꧒. ꦢꦸꦠꦶꦪꦙꦴꦤꦥꦚ꧀ꦲꦴꦱꦸꦠ꧀ꦠꦁ

꧓꧓꧓. ‘‘‘ꦢꦸꦠꦶꦪꦁ ꦙꦴꦤꦁ, ꦢꦸꦠꦶꦪꦁ ꦙꦴꦤ’ꦤ꧀ꦠꦶ ꦮꦸꦕ꧀ꦕꦠꦶ. ꦏꦠꦩꦁ ꦤꦸ ꦑꦺꦴ ꦢꦸꦠꦶꦪꦁ ꦙꦴꦤꦤ꧀ꦠꦶ? ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦌꦠꦢꦲꦺꦴꦱꦶ – ‘ꦆꦣ ꦨꦶꦏ꧀ꦑꦸ ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ ꦮꦸꦕ꧀ꦕꦠꦶ ꦢꦸꦠꦶꦪꦁ ꦙꦴꦤ’ꦤ꧀ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦴꦩꦶ. ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦮꦶꦠꦏ꧀ꦏꦱꦲꦒꦠꦴ ꦱꦚ꧀ꦚꦴꦩꦤꦱꦶꦏꦴꦫꦴ ꦱꦩꦸꦢꦴꦕꦫꦤ꧀ꦠꦶ.

‘‘ꦄꦡ ꦑꦺꦴ ꦩꦁ, ꦄꦴꦮꦸꦱꦺꦴ, ꦨꦒꦮꦴ ꦆꦢ꧀ꦣꦶꦪꦴ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦢꦮꦺꦴꦕ – ‘ꦩꦺꦴꦒ꧀ꦒꦭ꧀ꦭꦴꦤ, ꦩꦺꦴꦒ꧀ꦒꦭ꧀ꦭꦴꦤ! ꦩꦴ, ꦧ꧀ꦫꦴꦲ꧀ꦩꦟ, ꦢꦸꦠꦶꦪꦁ ꦙꦴꦤꦁ ꦥꦩꦴꦢꦺꦴ, ꦢꦸꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦱꦟ꧀ꦜꦥꦺꦲꦶ, ꦢꦸꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦌꦏꦺꦴꦢꦶꦁ ꦏꦫꦺꦴꦲꦶ, ꦢꦸꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦱꦩꦴꦢꦲꦴ’ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦄꦥꦫꦺꦤ ꦱꦩꦪꦺꦤ ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ ꦄꦗ꧀ꦙꦠ꧀ꦠꦁ ꦱꦩ꧀ꦥꦱꦴꦢꦤꦁ ꦕꦺꦠꦱꦺꦴ ꦌꦏꦺꦴꦢꦶꦨꦴꦮꦁ ꦄꦮꦶꦠꦏ꧀ꦏꦁ ꦄꦮꦶꦕꦴꦫꦁ ꦱꦩꦴꦣꦶꦗꦁ ꦥꦷꦠꦶꦱꦸꦑꦁ ꦢꦸꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦪꦚ꧀ꦲꦶ ꦠꦁ, ꦄꦴꦮꦸꦱꦺꦴ, ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦱꦠ꧀ꦡꦴꦫꦴꦤꦸꦒ꧀ꦒꦲꦶꦠꦺꦴ ꦱꦴꦮꦏꦺꦴ ꦩꦲꦴꦨꦶꦚ꧀ꦚꦠꦁ ꦥꦠ꧀ꦠꦺꦴ’ꦠꦶ, ꦩꦩꦁ ꦠꦁ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ – ‘ꦱꦠ꧀ꦡꦴꦫꦴꦤꦸꦒ꧀ꦒꦲꦶꦠꦺꦴ ꦱꦴꦮꦏꦺꦴ ꦩꦲꦴꦨꦶꦚ꧀ꦚꦠꦁ ꦥꦠ꧀ꦠꦺꦴ’’’ꦠꦶ. ꦢꦸꦠꦶꦪꦁ.