꧘. ꦥꦚ꧀ꦕꦱꦠꦨꦶꦏ꧀ꦑꦸꦮꦠ꧀ꦡꦸ

ꦱꦧ꧀ꦧꦠ꧀ꦡ ꦮꦺ ꦱꦥ꧀ꦥꦸꦫꦶꦱꦴ ꦕꦗꦤ꧀ꦠꦷꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦥꦚ꧀ꦕꦱꦠꦺ ꦨꦶꦏ꧀ꦑꦹ ꦄꦴꦫꦧ꧀ꦨ ꦏꦡꦺꦱꦶ. ꦢꦺꦱꦤꦴ ꦮꦺꦫꦚ꧀ꦗꦴꦪꦁ ꦱꦩꦸꦛ꧀ꦜꦶꦠꦴ.

ꦥꦜꦩꦧꦺꦴꦣꦶꦪꦚ꧀ꦲꦶ ꦨꦒꦮꦴ ꦮꦺꦫꦚ꧀ꦗꦁ ꦒꦤ꧀ꦠ꧀ꦮꦴ ꦮꦺꦫꦚ꧀ꦗꦺꦤ ꦧ꧀ꦫꦴꦲ꧀ꦩꦟꦺꦤ ꦤꦶꦩꦤ꧀ꦠꦶꦠꦺꦴ ꦥꦚ꧀ꦕꦲꦶ ꦨꦶꦏ꧀ꦑꦸꦱꦠꦺꦲꦶ ꦱꦢ꧀ꦣꦶꦁ ꦮꦱ꧀ꦱꦁ ꦈꦥꦒꦚ꧀ꦖꦶ. ꦮꦺꦫꦚ꧀ꦗꦺꦴ ꦧ꧀ꦫꦴꦲ꧀ꦩꦟꦺꦴ ꦩꦴꦫꦴꦮꦛ꧀ꦛꦤꦺꦤ ꦄꦴꦮꦛ꧀ꦛꦺꦴ ꦌꦏꦢꦶꦮꦱꦩ꧀ꦥꦶ ꦱꦠ꧀ꦡꦴꦫꦁ ꦄꦴꦫꦧ꧀ꦨ ꦱꦠꦶꦁ ꦤ ꦈꦥ꧀ꦥꦴꦢꦺꦱꦶ. ꦮꦺꦫꦚ꧀ꦗꦴꦥꦶ ꦢꦸꦧ꧀ꦨꦶꦏ꧀ꦑꦴ ꦄꦲꦺꦴꦱꦶ, ꦨꦶꦏ꧀ꦑꦹ ꦱꦤ꧀ꦠꦫꦧꦴꦲꦶꦫꦁ ꦮꦺꦫꦚ꧀ꦗꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦶꦟ꧀ꦝꦥꦴꦠꦁ ꦄꦭꦨꦤ꧀ꦠꦴ ꦏꦶꦭꦩꦶꦁꦱꦸ. ꦠꦺꦱꦁ ꦄꦱ꧀ꦱꦮꦴꦟꦶꦗꦏꦴ ꦥꦠ꧀ꦡꦥꦠ꧀ꦡꦥꦸꦭꦏꦁ ꦨꦶꦏ꧀ꦑꦁ ꦥꦚ꧀ꦚꦴꦥꦺꦱꦸꦁ. ꦠꦺ ꦏꦶꦭꦩꦤ꧀ꦠꦺ ꦢꦶꦱ꧀ꦮꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦠ꧀ꦡꦺꦫꦺꦴ ꦥꦡꦮꦺꦴꦗꦁ ꦨꦺꦴꦗꦺꦠꦸꦏꦴꦩꦺꦴ, ꦈꦠ꧀ꦠꦫꦏꦸꦫꦸꦚ꧀ꦕ ꦥꦶꦟ꧀ꦝꦴꦪ ꦥꦮꦺꦱꦺꦠꦸꦏꦴꦩꦺꦴ ꦄꦲꦺꦴꦱꦶ, ꦱꦠ꧀ꦡꦴ ꦠꦁ ꦥꦛꦶꦏ꧀ꦑꦶꦥꦶ. ꦨꦶꦏ꧀ꦑꦹꦤꦁ ꦌꦏꦢꦶꦮꦱꦩ꧀ꦥꦶ ꦥꦶꦟ꧀ꦝꦥꦴꦠꦁ ꦄꦴꦫꦧ꧀ꦨ ꦥꦫꦶꦠ꧀ꦠꦴꦱꦺꦴ ꦤꦴꦲꦺꦴꦱꦶ, ꦆꦕ꧀ꦖꦴꦕꦴꦫꦁ ꦮꦗ꧀ꦗꦺꦠ꧀ꦮꦴ ꦌꦮ ꦮꦶꦲꦫꦶꦁꦱꦸ. ꦱꦠ꧀ꦡꦴ ꦠꦠ꧀ꦡ ꦠꦺꦩꦴꦱꦁ ꦮꦱꦶꦠ꧀ꦮꦴ ꦮꦺꦫꦚ꧀ꦗꦁ ꦧ꧀ꦫꦴꦲ꧀ꦩꦟꦁ ꦄꦥꦭꦺꦴꦏꦺꦠ꧀ꦮꦴ ꦠꦺꦤ ꦏꦠꦱꦏ꧀ꦏꦴꦫꦱꦩ꧀ꦩꦴꦤꦺꦴ ꦠꦁ ꦱꦫꦟꦺꦱꦸ ꦥꦠꦶꦛ꧀ꦜꦴꦥꦺꦠ꧀ꦮꦴ ꦠꦠꦺꦴ ꦤꦶꦏ꧀ꦑꦤ꧀ꦠꦺꦴ ꦄꦤꦸꦥꦸꦧ꧀ꦧꦺꦤ ꦕꦴꦫꦶꦏꦁ ꦕꦫꦩꦴꦤꦺꦴ ꦌꦏꦱ꧀ꦩꦶꦁ ꦱꦩꦪꦺ ꦱꦴꦮꦠ꧀ꦡꦶꦁ ꦥꦠ꧀ꦮꦴ ꦗꦺꦠꦮꦤꦺ ꦮꦶꦲꦴꦱꦶ, ꦱꦴꦮꦠ꧀ꦡꦶꦮꦴꦱꦶꦤꦺꦴ ꦱꦠ꧀ꦡꦸ ꦄꦴꦒꦤ꧀ꦠꦸꦏꦨꦠ꧀ꦠꦴꦤꦶ ꦏꦫꦶꦁꦱꦸ. ꦠꦢꦴ ꦥꦤ ꦥꦚ꧀ꦕꦱꦠꦩꦠ꧀ꦠꦴ ꦮꦶꦓꦴꦱꦴꦢꦴ ꦨꦶꦏ꧀ꦑꦹ ꦤꦶꦱ꧀ꦱꦴꦪ ꦄꦤ꧀ꦠꦺꦴꦮꦶꦲꦴꦫꦺꦪꦺꦮ ꦮꦱꦤ꧀ꦠꦶ. ꦠꦺ ꦨꦶꦏ꧀ꦑꦹꦤꦁ ꦨꦸꦠ꧀ꦠꦴꦮꦱꦺꦱꦴꦤꦶ ꦥꦟꦷꦠꦨꦺꦴꦗꦤꦴꦤꦶ ꦨꦸꦚ꧀ꦗꦶꦠ꧀ꦮꦴ ꦤꦶꦢ꧀ꦢꦴꦪꦶꦠ꧀ꦮꦴ ꦈꦛ꧀ꦜꦴꦪ ꦤꦢꦷꦠꦷꦫꦁ ꦒꦤ꧀ꦠ꧀ꦮꦴ ꦤꦢꦤ꧀ꦠꦴ ꦮꦒ꧀ꦒꦤ꧀ꦠꦴ ꦩꦭ꧀ꦭꦩꦸꦛ꧀ꦜꦶꦪꦸꦢ꧀ꦣꦁ ꦪꦸꦗ꧀ꦙꦤ꧀ꦠꦴ ꦏꦷꦭ꦳ꦤ꧀ꦠꦴ ꦄꦤ꧀ꦠꦺꦴꦮꦶꦲꦴꦫꦺꦥꦶ ꦧꦲꦶꦮꦶꦲꦴꦫꦺꦥꦶ ꦄꦤꦴꦕꦴꦫꦩꦺꦮ ꦕꦫꦤ꧀ꦠꦴ ꦮꦶꦕꦫꦤ꧀ꦠꦶ. ꦨꦶꦏ꧀ꦑꦹ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ ‘‘ꦥꦱ꧀ꦱꦡꦴꦮꦸꦱꦺꦴ, ꦆꦩꦺ ꦮꦶꦓꦴꦱꦴꦢꦴ ꦢꦸꦧ꧀ꦨꦶꦏ꧀ꦑꦏꦴꦭꦺ ꦮꦺꦫꦚ꧀ꦗꦴꦪꦁ ꦏꦚ꧀ꦕꦶ ꦮꦶꦏꦴꦫꦁ ꦤ ꦢꦱ꧀ꦱꦺꦱꦸꦁ, ꦆꦢꦴꦤꦶ ꦥꦤ ꦌꦮꦫꦹꦥꦴꦤꦶ ꦥꦟꦷꦠꦨꦺꦴꦗꦤꦴꦤꦶ ꦨꦸꦚ꧀ꦗꦶꦠ꧀ꦮꦴ ꦄꦤꦺꦏꦥ꧀ꦥꦏꦴꦫꦁ ꦮꦶꦏꦴꦫꦁ ꦢꦱ꧀ꦱꦺꦤ꧀ꦠꦴ ꦮꦶꦕꦫꦤ꧀ꦠꦶ. ꦨꦶꦏ꧀ꦑꦹ ꦥꦤ ꦮꦺꦫꦚ꧀ꦗꦴꦪꦩ꧀ꦥꦶ ꦈꦥꦱꦤ꧀ꦠꦫꦹꦥꦴ ꦮꦶꦲꦫꦶꦠ꧀ꦮꦴ ꦆꦢꦴꦤꦶꦥꦶ ꦈꦥꦱꦤ꧀ꦠꦸꦥꦱꦤ꧀ꦠꦴꦮ ꦮꦶꦲꦫꦤ꧀ꦠꦷ’’ꦠꦶ. ꦱꦠ꧀ꦡꦴ ꦣꦩ꧀ꦩꦱꦨꦁ ꦒꦤ꧀ꦠ꧀ꦮꦴ, ‘‘ꦨꦶꦏ꧀ꦑꦮꦺ, ꦏꦶꦁ ꦏꦡꦺꦡꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘‘ꦆꦢꦁ ꦤꦴꦩꦴ’’ꦠꦶ ꦮꦸꦠ꧀ꦠꦺ ‘‘ꦥꦸꦧ꧀ꦧꦺꦥꦺꦠꦺ ꦒꦢ꧀ꦫꦨꦪꦺꦴꦤꦶꦪꦁ ꦤꦶꦧ꧀ꦧꦠ꧀ꦠꦴ ꦥꦚ꧀ꦕꦱꦠꦴ ꦒꦢ꧀ꦫꦨꦴ ꦲꦸꦠ꧀ꦮꦴ ꦥꦚ꧀ꦕꦱꦠꦴꦤꦁ ꦄꦴꦗꦴꦤꦷꦪꦱꦶꦤ꧀ꦣꦮꦴꦤꦁ ꦄꦭ꧀ꦭꦫꦱꦩꦸꦢ꧀ꦢꦶꦏꦥꦴꦤꦏꦥꦷꦠꦴꦮꦱꦺꦱꦁ ꦈꦕ꧀ꦖꦶꦛ꧀ꦜꦏꦱꦛꦁ ꦈꦢꦏꦺꦤ ꦩꦢ꧀ꦢꦶꦠ꧀ꦮꦴ ꦩꦏꦕꦶꦥꦶꦭꦺꦴꦠꦶꦏꦴꦲꦶ ꦥꦫꦶꦱ꧀ꦱꦴꦮꦶꦠꦠ꧀ꦠꦴ ‘ꦮꦺꦴꦭꦺꦴꦢꦏ’ꦤ꧀ꦠꦶ ꦱꦔ꧀ꦑ꧀ꦪꦁ ꦒꦠꦁ ꦄꦥ꧀ꦥꦫꦱꦁ ꦤꦶꦲꦷꦤꦁ ꦥꦶꦮꦶꦠ꧀ꦮꦴ ꦩꦣꦸꦩꦠ꧀ꦠꦴ ꦮꦶꦪ ꦤꦢꦤ꧀ꦠꦴ ꦮꦶꦕꦫꦶꦁꦱꦹꦠꦶ ꦮꦠ꧀ꦮꦴ –

‘‘ꦮꦴꦭꦺꦴꦢꦏꦁ ꦄꦥ꧀ꦥꦫꦱꦁ ꦤꦶꦲꦷꦤꦁ,

ꦥꦶꦠ꧀ꦮꦴ ꦩꦢꦺꦴ ꦗꦴꦪꦠꦶ ꦒꦢ꧀ꦫꦨꦴꦤꦁ;

ꦆꦩꦚ꧀ꦕ ꦥꦶꦠ꧀ꦮꦴꦤ ꦫꦱꦁ ꦥꦟꦷꦠꦁ,

ꦩꦢꦺꦴ ꦤ ꦱꦚ꧀ꦗꦴꦪꦠꦶ ꦱꦶꦤ꧀ꦣꦮꦴꦤꦁ.

‘‘ꦄꦥ꧀ꦥꦁ ꦥꦶꦮꦶꦠ꧀ꦮꦴꦤ ꦤꦶꦲꦷꦤꦗꦕ꧀ꦕꦺꦴ,

ꦱꦺꦴ ꦩꦗ꧀ꦗꦠꦷ ꦠꦺꦤ ꦗꦤꦶꦤ꧀ꦢ ꦥꦸꦛ꧀ꦜꦺꦴ;

ꦣꦺꦴꦫꦪ꧀ꦲꦱꦷꦭꦷ ꦕ ꦏꦸꦭꦩ꧀ꦲꦶ ꦗꦴꦠꦺꦴ,

ꦤ ꦩꦗ꧀ꦗꦠꦷ ꦄꦒ꧀ꦒꦫꦱꦁ ꦥꦶꦮꦶꦠ꧀ꦮꦴ’’ꦠꦶ. (ꦗꦴ. ꧑.꧒.꧖꧕);

ꦆꦢꦁ ꦮꦴꦭꦺꦴꦢꦏꦗꦴꦠꦏꦁ ꦮꦶꦠ꧀ꦡꦴꦫꦺꦤ ꦏꦡꦺꦠ꧀ꦮꦴ ‘‘ꦌꦮꦁ, ꦨꦶꦏ꧀ꦑꦮꦺ, ꦱꦥ꧀ꦥꦸꦫꦶꦱꦴ ꦭꦺꦴꦏꦣꦩ꧀ꦩꦁ ꦮꦶꦮꦗ꧀ꦗꦺꦠ꧀ꦮꦴ ꦱꦸꦑꦶꦠꦏꦴꦭꦺꦥꦶ ꦢꦸꦏ꧀ꦑꦶꦠꦏꦴꦭꦺꦥꦶ ꦤꦶꦧ꧀ꦧꦶꦏꦴꦫꦴꦮ ꦲꦺꦴꦤ꧀ꦠꦷ’’ꦠꦶ ꦄꦤꦸꦱꦤ꧀ꦣꦶꦁ ꦓꦛꦺꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧘꧓. ‘‘ꦱꦧ꧀ꦧꦠ꧀ꦡ ꦮꦺ ꦱꦥ꧀ꦥꦸꦫꦶꦱꦴ ꦕꦗꦤ꧀ꦠꦶ,

ꦤ ꦏꦴꦩꦏꦴꦩꦴ ꦭꦥꦪꦤ꧀ꦠꦶ ꦱꦤ꧀ꦠꦺꦴ;

ꦱꦸꦑꦺꦤ ꦦꦸꦛ꧀ꦜꦴ ꦄꦡ ꦮꦴ ꦢꦸꦑꦺꦤ,

ꦤ ꦈꦕ꧀ꦕꦴꦮꦕꦁ ꦥꦟ꧀ꦝꦶꦠꦴ ꦢꦱ꧀ꦱꦪꦤ꧀ꦠꦷ’’ꦠꦶ.

ꦠꦠ꧀ꦡ ꦱꦧ꧀ꦧꦠ꧀ꦡꦴꦠꦶ ꦥꦚ꧀ꦕꦏ꧀ꦑꦤ꧀ꦣꦴꦢꦶꦨꦺꦢꦺꦱꦸ ꦱꦧ꧀ꦧꦣꦩ꧀ꦩꦺꦱꦸ. ꦱꦥ꧀ꦥꦸꦫꦶꦱꦴꦠꦶ ꦱꦸꦥꦸꦫꦶꦱꦴ. ꦕꦗꦤ꧀ꦠꦷꦠꦶ ꦄꦫꦲꦠ꧀ꦠꦩꦒ꧀ꦒꦚꦴꦟꦺꦤ ꦄꦥꦏꦝ꧀ꦞꦤ꧀ꦠꦴ ꦖꦤ꧀ꦢꦫꦴꦒꦁ ꦮꦶꦗꦲꦤ꧀ꦠꦶ. ꦏꦴꦩꦏꦴꦩꦴꦠꦶ ꦏꦴꦩꦺ ꦏꦴꦩꦪꦤ꧀ꦠꦴ ꦏꦴꦩꦲꦺꦠꦸ ꦏꦴꦩꦏꦴꦫꦟꦴ. ꦤ ꦭꦥꦪꦤ꧀ꦠꦶ ꦱꦤ꧀ꦠꦺꦴꦠꦶ ꦧꦸꦢ꧀ꦣꦴꦢꦪꦺꦴ ꦱꦤ꧀ꦠꦺꦴ ꦏꦴꦩꦲꦺꦠꦸ ꦤꦺꦮ ꦄꦠ꧀ꦠꦤꦴ ꦭꦥꦪꦤ꧀ꦠꦶ, ꦤ ꦥꦫꦁ ꦭꦥꦴꦥꦺꦤ꧀ꦠꦶ. ꦪꦺ ꦲꦶ ꦨꦶꦏ꧀ꦑꦴꦪ ꦥꦮꦶꦛ꧀ꦜꦴ ꦆꦕ꧀ꦖꦴꦕꦴꦫꦺ ꦜꦶꦠꦴ ‘‘ꦏꦶꦁ, ꦈꦥꦴꦱꦏ, ꦱꦸꦑꦁ ꦠꦺ ꦥꦸꦠ꧀ꦠꦢꦴꦫꦱ꧀ꦱ, ꦫꦴꦗꦕꦺꦴꦫꦴꦢꦷꦤꦁ ꦮꦱꦺꦤ ꦢ꧀ꦮꦶꦥꦢꦕꦠꦸꦥ꧀ꦥꦢꦺꦱꦸ ꦤꦠ꧀ꦡꦶ ꦏꦺꦴꦕꦶ ꦈꦥꦢ꧀ꦢꦮꦺꦴ’’ꦠꦶꦄꦴꦢꦷꦤꦶ ꦮꦢꦤ꧀ꦠꦶ, ꦠꦴꦮ ꦠꦺ ꦭꦥꦪꦤ꧀ꦠꦶ ꦤꦴꦩ. ꦠꦡꦴ ꦥꦤ ꦮꦠ꧀ꦮꦴ ‘‘ꦄꦴꦩ, ꦨꦤ꧀ꦠꦺ, ꦱꦧ꧀ꦧꦺꦱꦁ ꦤꦺꦴ ꦱꦸꦑꦁ, ꦤꦠ꧀ꦡꦶ ꦏꦺꦴꦕꦶ ꦈꦥꦢ꧀ꦢꦮꦺꦴ, ꦆꦢꦴꦤꦶ ꦤꦺꦴ ꦒꦺꦲꦁ ꦥꦲꦹꦠꦄꦤ꧀ꦤꦥꦴꦤꦁ, ꦆꦣꦺꦮ ꦮꦱꦡꦴ’’ꦠꦶ ꦄꦠ꧀ꦠꦴꦤꦁ ꦤꦶꦩꦤ꧀ꦠꦴꦥꦺꦤ꧀ꦠꦴ ꦭꦥꦴꦥꦺꦤ꧀ꦠꦶ ꦤꦴꦩ. ꦱꦤ꧀ꦠꦺꦴ ꦥꦤ ꦆꦢꦁ ꦈꦨꦪꦩ꧀ꦥꦶ ꦤ ꦏꦫꦺꦴꦤ꧀ꦠꦶ. ꦱꦸꦑꦺꦤ ꦦꦸꦛ꧀ꦜꦴ ꦄꦡ ꦮꦴ ꦢꦸꦑꦺꦤꦴꦠꦶ ꦢꦺꦱꦤꦴꦩꦠ꧀ꦠꦩꦺꦠꦁ, ꦄꦛ꧀ꦜꦲꦶ ꦥꦤ ꦭꦺꦴꦏꦣꦩ꧀ꦩꦺꦲꦶ ꦦꦸꦛ꧀ꦜꦴ ꦠꦸꦛ꧀ꦜꦶꦨꦴꦮꦩꦔ꧀ꦏꦸꦨꦴꦮꦮꦱꦺꦤ ꦮꦴ ꦮꦟ꧀ꦟꦨꦟꦤꦄꦮꦟ꧀ꦟꦨꦟꦤꦮꦱꦺꦤ ꦮꦴ ꦈꦕ꧀ꦕꦴꦮꦕꦁ ꦄꦴꦏꦴꦫꦁ ꦥꦟ꧀ꦝꦶꦠꦴ ꦤ ꦢꦱ꧀ꦱꦪꦤ꧀ꦠꦷꦠꦶ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦥꦚ꧀ꦕꦱꦠꦨꦶꦏ꧀ꦑꦸꦮꦠ꧀ꦡꦸ ꦄꦛ꧀ꦜꦩꦁ.