ꦥꦚ꧀ꦕꦥꦚ꧀ꦚꦴꦱꦠꦶꦩ ꦥꦫꦶꦕ꧀ꦖꦺꦢ

ꦫꦺꦴꦲꦟꦴꦫꦴꦠꦶ ꦮꦶꦗꦪꦺꦴꦤꦴꦩ

꧑. ꦭꦺꦴꦏꦤꦴꦩꦺꦴ ꦕꦩꦹꦤꦴꦡꦺꦴ, ꦩꦏ꧀ꦑꦏꦸꦢ꧀ꦫꦹꦱꦮꦴꦱꦶꦏꦺꦴ;

ꦱꦕ꧀ꦕꦥꦛꦶꦚ꧀ꦚꦺꦴ ꦣꦷꦠꦶꦩꦴ, ꦕꦺꦴꦭ꦳ꦢꦥ꧀ꦥꦮꦶꦓꦴꦠꦤꦺꦴ.

꧒. ꦄꦨꦶꦨꦹꦪ ꦗꦤꦺ ꦥꦠ꧀ꦮꦴ, ꦫꦗ꧀ꦗꦁ ꦫꦺꦴꦲꦟꦩꦟ꧀ꦝꦭꦺ;

ꦮꦱꦷ ꦏꦴꦗꦫꦒꦴꦩꦩ꧀ꦲꦶ, ꦕꦴꦫꦶꦠ꧀ꦠꦮꦶꦣꦶꦏꦺꦴꦮꦶꦢꦺꦴ.

꧓. ꦄꦲꦸ ꦠꦢꦴ ꦏꦶꦠ꧀ꦠꦶꦤꦴꦩꦺꦴ, ꦫꦴꦗꦥꦸꦠ꧀ꦠꦺꦴ ꦩꦲꦧ꧀ꦧꦭꦺꦴ;

ꦠꦱ꧀ꦱ ꦮꦁꦱꦴꦢꦶꦱꦩ꧀ꦥꦠ꧀ꦠꦷ, ꦤꦸꦥꦸꦧ꧀ꦧꦺꦤ ꦥꦮꦸꦕ꧀ꦕꦠꦺ.

꧔. ꦱꦸꦠꦺꦴ ꦏꦱ꧀ꦱꦥꦨꦹꦥꦱ꧀ꦱ, ꦩꦴꦟꦤꦴꦩꦺꦤ ꦮꦶꦱ꧀ꦱꦸꦠꦺꦴ;

ꦄꦴꦢꦶꦥꦴꦢꦺꦴ ꦄꦲꦸ ꦣꦷꦫꦺꦴ, ꦱꦢꦴꦕꦴꦫꦮꦶꦨꦹꦱꦶꦠꦺꦴ.

꧕. ꦠꦱ꧀ꦱꦴ’ꦡ ꦗꦺꦛ꧀ꦜꦏꦺꦴ ꦨꦴꦠꦴ, ꦩꦴꦟꦮꦩ꧀ꦩꦺꦴ ꦩꦲꦴꦩꦠꦶ;

ꦒꦺꦴꦏꦟ꧀ꦟꦏꦱꦩꦷꦥꦛ꧀ꦜ-ꦤꦢꦷꦠꦷꦫꦺ ꦤꦶꦱꦷꦢꦶꦪ.

꧖. ꦏꦠꦩꦤ꧀ꦠꦸꦥꦕꦴꦫꦺꦴ ꦱꦺꦴ, ꦪꦡꦴꦮꦶꦣꦶꦩꦱꦺꦱꦠꦺꦴ;

ꦄꦏ꧀ꦑꦩꦴꦭꦁ ꦒꦲꦺꦠ꧀ꦮꦴꦤ, ꦩꦤ꧀ꦠꦁ ꦗꦥ꧀ꦥꦶꦠꦸꦩꦴꦫꦨꦶ.

꧗. ꦏꦸꦩꦴꦫꦺꦴ ꦏꦶꦫ ꦨꦠ꧀ꦠꦒ꧀ꦒꦺ, ꦥꦴꦠꦸꦫꦴꦱꦶ ꦱꦮꦴꦲꦤꦺꦴ;

ꦱꦶꦑꦟ꧀ꦝꦶ ꦩꦸꦑꦠꦸꦟ꧀ꦝꦺꦤ, ꦧꦭꦶꦥꦛ꧀ꦛꦁ ꦮꦶꦑꦟ꧀ꦝꦶꦪ.

꧘. ꦱꦕ꧀ꦖꦶꦢ꧀ꦢꦏꦺ ꦤꦴꦭ꦳ꦶꦏꦺꦫ-ꦏꦥꦴꦭꦺ ꦮꦶꦕ꧀ꦕꦸꦤꦺꦴꦢꦏꦺ;

ꦭꦹꦑꦺ ꦗꦭꦩꦥꦱ꧀ꦱꦤ꧀ꦠꦺꦴ, ꦗꦥꦤ꧀ꦠꦱ꧀ꦱ ꦩꦸꦑꦁꦒꦠꦺꦴ.

꧙. ꦠꦠꦺꦴ ꦨꦴꦮꦶꦤꦶꦁ ꦱꦶꦢ꧀ꦣꦶ, ꦩꦥꦺꦏ꧀ꦑꦁ ꦤꦪꦤꦁ ꦱꦏꦁ;

ꦠꦱ꧀ꦱꦺꦴꦥꦤꦺꦱꦶ, ꦤꦶꦧ꧀ꦨꦶꦗ꧀ꦗ, ꦱꦺꦴꦥꦶ ꦠꦁ ꦱꦲꦱꦴꦥꦶꦕꦶ.

꧑꧐. ꦏꦸꦩꦴꦫꦺꦴ ꦠꦱ꧀ꦱ ꦱꦤ꧀ꦠꦸꦛ꧀ꦜꦺꦴ, ꦏꦸꦩꦴꦫꦱ꧀ꦱꦴꦨꦶꦥꦠ꧀ꦡꦶꦠꦁ;

ꦮꦫꦁ ꦥꦢꦴꦪ ꦤꦨꦱꦴ, ꦫꦴꦗꦩꦴꦤꦺꦴ ꦒꦠꦺꦴ ꦠꦠꦺꦴ.

꧑꧑. ꦨꦶꦤ꧀ꦤꦺꦏꦤꦪꦤꦁ ꦢꦶꦱ꧀ꦮꦴ, ꦱꦕꦶꦮꦴꦠꦁ ꦥꦫꦺꦴ ꦢꦶꦱꦸꦁ;

ꦮꦫꦭꦴꦨꦁ ꦥꦏꦴꦱꦺꦠ꧀ꦮꦴ, ꦱꦩꦱ꧀ꦱꦴꦱꦺꦱꦶ ꦱꦺꦴ ꦗꦤꦺ.

꧑꧒. ꦠꦠꦺꦴ ꦱꦺꦴ ꦱꦕꦶꦮꦴꦠꦱ꧀ꦱ, ꦱꦤ꧀ꦠꦸꦛ꧀ꦜꦴꦫꦴꦣꦪꦶꦁꦱꦸ ꦠꦁ;

ꦄꦤꦸꦫꦴꦣꦥꦸꦫꦁ ꦥꦠ꧀ꦮꦴ, ꦨꦶꦱꦺꦏꦺꦴ ꦏꦴꦫꦶꦪꦺꦴ ꦆꦠꦶ.

꧑꧓. ꦄꦠ꧀ꦡꦺꦴ ꦏꦺꦴ ꦩꦩꦫꦗ꧀ꦗꦺꦤ, ꦮꦶꦏꦭꦔ꧀ꦒꦱ꧀ꦱ ꦱꦩ꧀ꦥꦠꦶ;

ꦠꦥꦺꦴꦏꦩ꧀ꦩꦁ ꦏꦫꦶꦱ꧀ꦱꦴꦩꦶ, ꦥꦧ꧀ꦧꦗ꧀ꦗꦩꦸꦥꦒꦩ꧀ꦩꦲꦁ.

꧑꧔. ꦏꦟꦶꦛ꧀ꦜꦺꦴ ꦩꦴꦟꦤꦴꦩꦺꦴ ꦕ, ꦭꦔ꧀ꦏꦴꦫꦗ꧀ꦗꦁ ꦏꦩꦴꦒꦠꦁ;

ꦥꦴꦭꦺꦠꦸ ꦆꦠꦶ ꦱꦺꦴ ꦫꦗ꧀ꦗꦁ, ꦱꦩ꧀ꦥꦠ꧀ꦠꦁ ꦱꦩ꧀ꦥꦛꦶꦏ꧀ꦑꦶꦥꦶ.

꧑꧕. ꦮꦶꦚ꧀ꦚꦴꦠꦕꦶꦠ꧀ꦠꦱꦚ꧀ꦕꦴꦫꦴ, ꦱꦕꦶꦮꦴ ꦠꦱ꧀ꦱ ꦱꦧ꧀ꦧꦡꦴ;

ꦮꦠ꧀ꦠꦸꦩꦺꦠꦁ ꦏꦟꦶꦛ꧀ꦜꦱ꧀ꦱ, ꦥꦺꦱꦺꦱꦸꦁ ꦥꦸꦫꦶꦱꦺ ꦠꦢꦴ.

꧑꧖. ꦱꦸꦠ꧀ꦮꦴ ꦠꦁ ꦱꦷꦓꦩꦴꦒꦩ꧀ꦩ, ꦥꦱ꧀ꦱꦶꦠ꧀ꦮꦴ ꦱꦏꦨꦴꦠꦫꦁ;

ꦥꦠꦶꦠ꧀ꦮꦴ ꦥꦴꦢꦩꦹꦭꦩ꧀ꦲꦶ, ꦧꦲꦸꦁ ꦏꦤ꧀ꦢꦶꦪ ꦫꦺꦴꦢꦶꦪ.

꧑꧗. ꦗꦺꦛ꧀ꦜꦺꦤ ꦨꦴꦠꦫꦴ ꦱꦢ꧀ꦣꦶ-ꦩꦤꦸꦫꦴꦣꦥꦸꦫꦁ ꦒꦠꦺꦴ;

ꦩꦏꦸꦛꦁ ꦠꦠ꧀ꦡ ꦣꦴꦫꦺꦱꦶ, ꦗꦺꦛ꧀ꦜꦕꦶꦠ꧀ꦠꦴꦤꦸꦮꦠ꧀ꦠꦏꦺꦴ.

꧑꧘. ꦠꦠꦺꦴ’ꦨꦪꦒꦶꦫꦶꦁ ꦒꦤ꧀ꦠ꧀ꦮꦴ, ꦥꦧ꧀ꦧꦗ꧀ꦗꦁ ꦱꦏꦨꦴꦠꦸꦤꦺꦴ;

ꦪꦠ ꦪꦺꦴ ꦠꦠ꧀ꦡ ꦪꦴꦕꦶꦠ꧀ꦡ, ꦧꦲꦸꦩꦴꦤꦥꦸꦫꦱ꧀ꦱꦫꦁ.

꧑꧙. ꦠꦠꦺꦴ ꦠꦺ ꦪꦠꦪꦺꦴ ꦠꦱ꧀ꦱ, ꦥꦧ꧀ꦧꦗ꧀ꦗꦩꦸꦥꦱꦩ꧀ꦥꦢꦁ;

ꦄꦏꦁꦱꦸ ꦮꦶꦏꦭꦔ꧀ꦒꦱ꧀ꦱ, ꦱꦶꦏ꧀ꦑꦴꦥꦢꦤꦶꦫꦴꦢꦫꦴ.

꧒꧐. ꦥꦫꦶꦮꦺꦟꦩꦸꦠ꧀ꦠꦫꦺꦴꦭ꦳-ꦩꦸꦭ꦳ꦴꦫꦁ ꦠꦱ꧀ꦱ ꦏꦴꦫꦶꦪ;

ꦏꦠ꧀ꦮꦴ ꦠꦁ ꦥꦫꦶꦮꦺꦟꦱ꧀ꦱ, ꦱꦴꦩꦶꦏꦁ ꦣꦫꦟꦷ ꦥꦠꦶ.

꧒꧑. ꦨꦶꦏ꧀ꦑꦹꦤꦁ ꦖꦱꦠꦁ ꦠꦠ꧀ꦡ, ꦮꦶꦣꦴꦪ ꦠꦢꦣꦷꦤꦏꦁ;

ꦥꦫꦶꦲꦴꦫꦺ ꦄꦢꦴ ꦠꦱ꧀ꦱ, ꦥꦺꦱ꧀ꦱꦮꦒ꧀ꦒꦺ ꦕ ꦥꦚ꧀ꦕ ꦱꦺꦴ.

꧒꧒. ꦱꦩꦥ꧀ꦥꦺꦱꦶ ꦕ ꦱꦺꦴ ꦤꦴꦤꦴ-ꦱꦶꦥ꧀ꦥꦏꦩ꧀ꦩꦮꦶꦕꦏ꧀ꦑꦟꦺ;

ꦗꦤꦺ ꦕꦴꦏꦴ ꦠꦢꦴꦪꦠ꧀ꦠꦺ, ꦱꦺꦴ ꦢꦴꦜꦴꦣꦴꦠꦸꦫꦏ꧀ꦑꦶꦪꦺ.

꧒꧓. ꦠꦱ꧀ꦱꦺꦮꦴꦢꦏꦫꦴ’ꦲꦺꦱꦸꦁ, ꦨꦶꦏ꧀ꦑꦹ’ꦨꦪꦒꦶꦫꦶꦩ꧀ꦲꦶ ꦠꦺ;

ꦫꦴꦗꦴ ꦕ ꦭꦺꦴꦏꦁ ꦥꦴꦭꦺꦱꦶ, ꦱꦩ꧀ꦩꦴ ꦠꦱ꧀ꦱꦴꦤꦸꦱꦶꦛ꧀ꦜꦶꦪꦴ.

꧒꧔. ꦗꦤꦴ ꦠꦧ꧀ꦧꦁꦱꦗꦴ ꦏꦺꦕꦶ, ꦠꦁ ꦫꦗ꧀ꦗꦤꦶꦫꦥꦺꦏ꧀ꦑꦏꦴ;

ꦤꦶꦮꦱꦶꦁꦱꦸ ꦪꦡꦴꦏꦴꦩꦁ, ꦩꦲꦴꦱꦴꦩꦶ ꦥꦢꦁꦱꦶꦠꦴ.

꧒꧕. ꦌꦠꦱ꧀ꦱ ꦩꦴꦟꦮꦩ꧀ꦩꦱ꧀ꦱ, ꦫꦚ꧀ꦚꦺꦴ ꦣꦩ꧀ꦩꦤꦪꦚ꧀ꦚꦸꦤꦺꦴ;

ꦄꦒ꧀ꦒꦧꦺꦴꦣꦶꦏꦸꦩꦴꦫꦴꦢꦶ-ꦥꦸꦠ꧀ꦠꦤꦠ꧀ꦠꦸꦏ꧀ꦏꦩꦴꦒꦠꦺ.

꧒꧖. ꦮꦁꦱꦺ ꦮꦶꦱꦸꦢ꧀ꦣꦺ ꦗꦴꦠꦱ꧀ꦱ, ꦨꦹꦥꦴꦭꦤ꧀ꦮꦪꦩꦸꦢ꧀ꦣꦤꦶ;

ꦱꦩꦴꦱꦺꦴꦭ꦳ꦱꦏꦔ꧀ꦏꦴꦪꦁ, ꦱꦩ꧀ꦩꦴ ꦫꦗ꧀ꦗꦴꦤꦸꦱꦴꦱꦶꦤꦺꦴ.

꧒꧗. ꦩꦲꦷꦥꦱ꧀ꦱ ꦩꦲꦶꦤ꧀ꦢꦱ꧀ꦱ, ꦢꦸꦮꦺ ꦩꦴꦏꦸꦭꦣꦷꦠꦫꦺꦴ;

ꦢꦺꦮꦭꦴ ꦭꦺꦴꦏꦶꦏꦴ ꦕꦴꦠꦶ, ꦤꦴꦩꦠꦺꦴ ꦮꦶꦱ꧀ꦱꦸꦠꦴ ꦱꦸꦨꦴ.

꧒꧘. ꦌꦠꦴꦱꦸ ꦢ꧀ꦮꦷꦱꦸ ꦣꦷꦠꦴꦱꦸ, ꦭꦺꦴꦏꦶꦏꦴ ꦩꦴꦠꦸꦭꦠ꧀ꦠꦗꦁ;

ꦥꦛꦶꦕ꧀ꦕ ꦫꦴꦗꦠꦤꦪꦁ, ꦱꦸꦨꦁ ꦏꦱ꧀ꦱꦥꦤꦴꦩꦏꦁ.

꧒꧙. ꦱꦴ ꦩꦺꦴꦒ꧀ꦒꦭ꧀ꦭꦴꦤ ꦭꦺꦴꦏꦮ꧀ꦲꦺ, ꦥꦸꦠ꧀ꦠꦺ ꦢ꧀ꦮꦺ ꦭꦨꦶ ꦱꦺꦴꦨꦤꦺ;

ꦠꦺꦱꦸ ꦗꦺꦛ꧀ꦜꦱꦸꦠꦺꦴ ꦭꦺꦴꦏ-ꦱꦴꦱꦤꦴꦣꦴꦫꦏꦺꦴꦮꦶꦢꦺꦴ.

꧓꧐. ꦩꦲꦴꦱꦴꦩꦷꦠꦶ ꦥꦚ꧀ꦚꦴꦠꦺꦴ, ꦱꦔ꧀ꦓꦸꦥꦴꦱꦤꦥꦴꦭꦪꦺꦴ;

ꦤꦺꦏꦱꦴꦫꦒꦸꦟꦴꦮꦴꦱꦺꦴ, ꦮꦴꦱꦁ ꦏꦥ꧀ꦥꦺꦱꦶ ꦫꦺꦴꦲꦟꦺ.

꧓꧑. ꦢꦴꦜꦺꦴꦥꦠꦶꦱ꧀ꦱ ꦫꦴꦗꦱ꧀ꦱ, ꦤꦠ꧀ꦠꦴ ꦱꦸꦒꦠꦱꦴꦱꦤꦺ;

ꦥꦧ꧀ꦧꦗ꧀ꦗꦹꦥꦒꦠꦺꦴ ꦱꦢ꧀ꦣꦺꦴ, ꦣꦸꦠꦮꦴ ꦱꦷꦭꦱꦁꦮꦸꦠꦺꦴ.

꧓꧒. ꦥꦲꦶꦠꦠ꧀ꦠꦺꦴ ꦮꦶꦕꦶꦠ꧀ꦠꦺꦴꦱꦺꦴ, ꦥꦤ꧀ꦠꦱꦺꦤꦴꦱꦤꦺ ꦮꦱꦷ;

ꦒꦸꦟꦁ ꦱꦧ꧀ꦧꦠ꧀ꦡ ꦮꦟ꧀ꦟꦺꦱꦸꦁ, ꦠꦱ꧀ꦩꦶꦁ ꦢꦺꦮꦴ ꦥꦱꦷꦢꦶꦪ.

꧓꧓. ꦒꦸꦟꦁ ꦱꦸꦟꦶꦠ꧀ꦮꦴ ꦭꦁꦏꦶꦤ꧀ꦢꦺꦴ, ꦠꦢꦴ ꦱꦧ꧀ꦧꦠ꧀ꦡ ꦥꦠ꧀ꦡꦛꦁ;

ꦈꦥꦱꦔ꧀ꦏꦩ꧀ꦩ ꦠꦁ ꦤꦠ꧀ꦮꦴ, ꦏꦴꦠꦸꦩꦠ꧀ꦠꦴꦤꦸꦱꦴꦱꦤꦁ.

꧓꧔. ꦄꦴꦫꦴꦣꦪꦩꦤꦶꦕ꧀ꦖꦤ꧀ꦠꦁ, ꦪꦴꦕꦶꦠ꧀ꦮꦴꦤ ꦥꦸꦤꦥ꧀ꦥꦸꦤꦁ;

ꦄꦴꦤꦷꦪ ꦮꦴꦱꦪꦶꦠ꧀ꦮꦴ ꦠꦁ, ꦥꦴꦱꦴꦢꦺ ꦱꦴꦣꦸꦏꦴꦫꦶꦠꦺ.

꧓꧕. ꦪꦠꦶꦱ꧀ꦱꦫꦱ꧀ꦱ ꦮꦱꦠꦺꦴ, ꦏꦠ꧀ꦡ ꦫꦴꦗꦴꦒꦸꦟꦥ꧀ꦥꦶꦪꦺꦴ;

ꦠꦱ꧀ꦱꦴꦤꦸꦱꦶꦛ꧀ꦜꦶꦩꦒ꧀ꦒꦛ꧀ꦜꦺꦴ, ꦭꦺꦴꦏꦁ ꦣꦩ꧀ꦩꦺꦤ ꦥꦴꦭꦪꦶ.

꧓꧖. ꦈꦢ꧀ꦢꦶꦱ꧀ꦱꦴꦫꦴꦣꦤꦁ ꦱꦩ꧀ꦩꦴ, ꦭꦁꦏꦶꦤ꧀ꦢꦺꦤ ꦏꦠꦁ ꦠꦢꦴ;

ꦱꦺꦭꦤ꧀ꦠꦫꦴꦨꦶꦤꦶꦏ꧀ꦑꦩ꧀ꦩ, ꦪꦠꦶꦤ꧀ꦢꦺꦴ ꦱꦺꦴ ꦢꦪꦴꦤꦸꦒꦺꦴ.

꧓꧗. ꦪꦠꦺꦴ ꦨꦶꦏ꧀ꦑꦹ ꦱꦩꦹꦲꦺꦠ꧀ꦮꦴ, ꦮꦴꦱꦁ ꦏꦥ꧀ꦥꦺꦱꦶ ꦪꦠ꧀ꦡ ꦱꦺꦴ;

ꦱꦺꦭꦤ꧀ꦠꦫꦱꦩꦹꦲꦺꦴ’ꦠꦶ, ꦮꦶꦏ꧀ꦑ꧀ꦪꦴꦠꦶꦁ ꦱꦺꦴ ꦠꦠꦺꦴ ꦒꦠꦺꦴ.

꧓꧘. ꦠꦠꦺꦴ ꦥꦛ꧀ꦜꦴꦪ ꦮꦴꦱꦺꦠ꧀ꦮꦴ, ꦫꦠ꧀ꦠꦶꦪꦁ ꦢꦺꦮꦥꦭ꧀ꦭꦶꦪꦁ;

ꦢꦺꦮꦠꦴꦤꦸꦩꦠꦁ ꦨꦶꦏ꧀ꦑꦸꦁ, ꦩꦹꦭꦜꦴꦤꦺ ꦜꦥꦺꦤ꧀ꦠꦶ ꦲꦶ.

꧓꧙. ꦩꦹꦭꦠ꧀ꦠꦩꦴꦮꦱꦤ꧀ꦠꦴꦤꦁ, ꦪꦠꦷꦤꦩꦤꦸꦱꦴꦱꦤꦴ;

ꦭꦁꦏꦶꦱ꧀ꦱꦫꦴ ꦥꦮꦠ꧀ꦠꦤ꧀ꦠꦶ, ꦥꦴꦭꦺꦤ꧀ꦠꦴ ꦭꦺꦴꦏꦱꦴꦱꦤꦁ.

꧔꧐. ꦠꦱ꧀ꦱ ꦢꦴꦜꦺꦴꦥꦠꦶꦱ꧀ꦱꦱ꧀ꦱ, ꦮꦁꦱꦗꦁ ꦫꦴꦗꦥꦸꦠ꧀ꦠꦏꦁ;

ꦧꦺꦴꦣꦶꦁ ꦥꦛꦶꦕ꧀ꦕ ꦠꦧ꧀ꦧꦁꦱꦴ, ꦧꦸꦢ꧀ꦣꦤꦴꦩꦴ ꦏꦸꦩꦴꦫꦶꦏꦴ.

꧔꧑. ꦄꦭꦠ꧀ꦡ ꦭꦺꦴꦏꦶꦠꦁ ꦤꦴꦩ, ꦣꦷꦠꦫꦁ ꦮꦫꦭꦏ꧀ꦑꦟꦁ;

ꦏꦴꦭꦺꦤ ꦱꦴ ꦥꦢꦶꦤ꧀ꦤꦴ’ꦱꦶ, ꦩꦺꦴꦒ꧀ꦒꦭ꧀ꦭꦴꦤꦱ꧀ꦱ ꦣꦷꦩꦠꦺꦴ.

꧔꧒. ꦱꦴ ꦠꦁ ꦥꦛꦶꦕ꧀ꦕ ꦏꦶꦠ꧀ꦠꦶꦚ꧀ꦕ, ꦩꦶꦠ꧀ꦠꦁ ꦤꦴꦩ ꦏꦸꦩꦴꦫꦶꦏꦁ;

ꦩꦲꦶꦤ꧀ꦢꦁ ꦫꦏ꧀ꦑꦶꦠꦁ ꦕꦴꦥꦶ, ꦭꦠꦶꦠ꧀ꦡ ꦕꦠꦸꦫꦺꦴ ꦥꦗꦴ.

꧔꧓. ꦄꦲꦸ ꦗꦺꦛ꧀ꦜꦱꦸꦠꦺꦴ ꦣꦷꦫꦺꦴ, ꦮꦷꦫꦺꦴ ꦠꦺꦫꦱꦮꦱ꧀ꦱꦶꦏꦺꦴ;

ꦏꦠꦲꦠ꧀ꦡꦺꦴ ꦮꦶꦱꦺꦱꦺꦤ, ꦣꦤꦸꦱꦶꦥ꧀ꦥꦩ꧀ꦲꦶ ꦱꦺꦴ ꦠꦠꦺꦴ.

꧔꧔. ꦏꦡꦁ ꦭꦔ꧀ꦏꦁ ꦒꦲꦺꦱ꧀ꦱꦴꦩꦶ, ꦢꦹꦫꦺꦠ꧀ꦮꦴ’ꦫꦴꦠꦶ ꦏꦟ꧀ꦛꦏꦁ;

ꦆꦠꦶ ꦕꦶꦤ꧀ꦠꦴꦥꦫꦺꦴꦒꦴꦩꦺ, ꦩꦹꦭꦱꦴꦭꦮ꧀ꦲꦪꦺ ꦮꦱꦷ.

꧔꧕. ꦌꦏꦺꦴ ꦩꦲꦴꦧꦭꦺꦴ ꦮꦷꦫꦺꦴ, ꦧꦸꦢ꧀ꦣꦫꦴꦗꦺꦴꦠꦶ ꦮꦶꦱ꧀ꦱꦸꦠꦺꦴ;

ꦮꦶꦭꦺꦴꦩꦮꦠ꧀ꦠꦷ ꦲꦸꦠ꧀ꦮꦴꦤ, ꦭꦺꦴꦏꦱꦺꦤꦴꦤꦶꦤꦺꦴ ꦠꦢꦴ.

꧔꧖. ꦥꦭꦴꦠꦺꦴ ꦕꦸꦟ꧀ꦟꦱꦴꦭꦮ꧀ꦲꦁ, ꦑꦶꦥ꧀ꦥꦁ ꦗꦤꦥꦢꦁ ꦠꦲꦶꦁ;

ꦏꦶꦠ꧀ꦠꦴꦢꦶꦏꦺ ꦗꦤꦺ ꦤꦺꦏꦺ, ꦮꦱꦺ ꦮꦠ꧀ꦠꦶꦪ ꦱꦧ꧀ꦧꦡꦴ.

꧔꧗. ꦱꦢ꧀ꦣꦶꦁ ꦧꦤ꧀ꦣꦹꦲꦶ ꦱꦔ꧀ꦒꦴꦩ-ꦱꦹꦫꦺꦲꦶ ꦧꦲꦸꦏꦺꦲꦶ ꦱꦺꦴ;

ꦩꦭꦪꦴꦕꦭꦥꦴꦢꦺꦱꦸ, ꦮꦱꦷ ꦢꦸꦥ꧀ꦥꦱꦲꦺꦴ ꦠꦢꦴ.

꧔꧘. ꦠꦱ꧀ꦱ’ꦤ꧀ꦠꦶꦏꦩꦸꦥꦴꦒꦩ꧀ꦩ, ꦱꦁꦮꦕ꧀ꦖꦫꦶꦏꦤꦴꦪꦏꦺꦴ;

ꦱꦔ꧀ꦓꦺꦴ ꦤꦴꦩ ꦏꦸꦩꦴꦫꦱ꧀ꦱ, ꦱꦫꦹꦥꦁ ꦱꦴꦣꦸꦮꦁ ꦧ꧀ꦫꦮꦶ.

꧔꧙. ꦩꦲꦴꦱꦴꦩꦶꦱ꧀ꦱ ꦠꦤꦪꦺꦴ, ꦗꦺꦛ꧀ꦜꦺꦴ ꦏꦶꦠ꧀ꦠꦶ ꦱꦤꦴꦩꦏꦺꦴ;

ꦣꦚ꧀ꦚꦭꦏ꧀ꦑꦟꦱꦩ꧀ꦥꦤ꧀ꦤꦺꦴ, ꦱꦩ꧀ꦥꦤ꧀ꦤꦩꦠꦶꦮꦶꦏ꧀ꦏꦩꦺꦴ.

꧕꧐. ꦗꦩ꧀ꦧꦸꦢꦷꦥꦺꦥꦶ ꦠꦁ ꦫꦗ꧀ꦗꦁ, ꦏꦠ꧀ꦠꦸꦩꦺꦏꦴꦠꦥꦠ꧀ꦠꦏꦁ;

ꦱꦩꦠ꧀ꦡꦺꦴꦠꦶ ꦮꦶꦕꦶꦤ꧀ꦠꦺꦥꦶ, ꦭꦔ꧀ꦏꦴꦢꦷꦥꦩ꧀ꦲꦶ ꦏꦴ ꦏꦡꦴ.

꧕꧑. ꦠꦱ꧀ꦱ ꦱꦺꦴ ꦮꦕꦤꦁ ꦱꦸꦠ꧀ꦮꦴ, ꦱꦺꦮꦶꦠꦧ꧀ꦧꦺꦴ ꦏꦸꦩꦴꦫꦏꦺꦴ;

ꦆꦠꦶ ꦤꦶꦕ꧀ꦖꦶꦪ ꦥꦺꦱꦺꦱꦶ, ꦏꦸꦩꦴꦫꦱ꧀ꦱ’ꦤ꧀ꦠꦶꦏꦁ ꦗꦤꦺ.

꧕꧒. ꦱꦸꦟꦶꦠ꧀ꦮꦴ ꦱꦺꦴ ꦮꦕꦺꦴ ꦠꦺꦱꦁ, ꦤꦶꦮꦠ꧀ꦠꦤꦨꦪꦴ ꦮꦶꦨꦹ;

ꦄꦗꦴꦤꦲꦁ ꦥꦶꦠꦸꦤ꧀ꦤꦁ ꦱꦺꦴ, ꦮꦷꦫꦺꦴ ꦣꦤꦸꦱꦲꦴꦪꦏꦺꦴ.

꧕꧓. ꦒꦺꦲꦴ ꦤꦶꦏ꧀ꦑꦩ꧀ꦩ ꦥꦱ꧀ꦱꦤ꧀ꦠꦺꦴ, ꦱꦸꦤꦶꦩꦶꦠ꧀ꦠꦴꦤꦶꦤꦺꦏꦣꦴ;

ꦄꦒꦴꦭꦲꦸꦁ ꦱꦫꦷꦮꦒ꧀ꦒ-ꦥꦶꦛ꧀ꦜꦶꦒꦴꦩꦁ ꦩꦲꦴꦩꦠꦶ.

꧕꧔. ꦠꦲꦶꦁ ꦱꦺꦴ ꦤꦶꦮꦱꦁ ꦮꦷꦫꦺꦴ, ꦥꦺꦱꦪꦶꦠ꧀ꦮꦴ ꦱꦱꦺꦮꦏꦺ;

ꦮꦶꦥꦏ꧀ꦑꦴꦣꦶꦛ꧀ꦜꦶꦠꦁ ꦗꦺꦱꦶ, ꦧꦺꦴꦣꦶꦮꦴꦭꦮ꧀ꦲꦒꦴꦩꦏꦁ.

꧕꧕. ꦠꦠꦺꦴ’ꦨꦶꦩꦴꦤꦷ ꦱꦺꦤꦴꦤꦷ, ꦱꦺꦤꦁ ꦱꦺꦴ ꦠꦠ꧀ꦡ ꦥꦺꦱꦪꦶ;

ꦱꦴ ꦥꦫꦶꦏ꧀ꦑꦶꦥꦠꦁ ꦒꦴꦩꦁ, ꦱꦔ꧀ꦒꦴꦩꦴꦪ ꦱꦩꦴꦫꦨꦷ.

꧕꧖. ꦏꦸꦩꦴꦫꦺꦴ ꦠꦺꦲꦶ ꦪꦸꦗ꧀ꦙꦤ꧀ꦠꦺꦴ, ꦱꦸꦨꦛꦺꦴ ꦥꦛꦸꦮꦶꦏ꧀ꦏꦩꦺꦴ;

ꦢꦶꦱꦴꦱꦸ ꦮꦶꦏꦶꦫꦷꦱꦧ꧀ꦧꦺ, ꦠꦸꦭꦁ ꦕꦟ꧀ꦝꦺꦴꦮ ꦩꦴꦭ꦳ꦸꦠꦺꦴ.

꧕꧗. ꦕꦸꦟ꧀ꦟꦱꦴꦭꦁ ꦗꦤꦥꦢꦁ, ꦒꦤ꧀ꦠ꧀ꦮꦴ ꦜꦴꦤꦮꦶꦢꦹ ꦠꦢꦴ;

ꦠꦲꦶꦁ ꦮꦱꦁ ꦮꦱꦺꦏꦴꦱꦶ, ꦱꦧ꧀ꦧꦁ ꦩꦭꦪꦩꦟ꧀ꦝꦭꦁ.

꧕꧘. ꦠꦢꦴꦥꦶ ꦱꦺꦤꦁ ꦱꦺꦤꦶꦤ꧀ꦢꦺꦴ, ꦥꦺꦱꦺꦠ꧀ꦮꦴ ꦄꦱꦏꦶꦁ ꦱꦏꦁ;

ꦄꦨꦶꦨꦹꦠꦶꦩꦱꦏ꧀ꦏꦺꦴꦤ꧀ꦠꦺꦴ, ꦏꦴꦠꦸꦁ ꦢꦸꦩ꧀ꦩꦤꦠꦁ ꦒꦠꦺꦴ.

꧕꧙. ꦩꦏ꧀ꦑꦏꦸꦢ꧀ꦫꦸꦱꦮꦴꦱꦶꦱ꧀ꦱ, ꦱꦕꦶꦥꦱ꧀ꦱꦴꦡ ꦏꦶꦠ꧀ꦠꦶꦤꦺꦴ;

ꦱꦸꦠꦺꦴ ꦩꦲꦧ꧀ꦧꦭꦺꦴ ꦢꦺꦮ-ꦩꦭ꧀ꦭꦺꦴꦠꦶ ꦮꦶꦢꦶꦠꦺꦴ ꦠꦢꦴ.

꧖꧐. ꦱꦲꦶꦠꦺꦴ ꦧꦤ꧀ꦣꦸꦩꦶꦠ꧀ꦠꦺꦲꦶ, ꦧꦲꦹ ꦫꦺꦴꦲꦟꦮꦴꦱꦶꦤꦺꦴ;

ꦱꦩꦴꦢꦴꦪꦴ’ꦨꦶꦒꦤ꧀ꦠ꧀ꦮꦴꦤ, ꦏꦸꦩꦴꦫꦁ ꦥꦱ꧀ꦱꦶ ꦱꦴꦢꦫꦺꦴ.

꧖꧑. ꦧꦤ꧀ꦣꦶꦪ ꦖꦸꦫꦶꦏꦁ ꦖꦺꦏꦺꦴ, ꦱꦺꦴ ꦥꦤ꧀ꦤꦫꦱꦮꦱ꧀ꦱꦶꦏꦺꦴ;

ꦄꦴꦢꦶꦥꦴꦢꦥꦢꦁ ꦠꦠ꧀ꦡ, ꦱꦩ꧀ꦥꦴꦥꦸꦟꦶ ꦩꦲꦴꦪꦱꦺꦴ.

꧖꧒. ꦠꦠꦺꦴ ꦲꦶꦫꦚ꧀ꦚꦩꦭꦪ, ꦩꦸꦥꦴꦒꦩ꧀ꦩ ꦩꦲꦧ꧀ꦧꦭꦺꦴ;

ꦠꦲꦶꦁ ꦫꦺꦩꦸꦟꦱꦺꦭꦩ꧀ꦲꦶ, ꦑꦤ꧀ꦣꦴꦮꦴꦫꦁ ꦤꦶꦧꦤ꧀ꦣꦪꦶ.

꧖꧓. ꦠꦠ꧀ꦡꦴꦥꦶ ꦱꦺꦤꦁ ꦥꦺꦱꦺꦠ꧀ꦮꦴ, ꦱꦔ꧀ꦒꦴꦩꦺꦤ꧀ꦠꦺꦴ ꦕꦩꦹꦥꦠꦶ;

ꦄꦭꦢ꧀ꦣꦮꦶꦗꦪꦺꦴ ꦖꦤ꧀ꦢꦁ, ꦥꦸꦤꦪꦸꦢ꧀ꦣꦺ ꦗꦲꦶꦠꦠꦺꦴ.

꧖꧔. ꦭꦺꦴꦏꦤꦴꦩꦺꦴ ꦕꦩꦹꦤꦴꦡꦺꦴ, ꦭꦺꦴꦏꦁ ꦲꦶꦠ꧀ꦮꦴ ꦱꦏꦁ ꦠꦢꦴ;

ꦄꦲꦸ ꦮꦱ꧀ꦱꦩ꧀ꦲꦶ ꦖꦛ꧀ꦜꦺꦱꦺꦴ, ꦥꦫꦭꦺꦴꦏꦥꦫꦴꦪꦤꦺꦴ.

꧖꧕. ꦠꦢꦴ ꦏꦱ꧀ꦱꦥꦤꦴꦩꦺꦏꦺꦴ, ꦏꦺꦱꦣꦴꦠꦸꦏꦤꦴꦪꦏꦺꦴ;

ꦗꦤꦺ’ꦨꦶꦨꦹꦪꦮꦠ꧀ꦠꦺꦱꦶ, ꦤꦷꦗꦴꦟꦁ ꦫꦺꦴꦲꦟꦺ ꦠꦢꦴ.

꧖꧖. ꦱꦸꦠ꧀ꦮꦴ ꦠꦁ ꦕꦺꦴꦭ꦳ꦱꦴꦩꦤ꧀ꦠꦺꦴ, ꦥꦸꦭ꦳ꦠ꧀ꦡꦶꦤꦒꦫꦴ ꦠꦢꦴ;

ꦤꦶꦏ꧀ꦑꦩ꧀ꦩ ꦪꦸꦢ꧀ꦣꦱꦤꦢ꧀ꦣꦺꦴ, ꦒꦤ꧀ꦠ꧀ꦮꦴ ꦏꦴꦗꦫꦒꦴꦩꦏꦁ.

꧖꧗. ꦏꦺꦱꦴꦣꦴꦠꦸ ꦠꦠꦺꦴ ꦪꦸꦢ꧀ꦣꦺ, ꦨꦶꦤ꧀ꦢꦶꦠ꧀ꦮꦴ ꦢꦩꦶꦭ꦳ꦁ ꦧꦭꦁ;

ꦫꦏ꧀ꦑꦥꦴꦱꦴꦟꦱꦷꦩꦴꦪꦁ, ꦜꦥꦺꦠ꧀ꦮꦴ ꦫꦏ꧀ꦑꦶꦪꦺ ꦗꦤꦺ.

꧖꧘. ꦥꦛꦶꦭꦢ꧀ꦣꦗꦪꦸꦢ꧀ꦢꦴꦩꦺꦴ, ꦩꦲꦴꦱꦺꦤꦴ ꦥꦸꦫꦏ꧀ꦑꦠꦺꦴ;

ꦥꦸꦤꦫꦴꦒꦩ꧀ꦩ ꦥꦴꦮꦺꦏ꧀ꦑꦶ, ꦮꦷꦫꦺꦴ ꦏꦴꦗꦫꦒꦴꦩꦏꦁ.

꧖꧙. ꦠꦢꦴꦢꦶꦥꦴꦢꦺꦴ ꦱꦸꦠ꧀ꦮꦴꦤ, ꦱꦧ꧀ꦧꦁ ꦱꦸꦠ꧀ꦡꦷꦫꦣꦴꦠꦸꦏꦺꦴ;

ꦏꦺꦱꦣꦴꦠꦸꦁ ꦤꦶꦓꦴꦠꦺꦠꦸꦁ, ꦧꦭꦁ ꦱꦤ꧀ꦤꦪ꧀ꦲꦶ ꦮꦺꦒꦱꦴ.

꧗꧐. ꦥꦮꦠ꧀ꦠꦶꦁ ꦠꦁ ꦱꦸꦟꦶꦠ꧀ꦮꦴ ꦱꦺꦴ, ꦱꦴꦨꦶꦩꦴꦤꦺꦴ ꦨꦸꦱꦁꦠꦠꦺꦴ;

ꦱꦩꦠ꧀ꦠꦁ ꦧꦭꦩꦴꦢꦴꦪ, ꦱꦶꦥ꧀ꦥꦠ꧀ꦡꦭꦏꦩꦴꦒꦩꦴ.

꧗꧑. ꦥꦚ꧀ꦕꦪꦺꦴꦗꦤꦫꦛ꧀ꦜꦴꦢꦶ-ꦮꦴꦱꦶꦏꦺꦱꦸ ꦧꦲꦹꦗꦤꦺ;

ꦱꦩꦴꦢꦴꦪ ꦱꦩꦴꦱꦤ꧀ꦤꦺ, ꦫꦴꦗꦥꦸꦠ꧀ꦠꦺ ꦱꦸꦢꦸꦗ꧀ꦗꦪꦺ.

꧗꧒. ꦮꦶꦫꦠ꧀ꦠꦠꦚ꧀ꦕ ꦱꦺꦴ ꦚꦠ꧀ꦮꦴ, ꦧꦲꦸꦤ꧀ꦤꦁ ꦫꦛ꧀ꦜꦮꦴꦱꦶꦤꦁ;

ꦢꦸꦏ꧀ꦏꦫꦁ ꦌꦠ꧀ꦡ ꦪꦸꦢ꧀ꦣꦤ꧀ꦠꦶ, ꦒꦠꦺꦴ ꦱꦺꦴ ꦑꦢꦶꦫꦔ꧀ꦒꦟꦶꦁ.

꧗꧓. ꦩꦲꦴꦱꦺꦤꦴꦪ ꦨꦹꦥꦴꦭ ꦱꦸꦠꦺꦴ ꦱꦺꦴꦭ꦳ꦱꦮꦱ꧀ꦱꦷꦏꦺꦴ;

ꦑꦶꦥ꧀ꦥꦁ ꦮꦴꦥꦺꦏ꧀ꦑꦶ ꦱꦺꦴ ꦮꦷꦠ-ꦢꦫꦺꦴ ꦏꦴꦗꦫꦒꦴꦩꦏꦁ.

꧗꧔. ꦖꦩ꧀ꦩꦴꦱꦩꦤꦸꦨꦺꦴꦠ꧀ꦮꦴꦤ, ꦫꦺꦴꦲꦟꦁ ꦫꦸꦛ꧀ꦜꦩꦴꦤꦱꦺꦴ;

ꦏꦺꦱꦣꦴꦠꦸꦏꦤꦴꦡꦺꦴꦥꦶ, ꦱꦔ꧀ꦒꦴꦩꦠ꧀ꦡꦴꦪ ꦠꦠ꧀ꦡꦒꦴ.