꧕. ꦥꦥꦴꦠꦮꦒ꧀ꦒꦺꦴ

꧑. ꦭꦺꦴꦏꦕꦶꦤ꧀ꦠꦴꦱꦸꦠ꧀ꦠꦁ

꧑꧑꧑꧑. ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦄꦚ꧀ꦚꦠꦫꦺꦴ ꦥꦸꦫꦶꦱꦺꦴ ꦫꦴꦗꦒꦲꦴ ꦤꦶꦏ꧀ꦑꦩꦶꦠ꧀ꦮꦴ ‘ꦭꦺꦴꦏꦕꦶꦤ꧀ꦠꦁ ꦕꦶꦤ꧀ꦠꦺꦱ꧀ꦱꦴꦩꦷ’ꦠꦶ ꦪꦺꦤ ꦱꦸꦩꦴꦒꦣꦴ ꦥꦺꦴꦏ꧀ꦑꦫꦟꦷ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦱꦸꦩꦴꦒꦣꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦤꦶꦱꦷꦢꦶ ꦭꦺꦴꦏꦕꦶꦤ꧀ꦠꦁ ꦕꦶꦤ꧀ꦠꦺꦤ꧀ꦠꦺꦴ. ꦄꦢ꧀ꦢꦱꦴ ꦑꦺꦴ, ꦨꦶꦏ꧀ꦑꦮꦺ, ꦱꦺꦴ ꦥꦸꦫꦶꦱꦺꦴ ꦱꦸꦩꦴꦒꦣꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ [ꦕꦠꦸꦫꦔ꧀ꦒꦶꦤꦶꦱꦺꦤꦁ (ꦏ.)] ꦨꦶꦱꦩꦸꦭ꦳ꦴꦭꦁ [ꦨꦶꦱꦩꦹꦭꦴꦭꦁ (ꦥꦷ. ꦏ.)] ꦥꦮꦶꦱꦤ꧀ꦠꦁ. ꦢꦶꦱ꧀ꦮꦴꦤꦱ꧀ꦱ ꦌꦠꦢꦲꦺꦴꦱꦶ – ‘ꦈꦩ꧀ꦩꦠ꧀ꦠꦺꦴꦱ꧀ꦩꦶ ꦤꦴꦩꦴꦲꦁ, ꦮꦶꦕꦺꦠꦺꦴꦱ꧀ꦩꦶ ꦤꦴꦩꦴꦲꦁ! ꦪꦁ ꦭꦺꦴꦏꦺ ꦤꦠ꧀ꦡꦶ ꦠꦁ ꦩꦪꦴ ꦢꦶꦛ꧀ꦜ’’’ꦤ꧀ꦠꦶ.

‘‘ꦄꦡ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦤꦒꦫꦁ ꦥꦮꦶꦱꦶꦠ꧀ꦮꦴ ꦩꦲꦴꦗꦤꦏꦴꦪꦱ꧀ꦱ ꦄꦴꦫꦺꦴꦕꦺꦱꦶ – ‘ꦈꦩ꧀ꦩꦠ꧀ꦠꦺꦴꦱ꧀ꦩꦶ ꦤꦴꦩꦴꦲꦁ, ꦨꦤ꧀ꦠꦺ, ꦮꦶꦕꦺꦠꦺꦴꦱ꧀ꦩꦶ ꦤꦴꦩꦴꦲꦁ, ꦨꦤ꧀ꦠꦺ! ꦪꦁ ꦭꦺꦴꦏꦺ ꦤꦠ꧀ꦡꦶ ꦠꦁ ꦩꦪꦴ ꦢꦶꦛ꧀ꦜ’’’ꦤ꧀ꦠꦶ. ‘‘ꦏꦡꦁ ꦥꦤ ꦠ꧀ꦮꦁ, ꦄꦩ꧀ꦨꦺꦴ ꦥꦸꦫꦶꦱ, ꦈꦩ꧀ꦩꦠ꧀ꦠꦺꦴ ꦏꦡꦁ ꦮꦶꦕꦺꦠꦺꦴ? ꦏꦶꦚ꧀ꦕ ꦭꦺꦴꦏꦺ ꦤꦠ꧀ꦡꦶ ꦪꦁ ꦠꦪꦴ ꦢꦶꦛ꧀ꦜ’’ꦤ꧀ꦠꦶ? ‘‘ꦆꦣꦴꦲꦁ, ꦨꦤ꧀ꦠꦺ, ꦫꦴꦗꦒꦲꦴ ꦤꦶꦏ꧀ꦑꦩꦶꦠ꧀ꦮꦴ ‘ꦭꦺꦴꦏꦕꦶꦤ꧀ꦠꦁ ꦕꦶꦤ꧀ꦠꦺꦱ꧀ꦱꦴꦩꦷ’ꦠꦶ ꦪꦺꦤ ꦱꦸꦩꦴꦒꦣꦴ ꦥꦺꦴꦏ꧀ꦑꦫꦟꦷ ꦠꦺꦤꦸꦥꦱꦔ꧀ꦏꦩꦶꦁ; ꦈꦥꦱꦔ꧀ꦏꦩꦶꦠ꧀ꦮꦴ ꦱꦸꦩꦴꦒꦣꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦤꦶꦱꦷꦢꦶꦁ ꦭꦺꦴꦏꦕꦶꦤ꧀ꦠꦁ ꦕꦶꦤ꧀ꦠꦺꦤ꧀ꦠꦺꦴ. ꦄꦢ꧀ꦢꦱꦁ ꦑ꧀ꦮꦴꦲꦁ, ꦨꦤ꧀ꦠꦺ, ꦱꦸꦩꦴꦒꦣꦴꦪ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ ꦨꦶꦱꦩꦸꦭ꦳ꦴꦭꦁ ꦥꦮꦶꦱꦤ꧀ꦠꦁ. ꦌꦮꦁ ꦑ꧀ꦮꦴꦲꦁ, ꦨꦤ꧀ꦠꦺ, ꦈꦩ꧀ꦩꦠ꧀ꦠꦺꦴ ꦌꦮꦁ ꦮꦶꦕꦺꦠꦺꦴ. ꦆꦢꦚ꧀ꦕ ꦭꦺꦴꦏꦺ ꦤꦠ꧀ꦡꦶ ꦪꦁ ꦩꦪꦴ ꦢꦶꦛ꧀ꦜ’’ꦤ꧀ꦠꦶ. ‘‘ꦠꦒ꧀ꦓ ꦠ꧀ꦮꦁ, ꦄꦩ꧀ꦨꦺꦴ ꦥꦸꦫꦶꦱ, ꦈꦩ꧀ꦩꦠ꧀ꦠꦺꦴ ꦠꦒ꧀ꦓ ꦮꦶꦕꦺꦠꦺꦴ. ꦆꦢꦚ꧀ꦕ ꦭꦺꦴꦏꦺ ꦤꦠ꧀ꦡꦶ ꦪꦁ ꦠꦪꦴ ꦢꦶꦛ꧀ꦜ’’ꦤ꧀ꦠꦶ.

‘‘ꦠꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦺꦴ ꦥꦸꦫꦶꦱꦺꦴ ꦨꦹꦠꦁꦪꦺꦮ ꦄꦢ꧀ꦢꦱ, ꦤꦺꦴ ꦄꦨꦹꦠꦁ. ꦨꦹꦠꦥꦸꦧ꧀ꦧꦁ, ꦨꦶꦏ꧀ꦑꦮꦺ, ꦢꦺꦮꦴꦱꦸꦫꦱꦔ꧀ꦒꦴꦩꦺꦴ ꦱꦩꦸꦥꦧ꧀ꦪꦹꦭ꦳꧀ꦲꦺꦴ ꦄꦲꦺꦴꦱꦶ. ꦠꦱ꧀ꦩꦶꦁ ꦑꦺꦴ ꦥꦤ, ꦨꦶꦏ꧀ꦑꦮꦺ, ꦱꦔ꧀ꦒꦴꦩꦺ ꦢꦺꦮꦴ ꦗꦶꦤꦶꦁꦱꦸ, ꦄꦱꦸꦫꦴ ꦥꦫꦴꦗꦶꦤꦶꦁꦱꦸ. ꦥꦫꦴꦗꦶꦠꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦄꦱꦸꦫꦴ ꦨꦷꦠꦴ ꦨꦶꦱꦩꦸꦭ꦳ꦴꦭꦺꦤ ꦄꦱꦸꦫꦥꦸꦫꦁ ꦥꦮꦶꦱꦶꦁꦱꦸ ꦢꦺꦮꦴꦤꦁꦪꦺꦮ ꦩꦺꦴꦲꦪꦩꦴꦤꦴ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦩꦴ ꦭꦺꦴꦏꦕꦶꦤ꧀ꦠꦁ ꦕꦶꦤ꧀ꦠꦺꦡ – ‘ꦱꦱ꧀ꦱꦠꦺꦴ ꦭꦺꦴꦏꦺꦴ’ꦠꦶ ꦮꦴ ‘ꦄꦱꦱ꧀ꦱꦠꦺꦴ ꦭꦺꦴꦏꦺꦴ’ꦠꦶ ꦮꦴ, ‘ꦄꦤ꧀ꦠꦮꦴ ꦭꦺꦴꦏꦺꦴ’ꦠꦶ ꦮꦴ ‘ꦄꦤꦤ꧀ꦠꦮꦴ ꦭꦺꦴꦏꦺꦴ’ꦠꦶ ꦮꦴ, ‘ꦠꦁ ꦗꦷꦮꦁ ꦠꦁ ꦱꦫꦷꦫ’ꦤ꧀ꦠꦶ ꦮꦴ ‘ꦄꦚ꧀ꦚꦁ ꦗꦷꦮꦁ ꦄꦚ꧀ꦚꦁ ꦱꦫꦷꦫ’ꦤ꧀ꦠꦶ ꦮꦴ, ‘ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦮꦴ ‘ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦮꦴ, ‘ꦲꦺꦴꦠꦶ ꦕ ꦤ ꦕ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦮꦴ, ‘ꦤꦺꦮ ꦲꦺꦴꦠꦶ ꦤ ꦤ ꦲꦺꦴꦠꦶ ꦠꦡꦴꦒꦠꦺꦴ ꦥꦫꦁ ꦩꦫꦟꦴ’ꦠꦶ ꦮꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦤꦺꦱꦴ, ꦨꦶꦏ꧀ꦑꦮꦺ, ꦕꦶꦤ꧀ꦠꦴ ꦄꦠ꧀ꦡꦱꦁꦲꦶꦠꦴ ꦤꦴꦢꦶꦧ꧀ꦫꦲ꧀ꦩꦕꦫꦶꦪꦏꦴ ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦕꦶꦤ꧀ꦠꦺꦤ꧀ꦠꦴ ꦑꦺꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦕꦶꦤ꧀ꦠꦺꦪ꧀ꦪꦴꦡ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦕꦶꦤ꧀ꦠꦺꦪ꧀ꦪꦴꦡ. ꦠꦁ ꦏꦶꦱ꧀ꦱ ꦲꦺꦠꦸ? ꦌꦱꦴ, ꦨꦶꦏ꧀ꦑꦮꦺ, ꦕꦶꦤ꧀ꦠꦴ ꦄꦠ꧀ꦡꦱꦁꦲꦶꦠꦴ ꦌꦱꦴ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦴ ꦌꦱꦴ ꦤꦶꦧ꧀ꦧꦶꦢꦴꦪ ꦮꦶꦫꦴꦒꦴꦪ ꦤꦶꦫꦺꦴꦣꦴꦪ ꦈꦥꦱꦩꦴꦪ ꦄꦨꦶꦚ꧀ꦚꦴꦪ ꦱꦩ꧀ꦧꦺꦴꦣꦴꦪ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦥꦜꦩꦁ.

꧒. ꦥꦥꦴꦠꦱꦸꦠ꧀ꦠꦁ

꧑꧑꧑꧒. ꦌꦏꦁ ꦱꦩꦪꦁ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ. ꦄꦡ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦪꦴꦩ, ꦨꦶꦏ꧀ꦑꦮꦺ, ꦪꦺꦤ ꦥꦛꦶꦨꦴꦤꦏꦹꦛꦺꦴ ꦠꦺꦤꦸꦥꦱꦔ꧀ꦏꦩꦶꦱ꧀ꦱꦴꦩ ꦢꦶꦮꦴꦮꦶꦲꦴꦫꦴꦪꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦡ ꦑꦺꦴ ꦨꦒꦮꦴ ꦱꦩ꧀ꦧꦲꦸꦭꦺꦲꦶ ꦨꦶꦏ꧀ꦑꦹꦲꦶ ꦱꦢ꧀ꦣꦶꦁ ꦪꦺꦤ ꦥꦛꦶꦨꦴꦤꦏꦹꦛꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦥꦛꦶꦨꦴꦤꦏꦹꦛꦺ ꦩꦲꦤ꧀ꦠꦁ ꦥꦥꦴꦠꦁ. ꦢꦶꦱ꧀ꦮꦴꦤ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦩꦲꦴ ꦮꦠꦴꦪꦁ, ꦨꦤ꧀ꦠꦺ, ꦥꦥꦴꦠꦺꦴ ꦱꦸꦨꦪꦴꦤꦏꦺꦴ, ꦨꦤ꧀ꦠꦺ, ꦥꦥꦴꦠꦺꦴ. ꦄꦠ꧀ꦡꦶ ꦤꦸ ꦑꦺꦴ, ꦨꦤ꧀ꦠꦺ, ꦆꦩꦩ꧀ꦲꦴ ꦥꦥꦴꦠꦴ ꦄꦚ꧀ꦚꦺꦴ ꦥꦥꦴꦠꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦄꦠ꧀ꦡꦶ ꦑꦺꦴ, ꦨꦶꦏ꧀ꦑꦸ, ꦆꦩꦩ꧀ꦲꦴ ꦥꦥꦴꦠꦴ ꦄꦚ꧀ꦚꦺꦴ ꦥꦥꦴꦠꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ.

‘‘ꦏꦠꦩꦺꦴ ꦥꦤ, ꦨꦤ꧀ꦠꦺ, ꦆꦩꦩ꧀ꦲꦴ ꦥꦥꦴꦠꦴ ꦄꦚ꧀ꦚꦺꦴ ꦥꦥꦴꦠꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ‘ꦄꦪꦁ ꦢꦸꦏ꧀ꦑꦱꦩꦸꦢꦪꦺꦴ’ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦺꦴ’ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ, ꦗꦫꦴꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ, ꦩꦫꦟꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ. ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦠꦴ ꦗꦫꦴꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦠꦴ ꦩꦫꦟꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦠꦴ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦠꦴ ꦗꦴꦠꦶꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦺꦴꦤ꧀ꦠꦶ, ꦗꦫꦴꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦺꦴꦤ꧀ꦠꦶ, ꦩꦫꦟꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦺꦴꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦺꦴꦤ꧀ꦠꦶ. ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦶꦠ꧀ꦮꦴ ꦗꦫꦴꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦶꦠ꧀ꦮꦴ ꦩꦫꦟꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦶꦠ꧀ꦮꦴ ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦨꦶꦱꦔ꧀ꦑꦫꦶꦠ꧀ꦮꦴ ꦗꦴꦠꦶꦥꦥꦴꦠꦩ꧀ꦥꦶ ꦥꦥꦠꦤ꧀ꦠꦶ, ꦗꦫꦴꦥꦥꦴꦠꦩ꧀ꦥꦶ ꦥꦥꦠꦤ꧀ꦠꦶ, ꦩꦫꦟꦥꦥꦴꦠꦩ꧀ꦥꦶ ꦥꦥꦠꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦥꦥꦴꦠꦩ꧀ꦥꦶ ꦥꦥꦠꦤ꧀ꦠꦶ. ꦠꦺ ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦪꦺ ꦕ ꦑꦺꦴ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ, ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ, ꦗꦫꦴꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ, ꦩꦫꦟꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ. ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦤꦨꦶꦫꦠꦴ, ꦗꦫꦴꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦤꦨꦶꦫꦠꦴ, ꦩꦫꦟꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦤꦨꦶꦫꦠꦴ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦤꦨꦶꦫꦠꦴ, ꦗꦴꦠꦶꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ, ꦗꦫꦴꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ, ꦩꦫꦟꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ. ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦤꦨꦶꦱꦔ꧀ꦑꦫꦶꦠ꧀ꦮꦴ, ꦗꦫꦴꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦤꦨꦶꦱꦔ꧀ꦑꦫꦶꦠ꧀ꦮꦴ, ꦩꦫꦟꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦤꦨꦶꦱꦔ꧀ꦑꦫꦶꦠ꧀ꦮꦴ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦱꦁꦮꦠ꧀ꦠꦤꦶꦏꦺꦥꦶ ꦱꦔ꧀ꦑꦴꦫꦺ ꦄꦤꦨꦶꦱꦔ꧀ꦑꦫꦶꦠ꧀ꦮꦴ, ꦗꦴꦠꦶꦥꦥꦴꦠꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦗꦫꦴꦥꦥꦴꦠꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦩꦫꦟꦥꦥꦴꦠꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦥꦥꦴꦠꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ. ꦠꦺ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦢꦸꦠꦶꦪꦁ.

꧓. ꦩꦲꦴꦥꦫꦶꦭ꦳ꦴꦲꦱꦸꦠ꧀ꦠꦁ

꧑꧑꧑꧓. ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦩꦲꦴꦥꦫꦶꦭ꦳ꦴꦲꦺꦴ ꦤꦴꦩ ꦤꦶꦫꦪꦺꦴ. ꦠꦠ꧀ꦡ ꦪꦁ ꦏꦶꦚ꧀ꦕꦶ ꦕꦏ꧀ꦑꦸꦤꦴ ꦫꦹꦥꦁ ꦥꦱ꧀ꦱꦠꦶ, ꦄꦤꦶꦛ꧀ꦜꦫꦹꦥꦚ꧀ꦚꦺꦮ ꦥꦱ꧀ꦱꦠꦶ ꦤꦺꦴ ꦆꦛ꧀ꦜꦫꦹꦥꦁ; ꦄꦏꦤ꧀ꦠꦫꦹꦥꦚ꧀ꦚꦺꦮ ꦥꦱ꧀ꦱꦠꦶ ꦤꦺꦴ ꦏꦤ꧀ꦠꦫꦹꦥꦁ; ꦄꦩꦤꦴꦥꦫꦹꦥꦚ꧀ꦚꦺꦮ ꦥꦱ꧀ꦱꦠꦶ ꦤꦺꦴ ꦩꦤꦴꦥꦫꦹꦥꦁ. ꦪꦁ ꦏꦶꦚ꧀ꦕꦶ ꦱꦺꦴꦠꦺꦤ ꦱꦢ꧀ꦢꦁ ꦱꦸꦟꦴꦠꦶ…ꦥꦺ… ꦪꦁ ꦏꦶꦚ꧀ꦕꦶ ꦏꦴꦪꦺꦤ ꦦꦺꦴꦛ꧀ꦜꦧ꧀ꦧꦁ ꦦꦸꦱꦠꦶ…ꦥꦺ… ꦪꦁ ꦏꦶꦚ꧀ꦕꦶ ꦩꦤꦱꦴ ꦣꦩ꧀ꦩꦁ ꦮꦶꦗꦴꦤꦴꦠꦶ, ꦄꦤꦶꦛ꧀ꦜꦫꦹꦥꦚ꧀ꦚꦺꦮ ꦮꦶꦗꦴꦤꦴꦠꦶ ꦤꦺꦴ ꦆꦛ꧀ꦜꦫꦹꦥꦁ; ꦄꦏꦤ꧀ꦠꦫꦹꦥꦚ꧀ꦚꦺꦮ ꦮꦶꦗꦴꦤꦴꦠꦶ ꦤꦺꦴ ꦏꦤ꧀ꦠꦫꦹꦥꦁ; ꦄꦩꦤꦴꦥꦫꦹꦥꦚ꧀ꦚꦺꦮ ꦮꦶꦗꦴꦤꦴꦠꦶ ꦤꦺꦴ ꦩꦤꦴꦥꦫꦹꦥ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦩꦲꦴ ꦮꦠ ꦱꦺꦴ, ꦨꦤ꧀ꦠꦺ, ꦥꦫꦶꦭ꦳ꦴꦲꦺꦴ, ꦱꦸꦩꦲꦴ ꦮꦠ ꦱꦺꦴ, ꦨꦤ꧀ꦠꦺ, ꦥꦫꦶꦭ꦳ꦴꦲꦺꦴ! ꦄꦠ꧀ꦡꦶ ꦤꦸ ꦑꦺꦴ, ꦨꦤ꧀ꦠꦺ, ꦌꦠꦩ꧀ꦲꦴ ꦥꦫꦶꦭ꦳ꦴꦲꦴ ꦄꦚ꧀ꦚꦺꦴ ꦥꦫꦶꦭ꦳ꦴꦲꦺꦴ ꦩꦲꦤ꧀ꦠꦠꦫꦺꦴ ꦕꦺꦮ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦄꦠ꧀ꦡꦶ ꦑꦺꦴ, ꦨꦶꦏ꧀ꦑꦸ, ꦌꦠꦩ꧀ꦲꦴ ꦥꦫꦶꦭ꦳ꦴꦲꦴ ꦄꦚ꧀ꦚꦺꦴ ꦥꦫꦶꦭ꦳ꦴꦲꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ.

‘‘ꦏꦠꦩꦺꦴ ꦥꦤ, ꦨꦤ꧀ꦠꦺ, ꦌꦠꦩ꧀ꦲꦴ ꦥꦫꦶꦭ꦳ꦴꦲꦴ ꦄꦚ꧀ꦚꦺꦴ ꦥꦫꦶꦭ꦳ꦴꦲꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ…ꦥꦺ… ꦄꦨꦶꦫꦠꦴ…ꦥꦺ… ꦄꦨꦶꦱꦔ꧀ꦑꦫꦺꦴꦤ꧀ꦠꦶ…ꦥꦺ… ꦄꦨꦶꦱꦔ꧀ꦑꦫꦶꦠ꧀ꦮꦴ ꦗꦴꦠꦶꦥꦫꦶꦭ꦳ꦴꦲꦺꦤꦥꦶ ꦥꦫꦶꦝꦪ꧀ꦲꦤ꧀ꦠꦶ, ꦗꦫꦴꦥꦫꦶꦭ꦳ꦴꦲꦺꦤꦥꦶ ꦥꦫꦶꦝꦪ꧀ꦲꦤ꧀ꦠꦶ, ꦩꦫꦟꦥꦫꦶꦭ꦳ꦴꦲꦺꦤꦥꦶ ꦥꦫꦶꦝꦪ꧀ꦲꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦥꦫꦶꦭ꦳ꦴꦲꦺꦤꦥꦶ ꦥꦫꦶꦝꦪ꧀ꦲꦤ꧀ꦠꦶ. ꦠꦺ ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦪꦺ ꦕ ꦑꦺꦴ ꦏꦺꦕꦶ, ꦨꦶꦏ꧀ꦑꦮꦺ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ. ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ…ꦥꦺ… ꦄꦤꦨꦶꦫꦠꦴ…ꦥꦺ… ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ…ꦥꦺ… ꦄꦤꦨꦶꦱꦔ꧀ꦑꦫꦶꦠ꧀ꦮꦴ ꦗꦴꦠꦶꦥꦫꦶꦭ꦳ꦴꦲꦺꦤꦥꦶ ꦤ ꦥꦫꦶꦝꦪ꧀ꦲꦤ꧀ꦠꦶ, ꦗꦫꦴꦥꦫꦶꦭ꦳ꦴꦲꦺꦤꦥꦶ ꦤ ꦥꦫꦶꦝꦪ꧀ꦲꦤ꧀ꦠꦶ, ꦩꦫꦟꦥꦫꦶꦭ꦳ꦴꦲꦺꦤꦥꦶ ꦤ ꦥꦫꦶꦝꦪ꧀ꦲꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦥꦫꦶꦭ꦳ꦴꦲꦺꦤꦥꦶ ꦤ ꦥꦫꦶꦝꦪ꧀ꦲꦤ꧀ꦠꦶ. ꦠꦺ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦠꦠꦶꦪꦁ.

꧔. ꦏꦹꦛꦴꦒꦴꦫꦱꦸꦠ꧀ꦠꦁ

꧑꧑꧑꧔. ‘‘ꦪꦺꦴ ꦲꦶ, ꦨꦶꦏ꧀ꦑꦮꦺ [ꦪꦺꦴ ꦕ ꦑꦺꦴ ꦨꦶꦏ꧀ꦑꦮꦺ (ꦱ꧀ꦪꦴ. ꦏ.)], ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦤꦨꦶꦱꦩꦺꦕ꧀ꦕ…ꦥꦺ… ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦤꦨꦶꦱꦩꦺꦕ꧀ꦕ ꦱꦩ꧀ꦩꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦴꦩꦷ’ꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦪꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦏꦹꦛꦴꦒꦴꦫꦱ꧀ꦱ ꦲꦺꦛ꧀ꦜꦶꦩꦁ ꦓꦫꦁ ꦄꦏꦫꦶꦠ꧀ꦮꦴ ꦈꦥꦫꦶꦩꦁ ꦓꦫꦁ ꦄꦴꦫꦺꦴꦥꦺꦱ꧀ꦱꦴꦩꦷ’ꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦪꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦤꦨꦶꦱꦩꦺꦕ꧀ꦕ…ꦥꦺ… ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦤꦨꦶꦱꦩꦺꦕ꧀ꦕ ꦱꦩ꧀ꦩꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦴꦩꦷ’ꦠꦶ – ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ.

‘‘ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦨꦶꦱꦩꦺꦕ꧀ꦕ…ꦥꦺ… ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦨꦶꦱꦩꦺꦕ꧀ꦕ ꦱꦩ꧀ꦩꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦴꦩꦷ’ꦠꦶ – ꦜꦴꦤꦩꦺꦠꦁ ꦮꦶꦗ꧀ꦗꦠꦶ.

‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦪꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦏꦹꦛꦴꦒꦴꦫꦱ꧀ꦱ ꦲꦺꦛ꧀ꦜꦶꦩꦁ ꦓꦫꦁ ꦏꦫꦶꦠ꧀ꦮꦴ ꦈꦥꦫꦶꦩꦁ ꦓꦫꦁ ꦄꦴꦫꦺꦴꦥꦺꦱ꧀ꦱꦴꦩꦷ’ꦠꦶ – ꦜꦴꦤꦩꦺꦠꦁ ꦮꦶꦗ꧀ꦗꦠꦶ; ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦪꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦨꦶꦱꦩꦺꦕ꧀ꦕ…ꦥꦺ… ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦁ ꦥꦛꦶꦥꦢꦁ ꦄꦫꦶꦪꦱꦕ꧀ꦕꦁ ꦪꦡꦴꦨꦹꦠꦁ ꦄꦨꦶꦱꦩꦺꦕ꧀ꦕ ꦱꦩ꧀ꦩꦴ ꦢꦸꦏ꧀ꦑꦱ꧀ꦱꦤ꧀ꦠꦁ ꦏꦫꦶꦱ꧀ꦱꦴꦩꦷ’ꦠꦶ – ꦜꦴꦤꦩꦺꦠꦁ ꦮꦶꦗ꧀ꦗꦠꦶ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦕꦠꦸꦠ꧀ꦡꦁ.

꧕. ꦮꦴꦭꦱꦸꦠ꧀ꦠꦁ

꧑꧑꧑꧕. ꦌꦏꦁ ꦱꦩꦪꦁ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦩꦲꦴꦮꦤꦺ ꦏꦹꦛꦴꦒꦴꦫꦱꦴꦭꦴꦪꦁ. ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦮꦺꦱꦴꦭꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦄꦢ꧀ꦢꦱꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦱꦩ꧀ꦧꦲꦸꦭꦺ ꦭꦶꦕ꧀ꦖꦮꦶꦏꦸꦩꦴꦫꦏꦺ ꦱꦤ꧀ꦡꦴꦒꦴꦫꦺ ꦈꦥꦴꦱꦤꦁ ꦏꦫꦺꦴꦤ꧀ꦠꦺ, ꦢꦹꦫꦠꦺꦴꦮ ꦱꦸꦑꦸꦩꦺꦤ ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤ ꦄꦱꦤꦁ ꦄꦠꦶꦥꦴꦠꦺꦤ꧀ꦠꦺ, ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦁ [ꦥꦺꦴꦑꦴꦤꦸꦥꦺꦴꦑꦁ (ꦱ꧀ꦪꦴ. ꦏꦁ.)] ꦄꦮꦶꦫꦴꦣꦶꦠꦁ. ꦢꦶꦱ꧀ꦮꦴꦤꦱ꧀ꦱ ꦌꦠꦢꦲꦺꦴꦱꦶ – ‘‘ꦱꦶꦏ꧀ꦑꦶꦠꦴ ꦮꦠꦶꦩꦺ ꦭꦶꦕ꧀ꦖꦮꦶꦏꦸꦩꦴꦫꦏꦴ, ꦱꦸꦱꦶꦏ꧀ꦑꦶꦠꦴ ꦮꦠꦶꦩꦺ ꦭꦶꦕ꧀ꦖꦮꦶꦏꦸꦩꦴꦫꦏꦴ; ꦪꦠ꧀ꦫ ꦲꦶ ꦤꦴꦩ ꦢꦹꦫꦠꦺꦴꦮ ꦱꦸꦑꦸꦩꦺꦤ ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤ ꦄꦱꦤꦁ ꦄꦠꦶꦥꦴꦠꦺꦱ꧀ꦱꦤ꧀ꦠꦶ ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦁ ꦄꦮꦶꦫꦴꦣꦶꦠ’’ꦤ꧀ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦮꦺꦱꦴꦭꦶꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦆꦣꦴꦲꦁ, ꦨꦤ꧀ꦠꦺ, ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦮꦺꦱꦴꦭꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶꦁ. ꦄꦢ꧀ꦢꦱꦁ ꦑ꧀ꦮꦴꦲꦁ, ꦨꦤ꧀ꦠꦺ ꦱꦩ꧀ꦧꦲꦸꦭꦺ ꦭꦶꦕ꧀ꦖꦮꦶꦏꦸꦩꦴꦫꦏꦺ ꦱꦤ꧀ꦡꦴꦒꦴꦫꦺ ꦈꦥꦴꦱꦤꦁ ꦏꦫꦺꦴꦤ꧀ꦠꦺ ꦢꦹꦫꦠꦺꦴꦮ ꦱꦸꦑꦸꦩꦺꦤ ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤ ꦄꦱꦤꦁ ꦄꦠꦶꦥꦴꦠꦺꦤ꧀ꦠꦺ ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦁ ꦄꦮꦶꦫꦴꦣꦶꦠꦁ’. ꦢꦶꦱ꧀ꦮꦴꦤ ꦩꦺ ꦌꦠꦢꦲꦺꦴꦱꦶ – ‘‘ꦱꦶꦏ꧀ꦑꦶꦠꦴ ꦮꦠꦶꦩꦺ ꦭꦶꦕ꧀ꦖꦮꦶꦏꦸꦩꦴꦫꦏꦴ, ꦱꦸꦱꦶꦏ꧀ꦑꦶꦠꦴ ꦮꦠꦶꦩꦺ ꦭꦶꦕ꧀ꦖꦮꦶꦏꦸꦩꦴꦫꦏꦴ; ꦪꦠ꧀ꦫ ꦲꦶ ꦤꦴꦩ ꦢꦹꦫꦠꦺꦴꦮ ꦱꦸꦑꦸꦩꦺꦤ ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤ ꦄꦱꦤꦁ ꦄꦠꦶꦥꦴꦠꦺꦱ꧀ꦱꦤ꧀ꦠꦶ ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦁ ꦄꦮꦶꦫꦴꦣꦶꦠ’’ꦤ꧀ꦠꦶ.

‘‘ꦠꦁ ꦏꦶꦁ ꦩꦚ꧀ꦚꦱꦶ, ꦄꦴꦤꦤ꧀ꦢ, ꦏꦠꦩꦁ ꦤꦸ ꦑꦺꦴ ꦢꦸꦏ꧀ꦏꦫꦠꦫꦁ ꦮꦴ ꦢꦸꦫꦨꦶꦱꦩ꧀ꦨꦮꦠꦫꦁ ꦮꦴ – ꦪꦺꦴ ꦢꦹꦫꦠꦺꦴꦮ ꦱꦸꦑꦸꦩꦺꦤ ꦠꦴꦭ꦳ꦕ꧀ꦖꦶꦒ꧀ꦒꦭ꦳ꦺꦤ ꦄꦱꦤꦁ ꦄꦠꦶꦥꦴꦠꦺꦪ꧀ꦪ ꦥꦺꦴꦔ꧀ꦑꦴꦤꦸꦥꦺꦴꦔ꧀ꦑꦁ ꦄꦮꦶꦫꦴꦣꦶꦠꦁ, ꦪꦺꦴ ꦮꦴ ꦱꦠ꧀ꦠꦣꦴ ꦨꦶꦤ꧀ꦤꦱ꧀ꦱ ꦮꦴꦭꦱ꧀ꦱ ꦏꦺꦴꦛꦶꦪꦴ ꦏꦺꦴꦛꦶꦁ ꦥꦛꦶꦮꦶꦗ꧀ꦙꦺꦪ꧀ꦪꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦢꦸꦏ꧀ꦏꦫꦠꦫꦚ꧀ꦕꦺꦮ ꦢꦸꦫꦨꦶꦱꦩ꧀ꦨꦮꦠꦫꦚ꧀ꦕ ꦪꦺꦴ ꦮꦴ [ꦪꦺꦴ (ꦱꦷ.)] ꦱꦠ꧀ꦠꦣꦴ ꦨꦶꦤ꧀ꦤꦱ꧀ꦱ ꦮꦴꦭꦱ꧀ꦱ ꦏꦺꦴꦛꦶꦪꦴ ꦏꦺꦴꦛꦶꦁ ꦥꦛꦶꦮꦶꦗ꧀ꦙꦺꦪ꧀ꦪꦴ’’ꦠꦶ. ‘‘ꦄꦡ ꦑꦺꦴ [ꦄꦡ ꦑꦺꦴ ꦠꦺ (ꦱ꧀ꦪꦴ. ꦏꦁ.)], ꦄꦴꦤꦤ꧀ꦢ, ꦢꦸꦥ꧀ꦥꦛꦶꦮꦶꦗ꧀ꦙꦠꦫꦁ ꦥꦛꦶꦮꦶꦗ꧀ꦙꦤ꧀ꦠꦶ, ꦪꦺ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦛꦶꦮꦶꦗ꧀ꦙꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦛꦶꦮꦶꦗ꧀ꦙꦤ꧀ꦠꦶ’’.

‘‘ꦠꦱ꧀ꦩꦴꦠꦶꦲꦴꦤꦤ꧀ꦢ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦥꦚ꧀ꦕꦩꦁ.

꧖. ꦄꦤ꧀ꦣꦏꦴꦫꦱꦸꦠ꧀ꦠꦁ

꧑꧑꧑꧖. ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦭꦺꦴꦏꦤ꧀ꦠꦫꦶꦏꦴ ꦄꦓꦴ ꦄꦱꦁꦮꦸꦠꦴ ꦄꦤ꧀ꦣꦏꦴꦫꦴ ꦄꦤ꧀ꦣꦏꦴꦫꦠꦶꦩꦶꦱꦴ, ꦪꦠ꧀ꦡꦩꦶꦩꦺꦱꦁ ꦕꦤ꧀ꦢꦶꦩꦱꦹꦫꦶꦪꦴꦤꦁ ꦌꦮꦁꦩꦲꦶꦢ꧀ꦣꦶꦏꦴꦤꦁ ꦌꦮꦁ ꦩꦲꦴꦤꦸꦨꦴꦮꦴꦤꦁ ꦄꦴꦨꦴꦪ ꦤꦴꦤꦸꦨꦺꦴꦤ꧀ꦠꦷ’’ꦠꦶ.

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦩꦲꦴ ꦮꦠ ꦱꦺꦴ, ꦨꦤ꧀ꦠꦺ, ꦄꦤ꧀ꦣꦏꦴꦫꦺꦴ, ꦱꦸꦩꦲꦴ ꦮꦠ ꦱꦺꦴ, ꦨꦤ꧀ꦠꦺ, ꦄꦤ꧀ꦣꦏꦴꦫꦺꦴ! ꦄꦠ꧀ꦡꦶ ꦤꦸ ꦑꦺꦴ, ꦨꦤ꧀ꦠꦺ, ꦌꦠꦩ꧀ꦲꦴ ꦄꦤ꧀ꦣꦏꦴꦫꦴ ꦄꦚ꧀ꦚꦺꦴ ꦄꦤ꧀ꦣꦏꦴꦫꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦄꦠ꧀ꦡꦶ ꦑꦺꦴ, ꦨꦶꦏ꧀ꦑꦸ, ꦌꦠꦩ꧀ꦲꦴ ꦄꦤ꧀ꦣꦏꦴꦫꦴ ꦄꦚ꧀ꦚꦺꦴ ꦄꦤ꧀ꦣꦏꦴꦫꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ.

‘‘ꦏꦠꦩꦺꦴ ꦥꦤ, ꦨꦤ꧀ꦠꦺ, ꦌꦠꦩ꧀ꦲꦴ ꦄꦤ꧀ꦣꦏꦴꦫꦴ ꦄꦚ꧀ꦚꦺꦴ ꦄꦤ꧀ꦣꦏꦴꦫꦺꦴ ꦩꦲꦤ꧀ꦠꦠꦫꦺꦴ ꦕ ꦨꦪꦴꦤꦏꦠꦫꦺꦴ ꦕꦴ’’ꦠꦶ? ‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦸ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦤ꧀ꦠꦶ, ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦄꦨꦶꦫꦩꦤ꧀ꦠꦶ…ꦥꦺ… ꦄꦨꦶꦫꦠꦴ…ꦥꦺ… ꦄꦨꦶꦱꦔ꧀ꦑꦫꦺꦴꦤ꧀ꦠꦶ…ꦥꦺ… ꦄꦨꦶꦱꦔ꧀ꦑꦫꦶꦠ꧀ꦮꦴ ꦗꦴꦠꦤ꧀ꦣꦏꦴꦫꦩ꧀ꦥꦶ ꦥꦥꦠꦤ꧀ꦠꦶ, ꦗꦫꦤ꧀ꦣꦏꦴꦫꦩ꧀ꦥꦶ ꦥꦥꦠꦤ꧀ꦠꦶ, ꦩꦫꦟꦤ꧀ꦣꦏꦴꦫꦩ꧀ꦥꦶ ꦥꦥꦠꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦤ꧀ꦣꦏꦴꦫꦩ꧀ꦥꦶ ꦥꦥꦠꦤ꧀ꦠꦶ. ꦠꦺ ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦤ ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦪꦺ ꦕ ꦑꦺꦴ ꦏꦺꦕꦶ, ꦨꦶꦏ꧀ꦑꦸ, ꦱꦩꦟꦴ ꦮꦴ ꦧ꧀ꦫꦴꦲ꧀ꦩꦟꦴ ꦮꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦤ꧀ꦠꦶ, ꦠꦺ ꦗꦴꦠꦶꦱꦁꦮꦠ꧀ꦠꦤꦶꦏꦺꦱꦸ ꦱꦔ꧀ꦑꦴꦫꦺꦱꦸ ꦤꦴꦨꦶꦫꦩꦤ꧀ꦠꦶ…ꦥꦺ… ꦄꦤꦨꦶꦫꦠꦴ…ꦥꦺ… ꦤꦴꦨꦶꦱꦔ꧀ꦑꦫꦺꦴꦤ꧀ꦠꦶ…ꦥꦺ… ꦄꦤꦨꦶꦱꦔ꧀ꦑꦫꦶꦠ꧀ꦮꦴ ꦗꦴꦠꦤ꧀ꦣꦏꦴꦫꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦗꦫꦤ꧀ꦣꦏꦴꦫꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦩꦫꦟꦤ꧀ꦣꦏꦴꦫꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ, ꦱꦺꦴꦏꦥꦫꦶꦢꦺꦮꦢꦸꦏ꧀ꦑꦢꦺꦴꦩꦤꦱ꧀ꦱꦸꦥꦴꦪꦴꦱꦤ꧀ꦣꦏꦴꦫꦩ꧀ꦥꦶ ꦤꦥ꧀ꦥꦥꦠꦤ꧀ꦠꦶ. ꦠꦺ ꦥꦫꦶꦩꦸꦕ꧀ꦕꦤ꧀ꦠꦶ ꦗꦴꦠꦶꦪꦴ ꦗꦫꦴꦪ ꦩꦫꦟꦺꦤ ꦱꦺꦴꦏꦺꦲꦶ ꦥꦫꦶꦢꦺꦮꦺꦲꦶ ꦢꦸꦏ꧀ꦑꦺꦲꦶ ꦢꦺꦴꦩꦤꦱ꧀ꦱꦺꦲꦶ ꦈꦥꦴꦪꦴꦱꦺꦲꦶ. ‘ꦥꦫꦶꦩꦸꦕ꧀ꦕꦤ꧀ꦠꦶ ꦢꦸꦏ꧀ꦑꦱ꧀ꦩꦴ’ꦠꦶ ꦮꦢꦴꦩꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦖꦛ꧀ꦜꦁ.

꧗. ꦥꦜꦩꦖꦶꦒ꧀ꦒꦭ꦳ꦪꦸꦒꦱꦸꦠ꧀ꦠꦁ

꧑꧑꧑꧗. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦩꦲꦴꦱꦩꦸꦢ꧀ꦢꦺ ꦌꦏꦕ꧀ꦖꦶꦒ꧀ꦒꦭ꦳ꦁ ꦪꦸꦒꦁ ꦥꦏ꧀ꦑꦶꦥꦺꦪ꧀ꦪ. ꦠꦠ꧀ꦫꦴꦥꦶꦱ꧀ꦱ ꦏꦴꦟꦺꦴ ꦏꦕ꧀ꦖꦥꦺꦴ. ꦱꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦑꦺꦴ ꦏꦴꦟꦺꦴ ꦏꦕ꧀ꦖꦥꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦤ꧀ꦠꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭ꦳ꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪꦴ’’ꦠꦶ? ‘‘ꦪꦢꦶ ꦤꦹꦤ, ꦨꦤ꧀ꦠꦺ, ꦏꦢꦴꦕꦶ ꦏꦫꦲꦕꦶ ꦢꦷꦓꦱ꧀ꦱ ꦄꦢ꧀ꦣꦸꦤꦺꦴ ꦄꦕ꧀ꦕꦪꦺꦤꦴ’’ꦠꦶ.

‘‘ꦑꦶꦥ꧀ꦥꦠꦫꦁ ꦑꦺꦴ ꦱꦺꦴ, ꦨꦶꦏ꧀ꦑꦮꦺ, ꦏꦴꦟꦺꦴ ꦏꦕ꧀ꦖꦥꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦤ꧀ꦠꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭ꦳ꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪ, ꦤ ꦠ꧀ꦮꦺꦮꦴꦲꦁ, ꦨꦶꦏ꧀ꦑꦮꦺ, ꦱꦏꦶꦁ ꦮꦶꦤꦶꦥꦴꦠꦒꦠꦺꦤ ꦧꦴꦭꦺꦤ [ꦮꦶꦤꦷꦠꦒꦠꦺꦤ ꦧꦲꦸꦭꦺꦤ (ꦏ.)] ꦩꦤꦸꦱ꧀ꦱꦠ꧀ꦠꦁ ꦮꦢꦴꦩꦶ’’.

ꦠꦁ ꦏꦶꦱ꧀ꦱ ꦲꦺꦠꦸ? ꦤ ꦲꦺꦠ꧀ꦡ, ꦨꦶꦏ꧀ꦑꦮꦺ, ꦄꦠ꧀ꦡꦶ ꦣꦩ꧀ꦩꦕꦫꦶꦪꦴ, ꦱꦩꦕꦫꦶꦪꦴ, ꦏꦸꦱꦭꦏꦶꦫꦶꦪꦴ, ꦥꦸꦚ꧀ꦚꦏꦶꦫꦶꦪꦴ. ꦄꦚ꧀ꦚꦩꦚ꧀ꦚꦑꦴꦢꦶꦏꦴ ꦌꦠ꧀ꦡ, ꦨꦶꦏ꧀ꦑꦮꦺ, ꦮꦠ꧀ꦠꦠꦶ ꦢꦸꦧ꧀ꦧꦭꦑꦴꦢꦶꦏꦴ. ꦠꦁ ꦏꦶꦱ꧀ꦱ ꦲꦺꦠꦸ? ꦄꦢꦶꦛ꧀ꦜꦠ꧀ꦠꦴ, ꦨꦶꦏ꧀ꦑꦮꦺ, ꦕꦠꦸꦤ꧀ꦤꦁ ꦄꦫꦶꦪꦱꦕ꧀ꦕꦴꦤꦁ. ꦏꦠꦩꦺꦱꦁ ꦕꦠꦸꦤ꧀ꦤꦁ? ꦢꦸꦏ꧀ꦑꦱ꧀ꦱ ꦄꦫꦶꦪꦱꦕ꧀ꦕꦱ꧀ꦱ…ꦥꦺ… ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦪꦴ ꦥꦛꦶꦥꦢꦴꦪ ꦄꦫꦶꦪꦱꦕ꧀ꦕꦱ꧀ꦱ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦱꦠ꧀ꦠꦩꦁ.

꧘. ꦢꦸꦠꦶꦪꦖꦶꦒ꧀ꦒꦭ꦳ꦪꦸꦒꦱꦸꦠ꧀ꦠꦁ

꧑꧑꧑꧘. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦪꦁ ꦩꦲꦴꦥꦡꦮꦷ ꦌꦏꦺꦴꦢꦏꦴ ꦄꦱ꧀ꦱ. ꦠꦠ꧀ꦫ ꦥꦸꦫꦶꦱꦺꦴ ꦌꦏꦕ꧀ꦖꦶꦒ꧀ꦒꦭ꦳ꦁ ꦪꦸꦒꦁ ꦥꦏ꧀ꦑꦶꦥꦺꦪ꧀ꦪ. ꦠꦩꦺꦤꦁ ꦥꦸꦫꦠ꧀ꦡꦶꦩꦺꦴ ꦮꦴꦠꦺꦴ ꦥꦕ꧀ꦖꦶꦩꦺꦤ ꦱꦁꦲꦫꦺꦪ꧀ꦪ, ꦥꦕ꧀ꦖꦶꦩꦺꦴ ꦮꦴꦠꦺꦴ ꦥꦸꦫꦠ꧀ꦡꦶꦩꦺꦤ ꦱꦁꦲꦫꦺꦪ꧀ꦪ, ꦈꦠ꧀ꦠꦫꦺꦴ ꦮꦴꦠꦺꦴ ꦢꦏ꧀ꦑꦶꦟꦺꦤ ꦱꦁꦲꦫꦺꦪ꧀ꦪ, ꦢꦏ꧀ꦑꦶꦟꦺꦴ ꦮꦴꦠꦺꦴ ꦈꦠ꧀ꦠꦫꦺꦤ ꦱꦁꦲꦫꦺꦪ꧀ꦪ. ꦠꦠ꧀ꦫꦱ꧀ꦱ ꦏꦴꦟꦺꦴ ꦏꦕ꧀ꦖꦥꦺꦴ. ꦱꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦑꦺꦴ ꦏꦴꦟꦺꦴ ꦏꦕ꧀ꦖꦥꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦤ꧀ꦠꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭ꦳ꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪꦴ’’ꦠꦶ? ‘‘ꦄꦣꦶꦕ꧀ꦕꦩꦶꦢꦁ, ꦨꦤ꧀ꦠꦺ, ꦪꦁ ꦱꦺꦴ ꦏꦴꦟꦺꦴ ꦏꦕ꧀ꦖꦥꦺꦴ ꦮꦱ꧀ꦱꦱꦠꦱ꧀ꦱ ꦮꦱ꧀ꦱꦱꦠꦱ꧀ꦱ ꦄꦕ꧀ꦕꦪꦺꦤ ꦱꦏꦶꦁ ꦱꦏꦶꦁ ꦈꦩ꧀ꦩꦸꦗ꧀ꦗꦤ꧀ꦠꦺꦴ ꦄꦩꦸꦱ꧀ꦩꦶꦁ ꦌꦏꦕ꧀ꦖꦶꦒ꧀ꦒꦭ꦳ꦺ ꦪꦸꦒꦺ ꦒꦷꦮꦁ ꦥꦮꦺꦱꦺꦪ꧀ꦪꦴ’’ꦠꦶ.

‘‘ꦌꦮꦁ ꦄꦣꦶꦕ꧀ꦕꦩꦶꦢꦁ, ꦨꦶꦏ꧀ꦑꦮꦺ, ꦪꦁ ꦩꦤꦸꦱ꧀ꦱꦠ꧀ꦠꦁ ꦭꦨꦠꦶ. ꦌꦮꦁ ꦄꦣꦶꦕ꧀ꦕꦩꦶꦢꦁ, ꦨꦶꦏ꧀ꦑꦮꦺ, ꦪꦁ ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦗ꧀ꦗꦠꦶ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ. ꦌꦮꦁ ꦄꦣꦶꦕ꧀ꦕꦩꦶꦢꦁ, ꦨꦶꦏ꧀ꦑꦮꦺ, ꦪꦁ ꦠꦡꦴꦒꦠꦥ꧀ꦥꦮꦺꦢꦶꦠꦺꦴ ꦣꦩ꧀ꦩꦮꦶꦤꦪꦺꦴ ꦭꦺꦴꦏꦺ ꦢꦶꦧ꧀ꦧꦠꦶ. ꦠꦱ꧀ꦱꦶꦢꦁ [ꦠꦪꦶꦢꦁ (?)], ꦨꦶꦏ꧀ꦑꦮꦺ, ꦩꦤꦸꦱ꧀ꦱꦠ꧀ꦠꦁ ꦭꦢ꧀ꦣꦁ, ꦠꦡꦴꦒꦠꦺꦴ ꦭꦺꦴꦏꦺ ꦈꦥ꧀ꦥꦤ꧀ꦤꦺꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ, ꦠꦡꦴꦒꦠꦥ꧀ꦥꦮꦺꦢꦶꦠꦺꦴ ꦕ ꦣꦩ꧀ꦩꦮꦶꦤꦪꦺꦴ ꦭꦺꦴꦏꦺ ꦢꦶꦧ꧀ꦧꦠꦶ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦄꦛ꧀ꦜꦩꦁ.

꧙. ꦥꦜꦩꦱꦶꦤꦺꦫꦸꦥꦧ꧀ꦧꦠꦫꦴꦗꦱꦸꦠ꧀ꦠꦁ

꧑꧑꧑꧙. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦱꦶꦤꦺꦫꦸꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦥꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴ ꦮꦴ [ꦪꦴ ꦕ] ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ, ꦪꦺꦴ ꦮꦴ [ꦪꦺꦴ ꦕ (ꦱ꧀ꦪꦴ. ꦏꦁ. ꦥꦷ. ꦏ.) ꦱꦁ. ꦤꦶ. ꧒.꧘꧔] ꦱꦶꦤꦺꦫꦸꦥꦧ꧀ꦧꦠꦫꦴꦗꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦱꦶꦤꦺꦫꦸꦥꦧ꧀ꦧꦠꦫꦴꦗꦴ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦱꦶꦤꦺꦫꦸꦥꦧ꧀ꦧꦠꦫꦴꦗꦴꦤꦁ ꦈꦥꦤꦶꦣꦴꦪ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ ꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦨꦶꦱꦩꦺꦠꦴꦮꦶꦤꦺꦴ ꦌꦠꦢꦺꦮ ꦧꦲꦸꦠꦫꦁ ꦢꦸꦏ꧀ꦑꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦁ ꦄꦮꦱꦶꦛ꧀ꦜꦁ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ, ꦥꦸꦫꦶꦩꦁ ꦢꦸꦏ꧀ꦑꦏ꧀ꦑꦤ꧀ꦣꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦪꦢꦶꦢꦁ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦠꦴ; ꦪꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦤꦮꦩꦁ.

꧑꧐. ꦢꦸꦠꦶꦪꦱꦶꦤꦺꦫꦸꦥꦧ꧀ꦧꦠꦫꦴꦗꦱꦸꦠ꧀ꦠꦁ

꧑꧑꧒꧐. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦱꦶꦤꦺꦫꦸꦥꦧ꧀ꦧꦠꦫꦴꦗꦴꦪꦁ ꦥꦫꦶꦏ꧀ꦑꦪꦁ ꦥꦫꦶꦪꦴꦢꦴꦤꦁ ꦒꦕ꧀ꦖꦺꦪ꧀ꦪ, ꦜꦥꦺꦠ꧀ꦮꦴ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦱꦶꦤꦺꦫꦸꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ, ꦪꦴ ꦮꦴ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦱꦶꦤꦺꦫꦸꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦱꦶꦤꦺꦫꦸꦱ꧀ꦱ ꦥꦧ꧀ꦧꦠꦫꦴꦗꦱ꧀ꦱ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦱꦠ꧀ꦠ ꦩꦸꦒ꧀ꦒꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ ꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦨꦶꦱꦩꦺꦠꦴꦮꦶꦤꦺꦴ ꦌꦠꦢꦺꦮ ꦧꦲꦸꦠꦫꦁ ꦢꦸꦏ꧀ꦑꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦁ ꦄꦮꦱꦶꦛ꧀ꦜꦁ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ, ꦥꦸꦫꦶꦩꦁ ꦢꦸꦏ꧀ꦑꦏ꧀ꦑꦤ꧀ꦣꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦪꦢꦶꦢꦁ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦠꦴ; ꦪꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦢꦱꦩꦁ.

ꦥꦥꦴꦠꦮꦒ꧀ꦒꦺꦴ ꦥꦚ꧀ꦕꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦕꦶꦤ꧀ꦠꦴ ꦥꦥꦴꦠꦺꦴ ꦥꦫꦶꦭ꦳ꦴꦲꦺꦴ, ꦏꦹꦛꦁ ꦮꦴꦭꦤ꧀ꦣꦏꦴꦫꦺꦴ ꦕ;

ꦖꦶꦒ꧀ꦒꦭ꦳ꦺꦤ ꦕ ꦢ꧀ꦮꦺ ꦮꦸꦠ꧀ꦠꦴ, ꦱꦶꦤꦺꦫꦸ ꦄꦥꦫꦺ ꦢꦸꦮꦺꦠꦶ.