦺꦤ ꦱꦕ꧀ꦖꦶꦏꦠꦺꦴ. ꦤꦶꦫꦺꦴꦣꦁ ꦥꦤ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦌꦏꦕ꧀ꦕꦺꦱꦸ ꦄꦴꦱꦮꦺꦱꦸ ꦑꦺꦥꦶꦠꦺꦱꦸ ꦠꦺꦤ ꦱꦺꦴ ꦱꦕ꧀ꦖꦶꦏꦠꦺꦴ ꦲꦺꦴꦠꦶ, ꦠꦱ꧀ꦩꦴ ꦱꦺꦴ ꦱꦕ꧀ꦖꦶꦏꦴꦠꦧ꧀ꦧꦁ ꦤꦶꦫꦺꦴꦣꦁ ꦪꦡꦴꦄꦴꦭꦺꦴꦕꦶꦠꦁ ꦤꦴꦩꦏꦴꦪꦺꦤ ꦱꦕ꧀ꦖꦶ ꦏꦫꦺꦴꦠꦷꦠꦶ ‘‘ꦏꦴꦪꦱꦏ꧀ꦑꦷ’’ꦠꦶ ꦮꦸꦕ꧀ꦕꦠꦶ, ꦤ ꦠꦸ ‘‘ꦮꦶꦩꦸꦠ꧀ꦠꦺꦴ’’ꦠꦶ ꦌꦏꦕ꧀ꦕꦴꦤꦁ ꦄꦴꦱꦮꦴꦤꦁ ꦄꦥꦫꦶꦏ꧀ꦑꦷꦟꦠ꧀ꦠꦴ. ꦠꦺꦤꦴꦲ ‘‘ꦙꦴꦤꦦꦱ꧀ꦱꦁ ꦥꦜꦩꦁ ꦦꦸꦱꦠꦶ, ꦥꦕ꧀ꦖꦴ ꦤꦶꦫꦺꦴꦣꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦫꦺꦴꦠꦷ’’ꦠꦶ. ꦄꦪꦁ ꦕꦠꦸꦤ꧀ꦤꦁ ꦄꦫꦹꦥꦱꦩꦴꦥꦠ꧀ꦠꦷꦤꦁ ꦌꦏꦺꦏꦠꦺꦴ ꦮꦸꦛ꧀ꦜꦴꦪ ꦱꦔ꧀ꦑꦴꦫꦺ ꦱꦩ꧀ꦩꦱꦶꦠ꧀ꦮꦴ ꦏꦴꦪꦱꦏ꧀ꦑꦶꦨꦴꦮꦁ ꦥꦠ꧀ꦠꦴꦤꦁ ꦕꦠꦸꦤ꧀ꦤꦁ, ꦤꦶꦫꦺꦴꦣꦴ ꦮꦸꦛ꧀ꦜꦴꦪ ꦄꦒ꧀ꦒꦩꦒ꧀ꦒꦥ꧀ꦥꦠ꧀ꦠꦄꦤꦴꦒꦴꦩꦶꦤꦺꦴ ꦕ ꦮꦱꦺꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦺꦴ ꦮꦶꦪ ꦥꦚ꧀ꦕꦮꦶꦣꦺꦴ ꦤꦴꦩ ꦲꦺꦴꦠꦷꦠꦶ ꦮꦸꦠ꧀ꦠꦁ ꦄꦨꦶꦣꦩ꧀ꦩꦛꦷꦏꦴꦪꦁ (ꦥꦸ. ꦥ. ꦩꦹꦭꦛꦷ. ꧒꧔) ‘‘ꦏꦴꦪꦱꦏ꧀ꦑꦶꦩ꧀ꦲꦶꦥꦶ ꦌꦱꦺꦮ ꦤꦪꦺꦴ’’ꦠꦶ. ꦌꦏꦕ꧀ꦕꦺ ꦄꦴꦱꦮꦴꦠꦶ ꦲꦺꦛ꧀ꦜꦶꦩꦩꦒ꧀ꦒꦮꦗ꧀ꦙꦴ ꦄꦴꦱꦮꦴ.

ꦢꦶꦛ꧀ꦜꦤ꧀ꦠꦁ ꦥꦠ꧀ꦠꦺꦴꦠꦶ ꦢꦱ꧀ꦱꦤꦱꦔ꧀ꦑꦴꦠꦱ꧀ꦱ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦚꦴꦟꦱ꧀ꦱ ꦄꦤꦤ꧀ꦠꦫꦁ ꦥꦠ꧀ꦠꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ‘‘ꦢꦶꦛ꧀ꦜꦠ꧀ꦠꦴ ꦥꦠ꧀ꦠꦺꦴ’’ꦠꦶꦥꦶ ꦥꦴꦜꦺꦴ. ꦌꦠꦺꦤ ꦕꦠꦸꦱꦕ꧀ꦕꦢꦱ꧀ꦱꦤꦱꦔ꧀ꦑꦴꦠꦴꦪ ꦢꦶꦛ꧀ꦜꦶꦪꦴ ꦤꦶꦫꦺꦴꦣꦱ꧀ꦱ ꦥꦠ꧀ꦠꦠꦁ ꦢꦷꦥꦺꦠꦶ. ꦠꦺꦤꦴꦲ ‘‘ꦢꦸꦏ꧀ꦑꦴ ꦱꦔ꧀ꦑꦴꦫꦴ’’ꦠꦶꦄꦴꦢꦶ. ꦠꦠ꧀ꦡ ꦥꦚ꧀ꦚꦴꦪꦴꦠꦶ ꦩꦒ꧀ꦒꦥꦚ꧀ꦚꦴꦪ. ꦥꦜꦩꦦꦭꦛ꧀ꦜꦠꦺꦴ ꦥꦛ꧀ꦜꦴꦪ ꦪꦴꦮ ꦄꦒ꧀ꦒꦩꦒ꧀ꦒꦛ꧀ꦜꦴ ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ. ꦠꦺꦤꦴꦲ ‘‘ꦱꦺꦴꦥꦶ ꦏꦴꦪꦱꦏ꧀ꦑꦷ ꦮꦶꦪ ꦖꦧ꧀ꦧꦶꦣꦺꦴ ꦲꦺꦴꦠꦷ’’ꦠꦶ. ꦪꦡꦴ ꦥꦤ ꦥꦚ꧀ꦚꦴꦮꦶꦩꦸꦠ꧀ꦠꦺꦴ, ꦌꦮꦁ ꦄꦪꦩ꧀ꦥꦶ ꦱꦸꦏ꧀ꦑꦮꦶꦥꦱ꧀ꦱꦏꦺꦴ ꦕꦠꦹꦲꦶ ꦄꦫꦹꦥꦗ꧀ꦙꦴꦤꦺꦲꦶ ꦮꦸꦛ꧀ꦜꦴꦪ ꦢꦶꦛ꧀ꦜꦶꦥ꧀ꦥꦠ꧀ꦠꦨꦴꦮꦥ꧀ꦥꦠ꧀ꦠꦴ ꦕꦠ꧀ꦠꦴꦫꦺꦴ ꦕꦴꦠꦶ ꦥꦚ꧀ꦕꦮꦶꦣꦺꦴ ꦲꦺꦴꦠꦷꦠꦶ ꦮꦺꦢꦶꦠꦧ꧀ꦧꦺꦴ. ꦱꦢ꧀ꦣꦴꦮꦶꦩꦸꦠ꧀ꦠꦺꦥꦶ ꦌꦱꦺꦮ ꦤꦪꦺꦴ. ꦆꦢꦁ ꦢꦸꦏ꧀ꦑꦤ꧀ꦠꦶ ꦌꦠ꧀ꦠꦏꦁ ꦢꦸꦏ꧀ꦑꦁ, ꦤ ꦆꦠꦺꦴ ꦈꦢ꧀ꦣꦁ ꦢꦸꦏ꧀ꦑꦤ꧀ꦠꦶ. ꦪꦡꦴꦨꦹꦠꦁ ꦥꦗꦴꦤꦴꦠꦷꦠꦶ ꦜꦥꦺꦠ꧀ꦮꦴ ꦠꦟ꧀ꦲꦁ ꦈꦥꦴꦢꦴꦤꦏ꧀ꦑꦤ꧀ꦣꦥꦚ꧀ꦕꦏꦁ ꦢꦸꦏ꧀ꦑꦱꦕ꧀ꦕꦤ꧀ꦠꦶ ꦪꦴꦡꦴꦮꦠꦺꦴ ꦥꦗꦴꦤꦴꦠꦶ. ꦪꦱ꧀ꦩꦴ ꦥꦤ ꦠꦟ꧀ꦲꦴ ꦢꦸꦏ꧀ꦑꦁ ꦗꦤꦺꦠꦶ ꦤꦶꦧ꧀ꦧꦠ꧀ꦠꦺꦠꦶ, ꦠꦠꦺꦴ ꦠꦁ ꦢꦸꦏ꧀ꦑꦁ ꦱꦩꦸꦢꦺꦠꦶ, ꦠꦱ꧀ꦩꦴ ꦤꦁ ‘‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦪꦱ꧀ꦩꦴ ꦥꦤ ꦆꦢꦁ ꦢꦸꦏ꧀ꦑꦚ꧀ꦕ ꦱꦩꦸꦢꦪꦺꦴ ꦕ ꦤꦶꦧ꧀ꦧꦴꦤꦁ ꦥꦠ꧀ꦮꦴ ꦤꦶꦫꦸꦗ꧀ꦙꦠꦶ, ꦄꦥ꧀ꦥꦮꦠ꧀ꦠꦶꦁ ꦒꦕ꧀ꦖꦠꦶ, ꦠꦱ꧀ꦩꦴ ꦤ ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦄꦫꦶꦪꦺꦴ ꦥꦤ ꦄꦛ꧀ꦜꦔ꧀ꦒꦶꦏꦺꦴ ꦩꦒ꧀ꦒꦺꦴ ꦠꦁ ꦢꦸꦏ꧀ꦑꦤꦶꦫꦺꦴꦣꦁ ꦒꦕ꧀ꦖꦠꦶ, ꦠꦺꦤ ꦠꦁ ‘‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ. ꦌꦠ꧀ꦠꦴꦮꦠꦴ ꦤꦴꦤꦴꦏ꧀ꦑꦟꦺ ꦱꦕ꧀ꦕꦮꦮꦠ꧀ꦡꦴꦤꦁ ꦢꦱ꧀ꦱꦶꦠꦁ. ꦆꦢꦴꦤꦶ ꦠꦁ ꦌꦏꦏ꧀ꦑꦟꦺ ꦢꦱ꧀ꦱꦺꦠꦸꦁ ‘‘ꦠꦡꦴꦒꦠꦥ꧀ꦥꦮꦺꦢꦶꦠꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦡꦴꦒꦠꦥ꧀ꦥꦮꦺꦢꦶꦠꦴꦠꦶ ꦠꦡꦴꦒꦠꦺꦤ ꦧꦺꦴꦣꦶꦩꦟ꧀ꦝꦺ ꦥꦛꦶꦮꦶꦢ꧀ꦣꦴ ꦮꦶꦢꦶꦠꦴ ꦥꦴꦏꦛꦴ ꦏꦠꦴ. ꦣꦩ꧀ꦩꦴꦠꦶ ꦕꦠꦸꦱꦕ꧀ꦕꦣꦩ꧀ꦩꦴ. ꦮꦺꦴꦢꦶꦛ꧀ꦜꦴ ꦲꦺꦴꦤ꧀ꦠꦷꦠꦶ ꦱꦸꦢꦶꦛ꧀ꦜꦴ. ꦮꦺꦴꦕꦫꦶꦠꦴꦠꦶ ꦱꦸꦕꦫꦶꦠꦴ, ꦥꦚ꧀ꦚꦴꦪ ꦱꦸꦛ꧀ꦜꦸ ꦕꦫꦴꦥꦶꦠꦴꦠꦶ ꦄꦠ꧀ꦡꦺꦴ. ꦄꦪꦤ꧀ꦠꦶ ꦄꦪꦁ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦺꦴꦠꦶ.

ꦱꦢ꧀ꦣꦴꦪ ꦮꦶꦩꦸꦠ꧀ꦠꦺꦴꦠꦶ ꦱꦢ꧀ꦢꦲꦤꦮꦱꦺꦤ ꦮꦶꦩꦸꦠ꧀ꦠꦺꦴ. ꦌꦠꦺꦤ ꦱꦧ꧀ꦧꦡꦴ ꦄꦮꦶꦩꦸꦠ꧀ꦠꦱ꧀ꦱꦥꦶ ꦱꦢ꧀ꦣꦴꦩꦠ꧀ꦠꦺꦤ ꦮꦶꦩꦸꦠ꧀ꦠꦨꦴꦮꦁ ꦢꦱ꧀ꦱꦺꦠꦶ. ꦱꦢ꧀ꦣꦴꦮꦶꦩꦸꦠ꧀ꦠꦺꦴꦠꦶ ꦮꦴ ꦱꦢ꧀ꦣꦴꦪ ꦄꦣꦶꦩꦸꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦏꦶꦁ ꦥꦤ ꦤꦺꦱꦁ ꦏꦶꦭꦺꦱꦥ꧀ꦥꦲꦴꦤꦺ ꦤꦴꦤꦠ꧀ꦠꦁ ꦄꦠ꧀ꦡꦷꦠꦶ? ꦤꦠ꧀ꦡꦶ. ꦄꦡ ꦏꦱ꧀ꦩꦴ ꦱꦢ꧀ꦣꦴꦮꦶꦩꦸꦠ꧀ꦠꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦁ ꦤ ꦥꦴꦥꦸꦟꦴꦠꦷꦠꦶ? ꦄꦴꦒꦩꦤꦷꦪꦤꦴꦤꦠ꧀ꦠꦺꦤ. ꦢꦶꦛ꧀ꦜꦶꦥ꧀ꦥꦠ꧀ꦠꦺꦴ ꦲꦶ ꦄꦴꦒꦩꦤꦩ꧀ꦲꦶ ꦏꦶꦭꦺꦱꦺ ꦮꦶꦏ꧀ꦑꦩ꧀ꦨꦺꦤ꧀ꦠꦺꦴ ꦄꦥ꧀ꦥꦢꦸꦏ꧀ꦑꦺꦤ ꦄꦏꦱꦶꦫꦺꦤ ꦄꦏꦶꦭꦩꦤ꧀ꦠꦺꦴꦮ ꦱꦏ꧀ꦏꦺꦴꦠꦶ ꦮꦶꦏ꧀ꦑꦩ꧀ꦨꦶꦠꦸꦁ, ꦱꦢ꧀ꦣꦴꦮꦶꦩꦸꦠ꧀ꦠꦺꦴ ꦥꦤ ꦢꦸꦏ꧀ꦑꦺꦤ ꦏꦱꦶꦫꦺꦤ ꦏꦶꦭꦩꦤ꧀ꦠꦺꦴ ꦱꦏ꧀ꦏꦺꦴꦠꦶ ꦮꦶꦏ꧀ꦑꦩ꧀ꦨꦶꦠꦸꦁ, ꦠꦱ꧀ꦩꦴ ꦱꦢ꧀ꦣꦴꦮꦶꦩꦸꦠ꧀ꦠꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦁ ꦤ ꦥꦴꦥꦸꦟꦴꦠꦶ. ꦠꦺꦤꦴꦲ ‘‘ꦌꦠꦱ꧀ꦱ ꦲꦷ’’ꦠꦶꦄꦴꦢꦶ. ꦱꦢ꧀ꦢꦲꦤ꧀ꦠꦱ꧀ꦱꦴꦠꦶ ‘‘ꦌꦏꦁꦱꦠꦺꦴ ꦄꦪꦁ ꦥꦛꦶꦥꦢꦴ ꦏꦶꦭꦺꦱꦏ꧀ꦑꦪꦁ ꦄꦴꦮꦲꦠꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦨꦴꦱꦶꦠꦠ꧀ꦠꦴ’’ꦠꦶ ꦌꦮꦁ ꦱꦢ꧀ꦢꦲꦤ꧀ꦠꦱ꧀ꦱ. ꦪꦱ꧀ꦩꦴ ꦥꦤꦱ꧀ꦱ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦢꦷꦲꦶ ꦤꦶꦕ꧀ꦕꦱꦚ꧀ꦚꦴꦥꦲꦴꦤꦮꦱꦺꦤ ꦨꦴꦮꦤꦴꦪ ꦥꦸꦧ꧀ꦧꦺꦤꦴꦥꦫꦁ ꦮꦶꦱꦺꦱꦁ ꦥꦱ꧀ꦱꦠꦺꦴ ꦠꦠ꧀ꦡ ꦠꦠ꧀ꦡ ꦥꦕ꧀ꦕꦏ꧀ꦑꦠꦴꦥꦶ ꦄꦠ꧀ꦡꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦢ꧀ꦢꦲꦤ꧀ꦠꦱ꧀ꦱ ꦮꦶꦪꦴ’’ꦠꦶ. ꦱꦺꦱꦥꦢꦢ꧀ꦮꦪꦁ ꦠꦱ꧀ꦱꦺꦮ ꦮꦺꦮꦕꦤꦁ. ꦌꦠ꧀ꦡ ꦕ ꦥꦸꦧ꧀ꦧꦨꦴꦒꦩꦒ꧀ꦒꦨꦴꦮꦤꦴꦠꦶ ꦮꦕꦤꦺꦤ ꦄꦴꦒꦩꦤꦷꦪꦤꦴꦤꦠ꧀ꦠꦺꦤ ꦢꦶꦛ꧀ꦜꦶꦥ꧀ꦥꦠ꧀ꦠꦱꦢ꧀ꦣꦴꦮꦶꦩꦸꦠ꧀ꦠꦴꦤꦁ ꦥꦚ꧀ꦚꦴꦤꦴꦤꦠ꧀ꦠꦁ ꦲꦺꦴꦠꦷꦠꦶ ꦢꦱ꧀ꦱꦶꦠꦁ. ꦄꦨꦶꦣꦩ꧀ꦩꦛ꧀ꦜꦏꦡꦴꦪꦩ꧀ꦥꦶ (ꦥꦸ. ꦥ. ꦄꦛ꧀ꦜ. ꧒꧘) ‘‘ꦤꦺꦱꦁ ꦏꦶꦭꦺꦱꦥ꧀ꦥꦲꦴꦤꦺ ꦤꦴꦤꦠ꧀ꦠꦁ ꦤꦠ꧀ꦡꦶ, ꦥꦚ꧀ꦚꦴꦪ ꦤꦴꦤꦠ꧀ꦠꦁ ꦄꦠ꧀ꦡꦶꦪꦺꦮꦴ’’ꦠꦶ ꦮꦠ꧀ꦮꦴ ‘‘ꦄꦴꦒꦩꦤꦷꦪꦤꦴꦤꦠ꧀ꦠꦺꦤꦺꦮ ꦱꦢ꧀ꦣꦴꦮꦶꦩꦸꦠ꧀ꦠꦺꦴ ꦢꦶꦛ꧀ꦜꦶꦥ꧀ꦥꦠ꧀ꦠꦁ ꦤ ꦥꦴꦥꦸꦟꦴꦠꦷꦠꦶ ꦱꦤ꧀ꦤꦶꦛ꧀ꦜꦴꦤꦁ ꦏꦠ’’ꦤ꧀ꦠꦶ ꦮꦸꦠ꧀ꦠꦁ.

ꦄꦴꦫꦩ꧀ꦩꦟꦁ ꦪꦴꦡꦴꦮꦠꦺꦴ ꦣꦴꦫꦺꦠꦶ ꦄꦮꦣꦴꦫꦺꦠꦷꦠꦶ ꦣꦩ꧀ꦩꦺꦴ, ꦥꦚ꧀ꦚꦴ. ꦠꦁ ꦥꦚ꧀ꦚꦴꦱꦔ꧀ꦑꦴꦠꦁ ꦣꦩ꧀ꦩꦁ ꦄꦣꦶꦩꦠ꧀ꦠꦠꦴꦪ ꦥꦸꦧ꧀ꦧꦔ꧀ꦒꦩꦁ ꦲꦸꦠ꧀ꦮꦴ ꦥꦮꦠ꧀ꦠꦁ ꦄꦤꦸꦱ꧀ꦱꦫꦠꦷꦠꦶ ꦣꦩ꧀ꦩꦴꦤꦸꦱꦴꦫꦷ. ꦠꦺꦤꦴꦲ ‘‘ꦣꦩ꧀ꦩꦺꦴ’’ꦠꦶꦄꦴꦢꦶ. ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦤ꧀ꦠꦶ ꦥꦚ꧀ꦚꦴꦥꦣꦴꦤꦁ. ‘‘ꦱꦢ꧀ꦣꦁ ꦄꦤꦸꦱ꧀ꦱꦫꦠꦶ, ꦱꦢ꧀ꦣꦴꦥꦸꦧ꧀ꦧꦔ꧀ꦒꦩꦁ ꦩꦒ꧀ꦒꦁ ꦨꦴꦮꦺꦠꦷ’’ꦠꦶ ꦆꦩꦩꦠ꧀ꦡꦁ ꦌꦱꦺꦮ ꦤꦪꦺꦴꦠꦶ ꦄꦠꦶꦢꦶꦱꦠꦶ. ꦥꦚ꧀ꦚꦁ ꦮꦴꦲꦺꦠꦷꦠꦶ ꦥꦚ꧀ꦚꦴꦮꦴꦲꦷ, ꦥꦚ꧀ꦚꦁ ꦱꦴꦠꦶꦱꦪꦁ ꦥꦮꦠ꧀ꦠꦺꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦥꦚ꧀ꦚꦴꦥꦸꦧ꧀ꦧꦔ꧀ꦒꦩꦁ ꦄꦫꦶꦪꦩꦒ꧀ꦒꦁ ꦨꦴꦮꦺꦠꦷ’’ꦠꦶ. ꦥꦚ꧀ꦚꦴ ꦮꦴ ꦥꦸꦒ꧀ꦒꦭꦁ ꦮꦴꦲꦺꦠꦶ ꦤꦶꦧ꧀ꦧꦴꦤꦴꦨꦶꦩꦸꦑꦁ ꦒꦩꦺꦠꦷꦠꦶ ꦥꦚ꧀ꦚꦴꦮꦴꦲꦷ. ꦱꦢ꧀ꦣꦴꦮꦴꦲꦷꦠꦶ ꦌꦠ꧀ꦡꦴꦥꦶ ꦆꦩꦶꦤꦴ ꦤꦪꦺꦤꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦴꦢꦶꦏꦡꦴꦠꦶ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦴꦢꦷꦱꦸ ꦄꦴꦒꦩꦤꦠꦺꦴ ꦥꦛ꧀ꦜꦴꦪ ꦮꦠ꧀ꦠꦧ꧀ꦧꦏꦡꦴ. ꦠꦱ꧀ꦩꦴꦠꦶ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧒.꧗꧗꧓, ꧘꧘꧙) ꦮꦸꦠ꧀ꦠꦠ꧀ꦠꦴ. ꦠꦠꦺꦴ ꦌꦮ ꦮꦶꦱꦸꦢ꧀ꦣꦶꦩꦒ꧀ꦒꦱꦁꦮꦟ꧀ꦟꦤꦴꦪꦁ (ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧒.꧗꧗꧓) ꦮꦸꦠ꧀ꦠꦤꦪꦺꦤꦺꦮ ꦕꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦥꦸꦒ꧀ꦒꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦈꦢꦏꦹꦥꦩꦴꦱꦸꦠ꧀ꦠꦮꦟ꧀ꦟꦤꦴ

꧑꧕. ꦥꦚ꧀ꦕꦩꦺ ꦌꦏꦤ꧀ꦠꦏꦴꦭ꦳ꦏꦺꦲꦷꦠꦶ ꦤꦠ꧀ꦡꦶꦏꦮꦴꦢꦄꦲꦺꦠꦸꦏꦮꦴꦢꦄꦏꦶꦫꦶꦪꦮꦴꦢꦱꦔ꧀ꦑꦴꦠꦺꦲꦶ ꦤꦶꦪꦠꦩꦶꦕ꧀ꦖꦴꦢꦶꦛ꧀ꦜꦶꦣꦩ꧀ꦩꦺꦲꦶ. ꦠꦺꦤꦴꦲ ‘‘ꦤꦶꦪꦠꦩꦶꦕ꧀ꦖꦴꦢꦶꦛ꧀ꦜꦶꦁ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶ. ꦌꦮꦁ ꦥꦸꦒ꧀ꦒꦭꦺꦴꦠꦶ ꦆꦩꦶꦤꦴ ꦏꦴꦫꦟꦺꦤ ꦌꦏꦮꦴꦫꦁ ꦤꦶꦩꦸꦒ꧀ꦒꦺꦴ ꦤꦶꦩꦸꦒ꧀ꦒꦺꦴꦪꦺꦮ ꦱꦺꦴ ꦲꦺꦴꦠꦶ. ꦌꦠꦱ꧀ꦱ ꦲꦶ ꦥꦸꦤ ꦨꦮꦠꦺꦴ ꦮꦸꦛ꧀ꦜꦴꦤꦁ ꦤꦴꦩ ꦤꦠ꧀ꦡꦷꦠꦶ ꦮꦢꦤ꧀ꦠꦶ ꦩꦏ꧀ꦑꦭꦶꦒꦺꦴꦱꦴꦭꦴꦢꦪꦺꦴ ꦮꦶꦪ. ꦲꦺꦛ꧀ꦜꦴ ꦲꦺꦛ꧀ꦜꦴ ꦤꦫꦏꦒ꧀ꦒꦷꦤꦁꦪꦺꦮ ꦄꦴꦲꦴꦫꦺꦴ. ꦱꦴꦣꦸ ꦱꦢ꧀ꦣꦴ ꦏꦸꦱꦭꦺꦱꦹꦠꦶ ꦏꦸꦱꦭꦣꦩ꧀ꦩꦺꦱꦸ ꦱꦢ꧀ꦣꦴ ꦤꦴꦩ ꦱꦴꦲꦸ ꦭꦢ꧀ꦣꦏꦴꦠꦶ ꦈꦩ꧀ꦩꦸꦗ꧀ꦗꦠꦶ, ꦱꦺꦴ ꦠꦴꦮꦠ꧀ꦠꦏꦺꦤꦺꦮ ꦏꦸꦱꦭꦺꦤ ꦈꦩ꧀ꦩꦸꦗ꧀ꦗꦠꦶ ꦤꦴꦩ. ꦱꦴꦣꦸ ꦲꦶꦫꦷꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦕꦔ꧀ꦏꦮꦴꦫꦺꦠꦶ ꦫꦗꦏꦴꦤꦁ ꦑꦴꦫꦥꦫꦶꦱ꧀ꦱꦴꦮꦤꦺ, ꦱꦸꦫꦴꦥꦫꦶꦱ꧀ꦱꦴꦮꦤꦺ ꦮꦴ. ꦌꦮꦁ ꦥꦸꦒ꧀ꦒꦭꦺꦴꦠꦶ ‘‘ꦌꦮꦁ ꦱꦴꦣꦸ ꦱꦢ꧀ꦣꦴ’’ꦠꦶ ꦆꦩꦺꦱꦁ ꦱꦢ꧀ꦣꦴꦢꦷꦤꦁ ꦮꦱꦺꦤ ꦌꦏꦮꦴꦫꦁ ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦠꦺꦱꦁ ꦥꦫꦶꦲꦴꦤꦶꦪꦴ ꦥꦸꦤ ꦤꦶꦩꦸꦗ꧀ꦗꦠꦶꦪꦺꦮ ꦢꦺꦮꦢꦠ꧀ꦠꦴꦢꦪꦺꦴ ꦮꦶꦪ. ꦢꦺꦮꦢꦠ꧀ꦠꦺꦴ ꦲꦶ ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ ꦥꦚ꧀ꦕ ꦕ ꦄꦨꦶꦚ꧀ꦚꦴꦪꦺꦴ ꦤꦶꦧ꧀ꦧꦠ꧀ꦠꦺꦠ꧀ꦮꦴꦥꦶ ꦥꦸꦤ ꦧꦸꦢ꧀ꦣꦴꦤꦁ ꦥꦛꦶꦥꦏ꧀ꦑꦠꦴꦪ ꦠꦺꦲꦶ ꦒꦸꦟꦺꦲꦶ ꦥꦫꦶꦲꦷꦤꦺꦴ ꦫꦸꦲꦶꦫꦸꦥ꧀ꦥꦴꦢꦏꦩ꧀ꦩꦁ ꦱꦔ꧀ꦓꦨꦺꦢꦏꦩ꧀ꦩꦚ꧀ꦕ ꦏꦠ꧀ꦮꦴ ꦏꦴꦪꦱ꧀ꦱ ꦨꦺꦢꦴ ꦢꦸꦠꦶꦪꦕꦶꦠ꧀ꦠꦮꦴꦫꦺꦤ ꦕꦸꦠꦶꦕꦶꦠ꧀ꦠꦩꦤꦤ꧀ꦠꦫꦴ ꦤꦶꦫꦪꦺ ꦤꦶꦧ꧀ꦧꦠ꧀ꦠꦺꦴ. ꦏꦺꦴꦏꦴꦭꦶꦏꦺꦴ ꦢ꧀ꦮꦺ ꦄꦒ꧀ꦒꦱꦴꦮꦏꦺ ꦈꦥꦮꦢꦶꦠ꧀ꦮꦴ ꦥꦢꦸꦩꦤꦶꦫꦪꦺ ꦤꦶꦧ꧀ꦧꦠ꧀ꦠꦺꦴ.

ꦤꦺꦮ ꦲꦴꦪꦠꦶ ꦤꦺꦴ ꦮꦝ꧀ꦞꦠꦷꦠꦶ ꦄꦥ꧀ꦥꦲꦺꦴꦤꦏꦏꦴꦭꦺꦥꦶ ꦤ ꦲꦴꦪꦠꦶ, ꦥꦲꦺꦴꦤꦏꦏꦴꦭꦺꦥꦶ ꦤ ꦮꦝ꧀ꦞꦠꦶ. ꦈꦨꦪꦩ꧀ꦥꦶ ꦥꦤꦺꦠꦁ ꦄꦒꦴꦫꦶꦏꦺꦤꦥꦶ ꦄꦤꦒꦴꦫꦶꦏꦺꦤꦥꦶ ꦢꦷꦥꦺꦠꦧ꧀ꦧꦁ. ꦌꦏꦕ꧀ꦕꦺꦴ ꦲꦶ ꦄꦒꦴꦫꦶꦏꦺꦴ ꦄꦥ꧀ꦥꦲꦺꦴꦤꦏꦏꦴꦭꦺ ꦥꦏ꧀ꦑꦶꦏꦨꦠ꧀ꦠꦁ ꦮꦱ꧀ꦱꦶꦏꦁ ꦮꦴ ꦈꦥꦤꦶꦧꦤ꧀ꦣꦴꦥꦺꦱꦶ, ꦱꦺꦴ ꦥꦕ꧀ꦖꦴ ꦥꦲꦺꦴꦤꦏꦏꦴꦭꦺꦥꦶ ꦥꦏ꧀ꦑꦶꦏꦨꦠ꧀ꦠꦴꦢꦶꦩꦠ꧀ꦠꦩꦺꦮ ꦥꦮꦠ꧀ꦠꦺꦠꦶ. ꦄꦤꦒꦴꦫꦶꦏꦺꦴꦥꦶ ꦄꦴꦢꦶꦩ꧀ꦲꦶ ꦄꦥ꧀ꦥꦲꦺꦴꦤꦏꦏꦴꦭꦺ ꦈꦢ꧀ꦢꦺꦱꦁ ꦣꦸꦠꦔ꧀ꦒꦁ ꦮꦴ ꦒꦟ꧀ꦲꦴꦠꦶ, ꦩꦺꦣꦴꦮꦷ ꦧꦭꦮꦷꦫꦶꦪꦱꦩ꧀ꦥꦠ꧀ꦠꦶꦪꦴ ꦥꦲꦺꦴꦤꦏꦏꦴꦭꦺ ꦠꦠꦺꦴ ꦈꦠ꧀ꦠꦫꦶꦁ ꦤ ꦏꦫꦺꦴꦠꦶ. ꦌꦮꦁ ꦥꦸꦒ꧀ꦒꦭꦺꦴꦠꦶ ꦌꦮꦁ ꦆꦩꦴꦪ ꦱꦢ꧀ꦣꦴꦢꦷꦤꦁ ꦜꦶꦠꦶꦪꦴ ꦥꦸꦒ꧀ꦒꦭꦺꦴ ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦜꦶꦠꦺꦴ ꦤꦴꦩ ꦲꦺꦴꦠꦶ. ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦥꦠꦫꦠꦷꦠꦶ ꦱꦏꦢꦴꦒꦴꦩꦶꦥꦸꦒ꧀ꦒꦭꦺꦴ ꦏꦶꦭꦺꦱꦠꦤꦸꦠꦴꦪ ꦈꦛ꧀ꦜꦲꦶꦠ꧀ꦮꦴ ꦒꦤ꧀ꦠꦧ꧀ꦧꦢꦶꦱꦴꦨꦶꦩꦸꦑꦺꦴ ꦠꦫꦠꦶ ꦤꦴꦩ.

ꦥꦛꦶꦒꦴꦣꦥ꧀ꦥꦠ꧀ꦠꦺꦴ ꦲꦺꦴꦠꦷꦠꦶ ꦄꦤꦴꦒꦴꦩꦶꦥꦸꦒ꧀ꦒꦭꦁ ꦱꦤ꧀ꦣꦴꦪ ꦮꦢꦠꦶ. ꦆꦩꦺ ꦥꦤ ꦱꦠ꧀ꦠ ꦥꦸꦒ꧀ꦒꦭꦴ ꦈꦢꦏꦺꦴꦥꦩꦺꦤ ꦢꦷꦥꦶꦠꦴ. ꦱꦠ꧀ꦠ ꦏꦶꦫ ꦗꦔ꧀ꦓꦮꦴꦟꦶꦗꦴ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦴ ꦄꦤ꧀ꦠꦫꦴꦩꦒ꧀ꦒꦺ ꦌꦏꦁ ꦥꦸꦟ꧀ꦟꦤꦢꦶꦁ ꦥꦴꦥꦸꦟꦶꦁꦱꦸ. ꦠꦺꦱꦸ ꦥꦜꦩꦁ ꦎꦠꦶꦟ꧀ꦟꦺꦴ ꦈꦢꦏꦨꦷꦫꦸꦏꦺꦴ ꦥꦸꦫꦶꦱꦺꦴ ꦎꦠꦶꦟ꧀ꦟꦛ꧀ꦜꦴꦤꦺꦪꦺꦮ ꦤꦶꦩꦸꦗ꧀ꦗꦶꦠ꧀ꦮꦴ ꦥꦸꦤ ꦱꦟ꧀ꦜꦴꦠꦸꦁ ꦤꦴꦱꦏ꧀ꦑꦶ, ꦄꦮꦱ꧀ꦱꦁꦮ ꦩꦕ꧀ꦖꦏꦕ꧀ꦖꦥꦨꦠ꧀ꦠꦁ ꦗꦴꦠꦺꦴ. ꦢꦸꦠꦶꦪꦺꦴ ꦎꦠꦶꦟ꧀ꦟꦛ꧀ꦜꦴꦤꦺ ꦤꦶꦩꦸꦗ꧀ꦗꦶꦠ꧀ꦮꦴ ꦱꦏꦶꦁ ꦈꦛ꧀ꦜꦲꦶꦠ꧀ꦮꦴ ꦥꦸꦤ ꦤꦶꦩꦸꦒ꧀ꦒꦺꦴ ꦈꦛ꧀ꦜꦴꦠꦸꦁ ꦤꦴꦱꦏ꧀ꦑꦶ, ꦄꦤ꧀ꦠꦺꦴꦪꦺꦮ ꦩꦕ꧀ꦖꦏꦕ꧀ꦖꦥꦨꦠ꧀ꦠꦁ ꦗꦴꦠꦺꦴ. ꦠꦠꦶꦪꦺꦴ ꦤꦶꦩꦸꦗ꧀ꦗꦶꦠ꧀ꦮꦴ ꦈꦛ꧀ꦜꦶꦠꦺꦴ ꦩꦗ꧀ꦙꦺ ꦤꦢꦶꦪꦴ ꦜꦠ꧀ꦮꦴ ꦤꦺꦮ ꦎꦫꦠꦺꦴ ꦄꦴꦒꦤ꧀ꦠꦸꦁ, ꦤ ꦥꦴꦫꦁ ꦒꦤ꧀ꦠꦸꦁ ꦄꦱꦏ꧀ꦑꦶ. ꦕꦠꦸꦠ꧀ꦡꦺꦴ ꦈꦛ꧀ꦜꦴꦪ ꦜꦶꦠꦺꦴ ꦈꦠ꧀ꦠꦫꦟꦠꦶꦠ꧀ꦡꦁ ꦎꦭꦺꦴꦏꦺꦱꦶ. ꦥꦚ꧀ꦕꦩꦺꦴ ꦈꦠ꧀ꦠꦫꦟꦠꦶꦠ꧀ꦡꦁ ꦎꦭꦺꦴꦏꦺꦠ꧀ꦮꦴ ꦥꦠꦫꦠꦶ. ꦖꦛ꧀ꦜꦺꦴ ꦠꦁ ꦢꦶꦱ꧀ꦮꦴ ꦥꦴꦫꦶꦩꦠꦷꦫꦁ ꦒꦤ꧀ꦠ꧀ꦮꦴ ꦏꦛꦶꦥ꧀ꦥꦩꦴꦟꦺ ꦈꦢꦏꦺ ꦜꦶꦠꦺꦴ. ꦱꦠ꧀ꦠꦩꦺꦴ ꦥꦴꦫꦶꦩꦠꦷꦫꦁ ꦒꦤ꧀ꦠ꧀ꦮꦴ ꦒꦤ꧀ꦣꦕꦸꦟ꧀ꦟꦴꦢꦷꦲꦶ ꦤ꧀ꦲꦠ꧀ꦮꦴ ꦮꦫꦮꦠ꧀ꦡꦴꦢꦷꦤꦶ ꦤꦶꦮꦴꦱꦺꦠ꧀ꦮꦴ ꦱꦸꦫꦨꦶꦮꦶꦭꦺꦥꦤꦁ ꦮꦶꦭꦶꦩ꧀ꦥꦶꦠ꧀ꦮꦴ ꦤꦷꦭꦸꦥ꧀ꦥꦭꦩꦴꦭꦴꦢꦷꦤꦶ ꦥꦶꦭꦤ꧀ꦣꦶꦠ꧀ꦮꦴ ꦤꦴꦤꦴꦭꦔ꧀ꦏꦴꦫꦥ꧀ꦥꦛꦶꦩꦟ꧀ꦝꦶꦠꦺꦴ ꦩꦲꦴꦤꦒꦫꦁ ꦥꦮꦶꦱꦶꦠ꧀ꦮꦴ ꦥꦴꦱꦴꦢꦩꦴꦫꦸꦲꦶꦠ꧀ꦮꦴ ꦈꦠ꧀ꦠꦩꦨꦺꦴꦗꦤꦁ ꦨꦸꦚ꧀ꦗꦠꦶ.

ꦠꦠ꧀ꦡ ꦗꦔ꧀ꦓꦮꦴꦟꦶꦗꦴ ꦮꦶꦪ ꦆꦩꦺ ꦱꦠ꧀ꦠ ꦥꦸꦒ꧀ꦒꦭꦴ, ꦤꦢꦷ ꦮꦶꦪ ꦮꦛ꧀ꦛꦁ, ꦥꦜꦩꦱ꧀ꦱ ꦈꦢꦏꦨꦷꦫꦸꦏꦱ꧀ꦱ ꦥꦸꦫꦶꦱꦱ꧀ꦱ ꦎꦠꦶꦟ꧀ꦟꦛ꧀ꦜꦴꦤꦺꦪꦺꦮ ꦤꦶꦩꦸꦗ꧀ꦗꦤꦁ ꦮꦶꦪ ꦩꦶꦕ꧀ꦖꦴꦢꦶꦛ꧀ꦜꦶꦏꦱ꧀ꦱ ꦮꦛ꧀ꦛꦺ ꦤꦶꦩꦸꦗ꧀ꦗꦤꦁ, ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦤꦶꦩꦸꦗ꧀ꦗꦤꦥꦸꦫꦶꦱꦺꦴ ꦮꦶꦪ ꦱꦢ꧀ꦣꦴꦢꦷꦤꦁ ꦈꦥ꧀ꦥꦠ꧀ꦠꦶꦩꦠ꧀ꦡꦏꦺꦤ ꦈꦩ꧀ꦩꦸꦗ꧀ꦗꦶꦠ꧀ꦮꦴ ꦠꦴꦱꦁ ꦲꦴꦤꦶꦪꦴ ꦤꦶꦩꦸꦒ꧀ꦒꦥꦸꦒ꧀ꦒꦭꦺꦴ, ꦩꦗ꧀ꦙꦺ ꦤꦢꦶꦪꦴ ꦜꦠ꧀ꦮꦴ ꦮꦶꦪ ꦱꦢ꧀ꦣꦴꦢꦷꦤꦁ ꦜꦶꦠꦶꦪꦴ ꦜꦶꦠꦶꦥꦸꦒ꧀ꦒꦭꦺꦴ, ꦈꦠ꧀ꦠꦫꦟꦠꦶꦠ꧀ꦡꦁ ꦎꦭꦺꦴꦏꦺꦤ꧀ꦠꦺꦴ ꦮꦶꦪ ꦱꦺꦴꦠꦴꦥꦤ꧀ꦤꦺꦴ, ꦥꦠꦫꦤ꧀ꦠꦥꦸꦫꦶꦱꦺꦴ ꦮꦶꦪ ꦏꦶꦭꦺꦱꦏꦴꦩꦴꦮꦛ꧀ꦛꦠꦴꦪ ꦥꦠꦫꦤ꧀ꦠꦺꦴ ꦱꦏꦢꦴꦒꦴꦩꦷ, ꦠꦫꦶꦠ꧀ꦮꦴ ꦏꦛꦶꦩꦠ꧀ꦠꦺ ꦈꦢꦏꦺ ꦜꦶꦠꦥꦸꦫꦶꦱꦺꦴ ꦮꦶꦪ ꦄꦤꦴꦮꦛ꧀ꦛꦣꦩ꧀ꦩꦠ꧀ꦠꦴ ꦄꦤꦴꦒꦴꦩꦷ, ꦤ꧀ꦲꦠ꧀ꦮꦴ ꦥꦴꦫꦶꦩꦠꦷꦫꦁ ꦈꦠ꧀ꦠꦫꦶꦠ꧀ꦮꦴ ꦡꦭꦺ ꦜꦶꦠꦥꦸꦫꦶꦱꦺꦴ ꦮꦶꦪ ꦕꦠ꧀ꦠꦴꦫꦺꦴ ꦎꦓꦺ ꦄꦠꦶꦏ꧀ꦏꦩꦶꦠ꧀ꦮꦴ ꦤꦶꦧ꧀ꦧꦴꦤꦡꦭꦺ ꦜꦶꦠꦺꦴ ꦑꦷꦟꦴꦱꦮꦧ꧀ꦫꦴꦲ꧀ꦩꦟꦺꦴ, ꦡꦭꦺ ꦜꦶꦠꦥꦸꦫꦶꦱꦱ꧀ꦱ ꦤꦒꦫꦁ ꦥꦮꦶꦱꦶꦠ꧀ꦮꦴ ꦥꦴꦱꦴꦢꦁ ꦄꦴꦫꦸꦪ꧀ꦲ ꦈꦠ꧀ꦠꦩꦨꦺꦴꦗꦤꦨꦸꦚ꧀ꦗꦤꦁ ꦮꦶꦪ ꦑꦷꦟꦴꦱꦮꦱ꧀ꦱ ꦤꦶꦧ꧀ꦧꦴꦤꦴꦫꦩ꧀ꦩꦟꦱꦩꦴꦥꦠ꧀ꦠꦶꦁ ꦄꦥ꧀ꦥꦺꦠ꧀ꦮꦴ ꦮꦷꦠꦶꦤꦴꦩꦤꦁ ꦮꦺꦢꦶꦠꦧ꧀ꦧꦁ.

ꦈꦢꦏꦹꦥꦩꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖-꧙. ꦄꦤꦶꦕ꧀ꦕꦴꦤꦸꦥꦱ꧀ꦱꦷꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧑꧖-꧑꧙. ꦖꦛ꧀ꦜꦺ ‘‘ꦆꦣ ꦱꦩꦱꦷꦱꦷ ꦏꦡꦶꦠꦺꦴ’’ꦠꦶ ꦮꦠ꧀ꦮꦴ ꦌꦮꦁ ꦱꦩꦱꦷꦱꦶꦠꦁ ꦮꦶꦨꦗꦶꦠ꧀ꦮꦴ ꦆꦣꦴꦣꦶꦥ꧀ꦥꦺꦠꦁ ꦢꦱ꧀ꦱꦺꦠꦸꦁ ‘‘ꦱꦺꦴ ꦕꦠꦸꦧ꧀ꦧꦶꦣꦺꦴ ꦲꦺꦴꦠꦷ’’ꦠꦶꦄꦴꦢꦶꦩꦴꦲ. ꦫꦺꦴꦒꦮꦱꦺꦤ ꦱꦩꦱꦷꦱꦷ ꦫꦺꦴꦒꦱꦩꦱꦷꦱꦷ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦌꦏꦥ꧀ꦥꦲꦴꦫꦺꦤꦺꦮꦴꦠꦶ ꦌꦏꦮꦺꦭꦴꦪꦩꦺꦮ. ꦪꦺꦴ ꦕꦏ꧀ꦑꦸꦫꦺꦴꦒꦴꦢꦷꦱꦸ ꦄꦚ꧀ꦚꦠꦫꦱ꧀ꦩꦶꦁ ꦱꦠꦶ ‘‘ꦆꦠꦺꦴ ꦄꦤꦸꦛ꧀ꦜꦶꦠꦺꦴ ꦄꦫꦲꦠ꧀ꦠꦁ ꦥꦴꦥꦸꦟꦶꦱ꧀ꦱꦴꦩꦷ’’ꦠꦶ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦱꦶ, ꦄꦡꦱ꧀ꦱ ꦄꦫꦲꦠ꧀ꦠꦚ꧀ꦕ ꦫꦺꦴꦒꦠꦺꦴ ꦮꦸꦛ꧀ꦜꦴꦤꦚ꧀ꦕ ꦌꦏꦏꦴꦭꦩꦺꦮ ꦲꦺꦴꦠꦶ, ꦄꦪꦁ ꦫꦺꦴꦒꦱꦩꦱꦷꦱꦷ ꦤꦴꦩ. ꦆꦫꦶꦪꦴꦥꦡꦱ꧀ꦱ ꦥꦫꦶꦪꦺꦴꦱꦴꦤꦤ꧀ꦠꦶ ꦆꦫꦶꦪꦴꦥꦡꦤ꧀ꦠꦫꦱꦩꦴꦪꦺꦴꦒꦺꦴ. ꦪꦺꦴ ꦜꦴꦤꦴꦢꦷꦱꦸ ꦆꦫꦶꦪꦴꦥꦡꦺꦱꦸ ꦄꦚ꧀ꦚꦠꦫꦁ ꦄꦣꦶꦛ꧀ꦜꦴꦪ ‘‘ꦄꦮꦶꦏꦺꦴꦥꦺꦠ꧀ꦮꦴꦮ ꦄꦫꦲꦠ꧀ꦠꦁ ꦥꦴꦥꦸꦟꦶꦱ꧀ꦱꦴꦩꦷ’’ꦠꦶ ꦮꦶꦥꦱ꧀ꦱꦤꦁ ꦥꦛ꧀ꦜꦥꦺꦱꦶ. ꦄꦡꦱ꧀ꦱ ꦄꦫꦲꦠ꧀ꦠꦥ꧀ꦥꦠ꧀ꦠꦶ ꦕ ꦆꦫꦶꦪꦴꦥꦡꦮꦶꦏꦺꦴꦥꦤꦚ꧀ꦕ ꦌꦏꦥ꧀ꦥꦲꦴꦫꦺꦤꦺꦮ ꦲꦺꦴꦠꦶ, ꦄꦪꦁ ꦆꦫꦶꦪꦴꦥꦡꦱꦩꦱꦷꦱꦷ ꦤꦴꦩ. ꦗꦷꦮꦶꦠꦱꦩꦱꦷꦱꦷ ꦤꦴꦩꦴꦠꦶ ꦌꦠ꧀ꦡ ‘‘ꦥꦭꦶꦧꦺꦴꦣꦱꦷꦱꦁ ꦩꦴꦤꦺꦴ, ꦥꦫꦴꦩꦴꦱꦱꦷꦱꦁ ꦢꦶꦛ꧀ꦜꦶ, ꦮꦶꦏ꧀ꦑꦺꦥꦱꦷꦱꦁ ꦈꦢ꧀ꦣꦕ꧀ꦕꦁ, ꦏꦶꦭꦺꦱꦱꦷꦱꦁ ꦄꦮꦶꦗ꧀ꦗꦴ, ꦄꦣꦶꦩꦺꦴꦏ꧀ꦑꦱꦷꦱꦁ ꦱꦢ꧀ꦣꦴ, ꦥꦒ꧀ꦒꦲꦱꦷꦱꦁ ꦮꦷꦫꦶꦪꦁ, ꦈꦥꦛ꧀ꦜꦴꦤꦱꦷꦱꦁ ꦱꦠꦶ, ꦄꦮꦶꦏ꧀ꦑꦺꦥꦱꦷꦱꦁ ꦱꦩꦴꦣꦶ, ꦢꦱ꧀ꦱꦤꦱꦷꦱꦁ ꦥꦚ꧀ꦚꦴ, ꦥꦮꦠ꧀ꦠꦱꦷꦱꦁ ꦗꦷꦮꦶꦠꦶꦤ꧀ꦢ꧀ꦫꦶꦪꦁ, ꦕꦸꦠꦶꦱꦷꦱꦁ ꦮꦶꦩꦺꦴꦏ꧀ꦑꦺꦴ, ꦱꦔ꧀ꦑꦴꦫꦱꦷꦱꦁ ꦤꦶꦫꦺꦴꦣꦺꦴ’’ꦠꦶ ꦥꦛꦶꦱꦩ꧀ꦨꦶꦢꦴꦪꦁ (ꦥꦛꦶ. ꦩ. ꧓.꧓꧓) ꦮꦸꦠ꧀ꦠꦺꦱꦸ ꦱꦠ꧀ꦠꦫꦱꦱꦸ ꦱꦷꦱꦺꦱꦸ ꦥꦮꦠ꧀ꦠꦱꦷꦱꦁ ꦏꦶꦭꦺꦱꦱꦷꦱꦤ꧀ꦠꦶ ꦢ꧀ꦮꦺ ꦱꦷꦱꦴꦤꦶ ꦆꦣꦴꦣꦶꦥ꧀ꦥꦺꦠꦴꦤꦶ – ‘‘ꦄꦥꦸꦧ꧀ꦧꦁ ꦄꦕꦫꦶꦩꦁ ꦄꦴꦱꦮꦥꦫꦶꦪꦴꦢꦴꦤꦚ꧀ꦕ ꦲꦺꦴꦠꦶ ꦗꦷꦮꦶꦠꦥꦫꦶꦪꦴꦢꦴꦤꦚ꧀ꦕꦴ’’ꦠꦶ ꦮꦕꦤꦠꦺꦴ. ꦠꦺꦱꦸ ꦏꦶꦭꦺꦱꦱꦷꦱꦁ ꦄꦫꦲꦠ꧀ꦠꦩꦒ꧀ꦒꦺꦴ ꦥꦫꦶꦪꦴꦢꦶꦪꦠꦶ, ꦥꦮꦠ꧀ꦠꦱꦷꦱꦁ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦕꦸꦠꦶꦕꦶꦠ꧀ꦠꦁ ꦥꦫꦶꦪꦴꦢꦶꦪꦠꦶ. ꦠꦠ꧀ꦡ ꦄꦮꦶꦗ꧀ꦗꦴꦥꦫꦶꦪꦴꦢꦴꦪꦏꦁ ꦕꦶꦠ꧀ꦠꦁ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦥꦫꦶꦪꦴꦢꦴꦠꦸꦁ ꦤ ꦱꦏ꧀ꦏꦺꦴꦠꦶ, ꦗꦷꦮꦶꦠꦶꦤ꧀ꦢ꧀ꦫꦶꦪꦥꦫꦶꦪꦴꦢꦴꦪꦏꦁ ꦄꦮꦶꦗ꧀ꦗꦁ ꦥꦫꦶꦪꦴꦢꦴꦠꦸꦁ ꦤ ꦱꦏ꧀ꦏꦺꦴꦠꦶ. ꦄꦚ꧀ꦚꦁ ꦄꦮꦶꦗ꧀ꦗꦴꦥꦫꦶꦪꦴꦢꦴꦪꦏꦁ ꦕꦶꦠ꧀ꦠꦁ, ꦄꦚ꧀ꦚꦁ ꦗꦷꦮꦶꦠꦤ꧀ꦢ꧀ꦫꦶꦪꦥꦫꦶꦪꦴꦢꦴꦪꦏꦁ. ꦪꦱ꧀ꦱ ꦕꦺꦠꦁ ꦱꦷꦱꦢ꧀ꦮꦪꦁ ꦱꦩꦁ ꦥꦫꦶꦪꦴꦢꦴꦤꦁ ꦒꦕ꧀ꦖꦠꦶ, ꦱꦺꦴ ꦗꦷꦮꦶꦠꦱꦩꦱꦷꦱꦷ ꦤꦴꦩ.

ꦏꦡꦁ ꦥꦤꦶꦢꦁ ꦱꦩꦁ ꦲꦺꦴꦠꦷꦠꦶ? ꦮꦴꦫꦱꦩꦠꦴꦪ. ꦪꦱ꧀ꦩꦶꦚ꧀ꦲꦶ ꦮꦴꦫꦺ ꦩꦒ꧀ꦒꦮꦸꦛ꧀ꦜꦴꦤꦁ ꦲꦺꦴꦠꦶ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺ ꦥꦚ꧀ꦕ ꦥꦕ꧀ꦕꦮꦺꦏ꧀ꦑꦟꦴꦤꦶ, ꦱꦏꦢꦴꦒꦴꦩꦶꦩꦒ꧀ꦒꦺ ꦥꦚ꧀ꦕ, ꦄꦤꦴꦒꦴꦩꦶꦩꦒ꧀ꦒꦺ ꦥꦚ꧀ꦕ, ꦄꦫꦲꦠ꧀ꦠꦩꦒ꧀ꦒꦺ ꦕꦠ꧀ꦠꦴꦫꦷꦠꦶ ꦌꦏꦹꦤꦮꦷꦱꦠꦶꦩꦺ ꦥꦕ꧀ꦕꦮꦺꦏ꧀ꦑꦟꦚꦴꦟꦺ ꦥꦠꦶꦛ꧀ꦜꦴꦪ ꦨꦮꦔ꧀ꦒꦁ ꦎꦠꦫꦶꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦺꦴ ꦆꦩꦴꦪ ꦮꦴꦫꦱꦩꦠꦴꦪ ꦆꦢꦁ ꦈꦨꦪꦱꦷꦱꦥꦫꦶꦪꦴꦢꦴꦤꦩ꧀ꦥꦶ ꦱꦩꦁ ꦲꦺꦴꦠꦷꦠꦶ ꦆꦩꦴꦪ ꦮꦴꦫꦱꦩꦠꦴꦪ. ꦮꦴꦫꦱꦩꦮꦸꦠ꧀ꦠꦶꦢꦴꦪꦏꦺꦤ ꦲꦶ ꦩꦒ꧀ꦒꦕꦶꦠ꧀ꦠꦺꦤ ꦄꦠ꧀ꦠꦤꦺꦴ ꦄꦤꦤ꧀ꦠꦫꦁ ꦮꦶꦪ ꦤꦶꦥ꧀ꦦꦴꦢꦺꦠꦧ꧀ꦧꦴ ꦥꦕ꧀ꦕꦮꦺꦏ꧀ꦑꦟꦮꦴꦫꦴ ꦕ ꦏꦶꦭꦺꦱꦥꦫꦶꦪꦴꦢꦴꦤꦱ꧀ꦱꦺꦮ ꦮꦴꦫꦴꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦶ. ‘‘ꦮꦶꦩꦸꦠ꧀ꦠꦱ꧀ꦩꦶꦁ ꦮꦶꦩꦸꦠ꧀ꦠꦩꦶꦠꦶ ꦚꦴꦟꦁ ꦲꦺꦴꦠꦷ’’ꦠꦶ (ꦩ. ꦤꦶ. ꧑.꧗꧘; ꦱꦁ. ꦤꦶ. ꧓.꧑꧒, ꧑꧔) ꦮꦕꦤꦠꦺꦴ ꦥꦕ꧀ꦕꦮꦺꦏ꧀ꦑꦟꦥꦫꦶꦱꦩꦴꦥꦤꦺꦤ ꦏꦶꦭꦺꦱꦥꦫꦶꦪꦴꦢꦴꦤꦁ ꦱꦩ꧀ꦥꦴꦥꦶꦠꦁ ꦤꦴꦩ ꦲꦺꦴꦠꦷꦠꦶ ꦆꦩꦴꦪ ꦮꦴꦫꦮꦸꦠ꧀ꦠꦶꦪꦴ ꦱꦩꦠꦴꦪ ꦏꦶꦭꦺꦱꦥꦫꦶꦪꦴꦢꦴꦤꦗꦷꦮꦶꦠꦥꦫꦶꦪꦴꦢꦴꦤꦴꦤꦁ ꦱꦩꦠꦴ ꦮꦺꦢꦶꦠꦧ꧀ꦧꦴ. ꦠꦺꦤꦺꦮꦴꦲ ‘‘ꦪꦱ꧀ꦩꦴ ꦥꦤꦱ꧀ꦱ…ꦥꦺ... ꦠꦱ꧀ꦩꦴ ꦌꦮꦁ ꦮꦸꦠ꧀ꦠ’’ꦤ꧀ꦠꦶ.

ꦄꦴꦪꦸꦤꦺꦴ ꦮꦺꦩꦗ꧀ꦙꦁ ꦄꦤꦠꦶꦏ꧀ꦏꦩꦶꦠ꧀ꦮꦴ ꦄꦤ꧀ꦠꦫꦴꦮ ꦏꦶꦭꦺꦱꦥꦫꦶꦤꦶꦧ꧀ꦧꦴꦤꦺꦤ ꦥꦫꦶꦤꦶꦧ꧀ꦧꦴꦪꦠꦷꦠꦶ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦷ. ꦠꦺꦤꦴꦲ ‘‘ꦪꦺꦴ ꦥꦚ꧀ꦕꦱꦸ ꦱꦸꦢ꧀ꦣꦴꦮꦴꦱꦺꦱꦹ’’ꦠꦶꦄꦴꦢꦶ. ꦮꦺꦩꦗ꧀ꦙꦺꦠꦶ ꦄꦮꦶꦲꦴꦢꦷꦱꦸ ꦪꦠ꧀ꦡ ꦈꦥ꧀ꦥꦤ꧀ꦤꦺꦴ, ꦠꦠ꧀ꦡ ꦄꦴꦪꦸꦤꦺꦴ ꦮꦺꦩꦗ꧀ꦙꦺ. ꦄꦴꦪꦸꦮꦺꦩꦗ꧀ꦙꦁ ꦈꦥꦲꦕ꧀ꦕ ꦄꦠꦶꦏ꧀ꦏꦩꦶꦠ꧀ꦮꦴ ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦠꦷꦠꦶ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ. ꦠꦺꦤꦴꦲ ‘‘ꦪꦺꦴ ꦠꦠ꧀ꦡꦺꦮꦴ’’ꦠꦶꦄꦴꦢꦶ. ꦄꦱꦔ꧀ꦑꦴꦫꦺꦤ ꦄꦥ꧀ꦥꦪꦺꦴꦒꦺꦤ ꦄꦤꦸꦱ꧀ꦱꦴꦲꦺꦤ ꦄꦏꦶꦭꦩꦤ꧀ꦠꦺꦴ ꦠꦶꦏ꧀ꦑꦶꦤ꧀ꦢ꧀ꦫꦶꦪꦠꦴꦪ ꦱꦸꦑꦺꦤꦺꦮ ꦥꦫꦶꦤꦶꦧ꧀ꦧꦴꦪꦠꦷꦠꦶ ꦄꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ. ꦠꦺꦤꦴꦲ ‘‘ꦪꦺꦴ ꦠꦺꦱꦁꦪꦺꦮꦴ’’ꦠꦶꦄꦴꦢꦶ. ꦠꦺꦱꦁꦪꦺꦮ ꦥꦸꦒ꧀ꦒꦭꦴꦤꦤ꧀ꦠꦶ ꦤꦶꦢ꧀ꦣꦴꦫꦟꦺ ꦱꦴꦩꦶꦮꦕꦤꦁ. ꦄꦥ꧀ꦥꦪꦺꦴꦒꦺꦤꦴꦠꦶ ꦄꦣꦶꦩꦠ꧀ꦠꦥ꧀ꦥꦪꦺꦴꦒꦺꦤ ꦮꦶꦤꦴ ꦄꦥ꧀ꦥꦏꦱꦶꦫꦺꦤ. ꦱꦱꦔ꧀ꦑꦴꦫꦺꦤ ꦱꦥ꧀ꦥꦪꦺꦴꦒꦺꦤ ꦏꦶꦭꦩꦤ꧀ꦠꦺꦴ ꦢꦸꦏ꧀ꦑꦺꦤ ꦥꦫꦶꦤꦶꦧ꧀ꦧꦴꦪꦠꦷꦠꦶ ꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦷ. ꦈꦢ꧀ꦣꦁꦮꦴꦲꦶꦨꦴꦮꦺꦤ ꦈꦢ꧀ꦣꦩꦱ꧀ꦱ ꦠꦟ꧀ꦲꦴꦱꦺꦴꦠꦁ ꦮꦛ꧀ꦛꦱꦺꦴꦠꦚ꧀ꦕꦴꦠꦶ, ꦈꦢ꧀ꦣꦁ ꦮꦴ ꦒꦤ꧀ꦠ꧀ꦮꦴ ꦥꦛꦶꦭꦨꦶꦠꦧ꧀ꦧꦠꦺꦴ ꦈꦢ꧀ꦣꦩꦱ꧀ꦱ ꦩꦒ꧀ꦒꦱꦺꦴꦠꦤ꧀ꦠꦶ ꦈꦢ꧀ꦣꦁꦨꦺꦴꦠꦺꦴ. ꦥꦛꦶꦱꦤ꧀ꦣꦶꦮꦱꦺꦤ ꦄꦏꦤꦶꦛ꧀ꦜꦁ ꦒꦕ꧀ꦖꦠꦷꦠꦶ ꦄꦏꦤꦶꦛ꧀ꦜꦒꦴꦩꦷ.

ꦌꦠ꧀ꦡ ꦥꦤ ꦕꦠꦸꦏ꧀ꦏꦁ ꦮꦺꦢꦶꦠꦧ꧀ꦧꦁ. ꦪꦺꦴ ꦲꦶ ꦄꦮꦶꦲꦠꦺꦴ ꦥꦛ꧀ꦜꦴꦪ ꦕꦠ꧀ꦠꦴꦫꦺꦴ ꦢꦺꦮꦭꦺꦴꦏꦺ ꦱꦺꦴꦣꦺꦠ꧀ꦮꦴ ꦄꦏꦤꦶꦛ꧀ꦜꦁ ꦒꦤ꧀ꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦶ, ꦄꦪꦁ ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷ ꦤꦴꦩ. ꦄꦪꦚ꧀ꦲꦶ ꦄꦮꦶꦲꦺꦱꦸ ꦏꦥ꧀ꦥꦱꦲꦱ꧀ꦱꦁ ꦮꦱꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦄꦠꦥ꧀ꦥꦁ ꦒꦕ꧀ꦖꦠꦶ, ꦠꦠ꧀ꦫꦴꦥꦶ ꦢ꧀ꦮꦺ ꦏꦥ꧀ꦥꦱꦲꦱ꧀ꦱꦴꦤꦶ ꦮꦱꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦱꦸꦢꦱ꧀ꦱꦁ ꦒꦕ꧀ꦖꦠꦶ, ꦠꦠ꧀ꦫꦴꦥꦶ ꦕꦠ꧀ꦠꦴꦫꦶ ꦏꦥ꧀ꦥꦱꦲꦱ꧀ꦱꦴꦤꦶ ꦮꦱꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦱꦸꦢꦱ꧀ꦱꦶꦁ ꦒꦕ꧀ꦖꦠꦶ, ꦠꦠ꧀ꦫꦴꦥꦶ ꦄꦛ꧀ꦜ ꦏꦥ꧀ꦥꦱꦲꦱ꧀ꦱꦴꦤꦶ ꦮꦱꦤ꧀ꦠꦺꦴ ꦄꦫꦲꦠ꧀ꦠꦁ ꦥꦠ꧀ꦠꦸꦁ ꦄꦱꦏ꧀ꦏꦸꦟꦶꦠ꧀ꦮꦴ ꦄꦏꦤꦶꦛ꧀ꦜꦁ ꦒꦕ꧀ꦖꦠꦶ, ꦠꦠ꧀ꦡ ꦮꦱꦤ꧀ꦠꦺꦴ ꦄꦒ꧀ꦒꦩꦒ꧀ꦒꦁ ꦄꦣꦶꦒꦕ꧀ꦖꦠꦶ. ꦠꦠ꧀ꦡ ꦪꦺꦴ ꦄꦮꦶꦲꦠꦺꦴ ꦥꦛ꧀ꦜꦴꦪ ꦢꦸꦠꦶꦪꦁ ꦮꦴ ꦕꦠꦸꦠ꧀ꦡꦁ ꦮꦴ ꦢꦺꦮꦭꦺꦴꦏꦁ ꦒꦤ꧀ꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦶ, ꦄꦪꦁ ꦈꦢ꧀ꦣꦁꦱꦺꦴꦠꦺꦴ ꦤ ꦄꦏꦤꦶꦛ꧀ꦜꦒꦴꦩꦷ ꦤꦴꦩ. ꦪꦺꦴ ꦏꦴꦩꦨꦮꦠꦺꦴ ꦕꦮꦶꦠ꧀ꦮꦴ ꦄꦏꦤꦶꦛ꧀ꦜꦺꦱꦸ ꦥꦫꦶꦤꦶꦧ꧀ꦧꦴꦪꦠꦶ, ꦄꦪꦁ ꦤ ꦈꦢ꧀ꦣꦁꦱꦺꦴꦠꦺꦴ ꦄꦏꦤꦶꦛ꧀ꦜꦒꦴꦩꦷ ꦤꦴꦩ. ꦪꦺꦴ ꦲꦺꦛ꧀ꦜꦴ ꦕꦠꦹꦱꦸ ꦢꦺꦮꦭꦺꦴꦏꦺꦱꦸ ꦠꦠ꧀ꦡ ꦠꦠ꧀ꦡꦺꦮ ꦤꦶꦧ꧀ꦧꦠ꧀ꦠꦶꦠ꧀ꦮꦴ ꦥꦫꦶꦤꦶꦧ꧀ꦧꦴꦪꦠꦶ, ꦄꦪꦁ ꦤ ꦈꦢ꧀ꦣꦁꦱꦺꦴꦠꦺꦴ ꦤ ꦄꦏꦤꦶꦛ꧀ꦜꦒꦴꦩꦷꦠꦶ.

ꦌꦠꦺ ꦥꦤ ꦄꦮꦶꦲꦺꦱꦸ ꦈꦥ꧀ꦥꦤ꧀ꦤꦱꦩꦤꦤ꧀ꦠꦫꦄꦴꦪꦸꦮꦺꦩꦗ꧀ꦙꦁ ꦄꦥ꧀ꦥꦠ꧀ꦮꦴꦮ ꦥꦫꦶꦤꦶꦧ꧀ꦧꦴꦪꦤꦮꦱꦺꦤ ꦠꦪꦺꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦶꦤꦺꦴ, ꦌꦏꦺꦴ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷ, ꦌꦏꦺꦴ ꦈꦢ꧀ꦣꦁꦱꦺꦴꦠꦺꦴꦠꦶ ꦥꦚ꧀ꦕꦮꦶꦣꦺꦴ, ꦄꦱꦔ꧀ꦑꦴꦫꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦶꦮꦶꦨꦴꦒꦺꦤ ꦢꦱ ꦲꦺꦴꦤ꧀ꦠꦶ, ꦠꦡꦴ ꦄꦠꦥ꧀ꦥꦱꦸꦢꦱ꧀ꦱꦱꦸꦢꦱ꧀ꦱꦷꦱꦹꦠꦶ ꦕꦠ꧀ꦠꦴꦫꦺꦴ ꦢꦱꦏꦴꦠꦶ ꦕꦠ꧀ꦠꦴꦫꦷꦱꦁ. ꦄꦏꦤꦶꦛ꧀ꦜꦺ ꦥꦤ ꦈꦢ꧀ꦣꦁꦱꦺꦴꦠꦺꦴ ꦤꦠ꧀ꦡꦶ, ꦠꦪꦺꦴ ꦄꦤ꧀ꦠꦫꦴꦥꦫꦶꦤꦶꦧ꧀ꦧꦴꦪꦶꦤꦺꦴ, ꦌꦏꦺꦴ ꦈꦥꦲꦕ꧀ꦕꦥꦫꦶꦤꦶꦧ꧀ꦧꦴꦪꦷꦠꦶ ꦕꦠ꧀ꦠꦴꦫꦺꦴ, ꦄꦱꦔ꧀ꦑꦴꦫꦱꦱꦔ꧀ꦑꦴꦫꦥꦫꦶꦤꦶꦧ꧀ꦧꦴꦪꦶꦮꦶꦨꦴꦒꦺꦤ ꦄꦛ꧀ꦜꦴꦠꦶ ꦄꦛ꧀ꦜꦕꦠ꧀ꦠꦴꦫꦷꦱꦁ ꦄꦤꦴꦒꦴꦩꦶꦤꦺꦴ. ꦱꦠ꧀ꦠꦩꦴꦢꦷꦱꦸ ꦤꦠ꧀ꦡꦶ ꦮꦠ꧀ꦠꦧ꧀ꦧꦁ.

ꦄꦤꦶꦕ꧀ꦕꦴꦤꦸꦥꦱ꧀ꦱꦷꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦤꦶꦢ꧀ꦢꦱꦮꦠ꧀ꦡꦸꦱꦸꦠ꧀ꦠꦮꦟ꧀ꦟꦤꦴ

꧒꧐. ꦢꦱꦩꦺ ꦤꦶꦢ꧀ꦢꦱꦮꦠ꧀ꦡꦹꦤꦷꦠꦶ ꦄꦴꦢꦶꦱꦢ꧀ꦢꦭꦺꦴꦥꦺꦤꦴꦪꦁ ꦤꦶꦢ꧀ꦢꦺꦱꦺꦴꦠꦶ ꦄꦴꦲ ‘‘ꦤꦶꦢ꧀ꦢꦱꦴꦢꦶꦮꦠ꧀ꦡꦹꦤꦷ’’ꦠꦶ. ꦤꦠ꧀ꦡꦶ ꦆꦢꦴꦤꦶ ꦆꦩꦱ꧀ꦱ ꦢꦱꦴꦠꦶ ꦤꦶꦢ꧀ꦢꦱꦺꦴ. ꦥꦚ꧀ꦲꦺꦴꦠꦶ ꦚꦴꦠꦸꦁ ꦆꦕ꧀ꦖꦶꦠꦺꦴ ꦄꦠ꧀ꦡꦺꦴ. ꦥꦸꦤ ꦢꦱꦮꦱ꧀ꦱꦺꦴ ꦤ ꦲꦺꦴꦠꦷꦠꦶ ꦠꦺꦱꦁ ꦩꦠꦶꦩꦠ꧀ꦠꦩꦺꦠꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦱꦺꦴ ꦏꦶꦫꦴ’’ꦠꦶ ꦏꦶꦫꦱꦢ꧀ꦢꦒ꧀ꦒꦲꦟꦁ. ꦤꦶꦢ꧀ꦢꦱꦺꦴꦠꦶ ꦕꦺꦠꦁ ꦮꦕꦤꦩꦠ꧀ꦠꦁ. ꦠꦱ꧀ꦱ ꦤꦶꦧ꧀ꦧꦷꦱꦴꦢꦶꦨꦴꦮꦱ꧀ꦱ ꦮꦶꦪ ꦤꦶꦤ꧀ꦤꦮꦴꦢꦶꦨꦴꦮꦱ꧀ꦱ ꦕ ꦆꦕ꧀ꦖꦶꦠꦠ꧀ꦠꦴꦠꦶ ꦢꦱ꧀ꦱꦺꦠꦸꦁ ‘‘ꦤ ꦏꦺꦮꦭꦚ꧀ꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦒꦴꦩꦺ ꦮꦶꦕꦫꦤ꧀ꦠꦺꦴꦠꦶ ꦒꦴꦩꦺ ꦥꦶꦟ꧀ꦝꦴꦪ ꦕꦫꦤ꧀ꦠꦺꦴ. ꦤ ꦆꦢꦁ ꦠꦶꦠ꧀ꦡꦶꦪꦴꦤꦁ ꦄꦣꦶꦮꦕꦤꦁ ꦠꦺꦱꦸ ꦠꦤ꧀ꦤꦶꦩꦶꦠ꧀ꦠꦱ꧀ꦱ ꦄꦨꦴꦮꦴ, ꦱꦴꦱꦤꦺꦥꦶ ꦱꦺꦑꦱ꧀ꦱꦥꦶ ꦤ ꦆꦢꦁ ꦄꦣꦶꦮꦕꦤꦁ, ꦏꦶꦩꦔ꧀ꦒꦁ ꦥꦤ ꦥꦸꦡꦸꦗ꧀ꦗꦤꦱ꧀ꦱ. ꦪꦱ꧀ꦱ ꦥꦤꦺꦠꦁ ꦄꦣꦶꦮꦕꦤꦁ ꦪꦺꦤ ꦕ ꦏꦴꦫꦟꦺꦤ, ꦠꦁ ꦢꦱ꧀ꦱꦺꦠꦸꦁ ‘‘ꦑꦷꦟꦴꦱꦮꦱ꧀ꦱꦺꦠ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦄꦥ꧀ꦥꦛꦶꦱꦤ꧀ꦣꦶꦏꦨꦴꦮꦺꦴ ꦲꦶꦱ꧀ꦱ ꦥꦕ꧀ꦕꦏ꧀ꦑꦠꦺꦴ ꦏꦴꦫꦟꦁ. ꦥꦫꦩ꧀ꦥꦫꦴꦪ ꦆꦠꦫꦴꦤꦶ ꦪꦴꦤꦶ ꦥꦴꦭ꦳ꦶꦪꦁ ꦄꦴꦒꦠꦴꦤꦶꦁ.

ꦱꦶꦏ꧀ꦑꦴꦪ ꦱꦩ꧀ꦩꦢꦺꦮ ꦄꦴꦢꦴꦤꦁ ꦱꦶꦏ꧀ꦑꦴꦱꦩꦴꦢꦴꦤꦁ. ꦠꦁ ꦥꦤꦱ꧀ꦱꦴ ꦥꦴꦫꦶꦥꦹꦫꦶꦪꦴ ꦮꦺꦢꦶꦠꦧ꧀ꦧꦤ꧀ꦠꦶ ꦄꦴꦲ ‘‘ꦱꦶꦏ꧀ꦑꦴꦠ꧀ꦠꦪꦥꦹꦫꦟꦺ’’ꦠꦶ. ꦱꦶꦏ꧀ꦑꦴꦪ ꦮꦴ ꦱꦩ꧀ꦩꦢꦺꦮ ꦄꦴꦢꦶꦠꦺꦴ ꦥꦛ꧀ꦜꦴꦪ ꦫꦏ꧀ꦑꦟꦁ ꦱꦶꦏ꧀ꦑꦴꦱꦩꦴꦢꦴꦤꦁ. ꦠꦚ꧀ꦕ ꦄꦠ꧀ꦡꦠꦺꦴ ꦥꦹꦫꦟꦺꦤ ꦥꦫꦶꦕ꧀ꦖꦶꦤ꧀ꦤꦁ ꦄꦫꦏ꧀ꦑꦟꦺ ꦱꦧ꧀ꦧꦺꦤ ꦱꦧ꧀ꦧꦁ ꦄꦨꦴꦮꦠꦺꦴ, ꦫꦏ꧀ꦑꦟꦺ ꦕ ꦥꦫꦶꦥꦹꦫꦟꦠꦺꦴ. ꦧꦭꦮꦕ꧀ꦖꦤ꧀ꦢꦺꦴꦠꦶ ꦢꦭ꦳꧀ꦲꦕ꧀ꦖꦤ꧀ꦢꦺꦴ. ꦄꦴꦪꦠꦶꦤ꧀ꦠꦶ ꦄꦤꦤ꧀ꦠꦫꦴꦤꦴꦒꦠꦢꦶꦮꦱꦴꦢꦶꦏꦴꦭꦺꦴ ꦄꦣꦶꦥ꧀ꦥꦺꦠꦺꦴ, ꦤ ꦄꦤꦴꦒꦠꦨꦮꦺꦴꦠꦶ ꦄꦴꦲ ‘‘ꦄꦤꦴꦒꦠꦺ ꦥꦸꦤꦢꦶꦮꦱꦴꦢꦷꦱꦸꦥꦷ’’ꦠꦶ. ꦱꦶꦏ꧀ꦑꦁ ꦥꦫꦶꦥꦹꦫꦺꦤ꧀ꦠꦱ꧀ꦱ ꦠꦠ꧀ꦡ ꦤꦶꦧꦢ꧀ꦣꦨꦠ꧀ꦠꦶꦠꦴ ꦄꦮꦶꦒꦠꦥꦺꦩꦠꦴ. ꦠꦺꦨꦹꦩꦏꦣꦩ꧀ꦩꦴꦤꦁ ꦄꦤꦶꦕ꧀ꦕꦴꦢꦶꦮꦱꦺꦤ ꦱꦩ꧀ꦩꦢꦺꦮ ꦤꦶꦗ꧀ꦙꦴꦤꦁ ꦣꦩ꧀ꦩꦤꦶꦱꦴꦩꦤꦴꦠꦶ ꦄꦴꦲ ‘‘ꦮꦶꦥꦱ꧀ꦱꦤꦴꦪꦺꦠꦁ ꦄꦣꦶꦮꦕꦤ’’ꦤ꧀ꦠꦶ. ꦠꦟ꧀ꦲꦴꦮꦶꦤꦪꦺꦠꦶ ꦨꦔ꧀ꦒꦴꦤꦸꦥꦱ꧀ꦱꦤꦴꦚꦴꦟꦴꦤꦸꦨꦴꦮꦱꦶꦢ꧀ꦣꦺ ꦠꦟ꧀ꦲꦴꦮꦶꦏ꧀ꦑꦩ꧀ꦨꦤꦺ. ꦌꦏꦷꦨꦴꦮꦺꦠꦶ ꦒꦟꦱꦔ꧀ꦒꦟꦶꦏꦴꦏꦶꦭꦺꦱꦱꦔ꧀ꦒꦟꦶꦏꦴꦮꦶꦒꦩꦱꦶꦢ꧀ꦣꦺ ꦮꦶꦮꦺꦏꦮꦴꦱꦺ. ꦮꦷꦫꦶꦪꦴꦫꦩ꧀ꦨꦺꦠꦶ ꦱꦩ꧀ꦩꦥ꧀ꦥꦣꦴꦤꦱ꧀ꦱ ꦥꦒ꧀ꦒꦟ꧀ꦲꦤꦺ. ꦠꦁ ꦥꦤ ꦱꦧ꧀ꦧꦱꦺꦴ ꦮꦷꦫꦶꦪꦱ꧀ꦱ ꦥꦫꦶꦧ꧀ꦫꦹꦲꦤꦁ ꦲꦺꦴꦠꦷꦠꦶ ꦄꦴꦲ ‘‘ꦏꦴꦪꦶꦏꦕꦺꦠꦱꦶꦏꦱ꧀ꦱ ꦮꦷꦫꦶꦪꦱ꧀ꦱ ꦥꦹꦫꦟꦺ’’ꦠꦶ. ꦱꦠꦶꦪꦚ꧀ꦕꦺꦮ ꦤꦶꦥꦏꦨꦴꦮꦺ ꦕꦴꦠꦶ ꦱꦠꦺꦴꦏꦴꦫꦶꦠꦴꦪ ꦕꦺꦮ ꦱꦩ꧀ꦥꦗꦴꦤꦏꦴꦫꦶꦠꦴꦪ ꦕ. ꦱꦠꦶꦱꦩ꧀ꦥꦗꦚ꧀ꦚꦧꦭꦺꦤꦺꦮ ꦲꦶ ꦮꦷꦫꦶꦪꦴꦫꦩ꧀ꦨꦺꦴ ꦆꦗ꧀ꦙꦠꦶ. ꦢꦶꦛ꧀ꦜꦶꦥꦛꦶꦮꦺꦣꦺꦠꦶ ꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶꦪꦴ ꦥꦛꦶꦮꦶꦗ꧀ꦙꦤꦺ. ꦠꦺꦤꦴꦲ ‘‘ꦩꦒ꧀ꦒꦢꦱ꧀ꦱꦤꦺ’’ꦠꦶ.

ꦤꦶꦢ꧀ꦢꦱꦮꦠ꧀ꦡꦸꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦤꦸꦱꦪꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦮꦗ꧀ꦗꦶꦱꦠ꧀ꦠꦏꦮꦒ꧀ꦒꦺꦴ

꧑. ꦱꦴꦫꦤ꧀ꦢꦢꦱꦸꦠ꧀ꦠꦮꦟ꧀ꦟꦤꦴ

꧒꧑. ꦠꦠꦶꦪꦱ꧀ꦱ ꦥꦜꦩꦺ ꦢꦺꦮꦴꦪꦠꦤꦨꦴꦮꦺꦤ ꦕꦶꦠ꧀ꦠꦠ꧀ꦠꦴ ꦭꦺꦴꦏꦱ꧀ꦱ ꦕꦶꦠ꧀ꦠꦷꦏꦴꦫꦛ꧀ꦜꦴꦤꦠꦴꦪ ꦕ ꦕꦺꦠꦶꦪꦁ ꦄꦲꦺꦴꦱꦶ. ꦪꦴꦮꦏꦷꦮꦤ꧀ꦠꦶ (ꦢꦷ. ꦤꦶ. ꦛꦷ. ꧒.꧑꧓꧔) ꦌꦏꦩꦺꦮꦺꦠꦁ ꦥꦢꦁ ꦄꦤꦶꦪꦩꦠꦺꦴ ꦥꦫꦶꦩꦴꦟꦮꦴꦕꦷ. ꦏꦴꦭꦺꦴ ꦕꦺꦠ꧀ꦡ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦪꦠ꧀ꦠꦏꦁ ꦏꦴꦭ’’ꦤ꧀ꦠꦶ. ꦄꦨꦶꦟ꧀ꦲꦁ ꦱꦤ꧀ꦤꦶꦥꦴꦠꦴꦠꦶ ꦤꦶꦕ꧀ꦕꦱꦤ꧀ꦤꦶꦥꦴꦠꦴ. ꦠꦁ ꦥꦤ ꦤꦶꦕ꧀ꦕꦱꦤ꧀ꦤꦶꦥꦴꦠꦠꦁ ꦢꦱ꧀ꦱꦺꦠꦸꦁ ‘‘ꦢꦶꦮꦱꦱ꧀ꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦤ꧀ꦤꦶꦥꦴꦠꦧꦲꦸꦭꦴꦠꦶ ꦥꦕꦸꦫꦱꦤ꧀ꦤꦶꦥꦴꦠꦴ. ꦮꦺꦴꦱꦴꦤꦤ꧀ꦠꦶ ꦱꦔ꧀ꦏꦺꦴꦕꦁ. ‘‘ꦮꦸꦢ꧀ꦣꦶꦪꦺꦮꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦩꦠ꧀ꦡꦁ ꦧ꧀ꦪꦠꦶꦫꦺꦏꦩꦸꦑꦺꦤ ꦢꦱ꧀ꦱꦺꦠꦸꦁ ‘‘ꦄꦨꦶꦟ꧀ꦲꦁ ꦄꦱꦤ꧀ꦤꦶꦥꦠꦤ꧀ꦠꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦴꦏꦸꦭꦴꦠꦶ ꦑꦸꦨꦶꦠꦴ ꦤ ꦥꦱꦤ꧀ꦤꦴ. ꦨꦶꦗ꧀ꦗꦶꦠ꧀ꦮꦴꦠꦶ ꦮꦒ꧀ꦒꦧꦤ꧀ꦣꦠꦺꦴ ꦮꦶꦨꦗ꧀ꦗ ꦮꦶꦱꦸꦁ ꦮꦶꦱꦸꦁ ꦲꦸꦠ꧀ꦮꦴ.

ꦱꦤ꧀ꦤꦶꦥꦴꦠꦨꦺꦫꦶꦪꦴꦠꦶ ꦱꦤ꧀ꦤꦶꦥꦴꦠꦴꦫꦺꦴꦕꦤꦨꦺꦫꦶꦪꦴ. ꦄꦢ꧀ꦣꦨꦸꦠ꧀ꦠꦴ ꦮꦴꦠꦶ ꦱꦴꦩꦶꦨꦸꦠ꧀ꦠꦴ ꦮꦴ. ꦎꦱꦷꦢꦩꦴꦤꦺꦠꦶ ꦲꦴꦪꦩꦴꦤꦺ.

ꦱꦸꦔ꧀ꦏꦤ꧀ꦠꦶ ꦨꦟ꧀ꦝꦁ ꦒꦲꦺꦠ꧀ꦮꦴ ꦒꦕ꧀ꦖꦤ꧀ꦠꦺꦲꦶ ꦥꦧ꧀ꦧꦠꦑꦟ꧀ꦝꦤꦴꦢꦶꦠꦶꦠ꧀ꦡꦒꦴꦩꦢ꧀ꦮꦴꦫꦴꦢꦷꦱꦸ ꦫꦴꦗꦥꦸꦫꦶꦱꦴꦤꦁ ꦢꦴꦠꦧ꧀ꦧꦨꦴꦒꦁ. ꦧꦭꦶꦤ꧀ꦠꦶ ꦤꦶꦥ꧀ꦦꦤ꧀ꦤꦱꦱ꧀ꦱꦴꦢꦶꦠꦺꦴ ꦖꦨꦴꦒꦁ ꦱꦠ꧀ꦠꦨꦴꦒꦤ꧀ꦠꦶꦄꦴꦢꦶꦤꦴ ꦭꦢ꧀ꦣꦧ꧀ꦧꦏꦫꦁ. ꦢꦟ꧀ꦝꦤ꧀ꦠꦶ ꦢꦱꦮꦷꦱꦠꦶꦏꦲꦴꦥꦟꦴꦢꦶꦏꦁ ꦄꦥꦫꦴꦣꦴꦤꦸꦫꦹꦥꦁ ꦒꦲꦺꦠꦧ꧀ꦧꦣꦤꦢꦟ꧀ꦝꦁ. ꦮꦗ꧀ꦗꦶꦣꦩ꧀ꦩꦤ꧀ꦠꦶ ꦮꦗ꧀ꦗꦶꦫꦴꦗꦣꦩ꧀ꦩꦁ. ꦆꦢꦴꦤꦶ ꦄꦥꦚ꧀ꦚꦠ꧀ꦠꦥꦚ꧀ꦚꦴꦥꦤꦴꦢꦷꦱꦸ ꦠꦥ꧀ꦥꦛꦶꦏ꧀ꦑꦺꦥꦺ ꦕ ꦄꦴꦢꦷꦤꦮꦴꦤꦶꦱꦁꦱꦺ ꦕ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦠꦸꦁ ‘‘ꦠꦺꦱ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦥꦴꦫꦶꦕꦫꦶꦪꦏ꧀ꦑꦩꦴꦠꦶ ꦈꦥꦛ꧀ꦜꦴꦤꦏ꧀ꦑꦩꦴ. ꦥꦺꦴꦫꦴꦟꦁ ꦮꦗ꧀ꦗꦶꦣꦩ꧀ꦩꦤ꧀ꦠꦶ ꦌꦠ꧀ꦡ ꦥꦸꦧ꧀ꦧꦺ ꦏꦶꦫ ꦮꦗ꧀ꦗꦶꦫꦴꦗꦴꦤꦺꦴ ‘‘ꦄꦪꦁ ꦕꦺꦴꦫꦺꦴ’’ꦠꦶ ꦄꦴꦤꦺꦠ꧀ꦮꦴ ꦢꦱ꧀ꦱꦶꦠꦺ ‘‘ꦒꦟ꧀ꦲꦡ ꦤꦁ ꦕꦺꦴꦫ’’ꦤ꧀ꦠꦶ ꦄꦮꦠ꧀ꦮꦴ ꦮꦶꦤꦶꦕ꧀ꦖꦪꦩꦲꦴꦩꦠ꧀ꦠꦴꦤꦁ ꦢꦺꦤ꧀ꦠꦶ. ꦠꦺ ꦮꦶꦤꦶꦕ꧀ꦖꦶꦤꦶꦠ꧀ꦮꦴ ꦱꦕꦺ ꦄꦕꦺꦴꦫꦺꦴ ꦲꦺꦴꦠꦶ, ꦮꦶꦱ꧀ꦱꦗ꧀ꦗꦺꦤ꧀ꦠꦶ. ꦱꦕꦺ ꦕꦺꦴꦫꦺꦴ, ꦄꦠ꧀ꦠꦤꦴ ꦏꦶꦚ꧀ꦕꦶ ꦄꦏꦠ꧀ꦮꦴ ꦮꦺꦴꦲꦴꦫꦶꦏꦴꦤꦁ ꦢꦺꦤ꧀ꦠꦶ, ꦠꦺꦥꦶ ꦮꦶꦤꦶꦕ꧀ꦖꦶꦤꦶꦠ꧀ꦮꦴ ꦄꦕꦺꦴꦫꦺꦴ ꦕꦺ, ꦮꦶꦱ꧀ꦱꦗ꧀ꦗꦺꦤ꧀ꦠꦶ. ꦕꦺꦴꦫꦺꦴ ꦕꦺ, ꦱꦸꦠ꧀ꦠꦣꦫꦴꦤꦁ ꦢꦺꦤ꧀ꦠꦶ. ꦠꦺꦥꦶ ꦮꦶꦤꦶꦕ꧀ꦖꦶꦤꦶꦠ꧀ꦮꦴ ꦄꦕꦺꦴꦫꦺꦴ ꦕꦺ, ꦮꦶꦱ꧀ꦱꦗ꧀ꦗꦺꦤ꧀ꦠꦶ. ꦕꦺꦴꦫꦺꦴ ꦕꦺ, ꦄꦛ꧀ꦛꦏꦸꦭꦶꦏꦴꦤꦁ ꦢꦺꦤ꧀ꦠꦶ, ꦠꦺꦥꦶ ꦠꦡꦺꦮ ꦏꦠ꧀ꦮꦴ ꦱꦺꦤꦴꦥꦠꦶꦱ꧀ꦱ, ꦱꦺꦤꦴꦥꦠꦶ ꦈꦥꦫꦴꦗꦱ꧀ꦱ, ꦈꦥꦫꦴꦗꦴ ꦫꦚ꧀ꦚꦺꦴ. ꦫꦴꦗꦴ ꦮꦶꦤꦶꦕ꧀ꦖꦶꦤꦶꦠ꧀ꦮꦴ ꦱꦕꦺ ꦄꦕꦺꦴꦫꦺꦴ ꦲꦺꦴꦠꦶ, ꦮꦶꦱ꧀ꦱꦗ꧀ꦗꦺꦠꦶ. ꦱꦕꦺ ꦥꦤ ꦕꦺꦴꦫꦺꦴ ꦲꦺꦴꦠꦶ, ꦥꦮꦺꦟꦶꦥꦟ꧀ꦟꦏꦁ ꦮꦴꦕꦴꦥꦺꦠꦶ. ꦠꦠ꧀ꦡ ‘‘ꦪꦺꦤ ꦆꦢꦁ ꦤꦴꦩ ꦏꦠꦁ, ꦠꦱ꧀ꦱ ꦄꦪꦁ ꦤꦴꦩꦢꦟ꧀ꦝꦺꦴ’’ꦠꦶ ꦭꦶꦑꦶꦠꦁ. ꦫꦴꦗꦴ ꦠꦱ꧀ꦱ ꦏꦶꦫꦶꦪꦁ ꦠꦺꦤ ꦱꦩꦴꦤꦺꦠ꧀ꦮꦴ ꦠꦢꦤꦸꦕ꧀ꦖꦮꦶꦏꦁ ꦢꦟ꧀ꦝꦁ ꦏꦫꦺꦴꦠꦶ. ꦆꦠꦶ ꦌꦠꦁ ꦥꦺꦴꦫꦴꦟꦁ ꦮꦗ꧀ꦗꦶꦣꦩ꧀ꦩꦁ ꦱꦩꦴꦢꦴꦪ ꦮꦠ꧀ꦠꦤ꧀ꦠꦴꦤꦁ ꦩꦤꦸꦱ꧀ꦱꦴ ꦤ ꦈꦗ꧀ꦙꦴꦪꦤ꧀ꦠꦶ. ꦥꦫꦩ꧀ꦥꦫꦴꦒꦠꦺꦱꦸ ꦄꦛ꧀ꦛꦏꦸꦭꦺꦱꦸ ꦗꦴꦠꦴ ꦄꦒꦠꦶꦒꦩꦤꦮꦶꦫꦠꦴ ꦄꦛ꧀ꦛꦩꦲꦭ꧀ꦭꦏꦥꦸꦫꦶꦱꦴ ꦄꦛ꧀ꦛꦏꦸꦭꦶꦏꦴ.

ꦱꦏ꧀ꦏꦴꦫꦤ꧀ꦠꦶ ꦈꦥꦏꦴꦫꦁ. ꦒꦫꦸꦨꦴꦮꦁ ꦥꦕ꧀ꦕꦸꦥꦛ꧀ꦜꦥꦺꦠ꧀ꦮꦴꦠꦶ ‘‘ꦆꦩꦺ ꦄꦩ꧀ꦲꦴꦏꦁ ꦒꦫꦸꦤꦺꦴ’’ꦠꦶ ꦠꦠ꧀ꦡ ꦒꦫꦸꦨꦴꦮꦁ ꦥꦛꦶ ꦥꦛꦶ ꦈꦥꦛ꧀ꦜꦥꦺꦠ꧀ꦮꦴ. ꦩꦴꦤꦺꦱ꧀ꦱꦤ꧀ꦠꦷꦠꦶ ꦱꦩ꧀ꦩꦴꦤꦺꦱ꧀ꦱꦤ꧀ꦠꦶ. ꦠꦁ ꦥꦤ ꦱꦩ꧀ꦩꦴꦤꦤꦁ ꦠꦺꦱꦸ ꦤꦺꦱꦁ ꦄꦠ꧀ꦠꦩꦤꦠꦴꦥꦸꦧ꧀ꦧꦏꦤ꧀ꦠꦶ ꦄꦴꦲ ‘‘ꦩꦤꦺꦤ ꦥꦶꦪꦴꦪꦶꦱ꧀ꦱꦤ꧀ꦠꦷ’’ꦠꦶ. ꦤꦶꦥꦕ꧀ꦕꦏꦴꦫꦁ ꦥꦟꦶꦥꦴꦠꦁ. ꦢꦱ꧀ꦱꦺꦤ꧀ꦠꦷꦠꦶ ꦒꦫꦸꦕꦶꦠ꧀ꦠꦨꦴꦫꦁ ꦢꦱ꧀ꦱꦺꦤ꧀ꦠꦶ. ꦱꦤ꧀ꦣꦴꦤꦺꦠꦸꦤ꧀ꦠꦶ ꦱꦩ꧀ꦧꦤ꧀ꦣꦁ ꦄꦮꦶꦕ꧀ꦖꦶꦤ꧀ꦤꦁ ꦏꦠ꧀ꦮꦴ ꦓꦛꦺꦠꦸꦁ.

ꦥꦱꦪ꧀ꦲꦏꦴꦫꦱ꧀ꦱꦴꦠꦶ ꦧꦭꦏ꧀ꦏꦴꦫꦱ꧀ꦱ. ꦏꦴꦩꦁ ꦮꦸꦢ꧀ꦣꦶꦪꦴ ꦥꦹꦗꦤꦷꦪꦠꦴꦪ ‘‘ꦮꦸꦢ꧀ꦣꦶꦲꦴꦤꦶꦪꦺꦴ’’ꦠꦶ ꦮꦸꦠ꧀ꦠꦁ, ꦄꦠ꧀ꦡꦺꦴ ꦥꦤ ꦮꦸꦠ꧀ꦠꦴꦤꦸꦏ꧀ꦏꦩꦺꦤꦺꦮ ꦪꦺꦴꦗꦺꦠꦧ꧀ꦧꦺꦴ. ꦥꦴꦭ꦳ꦶꦪꦁ ꦮꦴ ꦪꦱ꧀ꦩꦴ ‘‘ꦮꦸꦢ꧀ꦣꦶꦪꦺꦮ ꦥꦴꦛꦶꦏꦔ꧀ꦑꦴ, ꦤꦺꦴ ꦥꦫꦶꦲꦴꦤꦷ’’ꦠꦶ ꦮꦸꦠ꧀ꦠꦁ, ꦠꦱ꧀ꦩꦴ ꦠꦢꦤꦸꦏ꧀ꦏꦩꦺꦤ ‘‘ꦮꦸꦢ꧀ꦣꦶꦲꦴꦤꦶꦪꦺꦴ’’ꦠꦶ ꦮꦸꦠ꧀ꦠꦁ.

ꦮꦶꦥꦕ꧀ꦕꦶꦠꦸꦁ ꦄꦭꦢ꧀ꦣꦺꦴꦏꦴꦱꦺ ꦥꦴꦥꦏꦩ꧀ꦩꦺ, ꦠꦱ꧀ꦱ ꦏꦩ꧀ꦩꦱ꧀ꦱ ꦮꦶꦥꦴꦏꦺ ꦮꦴ ꦄꦤꦮꦱꦫꦺꦴꦮ ꦢꦺꦮꦱꦺꦴꦥꦱꦒ꧀ꦒꦺꦴ. ꦠꦱ꧀ꦩꦶꦁ ꦥꦤ ꦭꦢ꧀ꦣꦺꦴꦏꦴꦱꦺ ꦱꦶꦪꦴ ꦢꦺꦮꦠꦺꦴꦥꦱꦒ꧀ꦒꦱ꧀ꦱ ꦄꦮꦱꦫꦺꦴꦠꦶ ꦄꦴꦲ ‘‘ꦄꦤꦸꦥ꧀ꦥꦤ꧀ꦤꦁ…ꦥꦺ… ꦮꦝ꧀ꦞꦺꦤ꧀ꦠꦷ’’ꦠꦶ. ꦌꦠꦺꦤꦺꦮ ꦄꦤꦸꦥ꧀ꦥꦤ꧀ꦤꦁ ꦱꦸꦑꦤ꧀ꦠꦶ ꦌꦠ꧀ꦡꦴꦥꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦧꦭꦏꦴꦪꦱ꧀ꦱ ꦢꦶꦒꦸꦟꦠꦶꦒꦸꦟꦠꦴꦢꦱ꧀ꦱꦤꦁ ꦥꦛꦶꦨꦪꦨꦴꦮꦢꦱ꧀ꦱꦤꦤ꧀ꦠꦶ ꦌꦮꦩꦴꦢꦶꦤꦴ ꦢꦺꦮꦠꦴꦤꦁ ꦱꦔ꧀ꦒꦴꦩꦱꦷꦱꦺ ꦱꦲꦴꦪꦠꦴ ꦮꦺꦢꦶꦠꦧ꧀ꦧꦴ.

ꦄꦤꦶꦕ꧀ꦖꦶꦠꦤ꧀ꦠꦶ ꦄꦤꦶꦛ꧀ꦜꦁ. ꦄꦴꦮꦫꦟꦠꦺꦴꦠꦶ ꦤꦶꦱꦺꦣꦤꦠꦺꦴ. ꦣꦩ꧀ꦩꦠꦺꦴ ꦄꦤꦥꦺꦠꦴ ꦣꦩ꧀ꦩꦶꦪꦴꦠꦶ ꦆꦣ ‘‘ꦣꦩ꧀ꦩꦶꦏꦴ’’ꦠꦶ ꦮꦸꦠ꧀ꦠꦴ. ꦩꦶꦒꦱꦹꦏꦫꦴꦢꦶꦓꦴꦠꦴꦪ ꦱꦸꦤꦑꦴꦢꦷꦤꦁ ꦏꦝ꧀ꦞꦶꦠ꧀ꦮꦴ ꦮꦤꦕꦫꦟꦁ ꦮꦴꦗꦺꦴ, ꦠꦠ꧀ꦡ ꦤꦶꦪꦸꦠ꧀ꦠꦴ, ꦠꦺ ꦮꦴ ꦮꦴꦗꦺꦤ꧀ꦠꦷꦠꦶ ꦮꦴꦗꦶꦏꦴ, ꦩꦶꦒꦮꦣꦕꦴꦫꦶꦤꦺꦴ.

ꦱꦴꦫꦤ꧀ꦢꦢꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦮꦱ꧀ꦱꦏꦴꦫꦱꦸꦠ꧀ꦠꦮꦟ꧀ꦟꦤꦴ

꧒꧒. ꦢꦸꦠꦶꦪꦺ ꦄꦨꦶꦪꦴꦠꦸꦏꦴꦩꦺꦴꦠꦶ ꦌꦠ꧀ꦡ ꦄꦨꦶ-ꦱꦢ꧀ꦢꦺꦴ ꦄꦨꦶꦨꦮꦤꦠ꧀ꦡꦺꦴ ‘‘ꦄꦤꦨꦶꦮꦶꦢꦶꦠꦸ’’ꦤ꧀ꦠꦶꦄꦴꦢꦷꦱꦸ ꦮꦶꦪꦴꦠꦶ ꦄꦴꦲ ‘‘ꦄꦨꦶꦨꦮꦤꦠ꧀ꦡꦴꦪ ꦪꦴꦠꦸꦏꦴꦩꦺꦴ’’ꦠꦶ. ꦮꦗ꧀ꦗꦶꦫꦴꦗꦴꦤꦺꦴꦠꦶ ‘‘ꦮꦗ꧀ꦗꦺꦠꦧ꧀ꦧꦴ ꦆꦩꦺ’’ꦠꦶ ꦄꦴꦢꦶꦠꦺꦴ ꦥꦮꦠ꧀ꦠꦁ ꦮꦕꦤꦁ ꦈꦥꦴꦢꦴꦪ ꦮꦗ꧀ꦗꦷꦠꦶ ꦭꦢ꧀ꦣꦤꦴꦩꦴ ꦫꦴꦗꦴꦤꦺꦴ, ꦮꦗ꧀ꦗꦶꦫꦛ꧀ꦜꦱ꧀ꦱ ꦮꦴ ꦫꦴꦗꦴꦤꦺꦴ ꦮꦗ꧀ꦗꦶꦫꦴꦗꦴꦤꦺꦴ. ꦫꦛ꧀ꦜꦱ꧀ꦱ ꦥꦤ ꦮꦗ꧀ꦗꦶꦱꦩꦚ꧀ꦚꦴ ꦠꦤ꧀ꦤꦶꦮꦴꦱꦶꦫꦴꦗꦏꦸꦩꦴꦫꦮꦱꦺꦤ ꦮꦺꦢꦶꦠꦧ꧀ꦧꦴ. ꦫꦴꦗꦶꦢ꧀ꦣꦶꦪꦴꦠꦶ ꦫꦴꦗꦨꦴꦮꦴꦤꦸꦒꦠꦺꦤ ꦥꦨꦴꦮꦺꦤ. ꦱꦺꦴ ꦥꦤ ꦥꦨꦴꦮꦺꦴ ꦤꦺꦱꦁ ꦒꦟꦫꦴꦗꦴꦤꦁ ꦩꦶꦡꦺꦴ ꦱꦴꦩꦒ꧀ꦒꦶꦪꦴ ꦭꦺꦴꦏꦺ ꦥꦴꦏꦛꦺꦴ. ꦕꦶꦫꦛ꧀ꦜꦴꦪꦷ ꦕ ꦄꦲꦺꦴꦱꦷꦠꦶ ‘‘ꦱꦩꦒ꧀ꦒꦨꦴꦮꦁ ꦏꦡꦺꦠꦷ’’ꦠꦶ ꦮꦸꦠ꧀ꦠꦁ. ꦄꦤꦸ ꦄꦤꦸ ꦠꦁꦱꦩꦔ꧀ꦒꦶꦤꦺꦴ ꦨꦴꦮꦺꦠꦶ ꦮꦝ꧀ꦞꦺꦠꦷꦠꦶ ꦄꦤꦸꦨꦴꦮꦺꦴ, ꦄꦤꦸꦨꦴꦮꦺꦴ ꦌꦮ ꦄꦴꦤꦸꦨꦴꦮꦺꦴ, ꦥꦠꦴꦥꦺꦴ. ꦱꦺꦴ ꦥꦤ ꦤꦺꦱꦁ ꦥꦠꦴꦥꦺꦴ ꦲꦠ꧀ꦡꦶꦄꦱ꧀ꦱꦴꦢꦶꦮꦴꦲꦤꦱꦩ꧀ꦥꦠ꧀ꦠꦶꦪꦴ ꦠꦠ꧀ꦡ ꦕ ꦱꦸꦨꦶꦏ꧀ꦑꦶꦠꦨꦴꦮꦺꦤ ꦭꦺꦴꦏꦺ ꦥꦴꦏꦛꦺꦴ ꦗꦴꦠꦺꦴꦠꦶ ‘‘ꦌꦠꦺꦤ…ꦥꦺ… ꦏꦡꦺꦠꦷ’’ꦠꦶ ꦮꦸꦠ꧀ꦠꦁ. ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤꦴꦠꦶ ꦏꦸꦚ꧀ꦕꦶꦏꦴꦖꦶꦢ꧀ꦢꦺꦤ. ꦄꦱꦤꦤ꧀ꦠꦶ ꦱꦫꦁ. ꦄꦠꦶꦥꦴꦠꦪꦶꦱ꧀ꦱꦤ꧀ꦠꦷꦠꦶ ꦄꦠꦶꦏ꧀ꦏꦴꦩꦺꦤ꧀ꦠꦶ. ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦤ꧀ꦠꦶ ꦥꦺꦴꦔ꧀ꦑꦱ꧀ꦱ ꦄꦤꦸꦥꦺꦴꦔ꧀ꦑꦁ, ꦥꦸꦫꦶꦩꦱꦫꦱ꧀ꦱ ꦥꦺꦴꦔ꧀ꦑꦥꦢꦴꦤꦸꦒꦠꦥꦺꦴꦔ꧀ꦑꦁ ꦆꦠꦫꦁ ꦱꦫꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦄꦮꦶꦫꦴꦣꦶꦠꦤ꧀ꦠꦶ ꦄꦮꦶꦫꦗ꧀ꦙꦶꦠꦁ. ꦈꦕ꧀ꦖꦶꦤ꧀ꦢꦶꦱ꧀ꦱꦴꦩꦷꦠꦶ ꦈꦩ꧀ꦩꦹꦭꦤꦮꦱꦺꦤ ꦏꦸꦭꦱꦤ꧀ꦠꦠꦶꦁ ꦖꦶꦤ꧀ꦢꦶꦱ꧀ꦱꦴꦩꦶ. ꦄꦪꦤꦁ ꦮꦝ꧀ꦞꦤꦁ ꦄꦪꦺꦴ, ꦠꦥ꧀ꦥꦛꦶꦥꦏ꧀ꦑꦺꦤ ꦄꦤꦪꦺꦴꦠꦶ ꦄꦴꦲ ‘‘ꦄꦮꦝ꧀ꦞꦶ’’ꦤ꧀ꦠꦶ. ꦚꦴꦠꦷꦤꦁ ꦧ꧀ꦪꦱꦤꦁ ꦮꦶꦤꦴꦱꦺꦴ ꦚꦴꦠꦶꦧ꧀ꦪꦱꦤꦁ.

ꦒꦔ꧀ꦒꦴꦪꦴꦠꦶ ꦒꦔ꧀ꦒꦴꦱꦩꦷꦥꦺ. ꦥꦛ꧀ꦛꦤꦒꦴꦩꦤ꧀ꦠꦶ ꦱꦏꦛꦥꦛ꧀ꦛꦤꦒꦴꦩꦁ. ꦠꦠ꧀ꦫꦴꦠꦶ ꦠꦱ꧀ꦩꦶꦁ ꦥꦛ꧀ꦛꦤꦺ. ꦧꦭꦮꦴꦓꦴꦠꦗꦴꦠꦺꦴꦠꦶ ꦈꦥ꧀ꦥꦤ꧀ꦤꦧꦭꦮꦏꦺꦴꦣꦺꦴ. ꦩꦺꦠꦶ ꦩꦪ꧀ꦲꦁ. ꦒꦠꦺꦤꦴꦠꦶ ꦒꦩꦤꦺꦤ. ꦱꦷꦠꦁ ꦮꦴ ꦈꦟ꧀ꦲꦁ ꦮꦴ ꦤꦠ꧀ꦡꦶ ꦠꦴꦪ ꦮꦺꦭꦴꦪ. ꦄꦨꦶꦩꦸꦑꦁ ꦪꦸꦢ꧀ꦣꦺꦤꦴꦠꦶ ꦄꦨꦶꦩꦸꦑꦁ ꦈꦗꦸꦏꦩꦺꦮ ꦱꦔ꧀ꦒꦴꦩꦏꦫꦟꦺꦤ. ꦈꦥꦭꦴꦥꦤꦁ ꦱꦴꦩꦁ ꦢꦴꦤꦚ꧀ꦕꦴꦠꦶ ꦢꦱ꧀ꦱꦺꦠꦸꦁ ‘‘ꦄꦭ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦨꦺꦢꦺꦴꦥꦶ ꦆꦣ ꦈꦥꦴꦪꦺꦴ ꦌꦮꦴꦠꦶ ꦮꦸꦠ꧀ꦠꦁ ‘‘ꦄꦚ꧀ꦚꦠ꧀ꦫ ꦩꦶꦡꦸꦨꦺꦢꦴ’’ꦠꦶ. ꦪꦸꦢ꧀ꦣꦱ꧀ꦱ ꦥꦤ ꦄꦤꦸꦥꦴꦪꦠꦴ ꦥꦒꦺꦮ ꦥꦏꦴꦱꦶꦠꦴ. ꦆꦢꦤ꧀ꦠꦶ ‘‘ꦄꦚ꧀ꦚꦠ꧀ꦫ ꦈꦥꦭꦴꦥꦤꦴꦪ ꦄꦚ꧀ꦚꦠ꧀ꦫ ꦩꦶꦡꦸꦨꦺꦢꦴ’’ꦠꦶ ꦆꦢꦁ ꦮꦕꦤꦁ. ꦏꦡꦴꦪ ꦤꦪꦁ ꦭꦨꦶꦠ꧀ꦮꦴꦠꦶ ‘‘ꦪꦴꦮꦏꦷꦮꦚ꧀ꦕ …ꦥꦺ… ꦥꦫꦶꦲꦴꦤꦷ’’ꦠꦶ ꦆꦩꦴꦪ ꦨꦒꦮꦠꦺꦴ ꦏꦡꦴꦪ ꦈꦥꦴꦪꦁ ꦭꦨꦶꦠ꧀ꦮꦴ. ꦄꦤꦸꦏꦩ꧀ꦥꦴꦪꦴꦠꦶ ꦮꦗ꧀ꦗꦶꦫꦴꦗꦺꦱꦸ ꦄꦤꦸꦒ꧀ꦒꦲꦺꦤ.

ꦫꦴꦗꦴꦥꦶ ꦠꦩꦺꦮ ꦥꦺꦱꦺꦠ꧀ꦮꦴ ꦱꦧ꧀ꦧꦺ…ꦥꦺ… ꦥꦴꦥꦺꦱꦷꦠꦶ ꦫꦴꦗꦴ ꦠꦁ ꦄꦠ꧀ꦠꦤꦺꦴ ꦱꦤ꧀ꦠꦶꦏꦁ ꦄꦴꦒꦠꦁ ‘‘ꦏꦶꦁ, ꦄꦴꦕꦫꦶꦪ, ꦨꦒꦮꦴ ꦄꦮꦕꦴ’’ꦠꦶ ꦥꦸꦕ꧀ꦖꦶ. ꦱꦺꦴ ‘‘ꦪꦡꦴ ꦨꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦮꦕꦤꦁ ꦤ ꦱꦏ꧀ꦏꦴ ꦮꦗ꧀ꦗꦷ ꦏꦺꦤꦕꦶ ꦒꦲꦺꦠꦸꦁ, ꦄꦥꦶꦕ ꦈꦥꦭꦴꦥꦤꦴꦪ ꦮꦴ ꦩꦶꦡꦸꦨꦺꦢꦺꦤ ꦮꦴ ꦱꦏ꧀ꦏꦴ’’ꦠꦶ ꦄꦴꦲ. ꦠꦠꦺꦴ ꦤꦁ ꦫꦴꦗꦴ ‘‘ꦈꦥꦭꦴꦥꦤꦴꦪ ꦄꦩ꧀ꦲꦴꦏꦁ ꦲꦠ꧀ꦡꦶꦄꦱ꧀ꦱꦴꦢꦪꦺꦴ ꦤꦱ꧀ꦱꦶꦱ꧀ꦱꦤ꧀ꦠꦶ, ꦨꦺꦢꦺꦤꦺꦮ ꦠꦺ ꦒꦲꦺꦱ꧀ꦱꦴꦩꦶ, ꦏꦶꦁ ꦏꦫꦺꦴꦩꦴ’’ꦠꦶ ꦥꦸꦕ꧀ꦖꦶ. ꦠꦺꦤ ꦲꦶ, ꦩꦲꦴꦫꦴꦗ, ꦠꦸꦩ꧀ꦲꦺ ꦮꦗ꧀ꦗꦷ ꦄꦴꦫꦧ꧀ꦨ ꦥꦫꦶꦱꦠꦶ ꦏꦡꦁ ꦱꦩꦸꦛ꧀ꦜꦴꦥꦺꦡ, ꦠꦠꦺꦴ ꦄꦲꦁ ‘‘ꦏꦶꦁ ꦠꦺ, ꦩꦲꦴꦫꦴꦗ, ꦠꦺꦲꦶ, ꦄꦠ꧀ꦠꦤꦺꦴ ꦱꦤ꧀ꦠꦏꦺꦤ ꦏꦱꦶꦮꦟꦶꦗ꧀ꦗꦴꦢꦷꦤꦶ ꦏꦠ꧀ꦮꦴ ꦗꦷꦮꦤ꧀ꦠꦸ ꦌꦠꦺ ꦫꦴꦗꦴꦤꦺꦴ’’ꦠꦶ ꦮꦠ꧀ꦮꦴ ꦥꦏ꧀ꦏꦩꦶꦱ꧀ꦱꦴꦩꦶ. ꦠꦠꦺꦴ ꦠꦸꦩ꧀ꦲꦺ ‘‘ꦏꦶꦁ ꦤꦸ, ꦨꦺꦴ, ꦌꦱ ꦧ꧀ꦫꦴꦲ꧀ꦩꦟꦺꦴ ꦮꦗ꧀ꦗꦷ ꦄꦴꦫꦧ꧀ꦨ ꦥꦮꦠ꧀ꦠꦁ ꦏꦡꦁ ꦥꦛꦶꦧꦴꦲꦠꦷ’’ꦠꦶ ꦮꦢꦺꦪ꧀ꦪꦴꦡ. ꦢꦶꦮꦱꦨꦴꦒꦺ ꦕꦴꦲꦁ ꦠꦺꦱꦁ ꦥꦟ꧀ꦟꦴꦏꦴꦫꦁ ꦥꦺꦱꦺꦱ꧀ꦱꦴꦩꦶ, ꦠꦩ꧀ꦥꦶ ꦒꦴꦲꦴꦥꦺꦠ꧀ꦮꦴ ꦠꦸꦩ꧀ꦲꦺꦥꦶ ꦩꦩ ꦢꦺꦴꦱꦁ ꦄꦴꦫꦺꦴꦥꦺꦠ꧀ꦮꦴ ꦧꦤ꧀ꦣꦤꦠꦴꦭ꦳ꦤꦴꦢꦷꦤꦶ ꦄꦏꦠ꧀ꦮꦴꦮ ꦏꦺꦮꦭꦁ ꦑꦸꦫꦩꦸꦟ꧀ꦝꦁ ꦩꦁ ꦏꦠ꧀ꦮꦴ ꦤꦒꦫꦴ ꦤꦷꦲꦫꦴꦥꦺꦡ, ꦄꦡꦴꦲꦁ ‘‘ꦩꦪꦴ ꦠꦺ ꦤꦒꦫꦺ ꦥꦴꦏꦴꦫꦺꦴ ꦥꦫꦶꦑꦴ ꦕ ꦏꦴꦫꦶꦠꦴ, ꦄꦲꦁ ꦡꦶꦫꦢꦸꦧ꧀ꦧꦭꦛ꧀ꦜꦴꦤꦚ꧀ꦕ ꦈꦠ꧀ꦠꦴꦤꦒꦩ꧀ꦨꦷꦫꦛ꧀ꦜꦴꦤꦚ꧀ꦕ ꦗꦴꦤꦴꦩꦶ, ꦤ ꦕꦶꦫꦱ꧀ꦱꦁ ꦢꦴꦤꦶ ꦠꦁ ꦈꦗꦸꦁ ꦏꦫꦶꦱ꧀ꦱꦴꦩꦷ’’ꦠꦶ ꦮꦏ꧀ꦑꦴꦩꦶ. ꦠꦁ ꦱꦸꦠ꧀ꦮꦴ ꦠꦸꦩ꧀ꦲꦺ ‘‘ꦒꦕ꧀ꦖꦠꦹ’’ꦠꦶ ꦮꦢꦺꦪ꧀ꦪꦴꦡꦴꦠꦶ. ꦫꦴꦗꦴ ꦱꦧ꧀ꦧꦁ ꦄꦏꦴꦱꦶ.

ꦭꦶꦕ꧀ꦖꦮꦷ ꦠꦱ꧀ꦱ ꦤꦶꦏ꧀ꦑꦩꦤꦁ ꦱꦸꦠ꧀ꦮꦴ ‘‘ꦱꦜꦺꦴ ꦧ꧀ꦫꦴꦲ꧀ꦩꦟꦺꦴ, ꦩꦴ ꦠꦱ꧀ꦱ ꦒꦔ꧀ꦒꦁ ꦈꦠ꧀ꦠꦴꦫꦺꦠꦸꦁ ꦄꦢꦠ꧀ꦡꦴ’’ꦠꦶ ꦄꦴꦲꦁꦱꦸ. ꦠꦠ꧀ꦫ ꦌꦏꦕ꧀ꦕꦺꦲꦶ ‘‘ꦄꦩ꧀ꦲꦺ ꦄꦴꦫꦧ꧀ꦨ ꦏꦡꦶꦠꦠ꧀ꦠꦴ ꦏꦶꦫ ꦱꦺꦴ ꦌꦮꦁ ꦏꦫꦺꦴꦠꦷ’’ꦠꦶ ꦮꦸꦠ꧀ꦠꦺ ‘‘ꦠꦺꦤ ꦲꦶ ꦨꦟꦺ ꦌꦠꦹ’’ꦠꦶ ꦮꦢꦶꦁꦱꦸ. ꦱꦺꦴ ꦒꦤ꧀ꦠ꧀ꦮꦴ ꦭꦶꦕ꧀ꦖꦮꦷ ꦢꦶꦱ꧀ꦮꦴ ‘‘ꦏꦶꦩꦴꦒꦠꦠ꧀ꦡꦴ’’ꦠꦶ ꦥꦸꦕ꧀ꦖꦶꦠꦺꦴ ꦠꦁ ꦥꦮꦠ꧀ꦠꦶꦁ ꦄꦴꦫꦺꦴꦕꦺꦱꦶ. ꦭꦶꦕ꧀ꦖꦮꦶꦤꦺꦴ ‘‘ꦄꦥ꧀ꦥꦩꦠ꧀ꦠꦏꦺꦤ ꦤꦴꦩ ꦌꦮꦁ ꦒꦫꦸꦁ ꦢꦟ꧀ꦝꦁ ꦏꦴꦠꦸꦁ ꦤ ꦪꦸꦠ꧀ꦠ’’ꦤ꧀ꦠꦶ ꦮꦠ꧀ꦮꦴ ‘‘ꦏꦶꦁ ꦠꦺ ꦠꦠ꧀ꦫ ꦜꦴꦤꦤ꧀ꦠꦫ’’ꦤ꧀ꦠꦶ ꦥꦸꦕ꧀ꦖꦶꦁꦱꦸ. ꦮꦶꦤꦶꦕ꧀ꦖꦪꦩꦲꦴꦩꦕ꧀ꦕꦺꦴꦲꦩꦱ꧀ꦩꦷꦠꦶ. ꦠꦢꦺꦮ ꦠꦺ ꦜꦴꦤꦤ꧀ꦠꦫꦁ ꦲꦺꦴꦠꦹꦠꦶ. ꦱꦺꦴ ꦱꦸꦛ꧀ꦜꦸꦠꦫꦁ ꦮꦶꦤꦶꦕ꧀ꦖꦪꦁ ꦏꦫꦺꦴꦠꦶ. ꦫꦴꦗꦏꦸꦩꦴꦫꦴ ꦠꦱ꧀ꦱ ꦱꦤ꧀ꦠꦶꦏꦺ ꦱꦶꦥ꧀ꦥꦁ ꦈꦒ꧀ꦒꦟ꧀ꦲꦤ꧀ꦠꦶ. ꦱꦺꦴ ꦥꦠꦶꦛ꧀ꦜꦶꦠꦒꦸꦟꦺꦴ ꦲꦸꦠ꧀ꦮꦴ ꦌꦏꦢꦶꦮꦱꦁ ꦌꦏꦁ ꦭꦶꦕ꧀ꦖꦮꦶꦁ ꦒꦲꦺꦠ꧀ꦮꦴ ꦌꦏꦩꦤ꧀ꦠꦁ ꦒꦤ꧀ꦠ꧀ꦮꦴ ‘‘ꦢꦴꦫꦏꦴ ꦏꦱꦤ꧀ꦠꦷ’’ꦠꦶ ꦥꦸꦕ꧀ꦖꦶ. ꦄꦴꦩ, ꦏꦱꦤ꧀ꦠꦶ. ꦢ꧀ꦮꦺ ꦒꦺꦴꦟꦺ ꦪꦺꦴꦗꦺꦠ꧀ꦮꦴꦠꦶ. ꦄꦴꦩ, ꦢ꧀ꦮꦺ ꦒꦺꦴꦟꦺ ꦪꦺꦴꦗꦺꦠ꧀ꦮꦴꦠꦶ. ꦌꦠ꧀ꦠꦏꦁ ꦮꦠ꧀ꦮꦴ ꦤꦶꦮꦠ꧀ꦠꦺꦴ. ꦠꦠꦺꦴ ꦠꦩꦚ꧀ꦚꦺꦴ ‘‘ꦏꦶꦁ ꦄꦴꦕꦫꦶꦪꦺꦴ ꦄꦴꦲꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦺꦤ ꦮꦸꦠ꧀ꦠꦁ – ꦄꦱꦢ꧀ꦢꦲꦤ꧀ꦠꦺꦴ ‘‘ꦤ ꦩꦺꦱꦺꦴ ꦪꦡꦴꦨꦹꦠꦁ ꦏꦡꦺꦠꦷ’’ꦠꦶ ꦠꦺꦤ ꦱꦢ꧀ꦣꦶꦁ ꦨꦶꦗ꧀ꦗꦶ.

ꦧ꧀ꦫꦴꦲ꧀ꦩꦟꦺꦴ ꦄꦥꦫꦩ꧀ꦥꦶ ꦌꦏꦢꦶꦮꦱꦁ ꦌꦏꦁ ꦭꦶꦕ꧀ꦖꦮꦶꦁ ꦌꦏꦩꦤ꧀ꦠꦁ ꦤꦺꦠ꧀ꦮꦴ ‘‘ꦏꦺꦤ ꦧ꧀ꦪꦚ꧀ꦗꦤꦺꦤ ꦨꦸꦠ꧀ꦠꦺꦴꦱꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦤꦶꦮꦠ꧀ꦠꦺꦴ. ꦠꦩ꧀ꦥꦶ ꦄꦚ꧀ꦚꦺꦴ ꦥꦸꦕ꧀ꦖꦶꦠ꧀ꦮꦴ ꦄꦱꦢ꧀ꦢꦲꦤ꧀ꦠꦺꦴ ꦠꦡꦺꦮ ꦨꦶꦗ꧀ꦗꦶ. ꦧ꧀ꦫꦴꦲ꧀ꦩꦟꦺꦴ ꦄꦥꦫꦩ꧀ꦥꦶ ꦢꦶꦮꦱꦁ ꦌꦏꦁ ꦭꦶꦕ꧀ꦖꦮꦶꦁ ꦌꦏꦩꦤ꧀ꦠꦁ ꦤꦺꦠ꧀ꦮꦴ ‘‘ꦄꦠꦶꦢꦸꦒ꧀ꦒꦠꦺꦴꦱꦶ ꦏꦶꦫꦴ’’ꦠꦶ ꦥꦸꦕ꧀ꦖꦶ. ꦏꦺꦴ ꦌꦮꦩꦴꦲꦴꦠꦶ. ꦄꦱꦸꦏꦺꦴ ꦤꦴꦩ ꦭꦶꦕ꧀ꦖꦮꦷꦠꦶ. ꦄꦥꦫꦩ꧀ꦥꦶ ꦌꦏꦩꦤ꧀ꦠꦁ ꦤꦺꦠ꧀ꦮꦴ ‘‘ꦠ꧀ꦮꦁ ꦏꦶꦫ ꦨꦷꦫꦸꦗꦴꦠꦶꦏꦺꦴ’’ꦠꦶ ꦥꦸꦕ꧀ꦖꦶ. ꦏꦺꦴ ꦌꦮꦩꦴꦲꦴꦠꦶ? ꦄꦱꦸꦏꦺꦴ ꦤꦴꦩ ꦭꦶꦕ꧀ꦖꦮꦷꦠꦶ. ꦌꦮꦁ ꦄꦚ꧀ꦚꦺꦤ ꦄꦏꦡꦶꦠꦩꦺꦮ ꦄꦚ꧀ꦚꦱ꧀ꦱ ꦏꦡꦺꦤ꧀ꦠꦺꦴ ꦠꦷꦲꦶ ꦱꦁꦮꦕ꧀ꦖꦫꦺꦲꦶ ꦠꦺ ꦫꦴꦗꦴꦤꦺꦴ ꦄꦚ꧀ꦚꦩꦚ꧀ꦚꦁ ꦨꦶꦤ꧀ꦢꦶꦠ꧀ꦮꦴ ꦪꦡꦴ ꦢ꧀ꦮꦺ ꦌꦏꦩꦒ꧀ꦒꦺꦤ ꦤ ꦒꦕ꧀ꦖꦤ꧀ꦠꦶ, ꦠꦡꦴ ꦏꦠ꧀ꦮꦴ ꦱꦤ꧀ꦤꦶꦥꦴꦠꦨꦺꦫꦶꦁ ꦕꦫꦴꦥꦺꦱꦶ. ꦭꦶꦕ꧀ꦖꦮꦶꦤꦺꦴ ‘‘ꦆꦱ꧀ꦱꦫꦴ ꦱꦤ꧀ꦤꦶꦥꦠꦤ꧀ꦠꦸ, ꦱꦹꦫꦴ ꦱꦤ꧀ꦤꦶꦥꦠꦤ꧀ꦠꦹ’’ꦠꦶ ꦮꦠ꧀ꦮꦴ ꦤ ꦱꦤ꧀ꦤꦶꦥꦠꦶꦁꦱꦸ. ꦧ꧀ꦫꦴꦲ꧀ꦩꦟꦺꦴ ‘‘ꦄꦪꦁ ꦢꦴꦤꦶ ꦏꦴꦭꦺꦴ, ꦱꦷꦓꦁ ꦄꦴꦒꦕ꧀ꦖꦠꦹ’’ꦠꦶ ꦫꦚ꧀ꦚꦺꦴ ꦱꦴꦱꦤꦁ ꦥꦺꦱꦺꦠꦶ. ꦫꦴꦗꦴ ꦱꦸꦠ꧀ꦮꦴꦮ ꦧꦭꦨꦺꦫꦶꦁ ꦕꦫꦴꦥꦺꦠ꧀ꦮꦴ ꦤꦶꦏ꧀ꦑꦩꦶ. ꦮꦺꦱꦴꦭꦶꦏꦴ ꦱꦸꦠ꧀ꦮꦴ ‘‘ꦫꦚ꧀ꦚꦺꦴ ꦒꦔ꧀ꦒꦁ ꦈꦠ꧀ꦠꦫꦶꦠꦸꦁ ꦤ ꦢꦱ꧀ꦱꦴꦩꦴ’’ꦠꦶ ꦨꦺꦫꦶꦁ ꦕꦫꦴꦥꦺꦱꦸꦁ. ꦠꦺ ꦱꦸꦠ꧀ꦮꦴ ‘‘ꦒꦕ꧀ꦖꦤ꧀ꦠꦸ ꦱꦹꦫꦫꦴꦗꦴꦤꦺꦴ’’ꦠꦶꦄꦴꦢꦷꦤꦶ ꦮꦠ꧀ꦮꦴ ꦤ ꦱꦤ꧀ꦤꦶꦥꦠꦶꦁꦱꦸ. ‘‘ꦤꦒꦫꦥ꧀ꦥꦮꦺꦱꦤꦁ ꦤ ꦢꦱ꧀ꦱꦴꦩ, ꦢ꧀ꦮꦴꦫꦴꦤꦶ ꦥꦶꦢꦲꦶꦱ꧀ꦱꦴꦩꦴ’’ꦠꦶ ꦨꦺꦫꦶꦁ ꦕꦫꦴꦥꦺꦱꦸꦁ. ꦌꦏꦺꦴꦥꦶ ꦤ ꦱꦤ꧀ꦤꦶꦥꦠꦶ. ꦪꦡꦴꦮꦶꦮꦛꦺꦲꦶ ꦢ꧀ꦮꦴꦫꦺꦲꦶ ꦥꦮꦶꦱꦶꦠ꧀ꦮꦴ ꦱꦧ꧀ꦧꦺ ꦄꦤꦪꦧ꧀ꦪꦱꦤꦁ ꦥꦴꦥꦺꦠ꧀ꦮꦴ ꦒꦠꦺꦴ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ – ‘‘ꦫꦴꦗꦴꦥꦶ ꦠꦩꦺꦮ ꦥꦺꦱꦺꦠ꧀ꦮꦴ ꦱꦧ꧀ꦧꦺꦥꦶ ꦨꦶꦤ꧀ꦢꦶꦠ꧀ꦮꦴ ꦒꦤ꧀ꦠ꧀ꦮꦴ ꦄꦤꦪꦧ꧀ꦪꦱꦤꦁ ꦥꦴꦥꦺꦱꦷ’’ꦠꦶ.

ꦮꦱ꧀ꦱꦏꦴꦫꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦥꦜꦩꦱꦠ꧀ꦠꦏꦱꦸꦠ꧀ꦠꦮꦟ꧀ꦟꦤꦴ

꧒꧓. ꦠꦠꦶꦪꦺ ꦄꦥꦫꦶꦲꦴꦤꦴꦪ ꦲꦶꦠꦴꦠꦶ ꦄꦥꦫꦶꦲꦴꦤꦶꦪꦴ (ꦢꦷ. ꦤꦶ. ꦛꦷ. ꧒.꧑꧓꧖), ꦤ ꦥꦫꦶꦲꦴꦪꦤ꧀ꦠꦶ ꦌꦠꦺꦲꦷꦠꦶ ꦮꦴ ꦄꦥꦫꦶꦲꦴꦤꦶꦪꦴ. ꦌꦮꦁ ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦩꦠ꧀ꦡꦁ ꦮꦶꦠ꧀ꦡꦴꦫꦠꦺꦴ ꦢꦱ꧀ꦱꦺꦤ꧀ꦠꦺꦴ ‘‘ꦆꦣꦴꦥꦶ ꦕꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦠꦠꦺꦴꦠꦶꦄꦴꦢꦶ ꦢꦶꦱꦴꦱꦸ ꦄꦴꦒꦠꦱꦴꦱꦤꦺ ꦮꦸꦠ꧀ꦠꦮꦕꦤꦁ ꦮꦸꦠ꧀ꦠꦏꦡꦤꦁ. ꦮꦶꦲꦴꦫꦱꦷꦩꦴ ꦄꦴꦏꦸꦭꦴ ꦪꦱ꧀ꦩꦴ, ꦠꦱ꧀ꦩꦴ ꦈꦥꦺꦴꦱꦡꦥꦮꦴꦫꦟꦴ ꦜꦶꦠꦴ. ꦎꦭꦷꦪꦩꦴꦤꦏꦺꦴꦠꦶ ꦥꦴꦭ꦳ꦶꦠꦺꦴ ꦄꦠ꧀ꦡꦠꦺꦴ ꦕ ꦮꦶꦤꦱ꧀ꦱꦩꦴꦤꦏꦺꦴ. ꦈꦏ꧀ꦑꦶꦥꦴꦥꦺꦤ꧀ꦠꦴꦠꦶ ꦥꦒꦸꦟꦨꦴꦮꦏꦫꦟꦺꦤ ꦄꦠ꧀ꦡꦱꦁꦮꦟ꧀ꦟꦤꦴꦮꦱꦺꦤ ꦕ ꦥꦒ꧀ꦒꦟ꧀ꦲꦤ꧀ꦠꦴ.

ꦱꦴꦮꦠ꧀ꦡꦶꦪꦁ ꦨꦶꦏ꧀ꦑꦹ ꦮꦶꦪ (ꦥꦴꦫꦴ. ꧕꧖꧕) ꦥꦴꦕꦶꦠ꧀ꦠꦶꦪꦁ ꦢꦺꦱꦴꦥꦺꦠꦧ꧀ꦧꦺꦴꦠꦶ ꦥꦚ꧀ꦚꦴꦥꦺꦤ꧀ꦠꦴ. ꦮꦗ꧀ꦗꦶꦥꦸꦠ꧀ꦠꦏꦴ ꦮꦶꦪ (ꦕꦹꦭ꦳ꦮ. ꧔꧔꧖) ꦢꦱꦮꦠ꧀ꦡꦸꦢꦷꦥꦤꦺꦤ. ꦠꦡꦴ ꦄꦏꦫꦺꦴꦤ꧀ꦠꦴꦠꦶ ꦤꦮꦁ ꦏꦠꦶꦏꦮꦠ꧀ꦠꦁ ꦮꦴ ꦱꦶꦏ꧀ꦑꦴꦥꦢꦁ ꦮꦴ ꦄꦩꦢ꧀ꦢꦤ꧀ꦠꦴ ꦣꦩ꧀ꦩꦮꦶꦤꦪꦠꦺꦴ ꦱꦴꦱꦤꦁ ꦢꦷꦥꦺꦤ꧀ꦠꦴ ꦑꦸꦢ꧀ꦢꦏꦩ꧀ꦥꦶ ꦕ ꦱꦶꦏ꧀ꦑꦴꦥꦢꦁ ꦄꦱꦩꦹꦲꦤꦤ꧀ꦠꦴ. ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦮꦶꦪ ꦕꦴꦠꦶ ‘‘ꦱꦸꦟꦴꦠꦸ ꦩꦺ, ꦄꦴꦮꦸꦱꦺꦴ, ꦱꦔ꧀ꦓꦺꦴ, ꦱꦤ꧀ꦠꦴꦩ꧀ꦲꦴꦏꦁ ꦱꦶꦏ꧀ꦑꦴꦥꦢꦴꦤꦶ ꦒꦶꦲꦶꦒꦠꦴꦤꦶ. ꦒꦶꦲꦶꦤꦺꦴꦥꦶ ꦗꦴꦤꦤ꧀ꦠꦶ ‘ꦆꦢꦁ ꦮꦺꦴ ꦱꦩꦟꦴꦤꦁ ꦱꦏ꧀ꦪꦥꦸꦠ꧀ꦠꦶꦏꦴꦤꦁ ꦏꦥ꧀ꦥꦠꦶ, ꦆꦢꦁ ꦮꦺꦴ ꦤ ꦏꦥ꧀ꦥꦠꦷ’ꦠꦶ. ꦱꦕꦺꦥꦶ ꦲꦶ ꦩꦪꦁ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ ꦱꦶꦏ꧀ꦑꦴꦥꦢꦴꦤꦶ ꦱꦩꦹꦲꦤꦶꦱ꧀ꦱꦴꦩ, ꦨꦮꦶꦱ꧀ꦱꦤ꧀ꦠꦶ ꦮꦠ꧀ꦠꦴꦫꦺꦴ ‘ꦣꦹꦩꦏꦴꦭꦶꦏꦁ ꦱꦩꦟꦺꦤ ꦒꦺꦴꦠꦩꦺꦤ ꦱꦴꦮꦏꦴꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ, ꦪꦴꦮꦶꦩꦺꦱꦁ ꦱꦠ꧀ꦡꦴ ꦄꦛ꧀ꦜꦴꦱꦶ, ꦠꦴꦮꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦶꦁꦱꦸ. ꦪꦠꦺꦴ ꦆꦩꦺꦱꦁ ꦱꦠ꧀ꦡꦴ ꦥꦫꦶꦤꦶꦧ꧀ꦧꦸꦠꦺꦴ, ꦤ ꦢꦴꦤꦶꦩꦺ ꦱꦶꦏ꧀ꦑꦴꦥꦢꦺꦱꦸ ꦱꦶꦏ꧀ꦑꦤ꧀ꦠꦷ’ꦠꦶ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ, ꦱꦔ꧀ꦓꦺꦴ ꦄꦥꦚ꧀ꦚꦠ꧀ꦠꦁ ꦤ ꦥꦚ꧀ꦚꦥꦺꦪ꧀ꦪ, ꦥꦚ꧀ꦚꦠ꧀ꦠꦁ ꦤ ꦱꦩꦸꦕ꧀ꦖꦶꦤ꧀ꦢꦺꦪ꧀ꦪ, ꦪꦡꦴꦥꦚ꧀ꦚꦠ꧀ꦠꦺꦱꦸ ꦱꦶꦏ꧀ꦑꦴꦥꦢꦺꦱꦸ ꦱꦩꦴꦢꦴꦪ ꦮꦠ꧀ꦠꦺꦪ꧀ꦪꦴ’’ꦠꦶ ꦆꦩꦁ (ꦕꦹꦭ꦳ꦮ. ꧔꧔꧒) ꦠꦤ꧀ꦠꦶꦁ ꦜꦥꦺꦤ꧀ꦠꦺꦴ ꦄꦴꦪꦱ꧀ꦩꦴ ꦩꦲꦴꦏꦱ꧀ꦱꦥꦺꦴ ꦮꦶꦪ ꦕ.

ꦡꦶꦫꦨꦴꦮꦥ꧀ꦥꦠ꧀ꦠꦴꦠꦶ ꦱꦴꦱꦤꦺ ꦡꦶꦫꦨꦴꦮꦁ ꦄꦤꦶꦮꦠ꧀ꦠꦶꦠꦨꦴꦮꦁ ꦈꦥꦒꦠꦴ. ꦡꦺꦫꦏꦴꦫꦏꦺꦲꦷꦠꦶ ꦡꦺꦫꦨꦴꦮꦱꦴꦣꦏꦺꦲꦶ ꦱꦷꦭꦴꦢꦶꦒꦸꦟꦺꦲꦶ ꦄꦱꦺꦏ꧀ꦑꦣꦩ꧀ꦩꦺꦲꦶ. ꦧꦲꦹ ꦫꦠ꧀ꦠꦶꦪꦺꦴꦠꦶ ꦥꦧ꧀ꦧꦗꦶꦠꦴ ꦲꦸꦠ꧀ꦮꦴ ꦧꦲꦹ ꦫꦠ꧀ꦠꦶꦪꦺꦴ ꦗꦴꦤꦤ꧀ꦠꦶ. ꦱꦷꦭꦴꦢꦶꦒꦸꦟꦺꦱꦸ ꦥꦠꦶꦛ꧀ꦜꦴꦥꦤꦩꦺꦮ ꦱꦴꦱꦤꦺ ꦥꦫꦶꦟꦴꦪꦏꦠꦴꦠꦶ ꦄꦴꦲ ‘‘ꦠꦷꦱꦸ ꦱꦶꦏ꧀ꦑꦴꦱꦸ ꦥꦮꦠ꧀ꦠꦺꦤ꧀ꦠꦷ’’ꦠꦶ. ꦎꦮꦴꦢꦁ ꦤ ꦢꦺꦤ꧀ꦠꦶ ꦄꦨꦴꦗꦤꦨꦴꦮꦠꦺꦴ. ꦥꦮꦺꦟꦶꦏꦡꦤ꧀ꦠꦶ ꦄꦴꦕꦫꦶꦪꦥꦫꦩ꧀ꦥꦫꦴꦨꦠꦁ ꦱꦩ꧀ꦩꦴꦥꦛꦶꦥꦠ꧀ꦠꦶꦢꦷꦥꦤꦁ ꦣꦩ꧀ꦩꦏꦡꦁ. ꦱꦴꦫꦨꦹꦠꦁ ꦣꦩ꧀ꦩꦥꦫꦶꦪꦴꦪꦤ꧀ꦠꦶ ꦱꦩꦡꦮꦶꦥꦱ꧀ꦱꦤꦴꦩꦒ꧀ꦒꦦꦭꦱꦩ꧀ꦥꦴꦥꦤꦺꦤ ꦱꦴꦱꦤꦺ ꦱꦴꦫꦨꦹꦠꦁ ꦧꦺꦴꦗ꧀ꦙꦔ꧀ꦒꦏꦺꦴꦱꦭ꧀ꦭꦄꦤꦸꦠ꧀ꦠꦫꦱꦷꦠꦶꦨꦴꦮ- (ꦄ. ꦤꦶ. ꧖.꧘꧕) ꦄꦣꦶꦕꦶꦠ꧀ꦠꦱꦸꦠ꧀ꦠꦴꦢꦶꦣꦩ꧀ꦩꦠꦤ꧀ꦠꦶꦁ. ꦄꦴꦢꦶꦏꦁ ꦎꦮꦴꦢꦤ꧀ꦠꦶ ꦄꦴꦢꦶ-ꦱꦢ꧀ꦢꦺꦤ ‘‘ꦌꦮꦁ ꦠꦺ ꦄꦴꦭꦺꦴꦏꦺꦠꦧ꧀ꦧꦁ, ꦌꦮꦁ ꦠꦺ ꦮꦶꦭꦺꦴꦏꦺꦠꦧ꧀ꦧꦁ, ꦌꦮꦁ ꦠꦺ ꦱꦩꦶꦚ꧀ꦗꦶꦠꦧ꧀ꦧꦁ, ꦌꦮꦁ ꦠꦺ ꦥꦱꦴꦫꦺꦠꦧ꧀ꦧꦁ, ꦌꦮꦁ ꦠꦺ ꦱꦔ꧀ꦓꦴꦛꦶꦥꦠ꧀ꦠꦕꦷꦮꦫꦁ ꦣꦴꦫꦺꦠꦧ꧀ꦧ’’ꦤ꧀ꦠꦶ ꦎꦮꦴꦢꦁ ꦱꦔ꧀ꦒꦟ꧀ꦲꦴꦠꦶ.

ꦥꦸꦤꦧ꧀ꦨꦮꦢꦴꦤꦁ ꦥꦸꦤꦧ꧀ꦨꦮꦺꦴ ꦈꦠ꧀ꦠꦫꦥꦢꦭꦺꦴꦥꦺꦤ. ꦆꦠꦫꦺꦠꦶ ꦪꦺ ꦤ ꦥꦕ꧀ꦕꦪꦮꦱꦶꦏꦴ ꦤ ꦄꦴꦩꦶꦱꦕꦏ꧀ꦑꦸꦏꦴ, ꦠꦺ ꦤ ꦒꦕ꧀ꦖꦤ꧀ꦠꦶ ꦠꦟ꧀ꦲꦴꦪ ꦮꦱꦁ.

ꦄꦴꦫꦚ꧀ꦚꦏꦺꦱꦹꦠꦶ ꦄꦫꦚ꧀ꦚꦨꦴꦒꦺꦱꦸ ꦄꦫꦚ꧀ꦚꦥꦫꦶꦪꦴꦥꦤ꧀ꦤꦺꦱꦸ. ꦤꦤꦸ ꦪꦠ꧀ꦡ ꦏꦠ꧀ꦡꦕꦶꦥꦶ ꦠꦟ꧀ꦲꦴ ꦱꦴꦮꦗ꧀ꦗꦴ ꦌꦮꦴꦠꦶ ꦕꦺꦴꦢꦤꦁ ꦱꦤ꧀ꦣꦴꦪꦴꦲ ‘‘ꦒꦴꦩꦤ꧀ꦠꦱꦺꦤꦴꦱꦤꦺꦱꦸ ꦲꦷ’’ꦠꦶꦄꦴꦢꦶ. ꦠꦺꦤ ‘‘ꦄꦤꦸꦠ꧀ꦠꦫꦺꦱꦸ ꦮꦶꦩꦺꦴꦏ꧀ꦑꦺꦱꦸ ꦥꦶꦲꦁ ꦈꦥꦛ꧀ꦜꦴꦥꦪꦠꦺꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦥꦶꦲꦴꦢꦪꦺꦴ ꦥꦶꦪ ꦄꦴꦫꦚ꧀ꦚꦏꦱꦺꦤꦴꦱꦤꦺꦱꦸ ꦱꦴꦭꦪꦠꦴ ꦱꦺꦮꦶꦠꦧ꧀ꦧꦥꦏ꧀ꦑꦶꦏꦴ ꦌꦮꦴꦠꦶ ꦢꦱ꧀ꦱꦺꦠꦶ.

ꦄꦠ꧀ꦠꦤꦴꦮꦴꦠꦶ ꦱꦪꦩꦺꦮ. ꦠꦺꦤ ꦥꦫꦺꦲꦶ ꦄꦤꦸꦱ꧀ꦱꦴꦲꦶꦠꦴꦤꦁ ꦱꦫꦱꦺꦤꦺꦮ ꦄꦤꦴꦒꦠꦴꦤꦁ ꦥꦺꦱꦭꦴꦤꦁ ꦨꦶꦏ꧀ꦑꦹꦤꦁ ꦄꦴꦒꦩꦤꦁ, ꦄꦴꦒꦠꦴꦤꦚ꧀ꦕ ꦦꦴꦱꦸꦮꦶꦲꦴꦫꦁ ꦥꦕ꧀ꦕꦴꦱꦷꦱꦤ꧀ꦠꦷꦠꦶ ꦢꦱ꧀ꦱꦺꦠꦶ. ꦆꦩꦶꦤꦴꦮ ꦤꦷꦲꦴꦫꦺꦤꦴꦠꦶ ꦆꦩꦴꦪ ꦥꦛꦶꦥꦠ꧀ꦠꦶꦪꦴ. ꦄꦒ꧀ꦒꦲꦶꦠꦣꦩ꧀ꦩꦒ꧀ꦒꦲꦟꦤ꧀ꦠꦶ ꦄꦒ꧀ꦒꦲꦶꦠꦱ꧀ꦱ ꦥꦫꦶꦪꦠ꧀ꦠꦶꦣꦩ꧀ꦩꦱ꧀ꦱ ꦈꦒ꧀ꦒꦲꦟꦁ. ꦒꦲꦶꦠꦱꦗ꧀ꦙꦴꦪꦏꦫꦟꦤ꧀ꦠꦶ ꦈꦒ꧀ꦒꦲꦶꦠꦱ꧀ꦱ ꦱꦸꦛ꧀ꦜꦸ ꦄꦠ꧀ꦡꦕꦶꦤ꧀ꦠꦤꦁ. ꦕꦶꦤ꧀ꦠꦫꦠ꧀ꦡꦺꦴ ꦲꦶ ꦄꦪꦁ ꦱꦗ꧀ꦙꦴꦪꦱꦢ꧀ꦢꦺꦴ. ꦌꦤ꧀ꦠꦷꦠꦶ ꦈꦥꦒꦕ꧀ꦖꦤ꧀ꦠꦶ. ꦤꦶꦱꦷꦢꦤ꧀ꦠꦶ ꦄꦴꦱꦤꦥꦚ꧀ꦚꦴꦥꦤꦴꦢꦶꦤꦴ.

ꦥꦜꦩꦱꦠ꧀ꦠꦏꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔-꧖. ꦢꦸꦠꦶꦪꦱꦠ꧀ꦠꦏꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧔-꧒꧖. ꦕꦠꦸꦠ꧀ꦡꦺ ꦏꦫꦺꦴꦤ꧀ꦠꦺꦴꦪꦺꦮꦴꦠꦶ ꦪꦡꦴꦮꦸꦠ꧀ꦠꦁ ꦠꦶꦫꦕ꧀ꦖꦴꦤꦏꦡꦁ ꦏꦡꦺꦤ꧀ꦠꦺꦴꦪꦺꦮ. ꦄꦠꦶꦫꦕ꧀ꦖꦴꦤꦏꦡꦴꦨꦴꦮꦺꦥꦶ ꦠꦱ꧀ꦱ ꦠꦠ꧀ꦡ ꦠꦥ꧀ꦥꦫꦨꦴꦮꦢꦱ꧀ꦱꦤꦠ꧀ꦡꦁ ꦄꦮꦣꦴꦫꦟꦮꦕꦤꦁ. ꦥꦫꦶꦪꦤ꧀ꦠꦏꦴꦫꦷꦠꦶ ꦱꦥꦫꦶꦪꦤ꧀ꦠꦁ ꦏꦠ꧀ꦮꦴ ꦮꦠ꧀ꦠꦴ. ‘‘ꦥꦫꦶꦪꦤ꧀ꦠꦮꦠꦶꦁ ꦮꦴꦕꦁ ꦨꦴꦱꦶꦠꦴ’’ꦠꦶ (ꦢꦷ. ꦤꦶ. ꧑.꧙, ꧑꧙꧔) ꦲꦶ ꦮꦸꦠ꧀ꦠꦁ. ꦄꦥ꧀ꦥꦨꦱ꧀ꦱꦺꦴꦮꦴꦠꦶ ꦥꦫꦶꦩꦶꦠꦏꦡꦺꦴꦪꦺꦮ ꦌꦏꦤ꧀ꦠꦺꦤ ꦏꦡꦺꦠꦧ꧀ꦧꦱ꧀ꦱꦺꦮ ꦏꦡꦤꦠꦺꦴ. ꦱꦩꦴꦥꦠ꧀ꦠꦶꦱꦩꦴꦥꦗ꧀ꦗꦤꦁ ꦄꦫꦶꦪꦺꦴ ꦠꦸꦟ꧀ꦲꦷꦨꦴꦮꦺꦴ. ꦤꦶꦢ꧀ꦢꦴꦪꦠꦶꦪꦺꦮꦴꦠꦶ ꦤꦶꦢ꧀ꦢꦺꦴꦏ꧀ꦏꦩꦤꦺ ꦄꦤꦴꦢꦷꦤꦮꦢꦱ꧀ꦱꦷ ꦤꦶꦢ꧀ꦢꦴꦪꦠꦶꦪꦺꦮ, ꦆꦫꦶꦪꦴꦥꦡꦥꦫꦶꦮꦠ꧀ꦠꦤꦴꦢꦶꦤꦴ ꦤ ꦤꦁ ꦮꦶꦤꦺꦴꦢꦺꦠꦶ. ꦌꦮꦁ ꦱꦁꦱꦛ꧀ꦜꦺꦴꦮꦴꦠꦶ ꦮꦸꦠ꧀ꦠꦤꦪꦺꦤ ꦒꦟꦱꦔ꧀ꦒꦟꦶꦏꦴꦪ ꦱꦁꦱꦛ꧀ꦜꦺꦴ ꦌꦮ ꦮꦶꦲꦫꦠꦶ. ꦢꦸꦱ꧀ꦱꦷꦭꦴ ꦥꦴꦥꦶꦕ꧀ꦖꦴ ꦤꦴꦩꦴꦠꦶ ꦱꦪꦁ ꦤꦶꦱ꧀ꦱꦷꦭꦴ ꦄꦱꦤ꧀ꦠꦒꦸꦟꦱꦩ꧀ꦨꦴꦮꦤꦶꦕ꧀ꦖꦴꦪ ꦱꦩꦤ꧀ꦤꦴꦒꦠꦠ꧀ꦠꦴ ꦥꦴꦥꦴ ꦭꦴꦩꦏꦴ ꦆꦕ꧀ꦖꦴ ꦌꦠꦺꦱꦤ꧀ꦠꦶ ꦥꦴꦥꦶꦕ꧀ꦖꦴ. ꦥꦴꦥꦥꦸꦒ꧀ꦒꦭꦺꦲꦶ ꦩꦶꦠ꧀ꦠꦶꦏꦫꦟꦠꦺꦴ ꦥꦴꦥꦩꦶꦠ꧀ꦠꦴ. ꦠꦺꦲꦶ ꦱꦢꦴ ꦱꦲꦥꦮꦠ꧀ꦠꦤꦺꦤ ꦥꦴꦥꦱꦲꦴꦪꦴ. ꦠꦠ꧀ꦡ ꦤꦶꦤ꧀ꦤꦠꦴꦢꦶꦤꦴ ꦠꦢꦣꦶꦩꦸꦠ꧀ꦠꦠꦴꦪ ꦥꦴꦥꦱꦩ꧀ꦥꦮꦔ꧀ꦏꦴ. ꦥꦚ꧀ꦕꦩꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦶꦪꦺꦮ.

ꦢꦸꦠꦶꦪꦱꦠ꧀ꦠꦏꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗-꧑꧑. ꦱꦚ꧀ꦚꦴꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧒꧗-꧓꧑. ꦱꦠ꧀ꦠꦩꦺ ꦄꦤꦶꦕ꧀ꦕꦴꦠꦶ ꦄꦤꦸꦥꦱ꧀ꦱꦠꦶ ꦌꦠꦴꦪꦴꦠꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ. ꦠꦡꦴꦥꦮꦠ꧀ꦠꦮꦶꦥꦱ꧀ꦱꦤꦴ ꦥꦤ ꦪꦱ꧀ꦩꦴ ꦄꦠ꧀ꦠꦤꦴ ꦱꦲꦒꦠꦱꦚ꧀ꦚꦴꦪ ꦨꦴꦮꦶꦠꦴꦪ ꦨꦴꦮꦶꦠꦴ ꦌꦮ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦢꦷꦲꦶ ꦱꦲꦒꦠꦱꦚ꧀ꦚꦴ’’ꦠꦶ. ꦆꦩꦴ ꦱꦠ꧀ꦠ ꦭꦺꦴꦏꦶꦪꦮꦶꦥꦱ꧀ꦱꦤꦴꦥꦶ ꦲꦺꦴꦤ꧀ꦠꦶ ‘‘ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦥꦮꦠ꧀ꦠꦤꦠꦺꦴ. ‘‘ꦌꦠꦁ ꦱꦤ꧀ꦠꦁ ꦌꦠꦁ ꦥꦟꦷꦠꦁ ꦪꦢꦶꦢꦁ ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴ’’ꦠꦶ ꦄꦴꦒꦠꦮꦱꦺꦤ ꦥꦤꦺꦠ꧀ꦡ ꦢ꧀ꦮꦺ ꦭꦺꦴꦏꦸꦠ꧀ꦠꦫꦴ ꦲꦺꦴꦤ꧀ꦠꦷꦠꦶ ꦮꦺꦢꦶꦠꦧ꧀ꦧꦴ. ‘‘ꦮꦶꦫꦴꦒꦺꦴ ꦤꦶꦫꦺꦴꦣꦺꦴ’’ꦠꦶ ꦲꦶ ꦠꦠ꧀ꦡ ꦤꦶꦧ꧀ꦧꦴꦤꦁ ꦮꦸꦠ꧀ꦠꦤ꧀ꦠꦶ ꦆꦣ ꦮꦶꦫꦴꦒꦱꦚ꧀ꦚꦴ, ꦠꦴ ꦮꦸꦠ꧀ꦠꦱꦚ꧀ꦚꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦴꦥꦶ ꦱꦶꦪꦸꦁ. ꦱꦺꦱꦩꦺꦠ꧀ꦡ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦄꦛ꧀ꦜꦩꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ.

ꦱꦚ꧀ꦚꦴꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦮꦗ꧀ꦗꦶꦱꦠ꧀ꦠꦏꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔. ꦢꦺꦮꦠꦴꦮꦒ꧀ꦒꦺꦴ

꧕. ꦥꦜꦩꦩꦶꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧓꧖. ꦕꦠꦸꦠ꧀ꦡꦱ꧀ꦱ ꦥꦚ꧀ꦕꦩꦺ ꦄꦠ꧀ꦠꦤꦺꦴ ꦒꦸꦪ꧀ꦲꦁ ꦠꦱ꧀ꦱ ꦄꦴꦮꦶꦏꦫꦺꦴꦠꦷꦠꦶ ꦄꦠ꧀ꦠꦤꦺꦴ ꦒꦸꦪ꧀ꦲꦁ ꦤꦶꦒ꧀ꦒꦸꦲꦶꦠꦸꦁ ꦪꦸꦠ꧀ꦠꦏꦡꦁ ꦄꦚ꧀ꦚꦱ꧀ꦱ ꦄꦏꦡꦺꦠ꧀ꦮꦴ ꦠꦱ꧀ꦱꦺꦮ ꦄꦴꦕꦶꦏ꧀ꦑꦠꦶ. ꦠꦱ꧀ꦱ ꦒꦸꦪ꧀ꦲꦁ ꦄꦚ꧀ꦚꦺꦱꦁ ꦤꦴꦕꦶꦏ꧀ꦑꦠꦷꦠꦶ ꦠꦺꦤ ꦏꦡꦶꦠꦒꦸꦪ꧀ꦲꦁ ꦪꦡꦴ ꦄꦚ꧀ꦚꦺ ꦤ ꦗꦴꦤꦤ꧀ꦠꦶ, ꦌꦮꦁ ꦄꦤꦴꦮꦶꦏꦫꦺꦴꦤ꧀ꦠꦺꦴ ꦖꦴꦢꦺꦠꦶ.

ꦥꦜꦩꦩꦶꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖-꧑꧑. ꦢꦸꦠꦶꦪꦩꦶꦠ꧀ꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧓꧗-꧔꧒. ꦖꦛ꧀ꦜꦺ ꦥꦶꦪꦺꦴ ꦕ ꦲꦺꦴꦠꦶ ꦩꦤꦴꦥꦺꦴ ꦕꦴꦠꦶ ꦏꦭ꧀ꦪꦴꦟꦩꦶꦠ꧀ꦠꦭꦏ꧀ꦑꦟꦁ ꦢꦱ꧀ꦱꦶꦠꦁ. ꦏꦭ꧀ꦪꦴꦟꦩꦶꦠ꧀ꦠꦺꦴ ꦲꦶ ꦱꦢ꧀ꦣꦴꦱꦩ꧀ꦥꦤ꧀ꦤꦺꦴ ꦕ ꦲꦺꦴꦠꦶ ꦱꦷꦭꦱꦩ꧀ꦥꦤ꧀ꦤꦺꦴ ꦱꦸꦠꦱꦩ꧀ꦥꦤ꧀ꦤꦺꦴ ꦕꦴꦒꦱꦩ꧀ꦥꦤ꧀ꦤꦺꦴ ꦮꦷꦫꦶꦪꦱꦩ꧀ꦥꦤ꧀ꦤꦺꦴ ꦱꦠꦶꦱꦩ꧀ꦥꦤ꧀ꦤꦺꦴ ꦱꦩꦴꦣꦶꦱꦩ꧀ꦥꦤ꧀ꦤꦺꦴ ꦥꦚ꧀ꦚꦴꦱꦩ꧀ꦥꦤ꧀ꦤꦺꦴ. ꦠꦠ꧀ꦡ ꦱꦢ꧀ꦣꦴꦱꦩ꧀ꦥꦠ꧀ꦠꦶꦪꦴ ꦱꦢ꧀ꦢꦲꦠꦶ ꦠꦡꦴꦒꦠꦱ꧀ꦱ ꦱꦩ꧀ꦧꦺꦴꦣꦶꦁ ꦏꦩ꧀ꦩꦚ꧀ꦕ ꦏꦩ꧀ꦩꦦꦭꦚ꧀ꦕ, ꦠꦺꦤ ꦱꦩ꧀ꦧꦺꦴꦣꦶꦪꦴ ꦲꦺꦠꦸꦨꦹꦠꦁ ꦱꦠ꧀ꦠꦺꦱꦸ ꦲꦶꦠꦱꦸꦑꦁ ꦤ ꦥꦫꦶꦕ꧀ꦕꦗꦠꦶ. ꦱꦷꦭꦱꦩ꧀ꦥꦠ꧀ꦠꦶꦪꦴ ꦱꦠ꧀ꦠꦴꦤꦁ ꦥꦶꦪꦺꦴ ꦲꦺꦴꦠꦶ ꦒꦫꦸ ꦨꦴꦮꦤꦷꦪꦺꦴ ꦕꦺꦴꦢꦏꦺꦴ ꦥꦴꦥꦒꦫꦲꦷ ꦮꦠ꧀ꦠꦴ ꦮꦕꦤꦏ꧀ꦑꦩꦺꦴ. ꦱꦸꦠꦱꦩ꧀ꦥꦠ꧀ꦠꦶꦪꦴ ꦱꦕ꧀ꦕꦥꦛꦶꦕ꧀ꦕꦱꦩꦸꦥ꧀ꦥꦴꦢꦴꦢꦶꦥꦛꦶꦱꦁꦪꦸꦠ꧀ꦠꦴꦤꦁ ꦒꦩ꧀ꦨꦷꦫꦴꦤꦁ ꦏꦡꦴꦤꦁ ꦏꦠ꧀ꦠꦴ ꦲꦺꦴꦠꦶ. ꦕꦴꦒꦱꦩ꧀ꦥꦠ꧀ꦠꦶꦪꦴ ꦄꦥ꧀ꦥꦶꦕ꧀ꦖꦺꦴ ꦲꦺꦴꦠꦶ ꦱꦤ꧀ꦠꦸꦛ꧀ꦜꦺꦴ ꦥꦮꦶꦮꦶꦠ꧀ꦠꦺꦴ ꦄꦱꦁꦱꦛ꧀ꦜꦺꦴ. ꦮꦷꦫꦶꦪꦱꦩ꧀ꦥꦠ꧀ꦠꦶꦪꦴ ꦄꦴꦫꦢ꧀ꦣꦮꦷꦫꦶꦪꦺꦴ ꦲꦺꦴꦠꦶ ꦄꦠ꧀ꦠꦲꦶꦠꦥꦫꦲꦶꦠꦥꦛꦶꦥꦠ꧀ꦠꦶꦪꦁ. ꦱꦠꦶꦱꦩ꧀ꦥꦠ꧀ꦠꦶꦪꦴ ꦈꦥꦛ꧀ꦜꦶꦠꦱ꧀ꦱꦠꦷ ꦲꦺꦴꦠꦶ. ꦱꦩꦴꦣꦶꦱꦩ꧀ꦥꦠ꧀ꦠꦶꦪꦴ ꦄꦮꦶꦏ꧀ꦑꦶꦠ꧀ꦠꦺꦴ ꦲꦺꦴꦠꦶ ꦱꦩꦴꦲꦶꦠꦕꦶꦠꦺꦴ. ꦥꦚ꧀ꦚꦴꦱꦩ꧀ꦥꦠ꧀ꦠꦶꦪꦴ ꦄꦮꦶꦥꦫꦷꦠꦁ ꦥꦗꦴꦤꦴꦠꦶ. ꦱꦺꦴ ꦱꦠꦶꦪꦴ ꦏꦸꦱꦭꦴꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦒꦠꦶꦪꦺꦴ ꦱꦩꦤ꧀ꦤꦺꦱꦩꦴꦤꦺꦴ ꦥꦚ꧀ꦚꦴꦪ ꦱꦠ꧀ꦠꦴꦤꦁ ꦲꦶꦠꦴꦲꦶꦠꦁ ꦪꦡꦴꦨꦹꦠꦁ ꦗꦴꦤꦶꦠ꧀ꦮꦴ ꦱꦩꦴꦣꦶꦤꦴ ꦠꦠ꧀ꦡ ꦌꦏꦒ꧀ꦒꦕꦶꦠ꧀ꦠꦺꦴ ꦲꦸꦠ꧀ꦮꦴ ꦮꦷꦫꦶꦪꦺꦤ ꦱꦠ꧀ꦠꦺ ꦄꦲꦶꦠꦺ ꦤꦶꦱꦺꦣꦺꦠ꧀ꦮꦴ ꦲꦶꦠꦺ ꦤꦶꦪꦺꦴꦗꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦥꦶꦪꦺꦴ…ꦥꦺ… ꦤꦶꦪꦺꦴꦗꦺꦠꦷ’’ꦠꦶ. ꦱꦠ꧀ꦠꦩꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦶ.

ꦢꦸꦠꦶꦪꦩꦶꦠ꧀ꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦺꦮꦠꦴꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦩꦲꦴꦪꦚ꧀ꦚꦮꦒ꧀ꦒꦺꦴ

꧑. ꦱꦠ꧀ꦠꦮꦶꦚ꧀ꦚꦴꦟꦛ꧀ꦜꦶꦠꦶꦱꦸꦠ꧀ꦠꦮꦟ꧀ꦟꦤꦴ

꧔꧔. ꦥꦚ꧀ꦕꦩꦱ꧀ꦱ ꦥꦜꦩꦺ ꦪꦱ꧀ꦩꦴ ꦤꦶꦢꦱ꧀ꦱꦤꦠ꧀ꦡꦺ ꦤꦶꦥꦴꦠꦺꦴ (ꦢꦷ. ꦤꦶ. ꦛꦷ. ꧒.꧑꧒꧗) ꦠꦱ꧀ꦩꦴ ꦱꦺꦪ꧀ꦪꦡꦴꦥꦶ ꦩꦤꦸꦱ꧀ꦱꦴꦠꦶ ꦪꦡꦴ ꦩꦤꦸꦱ꧀ꦱꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦶꦱꦺꦱꦺꦴ ꦲꦺꦴꦠꦶꦪꦺꦮ ꦱꦠꦶꦥꦶ ꦧꦴꦲꦶꦫꦱ꧀ꦱ ꦏꦴꦫꦟꦱ꧀ꦱ ꦄꦨꦺꦢꦺ ꦄꦗ꧀ꦙꦠ꧀ꦠꦶꦏꦱ꧀ꦱ ꦨꦶꦤ꧀ꦤꦠ꧀ꦠꦴ. ꦤꦴꦤꦠ꧀ꦠꦁ ꦏꦴꦪꦺ ꦌꦠꦺꦱꦁ, ꦤꦴꦤꦠ꧀ꦠꦺꦴ ꦮꦴ ꦏꦴꦪꦺꦴ ꦌꦠꦺꦱꦤ꧀ꦠꦶ ꦤꦴꦤꦠ꧀ꦠꦏꦴꦪꦴ. ꦆꦩꦶꦤꦴ ꦤꦪꦺꦤ ꦱꦺꦱꦥꦢꦺꦱꦸꦥꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦤꦺꦱꦤ꧀ꦠꦶ ꦩꦤꦸꦱ꧀ꦱꦴꦤꦁ. ꦤꦴꦤꦠ꧀ꦠꦴ ꦱꦚ꧀ꦚꦴ ꦌꦠꦺꦱꦁ ꦄꦠ꧀ꦡꦷꦠꦶ ꦤꦴꦤꦠ꧀ꦠꦱꦚ꧀ꦚꦶꦤꦺꦴ. ꦱꦸꦑꦱꦩꦸꦱ꧀ꦱꦪꦠꦺꦴ ꦮꦶꦤꦶꦥꦴꦠꦺꦴ ꦌꦠꦺꦱꦁ ꦄꦠ꧀ꦡꦷꦠꦶ ꦮꦶꦤꦶꦥꦴꦠꦶꦏꦴ ꦱꦠꦶꦥꦶ ꦢꦺꦮꦨꦴꦮꦺ ꦢꦶꦧ꧀ꦧꦱꦩ꧀ꦥꦠ꧀ꦠꦶꦪꦴ ꦄꦨꦴꦮꦠꦺꦴ. ꦄꦥꦴꦪꦺꦱꦸ ꦮꦴ ꦒꦠꦺꦴ ꦤꦠ꧀ꦡꦶ ꦤꦶꦥꦴꦠꦺꦴ ꦌꦠꦺꦱꦤ꧀ꦠꦶ ꦮꦶꦤꦶꦥꦴꦠꦶꦏꦴ. ꦠꦺꦤꦴꦲ ‘‘ꦕꦠꦸꦄꦥꦴꦪꦮꦶꦤꦶꦩꦸꦠ꧀ꦠꦴ’’ꦠꦶ. ꦥꦶꦪꦔ꧀ꦏꦫꦩꦴꦠꦴꦢꦷꦤꦁ ꦮꦶꦪꦴꦠꦶ ꦥꦶꦪꦔ꧀ꦏꦫꦩꦴꦠꦴ ꦏꦶꦫ ꦪꦏ꧀ꦑꦶꦤꦷ ꦥꦕ꧀ꦕꦹꦱꦱꦩꦪꦺ ꦄꦤꦸꦫꦸꦢ꧀ꦣꦠ꧀ꦡꦺꦫꦱ꧀ꦱ ꦣꦩ꧀ꦩꦁ ꦱꦗ꧀ꦙꦴꦪꦠꦺꦴ ꦱꦸꦠ꧀ꦮꦴ –

‘‘ꦩꦴ ꦱꦢ꧀ꦢꦩꦏꦫꦷ ꦥꦶꦪꦔ꧀ꦏꦫ, ꦨꦶꦏ꧀ꦑꦸ ꦣꦩ꧀ꦩꦥꦢꦴꦤꦶ ꦨꦴꦱꦠꦶ;

ꦄꦥꦶ ꦣꦩ꧀ꦩꦥꦢꦁ ꦮꦶꦗꦴꦤꦶꦪ, ꦥꦛꦶꦥꦗ꧀ꦗꦺꦩ ꦲꦶꦠꦴꦪ ꦤꦺꦴ ꦱꦶꦪꦴ.

‘‘ꦥꦴꦟꦺꦱꦸ ꦕ ꦱꦁꦪꦩꦴꦩꦱꦺ, ꦱꦩ꧀ꦥꦗꦴꦤꦩꦸꦱꦴ ꦤ ꦨꦟꦴꦩꦱꦺ;

ꦱꦶꦏ꧀ꦑꦺꦩ ꦱꦸꦱꦷꦭ꧀ꦪꦩꦠ꧀ꦠꦤꦺꦴ, ꦄꦥꦶ ꦩꦸꦕ꧀ꦕꦺꦩ ꦥꦶꦱꦴꦕꦪꦺꦴꦤꦶꦪꦴ’’ꦠꦶ. (ꦱꦁ. ꦤꦶ. ꧑.꧒꧔꧐) –

ꦌꦮꦁ ꦥꦸꦠ꧀ꦠꦏꦁ ꦱꦚ꧀ꦚꦴꦥꦺꦠ꧀ꦮꦴ ꦠꦁ ꦢꦶꦮꦱꦁ ꦱꦺꦴꦠꦴꦥꦠ꧀ꦠꦶꦦꦭꦁ ꦥꦠ꧀ꦠꦴ. ꦈꦠ꧀ꦠꦫꦩꦴꦠꦴ ꦥꦤ ꦨꦒꦮꦠꦺꦴ ꦣꦩ꧀ꦩꦁ ꦱꦸꦠ꧀ꦮꦴꦮ ꦱꦺꦴꦠꦴꦥꦤ꧀ꦤꦴ ꦗꦴꦠꦴ.

ꦧ꧀ꦫꦲ꧀ꦩꦏꦴꦪꦺ ꦥꦜꦩꦗ꧀ꦙꦴꦤꦤꦶꦧ꧀ꦧꦠ꧀ꦠꦺ ꦧ꧀ꦫꦲ꧀ꦩꦱꦩꦹꦲꦺ, ꦧ꧀ꦫꦲ꧀ꦩꦤꦶꦏꦴꦪꦺ ꦮꦴ ꦨꦮꦴꦠꦶ ꦧ꧀ꦫꦲ꧀ꦩꦏꦴꦪꦶꦏꦴ. ꦩꦲꦴꦧ꧀ꦫꦲ꧀ꦩꦸꦤꦺꦴ ꦥꦫꦶꦱꦴꦪ ꦨꦮꦴꦠꦶ ꦧ꧀ꦫꦲ꧀ꦩꦥꦴꦫꦶꦱꦗ꧀ꦗꦴ ꦠꦱ꧀ꦱ ꦥꦫꦶꦕꦴꦫꦏꦛ꧀ꦜꦴꦤꦺ ꦜꦶꦠꦠ꧀ꦠꦴ. ꦩꦲꦴꦧ꧀ꦫꦲ꧀ꦩꦸꦤꦺꦴ ꦥꦸꦫꦺꦴꦲꦶꦠꦛ꧀ꦜꦴꦤꦺ ꦜꦶꦠꦴꦠꦶ ꦧ꧀ꦫꦲ꧀ꦩꦥꦸꦫꦺꦴꦲꦶꦠꦴ. ꦄꦴꦪꦸꦮꦟ꧀ꦟꦴꦢꦷꦲꦶ ꦩꦲꦤ꧀ꦠꦴ ꦧ꧀ꦫꦲ꧀ꦩꦴꦤꦺꦴꦠꦶ ꦩꦲꦴꦧ꧀ꦫꦲ꧀ꦩꦴꦤꦺꦴ. ꦱꦠꦶꦥꦶ ꦠꦺꦱꦁ ꦠꦶꦮꦶꦣꦴꦤꦩ꧀ꦥꦶ ꦥꦜꦩꦺꦤ ꦙꦴꦤꦺꦤ ꦒꦤ꧀ꦠ꧀ꦮꦴ ꦤꦶꦧ꧀ꦧꦠ꧀ꦠꦨꦴꦮꦺ ꦙꦴꦤꦱ꧀ꦱ ꦥꦤ ꦥꦮꦠ꧀ꦠꦶꦨꦺꦢꦺꦤ ꦄꦪꦁ ꦮꦶꦱꦺꦱꦺꦴꦠꦶ ꦢꦱ꧀ꦱꦺꦠꦸꦁ ‘‘ꦧ꧀ꦫꦲ꧀ꦩꦥꦴꦫꦶꦱꦗ꧀ꦗꦴ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦫꦶꦠ꧀ꦠꦺꦤꦴꦠꦶ ꦲꦷꦤꦺꦤ. ꦱꦴ ꦕꦱ꧀ꦱ ꦲꦷꦤꦠꦴ ꦖꦤ꧀ꦢꦴꦢꦷꦤꦁ ꦲꦷꦤꦠꦴꦪ ꦮꦺꦢꦶꦠꦧ꧀ꦧꦴ. ꦥꦛꦶꦭꦢ꧀ꦣꦩꦠ꧀ꦠꦁ ꦮꦴ ꦲꦷꦤꦁ. ꦏꦥ꧀ꦥꦱ꧀ꦱꦴꦠꦶ ꦄꦱꦔ꧀ꦑ꧀ꦪꦺꦪ꧀ꦪꦏꦥ꧀ꦥꦱ꧀ꦱ. ꦲꦷꦤꦥꦟꦷꦠꦴꦤꦁ ꦩꦗ꧀ꦙꦺ ꦨꦮꦠ꧀ꦠꦴ ꦩꦗ꧀ꦙꦶꦩꦁ. ꦱꦴ ꦕꦱ꧀ꦱ ꦩꦗ꧀ꦙꦶꦩꦠꦴ ꦖꦤ꧀ꦢꦴꦢꦷꦤꦁ ꦩꦗ꧀ꦙꦶꦩꦠꦴꦪ ꦮꦺꦢꦶꦠꦧ꧀ꦧꦴ. ꦥꦛꦶꦭꦨꦶꦠ꧀ꦮꦴ ꦤꦴꦠꦶꦱꦸꦨꦴꦮꦶꦠꦁ ꦮꦴ ꦩꦗ꧀ꦙꦶꦩꦁ. ꦈꦥꦝ꧀ꦞꦏꦥ꧀ꦥꦺꦴꦠꦶ ꦄꦱꦔ꧀ꦑ꧀ꦪꦺꦪ꧀ꦪꦏꦥ꧀ꦥꦱ꧀ꦱ ꦈꦥꦝ꧀ꦞꦏꦥ꧀ꦥꦺꦴ. ꦮꦶꦥ꧀ꦦꦴꦫꦶꦏꦠꦫꦺꦴꦠꦶ ꦧ꧀ꦫꦲ꧀ꦩꦥꦴꦫꦶꦱꦗ꧀ꦗꦺꦲꦶ ꦥꦩꦴꦟꦠꦺꦴ ꦮꦶꦥꦸꦭꦠꦫꦺꦴ ꦱꦨꦴꦮꦠꦺꦴ ꦈꦭ꦳ꦴꦫꦠꦫꦺꦴ ꦕ ꦲꦺꦴꦠꦶ. ꦱꦨꦴꦮꦺꦤꦥꦶ ꦲꦶ ꦈꦭ꦳ꦴꦫꦠꦩꦺꦴꦮ. ꦠꦁ ꦥꦤꦺꦠ꧀ꦡ ꦄꦥ꧀ꦥꦩꦴꦟꦁ. ꦠꦱ꧀ꦱ ꦲꦶ ꦥꦫꦶꦠ꧀ꦠꦴꦨꦴꦢꦷꦤꦁ ꦥꦫꦶꦠ꧀ꦠꦱꦸꦨꦴꦢꦷꦤꦚ꧀ꦕ ꦏꦴꦪꦺ ꦱꦠꦶꦥꦶ ꦱꦨꦴꦮꦮꦺꦩꦠ꧀ꦠꦺ ꦌꦏꦠ꧀ꦠꦮꦱꦺꦤꦺꦮ ꦮꦮꦠ꧀ꦡꦥꦷꦪꦠꦷꦠꦶ ‘‘ꦌꦏꦠ꧀ꦠꦏꦴꦪꦴ’’ꦠ꧀ꦮꦺꦮ ꦠꦺ ꦮꦸꦕ꧀ꦕꦤ꧀ꦠꦶ. ꦥꦟꦷꦠꦺꦤꦴꦠꦶ ꦈꦏ꧀ꦏꦛ꧀ꦜꦺꦤ. ꦱꦴ ꦕꦱ꧀ꦱ ꦈꦏ꧀ꦏꦛ꧀ꦜꦠꦴ ꦖꦤ꧀ꦢꦴꦢꦷꦤꦁ ꦈꦏ꧀ꦏꦛ꧀ꦜꦠꦴꦪ ꦮꦺꦢꦶꦠꦧ꧀ꦧꦴ. ꦱꦸꦨꦴꦮꦶꦠꦁ ꦮꦴ, ꦱꦩ꧀ꦩꦢꦺꦮ, ꦮꦱꦶꦨꦴꦮꦁ ꦥꦴꦥꦶꦠꦁ ꦥꦟꦷꦠꦁ ‘‘ꦥꦣꦴꦤꦨꦴꦮꦁ ꦤꦷꦠ’’ꦤ꧀ꦠꦶ ꦏꦠ꧀ꦮꦴ. ꦆꦣꦴꦥꦶ ꦏꦥ꧀ꦥꦺꦴ ꦄꦱꦔ꧀ꦑ꧀ꦪꦺꦪ꧀ꦪꦏꦥ꧀ꦥꦮꦱꦺꦤꦺꦮ ꦮꦺꦢꦶꦠꦧ꧀ꦧꦺꦴ ꦥꦫꦶꦥꦸꦟ꧀ꦟꦩꦲꦴꦏꦥ꧀ꦥꦱ꧀ꦱ ꦄꦱꦩ꧀ꦨꦮꦠꦺꦴ. ꦆꦠꦷꦠꦶ ꦌꦮꦁ ꦮꦸꦠ꧀ꦠꦥ꧀ꦥꦏꦴꦫꦺꦤ. ꦠꦺꦠꦶ ‘‘ꦧ꧀ꦫꦲ꧀ꦩꦏꦴꦪꦶꦏꦴ’’ꦠꦶ ꦮꦸꦠ꧀ꦠꦴ ꦠꦶꦮꦶꦣꦴꦥꦶ ꦧ꧀ꦫꦲ꧀ꦩꦴꦤꦺꦴ. ꦱꦚ꧀ꦚꦴꦪ ꦌꦏꦠ꧀ꦠꦴꦠꦶ ꦠꦶꦲꦺꦠꦸꦏꦨꦴꦮꦺꦤ ꦌꦏꦱꦨꦴꦮꦠ꧀ꦠꦴ. ꦤ ꦲꦶ ꦠꦱ꧀ꦱꦴ ꦱꦩ꧀ꦥꦪꦸꦠ꧀ꦠꦣꦩ꧀ꦩꦮꦱꦺꦤ ꦄꦚ꧀ꦚꦺꦴꦥꦶ ꦏꦺꦴꦕꦶ ꦨꦺꦢꦺꦴ ꦄꦠ꧀ꦡꦶ. ꦌꦮꦤ꧀ꦠꦶ ꦆꦩꦶꦤꦴ ꦤꦴꦤꦠ꧀ꦠꦏꦴꦪꦴ ꦌꦏꦠ꧀ꦠꦱꦚ꧀ꦚꦶꦤꦺꦴ ꦒꦲꦶꦠꦴꦠꦶ ꦢꦱ꧀ꦱꦺꦠꦶ.

ꦢꦟ꧀ꦝꦈꦏ꧀ꦏꦴꦪꦴꦠꦶ ꦢꦟ꧀ꦝꦢꦷꦥꦶꦏꦴꦪ. ꦱꦫꦠꦶ ꦣꦴꦮꦠꦶ, ꦮꦶꦱ꧀ꦱꦫꦠꦶ ꦮꦶꦥ꧀ꦥꦏꦶꦟ꧀ꦟꦴ ꦮꦶꦪ ꦣꦴꦮꦠꦶ. ꦢ꧀ꦮꦺ ꦏꦥ꧀ꦥꦴꦠꦶ ꦢ꧀ꦮꦺ ꦩꦲꦴꦏꦥ꧀ꦥꦴ. ꦆꦠꦺꦴ ꦥꦫꦺꦱꦸꦥꦶ ꦌꦱꦺꦮ ꦤꦪꦺꦴ. ꦆꦣꦴꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺ. ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦮꦱꦺꦤ ꦄꦴꦨꦱ꧀ꦱꦫꦒ꧀ꦒꦲꦟꦺꦤꦺꦮ ꦱꦧ꧀ꦧꦺꦥꦶ ꦠꦺ ꦥꦫꦶꦠ꧀ꦠꦴꦨꦴꦄꦥ꧀ꦥꦩꦴꦟꦴꦨꦴꦥꦶ ꦒꦲꦶꦠꦴ.

ꦱꦸꦤ꧀ꦢꦫꦴ ꦥꦨꦴ ꦱꦸꦨꦴ, ꦠꦴꦪ ꦏꦶꦟ꧀ꦟꦴ ꦱꦸꦨꦴꦏꦶꦟ꧀ꦟꦴꦠꦶ ꦮꦠ꧀ꦠꦧ꧀ꦧꦺ. ꦨꦴ-ꦱꦢ꧀ꦢꦱ꧀ꦱ ꦫꦱ꧀ꦱꦠ꧀ꦠꦁ ꦄꦤ꧀ꦠꦶꦩ-ꦟ-ꦏꦴꦫꦱ꧀ꦱ ꦲ-ꦏꦴꦫꦚ꧀ꦕ ꦏꦠ꧀ꦮꦴ ‘‘ꦱꦸꦨꦏꦶꦟ꧀ꦲꦴ’’ꦠꦶ ꦮꦸꦠ꧀ꦠꦴ. ꦄꦛ꧀ꦜꦏꦡꦴꦪꦁ ꦥꦤ ꦤꦶꦕ꧀ꦕꦭꦴꦪ ꦌꦏꦒ꧀ꦓꦤꦴꦪ ꦥꦨꦴꦪ ꦱꦸꦨꦺꦴꦠꦶ ꦥꦫꦶꦪꦴꦪꦮꦕꦤꦤ꧀ꦠꦶ ‘‘ꦱꦸꦨꦺꦤ ꦎꦏꦶꦟ꧀ꦟꦴ ꦮꦶꦏꦶꦟ꧀ꦟꦴ’’ꦠꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ. ꦌꦠ꧀ꦡꦴꦥꦶ ꦄꦤ꧀ꦠꦶꦩ-ꦟ-ꦏꦴꦫꦱ꧀ꦱ ꦲ-ꦏꦴꦫꦏꦫꦟꦁ ꦆꦕ꧀ꦖꦶꦠꦧ꧀ꦧꦩꦺꦮ. ꦤ ꦖꦶꦗ꧀ꦗꦶꦠ꧀ꦮꦴ ꦥꦨꦴ ꦒꦕ꧀ꦖꦠꦶ ꦌꦏꦒ꧀ꦓꦤꦠ꧀ꦠꦴ. ꦕꦠꦸꦠ꧀ꦡꦮꦶꦚ꧀ꦚꦴꦟꦛ꧀ꦜꦶꦠꦶꦩꦺꦮ ꦨꦗꦤ꧀ꦠꦶ ꦏꦴꦪꦱ꧀ꦱ ꦱꦚ꧀ꦚꦴꦪ ꦕ ꦌꦏꦫꦹꦥꦠ꧀ꦠꦴ. ꦮꦶꦥꦸꦭꦱꦤ꧀ꦠꦱꦸꦑꦴꦪꦸꦮꦟ꧀ꦟꦴꦢꦶꦦꦭꦠ꧀ꦠꦴ ꦮꦺꦲꦥ꧀ꦦꦭꦴ. ꦌꦠ꧀ꦡꦴꦠꦶ ꦮꦶꦚ꧀ꦚꦴꦟꦛ꧀ꦜꦶꦠꦶꦪꦁ.

ꦮꦶꦮꦛ꧀ꦛꦥꦏ꧀ꦑꦺ ꦜꦶꦠꦴ ꦄꦥꦸꦤꦫꦴꦮꦠ꧀ꦠꦤꦠꦺꦴ. ‘‘ꦤ ꦱꦧ꧀ꦧꦏꦴꦭꦶꦏꦴ’’ꦠꦶ ꦮꦠ꧀ꦮꦴ ꦠꦩꦺꦮ ꦄꦱꦧ꧀ꦧꦏꦴꦭꦶꦏꦠ꧀ꦠꦁ ꦮꦶꦨꦴꦮꦺꦠꦸꦁ ‘‘ꦏꦥ꧀ꦥꦱꦠꦱꦲꦱ꧀ꦱꦩ꧀ꦥꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦺꦴꦭ꦳ꦱꦏꦥ꧀ꦥꦱꦲꦱ꧀ꦱꦕ꧀ꦕꦪꦺꦤ ꦈꦥ꧀ꦥꦤ꧀ꦤꦴꦤꦁ ꦱꦸꦢ꧀ꦣꦴꦮꦴꦱꦧ꧀ꦫꦲ꧀ꦩꦴꦤꦁ ꦥꦫꦶꦤꦶꦧ꧀ꦧꦴꦪꦤꦠꦺꦴ ꦄꦚ꧀ꦚꦺꦱꦚ꧀ꦕ ꦠꦠ꧀ꦡ ꦄꦤꦸꦥ꧀ꦥꦗ꧀ꦗꦤꦠꦺꦴ ꦧꦸꦢ꧀ꦣꦱꦸꦚ꧀ꦚꦺ ꦭꦺꦴꦏꦺ ꦱꦸꦚ꧀ꦚꦁ ꦠꦁ ꦜꦴꦤꦁ ꦲꦺꦴꦠꦶ, ꦠꦱ꧀ꦩꦴ ꦱꦸꦢ꧀ꦣꦴꦮꦴꦱꦴ ꦤ ꦱꦧ꧀ꦧꦏꦴꦭꦶꦏꦴ. ꦑꦤ꧀ꦣꦴꦮꦴꦫꦛ꧀ꦜꦴꦤꦱꦢꦶꦱꦴ ꦲꦺꦴꦤ꧀ꦠꦶ ꦱꦸꦢ꧀ꦣꦴꦮꦴꦱꦨꦹꦩꦶꦪꦺꦴ. ꦆꦩꦶꦤꦴ ꦱꦸꦠ꧀ꦠꦺꦤ ꦱꦸꦢ꧀ꦣꦴꦮꦴꦱꦴꦤꦁ ꦱꦠ꧀ꦠꦴꦮꦴꦱꦨꦴꦮꦢꦷꦥꦤꦺꦤꦺꦮ ꦮꦶꦚ꧀ꦚꦴꦟꦛ꧀ꦜꦶꦠꦶꦨꦴꦮꦺꦴꦥꦶ ꦢꦷꦥꦶꦠꦺꦴ ꦲꦺꦴꦠꦶ, ꦠꦱ꧀ꦩꦴ ꦱꦸꦢ꧀ꦣꦴꦮꦴꦱꦴꦥꦶ ꦱꦠ꧀ꦠꦱꦸ ꦮꦶꦚ꧀ꦚꦴꦟꦛ꧀ꦜꦶꦠꦷꦱꦸ ꦕꦠꦸꦠ꧀ꦡꦮꦶꦚ꧀ꦚꦴꦟꦛ꧀ꦜꦶꦠꦶꦁ, ꦤꦮꦱꦸ ꦱꦠ꧀ꦠꦴꦮꦴꦱꦺꦱꦸ ꦕꦠꦸꦠ꧀ꦡꦱꦠ꧀ꦠꦴꦮꦴꦱꦚ꧀ꦕ ꦨꦗꦤ꧀ꦠꦶ.

ꦱꦸꦑꦸꦩꦠ꧀ꦠꦴꦠꦶ ꦱꦔ꧀ꦑꦴꦫꦴꦮꦱꦺꦱꦱꦸꦑꦸꦩꦨꦴꦮꦥ꧀ꦥꦠ꧀ꦠꦠ꧀ꦠꦴ. ꦥꦫꦶꦧ꧀ꦪꦠ꧀ꦠꦮꦶꦚ꧀ꦚꦴꦟꦏꦶꦕ꧀ꦕꦴꦨꦴꦮꦠꦺꦴ ꦤꦺꦮ ꦮꦶꦚ꧀ꦚꦴꦟꦁ, ꦤ ꦱꦧ꧀ꦧꦱꦺꦴ ꦄꦮꦶꦚ꧀ꦚꦴꦟꦁ ꦲꦺꦴꦠꦷꦠꦶ ꦤꦴꦮꦶꦚ꧀ꦚꦴꦟꦁ, ꦠꦱ꧀ꦩꦴ ꦥꦫꦶꦥ꧀ꦦꦸꦠꦮꦶꦚ꧀ꦚꦴꦟꦏꦶꦕ꧀ꦕꦮꦤ꧀ꦠꦷꦱꦸ ꦮꦶꦚ꧀ꦚꦴꦟꦛ꧀ꦜꦶꦠꦷꦱꦸ ꦤ ꦮꦸꦠ꧀ꦠꦁ.

ꦱꦠ꧀ꦠꦮꦶꦚ꧀ꦚꦴꦟꦛ꧀ꦜꦶꦠꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦱꦩꦴꦣꦶꦥꦫꦶꦏ꧀ꦑꦴꦫꦱꦸꦠ꧀ꦠꦮꦟ꧀ꦟꦤꦴ

꧔꧕. ꦢꦸꦠꦶꦪꦺ ꦱꦩꦴꦣꦶꦥꦫꦶꦏ꧀ꦑꦴꦫꦴꦠꦶ ꦌꦠ꧀ꦡ ꦠꦪꦺꦴ ꦥꦫꦶꦏ꧀ꦑꦴꦫꦴ. ‘‘ꦫꦡꦺꦴ ꦱꦷꦭꦥꦫꦶꦏ꧀ꦑꦴꦫꦺꦴ, ꦙꦴꦤꦏ꧀ꦑꦺꦴ ꦕꦏ꧀ꦏꦮꦷꦫꦶꦪꦺꦴ’’ꦠꦶ (ꦱꦁ. ꦤꦶ. ꧕.꧔) ꦲꦶ ꦌꦠ꧀ꦡ ꦄꦭꦔ꧀ꦏꦴꦫꦺꦴ ꦥꦫꦶꦏ꧀ꦑꦴꦫꦺꦴ ꦤꦴꦩ. ‘‘ꦱꦠ꧀ꦠꦲꦶ ꦤꦒꦫꦥꦫꦶꦏ꧀ꦑꦴꦫꦺꦲꦶ ꦱꦸꦥꦫꦶꦏ꧀ꦑꦠꦁ ꦲꦺꦴꦠꦷ’’ꦠꦶ (ꦄ. ꦤꦶ. ꧗.꧖꧗) ꦌꦠ꧀ꦡ ꦥꦫꦶꦮꦴꦫꦺꦴ ꦥꦫꦶꦏ꧀ꦑꦴꦫꦺꦴ ꦤꦴꦩ. ‘‘ꦒꦶꦭꦴꦤꦥꦕ꧀ꦕꦪ…ꦥꦺ… ꦗꦷꦮꦶꦠꦥꦫꦶꦏ꧀ꦑꦴꦫꦴ’’ꦠꦶ (ꦩ. ꦤꦶ. ꧑.꧑꧙꧑-꧑꧙꧒) ꦌꦠ꧀ꦡ ꦱꦩ꧀ꦨꦴꦫꦺꦴ ꦥꦫꦶꦏ꧀ꦑꦴꦫꦺꦴ ꦤꦴꦩ. ꦱꦺꦴ ꦆꦣ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦩꦒ꧀ꦒꦱꦩꦴꦣꦶꦱ꧀ꦱ ꦱꦩ꧀ꦨꦴꦫꦴ’’ꦠꦶ. ꦥꦫꦶꦮꦴꦫꦥꦫꦶꦏ꧀ꦑꦴꦫꦺꦴꦥꦶ ꦮꦛ꧀ꦛꦠꦶꦪꦺꦮ. ꦥꦫꦶꦮꦴꦫꦺꦴ ꦲꦶ ꦱꦩ꧀ꦩꦴꦢꦶꦛ꧀ꦜꦴꦢꦪꦺꦴ ꦩꦒ꧀ꦒꦣꦩ꧀ꦩꦴ ꦱꦩ꧀ꦩꦴꦱꦩꦴꦣꦶꦱ꧀ꦱ ꦱꦲꦗꦴꦠꦴꦢꦶꦥꦕ꧀ꦕꦪꦨꦴꦮꦺꦤ ꦥꦫꦶꦏꦫꦟꦠꦺꦴ ꦄꦨꦶꦱꦔ꧀ꦑꦫꦟꦠꦺꦴ. ꦥꦫꦶꦏ꧀ꦑꦠꦴꦠꦶ ꦥꦫꦶꦮꦴꦫꦶꦠꦴ. ꦄꦪꦁ ꦮꦸꦕ꧀ꦕꦠꦶ ꦄꦫꦶꦪꦺꦴ ꦱꦩ꧀ꦩꦴꦱꦩꦴꦣꦷꦠꦶ ꦄꦪꦁ ꦱꦠ꧀ꦠꦲꦶ ꦫꦠꦤꦺꦲꦶ ꦥꦫꦶꦮꦸꦠꦺꦴ ꦕꦏ꧀ꦏꦮꦠ꧀ꦠꦷ ꦮꦶꦪ ꦱꦠ꧀ꦠꦲꦶ ꦄꦔ꧀ꦒꦺꦲꦶ ꦥꦫꦶꦮꦸꦠꦺꦴ ꦄꦫꦶꦪꦺꦴ ꦱꦩ꧀ꦩꦴꦱꦩꦴꦣꦷꦠꦶ ꦮꦸꦕ꧀ꦕꦠꦶ. ꦈꦥꦺꦕ꧀ꦕ ꦤꦶꦱ꧀ꦱꦷꦪꦠꦷꦠꦶ ꦈꦥꦤꦶꦱꦴ, ꦱꦲ ꦈꦥꦤꦶꦱꦴꦪꦴꦠꦶ ꦱꦈꦥꦤꦶꦱꦺꦴ, ꦱꦈꦥꦤꦶꦱ꧀ꦱꦪꦺꦴ ꦄꦠ꧀ꦡꦺꦴ, ꦱꦥꦫꦶꦮꦴꦫꦺꦴꦪꦺꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦱꦲꦏꦴꦫꦶꦏꦴꦫꦟꦨꦹꦠꦺꦴ ꦲꦶ ꦣꦩ꧀ꦩꦱꦩꦹꦲꦺꦴ ꦆꦣ ‘‘ꦈꦥꦤꦶꦱꦺꦴ’’ꦠꦶ ꦄꦣꦶꦥ꧀ꦥꦺꦠꦺꦴ.

ꦱꦩꦴꦣꦶꦥꦫꦶꦏ꧀ꦑꦴꦫꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦥꦜꦩꦄꦒ꧀ꦒꦶꦱꦸꦠ꧀ꦠꦮꦟ꧀ꦟꦤꦴ

꧔꧖. ꦠꦠꦶꦪꦺ ꦄꦤꦸꦝꦲꦤꦛ꧀ꦜꦺꦤꦴꦠꦶ ꦏꦴꦩꦁ ꦄꦴꦲꦸꦤꦺꦪ꧀ꦪꦒ꧀ꦒꦶꦄꦴꦢꦪꦺꦴ ꦠꦪꦺꦴ ꦄꦒ꧀ꦒꦷ ꦧ꧀ꦫꦴꦲ꧀ꦩꦟꦺꦲꦶꦥꦶ ꦆꦕ꧀ꦖꦶꦠꦴ ꦱꦤ꧀ꦠꦶ. ꦠꦺ ꦥꦤ ꦠꦺꦲꦶ ꦆꦕ꧀ꦖꦶꦠꦩꦠ꧀ꦠꦴꦮ, ꦤ ꦱꦠ꧀ꦠꦴꦤꦁ ꦠꦴꦢꦶꦱꦴ ꦄꦠ꧀ꦡꦱꦴꦣꦏꦴ. ꦪꦺ ꦥꦤ ꦱꦠ꧀ꦠꦴꦤꦁ ꦄꦠ꧀ꦡꦱꦴꦣꦏꦴ, ꦠꦺ ꦢꦱ꧀ꦱꦺꦠꦸꦁ ‘‘ꦄꦴꦲꦸꦤꦁ ꦮꦸꦕ꧀ꦕꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦴꦤꦺꦠ꧀ꦮꦴ ꦲꦸꦤꦤꦁ ꦥꦹꦗꦤꦁ ‘‘ꦄꦴꦲꦸꦤ’’ꦤ꧀ꦠꦶ ꦮꦸꦠ꧀ꦠꦁ, ꦠꦁ ꦄꦴꦲꦸꦤꦁ ꦄꦫꦲꦤ꧀ꦠꦷ ꦩꦴꦠꦴꦥꦶꦠꦫꦺꦴ. ꦠꦺꦤꦴꦲ ꦨꦒꦮꦴ – ‘‘ꦄꦴꦲꦸꦤꦺꦪ꧀ꦪꦴꦠꦶ, ꦨꦶꦏ꧀ꦑꦮꦺ, ꦩꦴꦠꦴꦥꦶꦠꦹꦤꦁ ꦌꦠꦁ ꦄꦣꦶꦮꦕꦤ’’ꦤ꧀ꦠꦶ (ꦆꦠꦶꦮꦸ. ꧑꧐꧖). ꦪꦢꦒ꧀ꦒꦺꦤ ꦕ ꦠꦺ ꦥꦸꦠ꧀ꦠꦴꦤꦁ ꦧꦲꦹꦥꦏꦴꦫꦠꦴꦪ ꦄꦴꦲꦸꦤꦺꦪ꧀ꦪꦴꦠꦶ, ꦠꦺꦱꦸ ꦱꦩ꧀ꦩꦴꦥꦛꦶꦥꦠ꧀ꦠꦶ ꦤꦺꦱꦁ ꦲꦶꦠꦱꦸꦑꦴꦮꦲꦴ, ꦠꦢꦒ꧀ꦒꦺꦤ ꦠꦺꦱꦸ ꦩꦶꦕ꧀ꦖꦴꦥꦛꦶꦥꦠ꧀ꦠꦶ ꦄꦲꦶꦠꦢꦸꦏ꧀ꦑꦴꦮꦲꦴꦠꦶ ꦄꦴꦲ ‘‘ꦠꦺꦱꦸ…ꦥꦺ… ꦤꦶꦧ꧀ꦧꦠ꧀ꦠꦤ꧀ꦠꦷ’’ꦠꦶ.

ꦱ꧀ꦮꦴꦪꦩꦠ꧀ꦡꦺꦴ (ꦢꦷ. ꦤꦶ. ꦄꦛ꧀ꦜ. ꧓.꧓꧐꧕) ꦩꦶꦠ꧀ꦠꦮꦶꦤ꧀ꦢꦏꦮꦠ꧀ꦡꦸꦤꦴ ꦮꦺꦢꦶꦠꦧ꧀ꦧꦺꦴ. ꦩꦶꦠ꧀ꦠꦮꦶꦤ꧀ꦢꦏꦺꦴ ꦲꦶ ꦩꦴꦠꦫꦴ, ‘‘ꦠꦴꦠ, ꦄꦗ꧀ꦗ ꦈꦥꦺꦴꦱꦡꦶꦏꦺꦴ ꦲꦸꦠ꧀ꦮꦴ ꦮꦶꦲꦴꦫꦺ ꦱꦧ꧀ꦧꦫꦠ꧀ꦠꦶꦁ ꦣꦩ꧀ꦩꦱ꧀ꦱꦮꦤꦁ ꦱꦸꦟꦺꦴꦲꦶ, ꦱꦲꦱ꧀ꦱꦁ ꦠꦺ ꦢꦱ꧀ꦱꦴꦩꦷ’’ꦠꦶ ꦮꦸꦠ꧀ꦠꦺꦴ ꦣꦤꦭꦺꦴꦨꦺꦤ ꦈꦥꦺꦴꦱꦡꦁ ꦱꦩꦴꦢꦴꦪ ꦮꦶꦲꦴꦫꦁ ꦒꦤ꧀ꦠ꧀ꦮꦴ ‘‘ꦆꦢꦁ ꦜꦴꦤꦁ ꦄꦏꦸꦠꦺꦴꦨꦪ’’ꦤ꧀ꦠꦶ ꦱꦭ꧀ꦭꦏ꧀ꦑꦺꦠ꧀ꦮꦴ ꦣꦩ꧀ꦩꦴꦱꦤꦱ꧀ꦱ ꦲꦺꦛ꧀ꦜꦴ ꦤꦶꦥꦤ꧀ꦤꦺꦴ ꦱꦧ꧀ꦧꦫꦠ꧀ꦠꦶꦁ ꦤꦶꦢ꧀ꦢꦴꦪꦶꦠ꧀ꦮꦴ ꦓꦫꦁ ꦄꦒꦩꦴꦱꦶ. ꦩꦴꦠꦴ ꦥꦴꦠꦺꦴꦮ ꦪꦴꦒꦸꦁ ꦥꦕꦶꦠ꧀ꦮꦴ ꦈꦥꦤꦴꦩꦺꦱꦶ. ꦱꦺꦴ ꦱꦲꦱ꧀ꦱꦁ ꦒꦲꦺꦠ꧀ꦮꦴꦮ ꦥꦶꦮꦶ. ꦄꦡꦱ꧀ꦱ ꦌꦠꦢꦲꦺꦴꦱꦶ ‘‘ꦣꦤꦁ ꦱꦁꦲꦫꦶꦱ꧀ꦱꦴꦩꦷ’’ꦠꦶ. ꦱꦺꦴ ꦤꦴꦮꦴꦪ ꦱꦩꦸꦢ꧀ꦢꦁ ꦥꦏ꧀ꦑꦤ꧀ꦢꦶꦠꦸꦏꦴꦩꦺꦴ ꦄꦲꦺꦴꦱꦶ. ꦄꦡ ꦤꦁ ꦩꦴꦠꦴ, ‘‘ꦠꦴꦠ, ꦆꦩꦱ꧀ꦩꦶꦁ ꦏꦸꦭꦺ ꦕꦠ꧀ꦠꦴꦭꦷꦱꦏꦺꦴꦛꦶꦣꦤꦁ ꦄꦠ꧀ꦡꦶ, ꦄꦭꦁ ꦒꦩꦤꦺꦤꦴ’’ꦠꦶ ꦤꦶꦮꦴꦫꦺꦠꦶ. ꦱꦺꦴ ꦠꦱ꧀ꦱꦴ ꦮꦕꦤꦁ ꦄꦤꦴꦢꦶꦪꦶꦠ꧀ꦮꦴ ꦒꦕ꧀ꦖꦠꦶ ꦌꦮ. ꦱꦴ ꦥꦸꦫꦠꦺꦴ ꦄꦛ꧀ꦜꦴꦱꦶ. ꦄꦡ ꦤꦁ ꦏꦸꦗ꧀ꦙꦶꦠ꧀ꦮꦴ ‘‘ꦄꦪꦁ ꦩꦪ꧀ꦲꦁ ꦥꦸꦫꦠꦺꦴ ꦠꦶꦛ꧀ꦜꦠꦷ’’ꦠꦶ ꦥꦴꦢꦺꦤ ꦥꦲꦫꦶꦠ꧀ꦮꦴ ꦥꦠꦶꦠꦁ ꦄꦤ꧀ꦠꦫꦁ ꦏꦠ꧀ꦮꦴ ꦄꦒꦩꦴꦱꦶ.

ꦩꦴꦠꦴ ꦈꦛ꧀ꦜꦲꦶꦠ꧀ꦮꦴ ‘‘ꦩꦴꦢꦶꦱꦴꦪ ꦩꦴꦠꦫꦶ ꦌꦮꦫꦹꦥꦁ ꦏꦩ꧀ꦩꦁ ꦏꦠ꧀ꦮꦴ ꦒꦠꦱ꧀ꦱ ꦠꦺ ꦒꦠꦛ꧀ꦜꦴꦤꦺ ꦱꦸꦑꦁ ꦨꦮꦶꦱ꧀ꦱꦠꦷꦠꦶ ꦌꦮꦁꦱꦚ꧀ꦚꦷ ꦤꦴꦩ ꦠ꧀ꦮꦁ ꦥꦸꦠ꧀ꦠꦴ’’ꦠꦶ ꦄꦴꦲ. ꦠꦱ꧀ꦱ ꦤꦴꦮꦁ ꦄꦴꦫꦸꦪ꧀ꦲ ꦒꦕ꧀ꦖꦠꦺꦴ ꦱꦠ꧀ꦠꦩꦺ ꦢꦶꦮꦱꦺ ꦤꦴꦮꦴ ꦄꦛ꧀ꦜꦴꦱꦶ. ꦄꦡ ꦠꦺ ꦩꦤꦸꦱ꧀ꦱꦴ ‘‘ꦄꦢ꧀ꦣꦴ ꦌꦠ꧀ꦡ ꦥꦴꦥꦥꦸꦒ꧀ꦒꦭꦺꦴ ꦄꦠ꧀ꦡꦶ, ꦱꦭꦴꦏꦁ ꦢꦺꦡꦴ’’ꦠꦶ ꦄꦴꦲꦁꦱꦸ. ꦱꦭꦴꦏꦴ ꦢꦷꦪꦩꦴꦤꦴ ꦠꦱ꧀ꦱꦺꦮ ꦠꦶꦏ꧀ꦑꦠ꧀ꦠꦸꦁ ꦥꦴꦥꦸꦟꦶ. ꦠꦺ ꦠꦱ꧀ꦱ ꦈꦭ꦳ꦸꦩ꧀ꦥꦁ ꦢꦠ꧀ꦮꦴ ꦠꦁ ꦱꦩꦸꦢ꧀ꦢꦺ ꦥꦏ꧀ꦑꦶꦥꦶꦁꦱꦸ. ꦱꦺꦴ ꦌꦏꦁ ꦢꦷꦥꦁ ꦒꦤ꧀ꦠ꧀ꦮꦴ ꦮꦶꦩꦴꦤꦥꦺꦠꦷꦲꦶ ꦱꦢ꧀ꦣꦶꦁ ꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦤ꧀ꦠꦺꦴ ꦠꦴꦲꦶ ‘‘ꦥꦸꦫꦠꦺꦴ ꦥꦸꦫꦠꦺꦴ ꦩꦴ ꦄꦒꦩꦴꦱꦷ’’ꦠꦶ ꦮꦸꦕ꧀ꦕꦩꦴꦤꦺꦴꦥꦶ ꦠꦢ꧀ꦢꦶꦒꦸꦟꦁ ꦠꦢ꧀ꦢꦶꦒꦸꦟꦁ ꦱꦩ꧀ꦥꦠ꧀ꦠꦶꦁ ꦥꦱ꧀ꦱꦤ꧀ꦠꦺꦴ ꦄꦤꦸꦥꦸꦧ꧀ꦧꦺꦤ ꦑꦸꦫꦕꦏ꧀ꦏꦣꦫꦁ ꦌꦏꦁ ꦄꦢ꧀ꦢꦱ. ꦠꦁ ꦕꦏ꧀ꦏꦁ ꦥꦢꦸꦩꦥꦸꦥ꧀ꦦꦁ ꦮꦶꦪ ꦈꦥꦛ꧀ꦜꦴꦱꦶ. ꦱꦺꦴ ꦠꦁ ꦄꦴꦲ, ‘‘ꦄꦩ꧀ꦨꦺꦴ, ꦆꦢꦁ ꦠꦪꦴ ꦥꦶꦭ꦳ꦤ꧀ꦣꦶꦠꦁ ꦥꦢꦸꦩꦁ ꦩꦪ꧀ꦲꦁ ꦢꦺꦲꦷ’’ꦠꦶ. ꦤ ꦆꦢꦁ, ꦱꦴꦩꦶ, ꦥꦢꦸꦩꦁ, ꦑꦸꦫꦕꦏ꧀ꦏꦁ ꦌꦠꦤ꧀ꦠꦶ. ꦱꦺꦴ ‘‘ꦮꦚ꧀ꦕꦺꦱꦶ ꦩꦁ ꦠ꧀ꦮꦁ, ꦏꦶꦁ ꦩꦪꦴ ꦥꦢꦸꦩꦁ ꦤ ꦢꦶꦛ꧀ꦜꦥꦸꦧ꧀ꦧ’’ꦤ꧀ꦠꦶ ꦮꦠ꧀ꦮꦴ ‘‘ꦠ꧀ꦮꦁ ꦭꦺꦴꦲꦶꦠꦕꦤ꧀ꦢꦤꦁ ꦮꦶꦭꦶꦩ꧀ꦥꦶꦠ꧀ꦮꦴ ꦥꦶꦭ꦳ꦤ꧀ꦣꦤꦁ ꦥꦢꦸꦩꦥꦸꦥ꧀ꦦꦁ ꦩꦪ꧀ꦲꦁ ꦤ ꦢꦴꦠꦸꦏꦴꦩꦺꦴ’’ꦠꦶ ꦄꦴꦲ. ꦱꦺꦴ ꦕꦶꦤ꧀ꦠꦺꦱꦶ ‘‘ꦄꦪꦩ꧀ꦥꦶ ꦩꦪꦴ ꦏꦠꦱꦢꦶꦱꦁ ꦏꦩ꧀ꦩꦁ ꦏꦠ꧀ꦮꦴ ꦠꦱ꧀ꦱ ꦦꦭꦁ ꦄꦤꦸꦨꦮꦶꦠꦸꦏꦴꦩꦺꦴ’’ꦠꦶ. ꦄꦡ ꦤꦁ ‘‘ꦒꦟ꧀ꦲ, ꦫꦺ’’ꦠꦶ ꦮꦠ꧀ꦮꦴ ꦠꦱ꧀ꦱ ꦩꦠ꧀ꦡꦏꦺ ꦕꦏ꧀ꦏꦁ ꦑꦶꦥꦶ. ꦠꦺꦤ ꦮꦸꦠ꧀ꦠꦁ –

‘‘ꦕꦠꦸꦧ꧀ꦨꦶ ꦄꦛ꧀ꦜꦗ꧀ꦙꦒꦩꦴ, ꦄꦛ꧀ꦜꦴꦲꦶ ꦥꦶꦕ ꦱꦺꦴꦭ꦳ꦱ;

ꦱꦺꦴꦭ꦳ꦱꦴꦲꦶ ꦕ ꦧꦴꦠ꧀ꦠꦶꦁꦱ, ꦄꦠ꧀ꦫꦶꦕ꧀ꦖꦁ ꦕꦏ꧀ꦏꦩꦴꦱꦢꦺꦴ;

ꦆꦕ꧀ꦖꦴꦲꦠꦱ꧀ꦱ ꦥꦺꦴꦱꦱ꧀ꦱ, ꦕꦏ꧀ꦏꦁ ꦨꦩꦠꦶ ꦩꦠ꧀ꦡꦏꦺ’’ꦠꦶ. (ꦗꦴ. ꧑.꧑.꧑꧐꧔; ꧑.꧕.꧑꧐꧓);

ꦱꦺꦴꦠꦶ ꦒꦺꦲꦱꦴꦩꦶꦏꦺꦴ ꦨꦠ꧀ꦠꦴ. ꦥꦸꦫꦶꦩꦤꦪꦺꦤꦺꦮꦴꦠꦶ ꦄꦤꦸꦝꦲꦤꦱ꧀ꦱ ꦥꦕ꧀ꦕꦪꦠꦴꦪ. ꦠꦠ꧀ꦫꦶꦢꦁ ꦮꦠ꧀ꦡꦸ – ꦏꦱ꧀ꦱꦥꦧꦸꦢ꧀ꦣꦏꦴꦭꦺ ꦱꦺꦴꦠꦴꦥꦤ꧀ꦤꦱ꧀ꦱ ꦈꦥꦴꦱꦏꦱ꧀ꦱ ꦨꦫꦶꦪꦴ ꦄꦠꦶꦕꦴꦫꦁ ꦕꦫꦠꦶ. ꦱꦺꦴ ꦠꦁ ꦥꦕ꧀ꦕꦏ꧀ꦑꦠꦺꦴ ꦢꦶꦱ꧀ꦮꦴ ‘‘ꦏꦱ꧀ꦩꦴ ꦌꦮꦁ ꦏꦫꦺꦴꦱꦷ’’ꦠꦶ ꦄꦴꦲ. ꦱꦴ ‘‘ꦱꦕꦴꦲꦁ ꦌꦮꦫꦹꦥꦁ ꦏꦫꦺꦴꦩꦶ, ꦄꦪꦁ ꦩꦺ ꦱꦸꦤꦑꦺꦴ ꦮꦶꦭꦸꦥ꧀ꦥꦩꦴꦤꦺꦴ ꦑꦴꦢꦠꦹ’’ꦠꦶ ꦮꦠ꧀ꦮꦴ ꦏꦴꦭꦏꦠꦴ ꦏꦟ꧀ꦟꦩꦸꦟ꧀ꦝꦏꦢꦲꦺ ꦮꦺꦩꦴꦤꦶꦏꦥꦺꦠꦷ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦴ ꦢꦶꦮꦴ ꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦠꦶ, ꦫꦠ꧀ꦠꦶꦁ ꦢꦸꦏ꧀ꦑꦁ. ꦠꦢꦴ ꦧꦴꦫꦴꦟꦱꦶꦫꦴꦗꦴ ꦩꦶꦒꦮꦁ ꦕꦫꦤ꧀ꦠꦺꦴ ꦄꦫꦚ꧀ꦚꦁ ꦥꦮꦶꦱꦶꦠ꧀ꦮꦴ ꦄꦤꦸꦥꦸꦧ꧀ꦧꦺꦤ ꦏꦟ꧀ꦟꦩꦸꦟ꧀ꦝꦏꦢꦲꦁ ꦱꦩ꧀ꦥꦠ꧀ꦠꦺꦴ ꦠꦴꦪ ꦱꦢ꧀ꦣꦶꦁ ꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦠꦶ. ꦱꦴ ꦠꦁ ꦮꦚ꧀ꦕꦺꦠ꧀ꦮꦴ ꦫꦠ꧀ꦠꦶꦁ ꦢꦸꦏ꧀ꦑꦁ ꦄꦤꦸꦨꦮꦠꦶ. ꦱꦺꦴ ꦚꦠ꧀ꦮꦴ ‘‘ꦏꦠ꧀ꦡ ꦤꦸ ꦑꦺꦴ ꦒꦕ꧀ꦖꦠꦷ’’ꦠꦶ ꦥꦶꦛ꧀ꦜꦶꦠꦺꦴ ꦥꦶꦛ꧀ꦜꦶꦠꦺꦴ ꦒꦤ꧀ꦠ꧀ꦮꦴ ꦄꦮꦶꦢꦹꦫꦺ ꦜꦶꦠꦺꦴ ꦏꦟ꧀ꦟꦩꦸꦟ꧀ꦝꦏꦢꦲꦠꦺꦴ ꦤꦶꦏ꧀ꦑꦩꦶꦠ꧀ꦮꦴ ꦠꦁ ‘‘ꦥꦛꦥꦛ’’ꦤ꧀ꦠꦶ ꦑꦴꦢꦩꦴꦤꦁ ꦌꦏꦁ ꦱꦸꦤꦑꦁ ꦢꦶꦱ꧀ꦮꦴ ꦄꦱꦶꦤꦴ ꦢ꧀ꦮꦶꦣꦴ ꦖꦶꦤ꧀ꦢꦶ, ꦢ꧀ꦮꦺ ꦄꦲꦺꦱꦸꦁ. ꦥꦸꦤ ꦖꦶꦤ꧀ꦤꦺ ꦕꦠ꧀ꦠꦴꦫꦺꦴ, ꦥꦸꦤ ꦖꦶꦤ꧀ꦤꦺ ꦄꦛ꧀ꦜ, ꦥꦸꦤ ꦖꦶꦤ꧀ꦤꦺ ꦱꦺꦴꦭ꦳ꦱ ꦄꦲꦺꦱꦸꦁ. ꦱꦴ ‘‘ꦏꦶꦁ ꦏꦫꦺꦴꦱꦶ, ꦱꦴꦩꦷ’’ꦠꦶ ꦄꦴꦲ. ꦱꦺꦴ ‘‘ꦏꦶꦁ ꦆꦢ’’ꦤ꧀ꦠꦶ ꦄꦴꦲ. ꦱꦴ ‘‘ꦌꦮꦁ ꦄꦏꦠ꧀ꦮꦴ ꦑꦺꦭ꦳ꦥꦶꦟ꧀ꦝꦁ ꦨꦹꦩꦶꦪꦁ ꦤꦶꦛ꧀ꦜꦸꦨꦶꦠ꧀ꦮꦴ ꦥꦴꦢꦺꦤ ꦓꦁꦱꦴꦲꦷ’’ꦠꦶ ꦄꦴꦲ. ꦱꦺꦴ ꦠꦡꦴ ꦄꦏꦴꦱꦶ. ꦱꦸꦤꦑꦴ ꦄꦤ꧀ꦠꦫꦣꦴꦪꦶꦁꦱꦸ. ꦩꦸꦛ꧀ꦜꦶꦪꦺꦴꦒꦺꦴ ꦏꦶꦫꦴꦪꦁ ꦠꦱ꧀ꦱ ꦱꦸꦤꦑꦤ꧀ꦠꦫꦣꦴꦤꦱ꧀ꦱ, ꦪꦢꦶꦢꦁ ꦑꦺꦭ꦳ꦥꦶꦟ꧀ꦝꦁ ꦨꦹꦩꦶꦪꦁ ꦤꦶꦛ꧀ꦜꦸꦨꦶꦠ꧀ꦮꦴ ꦥꦴꦢꦺꦤ ꦓꦁꦱꦤꦁ, ꦠꦁ ꦢꦶꦮꦱꦁ ꦠꦱ꧀ꦱꦴ ꦏꦩ꧀ꦩꦁ ꦑꦷꦟꦁ. ꦫꦴꦗꦴ ꦮꦶꦥ꧀ꦥꦛꦶꦱꦴꦫꦷ ꦲꦸꦠ꧀ꦮꦴ ꦒꦤ꧀ꦠꦸꦁ ꦄꦴꦫꦢ꧀ꦣꦺꦴ. ꦱꦴ ‘‘ꦩꦪ꧀ꦲꦁ, ꦱꦴꦩꦶ, ꦏꦩ꧀ꦩꦁ ꦑꦷꦟꦁ, ꦩꦴ ꦄꦒꦩꦴꦱꦷ’’ꦠꦶ ꦄꦴꦲ. ꦫꦴꦗꦴ ꦄꦱ꧀ꦱꦸꦠ꧀ꦮꦴꦮ ꦒꦠꦺꦴ.

ꦢꦏ꧀ꦑꦶꦟꦴꦠꦶ ꦕꦠ꧀ꦠꦴꦫꦺꦴ ꦥꦕ꧀ꦕꦪꦴ ꦢꦷꦪꦩꦴꦤꦴ ꦢꦏ꧀ꦑꦤ꧀ꦠꦶ ꦌꦠꦺꦲꦶ ꦲꦶꦠꦱꦸꦑꦴꦤꦷꦠꦶ, ꦠꦁ ꦢꦏ꧀ꦑꦶꦟꦁ ꦄꦫꦲꦠꦷꦠꦶ ꦢꦏ꧀ꦑꦶꦟꦺꦪ꧀ꦪꦺꦴ, ꦨꦶꦏ꧀ꦑꦸꦱꦔ꧀ꦓꦺꦴ.

ꦥꦜꦩꦄꦒ꧀ꦒꦶꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔-꧕. ꦢꦸꦠꦶꦪꦄꦒ꧀ꦒꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧔꧗-꧔꧘. ꦕꦠꦸꦠ꧀ꦡꦺ ꦪꦚ꧀ꦚꦮꦴꦛꦁ ꦱꦩ꧀ꦥꦴꦢꦺꦠ꧀ꦮꦴ ꦩꦲꦴꦪꦚ꧀ꦚꦁ ꦈꦢ꧀ꦢꦶꦱ꧀ꦱ ꦱꦮꦶꦚ꧀ꦚꦴꦟꦏꦴꦤꦶ ꦄꦮꦶꦚ꧀ꦚꦴꦟꦏꦴꦤꦶ ꦕ ꦪꦚ꧀ꦚꦹꦥꦏꦫꦟꦴꦤꦶ ꦱꦗ꧀ꦗꦶꦠꦴꦤꦷꦠꦶ ꦄꦴꦲ ꦥꦴꦭ꦳ꦶꦪꦁ ‘‘ꦩꦲꦴꦪꦚ꧀ꦚꦺꦴ ꦈꦥꦏ꧀ꦑꦛꦺꦴ’’ꦠꦶ. ꦠꦁ ꦈꦥꦏꦫꦟꦁ ꦠꦺꦱꦁ ꦠꦡꦴꦱꦗ꧀ꦗꦤꦤ꧀ꦠꦶ ꦄꦴꦲ ‘‘ꦈꦥꦏ꧀ꦑꦛꦺꦴꦠꦶ ꦥꦕ꧀ꦕꦸꦥꦛ꧀ꦜꦶꦠꦺꦴ’’ꦠꦶ. ꦮꦕ꧀ꦖꦠꦫꦱꦠꦴꦤꦷꦠꦶ ꦪꦸꦮꦨꦴꦮꦥ꧀ꦥꦠ꧀ꦠꦴꦤꦶ ꦤꦴꦠꦶꦧꦭꦮꦮꦕ꧀ꦖꦱꦠꦴꦤꦶ. ꦠꦺ ꦥꦤ ꦮꦕ꧀ꦖꦴ ꦌꦮ ꦲꦺꦴꦤ꧀ꦠꦶ, ꦤ ꦢꦩ꧀ꦩꦴ, ꦧꦭꦷꦧꦢ꧀ꦢꦴ ꦮꦴ. ꦈꦫꦧ꧀ꦨꦴꦠꦶ ꦠꦫꦸꦟꦩꦺꦟ꧀ꦝꦏꦴ ꦮꦸꦕ꧀ꦕꦤ꧀ꦠꦶ. ꦈꦥꦤꦷꦠꦴꦤꦷꦠꦶ ꦜꦥꦤꦠ꧀ꦡꦴꦪ ꦈꦥꦤꦷꦠꦴꦤꦶ. ꦮꦶꦲꦶꦁꦱꦛ꧀ꦜꦺꦤꦴꦠꦶ ꦲꦶꦁꦱꦤꦛ꧀ꦜꦺꦤ. ꦈꦥꦮꦴꦪꦠꦹꦠꦶ ꦈꦥꦒꦤ꧀ꦠ꧀ꦮꦴ ꦱꦫꦷꦫꦢꦫꦡꦁ ꦤꦶꦧ꧀ꦧꦴꦥꦺꦤ꧀ꦠꦺꦴ ꦱꦟ꧀ꦲꦱꦷꦠꦭꦴ ꦮꦴꦠꦺꦴ ꦮꦴꦪꦠꦸ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦥꦚ꧀ꦕꦩꦺ ꦤꦠ꧀ꦡꦶ ꦮꦠ꧀ꦠꦧ꧀ꦧꦁ.

ꦢꦸꦠꦶꦪꦄꦒ꧀ꦒꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧖. ꦢꦸꦠꦶꦪꦱꦚ꧀ꦚꦴꦱꦸꦠ꧀ꦠꦮꦟ꧀ꦟꦤꦴ

꧔꧙. ꦖꦛ꧀ꦜꦺ ꦤ꧀ꦲꦴꦫꦸꦮꦶꦭꦺꦑꦤꦤ꧀ꦠꦶ ꦕꦩ꧀ꦩꦁ ꦭꦶꦑꦤ꧀ꦠꦴꦤꦁ ꦕꦩ꧀ꦩꦁ ꦭꦶꦑꦶꦠ꧀ꦮꦴ ꦖꦝ꧀ꦝꦶꦠꦏꦱꦛꦁ. ‘‘ꦌꦱꦺꦴꦲꦩꦱ꧀ꦩꦷ’’ꦠꦶꦄꦴꦢꦶꦤꦴ ꦄꦲꦁꦏꦫꦟꦁ ꦄꦲꦔ꧀ꦏꦴꦫꦺꦴ. ‘‘ꦌꦠꦁ ꦩꦩꦴ’’ꦠꦶ ꦩꦩꦁꦏꦫꦟꦁ ꦩꦩꦔ꧀ꦏꦴꦫꦺꦴ. ꦠꦺꦤꦴꦲ ‘‘ꦄꦲꦔ꧀ꦏꦴꦫꦢꦶꦛ꧀ꦜꦶꦠꦺꦴ’’ꦠꦶꦄꦴꦢꦶ. ꦠꦶꦱ꧀ꦱꦺꦴ ꦮꦶꦣꦴꦠꦶ ꦱꦺꦪ꧀ꦪꦱꦢꦶꦱꦲꦷꦤꦮꦱꦺꦤ ꦠꦪꦺꦴ ꦩꦴꦤꦴ. ‘‘ꦌꦏꦮꦶꦣꦺꦤ ꦫꦹꦥꦱꦔ꧀ꦒꦲꦺꦴ’’ꦠꦶꦄꦴꦢꦷꦱꦸ (ꦣ. ꦱ. ꧕꧘꧔) ꦏꦺꦴꦛ꧀ꦜꦴꦱꦺꦴ ‘‘ꦮꦶꦣꦴ’’ꦠꦶ ꦮꦸꦠ꧀ꦠꦺꦴ. ‘‘ꦏꦡꦁꦮꦶꦣꦁ ꦱꦷꦭꦮꦤ꧀ꦠꦁ ꦮꦢꦤ꧀ꦠꦶ, ꦏꦡꦁꦮꦶꦣꦁ ꦥꦚ꧀ꦚꦮꦤ꧀ꦠꦁ ꦮꦢꦤ꧀ꦠꦷ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧙꧕) ꦥꦏꦴꦫꦺꦴ. ‘‘ꦠꦶꦱ꧀ꦱꦺꦴ ꦆꦩꦴ, ꦨꦶꦏ꧀ꦑꦮꦺ, ꦮꦶꦣꦴ. ꦏꦠꦩꦴ ꦠꦶꦱ꧀ꦱꦺꦴ? ꦱꦺꦪ꧀ꦪꦺꦴꦲꦩꦱ꧀ꦩꦷꦠꦶ ꦮꦶꦣꦴ’’ꦠꦶ (ꦮꦶꦨ. ꧙꧒꧐) ꦌꦠ꧀ꦡ ꦩꦴꦤꦺꦴ ‘‘ꦮꦶꦣꦴ’’ꦠꦶ ꦮꦸꦠ꧀ꦠꦺꦴ. ꦆꦣꦴꦥꦶ ꦩꦴꦤꦺꦴꦮ ꦄꦣꦶꦥ꧀ꦥꦺꦠꦺꦴ. ꦩꦴꦤꦺꦴ ꦲꦶ ꦮꦶꦢꦲꦤꦠꦺꦴ ꦲꦷꦤꦴꦢꦶꦮꦱꦺꦤ ꦠꦶꦮꦶꦣꦴ. ꦠꦺꦤꦴꦏꦴꦫꦺꦤ ꦢꦲꦤꦠꦺꦴ ꦈꦥꦢꦲꦤꦠꦺꦴ ‘‘ꦮꦶꦣꦴ’’ꦠꦶ ꦮꦸꦕ꧀ꦕꦠꦶ.

ꦢꦸꦠꦶꦪꦱꦚ꧀ꦚꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗-꧘. ꦩꦺꦡꦸꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧕꧐-꧕꧑. ꦱꦠ꧀ꦠꦩꦺ ꦆꦣꦴꦠꦶ ꦆꦩꦱ꧀ꦩꦶꦁ ꦭꦺꦴꦏꦺ. ꦌꦏꦕ꧀ꦕꦺꦴꦠꦶ ꦌꦏꦺꦴ. ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴꦠꦶ ꦥꦧ꧀ꦧꦗ꧀ꦗꦴꦩꦠ꧀ꦠꦺꦤ ꦱꦩꦟꦺꦴ ꦮꦴ, ꦗꦴꦠꦶꦩꦠ꧀ꦠꦺꦤ ꦧ꧀ꦫꦴꦲ꧀ꦩꦟꦺꦴ ꦮꦴ. ꦢ꧀ꦮꦪꦁꦢ꧀ꦮꦪꦱꦩꦴꦥꦠ꧀ꦠꦶꦤ꧀ꦠꦶ ꦢ꧀ꦮꦷꦲꦶ ꦢ꧀ꦮꦷꦲꦶ ꦱꦩꦴꦥꦗ꧀ꦗꦶꦠꦧ꧀ꦧꦁ, ꦩꦺꦡꦸꦤꦤ꧀ꦠꦶ ꦄꦠ꧀ꦡꦺꦴ. ꦤ ꦲꦺꦮ ꦑꦺꦴ ꦱꦩꦴꦥꦗ꧀ꦗꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦈꦕ꧀ꦖꦴꦢꦤꦁ ꦈꦧ꧀ꦧꦛ꧀ꦛꦤꦁ. ꦱꦩ꧀ꦧꦴꦲꦤꦁ ꦥꦫꦶꦩꦢ꧀ꦢꦤꦁ. ꦱꦴꦢꦶꦪꦠꦷꦠꦶ ꦄꦣꦶꦮꦴꦱꦺꦠꦶ. ꦠꦢꦱ꧀ꦱꦴꦢꦺꦠꦷꦠꦶ ꦈꦕ꧀ꦖꦴꦢꦤꦴꦢꦶꦁ ꦄꦨꦶꦫꦩꦠꦶ. ꦤꦶꦏꦴꦩꦺꦠꦷꦠꦶ ꦆꦕ꧀ꦖꦠꦶ. ꦮꦶꦠ꧀ꦠꦶꦤ꧀ꦠꦶ ꦠꦸꦛ꧀ꦜꦶꦁ. ꦆꦢꦩ꧀ꦥꦶ ꦑꦺꦴꦠꦶ ꦌꦠ꧀ꦡ ꦆꦢꦤ꧀ꦠꦶ ꦪꦡꦴꦮꦸꦠ꧀ꦠꦁ ꦱꦴꦢꦶꦪꦤꦴꦢꦶꦁ ꦑꦟ꧀ꦝꦴꦢꦶꦨꦴꦮꦮꦱꦺꦤ ꦌꦏꦁ ꦏꦠ꧀ꦮꦴ ꦮꦸꦠ꧀ꦠꦁ. ꦥꦶ-ꦱꦢ꧀ꦢꦺꦴ ꦮꦏ꧀ꦑꦩꦴꦤꦁ ꦈꦥꦴꦢꦴꦪ ꦱꦩꦸꦕ꧀ꦕꦪꦠ꧀ꦡꦺꦴ, ꦑꦺꦴ-ꦱꦢ꧀ꦢꦺꦴ ꦄꦮꦣꦴꦫꦟꦠ꧀ꦡꦺꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦪꦢꦺꦠꦁ ꦧ꧀ꦫꦲ꧀ꦩꦕꦴꦫꦶꦥꦛꦶꦚ꧀ꦚꦱ꧀ꦱ ꦄꦱꦠꦶꦥꦶ ꦢ꧀ꦮꦪꦁꦢ꧀ꦮꦪꦱꦩꦴꦥꦠ꧀ꦠꦶꦪꦁ ꦩꦴꦠꦸꦒꦴꦩꦱ꧀ꦱ ꦈꦕ꧀ꦖꦴꦢꦤꦤꦲꦴꦥꦤꦱꦩ꧀ꦧꦴꦲꦤꦱꦴꦢꦶꦪꦤꦴꦢꦶ. ꦆꦢꦩ꧀ꦥꦶ ꦌꦏꦁꦱꦺꦤ ꦠꦱ꧀ꦱ ꦧ꧀ꦫꦲ꧀ꦩꦕꦫꦶꦪꦱ꧀ꦱ ꦑꦟ꧀ꦝꦴꦢꦶꦨꦴꦮꦴꦥꦴꦢꦤꦠꦺꦴ ꦑꦟ꧀ꦝꦩ꧀ꦥꦶ ꦖꦶꦢ꧀ꦢꦩ꧀ꦥꦶ ꦱꦧꦭꦩ꧀ꦥꦶ ꦏꦩ꧀ꦩꦴꦱꦩ꧀ꦥꦷꦠꦶ. ꦌꦮꦁ ꦥꦤ ꦑꦟ꧀ꦝꦴꦢꦶꦨꦴꦮꦴꦥꦠ꧀ꦠꦶꦪꦴ ꦱꦺꦴ ꦄꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦕꦫꦠꦶ, ꦤ ꦥꦫꦶꦱꦸꦢ꧀ꦣꦁ, ꦱꦁꦪꦸꦠ꧀ꦠꦺꦴ ꦩꦺꦡꦸꦤꦱꦁꦪꦺꦴꦒꦺꦤ, ꦤ ꦮꦶꦱꦁꦪꦸꦠ꧀ꦠꦺꦴ. ꦠꦠꦺꦴ ꦕꦱ꧀ꦱ ꦤ ꦗꦴꦠꦶꦄꦴꦢꦷꦲꦶ ꦥꦫꦶꦩꦸꦠ꧀ꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦪꦁ ꦮꦸꦕ꧀ꦕꦠꦷ’’ꦠꦶꦄꦴꦢꦶꦩꦴꦲ.

ꦱꦚ꧀ꦗꦒ꧀ꦓꦠꦷꦠꦶ ꦏꦶꦭꦺꦱꦮꦱꦺꦤ ꦩꦲꦴꦲꦱꦶꦠꦁ ꦲꦱꦠꦶ. ꦱꦁꦏꦷꦭ꦳ꦠꦷꦠꦶ ꦏꦴꦪꦱꦁꦱꦒ꧀ꦒꦮꦱꦺꦤ ꦏꦷꦭ꦳ꦠꦶ. ꦱꦁꦏꦺꦭꦴꦪꦠꦷꦠꦶ ꦱꦧ꧀ꦧꦱꦺꦴ ꦩꦴꦠꦸꦒꦴꦩꦁ ꦏꦺꦭꦴꦪꦤ꧀ꦠꦺꦴ ꦮꦶꦲꦫꦠꦶ. ꦕꦏ꧀ꦑꦸꦤꦴꦠꦶ ꦄꦠ꧀ꦠꦤꦺꦴ ꦕꦏ꧀ꦑꦸꦤꦴ. ꦕꦏ꧀ꦑꦸꦤ꧀ꦠꦶ ꦩꦴꦠꦸꦒꦴꦩꦱ꧀ꦱ ꦕꦏ꧀ꦑꦸꦁ. ꦈꦥꦤꦶꦗ꧀ꦙꦴꦪꦠꦷꦠꦶ ꦈꦥꦺꦕ꧀ꦕ ꦤꦶꦗ꧀ꦙꦴꦪꦠꦶ ꦎꦭꦺꦴꦏꦺꦠꦶ. ꦠꦶꦫꦺꦴꦏꦸꦛ꧀ꦛꦤ꧀ꦠꦶ ꦏꦸꦛ꧀ꦛꦱ꧀ꦱ ꦥꦫꦠꦺꦴ. ꦠꦡꦴ ꦠꦶꦫꦺꦴꦥꦴꦏꦴꦫꦁ, ‘‘ꦩꦠ꧀ꦠꦶꦏꦴꦩꦪꦴ ꦨꦶꦠ꧀ꦠꦶ ꦏꦸꦛ꧀ꦛꦁ, ꦆꦛ꧀ꦜꦏꦴꦩꦪꦴ ꦥꦴꦏꦴꦫꦺꦴ’’ꦠꦶ ꦮꦢꦤ꧀ꦠꦶ. ꦪꦴ ꦏꦴꦕꦶ ꦮꦴ ꦨꦶꦠ꧀ꦠꦶ ꦥꦺꦴꦫꦶꦱꦏꦴ ꦢꦶꦪꦝ꧀ꦞꦫꦠꦤꦥ꧀ꦥꦩꦴꦟꦴ ꦏꦸꦛ꧀ꦛꦁ, ꦠꦠꦺꦴ ꦄꦣꦶꦏꦺꦴ ꦥꦴꦏꦴꦫꦺꦴ. ꦄꦱ꧀ꦱꦴꦠꦶ ꦧ꧀ꦫꦲ꧀ꦩꦕꦴꦫꦶꦥꦛꦶꦚ꧀ꦚꦱ꧀ꦱ. ꦥꦸꦧ꧀ꦧꦺꦠꦶ ꦮꦠꦱꦩꦴꦢꦴꦤꦠꦺꦴ ꦥꦸꦧ꧀ꦧꦺ. ꦏꦴꦩꦒꦸꦟꦺꦲꦷꦠꦶ ꦏꦴꦩꦏꦺꦴꦛ꧀ꦜꦴꦱꦺꦲꦶ. ꦱꦩꦥ꧀ꦥꦶꦠꦤ꧀ꦠꦶ ꦱꦸꦛ꧀ꦜꦸ ꦄꦥ꧀ꦥꦶꦠꦁ ꦱꦲꦶꦠꦁ. ꦱꦩꦔ꧀ꦒꦶꦨꦹꦠꦤ꧀ꦠꦶ ꦱꦩꦤ꧀ꦤꦴꦒꦠꦁ. ꦥꦫꦶꦕꦴꦫꦪꦩꦴꦤꦤ꧀ꦠꦶ ꦏꦷꦭ꦳ꦤ꧀ꦠꦁ, ꦈꦥꦛ꧀ꦜꦲꦶꦪꦩꦴꦤꦁ ꦮꦴ. ꦥꦟꦶꦣꦴꦪꦴꦠꦶ ꦥꦠ꧀ꦡꦺꦠ꧀ꦮꦴ. ꦱꦷꦭꦺꦤꦴꦠꦶꦄꦴꦢꦷꦱꦸ ꦪꦩꦤꦶꦪꦩꦴꦢꦶꦱꦩꦴꦢꦴꦤꦮꦱꦺꦤ ꦱꦷꦭꦁ, ꦄꦮꦷꦠꦶꦏ꧀ꦏꦩꦮꦱꦺꦤ ꦮꦠꦁ. ꦈꦨꦪꦩ꧀ꦥꦶ ꦮꦴ ꦱꦷꦭꦁ, ꦢꦸꦏ꧀ꦏꦫꦕꦫꦶꦪꦮꦱꦺꦤ ꦥꦮꦠ꧀ꦠꦶꦠꦁ ꦮꦠꦁ. ꦠꦁꦠꦁꦄꦏꦶꦕ꧀ꦕꦱꦩ꧀ꦩꦠꦠꦺꦴ ꦮꦴ ꦤꦶꦮꦠ꧀ꦠꦶꦭꦏ꧀ꦑꦟꦁ ꦱꦷꦭꦁ, ꦠꦁꦠꦁꦱꦩꦴꦢꦴꦤꦮꦠꦺꦴ ꦮꦺꦱꦨꦺꦴꦗꦤꦏꦶꦕ꧀ꦕꦏꦫꦟꦴꦢꦶꦮꦶꦱꦺꦱꦥ꧀ꦥꦛꦶꦥꦠ꧀ꦠꦶ ꦮꦠꦁ. ꦱꦧ꧀ꦧꦡꦴꦥꦶ ꦢꦸꦏ꧀ꦏꦫꦕꦫꦶꦪꦴ ꦠꦥꦺꦴ. ꦩꦺꦡꦸꦤꦴ ꦮꦶꦫꦠꦶ ꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦌꦮꦩ꧀ꦥꦺꦠ꧀ꦡ ꦥꦴꦭ꦳ꦶꦮꦟ꧀ꦟꦤꦴ ꦮꦺꦢꦶꦠꦧ꧀ꦧꦴ. ꦄꦛ꧀ꦜꦩꦁ ꦈꦠ꧀ꦠꦴꦤꦩꦺꦮ.

ꦩꦺꦡꦸꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦢꦴꦤꦩꦲꦥ꧀ꦦꦭꦱꦸꦠ꧀ꦠꦮꦟ꧀ꦟꦤꦴ

꧕꧒. ꦤꦮꦩꦺ ‘‘ꦱꦴꦲꦸ ꦢꦴꦤ’’ꦤ꧀ꦠꦶ ꦢꦴꦤꦁ ꦢꦺꦠꦷꦠꦶ ‘‘ꦢꦴꦤꦁ ꦤꦴꦩ ꦱꦴꦣꦸ ꦱꦸꦤ꧀ꦢꦫ’’ꦤ꧀ꦠꦶ ꦢꦴꦤꦁ ꦢꦺꦠꦷꦠꦶ ꦄꦠ꧀ꦡꦺꦴ. ꦢꦴꦤꦚ꧀ꦲꦶ ꦢꦠ꧀ꦮꦴ ꦠꦁ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦥꦴꦩꦺꦴꦗ꧀ꦗꦥꦷꦠꦶꦱꦺꦴꦩꦤꦱ꧀ꦱꦴꦢꦪꦺꦴ ꦈꦥ꧀ꦥꦗ꧀ꦗꦤ꧀ꦠꦶ, ꦭꦺꦴꦨꦢꦺꦴꦱꦆꦱ꧀ꦱꦴꦩꦕ꧀ꦖꦺꦫꦴꦢꦪꦺꦴ ꦮꦶꦢꦹꦫꦷꦨꦮꦤ꧀ꦠꦶ. ꦆꦢꦴꦤꦶ ꦢꦴꦤꦁ ꦄꦤꦸꦏꦹꦭꦣꦩ꧀ꦩꦥꦫꦶꦧ꧀ꦫꦹꦲꦤꦺꦤ ꦥꦕ꧀ꦕꦤꦷꦏꦣꦩ꧀ꦩꦮꦶꦢꦹꦫꦷꦏꦫꦟꦺꦤ ꦕ ꦨꦴꦮꦤꦴꦕꦶꦠ꧀ꦠꦱ꧀ꦱ ꦈꦥꦱꦺꦴꦨꦤꦴꦪ ꦕ ꦥꦫꦶꦏ꧀ꦑꦴꦫꦴꦪ ꦕ ꦲꦺꦴꦠꦷꦠꦶ ‘‘ꦄꦭꦔ꧀ꦏꦴꦫꦨꦹꦠꦚ꧀ꦕꦺꦮ ꦥꦫꦶꦮꦴꦫꦨꦹꦠꦚ꧀ꦕ ꦢꦺꦠꦷ’’ꦠꦶ ꦮꦸꦠ꧀ꦠꦁ. ꦙꦴꦤꦴꦤꦴꦒꦴꦩꦷ ꦤꦴꦩ ꦲꦺꦴꦠꦶ ꦙꦴꦤꦁ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦧ꧀ꦫꦲ꧀ꦩꦭꦺꦴꦏꦹꦥꦥꦤ꧀ꦤꦴꦤꦁ ꦄꦫꦶꦪꦴꦤꦁ ꦲꦺꦛ꧀ꦜꦴ ꦄꦤꦸꦥ꧀ꦥꦗ꧀ꦗꦤꦠꦺꦴ. ꦆꦩꦁ ꦥꦺꦕ꧀ꦕ ꦥꦫꦶꦨꦸꦚ꧀ꦗꦶꦱ꧀ꦱꦴꦩꦷꦠꦶ ꦱꦴꦥꦺꦏ꧀ꦑꦱ꧀ꦱ ꦢꦴꦤꦁ ꦥꦫꦭꦺꦴꦏꦦꦭꦴꦱꦴꦪ ꦱꦴꦠꦶꦱꦪꦴꦪ ꦕ ꦥꦸꦧ꧀ꦧꦴꦕꦴꦫꦮꦱꦺꦤ ꦈꦥ꧀ꦥꦗ꧀ꦗꦩꦴꦤꦴꦪ ꦄꦤꦸꦨꦮꦠ꧀ꦠꦴ ꦠꦟ꧀ꦲꦸꦠ꧀ꦠꦫꦁ ꦤꦴꦩ ꦲꦺꦴꦠꦷꦠꦶ ꦄꦴꦲ ‘‘ꦥꦜꦩꦁ ꦠꦟ꧀ꦲꦸꦠ꧀ꦠꦫꦶꦪꦢꦴꦤ’’ꦤ꧀ꦠꦶ. ꦢꦴꦤꦁ ꦤꦴꦩ ꦧꦸꦢ꧀ꦣꦴꦢꦷꦲꦶ ꦥꦱꦠ꧀ꦡꦤ꧀ꦠꦶ ꦒꦫꦸꦁ ꦕꦶꦠ꧀ꦠꦷꦏꦴꦫꦁ ꦈꦥꦛ꧀ꦜꦥꦺꦠ꧀ꦮꦴ ꦢꦴꦠꦧ꧀ꦧꦠ꧀ꦠꦴ ‘‘ꦢꦸꦠꦶꦪꦁ ꦕꦶꦠ꧀ꦠꦷꦏꦴꦫꦢꦴꦤ’’ꦤ꧀ꦠꦶ ꦮꦸꦠ꧀ꦠꦁ. ꦥꦸꦧ꧀ꦧꦏꦺꦲꦶ ꦥꦶꦠꦸꦥꦶꦠꦴꦩꦲꦺꦲꦶ ꦢꦶꦤ꧀ꦤꦥꦸꦧ꧀ꦧꦁ ꦏꦠꦥꦸꦧ꧀ꦧꦁ ꦗꦲꦴꦥꦺꦠꦸꦁ ꦤꦴꦩ ꦤꦴꦤꦸꦕ꧀ꦖꦮꦶꦏꦤ꧀ꦠꦶ ꦄꦠ꧀ꦠꦨꦴꦮꦱꦨꦴꦒꦮꦱꦺꦤ ꦲꦶꦫꦺꦴꦠ꧀ꦠꦥ꧀ꦥꦁ ꦥꦕ꧀ꦕꦸꦥꦛ꧀ꦜꦥꦺꦠ꧀ꦮꦴ ꦢꦴꦠꦧ꧀ꦧꦠꦺꦴ ‘‘ꦠꦠꦶꦪꦁ ꦲꦶꦫꦺꦴꦠ꧀ꦠꦥ꧀ꦥꦢꦴꦤ’’ꦤ꧀ꦠꦶ ꦮꦸꦠ꧀ꦠꦁ. ‘‘ꦄꦲꦁ ꦥꦕꦴꦩꦶ, ꦤ ꦆꦩꦺ ꦥꦕꦤ꧀ꦠꦶ, ꦤꦴꦫꦲꦴꦩꦶ ꦥꦕꦤ꧀ꦠꦺꦴ ꦄꦥꦕꦤ꧀ꦠꦴꦤꦁ ꦢꦴꦤꦁ ꦄꦢꦴꦠꦸ’’ꦤ꧀ꦠꦶ ꦌꦮꦁꦱꦚ꧀ꦚꦷ ꦲꦸꦠ꧀ꦮꦴ ꦢꦺꦤ꧀ꦠꦺꦴ ꦤꦶꦫꦮꦱꦺꦱꦁ ꦏꦠ꧀ꦮꦴ ꦢꦺꦠꦷꦠꦶ ꦄꦴꦲ ‘‘ꦕꦠꦸꦠ꧀ꦡꦁ ꦤꦶꦫꦮꦱꦺꦱꦢꦴꦤ’’ꦤ꧀ꦠꦶ. ‘‘ꦪꦡꦴ ꦠꦺꦱꦁ ꦥꦸꦧ꧀ꦧꦏꦴꦤꦁ ꦆꦱꦷꦤꦁ ꦠꦴꦤꦶ ꦩꦲꦴꦪꦚ꧀ꦚꦏꦴꦤꦶ ꦄꦲꦺꦱꦸꦁ, ꦌꦮꦁ ꦩꦺ ꦄꦪꦁ ꦢꦴꦤꦥꦫꦶꦨꦺꦴꦒꦺꦴ ꦨꦮꦶꦱ꧀ꦱꦠꦷ’’ꦠꦶ ꦌꦮꦁꦱꦚ꧀ꦚꦶꦤꦺꦴ ꦢꦴꦤꦁ ꦢꦏ꧀ꦑꦶꦟꦁ ꦄꦫꦲꦺꦱꦸ ꦢꦴꦠꦧ꧀ꦧꦠꦺꦴ ‘‘ꦥꦚ꧀ꦕꦩꦁ ꦢꦏ꧀ꦑꦶꦟꦺꦪ꧀ꦪꦢꦴꦤ’’ꦤ꧀ꦠꦶ ꦮꦸꦠ꧀ꦠꦁ. ‘‘ꦆꦩꦁ ꦩꦺ ꦢꦴꦤꦁ ꦢꦢꦠꦺꦴ ꦕꦶꦠ꧀ꦠꦁ ꦥꦱꦷꦢꦠꦷ’’ꦠꦶꦄꦴꦢꦶꦤꦴ ꦥꦷꦠꦶꦱꦺꦴꦩꦤꦱ꧀ꦱꦁ ꦈꦥ꧀ꦥꦴꦢꦺꦠ꧀ꦮꦴ ꦢꦺꦤ꧀ꦠꦱ꧀ꦱ ꦢꦴꦤꦁ ꦱꦺꦴꦩꦤꦱ꧀ꦱꦧꦴꦲꦸꦭ꧀ꦭꦥ꧀ꦥꦠ꧀ꦠꦶꦪꦴ ꦱꦺꦴꦩꦤꦱ꧀ꦱꦸꦥꦕꦴꦫꦁ ꦤꦴꦩ ꦲꦺꦴꦠꦷꦠꦶ ꦄꦴꦲ ‘‘ꦖꦛ꧀ꦜꦁ ꦱꦺꦴꦩꦤꦱ꧀ꦱꦸꦥꦮꦶꦕꦴꦫꦢꦴꦤ’’ꦤ꧀ꦠꦶ ꦮꦸꦠ꧀ꦠꦁ.

ꦢꦴꦤꦩꦲꦥ꧀ꦦꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦤꦤ꧀ꦢꦩꦴꦠꦴꦱꦸꦠ꧀ꦠꦮꦟ꧀ꦟꦤꦴ

꧕꧓. ꦢꦱꦩꦺ ‘‘ꦮꦸꦠ꧀ꦡꦮꦱ꧀ꦱꦺꦴ ꦥꦮꦴꦫꦺꦠ꧀ꦮꦴ…ꦥꦺ… ꦤꦶꦏ꧀ꦑꦩꦷ’’ꦠꦶ ꦄꦔ꧀ꦒꦸꦠ꧀ꦠꦫꦨꦴꦟꦏꦴꦤꦁ ꦩꦠꦺꦤꦺꦠꦁ ꦮꦸꦠ꧀ꦠꦁ. ꦩꦗ꧀ꦙꦶꦩꦨꦴꦟꦏꦴ ꦥꦤ ꦮꦢꦤ꧀ꦠꦶ ‘‘ꦨꦒꦮꦴ ꦈꦥꦏꦛ꧀ꦜꦴꦪ ꦮꦱ꧀ꦱꦹꦥꦤꦴꦪꦶꦏꦴꦪ ꦗꦺꦠꦮꦤꦠꦺꦴ ꦨꦶꦏ꧀ꦑꦸꦱꦔ꧀ꦓꦥꦫꦶꦮꦸꦠꦺꦴ ꦕꦴꦫꦶꦏꦁ ꦤꦶꦏ꧀ꦑꦩꦶ. ꦠꦺꦤꦺꦮ ꦕ ꦄꦏꦴꦭꦺ ꦤꦶꦏ꧀ꦑꦤ꧀ꦠꦠ꧀ꦠꦴ ꦏꦺꦴꦱꦭꦫꦴꦗꦴꦢꦪꦺꦴ ꦮꦴꦫꦺꦠꦸꦁ ꦄꦴꦫꦨꦶꦁꦱꦸ. ꦥꦮꦴꦫꦺꦠ꧀ꦮꦴ ꦲꦶ ꦕꦫꦟꦁ ꦧꦸꦢ꧀ꦣꦴꦕꦶꦟ꧀ꦟ’’ꦤ꧀ꦠꦶ. ꦥꦸꦟ꧀ꦟꦴꦪ ꦱꦩ꧀ꦩꦴꦥꦛꦶꦥꦠ꧀ꦠꦶꦁ ꦥꦕ꧀ꦕꦴꦱꦷꦱꦤ꧀ꦠꦺꦴ ꦨꦒꦮꦴ ‘‘ꦩꦩ ꦤꦶꦮꦠ꧀ꦠꦤꦥꦕ꧀ꦕꦪꦴ ꦠ꧀ꦮꦁ ꦏꦶꦁ ꦏꦫꦶꦱ꧀ꦱꦱꦷ’’ꦠꦶ ꦄꦴꦲ. ꦥꦸꦟ꧀ꦟꦴꦥꦶ…ꦥꦺ… ꦥꦧ꧀ꦧꦗꦷꦠꦶ ꦌꦠ꧀ꦡ ꦱꦺꦛ꧀ꦜꦶ ‘‘ꦥꦸꦟ꧀ꦟꦴꦪ ꦨꦒꦮꦴ ꦤꦶꦮꦠ꧀ꦠꦶꦠꦺꦴ’’ꦠꦶ ꦱꦸꦠ꧀ꦮꦴ ꦠꦁ ꦨꦸꦗꦶꦱ꧀ꦱꦁ ꦏꦠ꧀ꦮꦴ ꦣꦷꦠꦸꦛ꧀ꦜꦴꦤꦺ ꦜꦥꦺꦱꦶ. ꦱꦴ ꦥꦧ꧀ꦧꦗ꧀ꦗꦁ ꦪꦴꦕꦶꦠ꧀ꦮꦴ ꦥꦧ꧀ꦧꦗꦶ, ꦥꦧ꧀ꦧꦗꦶꦠ꧀ꦮꦴ ꦮꦶꦥꦱ꧀ꦱꦤꦁ ꦄꦴꦫꦨꦶ. ꦄꦡꦱ꧀ꦱꦴ ꦱꦠ꧀ꦡꦴ ꦄꦴꦫꦢ꧀ꦣꦮꦶꦥꦱ꧀ꦱꦏꦨꦴꦮꦁ ꦚꦠ꧀ꦮꦴ ꦆꦩꦁ ꦎꦨꦴꦱꦒꦴꦡꦁ ꦮꦶꦱ꧀ꦱꦗ꧀ꦗꦺꦱꦶ –

‘‘ꦥꦸꦟ꧀ꦟꦺ ꦥꦹꦫꦱ꧀ꦱꦸ ꦱꦢ꧀ꦣꦩ꧀ꦩꦁ, ꦕꦤ꧀ꦢꦺꦴ ꦥꦤ꧀ꦤꦫꦱꦺꦴ ꦪꦡꦴ;

ꦥꦫꦶꦥꦸꦟ꧀ꦟꦴꦪ ꦥꦚ꧀ꦚꦴꦪ, ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦱꦷ’’ꦠꦶ. (ꦡꦺꦫꦷꦒꦴ. ꧓);

ꦱꦴ ꦒꦴꦡꦴꦥꦫꦶꦪꦺꦴꦱꦴꦤꦺ ꦄꦫꦲꦠ꧀ꦠꦁ ꦥꦠ꧀ꦮꦴ ꦄꦨꦶꦚ꧀ꦚꦴꦠꦴ ꦱꦴꦮꦶꦏꦴ ꦄꦲꦺꦴꦱꦶ. ꦱꦺꦱꦩꦺꦠ꧀ꦡ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦤꦤ꧀ꦢꦩꦴꦠꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦲꦴꦪꦚ꧀ꦚꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦜꦩꦥꦟ꧀ꦟꦴꦱꦏꦁ ꦤꦶꦛ꧀ꦜꦶꦠꦁ.

꧖. ꦄꦧ꧀ꦪꦴꦏꦠꦮꦒ꧀ꦒꦺꦴ

꧑-꧒. ꦄꦧ꧀ꦪꦴꦏꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧕꧔-꧕꧕. ꦖꦛ꧀ꦜꦮꦒ꧀ꦒꦱ꧀ꦱ ꦥꦜꦩꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦢꦸꦠꦶꦪꦺ ꦄꦠꦷꦠꦺ ꦄꦠ꧀ꦠꦨꦴꦮꦺ ꦤꦶꦧ꧀ꦧꦠ꧀ꦠꦏꦁ ꦏꦩ꧀ꦩꦤ꧀ꦠꦶ ‘‘ꦥꦸꦫꦶꦩꦏꦩ꧀ꦩꦨꦮꦱ꧀ꦩꦶꦁ ꦩꦺꦴꦲꦺꦴ ꦄꦮꦶꦗ꧀ꦗꦴ, ꦄꦴꦪꦹꦲꦤꦴ ꦱꦔ꧀ꦑꦴꦫꦴ, ꦤꦶꦏꦤ꧀ꦠꦶ ꦠꦟ꧀ꦲꦴ, ꦈꦥꦒꦩꦤꦁ ꦈꦥꦴꦢꦴꦤꦁ, ꦕꦺꦠꦤꦴ ꦨꦮꦺꦴ’’ꦠꦶ ꦌꦮꦩꦴꦒꦠꦁ ꦱꦥꦫꦶꦏ꧀ꦑꦴꦫꦁ ꦥꦚ꧀ꦕꦮꦶꦣꦁ ꦏꦩ꧀ꦩꦮꦛ꧀ꦛꦩꦴꦲ. ꦌꦠꦫꦲꦶ ꦩꦺ ꦄꦠ꧀ꦠꦨꦴꦮꦺꦴ ꦤ ꦱꦶꦪꦴꦠꦶ ꦮꦶꦚ꧀ꦚꦴꦟꦤꦴꦩꦫꦹꦥꦱꦭ꦳ꦴꦪꦠꦤꦦꦱ꧀ꦱꦮꦺꦢꦤꦴꦱꦲꦶꦠꦁ ꦥꦕ꧀ꦕꦸꦥ꧀ꦥꦤ꧀ꦤꦁ ꦥꦚ꧀ꦕꦮꦶꦣꦁ ꦮꦶꦥꦴꦏꦮꦛ꧀ꦛꦩꦴꦲ. ꦪꦁ ꦄꦠ꧀ꦡꦶꦏꦤ꧀ꦠꦶ ꦪꦁ ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦏꦁ. ꦠꦺꦤꦴꦲ ‘‘ꦨꦹꦠ’’ꦤ꧀ꦠꦶ. ꦠꦚ꧀ꦲꦶ ꦥꦕ꧀ꦕꦪꦤꦶꦧ꧀ꦧꦠ꧀ꦠꦠꦴꦪ ‘‘ꦨꦹꦠ’’ꦤ꧀ꦠꦶ ꦮꦸꦕ꧀ꦕꦠꦶ. ꦠꦁ ꦥꦗꦲꦴꦩꦷꦠꦶ ꦠꦥ꧀ꦥꦛꦶꦧꦢ꧀ꦣꦕ꧀ꦖꦤ꧀ꦢꦫꦴꦒꦥ꧀ꦥꦲꦴꦤꦺꦤ ꦠꦠꦺꦴ ꦌꦮ ꦄꦴꦪꦠꦶꦁ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦴꦥꦴꦢꦤꦮꦱꦺꦤ ꦥꦗꦲꦴꦩꦶ ꦥꦫꦶꦕ꧀ꦕꦗꦴꦩꦶ. ꦲꦫꦶꦠꦤ꧀ꦠꦤ꧀ꦠꦶ (ꦩ. ꦤꦶ. ꦄꦛ꧀ꦜ. ꧑.꧓꧐꧓) ꦲꦫꦶꦠꦩꦺꦮ. ꦄꦤ꧀ꦠ-ꦱꦢ꧀ꦢꦺꦤ ꦥꦢꦮꦝ꧀ꦞꦤꦁ ꦏꦠꦁ ꦪꦡꦴ ‘‘ꦮꦤꦤ꧀ꦠꦁ ꦱꦸꦠ꧀ꦠꦤ꧀ꦠ’’ꦤ꧀ꦠꦶ, ꦄꦭ꧀ꦭꦠꦶꦟꦴꦢꦷꦤꦶ ꦄꦴꦒꦩ꧀ꦩ ꦤꦶꦧ꧀ꦧꦴꦪꦠꦷꦠꦶ ꦄꦠ꧀ꦡꦺꦴ. ꦥꦡꦤ꧀ꦠꦤ꧀ꦠꦶ ꦩꦲꦴꦩꦒ꧀ꦒꦁ. ꦱꦺꦭꦤ꧀ꦠꦤ꧀ꦠꦶ ꦥꦧ꧀ꦧꦠꦁ. ꦈꦢꦏꦤ꧀ꦠꦤ꧀ꦠꦶ ꦈꦢꦏꦁ. ꦫꦩꦟꦷꦪꦁ ꦮꦴ ꦨꦹꦩꦶꦨꦴꦒꦤ꧀ꦠꦶ ꦠꦶꦟꦒꦸꦩ꧀ꦧꦴꦢꦶꦫꦲꦶꦠꦁ ꦮꦶꦮꦶꦠ꧀ꦠꦁ ꦄꦧ꧀ꦨꦺꦴꦏꦴꦱꦨꦹꦩꦶꦨꦴꦒꦁ. ꦄꦤꦴꦲꦴꦫꦴꦠꦶ ꦄꦥꦕ꧀ꦕꦪꦴ ꦤꦶꦫꦸꦥꦴꦢꦴꦤꦴ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

ꦄꦧ꧀ꦪꦴꦏꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦠꦶꦱ꧀ꦱꦧ꧀ꦫꦲ꧀ꦩꦴꦱꦸꦠ꧀ꦠꦮꦟ꧀ꦟꦤꦴ

꧕꧖. ꦠꦠꦶꦪꦺ ꦮꦶꦮꦶꦠ꧀ꦠꦴꦤꦶ ꦠꦴꦢꦶꦱꦴꦤꦶ ꦥꦤ ꦥꦫꦶꦪꦤ꧀ꦠꦴꦤꦶ ꦄꦠꦶꦢꦹꦫꦴꦤꦶ ꦲꦺꦴꦤ꧀ꦠꦷꦠꦶ ꦄꦴꦲ ‘‘ꦄꦤ꧀ꦠꦶꦩꦥꦫꦶꦪꦤ꧀ꦠꦶꦩꦴꦤꦷ’’ꦠꦶ. ꦄꦤ꧀ꦠꦺ ꦨꦮꦴꦤꦶ ꦄꦤ꧀ꦠꦶꦩꦴꦤꦶ, ꦄꦤ꧀ꦠꦶꦩꦴꦤꦶꦪꦺꦮ ꦥꦫꦶꦪꦤ꧀ꦠꦶꦩꦴꦤꦶ. ꦈꦨꦪꦺꦤꦥꦶ ꦄꦠꦶꦢꦹꦫꦠꦁ ꦢꦱ꧀ꦱꦺꦠꦶ. ꦱꦩꦤ꧀ꦤꦴꦲꦴꦫꦺ ꦜꦥꦪꦩꦴꦤꦺꦴꦠꦶ ꦆꦤ꧀ꦢ꧀ꦫꦶꦪꦁ ꦱꦩꦴꦏꦴꦫꦺꦤ ꦮꦠ꧀ꦠꦺꦤ꧀ꦠꦺꦴ ꦆꦤ꧀ꦢ꧀ꦫꦶꦪꦱꦩꦠꦁ ꦥꦛꦶꦥꦴꦢꦺꦤ꧀ꦠꦺꦴ ꦤꦴꦩ ꦲꦺꦴꦠꦶ. ꦮꦶꦥꦱ꧀ꦱꦤꦴꦕꦶꦠ꧀ꦠꦱꦩ꧀ꦥꦪꦸꦠ꧀ꦠꦺꦴ ꦱꦩꦴꦣꦶ, ꦱꦠꦶꦥꦶ ꦱꦔ꧀ꦑꦴꦫꦤꦶꦩꦶꦠ꧀ꦠꦴꦮꦶꦫꦲꦺ ꦤꦶꦕ꧀ꦕꦤꦶꦩꦶꦠ꧀ꦠꦴꦢꦶꦮꦶꦫꦲꦠꦺꦴ ‘‘ꦄꦤꦶꦩꦶꦠ꧀ꦠꦺꦴ’’ꦠꦶ ꦮꦸꦕ꧀ꦕꦠꦷꦠꦶ ꦄꦴꦲ ‘‘ꦄꦤꦶꦩꦶꦠ꧀ꦠꦤ꧀ꦠꦶ ꦧꦭꦮꦮꦶꦥꦱ꧀ꦱꦤꦴꦱꦩꦴꦣꦶ’’ꦤ꧀ꦠꦶ.

ꦠꦶꦱ꧀ꦱꦧ꧀ꦫꦲ꧀ꦩꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧔-꧗. ꦱꦷꦲꦱꦺꦤꦴꦥꦠꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧕꧗-꧖꧐. ꦕꦠꦸꦠ꧀ꦡꦺ ꦏꦸꦕ꧀ꦖꦶꦠꦺꦴ ꦄꦫꦶꦪꦺꦴ ꦏꦢꦫꦶꦪꦺꦴ. ꦡꦢ꧀ꦣꦩꦕ꧀ꦖꦫꦶꦪꦱꦢꦶꦱꦁ ꦲꦶ ꦏꦸꦕ꧀ꦖꦶꦠꦁ ꦱꦧ꧀ꦧꦤꦶꦲꦷꦤꦁ ꦤꦠ꧀ꦡꦶ ꦱꦧ꧀ꦧꦏꦸꦱꦭꦴꦤꦁ ꦄꦴꦢꦶꦨꦹꦠꦱ꧀ꦱ ꦤꦶꦱꦺꦣꦤꦠꦺꦴ. ꦱꦺꦱꦩꦺꦠ꧀ꦡ ꦥꦚ꧀ꦕꦩꦴꦢꦷꦤꦶ ꦕ ꦈꦠ꧀ꦠꦴꦤꦠ꧀ꦡꦴꦤꦺꦮ.

ꦱꦷꦲꦱꦺꦤꦴꦥꦠꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦥꦕꦭꦴꦪꦩꦴꦤꦱꦸꦠ꧀ꦠꦮꦟ꧀ꦟꦤꦴ

꧖꧑. ꦄꦛ꧀ꦜꦩꦺ ꦄꦴꦭꦺꦴꦏꦱꦚ꧀ꦚꦁ ꦩꦤꦱꦶ ꦏꦫꦺꦪ꧀ꦪꦴꦱꦷꦠꦶ ꦢꦶꦮꦴ ꦮꦴ ꦫꦠ꧀ꦠꦶꦁ ꦮꦴ ꦱꦹꦫꦶꦪꦥꦗ꧀ꦗꦺꦴꦠꦕꦤ꧀ꦢꦩꦟꦶꦄꦴꦢꦷꦤꦁ ꦄꦴꦭꦺꦴꦏꦁ ‘‘ꦄꦴꦭꦺꦴꦏꦺꦴ’’ꦠꦶ ꦩꦤꦱꦶ ꦏꦫꦺꦪ꧀ꦪꦴꦱꦶ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦱꦹꦫꦶꦪꦕꦤ꧀ꦢꦴꦭꦺꦴꦏꦴꦢꦶꦁ ꦢꦶꦮꦴ ꦫꦠ꧀ꦠꦶꦚ꧀ꦕ ꦈꦥꦭꦢ꧀ꦣꦁ ꦪꦡꦴꦭꦢ꧀ꦣꦮꦱꦺꦤꦺꦮ ꦩꦤꦱꦶ ꦏꦫꦺꦪ꧀ꦪꦴꦱꦶ, ꦕꦶꦠ꧀ꦠꦺ ꦜꦥꦺꦪ꧀ꦪꦴꦱꦶ. ꦪꦡꦴ ꦠꦺ ꦱꦸꦨꦴꦮꦶꦠꦴꦭꦺꦴꦏꦏꦱꦶꦟꦱ꧀ꦱ ꦮꦶꦪ ꦏꦱꦶꦟꦴꦭꦺꦴꦏꦺꦴ ꦪꦢꦶꦕ꧀ꦖꦏꦁ ꦪꦴꦮꦢꦶꦕ꧀ꦖꦏꦚ꧀ꦕ ꦱꦺꦴ ꦄꦴꦭꦺꦴꦏꦺꦴ ꦫꦠ꧀ꦠꦶꦪꦁ ꦈꦥꦠꦶꦛ꧀ꦜꦠꦶ, ꦪꦺꦤ ꦠꦠ꧀ꦡ ꦢꦶꦮꦴꦱꦚ꧀ꦚꦁ ꦜꦥꦺꦪ꧀ꦪꦴꦱꦶ, ꦢꦶꦮꦴ ꦮꦶꦪ ꦮꦶꦒꦠꦡꦶꦤꦩꦶꦢ꧀ꦣꦺꦴꦮ ꦨꦮꦺꦪ꧀ꦪꦴꦱꦷꦠꦶ. ꦠꦺꦤꦴꦲ ‘‘ꦪꦡꦴ ꦢꦶꦮꦴ ꦠꦡꦴ ꦫꦠ꧀ꦠꦶ’’ꦤ꧀ꦠꦶ. ꦆꦠꦶ ꦮꦶꦮꦛꦺꦤ ꦕꦺꦠꦱꦴꦠꦶ ꦌꦮꦁ ꦄꦥꦶꦲꦶꦠꦺꦤ ꦕꦶꦠ꧀ꦠꦺꦤ ꦡꦶꦤꦩꦶꦢ꧀ꦣꦥꦶꦣꦴꦤꦺꦤ ꦄꦥꦶꦲꦶꦠꦠ꧀ꦠꦴ. ꦄꦥꦫꦶꦪꦺꦴꦤꦢ꧀ꦣꦺꦤꦴꦠꦶ ꦱꦩꦤ꧀ꦠꦠꦺꦴ ꦄꦤꦺꦴꦤꦢ꧀ꦣꦺꦤ ꦄꦱꦚ꧀ꦖꦴꦢꦶꦠꦺꦤ. ꦱꦲꦺꦴꦨꦴꦱꦤ꧀ꦠꦶ ꦱꦚꦴꦟꦺꦴꦨꦴꦱꦁ. ꦡꦶꦤꦩꦶꦢ꧀ꦣꦮꦶꦤꦺꦴꦢꦤꦄꦴꦭꦺꦴꦏꦺꦴꦥꦶ ꦮꦴ ꦲꦺꦴꦠꦸ ꦏꦱꦶꦟꦴꦭꦺꦴꦏꦺꦴꦥꦶ ꦮꦴ ꦥꦫꦶꦏꦩ꧀ꦩꦴꦭꦺꦴꦏꦺꦴꦥꦶ ꦮꦴ, ꦈꦥꦏ꧀ꦏꦶꦭꦺꦱꦴꦭꦺꦴꦏꦺꦴ ꦮꦶꦪ ꦱꦧ꧀ꦧꦺꦴꦪꦁ ꦄꦴꦭꦺꦴꦏꦺꦴ ꦚꦴꦟꦱꦩꦸꦛ꧀ꦜꦴꦤꦺꦴꦮꦴꦠꦶ. ꦪꦺꦱꦁ ꦄꦏꦫꦟꦺ ꦥꦸꦒ꧀ꦒꦭꦺꦴ ꦩꦲꦴꦗꦴꦤꦶꦪꦺꦴ ꦲꦺꦴꦠꦶ, ꦠꦴꦤꦶ ꦄꦮꦱ꧀ꦱꦁ ꦏꦴꦠꦧ꧀ꦧꦴꦤꦶ. ꦪꦴꦤꦶ ꦄꦏꦴꦠꦸꦩ꧀ꦥꦶ ꦮꦛ꧀ꦛꦤ꧀ꦠꦶ, ꦱꦠꦶ ꦱꦩꦮꦴꦪꦺ ꦏꦴꦠꦧ꧀ꦧꦠꦺꦴ ꦠꦴꦤꦶ ꦏꦫꦟꦷꦪꦴꦤꦷꦠꦶ ꦄꦴꦲ ‘‘ꦆꦠꦫꦴꦤꦶ ꦏꦫꦟꦷꦪꦴꦤꦷ’’ꦠꦶ. ꦄꦡ ꦮꦴ ꦏꦠ꧀ꦠꦧ꧀ꦧꦴꦤꦶ ꦏꦩ꧀ꦩꦴꦤꦶ ꦏꦫꦟꦁ ꦄꦫꦲꦤ꧀ꦠꦷꦠꦶ ꦏꦫꦟꦷꦪꦴꦤꦶ. ꦆꦠꦫꦴꦤꦶ ꦏꦶꦕ꧀ꦕꦴꦤꦷꦠꦶꦥꦶ ꦮꦢꦤ꧀ꦠꦶ.

ꦄꦴꦢꦶꦤꦪꦥ꧀ꦥꦮꦠ꧀ꦠꦴ ꦮꦶꦒ꧀ꦒꦴꦲꦶꦏꦏꦡꦴꦠꦶ ‘‘ꦤ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦱꦶ, ꦄꦲꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦴꦩꦶ, ꦏꦶꦁ ꦠ꧀ꦮꦁ ꦆꦩꦁ ꦣꦩ꧀ꦩꦮꦶꦤꦪꦁ ꦄꦴꦗꦴꦤꦶꦱ꧀ꦱꦱꦶ, ꦩꦶꦕ꧀ꦖꦴꦥꦛꦶꦥꦤ꧀ꦤꦺꦴ ꦠ꧀ꦮꦩꦱꦶ, ꦄꦲꦩꦱ꧀ꦩꦶ ꦱꦩ꧀ꦩꦴꦥꦛꦶꦥꦤ꧀ꦤꦺꦴ, ꦱꦲꦶꦠꦁ ꦩꦺ, ꦄꦱꦲꦶꦠꦁ ꦠꦺ, ꦥꦸꦫꦺꦮꦕꦤꦷꦪꦁ ꦥꦕ꧀ꦖꦴ ꦄꦮꦕ, ꦥꦕ꧀ꦖꦴꦮꦕꦤꦷꦪꦁ ꦥꦸꦫꦺ ꦄꦮꦕ, ꦄꦣꦶꦕꦶꦟ꧀ꦟꦁ ꦠꦺ ꦮꦶꦥꦫꦴꦮꦠ꧀ꦠꦁ, ꦄꦴꦫꦺꦴꦥꦶꦠꦺꦴ ꦠꦺ ꦮꦴꦢꦺꦴ, ꦤꦶꦒ꧀ꦒꦲꦶꦠꦺꦴ ꦠ꧀ꦮꦩꦱꦶ. ꦕꦫ ꦮꦴꦢꦥ꧀ꦥꦩꦺꦴꦏ꧀ꦑꦴꦪ, ꦤꦶꦧ꧀ꦧꦺꦜꦺꦲꦶ ꦮꦴ ꦱꦕꦺ ꦥꦲꦺꦴꦱꦷ’’ꦠꦶ (ꦢꦷ. ꦤꦶ. ꧑.꧑꧘; ꦩ. ꦤꦶ. ꧓.꧔꧑) ꦌꦮꦁꦥꦮꦠ꧀ꦠꦴ ꦏꦡꦴ. ꦠꦠ꧀ꦡ ꦱꦲꦶꦠꦁ ꦩꦺꦠꦶ (ꦢꦷ. ꦤꦶ. ꦄꦛ꧀ꦜ. ꧑.꧑꧘) ꦩꦪ꧀ꦲꦁ ꦮꦕꦤꦁ ꦱꦲꦶꦠꦁ ꦱꦶꦭꦶꦛ꧀ꦜꦁ, ꦄꦠ꧀ꦡꦪꦸꦠ꧀ꦠꦁ ꦏꦴꦫꦟꦪꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦱꦲꦶꦠꦤ꧀ꦠꦶ ꦮꦴ ꦥꦸꦧ꧀ꦧꦴꦥꦫꦴꦮꦶꦫꦸꦢ꧀ꦣꦁ. ꦄꦱꦲꦶꦠꦁ ꦠꦺꦠꦶ ꦠꦸꦪ꧀ꦲꦁ ꦮꦕꦤꦁ ꦄꦱꦲꦶꦠꦁ ꦄꦱꦶꦭꦶꦛ꧀ꦜꦁ. ꦄꦣꦶꦕꦶꦟ꧀ꦟꦁ ꦠꦺ ꦮꦶꦥꦫꦴꦮꦠ꧀ꦠꦤ꧀ꦠꦶ ꦪꦁ ꦠꦸꦪ꧀ꦲꦁ ꦢꦷꦓꦫꦠ꧀ꦠꦴꦕꦶꦟ꧀ꦟꦮꦱꦺꦤ ꦱꦸꦥ꧀ꦥꦒꦸꦟꦁ, ꦠꦁ ꦩꦪ꧀ꦲꦁ ꦌꦏꦮꦕꦤꦺꦤꦺꦮ ꦮꦶꦥꦫꦴꦮꦠ꧀ꦠꦁ ꦥꦫꦶꦮꦠ꧀ꦠꦶꦠ꧀ꦮꦴ ꦜꦶꦠꦁ, ꦤ ꦏꦶꦚ꧀ꦕꦶ ꦗꦴꦤꦴꦱꦷꦠꦶ ꦄꦠ꧀ꦡꦺꦴ. ꦄꦴꦫꦺꦴꦥꦶꦠꦺꦴ ꦠꦺ ꦮꦴꦢꦺꦴꦠꦶ ꦩꦪꦴ ꦠꦮ ꦮꦴꦢꦺ ꦢꦺꦴꦱꦺꦴ ꦄꦴꦫꦺꦴꦥꦶꦠꦺꦴ. ꦕꦫ ꦮꦴꦢꦥ꧀ꦥꦩꦺꦴꦏ꧀ꦑꦴꦪꦴꦠꦶ ꦢꦺꦴꦱꦩꦺꦴꦕꦤꦠ꧀ꦡꦁ ꦕꦫ ꦮꦶꦕꦫ, ꦠꦠ꧀ꦡ ꦠꦠ꧀ꦡ ꦒꦤ꧀ꦠ꧀ꦮꦴ ꦱꦶꦏ꧀ꦑꦴꦠꦶ ꦄꦠ꧀ꦡꦺꦴ. ꦤꦶꦧ꧀ꦧꦺꦜꦺꦲꦶ ꦮꦴ ꦱꦕꦺ ꦥꦲꦺꦴꦱꦷꦠꦶ ꦄꦡ ꦱꦪꦁ ꦥꦲꦺꦴꦱꦶ, ꦆꦢꦴꦤꦶ ꦌꦮ ꦤꦶꦧ꧀ꦧꦺꦜꦺꦲꦷꦠꦶ ꦄꦠ꧀ꦡꦺꦴ.

ꦠꦟ꧀ꦲꦴ ꦱꦧ꧀ꦧꦱꦺꦴ ꦑꦷꦪꦤ꧀ꦠꦶ ꦌꦠ꧀ꦡꦴꦠꦶ ꦠꦟ꧀ꦲꦴꦱꦔ꧀ꦑꦪꦺꦴ, ꦠꦱ꧀ꦩꦶꦁ. ꦠꦟ꧀ꦲꦴꦱꦔ꧀ꦑꦪꦺꦠꦶ ꦕ ꦆꦢꦁ ꦮꦶꦱꦪꦺ ꦨꦸꦩ꧀ꦩꦤ꧀ꦠꦶ ꦄꦴꦲ ‘‘ꦠꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ’’ꦠꦶ. ꦮꦶꦩꦸꦠ꧀ꦠꦕꦶꦠ꧀ꦠꦠꦴꦪꦴꦠꦶ ꦱꦧ꧀ꦧꦱꦁꦏꦶꦭꦺꦱꦺꦲꦶ ꦮꦶꦥ꧀ꦥꦪꦸꦠ꧀ꦠꦕꦶꦠ꧀ꦠꦠꦴꦪ. ꦄꦥꦫꦨꦴꦒꦺ ꦥꦛꦶꦥꦢꦴ ꦤꦴꦩ ꦄꦫꦶꦪꦱꦕ꧀ꦕꦴꦨꦶꦱꦩꦪꦺꦴ. ꦱꦴ ꦱꦴꦱꦤꦕꦴꦫꦶꦒꦺꦴꦕꦫꦴ ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦠꦺꦴꦠꦶ ꦄꦴꦲ ‘‘ꦥꦸꦧ꧀ꦧꦨꦴꦒꦥ꧀ꦥꦛꦶꦥꦢꦁ ꦱꦁꦑꦶꦠ꧀ꦠꦺꦤ ꦢꦺꦱꦺꦡꦴꦠꦶ ꦥꦸꦕ꧀ꦖꦠꦷ’’ꦠꦶ. ꦄꦏꦸꦥ꧀ꦥꦣꦩ꧀ꦩꦠꦴꦪ ꦑꦪꦮꦪꦱꦔ꧀ꦑꦴꦠꦁ ꦄꦤ꧀ꦠꦁ ꦄꦠꦷꦠꦴꦠꦶ ꦄꦕ꧀ꦕꦤ꧀ꦠꦴ, ꦱꦺꦴ ꦌꦮ ꦄꦥꦫꦶꦲꦴꦪꦤꦱꦨꦴꦮꦠ꧀ꦠꦴ ꦄꦕ꧀ꦕꦤ꧀ꦠꦴ ꦤꦶꦛ꧀ꦜꦴ ꦄꦱ꧀ꦱꦴꦠꦶ ꦄꦕ꧀ꦕꦤ꧀ꦠꦤꦶꦛ꧀ꦜꦴ. ꦠꦺꦤꦴꦲ ‘‘ꦌꦏꦤ꧀ꦠꦤꦶꦛ꧀ꦜꦺꦴ ꦱꦠꦠꦤꦶꦛ꧀ꦜꦺꦴꦠꦶ ꦄꦠ꧀ꦡꦺꦴ’’ꦠꦶ. ꦤ ꦲꦶ ꦥꦛꦶꦮꦶꦢ꧀ꦣꦱ꧀ꦱ ꦭꦺꦴꦏꦸꦠ꧀ꦠꦫꦣꦩ꧀ꦩꦱ꧀ꦱ ꦢꦱ꧀ꦱꦤ꧀ꦤꦁ ꦏꦸꦥ꧀ꦥꦤ꧀ꦤꦁ ꦤꦴꦩ ꦄꦠ꧀ꦡꦶ. ꦄꦕ꧀ꦕꦤ꧀ꦠꦩꦺꦮ ꦕꦠꦹꦲꦶ ꦪꦺꦴꦒꦺꦲꦶ ꦑꦺꦩꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦕ꧀ꦕꦤ꧀ꦠꦪꦺꦴꦒꦏ꧀ꦑꦺꦩꦷ. ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦱ꧀ꦱ ꦮꦸꦱꦶꦠꦠ꧀ꦠꦴ ꦠꦱ꧀ꦱ ꦕ ꦄꦥꦫꦶꦲꦴꦪꦤꦱꦨꦴꦮꦠ꧀ꦠꦴ ꦄꦕ꧀ꦕꦤ꧀ꦠꦁ ꦧ꧀ꦫꦲ꧀ꦩꦕꦴꦫꦷꦠꦶ ꦄꦕ꧀ꦕꦤ꧀ꦠꦧ꧀ꦫꦲ꧀ꦩꦕꦴꦫꦷ. ꦠꦺꦤꦴꦲ ‘‘ꦤꦶꦕ꧀ꦕꦧ꧀ꦫꦲ꧀ꦩꦕꦴꦫꦷꦠꦶ ꦄꦠ꧀ꦡꦺꦴ’’ꦠꦶ. ꦥꦫꦶꦪꦺꦴꦱꦴꦤꦤ꧀ꦠꦶ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦥꦫꦶꦪꦥꦫꦶꦪꦺꦴꦱꦴꦤꦁ ꦮꦛ꧀ꦛꦢꦸꦏ꧀ꦑꦥꦫꦶꦪꦺꦴꦱꦴꦤꦚ꧀ꦕ.

ꦥꦚ꧀ꦕꦏ꧀ꦑꦤ꧀ꦣꦴꦠꦶ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ. ꦱꦏ꧀ꦏꦴꦪꦱꦧ꧀ꦧꦚ꧀ꦲꦶ ꦱꦤ꧀ꦣꦴꦪ ꦆꦣ ‘‘ꦱꦧ꧀ꦧꦺ ꦣꦩ꧀ꦩꦴ’’ꦠꦶ ꦮꦸꦠ꧀ꦠꦁ ꦮꦶꦥꦱ꧀ꦱꦤꦴꦮꦶꦱꦪꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦠꦱ꧀ꦩꦴ ꦄꦴꦪꦠꦤꦣꦴꦠꦸꦪꦺꦴꦥꦶ ꦠꦒ꧀ꦒꦠꦶꦏꦴ ꦌꦮ ꦢꦛ꧀ꦜꦧ꧀ꦧꦴ. ꦠꦺꦤꦴꦲ ꦨꦒꦮꦴ ‘‘ꦤꦴꦭꦁ ꦄꦨꦶꦤꦶꦮꦺꦱꦴꦪꦴ’’ꦠꦶ. ꦤ ꦪꦸꦠ꧀ꦠꦴ ꦄꦨꦶꦤꦶꦮꦺꦱꦴꦪ ‘‘ꦌꦠꦁ ꦩꦩ, ꦌꦱꦺꦴ ꦩꦺ ꦄꦠ꧀ꦠꦴ’’ꦠꦶ ꦄꦗ꧀ꦙꦺꦴꦱꦴꦤꦴꦪ. ‘‘ꦄꦭꦩꦺꦮ ꦤꦶꦧ꧀ꦧꦶꦤ꧀ꦢꦶꦠꦸꦁ ꦄꦭꦁ ꦮꦶꦫꦗ꧀ꦗꦶꦠꦸ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧒꧗꧒; ꦱꦁ. ꦤꦶ. ꧒.꧑꧒꧔, ꧑꧒꧘, ꧑꧓꧔, ꧑꧔꧓) ꦮꦶꦪ ꦄꦭꦁ-ꦱꦢ꧀ꦢꦺꦴ ꦪꦸꦠ꧀ꦠꦠ꧀ꦡꦺꦴꦥꦶ ꦲꦺꦴꦠꦷꦠꦶ ꦄꦴꦲ ‘‘ꦤ ꦪꦸꦠ꧀ꦠꦴ’’ꦠꦶ. ꦱꦩ꧀ꦥꦗ꧀ꦗꦤ꧀ꦠꦷꦠꦶ ꦨꦮꦤ꧀ꦠꦶ. ꦪꦢꦶꦥꦶ ‘‘ꦠꦠꦶꦪꦴ ꦕꦠꦸꦠ꧀ꦡꦷ’’ꦠꦶ ꦆꦢꦁ ꦮꦶꦱꦸꦢ꧀ꦣꦶꦢ꧀ꦮꦪꦁ ꦄꦨꦶꦚ꧀ꦚꦴꦥꦚ꧀ꦚꦴ, ꦠꦱ꧀ꦱ ꦥꦤ ꦱꦥꦕ꧀ꦕꦪꦤꦴꦩꦫꦹꦥꦢꦱ꧀ꦱꦤꦨꦴꦮꦠꦺꦴ ꦱꦠꦶ ꦕ ꦥꦕ꧀ꦕꦪꦥꦫꦶꦒ꧀ꦒꦲꦺ ꦱꦥꦕ꧀ꦕꦪꦠ꧀ꦠꦴ ꦄꦤꦶꦕ꧀ꦕꦤ꧀ꦠꦶ, ꦤꦴꦩꦫꦹꦥꦱ꧀ꦱ ꦄꦤꦶꦕ꧀ꦕꦠꦴꦪ ꦢꦸꦏ꧀ꦑꦁ, ꦢꦸꦏ꧀ꦑꦚ꧀ꦕ ꦄꦤꦠ꧀ꦠꦴꦠꦶ ꦄꦠ꧀ꦡꦠꦺꦴ ꦭꦏ꧀ꦑꦟꦠ꧀ꦠꦪꦁ ꦱꦸꦥꦴꦏꦛꦩꦺꦮ ꦲꦺꦴꦠꦷꦠꦶ ꦄꦴꦲ ‘‘ꦄꦤꦶꦕ꧀ꦕꦁ ꦢꦸꦏ꧀ꦑꦁ ꦄꦤꦠ꧀ꦠꦴꦠꦶ ꦚꦴꦠꦥꦫꦶꦚ꧀ꦚꦴꦪ ꦄꦨꦶꦗꦴꦤꦴꦠꦷ’’ꦠꦶ. ꦠꦡꦺꦮ ꦠꦷꦫꦟꦥꦫꦶꦚ꧀ꦚꦴꦪꦴꦠꦶ ꦆꦩꦶꦤꦴ ꦄꦤꦶꦕ꧀ꦕꦴꦢꦶꦨꦴꦮꦺꦤ ꦤꦴꦭꦁ ꦄꦨꦶꦤꦶꦮꦺꦱꦴꦪꦴꦠꦶ ꦤꦴꦩꦫꦹꦥꦱ꧀ꦱ ꦈꦥꦱꦁꦲꦫꦠꦶ, ꦤ ꦄꦨꦶꦚ꧀ꦚꦴꦥꦚ꧀ꦚꦴꦤꦁ ꦱꦩ꧀ꦨꦴꦫꦣꦩ꧀ꦩꦴꦤꦁ. ꦥꦸꦫꦶꦩꦴꦪ ꦲꦶ ꦄꦠ꧀ꦡꦠꦺꦴ ꦄꦴꦥꦤ꧀ꦤꦁ ꦭꦏ꧀ꦑꦟꦠ꧀ꦠꦪꦁ ꦒꦟ꧀ꦲꦴꦠꦶ ꦱꦭꦏ꧀ꦑꦟꦱꦭ꧀ꦭꦏ꧀ꦑꦟꦥꦫꦠ꧀ꦠꦴ ꦠꦱ꧀ꦱꦴ. ꦢꦸꦠꦶꦪꦴꦪ ꦱꦫꦹꦥꦠꦺꦴ ꦠꦱ꧀ꦱꦴ ꦭꦏ꧀ꦑꦟꦠ꧀ꦠꦪꦴꦫꦺꦴꦥꦤꦮꦱꦺꦤ ꦱꦩ꧀ꦩꦱꦤꦨꦴꦮꦠꦺꦴ. ꦌꦏꦕꦶꦠ꧀ꦠꦏ꧀ꦑꦟꦶꦏꦠꦴꦪ ꦄꦨꦶꦤꦶꦥꦴꦠꦩꦠ꧀ꦠꦠꦴꦪ ꦕ ꦄꦥ꧀ꦥꦩꦠ꧀ꦠꦏꦩ꧀ꦥꦶ. ꦫꦹꦥꦥꦫꦶꦒ꧀ꦒꦲꦱ꧀ꦱ ꦎꦭ꦳ꦴꦫꦶꦏꦨꦴꦮꦠꦺꦴ ꦄꦫꦹꦥꦥꦫꦶꦒ꧀ꦒꦲꦁ ꦢꦱ꧀ꦱꦺꦠꦶ. ꦢꦱ꧀ꦱꦺꦤ꧀ꦠꦺꦴ ꦕ ꦮꦺꦢꦤꦴꦪ ꦄꦴꦱꦤ꧀ꦤꦨꦴꦮꦠꦺꦴ, ꦮꦶꦱꦺꦱꦠꦺꦴ ꦱꦸꦑꦱꦴꦫꦴꦒꦶꦠꦴꦪ, ꦨꦮꦱ꧀ꦱꦴꦢꦒꦣꦶꦠꦩꦴꦤꦱꦠꦴꦪ ꦕ ꦡꦺꦫꦱ꧀ꦱ ꦮꦺꦢꦤꦴꦮꦱꦺꦤ ꦤꦶꦧ꧀ꦧꦠ꧀ꦠꦺꦠ꧀ꦮꦴ ꦢꦱ꧀ꦱꦺꦠꦶ.

ꦑꦪꦮꦶꦫꦴꦒꦺꦴꦠꦶ ꦑꦪꦱꦔ꧀ꦑꦴꦠꦺꦴ ꦮꦶꦫꦴꦒꦺꦴ ꦱꦔ꧀ꦑꦴꦫꦴꦤꦁ ꦥꦭꦸꦗ꧀ꦗꦤꦴ. ꦪꦁ ꦄꦴꦒꦩ꧀ꦩ ꦱꦧ꧀ꦧꦱꦺꦴ ꦱꦔ꧀ꦑꦴꦫꦺꦲꦶ ꦮꦶꦫꦗ꧀ꦗꦤꦴ ꦲꦺꦴꦠꦶ, ꦠꦁ ꦤꦶꦧ꧀ꦧꦴꦤꦁ ꦄꦕ꧀ꦕꦤ꧀ꦠꦮꦶꦫꦴꦒꦺꦴ. ꦤꦶꦫꦺꦴꦣꦴꦤꦸꦥꦱ꧀ꦱꦶꦩ꧀ꦲꦶꦥꦷꦠꦶ ꦤꦶꦫꦺꦴꦣꦴꦤꦸꦥꦱ꧀ꦱꦶꦥꦢꦺꦥꦶ. ꦌꦱꦺꦮ ꦤꦪꦺꦴꦠꦶ ꦄꦠꦶꦢꦶꦱꦶꦠ꧀ꦮꦴ ꦠꦁ ꦌꦏꦢꦺꦱꦺꦤ ꦮꦶꦮꦫꦤ꧀ꦠꦺꦴ ‘‘ꦤꦶꦫꦺꦴꦣꦺꦴꦥꦶ ꦲꦶ…ꦥꦺ… ꦢꦸꦮꦶꦣꦺꦴꦪꦺꦮꦴ’’ꦠꦶ ꦄꦴꦲ. ꦑꦤ꧀ꦣꦴꦤꦁ ꦥꦫꦶꦕ꧀ꦕꦗꦤꦁ ꦠꦥ꧀ꦥꦛꦶꦧꦢ꧀ꦣꦏꦶꦭꦺꦱꦥ꧀ꦥꦲꦴꦤꦮꦱꦺꦤꦴꦠꦶ ꦪꦺꦤꦴꦏꦴꦫꦺꦤ ꦮꦶꦥꦱ꧀ꦱꦤꦴ ꦏꦶꦭꦺꦱꦺ ꦥꦗꦲꦠꦶ, ꦠꦺꦤꦴꦏꦴꦫꦺꦤ ꦠꦁꦤꦶꦩꦶꦠ꧀ꦠꦏ꧀ꦑꦤ꧀ꦣꦺ ꦕ ꦥꦗꦲꦠꦷꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦷꦠꦶ ꦄꦴꦲ ‘‘ꦱꦴ ꦲꦶ…ꦥꦺ… ꦮꦺꦴꦱ꧀ꦱꦗ꧀ꦗꦠꦷ’’ꦠꦶ. ꦄꦴꦫꦩ꧀ꦩꦟꦠꦺꦴꦠꦶ ꦏꦶꦕ꧀ꦕꦱꦴꦣꦤꦮꦱꦺꦤ ꦄꦴꦫꦩ꧀ꦩꦟꦏꦫꦟꦠꦺꦴ. ꦌꦮꦚ꧀ꦲꦶ ꦩꦒ꧀ꦒꦠꦺꦴ ꦄꦚ꧀ꦚꦺꦱꦁ ꦤꦶꦧ꧀ꦧꦴꦤꦴꦫꦩ꧀ꦩꦟꦴꦤꦁ ꦥꦏ꧀ꦑꦤ꧀ꦢꦤꦮꦺꦴꦱ꧀ꦱꦒ꧀ꦒꦴꦨꦴꦮꦺꦴ ꦱꦶꦢ꧀ꦣꦺꦴꦮ ꦲꦺꦴꦠꦶ. ꦥꦫꦶꦕ꧀ꦕꦗꦤꦺꦤ ꦥꦏ꧀ꦑꦤ꧀ꦢꦤꦺꦤ ꦕꦴꦠꦶ ꦢ꧀ꦮꦷꦲꦶꦥꦶ ꦮꦴ ꦏꦴꦫꦟꦺꦲꦶ. ꦱꦺꦴꦠꦶ ꦩꦒ꧀ꦒꦺꦴ. ꦱꦧ꧀ꦧꦺꦱꦁ ꦑꦤ꧀ꦣꦴꦤꦁ ꦮꦺꦴꦱ꧀ꦱꦗ꧀ꦗꦤꦁ ꦠꦥ꧀ꦥꦛꦶꦧꦢ꧀ꦣꦱꦁꦏꦶꦭꦺꦱꦥ꧀ꦥꦲꦴꦤꦺꦤ ꦢꦛ꧀ꦜꦧ꧀ꦧꦁ. ꦪꦱ꧀ꦩꦴ ꦮꦴ ꦮꦶꦥꦱ꧀ꦱꦤꦴꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦷꦠꦶ ꦩꦒ꧀ꦒꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦁ ꦱꦤ꧀ꦣꦴꦪꦴꦲ. ꦩꦒ꧀ꦒꦺꦴ ꦕ ꦱꦩꦸꦕ꧀ꦖꦺꦢꦮꦱꦺꦤ ꦏꦶꦭꦺꦱꦺ ꦑꦤ꧀ꦣꦺ ꦕ ꦥꦫꦶꦕ꧀ꦕꦗꦠꦶ, ꦠꦱ꧀ꦩꦴ ꦪꦡꦴꦏ꧀ꦏꦩꦁ ꦮꦶꦥꦱ꧀ꦱꦤꦴꦩꦒ꧀ꦒꦴꦤꦚ꧀ꦕ ꦮꦱꦺꦤ ꦥꦏ꧀ꦑꦤ꧀ꦢꦤꦥꦫꦶꦕ꧀ꦕꦴꦒꦮꦺꦴꦱ꧀ꦱꦒ꧀ꦒꦴꦥꦶ ꦮꦺꦢꦶꦠꦧ꧀ꦧꦴ. ꦠꦢꦸꦨꦪꦱꦩꦔ꧀ꦒꦷꦠꦶ ꦮꦶꦥꦱ꧀ꦱꦤꦴꦱꦩꦔ꧀ꦒꦷ ꦩꦒ꧀ꦒꦱꦩꦔ꧀ꦒꦷ ꦕ. ‘‘ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦪ ꦤꦶꦕ꧀ꦕꦱꦚ꧀ꦚꦁ ꦥꦗꦲꦠꦷ’’ꦠꦶꦄꦴꦢꦶꦮꦕꦤꦠꦺꦴ (ꦥꦛꦶ. ꦩ. ꧑.꧕꧒) ꦲꦶ ꦪꦡꦴ ꦮꦶꦥꦱ꧀ꦱꦤꦴꦪ ꦏꦶꦭꦺꦱꦴꦤꦁ ꦥꦫꦶꦕ꧀ꦕꦴꦒꦥ꧀ꦥꦛꦶꦤꦶꦱ꧀ꦱꦒ꧀ꦒꦺꦴ ꦭꦧ꧀ꦨꦠꦶ, ꦌꦮꦁ ꦄꦴꦪꦠꦶꦁ ꦠꦺꦲꦶ ꦏꦶꦭꦺꦱꦺꦲꦶ ꦈꦥ꧀ꦥꦴꦢꦺꦠꦧ꧀ꦧꦏ꧀ꦑꦤ꧀ꦣꦴꦤꦩ꧀ꦥꦶ ꦥꦫꦶꦕ꧀ꦕꦴꦒꦥꦛꦶꦤꦶꦱ꧀ꦱꦒ꧀ꦒꦺꦴ ꦮꦠ꧀ꦠꦧ꧀ꦧꦺꦴ. ꦥꦏ꧀ꦑꦤ꧀ꦢꦤꦥꦛꦶꦤꦶꦱ꧀ꦱꦒ꧀ꦒꦺꦴ ꦥꦤ ꦩꦒ꧀ꦒꦺ ꦭꦧ꧀ꦨꦩꦴꦤꦴꦪ ꦌꦏꦤ꧀ꦠꦏꦴꦫꦟꦨꦹꦠꦴꦪ ꦮꦸꦛ꧀ꦜꦴꦤꦒꦴꦩꦶꦤꦶꦮꦶꦥꦱ꧀ꦱꦤꦴꦪ ꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦩꦒ꧀ꦒꦺ ꦥꦤ ꦠꦢꦸꦨꦪꦩ꧀ꦥꦶ ꦚꦴꦪꦴꦒꦠꦩꦺꦮ ꦤꦶꦥ꧀ꦥꦫꦶꦪꦴꦪꦠꦺꦴꦮ ꦭꦧ꧀ꦨꦩꦴꦤꦠ꧀ꦠꦴ. ꦠꦺꦤꦴꦲ ‘‘ꦠꦢꦸꦨꦪꦱꦩꦔ꧀ꦒꦷꦥꦸꦒ꧀ꦒꦭꦺꦴ’’ꦠꦶꦄꦴꦢꦶ. ꦥꦸꦕ꧀ꦖꦤ꧀ꦠꦱ꧀ꦱ ꦄꦗ꧀ꦙꦴꦱꦪꦮꦱꦺꦤ ‘‘ꦤ ꦏꦶꦚ꧀ꦕꦶ ꦭꦺꦴꦏꦺ ꦈꦥꦴꦢꦶꦪꦠꦷ’’ꦠꦶ ꦌꦠ꧀ꦡ ꦏꦴꦩꦸꦥꦴꦢꦴꦤꦮꦱꦺꦤ ꦈꦥꦴꦢꦶꦪꦤꦁ ꦥꦛꦶꦏ꧀ꦑꦶꦥꦠꦷꦠꦶ ꦄꦴꦲ ‘‘ꦠꦟ꧀ꦲꦴꦮꦱꦺꦤ ꦤ ꦈꦥꦴꦢꦶꦪꦠꦷ’’ꦠꦶ. ꦠꦟ꧀ꦲꦴꦮꦱꦺꦤ ꦮꦴ ꦄꦱꦠꦶ ꦈꦥꦴꦢꦶꦪꦤꦺ ꦢꦶꦛ꧀ꦜꦶꦮꦱꦺꦤ ꦈꦥꦴꦢꦶꦪꦤꦁ ꦄꦤꦮꦏꦴꦱꦩꦺꦮꦴꦠꦶ ‘‘ꦠꦟ꧀ꦲꦴꦮꦱꦺꦤ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦤ ꦥꦫꦴꦩꦱꦠꦷꦠꦶ ꦤꦴꦢꦶꦪꦠꦶ. ꦢꦶꦛ꧀ꦜꦶꦥꦫꦴꦩꦴꦱꦮꦱꦺꦤ ꦮꦴ ‘‘ꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦤ ꦥꦫꦴꦩꦱꦠꦶ. ꦱꦁꦑꦶꦠ꧀ꦠꦺꦤꦺꦮ ꦏꦡꦺꦱꦷꦠꦶ ꦠꦱ꧀ꦱ ꦄꦗ꧀ꦙꦴꦱꦪꦮꦱꦺꦤ ꦥꦥꦚ꧀ꦕꦁ ꦄꦏꦠ꧀ꦮꦴ ꦏꦡꦺꦱꦶ.

ꦥꦕꦭꦴꦪꦩꦴꦤꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦩꦺꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧖꧒. ꦤꦮꦩꦺ ꦩꦴ, ꦨꦶꦏ꧀ꦑꦮꦺ, ꦥꦸꦚ꧀ꦚꦴꦤꦤ꧀ꦠꦶ (ꦆꦠꦶꦮꦸ. ꦄꦛ꧀ꦜ. ꧖꧒) ꦌꦠ꧀ꦡ ꦩꦴꦠꦶ ꦥꦛꦶꦱꦺꦣꦺ ꦤꦶꦥꦴꦠꦺꦴ. ꦥꦸꦚ꧀ꦚ-ꦱꦢ꧀ꦢꦺꦴ ‘‘ꦏꦸꦱꦭꦴꦤꦁ, ꦨꦶꦏ꧀ꦑꦮꦺ, ꦣꦩ꧀ꦩꦴꦤꦁ ꦱꦩꦴꦢꦴꦤꦲꦺꦠꦸ ꦌꦮꦩꦶꦢꦁ ꦥꦸꦚ꧀ꦚꦁ ꦥꦮꦝ꧀ꦞꦠꦷ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧓.꧘꧐) ꦥꦸꦚ꧀ꦚꦦꦭꦺ ꦄꦴꦒꦠꦺꦴ. ‘‘ꦄꦮꦶꦗ꧀ꦗꦴꦒꦠꦺꦴꦪꦁ, ꦨꦶꦏ꧀ꦑꦮꦺ, ꦥꦸꦫꦶꦱꦥꦸꦒ꧀ꦒꦭꦺꦴ ꦥꦸꦚ꧀ꦚꦚ꧀ꦕꦺ ꦱꦔ꧀ꦑꦴꦫꦁ ꦄꦨꦶꦱꦔ꧀ꦑꦫꦺꦴꦠꦷ’’ꦠꦶꦄꦴꦢꦷꦱꦸ (ꦱꦁ. ꦤꦶ. ꧒.꧕꧑) ꦏꦴꦩꦫꦹꦥꦴꦮꦕꦫꦱꦸꦕꦫꦶꦠꦺꦱꦸ. ‘‘ꦥꦸꦚ꧀ꦚꦹꦥꦒꦁ ꦲꦺꦴꦠꦶ ꦮꦶꦚ꧀ꦚꦴꦟ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧒.꧕꧑) ꦱꦸꦒꦠꦶꦮꦶꦱꦺꦱꦨꦹꦠꦺ ꦈꦥꦥꦠ꧀ꦠꦶꦨꦮꦺ. ‘‘ꦠꦷꦟꦶꦩꦴꦤꦶ, ꦨꦶꦏ꧀ꦑꦮꦺ, ꦥꦸꦚ꧀ꦚꦏꦶꦫꦶꦪꦮꦠ꧀ꦡꦹꦤꦶ ꦢꦴꦤꦩꦪꦁ ꦥꦸꦚ꧀ꦚꦏꦶꦫꦶꦪꦮꦠ꧀ꦡꦸ, ꦱꦷꦭꦩꦪꦁ ꦥꦸꦚ꧀ꦚꦏꦶꦫꦶꦪꦮꦠ꧀ꦡꦸ, ꦨꦴꦮꦤꦴꦩꦪꦁ ꦥꦸꦚ꧀ꦚꦏꦶꦫꦶꦪꦮꦠ꧀ꦡꦹ’’ꦠꦶꦄꦴꦢꦷꦱꦸ (ꦆꦠꦶꦮꦸ. ꧖꧐; ꦢꦷ. ꦤꦶ. ꧓.꧓꧐꧕; ꦄ. ꦤꦶ. ꧘.꧓꧖) ꦏꦸꦱꦭꦕꦺꦠꦤꦴꦪꦁ. ꦆꦣ ꦥꦤ ꦠꦺꦨꦹꦩꦏꦏꦸꦱꦭꦣꦩ꧀ꦩꦺ ꦮꦺꦢꦶꦠꦧ꧀ꦧꦺꦴ. ꦨꦴꦪꦶꦠ꧀ꦡꦴꦠꦶ ꦌꦠ꧀ꦡ ꦢꦸꦮꦶꦣꦁ ꦨꦪꦁ ꦚꦴꦟꦨꦪꦁ, ꦱꦴꦫꦗ꧀ꦗꦨꦪꦤ꧀ꦠꦶ. ꦠꦠ꧀ꦡ ‘‘ꦪꦺꦥꦶ ꦠꦺ, ꦨꦶꦏ꧀ꦑꦮꦺ, ꦢꦺꦮꦴ ꦢꦷꦓꦴꦪꦸꦏꦴ ꦮꦟ꧀ꦟꦮꦤ꧀ꦠꦺꦴ ꦱꦸꦑꦧꦲꦸꦭꦴ ꦈꦕ꧀ꦕꦺꦱꦸ ꦮꦶꦩꦴꦤꦺꦱꦸ ꦕꦶꦫꦛ꧀ꦜꦶꦠꦶꦏꦴ, ꦠꦺꦥꦶ ꦠꦡꦴꦒꦠꦱ꧀ꦱ ꦣꦩ꧀ꦩꦢꦺꦱꦤꦁ ꦱꦸꦠ꧀ꦮꦴ ꦪꦺꦨꦸꦪ꧀ꦪꦺꦤ ꦨꦪꦁ ꦱꦁꦮꦺꦒꦁ ꦱꦤ꧀ꦠꦴꦱꦁ ꦄꦴꦥꦗ꧀ꦗꦤ꧀ꦠꦷ’’ꦠꦶ (ꦄ. ꦤꦶ. ꧔.꧓꧓) ꦄꦴꦒꦠꦁ ꦚꦴꦟꦨꦪꦁ. ‘‘ꦄꦲꦸꦢꦺꦮ ꦨꦪꦁ, ꦄꦲꦸ ꦖꦩ꧀ꦨꦶꦠꦠ꧀ꦠꦁ, ꦄꦲꦸ ꦭꦺꦴꦩꦲꦁꦱꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓꧑꧘) ꦄꦴꦒꦠꦁ ꦱꦴꦫꦗ꧀ꦗꦨꦪꦁ. ꦆꦣꦴꦥꦶ ꦱꦴꦫꦗ꧀ꦗꦨꦪꦩꦺꦮ. ꦄꦪꦚ꧀ꦲꦺꦠ꧀ꦡ ꦄꦠ꧀ꦡꦺꦴ – ꦨꦶꦏ꧀ꦑꦮꦺ, ꦢꦷꦓꦫꦠ꧀ꦠꦁ ꦏꦴꦪꦮꦕꦷꦱꦁꦪꦩꦺꦴ ꦮꦠ꧀ꦠꦥ꧀ꦥꦛꦶꦮꦠ꧀ꦠꦥꦹꦫꦟꦁ ꦌꦏꦴꦱꦤꦁ ꦌꦏꦱꦺꦪ꧀ꦪꦁ ꦆꦤ꧀ꦢ꧀ꦫꦶꦪꦢꦩꦺꦴ ꦣꦸꦠꦣꦩ꧀ꦩꦺꦲꦶ ꦕꦶꦠ꧀ꦠꦱ꧀ꦱ ꦤꦶꦒ꧀ꦒꦲꦺꦴ ꦱꦠꦶꦱꦩ꧀ꦥꦗꦚ꧀ꦚꦁ ꦏꦩ꧀ꦩꦛ꧀ꦜꦴꦤꦴꦤꦸꦪꦺꦴꦒꦮꦱꦺꦤ ꦮꦷꦫꦶꦪꦴꦫꦩ꧀ꦨꦺꦴꦠꦶ ꦌꦮꦩꦴꦢꦷꦤꦶ ꦪꦴꦤꦶ ꦨꦶꦏ꧀ꦑꦸꦤꦴ ꦤꦶꦫꦤ꧀ꦠꦫꦁ ꦥꦮꦠ꧀ꦠꦺꦠꦧ꧀ꦧꦴꦤꦶ ꦥꦸꦚ꧀ꦚꦴꦤꦶ, ꦠꦺꦲꦶ ꦩꦴ ꦨꦴꦪꦶꦠ꧀ꦡ, ꦩꦴ ꦨꦪꦁ ꦱꦤ꧀ꦠꦴꦱꦁ ꦄꦴꦥꦗ꧀ꦗꦶꦠ꧀ꦡ. ꦌꦏꦕ꧀ꦕꦱ꧀ꦱ ꦢꦶꦛ꧀ꦜꦣꦩ꧀ꦩꦱꦸꦑꦱ꧀ꦱ ꦈꦥꦫꦺꦴꦣꦨꦪꦺꦤ ꦱꦩ꧀ꦥꦫꦴꦪꦶꦏꦤꦶꦧ꧀ꦧꦴꦤꦱꦸꦑꦢꦴꦪꦏꦺꦲꦶ ꦥꦸꦚ꧀ꦚꦺꦲꦶ ꦩꦴ ꦨꦴꦪꦶꦠ꧀ꦡꦴꦠꦶ. ꦤꦶꦱ꧀ꦱꦏ꧀ꦏꦺ ꦆꦢꦁ ꦱꦴꦩꦶꦮꦕꦤꦁ.

ꦆꦢꦴꦤꦶ ꦠꦠꦺꦴ ꦄꦨꦴꦪꦶꦠꦧ꧀ꦧꦨꦴꦮꦺ ꦏꦴꦫꦟꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦸꦑꦱ꧀ꦱꦺꦠ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦸꦑ-ꦱꦢ꧀ꦢꦺꦴ ‘‘ꦱꦸꦑꦺꦴ ꦧꦸꦢ꧀ꦣꦴꦤꦩꦸꦥ꧀ꦥꦴꦢꦺꦴ, ꦱꦸꦑꦴ ꦮꦶꦫꦴꦒꦠꦴ ꦭꦺꦴꦏꦺ’’ꦠꦶꦄꦴꦢꦷꦱꦸ (ꦣ. ꦥ. ꧑꧙꧔) ꦱꦸꦑꦩꦹꦭꦺ ꦄꦴꦒꦠꦺꦴ. ‘‘ꦪꦱ꧀ꦩꦴ ꦕ ꦑꦺꦴ, ꦩꦲꦴꦭꦶ, ꦫꦹꦥꦁ ꦱꦸꦑꦁ ꦱꦸꦑꦴꦤꦸꦥꦠꦶꦠꦁ ꦱꦸꦑꦴꦮꦏ꧀ꦏꦤ꧀ꦠ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧓.꧖꧐) ꦱꦸꦑꦴꦫꦩ꧀ꦩꦟꦺ. ‘‘ꦪꦴꦮꦚ꧀ꦕꦶꦢꦁ, ꦨꦶꦏ꧀ꦑꦮꦺ, ꦤ ꦱꦸꦏꦫꦁ ꦄꦏ꧀ꦑꦴꦤꦺꦤ ꦥꦴꦥꦸꦟꦶꦠꦸꦁ ꦪꦴꦮ ꦱꦸꦑꦴ ꦱꦒ꧀ꦒꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧓.꧒꧕꧕) ꦱꦸꦑꦥꦕ꧀ꦕꦪꦛ꧀ꦜꦴꦤꦺ. ‘‘ꦱꦸꦑꦺꦴ ꦥꦸꦚ꧀ꦚꦱ꧀ꦱ ꦈꦕ꧀ꦕꦪꦺꦴ’’ꦠꦶꦄꦴꦢꦷꦱꦸ (ꦣ. ꦥ. ꧑꧑꧘) ꦱꦸꦑꦲꦺꦠꦸꦩ꧀ꦲꦶ. ‘‘ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴ ꦌꦠꦺ ꦣꦩ꧀ꦩꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧑.꧘꧒) ꦄꦧ꧀ꦪꦴꦥꦗ꧀ꦗꦺ. ‘‘ꦤꦶꦧ꧀ꦧꦴꦤꦁ ꦥꦫꦩꦁ ꦱꦸꦑ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧒.꧒꧑꧕; ꦣ. ꦥ. ꧒꧐꧓, ꧒꧐꧔) ꦤꦶꦧ꧀ꦧꦴꦤꦺ. ‘‘ꦱꦸꦑꦱ꧀ꦱ ꦕ ꦥꦲꦴꦤꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧒꧓꧒; ꦩ. ꦤꦶ. ꧑.꧒꧗꧑; ꦱꦁ. ꦤꦶ. ꧒.꧑꧕꧒) ꦱꦸꦑꦮꦺꦢꦤꦴꦪꦁ. ‘‘ꦄꦢꦸꦏ꧀ꦑꦩꦱꦸꦑꦁ ꦱꦤ꧀ꦠꦁ, ꦱꦸꦑꦩꦶꦕ꧀ꦕꦺꦮ ꦨꦴꦱꦶꦠ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧔.꧒꧕꧓; ꦆꦠꦶꦮꦸ. ꧕꧓) ꦈꦥꦺꦏ꧀ꦑꦴꦮꦺꦢꦤꦴꦪꦁ. ‘‘ꦢ꧀ꦮꦺꦥꦶ ꦩꦪꦴ, ꦄꦴꦤꦤ꧀ꦢ, ꦮꦺꦢꦤꦴ ꦮꦸꦠ꧀ꦠꦴ ꦥꦫꦶꦪꦴꦪꦺꦤ ꦱꦸꦑꦴ ꦮꦺꦢꦤꦴ ꦢꦸꦏ꧀ꦑꦴ ꦮꦺꦢꦤꦴ’’ꦠꦶꦄꦴꦢꦷꦱꦸ (ꦩ. ꦤꦶ. ꧒.꧘꧙) ꦆꦛ꧀ꦜꦱꦸꦑꦺꦱꦸ. ‘‘ꦱꦸꦑꦺꦴ ꦮꦶꦥꦴꦏꦺꦴ ꦥꦸꦚ꧀ꦚꦴꦤ’’ꦤ꧀ꦠꦶꦄꦴꦢꦷꦱꦸ (ꦥꦺꦛꦏꦺꦴ. ꧒꧓) ꦆꦛ꧀ꦜꦮꦶꦥꦴꦏꦺ. ꦆꦣꦴꦥꦶ ꦆꦛ꧀ꦜꦮꦶꦥꦴꦏꦺ ꦌꦮ ꦢꦛ꧀ꦜꦧ꧀ꦧꦺꦴ. ꦆꦛ꧀ꦜꦱ꧀ꦱꦴꦠꦶꦄꦴꦢꦷꦱꦸ ꦆꦕ꧀ꦖꦶꦠꦧ꧀ꦧꦠꦺꦴ ꦕꦺꦮ ꦄꦤꦶꦛ꧀ꦜꦥ꧀ꦥꦛꦶꦥꦏ꧀ꦑꦠꦺꦴ ꦕ ꦆꦛ꧀ꦜꦱ꧀ꦱ. ꦏꦩꦤꦷꦪꦠꦺꦴ ꦩꦤꦱ꧀ꦩꦶꦚ꧀ꦕ ꦏꦩꦤꦠꦺꦴ ꦥꦮꦶꦱꦤꦠꦺꦴ ꦏꦤ꧀ꦠꦱ꧀ꦱ. ꦥꦶꦪꦴꦪꦶꦠꦧ꧀ꦧꦠꦺꦴ ꦱꦤ꧀ꦠꦥ꧀ꦥꦤꦠꦺꦴ ꦕ ꦥꦶꦪꦱ꧀ꦱ. ꦩꦤꦤꦷꦪꦠꦺꦴ ꦩꦤꦱ꧀ꦱ ꦮꦝ꧀ꦞꦤꦠꦺꦴ ꦕ ꦩꦤꦴꦥꦱ꧀ꦱꦴꦠꦶ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦪꦢꦶꦢꦁ ꦥꦸꦚ꧀ꦚꦴꦤꦷꦠꦶ ꦥꦸꦚ꧀ꦚꦴꦤꦷꦠꦶ ꦪꦢꦶꦢꦁ ꦮꦕꦤꦁ, ꦌꦠꦁ ꦱꦸꦑꦱ꧀ꦱ ꦆꦛ꧀ꦜꦱ꧀ꦱ ꦮꦶꦥꦴꦏꦱ꧀ꦱ ꦄꦣꦶꦮꦕꦤꦁ ꦤꦴꦩꦁ. ꦱꦸꦑꦱ꧀ꦱꦺꦠꦁ ꦪꦢꦶꦢꦁ ꦥꦸꦚ꧀ꦚꦴꦤꦷꦠꦶ ꦦꦭꦺꦤ ꦏꦴꦫꦟꦱ꧀ꦱ ꦄꦨꦺꦢꦺꦴꦥꦕꦴꦫꦁ ꦮꦢꦠꦶ. ꦠꦺꦤ ꦏꦠꦹꦥꦕꦶꦠꦴꦤꦁ ꦥꦸꦚ꧀ꦚꦴꦤꦁ ꦄꦮꦱ꧀ꦱꦁꦨꦴꦮꦶꦦꦭꦁ ꦱꦸꦠ꧀ꦮꦴ ꦄꦥ꧀ꦥꦩꦠ꧀ꦠꦺꦤ ꦱꦏ꧀ꦏꦕ꧀ꦕꦁ ꦥꦸꦚ꧀ꦚꦴꦤꦶ ꦏꦠ꧀ꦠꦧ꧀ꦧꦴꦤꦷꦠꦶ ꦥꦸꦚ꧀ꦚꦏꦶꦫꦶꦪꦴꦪꦁ ꦤꦶꦪꦺꦴꦗꦺꦠꦶ, ꦄꦴꦢꦫꦚ꧀ꦕ ꦤꦺꦱꦁ ꦠꦠ꧀ꦡ ꦈꦥ꧀ꦥꦴꦢꦺꦠꦶ.

ꦆꦢꦴꦤꦶ ꦄꦠ꧀ꦠꦤꦴ ꦱꦸꦤꦺꦠ꧀ꦠꦏꦴꦭꦺ ꦏꦠꦺꦤ ꦥꦸꦚ꧀ꦚꦏꦩ꧀ꦩꦺꦤ ꦢꦷꦓꦫꦠ꧀ꦠꦁ ꦥꦕ꧀ꦕꦤꦸꦨꦹꦠꦁ ꦨꦮꦤ꧀ꦠꦫꦥ꧀ꦥꦛꦶꦕ꧀ꦖꦤ꧀ꦤꦁ ꦈꦭ꦳ꦴꦫꦠꦫꦁ ꦥꦸꦚ꧀ꦚꦮꦶꦥꦴꦏꦁ ꦈꦢꦴꦲꦫꦶꦠ꧀ꦮꦴ ꦠꦩꦠ꧀ꦡꦁ ꦥꦴꦏꦛꦠꦫꦁ ꦏꦫꦺꦴꦤ꧀ꦠꦺꦴ ‘‘ꦄꦨꦶꦗꦴꦤꦴꦩꦶ ꦑꦺꦴ ꦥꦤꦴꦲ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦨꦶꦗꦴꦤꦴꦩꦷꦠꦶ ꦄꦨꦶꦮꦶꦱꦶꦛ꧀ꦜꦺꦤ ꦚꦴꦟꦺꦤ ꦗꦴꦤꦴꦩꦶ, ꦥꦕ꧀ꦕꦏ꧀ꦑꦠꦺꦴ ꦧꦸꦗ꧀ꦙꦴꦩꦶ. ꦢꦷꦓꦫꦠ꧀ꦠꦤ꧀ꦠꦶ ꦕꦶꦫꦏꦴꦭꦁ. ꦥꦸꦚ꧀ꦚꦴꦤꦤ꧀ꦠꦶ ꦢꦴꦤꦴꦢꦷꦤꦁ ꦏꦸꦱꦭꦣꦩ꧀ꦩꦴꦤꦁ. ꦱꦠ꧀ꦠ ꦮꦱ꧀ꦱꦴꦤꦷꦠꦶ ꦱꦠ꧀ꦠ ꦱꦁꦮꦕ꧀ꦖꦫꦴꦤꦶ. ꦩꦺꦠ꧀ꦠꦕꦶꦠ꧀ꦠꦤ꧀ꦠꦶ ꦩꦶꦗ꧀ꦗꦠꦷꦠꦶ ꦩꦺꦠ꧀ꦠꦴ, ꦱꦶꦤꦶꦪ꧀ꦲꦠꦷꦠꦶ ꦄꦠ꧀ꦡꦺꦴ. ꦩꦶꦠ꧀ꦠꦺ ꦨꦮꦴ, ꦩꦶꦠ꧀ꦠꦱ꧀ꦱ ꦮꦴ ꦌꦱꦴ ꦥꦮꦠ꧀ꦠꦷꦠꦶꦥꦶ ꦩꦺꦠ꧀ꦠꦴ. ꦭꦏ꧀ꦑꦟꦴꦢꦶꦠꦺꦴ ꦥꦤ ꦲꦶꦠꦴꦏꦴꦫꦥ꧀ꦥꦮꦠ꧀ꦠꦶꦭꦏ꧀ꦑꦟꦴ, ꦲꦶꦠꦹꦥꦱꦁꦲꦴꦫꦫꦱꦴ, ꦄꦴꦓꦴꦠꦮꦶꦤꦪꦥꦕ꧀ꦕꦸꦥꦛ꧀ꦜꦴꦤꦴ, ꦱꦠ꧀ꦠꦴꦤꦁ ꦩꦤꦴꦥꦨꦴꦮꦢꦱ꧀ꦱꦤꦥꦢꦛ꧀ꦜꦴꦤꦴ. ꦧ꧀ꦪꦴꦥꦴꦢꦹꦥꦱꦩꦺꦴ ꦌꦠꦶꦱ꧀ꦱꦴ ꦱꦩ꧀ꦥꦠ꧀ꦠꦶ, ꦱꦶꦤꦺꦲꦱꦩ꧀ꦨꦮꦺꦴ ꦮꦶꦥꦠ꧀ꦠꦶ. ꦩꦺꦠ꧀ꦠꦕꦶꦠ꧀ꦠꦁ ꦨꦴꦮꦺꦠ꧀ꦮꦴꦠꦶ ꦩꦺꦠ꧀ꦠꦴꦱꦲꦒꦠꦁ ꦕꦶꦠ꧀ꦠꦁ, ꦕꦶꦠ꧀ꦠꦱꦷꦱꦺꦤ ꦱꦩꦴꦣꦶ ꦮꦸꦠ꧀ꦠꦺꦴꦠꦶ ꦩꦺꦠ꧀ꦠꦴꦱꦩꦴꦣꦶꦁ ꦩꦺꦠꦴꦧ꧀ꦫꦲ꧀ꦩꦮꦶꦲꦴꦫꦁ ꦈꦥ꧀ꦥꦴꦢꦺꦠ꧀ꦮꦴ ꦕꦺꦮ ꦮꦝ꧀ꦞꦺꦠ꧀ꦮꦴ ꦕ.

ꦱꦠ꧀ꦠ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦺꦠꦶ ꦱꦠ꧀ꦠ ꦩꦲꦴꦏꦥ꧀ꦥꦺ. ꦱꦁꦮꦛ꧀ꦛꦮꦶꦮꦛ꧀ꦛꦒ꧀ꦒꦲꦟꦺꦤꦺꦮ ꦲꦶ ꦱꦁꦮꦛ꧀ꦛꦛ꧀ꦜꦴꦪꦶꦮꦶꦮꦛ꧀ꦛꦛ꧀ꦜꦴꦪꦶꦤꦺꦴꦥꦶ ꦒꦲꦶꦠꦴ. ꦆꦩꦁ ꦭꦺꦴꦏꦤ꧀ꦠꦶ ꦏꦴꦩꦭꦺꦴꦏꦁ. ꦱꦁꦮꦛ꧀ꦛꦩꦴꦤꦺ ꦱꦸꦢꦤ꧀ꦠꦶ ꦱꦁꦮꦛ꧀ꦛꦩꦴꦤꦺ, ꦱꦸꦢꦤ꧀ꦠꦶ ꦤꦶꦥꦴꦠꦩꦠ꧀ꦠꦁ, ꦮꦶꦥꦗ꧀ꦗꦩꦴꦤꦺꦠꦶ ꦄꦠ꧀ꦡꦺꦴ. ‘‘ꦮꦫꦱꦁꦮꦠ꧀ꦠꦛ꧀ꦜꦴꦤꦺ ꦱꦸꦢ’’ꦤ꧀ꦠꦶꦥꦶ ꦥꦜꦤ꧀ꦠꦶ. ꦏꦥ꧀ꦥꦺꦠꦶ ꦏꦴꦭꦺ. ꦏꦥ꧀ꦥꦱꦷꦱꦺꦤ ꦲꦶ ꦏꦴꦭꦺꦴ ꦮꦸꦠ꧀ꦠꦺꦴ, ꦏꦴꦭꦺ ꦑꦷꦪꦩꦴꦤꦺ ꦱꦧ꧀ꦧꦺꦴꦥꦶ ꦑꦷꦪꦠꦺꦮ. ꦪꦡꦴꦲ – ‘‘ꦏꦴꦭꦺꦴ ꦓꦱꦠꦶ ꦨꦹꦠꦴꦤꦶ, ꦱꦧ꧀ꦧꦴꦤꦺꦮ ꦱꦲꦠ꧀ꦠꦤꦴ’’ꦠꦶ (ꦗꦴ. ꧑.꧒.꧑꧙꧐). ‘‘ꦄꦴꦨꦱ꧀ꦱꦫꦹꦥꦒꦺꦴ ꦲꦺꦴꦩꦷ’’ꦠꦶ ꦮꦸꦠ꧀ꦠꦠ꧀ꦠꦴ ꦠꦺꦗꦺꦴꦱꦁꦮꦛ꧀ꦛꦮꦱꦺꦤꦺꦠ꧀ꦡ ꦏꦥ꧀ꦥꦮꦸꦛ꧀ꦜꦴꦤꦁ ꦮꦺꦢꦶꦠꦧ꧀ꦧꦁ. ꦄꦴꦨꦱ꧀ꦱꦫꦹꦥꦒꦺꦴꦠꦶ ꦠꦠ꧀ꦡ ꦥꦛꦶꦱꦤ꧀ꦣꦶꦒ꧀ꦒꦲꦟꦮꦱꦺꦤ ꦄꦴꦨꦱ꧀ꦱꦫꦧ꧀ꦫꦲ꧀ꦩꦭꦺꦴꦏꦁ ꦈꦥꦒꦕ꧀ꦖꦴꦩꦷꦠꦶ ꦄꦴꦨꦱ꧀ꦱꦫꦹꦥꦒꦺꦴ ꦲꦺꦴꦩꦶ. ꦮꦶꦮꦛ꧀ꦛꦩꦴꦤꦺꦠꦶ ꦱꦟ꧀ꦜꦲꦩꦴꦤꦺꦠꦶ ꦄꦠ꧀ꦡꦺꦴ. ꦱꦸꦚ꧀ꦚꦁ ꦧ꧀ꦫꦲ꧀ꦩꦮꦶꦩꦴꦤꦁ ꦈꦥꦥꦗ꧀ꦗꦴꦩꦷꦠꦶ ꦏꦱ꧀ꦱꦕꦶ ꦱꦠ꧀ꦠꦱ꧀ꦱ ꦠꦠ꧀ꦡ ꦤꦶꦧ꧀ꦧꦠ꧀ꦠꦱ꧀ꦱ ꦄꦨꦴꦮꦠꦺꦴ ꦱꦸꦚ꧀ꦚꦁ ꦪꦁ ꦥꦜꦩꦗ꧀ꦙꦴꦤꦨꦹꦩꦶꦱꦔ꧀ꦑꦴꦠꦁ ꦧ꧀ꦫꦲ꧀ꦩꦮꦶꦩꦴꦤꦁ ꦄꦴꦢꦶꦠꦺꦴ ꦤꦶꦧ꧀ꦧꦠ꧀ꦠꦠꦶ, ꦠꦁ ꦥꦛꦶꦱꦤ꧀ꦣꦶꦒ꧀ꦒꦲꦟꦮꦱꦺꦤ ꦈꦥꦥꦗ꧀ꦗꦴꦩꦶ ꦈꦥꦺꦩꦶ.

ꦧ꧀ꦫꦲ꧀ꦩꦴꦠꦶ ꦏꦴꦩꦴꦮꦕꦫꦱꦠ꧀ꦠꦺꦲꦶ ꦮꦶꦱꦶꦛ꧀ꦜꦛ꧀ꦜꦺꦤ ꦠꦡꦴ ꦠꦡꦴ ꦧ꧀ꦫꦹꦲꦶꦠꦒꦸꦟꦠꦴꦪ ꦧ꧀ꦫꦲ꧀ꦩꦮꦶꦲꦴꦫꦠꦺꦴ ꦤꦶꦧ꧀ꦧꦠ꧀ꦠꦤꦛ꧀ꦜꦺꦤ ꦕ ꦧ꧀ꦫꦲ꧀ꦩꦴ. ꦧ꧀ꦫꦲ꧀ꦩꦥꦴꦫꦶꦱꦗ꧀ꦗꦧ꧀ꦫꦲ꧀ꦩꦥꦸꦫꦺꦴꦲꦶꦠꦺꦲꦶ ꦩꦲꦤ꧀ꦠꦺꦴ ꦧ꧀ꦫꦲ꧀ꦩꦴꦠꦶ ꦩꦲꦴꦧ꧀ꦫꦲ꧀ꦩꦴ, ꦠꦠꦺꦴ ꦌꦮ ꦠꦺ ꦄꦨꦶꦨꦮꦶꦠ꧀ꦮꦴ ꦜꦶꦠꦠ꧀ꦠꦴ ꦄꦨꦶꦨꦹ. ꦠꦺꦲꦶ ꦤ ꦏꦺꦤꦕꦶꦥꦶ ꦒꦸꦟꦺꦤ ꦄꦨꦶꦨꦹꦠꦺꦴꦠꦶ ꦄꦤꦨꦶꦨꦹꦠꦺꦴ. ꦄꦚ꧀ꦚꦢꦠ꧀ꦡꦹꦠꦶ ꦌꦏꦁꦱꦮꦕꦤꦺ ꦤꦶꦥꦴꦠꦺꦴ. ꦢꦱ꧀ꦱꦤꦠꦺꦴ ꦢꦱꦺꦴ, ꦄꦠꦷꦠꦴꦤꦴꦒꦠꦥꦕ꧀ꦕꦸꦥ꧀ꦥꦤ꧀ꦤꦴꦤꦁ ꦢꦱ꧀ꦱꦤꦱꦩꦠ꧀ꦡꦺꦴ ꦄꦨꦶꦚ꧀ꦚꦴꦚꦴꦟꦺꦤ ꦥꦱ꧀ꦱꦶꦠꦧ꧀ꦧꦁ ꦥꦱ꧀ꦱꦴꦩꦷꦠꦶ ꦄꦠ꧀ꦡꦺꦴ. ꦱꦺꦱꦧ꧀ꦫꦲ꧀ꦩꦴꦤꦁ ꦆꦢ꧀ꦣꦶꦥꦴꦢꦨꦴꦮꦤꦴꦧꦭꦺꦤ ꦄꦠ꧀ꦠꦤꦺꦴ ꦕꦶꦠ꧀ꦠꦚ꧀ꦕ ꦩꦩ ꦮꦱꦺ ꦮꦠ꧀ꦠꦺꦩꦷꦠꦶ ꦮꦱꦮꦠ꧀ꦠꦷ ꦲꦺꦴꦩꦷꦠꦶ ꦪꦺꦴꦗꦺꦠꦧ꧀ꦧꦁ. ꦠꦢꦴ ꦏꦶꦫ ꦧꦺꦴꦣꦶꦱꦠ꧀ꦠꦺꦴ ꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦷꦥꦶ ꦱꦩꦴꦤꦺꦴ ꦠꦡꦴ ꦱꦠ꧀ꦠꦲꦶꦠꦁ ꦄꦠ꧀ꦠꦤꦺꦴ ꦥꦴꦫꦩꦶꦥꦹꦫꦟꦚ꧀ꦕ ꦎꦭꦺꦴꦏꦺꦤ꧀ꦠꦺꦴ ꦠꦴꦱꦸ ꦌꦮ ꦢ꧀ꦮꦷꦱꦸ ꦙꦴꦤꦨꦹꦩꦷꦱꦸ ꦤꦶꦏꦤ꧀ꦠꦶ ꦈꦥ꧀ꦥꦴꦢꦺꦠ꧀ꦮꦴ ꦩꦺꦠ꧀ꦠꦴꦧ꧀ꦫꦲ꧀ꦩꦮꦶꦲꦴꦫꦮꦱꦺꦤ ꦄꦥꦫꦴꦥꦫꦁ ꦱꦁꦱꦫꦶ. ꦠꦺꦤ ꦮꦸꦠ꧀ꦠꦁ ‘‘ꦱꦠ꧀ꦠ ꦮꦱ꧀ꦱꦴꦤꦶ…ꦥꦺ… ꦮꦱꦮꦠ꧀ꦠꦷ’’ꦠꦶ.