꧙. ꦣꦩ꧀ꦩꦶꦏꦠ꧀ꦡꦺꦫꦮꦠ꧀ꦡꦸ

ꦤ ꦄꦠ꧀ꦠꦲꦺꦠꦹꦠꦶ ꦆꦩꦁ ꦣꦩ꧀ꦩꦢꦺꦱꦤꦁ ꦱꦠ꧀ꦡꦴ ꦗꦺꦠꦮꦤꦺ ꦮꦶꦲꦫꦤ꧀ꦠꦺꦴ ꦣꦩ꧀ꦩꦶꦏꦠ꧀ꦡꦺꦫꦁ ꦄꦴꦫꦧ꧀ꦨ ꦏꦡꦺꦱꦶ.

ꦱꦴꦮꦠ꧀ꦡꦶꦪꦁ ꦏꦶꦫꦺꦏꦺꦴ ꦈꦥꦴꦱꦏꦺꦴ ꦣꦩ꧀ꦩꦺꦤ ꦱꦩꦺꦤ ꦄꦒꦴꦫꦁ ꦄꦗ꧀ꦙꦴꦮꦱꦠꦶ. ꦱꦺꦴ ꦥꦧ꧀ꦧꦗꦶꦠꦸꦏꦴꦩꦺꦴ ꦲꦸꦠ꧀ꦮꦴ ꦌꦏꦢꦶꦮꦱꦁ ꦨꦫꦶꦪꦴꦪ ꦱꦢ꧀ꦣꦶꦁ ꦤꦶꦱꦷꦢꦶꦠ꧀ꦮꦴ ꦱꦸꦑꦏꦡꦁ ꦏꦡꦺꦤ꧀ꦠꦺꦴ ꦄꦴꦲ – ‘‘ꦨꦢ꧀ꦢꦺ, ꦆꦕ꧀ꦖꦴꦩꦲꦁ ꦥꦧ꧀ꦧꦗꦶꦠꦸ’’ꦤ꧀ꦠꦶ. ‘‘ꦠꦺꦤ ꦲꦶ, ꦱꦴꦩꦶ, ꦄꦴꦒꦩꦺꦲꦶ ꦠꦴꦮ, ꦪꦴꦮꦴꦲꦁ ꦏꦸꦕ꧀ꦖꦶꦒꦠꦁ ꦢꦴꦫꦏꦁ ꦮꦶꦗꦴꦪꦴꦩꦷ’’ꦠꦶ. ꦱꦺꦴ ꦄꦴꦒꦩꦺꦠ꧀ꦮꦴ ꦢꦴꦫꦏꦱ꧀ꦱ ꦥꦢꦱꦴ ꦒꦩꦤꦏꦴꦭꦺ ꦥꦸꦤ ꦠꦁ ꦄꦴꦥꦸꦕ꧀ꦖꦶꦠ꧀ꦮꦴ ‘‘ꦄꦴꦒꦩꦺꦲꦶ ꦠꦴꦮ, ꦱꦴꦩꦶ, ꦪꦴꦮꦴꦪꦁ ꦮꦪꦥ꧀ꦥꦠ꧀ꦠꦺꦴ ꦲꦺꦴꦠꦷ’’ꦠꦶ ꦮꦸꦠ꧀ꦠꦺ ‘‘ꦏꦶꦁ ꦩꦺ ꦆꦩꦴꦪ ꦄꦥꦭꦺꦴꦏꦶꦠꦴꦪ ꦮꦴ ꦄꦤꦥꦭꦺꦴꦏꦶꦠꦴꦪ ꦮꦴ, ꦄꦠ꧀ꦠꦤꦺꦴ ꦢꦸꦏ꧀ꦑꦤꦶꦱ꧀ꦱꦫꦟꦁ ꦏꦫꦶꦱ꧀ꦱꦴꦩꦷ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶ. ꦱꦺꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦓꦛꦺꦤ꧀ꦠꦺꦴ ꦮꦴꦪꦩꦤ꧀ꦠꦺꦴ ꦄꦠ꧀ꦠꦤꦺꦴ ꦥꦧ꧀ꦧꦗꦶꦠꦏꦶꦕ꧀ꦕꦁ ꦤꦶꦛ꧀ꦜꦥꦺꦠ꧀ꦮꦴ ꦠꦺꦱꦁ ꦢꦱ꧀ꦱꦤꦠ꧀ꦡꦴꦪ ꦥꦸꦤ ꦱꦴꦮꦠ꧀ꦡꦶꦁ ꦒꦤ꧀ꦠ꧀ꦮꦴ ꦥꦸꦠ꧀ꦠꦱ꧀ꦱ ꦣꦩ꧀ꦩꦏꦡꦁ ꦏꦡꦺꦱꦶ. ꦱꦺꦴꦥꦶ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶ, ꦥꦧ꧀ꦧꦗꦶꦠ꧀ꦮꦴ ꦕ ꦥꦤ ꦤ ꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦥꦸꦫꦴꦟꦢꦸꦠꦶꦪꦶꦏꦴꦥꦶꦱ꧀ꦱ ‘‘ꦪꦺꦱꦁ ꦄꦠ꧀ꦡꦴꦪ ꦄꦲꦁ ꦓꦫꦴꦮꦴꦱꦺ ꦮꦱꦺꦪ꧀ꦪꦁ, ꦠꦺ ꦈꦨꦺꦴꦥꦶ ꦥꦧ꧀ꦧꦗꦶꦠꦴ, ꦆꦢꦴꦤꦶ ꦩꦺ ꦏꦶꦁ ꦓꦫꦴꦮꦴꦱꦺꦤ, ꦥꦧ꧀ꦧꦗꦶꦱ꧀ꦱꦴꦩꦷ’’ꦠꦶ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶ, ꦥꦧ꧀ꦧꦗꦶꦠ꧀ꦮꦴ ꦕ ꦥꦤ ꦤ ꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ. ꦄꦡꦺꦏꦢꦶꦮꦱꦁ ꦣꦩ꧀ꦩꦱꦨꦴꦪꦁ ꦏꦡꦁ ꦱꦩꦸꦛ꧀ꦜꦴꦥꦺꦱꦸꦁ – ‘‘ꦄꦴꦮꦸꦱꦺꦴ, ꦣꦩ꧀ꦩꦶꦏꦈꦥꦴꦱꦏꦺꦴ ꦄꦠ꧀ꦠꦤꦺꦴ ꦣꦩ꧀ꦩꦺ ꦥꦠꦶꦛ꧀ꦜꦶꦠꦠ꧀ꦠꦴ ꦤꦶꦏ꧀ꦑꦩꦶꦠ꧀ꦮꦴ ꦥꦧ꧀ꦧꦗꦶꦠ꧀ꦮꦴ ꦄꦫꦲꦠ꧀ꦠꦁ ꦥꦠ꧀ꦠꦺꦴ ꦥꦸꦠ꧀ꦠꦢꦴꦫꦱ꧀ꦱꦴꦥꦶ ꦥꦠꦶꦛ꧀ꦜꦴ ꦗꦴꦠꦺꦴ’’ꦠꦶ. ꦱꦠ꧀ꦡꦴ ꦄꦴꦒꦤ꧀ꦠ꧀ꦮꦴ ‘‘ꦏꦴꦪ ꦤꦸꦠ꧀ꦡ, ꦨꦶꦏ꧀ꦑꦮꦺ, ꦌꦠꦫꦲꦶ ꦏꦡꦴꦪ ꦱꦤ꧀ꦤꦶꦱꦶꦤ꧀ꦤꦴ’’ꦠꦶ ꦥꦸꦕ꧀ꦖꦶꦠ꧀ꦮꦴ ‘ꦆꦩꦴꦪ ꦤꦴꦩꦴ’’’ꦠꦶ ꦮꦸꦠ꧀ꦠꦺ, ‘‘ꦨꦶꦏ꧀ꦑꦮꦺ, ꦥꦟ꧀ꦝꦶꦠꦺꦤ ꦤꦴꦩ ꦤꦺꦮ ꦄꦠ꧀ꦠꦲꦺꦠꦸ, ꦤ ꦥꦫꦲꦺꦠꦸ ꦱꦩꦶꦢ꧀ꦣꦶ ꦆꦕ꧀ꦖꦶꦠꦧ꧀ꦧꦴ, ꦣꦩ꧀ꦩꦶꦏꦺꦤꦺꦮ ꦥꦤ ꦣꦩ꧀ꦩꦥꦛꦶꦱꦫꦟꦺꦤ ꦨꦮꦶꦠꦧ꧀ꦧ’’ꦤ꧀ꦠꦶ ꦄꦤꦸꦱꦤ꧀ꦣꦶꦁ ꦓꦛꦺꦠ꧀ꦮꦴ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦆꦩꦁ ꦒꦴꦡꦩꦴꦲ –

꧘꧔. ‘‘ꦤ ꦄꦠ꧀ꦠꦲꦺꦠꦸ ꦤ ꦥꦫꦱ꧀ꦱ ꦲꦺꦠꦸ,

ꦤ ꦥꦸꦠ꧀ꦠꦩꦶꦕ꧀ꦖꦺ ꦤ ꦣꦤꦁ ꦤ ꦫꦛ꧀ꦜꦁ;

ꦤ ꦆꦕ꧀ꦖꦺꦪ꧀ꦪ ꦄꦣꦩ꧀ꦩꦺꦤ ꦱꦩꦶꦢ꧀ꦣꦶꦩꦠ꧀ꦠꦤꦺꦴ,

ꦱ ꦱꦷꦭꦮꦴ ꦥꦚ꧀ꦚꦮꦴ ꦣꦩ꧀ꦩꦶꦏꦺꦴ ꦱꦶꦪꦴ’’ꦠꦶ.

ꦠꦠ꧀ꦡ ꦤ ꦄꦠ꧀ꦠꦲꦺꦠꦹꦠꦶ ꦥꦟ꧀ꦝꦶꦠꦺꦴ ꦤꦴꦩ ꦄꦠ꧀ꦠꦲꦺꦠꦸ ꦮꦴ ꦥꦫꦲꦺꦠꦸ ꦮꦴ ꦥꦴꦥꦁ ꦤ ꦏꦫꦺꦴꦠꦶ. ꦤ ꦥꦸꦠ꧀ꦠꦩꦶꦕ꧀ꦖꦺꦠꦶ ꦥꦸꦠ꧀ꦠꦁ ꦮꦴ ꦣꦤꦁ ꦮꦴ ꦫꦛ꧀ꦜꦁ ꦮꦴ ꦥꦴꦥꦏꦩ꧀ꦩꦺꦤ ꦤ ꦆꦕ꧀ꦖꦺꦪ꧀ꦪ, ꦌꦠꦴꦤꦶꦥꦶ ꦆꦕ꧀ꦖꦠꦺꦴ ꦥꦴꦥꦏꦩ꧀ꦩꦁ ꦤ ꦏꦫꦺꦴꦠꦶꦪꦺꦮꦴꦠꦶ ꦄꦠ꧀ꦡꦺꦴ. ꦱꦩꦶꦢ꧀ꦣꦶꦩꦠ꧀ꦠꦤꦺꦴꦠꦶ ꦪꦴ ꦄꦠ꧀ꦠꦤꦺꦴ ꦱꦩꦶꦢ꧀ꦣꦶ, ꦠꦩ꧀ꦥꦶ ꦄꦣꦩ꧀ꦩꦺꦤ ꦤ ꦆꦕ꧀ꦖꦺꦪ꧀ꦪ,ꦱꦩꦶꦢ꧀ꦣꦶꦏꦴꦫꦟꦴꦥꦶ ꦥꦴꦥꦁ ꦤ ꦏꦫꦺꦴꦠꦷꦠꦶ ꦄꦠ꧀ꦡꦺꦴ. ꦱ ꦱꦷꦭꦮꦴꦠꦶ ꦪꦺꦴ ꦌꦮꦫꦹꦥꦺꦴ ꦥꦸꦒ꧀ꦒꦭꦺꦴ, ꦱꦺꦴ ꦌꦮ ꦱꦷꦭꦮꦴ ꦕ ꦥꦚ꧀ꦚꦮꦴ ꦕ ꦣꦩ꧀ꦩꦶꦏꦺꦴꦕ ꦱꦶꦪꦴ, ꦤ ꦄꦚ꧀ꦚꦺꦴꦠꦶ ꦄꦠ꧀ꦡꦺꦴ.

ꦢꦺꦱꦤꦴꦮꦱꦴꦤꦺ ꦧꦲꦹ ꦱꦺꦴꦠꦴꦥꦠ꧀ꦠꦶꦦꦭꦴꦢꦷꦤꦶ ꦥꦴꦥꦸꦟꦶꦁꦱꦹꦠꦶ.

ꦣꦩ꧀ꦩꦶꦏꦠ꧀ꦡꦺꦫꦮꦠ꧀ꦡꦸ ꦤꦮꦩꦁ.