꧓. ꦠꦠꦶꦪꦙꦴꦤꦥꦚ꧀ꦲꦴꦱꦸꦠ꧀ꦠꦁ

꧓꧓꧔. ‘‘‘ꦠꦠꦶꦪꦁ ꦙꦴꦤꦁ, ꦠꦠꦶꦪꦁ ꦙꦴꦤ’ꦤ꧀ꦠꦶ ꦮꦸꦕ꧀ꦕꦠꦶ. ꦏꦠꦩꦁ ꦤꦸ ꦑꦺꦴ ꦠꦠꦶꦪꦁ ꦙꦴꦤꦤ꧀ꦠꦶ? ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦌꦠꦢꦲꦺꦴꦱꦶ – ꦆꦣ ꦨꦶꦏ꧀ꦑꦸ ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦠꦶ ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦠꦶ, ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’ꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ ꦮꦸꦕ꧀ꦕꦠꦶ ꦠꦠꦶꦪꦁ ꦙꦴꦤꦤ꧀ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦴꦩꦶ ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦩꦶ. ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’ꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦴꦩꦶ. ꦠꦱ꧀ꦱ ꦩꦪ꧀ꦲꦁ, ꦄꦴꦮꦸꦱꦺꦴ, ꦆꦩꦶꦤꦴ ꦮꦶꦲꦴꦫꦺꦤ ꦮꦶꦲꦫꦠꦺꦴ ꦥꦷꦠꦶꦱꦲꦒꦠꦴ ꦱꦚ꧀ꦚꦴꦩꦤꦱꦶꦏꦴꦫꦴ ꦱꦩꦸꦢꦴꦕꦫꦤ꧀ꦠꦶ.

‘‘ꦄꦡ ꦑꦺꦴ ꦩꦁ, ꦄꦴꦮꦸꦱꦺꦴ, ꦨꦒꦮꦴ ꦆꦢ꧀ꦣꦶꦪꦴ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦢꦮꦺꦴꦕ – ‘ꦩꦺꦴꦒ꧀ꦒꦭ꧀ꦭꦴꦤ, ꦩꦺꦴꦒ꧀ꦒꦭ꧀ꦭꦴꦤ! ꦩꦴ, ꦧ꧀ꦫꦴꦲ꧀ꦩꦟ, ꦠꦠꦶꦪꦁ ꦙꦴꦤꦁ ꦥꦩꦴꦢꦺꦴ, ꦠꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦱꦟ꧀ꦜꦥꦺꦲꦶ, ꦠꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦌꦏꦺꦴꦢꦶꦁ ꦏꦫꦺꦴꦲꦶ, ꦠꦠꦶꦪꦺ ꦙꦴꦤꦺ ꦕꦶꦠ꧀ꦠꦁ ꦱꦩꦴꦢꦲꦴ’ꦠꦶ. ꦱꦺꦴ ꦑ꧀ꦮꦴꦲꦁ, ꦄꦴꦮꦸꦱꦺꦴ, ꦄꦥꦫꦺꦤ ꦱꦩꦪꦺꦤ ꦥꦷꦠꦶꦪꦴ ꦕ ꦮꦶꦫꦴꦒꦴ ꦈꦥꦺꦏ꧀ꦑꦏꦺꦴ ꦕ ꦮꦶꦲꦫꦴꦩꦶ ꦱꦠꦺꦴ ꦕ ꦱꦩ꧀ꦥꦗꦴꦤꦺꦴ ꦱꦸꦑꦚ꧀ꦕ ꦏꦴꦪꦺꦤ ꦥꦛꦶꦱꦁꦮꦺꦢꦺꦩꦶ, ꦪꦁ ꦠꦁ ꦄꦫꦶꦪꦴ ꦄꦴꦕꦶꦏ꧀ꦑꦤ꧀ꦠꦶ – ‘ꦈꦥꦺꦏ꧀ꦑꦏꦺꦴ ꦱꦠꦶꦩꦴ ꦱꦸꦑꦮꦶꦲꦴꦫꦷ’ꦠꦶ ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦴꦱꦶꦁ. ꦪꦚ꧀ꦲꦶ ꦠꦁ ꦄꦴꦮꦸꦱꦺꦴ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪ…ꦥꦺ… ꦩꦲꦴꦨꦶꦚ꧀ꦚꦠꦁ ꦥꦠ꧀ꦠꦺꦴ’’ꦠꦶ. ꦠꦠꦶꦪꦁ.