꧒. ꦱꦺꦴꦟꦏꦺꦴꦭ꦳ꦶꦮꦶꦱꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ

ꦄꦤꦺꦴꦩꦢꦱ꧀ꦱꦶꦱ꧀ꦱ ꦩꦸꦤꦶꦤꦺꦴꦠꦶꦄꦴꦢꦶꦏꦁ ꦄꦴꦪꦱ꧀ꦩꦠꦺꦴ ꦏꦺꦴꦭ꦳ꦶꦮꦶꦱꦠ꧀ꦡꦺꦫꦱ꧀ꦱ ꦄꦥꦢꦴꦤꦁ. ꦄꦪꦩ꧀ꦥꦶ ꦥꦸꦫꦶꦩꦧꦸꦢ꧀ꦣꦺꦱꦸ ꦏꦠꦴꦣꦶꦏꦴꦫꦺꦴ ꦠꦠ꧀ꦡ ꦠꦠ꧀ꦡ ꦨꦮꦺ ꦮꦶꦮꦛ꧀ꦛꦹꦥꦤꦶꦱ꧀ꦱꦪꦴꦤꦶ ꦥꦸꦚ꧀ꦚꦴꦤꦶ ꦈꦥꦕꦶꦤꦤ꧀ꦠꦺꦴ ꦄꦤꦺꦴꦩꦢꦱ꧀ꦱꦶꦱ꧀ꦱ ꦨꦒꦮꦠꦺꦴ ꦏꦴꦭꦺ ꦌꦏꦱ꧀ꦩꦶꦁ ꦏꦸꦭꦒꦺꦲꦺ ꦤꦶꦧ꧀ꦧꦠ꧀ꦠꦺꦴ ꦮꦪꦥ꧀ꦥꦠ꧀ꦠꦺꦴ ꦥꦸꦠ꧀ꦠꦢꦴꦫꦺꦲꦶ ꦮꦝ꧀ꦞꦶꦠꦺꦴ ꦮꦶꦨꦮꦱꦩ꧀ꦥꦤ꧀ꦤꦺꦴ ꦨꦒꦮꦠꦺꦴ ꦕꦔ꧀ꦏꦩꦤꦠ꧀ꦡꦴꦪ ꦱꦺꦴꦨꦤꦁ ꦕꦔ꧀ꦏꦩꦁ ꦏꦴꦫꦺꦠ꧀ꦮꦴ ꦱꦸꦣꦴꦥꦫꦶꦏꦩ꧀ꦩꦁ ꦏꦴꦫꦺꦠ꧀ꦮꦴ ꦄꦴꦢꦴꦱꦠꦭꦩꦶꦮ ꦱꦩꦁ ꦮꦶꦗ꧀ꦗꦺꦴꦠꦩꦴꦤꦁ ꦏꦠ꧀ꦮꦴ ꦢꦷꦥꦣꦹꦥꦥꦸꦥ꧀ꦦꦴꦢꦷꦲꦶ ꦱꦗ꧀ꦗꦺꦠ꧀ꦮꦴ ꦨꦒꦮꦠꦺꦴ ꦤꦶꦪ꧀ꦪꦴꦢꦺꦠ꧀ꦮꦴ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦟꦷꦠꦺꦤꦴꦲꦴꦫꦺꦤ ꦥꦹꦗꦺꦱꦶ. ꦱꦺꦴ ꦌꦮꦁ ꦪꦴꦮꦗꦷꦮꦁ ꦥꦸꦚ꧀ꦚꦴꦤꦶ ꦏꦠ꧀ꦮꦴ ꦠꦠꦺꦴ ꦕꦮꦶꦠ꧀ꦮꦴ ꦢꦺꦮꦭꦺꦴꦏꦺ ꦤꦶꦧ꧀ꦧꦠ꧀ꦠꦺꦴ. ꦠꦠ꧀ꦡ ꦥꦴꦭ꦳ꦶꦪꦴ ꦮꦸꦠ꧀ꦠꦤꦪꦺꦤ ꦢꦶꦧ꧀ꦧꦱꦩ꧀ꦥꦠ꧀ꦠꦶꦁ ꦄꦤꦸꦨꦮꦶꦠ꧀ꦮꦴ ꦄꦤ꧀ꦠꦫꦴ ꦎꦏ꧀ꦏꦴꦏꦏꦸꦭꦥ꧀ꦥꦱꦸꦠꦺꦴꦠꦶ ꦠꦁ ꦱꦧ꧀ꦧꦁ ꦥꦴꦭ꦳ꦶꦪꦴ ꦮꦸꦠ꧀ꦠꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦁ. ꦥꦕ꧀ꦖꦶꦩꦨꦮꦺ ꦥꦤ ꦏꦺꦴꦭꦶꦪꦫꦴꦗꦮꦁꦱꦺ ꦗꦴꦠꦺꦴ ꦮꦪꦥ꧀ꦥꦠ꧀ꦠꦺꦴ ꦏꦺꦴꦛꦶꦄꦒ꧀ꦓꦤꦏꦱ꧀ꦱ ꦏꦟ꧀ꦟꦥꦶꦭ꦳ꦤ꧀ꦣꦤꦱ꧀ꦱ ꦣꦴꦫꦶꦠꦠ꧀ꦠꦴ ꦏꦺꦴꦛꦶꦏꦟ꧀ꦟꦺꦴꦠꦶ, ꦏꦸꦛꦶꦏꦟ꧀ꦟꦺꦴꦠꦶ ꦕ ꦥꦴꦏꦛꦺꦴ ꦄꦲꦺꦴꦱꦶ. ꦱꦺꦴ ꦨꦒꦮꦠꦶ ꦥꦱꦤ꧀ꦤꦺꦴ ꦣꦩ꧀ꦩꦁ ꦱꦸꦠ꧀ꦮꦴ ꦥꦛꦶꦭꦢ꧀ꦣꦱꦢ꧀ꦣꦺꦴ ꦥꦧ꧀ꦧꦗꦶꦠ꧀ꦮꦴ ꦮꦶꦥꦱ꧀ꦱꦤꦁ ꦮꦝ꧀ꦞꦺꦠ꧀ꦮꦴ ꦤꦕꦶꦫꦱ꧀ꦱꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶ.

꧒꧕. ꦱꦺꦴ ꦄꦫꦲꦴ ꦲꦸꦠ꧀ꦮꦴ ꦄꦠ꧀ꦠꦤꦺꦴ ꦥꦸꦧ꧀ꦧꦏꦩ꧀ꦩꦁ ꦱꦫꦶꦠ꧀ꦮꦴ ꦱꦺꦴꦩꦤꦱ꧀ꦱꦗꦴꦠꦺꦴ ꦥꦸꦧ꧀ꦧꦕꦫꦶꦠꦴꦥꦢꦴꦤꦁ ꦥꦏꦴꦱꦺꦤ꧀ꦠꦺꦴ ꦄꦤꦺꦴꦩꦢꦱ꧀ꦱꦶꦱ꧀ꦱ ꦩꦸꦤꦶꦤꦺꦴꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦤꦺꦴꦩꦢꦱ꧀ꦱꦶꦱ꧀ꦱꦴꦠꦶ ꦄꦤꦺꦴꦩꦁ ꦄꦭꦴꦩꦏꦁ ꦱꦸꦤ꧀ꦢꦫꦁ ꦢꦱ꧀ꦱꦤꦁ ꦢ꧀ꦮꦠ꧀ꦠꦶꦁꦱꦩꦲꦴꦥꦸꦫꦶꦱꦭꦏ꧀ꦑꦟꦥꦛꦶꦩꦟ꧀ꦝꦶꦠꦠ꧀ꦠꦴ ꦧ꧀ꦪꦴꦩꦥ꧀ꦥꦨꦴꦩꦟ꧀ꦝꦭꦺꦴꦥꦱꦺꦴꦨꦶꦠꦠ꧀ꦠꦴ ꦄꦴꦫꦺꦴꦲꦥꦫꦶꦟꦴꦲꦺꦤ ꦱꦩꦤ꧀ꦤꦴꦒꦠꦠ꧀ꦠꦴ ꦕ ꦢꦱ꧀ꦱꦤꦷꦪꦁ ꦱꦫꦷꦫꦁ ꦪꦱ꧀ꦱ ꦨꦒꦮꦠꦺꦴ ꦱꦺꦴ ꦄꦤꦺꦴꦩꦢꦱ꧀ꦱꦷ, ꦠꦱ꧀ꦱ ꦄꦤꦺꦴꦩꦢꦱ꧀ꦱꦶꦱ꧀ꦱ ꦩꦸꦤꦶꦤꦺꦴꦠꦶ ꦄꦠ꧀ꦡꦺꦴ. ꦠꦴꦢꦶꦤꦺꦴꦠꦶ ꦆꦛ꧀ꦜꦴꦤꦶꦛ꧀ꦜꦺꦱꦸ ꦄꦏꦩ꧀ꦥꦶꦪꦱꦨꦴꦮꦱ꧀ꦱ. ꦱꦸꦣꦴꦪ ꦭꦺꦥꦤꦁ ꦏꦠ꧀ꦮꦴꦠꦶ ꦱꦸꦣꦴꦪ ꦄꦮꦭꦶꦠ꧀ꦠꦁ ꦏꦠ꧀ꦮꦴ ꦢꦷꦥꦣꦹꦥꦥꦸꦥ꧀ꦦꦣꦗꦥꦛꦴꦏꦴꦢꦷꦲꦶ ꦕ ꦄꦭꦔ꧀ꦏꦠꦁ ꦕꦔ꧀ꦏꦩꦁ ꦏꦴꦫꦪꦶꦁ ꦄꦏꦴꦱꦶꦤ꧀ꦠꦶ ꦄꦠ꧀ꦡꦺꦴ. ꦱꦺꦱꦒꦴꦡꦴꦤꦁ ꦄꦠ꧀ꦡꦺꦴ ꦥꦴꦭ꦳ꦶꦪꦴ ꦄꦤꦸꦱꦴꦫꦺꦤ ꦱꦸꦮꦶꦚ꧀ꦚꦺꦪ꧀ꦪꦺꦴꦮ.

꧓꧕. ꦥꦫꦶꦮꦴꦫꦱꦩ꧀ꦥꦠ꧀ꦠꦶꦣꦤꦱꦩ꧀ꦥꦠ꧀ꦠꦶꦱꦔ꧀ꦑꦴꦠꦁ ꦪꦱꦁ ꦣꦴꦫꦺꦠꦷꦠꦶ ꦪꦱꦺꦴꦣꦫꦺꦴ, ꦱꦧ꧀ꦧꦺ ꦌꦠꦺ ꦱꦠ꧀ꦠꦱꦠ꧀ꦠꦠꦶꦕꦏ꧀ꦏꦮꦠ꧀ꦠꦶꦫꦴꦗꦴꦤꦺꦴ ꦪꦱꦺꦴꦣꦫꦤꦴꦩꦺꦤ ꦌꦏꦤꦴꦩꦏꦴꦠꦶ ꦱꦩ꧀ꦧꦤ꧀ꦣꦺꦴ.

꧕꧒. ꦄꦔ꧀ꦒꦷꦫꦱꦺꦴꦠꦶ ꦄꦔ꧀ꦒꦠꦺꦴ ꦱꦫꦷꦫꦠꦺꦴ ꦤꦶꦒ꧀ꦒꦠꦴ ꦫꦱ꧀ꦩꦶ ꦪꦱ꧀ꦱ ꦱꦺꦴ ꦄꦔ꧀ꦒꦷꦫꦱꦺꦴ, ꦖꦤ꧀ꦢꦢꦺꦴꦱꦩꦺꦴꦲꦨꦪꦴꦒꦠꦷꦲꦶ ꦮꦴ ꦥꦴꦥꦴꦕꦴꦫꦮꦱꦺꦤ ꦮꦴ ꦕꦠꦸꦫꦴꦥꦴꦪꦁ ꦤ ꦒꦕ꧀ꦖꦠꦷꦠꦶ ꦤꦴꦒꦺꦴ, ꦩꦲꦤ꧀ꦠꦺꦴ ꦥꦹꦗꦶꦠꦺꦴ ꦕ ꦱꦺꦴ ꦤꦴꦒꦺꦴ ꦕꦺꦠꦶ ꦩꦲꦴꦤꦴꦒꦺꦴ. ꦱꦺꦱꦁ ꦈꦠ꧀ꦠꦴꦤꦠ꧀ꦡꦩꦺꦮꦴꦠꦶ.

ꦏꦺꦴꦭ꦳ꦶꦮꦶꦱꦠ꧀ꦡꦺꦫꦄꦥꦢꦴꦤꦮꦟ꧀ꦟꦤꦴ ꦱꦩꦠ꧀ꦠꦴ.