꧖. ꦄꦨꦶꦱꦩꦪꦮꦒ꧀ꦒꦺꦴ

꧑. ꦤꦑꦱꦶꦑꦱꦸꦠ꧀ꦠꦁ

꧑꧑꧒꧑. ꦄꦡ ꦑꦺꦴ ꦨꦒꦮꦴ ꦥꦫꦶꦠ꧀ꦠꦁ ꦤꦑꦱꦶꦑꦴꦪꦁ ꦥꦁꦱꦸꦁ ꦄꦴꦫꦺꦴꦥꦺꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦺꦴ ꦮꦴꦪꦁ ꦩꦪꦴ ꦥꦫꦶꦠ꧀ꦠꦺꦴ ꦤꦑꦱꦶꦑꦴꦪꦁ ꦥꦁꦱꦸ ꦄꦴꦫꦺꦴꦥꦶꦠꦺꦴ, ꦄꦪꦁ ꦮꦴ ꦩꦲꦴꦥꦡꦮꦷ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦪꦢꦶꦢꦁ – ꦩꦲꦴꦥꦡꦮꦷ; ꦄꦥ꧀ꦥꦩꦠ꧀ꦠꦏꦴꦪꦁ ꦨꦒꦮꦠꦴ ꦥꦫꦶꦠ꧀ꦠꦺꦴ ꦤꦑꦱꦶꦑꦴꦪꦁ ꦥꦁꦱꦸ ꦄꦴꦫꦺꦴꦥꦶꦠꦺꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ ꦩꦲꦴꦥꦡꦮꦶꦁ ꦈꦥꦤꦶꦣꦴꦪ ꦨꦒꦮꦠꦴ ꦥꦫꦶꦠ꧀ꦠꦺꦴ ꦤꦑꦱꦶꦑꦴꦪꦁ ꦥꦁꦱꦸ ꦄꦴꦫꦺꦴꦥꦶꦠꦺꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ ꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦨꦶꦱꦩꦺꦠꦴꦮꦶꦤꦺꦴ ꦌꦠꦢꦺꦮ ꦧꦲꦸꦠꦫꦁ ꦢꦸꦏ꧀ꦑꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦁ ꦄꦮꦱꦶꦛ꧀ꦜꦁ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ ꦥꦸꦫꦶꦩꦁ ꦢꦸꦏ꧀ꦑꦏ꧀ꦑꦤ꧀ꦣꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦪꦢꦶꦢꦁ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦠꦴ; ꦪꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦥꦜꦩꦁ.

꧒. ꦥꦺꦴꦏ꧀ꦑꦫꦟꦷꦱꦸꦠ꧀ꦠꦁ

꧑꧑꧒꧒. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦺꦴꦏ꧀ꦑꦫꦟꦷ ꦥꦚ꧀ꦚꦴꦱꦪꦺꦴꦗꦤꦴꦤꦶ ꦄꦴꦪꦴꦩꦺꦤ, ꦥꦚ꧀ꦚꦴꦱꦪꦺꦴꦗꦤꦴꦤꦶ ꦮꦶꦠ꧀ꦡꦴꦫꦺꦤ, ꦥꦚ꧀ꦚꦴꦱꦪꦺꦴꦗꦤꦴꦤꦶ ꦈꦧ꧀ꦧꦺꦣꦺꦤ, ꦥꦸꦟ꧀ꦟꦴ ꦈꦢꦏꦱ꧀ꦱ ꦱꦩꦠꦶꦠ꧀ꦠꦶꦏꦴ ꦏꦴꦏꦥꦺꦪ꧀ꦪꦴ. ꦠꦠꦺꦴ ꦥꦸꦫꦶꦱꦺꦴ ꦏꦸꦱꦒ꧀ꦒꦺꦤ ꦈꦢꦏꦁ ꦈꦢ꧀ꦣꦫꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦏꦸꦱꦒ꧀ꦒꦺꦤ ꦈꦧ꧀ꦨꦠꦁ, ꦪꦁ ꦮꦴ ꦥꦺꦴꦏ꧀ꦑꦫꦟꦶꦪꦴ ꦈꦢꦏ’’ꦤ꧀ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦥꦺꦴꦏ꧀ꦑꦫꦟꦶꦪꦴ ꦈꦢꦏꦁ; ꦄꦥ꧀ꦥꦩꦠ꧀ꦠꦏꦁ ꦏꦸꦱꦒ꧀ꦒꦺꦤ ꦈꦢꦏꦁ ꦈꦧ꧀ꦨꦠꦁ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ ꦥꦺꦴꦏ꧀ꦑꦫꦟꦶꦪꦴ ꦈꦢꦏꦁ ꦈꦥꦤꦶꦣꦴꦪ ꦏꦸꦱꦒ꧀ꦒꦺꦤ ꦈꦢꦏꦁ ꦈꦧ꧀ꦨꦠ’’ꦤ꧀ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦢꦸꦠꦶꦪꦁ.

꧓. ꦥꦜꦩꦱꦁꦨꦺꦗ꧀ꦗꦱꦸꦠ꧀ꦠꦁ

꧑꧑꧒꧓. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦪꦠ꧀ꦡꦶꦩꦴ ꦩꦲꦴꦤꦢꦶꦪꦺꦴ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ, ꦱꦺꦪ꧀ꦪꦡꦶꦢꦁ – ꦒꦔ꧀ꦒꦴ, ꦪꦩꦸꦤꦴ, ꦄꦕꦶꦫꦮꦠꦷ, ꦱꦫꦨꦹ, ꦩꦲꦷ, ꦠꦠꦺꦴ ꦥꦸꦫꦶꦱꦺꦴ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦢ꧀ꦣꦫꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦶ, ꦪꦁ ꦮꦴ ꦱꦁꦨꦺꦗ꧀ꦗꦈꦢꦏ’’ꦤ꧀ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦱꦁꦨꦺꦗ꧀ꦗꦈꦢꦏꦁ; ꦄꦥ꧀ꦥꦩꦠ꧀ꦠꦏꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦶ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦱꦁꦨꦺꦗ꧀ꦗꦈꦢꦏꦁ ꦈꦥꦤꦶꦣꦴꦪ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦠꦠꦶꦪꦁ.

꧔. ꦢꦸꦠꦶꦪꦱꦁꦨꦺꦗ꧀ꦗꦱꦸꦠ꧀ꦠꦁ

꧑꧑꧒꧔. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦪꦠ꧀ꦡꦶꦩꦴ ꦩꦲꦴꦤꦢꦶꦪꦺꦴ ꦱꦁꦱꦤ꧀ꦢꦤ꧀ꦠꦶ ꦱꦩꦺꦤ꧀ꦠꦶ, ꦱꦺꦪ꧀ꦪꦡꦶꦢꦁ – ꦒꦔ꧀ꦒꦴ, ꦪꦩꦸꦤꦴ, ꦄꦕꦶꦫꦮꦠꦷ, ꦱꦫꦨꦹ, ꦩꦲꦷ, ꦠꦁ ꦈꦢꦏꦁ ꦥꦫꦶꦏ꧀ꦑꦪꦁ ꦥꦫꦶꦪꦴꦢꦴꦤꦁ ꦒꦕ꧀ꦖꦺꦪ꧀ꦪ, ꦜꦥꦺꦠ꧀ꦮꦴ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦱꦁꦨꦺꦗ꧀ꦗꦈꦢꦏꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ, ꦪꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦷ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦱꦁꦨꦺꦗ꧀ꦗꦈꦢꦏꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦶ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦱꦁꦨꦺꦗ꧀ꦗꦈꦢꦏꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦕꦠꦸꦠ꧀ꦡꦁ.

꧕. ꦥꦜꦩꦩꦲꦴꦥꦡꦮꦷꦱꦸꦠ꧀ꦠꦁ

꧑꧑꧒꧕. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦩꦲꦴꦥꦡꦮꦶꦪꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦈꦥꦤꦶꦏ꧀ꦑꦶꦥꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴ ꦮꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦈꦥꦤꦶꦏ꧀ꦑꦶꦠ꧀ꦠꦴ, ꦄꦪꦁ ꦮꦴ ꦩꦲꦴꦥꦡꦮꦷ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦩꦲꦴꦥꦡꦮꦷ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦈꦥꦤꦶꦏ꧀ꦑꦶꦠ꧀ꦠꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦩꦲꦴꦥꦡꦮꦶꦁ ꦈꦥꦤꦶꦣꦴꦪ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦈꦥꦤꦶꦏ꧀ꦑꦶꦠ꧀ꦠꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦥꦚ꧀ꦕꦩꦁ.

꧖. ꦢꦸꦠꦶꦪꦩꦲꦴꦥꦡꦮꦷꦱꦸꦠ꧀ꦠꦁ

꧑꧑꧒꧖. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦩꦲꦴꦥꦡꦮꦷ ꦥꦫꦶꦏ꧀ꦑꦪꦁ ꦥꦫꦶꦪꦴꦢꦴꦤꦁ ꦒꦕ꧀ꦖꦺꦪ꧀ꦪ ꦜꦥꦺꦠ꧀ꦮꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦩꦲꦴꦥꦡꦮꦶꦪꦴ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ, ꦪꦴ ꦮꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦄꦮꦱꦶꦛ꧀ꦜꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦩꦲꦴꦥꦡꦮꦶꦪꦴ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦄꦮꦱꦶꦛ꧀ꦜꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦩꦲꦴꦥꦡꦮꦶꦪꦴ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦱꦠ꧀ꦠ ꦏꦺꦴꦭꦛ꧀ꦜꦶꦩꦠ꧀ꦠꦶꦪꦺꦴ ꦒꦸꦭ꦳ꦶꦏꦴ ꦄꦮꦱꦶꦛ꧀ꦜꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦖꦛ꧀ꦜꦁ.

꧗. ꦥꦜꦩꦩꦲꦴꦱꦩꦸꦢ꧀ꦢꦱꦸꦠ꧀ꦠꦁ

꧑꧑꧒꧗. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦩꦲꦴꦱꦩꦸꦢ꧀ꦢꦠꦺꦴ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦢ꧀ꦣꦫꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦶ, ꦪꦁ ꦮꦴ ꦩꦲꦴꦱꦩꦸꦢ꧀ꦢꦺ ꦈꦢꦏ’’ꦤ꧀ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦩꦲꦴꦱꦩꦸꦢ꧀ꦢꦺ ꦈꦢꦏꦁ; ꦄꦥ꧀ꦥꦩꦠ꧀ꦠꦏꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦶ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦩꦲꦴꦱꦩꦸꦢ꧀ꦢꦺ ꦈꦢꦏꦁ ꦈꦥꦤꦶꦣꦴꦪ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦈꦧ꧀ꦨꦠꦴꦤꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦱꦠ꧀ꦠꦩꦁ.

꧘. ꦢꦸꦠꦶꦪꦩꦲꦴꦱꦩꦸꦢ꧀ꦢꦱꦸꦠ꧀ꦠꦁ

꧑꧑꧒꧘. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦩꦲꦴꦱꦩꦸꦢ꧀ꦢꦺ ꦈꦢꦏꦁ ꦥꦫꦶꦏ꧀ꦑꦪꦁ [ꦩꦲꦴꦱꦩꦸꦢ꧀ꦢꦺꦴ ꦥꦫꦶꦏ꧀ꦑꦪꦁ (ꦱꦷ. ꦱ꧀ꦪꦴ. ꦏꦁ.) ꦱꦁ. ꦤꦶ. ꧒.꧘꧑] ꦥꦫꦶꦪꦴꦢꦴꦤꦁ ꦒꦕ꧀ꦖꦺꦪ꧀ꦪ ꦜꦥꦺꦠ꧀ꦮꦴ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦩꦲꦴꦱꦩꦸꦢ꧀ꦢꦺ ꦈꦢꦏꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ, ꦪꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦷ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦩꦲꦴꦱꦩꦸꦢ꧀ꦢꦺ ꦈꦢꦏꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦴꦤꦶ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦶ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦩꦲꦴꦱꦩꦸꦢ꧀ꦢꦺ ꦈꦢꦏꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦢ꧀ꦮꦺ ꦮꦴ ꦠꦷꦟꦶ ꦮꦴ ꦈꦢꦏꦦꦸꦱꦶꦠꦴꦤꦶ ꦄꦮꦱꦶꦛ꧀ꦜꦴꦤꦷ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦄꦛ꧀ꦜꦩꦁ.

꧙. ꦥꦜꦩꦥꦧ꧀ꦧꦠꦹꦥꦩꦱꦸꦠ꧀ꦠꦁ

꧑꧑꧒꧙. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦥꦸꦫꦶꦱꦺꦴ ꦲꦶꦩꦮꦠꦺꦴ ꦥꦧ꧀ꦧꦠꦫꦴꦗꦱ꧀ꦱ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦥꦺꦪ꧀ꦪ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦴ ꦮꦴ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ, ꦄꦪꦁ ꦮꦴ ꦲꦶꦩꦮꦴ ꦥꦧ꧀ꦧꦠꦫꦴꦗꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ, ꦪꦢꦶꦢꦁ – ꦲꦶꦩꦮꦴ ꦥꦧ꧀ꦧꦠꦫꦴꦗꦴ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦲꦶꦩꦮꦤ꧀ꦠꦁ ꦥꦧ꧀ꦧꦠꦫꦴꦗꦴꦤꦁ ꦈꦥꦤꦶꦣꦴꦪ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦈꦥꦤꦶꦏ꧀ꦑꦶꦠ꧀ꦠꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ…ꦥꦺ… ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦤꦮꦩꦁ.

꧑꧐. ꦢꦸꦠꦶꦪꦥꦧ꧀ꦧꦠꦹꦥꦩꦱꦸꦠ꧀ꦠꦁ

꧑꧑꧓꧐. ‘‘ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦲꦶꦩꦮꦴ ꦥꦧ꧀ꦧꦠꦫꦴꦗꦴ ꦥꦫꦶꦏ꧀ꦑꦪꦁ ꦥꦫꦶꦪꦴꦢꦴꦤꦁ ꦒꦕ꧀ꦖꦺꦪ꧀ꦪ, ꦜꦥꦺꦠ꧀ꦮꦴ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ. ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦏꦠꦩꦁ ꦤꦸ ꦑꦺꦴ ꦧꦲꦸꦠꦫꦁ – ꦪꦁ ꦮꦴ ꦲꦶꦩꦮꦠꦺꦴ ꦥꦧ꧀ꦧꦠꦫꦴꦗꦱ꧀ꦱ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ, ꦪꦴ ꦮꦴ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ’’ꦠꦶ? ‘‘ꦌꦠꦢꦺꦮ, ꦨꦤ꧀ꦠꦺ, ꦧꦲꦸꦠꦫꦁ ꦲꦶꦩꦮꦠꦺꦴ ꦥꦧ꧀ꦧꦠꦫꦴꦗꦱ꧀ꦱ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦶꦏꦴ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ. ꦱꦔ꧀ꦑꦩ꧀ꦥꦶ ꦤ ꦈꦥꦺꦤ꧀ꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦤ꧀ꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦤ꧀ꦠꦶ ꦲꦶꦩꦮꦠꦺꦴ ꦥꦧ꧀ꦧꦠꦫꦴꦗꦱ꧀ꦱ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦱꦠ꧀ꦠ ꦱꦴꦱꦥꦩꦠ꧀ꦠꦶꦪꦺꦴ ꦥꦴꦱꦴꦟꦱꦏ꧀ꦑꦫꦴ ꦄꦮꦱꦶꦛ꧀ꦜꦴ’’ꦠꦶ. ‘‘ꦌꦮꦩꦺꦮ ꦑꦺꦴ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦱ꧀ꦱ ꦢꦶꦛ꧀ꦜꦶꦱꦩ꧀ꦥꦤ꧀ꦤꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦨꦶꦱꦩꦺꦠꦴꦮꦶꦤꦺꦴ ꦌꦠꦢꦺꦮ ꦧꦲꦸꦠꦫꦁ ꦢꦸꦏ꧀ꦑꦁ ꦪꦢꦶꦢꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ; ꦄꦥ꧀ꦥꦩꦠ꧀ꦠꦏꦁ ꦄꦮꦱꦶꦛ꧀ꦜꦁ. ꦱꦔ꧀ꦑꦩ꧀ꦥꦶ ꦤ ꦈꦥꦺꦠꦶ, ꦈꦥꦤꦶꦣꦩ꧀ꦥꦶ ꦤ ꦈꦥꦺꦠꦶ, ꦏꦭꦨꦴꦒꦩ꧀ꦥꦶ ꦤ ꦈꦥꦺꦠꦶ ꦥꦸꦫꦶꦩꦁ ꦢꦸꦏ꧀ꦑꦏ꧀ꦑꦤ꧀ꦣꦁ ꦥꦫꦶꦏ꧀ꦑꦷꦟꦁ ꦥꦫꦶꦪꦴꦢꦶꦤ꧀ꦤꦁ ꦈꦥꦤꦶꦣꦴꦪ ꦪꦢꦶꦢꦁ ꦱꦠ꧀ꦠꦏ꧀ꦑꦠ꧀ꦠꦸꦥꦫꦩꦠꦴ; ꦪꦺꦴ ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦡꦴꦨꦹꦠꦁ ꦥꦗꦴꦤꦴꦠꦶ’’.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ‘ꦆꦢꦁ ꦢꦸꦏ꧀ꦑ’ꦤ꧀ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ…ꦥꦺ… ‘ꦄꦪꦁ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦷ ꦥꦛꦶꦥꦢꦴ’ꦠꦶ ꦪꦺꦴꦒꦺꦴ ꦏꦫꦟꦷꦪꦺꦴ’’ꦠꦶ. ꦢꦱꦩꦁ.

ꦄꦨꦶꦱꦩꦪꦮꦒ꧀ꦒꦺꦴ ꦖꦛ꧀ꦜꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦤꦑꦱꦶꦑꦴ ꦥꦺꦴꦏ꧀ꦑꦫꦟꦷ, ꦱꦁꦨꦺꦗ꧀ꦗ ꦄꦥꦫꦺ ꦢꦸꦮꦺ;

ꦥꦡꦮꦷ ꦢ꧀ꦮꦺ ꦱꦩꦸꦢ꧀ꦢꦴ ꦢ꧀ꦮꦺ, ꦢ꧀ꦮꦺꦩꦴ ꦕ ꦥꦧ꧀ꦧꦠꦹꦥꦩꦴꦠꦶ.