꧒꧔. ꦈꦢꦏꦴꦱꦤꦮꦒ꧀ꦒꦺꦴ

꧑. ꦈꦢꦏꦴꦱꦤꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧑. ‘‘ꦄꦴꦫꦴꦩꦢ꧀ꦮꦴꦫꦴ ꦤꦶꦏ꧀ꦑꦩ꧀ꦩ, ꦦꦭꦏꦁ ꦱꦤ꧀ꦡꦫꦶꦁ ꦄꦲꦁ;

ꦈꦢꦏꦚ꧀ꦕ ꦈꦥꦛ꧀ꦜꦴꦱꦶꦁ, ꦈꦠ꧀ꦠꦩꦠ꧀ꦡꦱ꧀ꦱ ꦥꦠ꧀ꦠꦶꦪꦴ.

꧒. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦄꦴꦱꦤꦺ ꦕꦺꦴꦢꦏꦺ ꦦꦭꦁ.

꧓. ‘‘ꦆꦠꦺꦴ ꦥꦤ꧀ꦤꦫꦱꦺ ꦏꦥ꧀ꦥꦺ, ꦄꦨꦶꦱꦴꦩꦱꦩꦮ꧀ꦲꦪꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧔. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ, ꦮꦶꦩꦺꦴꦏ꧀ꦑꦴꦥꦶ ꦕ ꦄꦛ꧀ꦜꦶꦩꦺ;

ꦖꦭ꦳ꦨꦶꦚ꧀ꦚꦴ ꦱꦕ꧀ꦖꦶꦏꦠꦴ, ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦈꦢꦏꦴꦱꦤꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦈꦢꦏꦴꦱꦤꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦜꦩꦁ.

꧒. ꦨꦴꦗꦤꦥꦴꦭꦏꦠ꧀ꦡꦺꦫꦄꦥꦢꦴꦤꦁ

꧕. ‘‘ꦤꦒꦫꦺ ꦧꦤ꧀ꦣꦸꦩꦠꦶꦪꦴ, ꦏꦸꦩ꧀ꦨꦏꦴꦫꦺꦴ ꦄꦲꦁ ꦠꦢꦴ;

ꦨꦴꦗꦤꦁ ꦄꦤꦸꦥꦴꦭꦺꦱꦶꦁ, ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦠꦴꦮꦢꦺ.

꧖. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦨꦴꦗꦤꦁ ꦄꦤꦸꦥꦴꦭꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦨꦴꦗꦤꦱ꧀ꦱ ꦆꦢꦁ ꦦꦭꦁ.

꧗. ‘‘ꦠꦺꦥꦚ꧀ꦚꦴꦱꦺ ꦆꦠꦺꦴ ꦏꦥ꧀ꦥꦺ, ꦄꦤꦤ꧀ꦠꦗꦴꦭꦶꦤꦴꦩꦏꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧘. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦨꦴꦗꦤꦥꦴꦭꦏꦺꦴ [ꦨꦴꦗꦤꦢꦴꦪꦏꦺꦴ (ꦱꦷ. ꦱ꧀ꦪꦴ.)] ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦨꦴꦗꦤꦥꦴꦭꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦸꦠꦶꦪꦁ.

꧓. ꦱꦴꦭꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧙. ‘‘ꦄꦫꦸꦟꦮꦠꦶꦪꦴ ꦤꦒꦫꦺ, ꦄꦲꦺꦴꦱꦶꦁ ꦥꦹꦥꦶꦏꦺꦴ ꦠꦢꦴ;

ꦩꦩ ꦢ꧀ꦮꦴꦫꦺꦤ ꦒꦕ꧀ꦖꦤ꧀ꦠꦁ, ꦱꦶꦑꦶꦤꦁ ꦄꦢ꧀ꦢꦱꦁ ꦗꦶꦤꦁ.

꧑꧐. ‘‘ꦧꦸꦢ꧀ꦣꦱ꧀ꦱ ꦥꦠ꧀ꦠꦁ ꦥꦒ꧀ꦒꦪ꧀ꦲ, ꦱꦴꦭꦥꦸꦥ꧀ꦦꦁ ꦄꦢꦴꦱꦲꦁ;

ꦱꦩ꧀ꦩꦒ꧀ꦒꦠꦱ꧀ꦱ ꦧꦸꦢ꧀ꦣꦱ꧀ꦱ, ꦮꦶꦥ꧀ꦥꦱꦤ꧀ꦤꦺꦤ ꦕꦺꦠꦱꦴ.

꧑꧑. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦢꦴꦱꦲꦁ [ꦪꦁ ꦑꦗ꧀ꦗꦏꦩꦢꦴꦱꦲꦁ (ꦱꦷ.), ꦪꦁ ꦑꦗ꧀ꦗꦩꦨꦶꦢꦴꦱꦲꦁ (ꦏ.) ꦱꦴꦭꦥꦸꦥ꧀ꦦꦤꦴꦩꦏꦁ ꦑꦗ꧀ꦗꦏꦁ ꦮꦴ ꦨꦮꦺꦪ꧀ꦪ];

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦱꦴꦭꦥꦸꦥ꧀ꦦꦱ꧀ꦱꦶꦢꦁ ꦦꦭꦁ.

꧑꧒. ‘‘ꦆꦠꦺꦴ ꦕꦸꦢ꧀ꦢꦱꦏꦥ꧀ꦥꦩ꧀ꦲꦶ, ꦄꦲꦺꦴꦱꦶꦁ ꦄꦩꦶꦠꦚ꧀ꦗꦭꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧑꧓. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦱꦴꦭꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦱꦴꦭꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦠꦠꦶꦪꦁ.

꧔. ꦏꦶꦭꦚ꧀ꦗꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧑꧔. ‘‘ꦠꦶꦮꦫꦴꦪꦁ ꦥꦸꦫꦺ ꦫꦩ꧀ꦩꦺ, ꦤꦭ꦳ꦏꦴꦫꦺꦴ ꦄꦲꦁ ꦠꦢꦴ;

ꦱꦶꦢ꧀ꦣꦠ꧀ꦡꦺ ꦭꦺꦴꦏꦥꦗ꧀ꦗꦺꦴꦠꦺ, ꦥꦱꦤ꧀ꦤꦴ ꦗꦤꦠꦴ ꦠꦲꦶꦁ.

꧑꧕. ‘‘ꦥꦹꦗꦠ꧀ꦡꦁ ꦭꦺꦴꦏꦤꦴꦡꦱ꧀ꦱ, ꦏꦶꦭꦚ꧀ꦗꦁ ꦥꦫꦶꦪꦺꦱꦠꦶ;

ꦧꦸꦢ꧀ꦣꦥꦹꦗꦁ ꦏꦫꦺꦴꦤ꧀ꦠꦴꦤꦁ, ꦏꦶꦭꦚ꧀ꦗꦁ ꦄꦢꦢꦶꦁ ꦄꦲꦁ.

꧑꧖. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦏꦶꦭꦚ꧀ꦗꦱ꧀ꦱ ꦆꦢꦁ ꦦꦭꦁ.

꧑꧗. ‘‘ꦱꦠ꧀ꦠꦱꦠ꧀ꦠꦠꦶꦏꦥ꧀ꦥꦩ꧀ꦲꦶ, ꦫꦴꦗꦴ ꦄꦴꦱꦶꦁ ꦗꦭꦢ꧀ꦣꦫꦺꦴ [ꦗꦸꦠꦶꦤ꧀ꦣꦫꦺꦴ (ꦱꦷ.)];

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧑꧘. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦏꦶꦭꦚ꧀ꦗꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦏꦶꦭꦚ꧀ꦗꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦕꦠꦸꦠ꧀ꦡꦁ.

꧕. ꦮꦺꦢꦶꦏꦴꦫꦏꦠ꧀ꦡꦺꦫꦄꦥꦢꦴꦤꦁ

꧑꧙. ‘‘ꦮꦶꦥꦱ꧀ꦱꦶꦤꦺꦴ ꦨꦒꦮꦠꦺꦴ, ꦧꦺꦴꦣꦶꦪꦴ ꦥꦴꦢꦥꦸꦠ꧀ꦠꦩꦺ;

ꦥꦱꦤ꧀ꦤꦕꦶꦠ꧀ꦠꦺꦴ ꦱꦸꦩꦤꦺꦴ, ꦏꦴꦫꦺꦱꦶꦁ ꦮꦺꦢꦶꦏꦁ ꦄꦲꦁ.

꧒꧐. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦏꦴꦫꦺꦱꦶꦁ ꦮꦺꦢꦶꦏꦁ ꦄꦲꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦮꦺꦢꦶꦏꦴꦪ ꦆꦢꦁ ꦦꦭꦁ.

꧒꧑. ‘‘ꦆꦠꦺꦴ ꦌꦏꦴꦢꦱꦺ ꦏꦥ꧀ꦥꦺ, ꦄꦲꦺꦴꦱꦶꦁ ꦱꦹꦫꦶꦪꦱ꧀ꦱꦩꦺꦴ;

ꦱꦠ꧀ꦠꦫꦠ꧀ꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧒꧒. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦮꦺꦢꦶꦏꦴꦫꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦮꦺꦢꦶꦏꦴꦫꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦥꦚ꧀ꦕꦩꦁ.

꧖. ꦮꦟ꧀ꦟꦏꦴꦫꦠ꧀ꦡꦺꦫꦄꦥꦢꦴꦤꦁ

꧒꧓. ‘‘ꦤꦒꦫꦺ ꦄꦫꦸꦟꦮꦠꦶꦪꦴ, ꦮꦟ꧀ꦟꦏꦴꦫꦺꦴ ꦄꦲꦁ ꦠꦢꦴ;

ꦕꦺꦠꦶꦪꦺ ꦢꦸꦱ꧀ꦱꦨꦟ꧀ꦝꦴꦤꦶ, ꦤꦴꦤꦴꦮꦟ꧀ꦟꦁ ꦫꦗꦺꦱꦲꦁ [ꦫꦗꦶꦁ ꦄꦲꦁ (ꦏ.), ꦫꦗꦺꦩꦲꦁ (ꦱ꧀ꦪꦴ.)].

꧒꧔. ‘‘ꦌꦏꦠ꧀ꦠꦶꦁꦱꦺ ꦆꦠꦺꦴ ꦏꦥ꧀ꦥꦺ, ꦪꦁ ꦮꦟ꧀ꦟꦁ ꦫꦗꦪꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦮꦟ꧀ꦟꦢꦴꦤꦱ꧀ꦱꦶꦢꦁ ꦦꦭꦁ.

꧒꧕. ‘‘ꦆꦠꦺꦴ ꦠꦺꦮꦷꦱꦠꦶꦏꦥ꧀ꦥꦺ, ꦮꦟ꧀ꦟꦱꦩ [ꦕꦤ꧀ꦢꦸꦥꦩ (ꦱꦷ.), ꦕꦤ꧀ꦢꦱꦩ (ꦱ꧀ꦪꦴ.)] ꦱꦤꦴꦩꦏꦺꦴ;

ꦱꦠ꧀ꦠꦫꦠꦤꦱꦩ꧀ꦥꦤ꧀ꦤꦺꦴ, ꦕꦏ꧀ꦏꦮꦠ꧀ꦠꦷ ꦩꦲꦧ꧀ꦧꦭꦺꦴ.

꧒꧖. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦮꦟ꧀ꦟꦏꦴꦫꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦮꦟ꧀ꦟꦏꦴꦫꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦖꦛ꧀ꦜꦁ.

꧗. ꦥꦶꦪꦴꦭꦥꦸꦥ꧀ꦦꦶꦪꦠ꧀ꦡꦺꦫꦄꦥꦢꦴꦤꦁ

꧒꧗. ‘‘ꦩꦶꦒꦭꦸꦢ꧀ꦢꦺꦴ ꦥꦸꦫꦺ ꦄꦴꦱꦶꦁ, ꦄꦫꦚ꧀ꦚꦺ ꦏꦴꦤꦤꦺ ꦄꦲꦁ;

ꦥꦶꦪꦴꦭꦁ ꦥꦸꦥ꧀ꦦꦶꦠꦁ ꦢꦶꦱ꧀ꦮꦴ, ꦒꦠꦩꦒ꧀ꦒꦺ ꦑꦶꦥꦶꦁ ꦄꦲꦁ.

꧒꧘. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦥꦸꦥ꧀ꦦꦩꦨꦶꦥꦹꦗꦪꦶꦁ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦧꦸꦢ꧀ꦣꦥꦹꦗꦴꦪꦶꦢꦁ ꦦꦭꦁ.

꧒꧙. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦥꦶꦪꦴꦭꦥꦸꦥ꧀ꦦꦶꦪꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦥꦶꦪꦴꦭꦥꦸꦥ꧀ꦦꦶꦪꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦱꦠ꧀ꦠꦩꦁ.

꧘. ꦄꦩ꧀ꦧꦪꦴꦒꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧓꧐. ‘‘ꦱꦏꦺ ꦱꦶꦥ꧀ꦥꦺ ꦄꦥꦠ꧀ꦡꦢ꧀ꦣꦺꦴ, ꦄꦒꦩꦁ ꦏꦴꦤꦤꦁ ꦄꦲꦁ;

ꦱꦩ꧀ꦧꦸꦢ꧀ꦣꦁ ꦪꦤ꧀ꦠꦁ ꦢꦶꦱ꧀ꦮꦴꦤ, ꦄꦩ꧀ꦧꦪꦴꦒꦁ ꦄꦢꦴꦱꦲꦁ.

꧓꧑. ‘‘ꦌꦏꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦢꦴꦤꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦄꦩ꧀ꦧꦪꦴꦒꦱ꧀ꦱꦶꦢꦁ ꦦꦭꦁ.

꧓꧒. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦄꦩ꧀ꦧꦪꦴꦒꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦄꦩ꧀ꦧꦪꦴꦒꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦄꦛ꧀ꦜꦩꦁ.

꧙. ꦗꦒꦠꦶꦏꦴꦫꦏꦠ꧀ꦡꦺꦫꦄꦥꦢꦴꦤꦁ

꧓꧓. ‘‘ꦤꦶꦧ꧀ꦧꦸꦠꦺ ꦭꦺꦴꦏꦤꦴꦡꦩ꧀ꦲꦶ, ꦄꦠ꧀ꦡꦢꦱ꧀ꦱꦶ ꦤꦫꦸꦠ꧀ꦠꦩꦺ;

ꦗꦒꦠꦷ ꦏꦴꦫꦶꦠꦴ ꦩꦪ꧀ꦲꦁ, ꦧꦸꦢ꧀ꦣꦱ꧀ꦱ ꦡꦹꦥꦩꦸꦠ꧀ꦠꦩꦺ.

꧓꧔. ‘‘ꦄꦛ꧀ꦜꦴꦫꦱꦺ ꦏꦥ꧀ꦥꦱꦠꦺ, ꦪꦁ ꦏꦩ꧀ꦩꦩꦏꦫꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦗꦒꦠꦶꦪꦴ ꦆꦢꦁ ꦦꦭꦁ.

꧓꧕. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦗꦒꦠꦶꦏꦴꦫꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦗꦒꦠꦶꦏꦴꦫꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦤꦮꦩꦁ.

꧑꧐. ꦮꦴꦱꦶꦢꦴꦪꦏꦠ꧀ꦡꦺꦫꦄꦥꦢꦴꦤꦁ

꧓꧖. ‘‘ꦏꦩ꧀ꦩꦴꦫꦺꦴꦲꦁ ꦥꦸꦫꦺ ꦄꦴꦱꦶꦁ, ꦠꦶꦮꦫꦴꦪꦁ ꦥꦸꦫꦸꦠ꧀ꦠꦩꦺ;

ꦌꦏꦴ ꦮꦴꦱꦶ ꦩꦪꦴ ꦢꦶꦤ꧀ꦤꦴ, ꦱꦪꦩ꧀ꦨꦸꦁ ꦄꦥꦫꦴꦗꦶꦠꦁ [ꦱꦪꦩ꧀ꦨꦸꦩ꧀ꦲꦶꦥꦫꦴꦗꦶꦠꦺ (?)].

꧓꧗. ‘‘ꦕꦠꦸꦤ꧀ꦤꦮꦸꦠꦶꦠꦺꦴ ꦏꦥ꧀ꦥꦺ, ꦪꦁ ꦮꦴꦱꦶꦩꦢꦢꦶꦁ ꦠꦢꦴ;

ꦢꦸꦒ꧀ꦒꦠꦶꦁ ꦤꦴꦨꦶꦗꦴꦤꦴꦩꦶ, ꦮꦴꦱꦶꦢꦴꦤꦱ꧀ꦱꦶꦢꦁ ꦦꦭꦁ.

꧓꧘. ‘‘ꦥꦛꦶꦱꦩ꧀ꦨꦶꦢꦴ ꦕꦠꦱ꧀ꦱꦺꦴ…ꦥꦺ… ꦏꦠꦁ ꦧꦸꦢ꧀ꦣꦱ꧀ꦱ ꦱꦴꦱꦤꦁ’’.

ꦆꦠ꧀ꦡꦁ ꦱꦸꦢꦁ ꦄꦴꦪꦱ꧀ꦩꦴ ꦮꦴꦱꦶꦢꦴꦪꦏꦺꦴ ꦡꦺꦫꦺꦴ ꦆꦩꦴ ꦒꦴꦡꦴꦪꦺꦴ ꦄꦨꦴꦱꦶꦠ꧀ꦡꦴꦠꦶ.

ꦮꦴꦱꦶꦢꦴꦪꦏꦠ꧀ꦡꦺꦫꦱ꧀ꦱꦴꦥꦢꦴꦤꦁ ꦢꦱꦩꦁ.

ꦈꦢꦏꦴꦱꦤꦮꦒ꧀ꦒꦺꦴ ꦕꦠꦸꦮꦷꦱꦠꦶꦩꦺꦴ.