꧑. ꦨꦴꦒꦶꦤꦺꦪ꧀ꦪꦸꦥꦴꦭꦶꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦑꦷꦟꦴꦱꦮꦱꦲꦱ꧀ꦱꦺꦲꦷꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦈꦥꦴꦭꦶꦠ꧀ꦡꦺꦫꦱ꧀ꦱ ꦨꦴꦒꦶꦤꦺꦪ꧀ꦪꦸꦥꦴꦭꦶꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦌꦱꦺꦴ ꦲꦶ ꦡꦺꦫꦺꦴ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦱ꧀ꦩꦶꦁ ꦠꦱ꧀ꦩꦶꦁ ꦨꦮꦺ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦥꦢꦸꦩꦸꦠ꧀ꦠꦫꦱ꧀ꦱ ꦨꦒꦮꦠꦺꦴ ꦏꦴꦭꦺ ꦌꦏꦱ꧀ꦩꦶꦁ ꦏꦸꦭꦺ ꦤꦶꦧ꧀ꦧꦠ꧀ꦠꦺꦴ ꦮꦸꦢ꧀ꦣꦶꦩꦤ꧀ꦮꦴꦪ ꦓꦫꦴꦮꦴꦱꦺ ꦄꦴꦢꦷꦤꦮꦁ ꦢꦶꦱ꧀ꦮꦴ ꦒꦺꦲꦁ ꦥꦲꦴꦪ ꦆꦱꦶꦥꦧ꧀ꦧꦗ꧀ꦗꦁ ꦥꦧ꧀ꦧꦗꦶꦠ꧀ꦮꦴ ꦥꦚ꧀ꦕꦴꦨꦶꦚ꧀ꦚꦴꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦷ ꦲꦸꦠ꧀ꦮꦴ ꦲꦶꦩꦮꦤ꧀ꦠꦺ ꦮꦴꦱꦁ ꦏꦥ꧀ꦥꦺꦱꦶ. ꦠꦱ꧀ꦩꦶꦁ ꦱꦩꦪꦺ ꦥꦢꦸꦩꦸꦠ꧀ꦠꦫꦺꦴ ꦨꦒꦮꦴ ꦮꦶꦮꦺꦏꦏꦴꦩꦺꦴ ꦲꦶꦩꦮꦤ꧀ꦠꦁ ꦥꦴꦮꦶꦱꦶ. ꦠꦴꦥꦱꦺꦴ ꦨꦒꦮꦤ꧀ꦠꦁ ꦥꦸꦟ꧀ꦟꦕꦤ꧀ꦢꦩꦶꦮ ꦮꦶꦫꦺꦴꦕꦩꦴꦤꦁ ꦢꦹꦫꦠꦺꦴꦮ ꦢꦶꦱ꧀ꦮꦴ ꦥꦱꦤ꧀ꦤꦩꦴꦤꦱꦺꦴ ꦄꦗꦶꦤꦕꦩ꧀ꦩꦁ ꦄꦁꦱꦺ ꦏꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦪ꧀ꦲ ꦮꦤ꧀ꦢꦶꦠ꧀ꦮꦴ ꦜꦶꦠꦏꦺꦴꦮ ꦢꦱꦤꦑꦱꦩꦺꦴꦣꦴꦤꦚ꧀ꦗꦭꦶꦁ ꦱꦶꦫꦱꦶ ꦥꦠꦶꦛ꧀ꦜꦥꦺꦠ꧀ꦮꦴ ꦄꦤꦺꦏꦴꦲꦶ ꦈꦥꦩꦴꦲꦶ ꦄꦤꦺꦏꦺꦲꦶ ꦡꦸꦠꦶꦮꦕꦤꦺꦲꦶ ꦨꦒꦮꦤ꧀ꦠꦁ ꦡꦺꦴꦩꦺꦱꦶ. ꦠꦁ ꦱꦸꦠ꧀ꦮꦴ ꦨꦒꦮꦴ – ‘‘ꦄꦪꦁ ꦠꦴꦥꦱꦺꦴ ꦄꦤꦴꦒꦠꦺ ꦒꦺꦴꦠꦩꦱ꧀ꦱ ꦤꦴꦩ ꦨꦒꦮꦠꦺꦴ ꦱꦴꦱꦤꦺ ꦥꦧ꧀ꦧꦗꦶꦠ꧀ꦮꦴ ꦮꦶꦤꦪꦺ ꦠꦶꦑꦶꦟꦥꦚ꧀ꦚꦴꦤꦁ ꦄꦒ꧀ꦒꦺꦴ ꦨꦮꦶꦱ꧀ꦱꦠꦷ’’ꦠꦶ ꦧ꧀ꦪꦴꦏꦫꦟꦩꦢꦴꦱꦶ. ꦱꦺꦴ ꦪꦴꦮꦠꦴꦪꦸꦏꦁ ꦜꦠ꧀ꦮꦴ ꦄꦥꦫꦶꦲꦷꦤꦗ꧀ꦙꦴꦤꦺꦴ ꦧ꧀ꦫꦲ꧀ꦩꦭꦺꦴꦏꦺ ꦤꦶꦧ꧀ꦧꦠ꧀ꦠꦶ. ꦠꦠꦺꦴ ꦕꦸꦠꦺꦴ ꦢꦺꦮꦩꦤꦸꦱ꧀ꦱꦺꦱꦸ ꦱꦁꦱꦫꦤ꧀ꦠꦺꦴ ꦱꦩ꧀ꦥꦠ꧀ꦠꦶꦪꦺꦴ ꦄꦤꦸꦨꦮꦶꦠ꧀ꦮꦴ ꦆꦩꦱ꧀ꦩꦶꦁ ꦧꦸꦢ꧀ꦣꦸꦥ꧀ꦥꦴꦢꦺ ꦏꦥꦶꦭꦮꦠ꧀ꦡꦸꦤꦒꦫꦺ ꦈꦥꦴꦭꦶꦠ꧀ꦡꦺꦫꦱ꧀ꦱ ꦨꦴꦒꦶꦤꦺꦪ꧀ꦪꦺꦴ ꦲꦸꦠ꧀ꦮꦴ ꦤꦶꦧ꧀ꦧꦠ꧀ꦠꦶ. ꦱꦺꦴ ꦏꦩꦺꦤ ꦮꦸꦢ꧀ꦣꦶꦥ꧀ꦥꦠ꧀ꦠꦺꦴ ꦩꦴꦠꦸꦭꦱ꧀ꦱ ꦈꦥꦴꦭꦶꦠ꧀ꦡꦺꦫꦱ ꦱꦤ꧀ꦠꦶꦏꦺ ꦥꦧ꧀ꦧꦗꦶꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦒꦲꦺꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦴ ꦄꦲꦺꦴꦱꦶ. ꦱꦺꦴ ꦄꦠ꧀ꦠꦤꦺꦴ ꦄꦴꦕꦫꦶꦪꦱ꧀ꦱ ꦱꦩꦷꦥꦺ ꦮꦱꦶꦠꦠ꧀ꦠꦴ ꦮꦶꦤꦪꦥꦚ꧀ꦲꦺ ꦠꦶꦑꦶꦟꦚꦴꦟꦺꦴ ꦄꦲꦺꦴꦱꦶ. ꦄꦡ ꦨꦒꦮꦴ ‘‘ꦌꦠꦢꦒ꧀ꦒꦁ, ꦨꦶꦏ꧀ꦑꦮꦺ, ꦩꦩ ꦱꦴꦮꦏꦴꦤꦁ ꦨꦶꦏ꧀ꦑꦹꦤꦁ ꦮꦶꦤꦪꦥꦚ꧀ꦲꦺ ꦠꦶꦑꦶꦟꦥꦚ꧀ꦚꦴꦤꦁ ꦨꦶꦏ꧀ꦑꦹꦤꦁ ꦪꦢꦶꦢꦁ ꦨꦴꦒꦶꦤꦺꦪ꧀ꦪꦸꦥꦴꦭꦷ’’ꦠꦶ ꦠꦁ ꦌꦠꦢꦒ꧀ꦒꦛ꧀ꦜꦴꦤꦺ ꦜꦥꦺꦱꦶ.

꧑. ꦱꦺꦴ ꦌꦮꦁ ꦌꦠꦢꦒ꧀ꦒꦛ꧀ꦜꦴꦤꦁ ꦥꦠ꧀ꦮꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦑꦷꦟꦴꦱꦮꦱꦲꦱ꧀ꦱꦺꦲꦷꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦴ ꦱꦩꦤ꧀ꦠꦠꦺꦴ ꦪꦴꦮꦨꦮꦒ꧀ꦒꦴ ꦱꦮꦤ꧀ꦠꦶ ꦥꦮꦠ꧀ꦠꦤ꧀ꦠꦷꦠꦶ ꦄꦴꦱꦮꦴ. ꦏꦴꦩꦴꦱꦮꦴꦢꦪꦺꦴ ꦕꦠ꧀ꦠꦴꦫꦺꦴ ꦄꦴꦱꦮꦴ, ꦠꦺ ꦑꦷꦟꦴ ꦱꦺꦴꦱꦶꦠꦴ ꦮꦶꦱꦺꦴꦱꦶꦠꦴ ꦮꦶꦢ꧀ꦣꦁꦱꦶꦠꦴ ꦪꦺꦲꦶ ꦠꦺꦠꦶ ꦑꦷꦟꦴꦱꦮꦴ, ꦠꦺꦪꦺꦮ ꦱꦲꦱ꧀ꦱꦴ ꦑꦷꦟꦴꦱꦮꦱꦲꦱ꧀ꦱꦴ, ꦠꦺꦲꦶ ꦑꦷꦟꦴꦱꦮꦱꦲꦱ꧀ꦱꦺꦲꦶ. ꦥꦫꦺꦠꦺꦴ ꦥꦫꦶꦮꦸꦠꦺꦴ ꦭꦺꦴꦏꦤꦴꦪꦏꦺꦴ ꦭꦺꦴꦏꦱ꧀ꦱ ꦤꦶꦧ꧀ꦧꦴꦤꦥꦴꦥꦤꦏꦺꦴ ꦮꦶꦮꦺꦏꦁ ꦄꦤꦸꦪꦸꦠ꧀ꦠꦺꦴ ꦥꦛꦶꦱꦭ꧀ꦭꦶꦠꦸꦁ ꦌꦏꦷꦨꦮꦶꦠꦸꦁ ꦒꦕ꧀ꦖꦠꦺꦠꦶ ꦱꦩ꧀ꦧꦤ꧀ꦣꦺꦴ.

꧒. ꦄꦗꦶꦤꦺꦤ ꦤꦶꦮꦠ꧀ꦡꦺꦴꦲꦤ꧀ꦠꦶ ꦄꦲꦁ ꦄꦗꦶꦤꦩꦶꦒꦕꦩ꧀ꦩꦺꦤ ꦥꦛꦶꦕ꧀ꦖꦤ꧀ꦤꦺꦴ, ꦄꦗꦶꦤꦕꦩ꧀ꦩꦮꦱꦤꦺꦴꦠꦶ ꦄꦠ꧀ꦡꦺꦴ. ꦠꦶꦢꦟ꧀ꦝꦥꦫꦶꦣꦴꦫꦏꦺꦴꦠꦶ ꦏꦸꦟ꧀ꦝꦶꦏꦛ꧀ꦜꦥꦤꦠ꧀ꦡꦴꦪ ꦠꦶꦢꦟ꧀ꦝꦁ ꦒꦲꦺꦠ꧀ꦮꦴ ꦣꦴꦫꦺꦤ꧀ꦠꦺꦴꦠꦶ ꦄꦠ꧀ꦡꦺꦴ. ꦨꦶꦏ꧀ꦑꦸꦱꦔ꧀ꦓꦺꦤ ꦥꦫꦶꦧ꧀ꦪꦹꦭ꦳꧀ꦲꦁ ꦥꦫꦶꦮꦴꦫꦶꦠꦁ ꦭꦺꦴꦏꦤꦴꦪꦏꦁ ꦄꦢ꧀ꦢꦱꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦱꦁ ꦥꦴꦏꦛꦩꦺꦮꦴꦠꦶ.

ꦨꦴꦒꦶꦤꦺꦪ꧀ꦪꦸꦥꦴꦭꦶꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.