ꦖꦥꦚ꧀ꦚꦴꦱꦠꦶꦩ ꦥꦫꦶꦕ꧀ꦖꦺꦢ

ꦄꦤꦸꦫꦴꦣꦥꦸꦫꦴꦨꦶꦒꦩꦤꦺꦴ

꧑. ꦪꦸꦮꦫꦴꦗꦥꦢꦺ ꦠꦱ꧀ꦱ, ꦜꦶꦠꦱ꧀ꦱꦴ’ꦡ ꦤꦪꦚ꧀ꦚꦸꦤꦺꦴ;

ꦄꦲꦹ ꦮꦶꦗꦪꦧꦴꦲꦹꦠꦶ, ꦤꦴꦩꦁ ꦱꦧ꧀ꦧꦠ꧀ꦡ ꦥꦴꦏꦛꦁ.

꧒. ꦩꦲꦴꦚ꧀ꦚꦟꦺꦴ ꦤꦶꦗꦴꦟꦴꦪ, ꦠꦠ꧀ꦡ ꦨꦺꦫꦶꦁ ꦕꦫꦴꦮꦶꦪ;

ꦜꦥꦺꦤ꧀ꦠꦺꦴ ꦱꦕꦶꦮꦺ’ꦤꦺꦏꦺ, ꦥꦠꦶꦫꦹꦥꦺ ꦥꦢꦤ꧀ꦠꦫꦺ.

꧓. ꦕꦺꦴꦭ꦳ꦴꦤꦁ ꦩꦢ꧀ꦢꦤꦠ꧀ꦡꦴꦪ, ꦫꦴꦗꦫꦛ꧀ꦜꦴꦣꦶꦮꦴꦱꦶꦤꦁ;

ꦕꦠꦸꦫꦺꦴ ꦕꦠꦸꦫꦺꦴꦥꦴꦪꦺ, ꦪꦺꦴ ꦗꦪꦁ ꦠꦠ꧀ꦡ ꦱꦺꦴ ꦮꦱꦷ.

꧔. ꦕꦺꦴꦭ꦳ꦫꦴꦗꦴ ꦱꦸꦟꦶꦠ꧀ꦮꦴ ꦠꦁ, ꦥꦸꦭ꦳ꦠ꧀ꦡꦶꦤꦒꦫꦺ ꦜꦶꦠꦁ;

ꦱꦺꦤꦴꦥꦠꦶꦩ ꦥꦺꦱꦺꦱꦶ, ꦢꦠ꧀ꦮꦴꦤ ꦧꦭꦮꦴꦲꦤꦁ.

꧕. ꦱꦺꦤꦶꦤ꧀ꦢꦁ ꦏꦴꦗꦫꦒ꧀ꦒꦴꦩ-ꦱꦩꦷꦥꦁ ꦱꦩꦸꦥꦴꦒꦠꦁ;

ꦢꦸꦥ꧀ꦥꦱꦪ꧀ꦲꦁ ꦮꦶꦢꦶꦠ꧀ꦮꦴꦤ, ꦒꦶꦫꦶꦢꦸꦒ꧀ꦒꦩꦒꦴ ꦠꦠꦺꦴ.

꧖. ꦱꦺꦤꦶꦤ꧀ꦢꦺꦴ ꦏꦴꦗꦫꦒ꧀ꦒꦴꦩꦁ, ꦮꦶꦭꦸꦩ꧀ꦥꦶꦠ꧀ꦮꦴꦤ ꦮꦺꦒꦱꦴ;

ꦠꦠ꧀ꦡ ꦮꦠ꧀ꦡꦸꦩꦱꦏ꧀ꦏꦺꦴꦤ꧀ꦠꦺꦴ, ꦱꦢꦺꦱꦁ ꦥꦸꦤ ꦫꦴꦒꦩꦶ.

꧗. ꦠꦠꦺꦴ ꦩꦲꦴꦢꦶꦥꦴꦢꦺꦴ’ꦥꦶ, ꦄꦴꦒꦩ꧀ꦩ ꦩꦭꦪꦴ ꦭꦲꦸꦁ;

ꦩꦲꦠꦴ ꦧꦭꦏꦴꦪꦺꦤ, ꦱꦶꦥ꧀ꦥꦠ꧀ꦡꦭꦏꦩꦴꦮꦱꦶ.

꧘. ꦫꦴꦗꦴ ꦫꦴꦩꦚ꧀ꦚꦮꦶꦱꦪꦺ, ꦫꦴꦗꦶꦤꦺꦴ ꦱꦤ꧀ꦠꦶꦏꦁ ꦗꦤꦺ;

ꦥꦺꦱꦺꦱꦶ ꦧꦲꦸꦏꦺꦱꦴꦫꦁ, ꦣꦤꦗꦴꦠꦚ꧀ꦕ’ꦤꦥ꧀ꦥꦏꦁ.

꧙. ꦮꦶꦕꦶꦠ꧀ꦠꦮꦠ꧀ꦡꦏꦥ꧀ꦥꦹꦫ-ꦕꦤ꧀ꦢꦤꦴꦢꦷꦲꦶ ꦮꦠ꧀ꦡꦹꦲꦶ;

ꦥꦫꦶꦥꦸꦟ꧀ꦟꦴ ꦕ ꦤꦴꦮꦴꦪꦺꦴ, ꦤꦺꦏꦴꦠꦶꦠ꧀ꦡꦺ ꦱꦩꦺꦴꦱꦛꦴ.

꧑꧐. ꦣꦤꦗꦴ ꦠꦺꦲꦶ ꦤꦺꦏꦺꦲꦶ, ꦏꦫꦺꦴꦤ꧀ꦠꦺꦴ ꦨꦛꦱꦔ꧀ꦒꦲꦁ;

ꦠꦠꦺꦴ ꦠꦩ꧀ꦧꦭꦒꦴꦩꦩ꧀ꦲꦶ, ꦤꦶꦮꦱꦶꦠ꧀ꦡ ꦩꦲꦧ꧀ꦧꦭꦺꦴ.

꧑꧑. ꦄꦚ꧀ꦚꦩꦚ꧀ꦚꦮꦶꦫꦸꦢ꧀ꦣꦠ꧀ꦠꦴ, ꦫꦴꦗꦴꦫꦛ꧀ꦜꦴꦣꦶꦮꦴꦱꦶꦤꦺꦴ;

ꦈꦥꦒ꧀ꦒꦩ꧀ꦩ ꦗꦤꦴ ꦱꦧ꧀ꦧꦺ, ꦏꦫꦁ ꦤꦺꦴ ꦢꦺꦤ꧀ꦠꦶ ꦱꦧ꧀ꦧꦱꦺꦴ.

꧑꧒. ꦮꦶꦥꦏ꧀ꦑꦴꦕꦺꦴꦭ꦳ꦫꦴꦗꦱ꧀ꦱ, ꦨꦶꦤ꧀ꦢꦤ꧀ꦠꦴ’ꦟꦁ ꦩꦢꦸꦢ꧀ꦣꦠꦴ;

ꦄꦴꦪꦸꦠ꧀ꦠꦏꦺ ꦮꦶꦲꦶꦁꦱꦺꦤ꧀ꦠꦺꦴ, ꦪꦡꦴꦏꦴꦩꦁ ꦕꦫꦤ꧀ꦠꦶ ꦕ.

꧑꧓. ꦠꦁ ꦱꦸꦠ꧀ꦮꦴ ꦕꦺꦴꦭ꦳ꦨꦹꦥꦴꦭꦺꦴ, ꦱꦩ꧀ꦥꦏꦺꦴꦥꦮꦱꦷꦏꦠꦺꦴ;

ꦱꦺꦤꦁ ꦩꦲꦤ꧀ꦠꦶꦁ ꦢꦠ꧀ꦮꦴꦤ, ꦥꦺꦱꦺꦱꦶ ꦱꦕꦶꦮꦁ ꦤꦶꦗꦁ.

꧑꧔. ꦩꦲꦴꦠꦶꦠ꧀ꦡꦺ’ꦮꦲꦶꦟ꧀ꦟꦺꦴ ꦱꦺꦴ, ꦠꦠ꧀ꦡ ꦠꦠ꧀ꦡ ꦧꦲꦹꦗꦤꦺ;

ꦓꦴꦠꦺꦤ꧀ꦠꦺꦴ ꦱꦮꦱꦺ ꦏꦠ꧀ꦮꦴ, ꦫꦴꦗꦴꦫꦛ꧀ꦜꦴꦣꦶꦮꦴꦱꦶꦤꦺꦴ.

꧑꧕. ꦄꦤꦸꦏ꧀ꦏꦩꦺꦤ ꦒꦤ꧀ꦠ꧀ꦮꦴꦤ, ꦑꦫꦴꦟꦺꦴ ꦫꦺꦴꦲꦟꦁ ꦠꦢꦴ;

ꦄꦗ꧀ꦙꦺꦴꦠ꧀ꦡꦫꦶ ꦱꦱꦺꦤꦺꦴ ꦱ, ꦨꦶꦤ꧀ꦤꦺꦴ ꦮꦺꦭꦺꦴꦮꦱꦴꦒꦫꦺꦴ.

꧑꧖. ꦫꦚ꧀ꦚꦺꦴ ꦥꦕ꧀ꦕꦠ꧀ꦡꦶꦏꦴ ꦲꦸꦠ꧀ꦮꦴ, ꦫꦮꦶꦢꦺꦮꦕꦭꦮ꧀ꦲꦪꦴ;

ꦈꦨꦺꦴ ꦢꦩꦶꦭ꦳ꦱꦺꦤꦶꦤ꧀ꦢ-ꦮꦱꦁ ꦪꦴꦠꦴ ꦩꦲꦧ꧀ꦧꦭꦴ.

꧑꧗. ꦩꦲꦴꦥꦏ꧀ꦑꦧꦭꦺꦴꦥꦺꦠꦺ, ꦠꦺ ꦥꦱ꧀ꦱꦶꦪ ꦕꦩꦹꦥꦠꦶ;

ꦫꦺꦴꦲꦟꦁ ꦱꦏꦭꦁ ꦑꦶꦥ꧀ꦥꦁ, ꦩꦚ꧀ꦚꦶꦠ꧀ꦡ ꦱꦏꦲꦠ꧀ꦡꦒꦁ.

꧑꧘. ꦌꦏꦴꦢꦱꦩ꧀ꦲꦶ ꦱꦺꦴ ꦮꦱ꧀ꦱꦺ, ꦫꦴꦗꦴ ꦕꦺꦴꦭ꦳ꦴꦨꦶꦨꦹꦠꦶꦪꦴ;

ꦥꦭꦸꦛ꧀ꦜꦥꦧ꧀ꦧꦠꦺ ꦢꦸꦒ꧀ꦒꦁ, ꦥꦮꦶꦣꦴꦪ ꦠꦲꦶꦁ ꦮꦱꦷ.

꧑꧙. ꦕꦺꦴꦭ꦳ꦱꦺꦤꦴ ꦠꦢꦴꦱꦺꦭꦁ, ꦱꦩꦤ꧀ꦠꦴ ꦱꦩ꧀ꦥꦫꦶꦏ꧀ꦑꦶꦥꦶ;

ꦠꦠ꧀ꦡꦺꦴ’ꦨꦪꦺꦱꦁ ꦱꦺꦤꦴꦤ-ꦩꦲꦹ ꦨꦶꦁꦱꦤꦏꦁ ꦫꦟꦁ.

꧒꧐. ꦫꦚ꧀ꦚꦺꦴ ꦨꦛꦴ ꦮꦶꦤꦴꦱꦺꦠ꧀ꦮꦴ, ꦱꦧ꧀ꦧꦁ ꦠꦁ ꦢꦩꦶꦭ꦳ꦁ ꦧꦭꦁ;

ꦥꦭꦴꦪꦤ꧀ꦠꦁ ꦩꦲꦴꦕꦺꦴꦭ꦳-ꦱꦴꦩꦤ꧀ꦠꦚ꧀ꦕꦴꦤꦸꦧꦤ꧀ꦣꦶꦪ.

꧒꧑. ꦒꦲꦺꦠ꧀ꦮꦴꦤ ꦱꦶꦫꦁ ꦠꦱ꧀ꦱ, ꦒꦴꦩꦱ꧀ꦩꦶꦁ ꦠꦩ꧀ꦧꦮꦶꦛ꧀ꦜꦶꦏꦺ

ꦱꦢ꧀ꦣꦶꦁ ꦮꦴꦲꦤꦪꦴꦤꦺꦲꦶ, ꦱꦴꦫꦨꦹꦠꦣꦤꦺꦲꦶ ꦕ.

꧒꧒. ꦠꦲꦶꦁ ꦠꦁ ꦱꦏꦭꦁ ꦨꦟ꧀ꦝꦁ, ꦤꦺꦠ꧀ꦮꦴ ꦫꦚ꧀ꦚꦺꦴ ꦥꦢꦱ꧀ꦱꦶꦪ;

ꦥꦸꦭ꦳ꦠ꧀ꦡꦶꦤꦒꦫꦁ ꦒꦤ꧀ꦠꦸꦁ, ꦏꦴꦭꦺꦴ ꦆꦠꦶ ꦱꦩꦧ꧀ꦫꦮꦸꦁ.

꧒꧓. ꦩꦲꦷꦥꦴꦭꦺꦴꦥꦶ ꦠꦁ ꦱꦸꦠ꧀ꦮꦴ, ꦱꦕꦶꦮꦴꦤꦁ ꦮꦕꦺꦴ ꦠꦢꦴ;

ꦩꦲꦠꦴ ꦧꦭꦏꦴꦪꦺꦤ, ꦥꦸꦭꦠ꧀ꦡꦶꦤꦒꦫꦁ ꦒꦠꦺꦴ.

꧒꧔. ꦥꦮꦠ꧀ꦠꦶꦩꦺꦠꦁ ꦱꦏꦭꦁ, ꦱꦸꦠ꧀ꦮꦴ ꦕꦺꦴꦭ꦳ꦤꦫꦶꦱ꧀ꦱꦫꦺꦴ;

ꦠꦶꦧ꧀ꦧꦏꦺꦴꦥꦮꦱꦁꦪꦴꦠꦺꦴ, ꦨꦹꦥꦴꦭꦒꦲꦟꦠ꧀ꦡꦶꦏꦺꦴ.

꧒꧕. ꦱꦴꦩꦁ ꦑꦶꦥ꧀ꦥꦁ ꦱꦩꦴꦒꦩ꧀ꦩ, ꦮꦷꦫꦺꦴ ꦱꦴꦒꦫꦥꦛ꧀ꦛꦤꦁ;

ꦨꦶꦪ꧀ꦪꦺꦴꦥꦶ ꦩꦲꦠꦶꦁ ꦱꦺꦤꦁ, ꦭꦁꦏꦴꦢꦷꦥꦩꦥꦺꦱꦪꦷ.

꧒꧖. ꦠꦁ ꦮꦶꦗꦴꦤꦶꦪ ꦨꦹꦩꦶꦤ꧀ꦢꦺꦴ, ꦱꦺꦤꦶꦤ꧀ꦢꦁ ꦥꦺꦱꦪꦷ ꦱꦏꦁ;

ꦧꦭꦁ ꦩꦲꦤ꧀ꦠꦁ ꦢꦠ꧀ꦮꦴꦤ, ꦕꦺꦴꦭ꦳ꦱꦺꦤꦴꦪ ꦪꦸꦗ꧀ꦙꦶꦠꦸꦁ.

꧒꧗. ꦒꦕ꧀ꦖꦩꦴꦤꦺꦴ ꦕꦩꦹꦤꦴꦡꦺꦴ, ꦱꦺꦴ’ꦤꦸꦫꦴꦣꦥꦸꦫꦤ꧀ꦠꦶꦏꦺ;

ꦱꦢ꧀ꦣꦶꦁ ꦢꦩꦶꦭ꦳ꦱꦺꦤꦴꦪ, ꦮꦠ꧀ꦠꦺꦱꦶ ꦠꦸꦩꦸꦭꦁ ꦫꦟꦁ.

꧒꧘. ꦥꦠꦶꦁꦱꦸ ꦠꦱ꧀ꦩꦶꦁ ꦱꦔ꧀ꦒꦴꦩꦺ, ꦨꦹꦥꦴꦭꦱ꧀ꦱ ꦤꦫꦴ ꦧꦲꦹ;

ꦨꦶꦪ꧀ꦪꦺꦴꦥꦶ ꦢꦩꦶꦭ꦳ꦴꦪꦠ꧀ꦠꦴ, ꦗꦴꦠꦴ ꦠꦁ ꦫꦛ꧀ꦜꦮꦴꦱꦶꦤꦺꦴ.

꧒꧙. ꦮꦶꦲꦴꦪ ꦣꦫꦟꦷꦥꦴꦭꦺꦴ, ꦥꦸꦭꦠ꧀ꦡꦶꦤꦒꦫꦁ ꦠꦢꦴ;

ꦮꦶꦭ꧀ꦭꦶꦏꦴꦧꦴꦟꦏꦁ ꦫꦛ꧀ꦜꦁ, ꦱꦩ꧀ꦥꦴꦥꦸꦟꦶꦪ ꦮꦺꦒꦱꦴ.

꧓꧐. ꦤꦶꦲꦕ꧀ꦕꦴꦩꦕ꧀ꦕꦪꦸꦒꦭꦁ, ꦠꦁ ꦫꦛ꧀ꦜꦴꦣꦶꦛ꧀ꦜꦶꦠꦁ ꦠꦢꦴ;

ꦠꦲꦶꦁ ꦮꦴꦱꦩꦏꦥ꧀ꦥꦺꦱꦶ, ꦱꦨꦛꦺ ꦱꦤ꧀ꦤꦶꦥꦴꦠꦪꦁ.

꧓꧑. ꦄꦠ꧀ꦠꦴꦤꦩꦤꦸꦧꦤ꧀ꦣꦤ꧀ꦠꦁ, ꦱꦸꦠ꧀ꦮꦴ ꦕꦺꦴꦭ꦳ꦕꦩꦹꦥꦠꦶꦁ;

ꦒꦤ꧀ꦠ꧀ꦮꦴ ꦮꦴꦠꦒꦶꦫꦶꦁ ꦤꦴꦩ, ꦱꦩꦪꦚ꧀ꦚꦹ ꦱꦶꦭꦸꦕ꧀ꦕꦪꦁ.

꧓꧒. ꦈꦥꦕ꧀ꦕꦏꦴꦪ ꦱꦺꦭꦱ꧀ꦱ, ꦠꦠ꧀ꦡ ꦢꦸꦒ꧀ꦒꦁ ꦤꦶꦮꦺꦱꦶꦪ;

ꦫꦟꦁ ꦏꦫꦺꦴꦤ꧀ꦠꦺꦴ ꦠꦺꦩꦴꦱꦁ, ꦢꦩꦶꦭ꦳ꦺ ꦥꦛꦶꦧꦴꦲꦪꦶ.

꧓꧓. ꦏꦺꦱꦣꦴꦠꦸꦏꦤꦴꦡꦱ꧀ꦱ, ꦩꦴꦫꦶꦠꦱ꧀ꦱ ꦥꦸꦫꦴꦫꦟꦺ;

ꦨꦴꦠꦴ ꦏꦟꦶꦛ꧀ꦜꦺꦴ ꦱꦩ꧀ꦥꦠ꧀ꦠ, ꦩꦲꦴꦥꦏ꧀ꦑꦧꦭꦺꦴ ꦠꦢꦴ.

꧓꧔. ꦩꦴꦫꦟꦁ ꦱꦏꦨꦴꦠꦸꦱ꧀ꦱ, ꦱꦫꦤ꧀ꦠꦺꦴ ꦫꦸꦛ꧀ꦜꦩꦴꦤꦱꦺꦴ;

ꦱꦏꦭꦁ ꦥꦫꦶꦮꦠ꧀ꦠꦺꦱꦶ, ꦒꦸꦠ꧀ꦠꦲꦴꦭꦏꦩꦟ꧀ꦝꦭꦁ.

꧓꧕. ꦄꦡꦺꦴ ꦭꦁꦏꦶꦱ꧀ꦱꦫꦺꦴ ꦠꦠ꧀ꦡ, ꦑꦶꦥ꧀ꦥꦁ ꦒꦤ꧀ꦠ꧀ꦮꦴ ꦩꦲꦧ꧀ꦧꦭꦺꦴ;

ꦜꦴꦤꦺ ꦩꦕ꧀ꦕꦸꦠ꧀ꦡꦭꦺ ꦤꦴꦩ, ꦑꦤ꧀ꦣꦴꦮꦴꦫꦁ ꦤꦶꦧꦤ꧀ꦣꦶꦪ.

꧓꧖. ꦑꦢꦶꦫꦔ꧀ꦒꦟꦶꦢꦸꦒ꧀ꦒꦩ꧀ꦲꦴ, ꦥꦭꦴꦥꦺꦠ꧀ꦮꦴꦤ ꦠꦁ ꦫꦟꦺ;

ꦜꦴꦤꦴ ꦏꦸꦧꦸꦭꦒꦭ꧀ꦭꦴ ꦕ, ꦪꦸꦗ꧀ꦙꦤ꧀ꦠꦺꦴ ꦠꦁ ꦥꦭꦴꦥꦪꦶ.

꧓꧗. ꦮꦶꦲꦴꦪ ꦥꦸꦠ꧀ꦠꦢꦴꦫꦴꦢꦶ-ꦱꦧ꧀ꦧꦁ ꦤꦺꦏꦣꦤꦁ ꦧꦭꦁ;

ꦥꦭꦴꦪꦩꦴꦤꦺꦴ ꦱꦺꦴ ꦫꦛ꧀ꦜꦁ, ꦕꦺꦴꦭ꦳ꦴꦪꦠ꧀ꦠ ꦩꦒꦴꦭꦲꦸꦁ.

꧓꧘. ꦠꦢꦴ ꦤꦫꦶꦱ꧀ꦱꦫꦺꦴ ꦠꦠ, ꦠꦱ꧀ꦱ ꦱꦧ꧀ꦧꦁ ꦱꦩꦴꦢꦶꦪ;

ꦒꦤ꧀ꦠ꧀ꦮꦴ ꦠꦩ꧀ꦧꦭꦒꦴꦩꦩ꧀ꦲꦶ, ꦤꦮꦁ ꦢꦸꦒ꧀ꦒꦁ ꦤꦶꦮꦺꦱꦶꦪ.

꧓꧙. ꦄꦤꦸꦏ꧀ꦏꦩꦺꦤ ꦒꦤ꧀ꦠ꧀ꦮꦴꦤ, ꦩꦲꦴꦤꦴꦒꦲꦸꦭꦮ꧀ꦲꦪꦺ;

ꦥꦸꦫꦺꦮꦱꦷ ꦱꦸꦱꦗ꧀ꦗꦺꦤ꧀ꦠꦺꦴ, ꦧꦭꦁ ꦕꦺꦴꦭ꦳ꦺꦲꦶ ꦪꦸꦗ꧀ꦙꦶꦠꦸꦁ.

꧔꧐. ꦠꦠꦺꦴ ꦫꦴꦗꦴ ꦱꦩꦮ꧀ꦲꦴꦪ, ꦱꦕꦷꦮꦺ ꦢ꧀ꦮꦺ ꦩꦲꦧ꧀ꦧꦭꦺ;

ꦥꦺꦱꦺꦱꦶ ꦢꦶꦏ꧀ꦑꦶꦟꦁ ꦥꦱ꧀ꦱꦁ, ꦮꦱꦁ ꦤꦺꦠꦸꦁ ꦠꦲꦶꦁ ꦗꦤꦺ.

꧔꧑. ꦱꦩ꧀ꦥꦺꦱꦺꦱꦶ ꦩꦲꦴꦩꦕ꧀ꦕ-ꦪꦸꦒꦭꦁ ꦏꦏ꧀ꦑꦭꦁ ꦮꦶꦨꦹ;

ꦕꦺꦴꦭ꦳ꦢꦥ꧀ꦥꦮꦶꦤꦴꦱꦴꦪ, ꦠꦠꦺꦴ ꦮꦺꦭꦴ ꦩꦲꦴꦥꦡꦺ.

꧔꧒. ꦥꦺꦱꦶꦠꦴ ꦢꦏ꧀ꦑꦶꦟꦁ ꦥꦱ꧀ꦱꦁ, ꦄꦩꦕ꧀ꦕꦴ’ꦩꦺ ꦩꦲꦧ꧀ꦧꦭꦴ;

ꦩꦸꦲꦸꦤ꧀ꦤꦫꦸꦒ꧀ꦒꦩꦢꦸꦒ꧀ꦒꦁ, ꦧꦢꦭ꦳ꦠ꧀ꦡꦭꦩꦺꦮ ꦕ.

꧔꧓. ꦮꦴꦥꦷꦤꦒꦫꦢꦸꦒ꧀ꦒꦚ꧀ꦕ, ꦧꦸꦢ꧀ꦣꦒꦴꦩꦏꦩꦺꦮ ꦕ;

ꦠꦶꦭꦒꦸꦭ꧀ꦭꦁ ꦩꦲꦴꦒꦭ꧀ꦭꦁ, ꦩꦟ꧀ꦝꦒꦭ꧀ꦭꦏꦩꦺꦮ ꦕ.

꧔꧔. ꦄꦤꦸꦫꦴꦣꦥꦸꦫꦚ꧀ꦕꦴꦠꦶ, ꦒꦲꦺꦠ꧀ꦮꦴꦤ ꦏꦩꦺꦤ ꦠꦺ;

ꦮꦠ꧀ꦠꦺꦤ꧀ꦠꦴ ꦱꦮꦱꦺ ꦫꦛ꧀ꦜꦁ, ꦩꦲꦴꦠꦶꦠ꧀ꦡꦩꦸꦥꦴꦒꦠꦴ.

꧔꧕. ꦥꦺꦱꦶꦠꦴ ꦱꦕꦶꦮꦴꦢ꧀ꦮꦺꦠꦸ, ꦠꦠꦺꦴ ꦮꦺꦭꦴ ꦩꦲꦴꦥꦡꦺ;

ꦮꦶꦭꦸꦩ꧀ꦥꦤ꧀ꦠꦴ ꦖꦒꦴꦩꦴꦢꦶ-ꦑꦤ꧀ꦣꦴꦮꦴꦫꦺ ꦠꦲꦶꦁ ꦠꦲꦶꦁ.

꧔꧖. ꦥꦸꦭꦠ꧀ꦡꦶꦤꦒꦫꦴꦱꦤ꧀ꦤꦁ, ꦏꦩꦺꦤꦴ’ꦒꦩ꧀ꦩ ꦥꦺꦱꦪꦸꦁ;

ꦢꦹꦠꦺ ꦫꦴꦗꦤ꧀ꦠꦶꦏꦑꦶꦥ꧀ꦥ-ꦩꦴꦒꦤ꧀ꦠꦸꦁ ꦮꦛ꧀ꦛꦠꦷꦠꦶꦲ.

꧔꧗. ꦢꦶꦱꦴꦱꦴ ꦢ꧀ꦮꦷꦱꦸ ꦪꦴꦤꦺꦲꦶ, ꦱꦕꦶꦮꦺꦲꦶ ꦥꦮꦠ꧀ꦠꦶꦠꦁ;

ꦮꦶꦏ꧀ꦏꦩꦴꦠꦶ ꦱꦪꦁ ꦱꦸꦠ꧀ꦮꦴ, ꦏꦴꦭꦚ꧀ꦚꦹ ꦱꦺꦴ ꦩꦲꦷꦥꦲꦶ.

꧔꧘. ꦱꦷꦓꦁ ꦱꦤ꧀ꦤꦪ꧀ꦲ ꦱꦺꦤꦔ꧀ꦒꦁ, ꦱꦩꦒ꧀ꦒꦁ ꦮꦶꦢꦶꦏꦺꦴꦮꦶꦢꦺꦴ;

ꦈꦩ꧀ꦩꦹꦭꦤꦴꦪꦕꦺꦴꦭ꦳ꦴꦤꦁ, ꦥꦸꦫꦴꦠꦩ꧀ꦲꦴ’ꦨꦶꦤꦶꦏ꧀ꦑꦩꦶ.

꧔꧙. ꦒꦕ꧀ꦖꦁ ꦒꦔ꧀ꦒꦴꦪ ꦩꦲꦶꦪ-ꦔ꧀ꦒꦟꦡꦹꦥꦤ꧀ꦠꦶꦏꦺ ꦮꦶꦨꦹ;

ꦱꦺꦤꦴꦤꦶꦮꦺꦱꦁ ꦏꦴꦫꦺꦠ꧀ꦮꦴ ꦏꦚ꧀ꦕꦶꦏꦴꦭꦁ ꦠꦲꦶꦁ ꦮꦱꦷ.

꧕꧐. ꦏꦩꦺꦤꦴꦒꦩ꧀ꦩ ꦜꦴꦤꦚ꧀ꦚꦹ, ꦥꦸꦭ꦳ꦠ꧀ꦡꦶꦤꦒꦫꦤ꧀ꦠꦶꦏꦺ;

ꦧꦤ꧀ꦣꦴꦥꦺꦱꦶ ꦩꦲꦴꦮꦷꦫꦺꦴ, ꦑꦤ꧀ꦣꦴꦮꦴꦫꦁ ꦡꦶꦫꦁ ꦮꦫꦁ.

꧕꧑. ꦠꦠ꧀ꦡ ꦠꦠ꧀ꦡ ꦜꦶꦠꦴ ꦱꦹꦫꦴ, ꦕꦺꦴꦭ꦳ꦴ ꦪꦺ ꦏꦏ꧀ꦑꦭꦴ’ꦑꦶꦭꦴ;

ꦥꦸꦭꦠ꧀ꦡꦶꦤꦒꦫꦺ ꦪꦸꦢ꧀ꦣꦁ, ꦏꦴꦠꦸꦁ ꦱꦤ꧀ꦤꦶꦥꦠꦶꦁꦱꦸ ꦠꦺ.

꧕꧒. ꦤꦶꦏ꧀ꦑꦩ꧀ꦩ ꦤꦒꦫꦴ ꦒꦤ꧀ꦠ꧀ꦮꦴ, ꦕꦺꦴꦭ꦳ꦴ ꦧꦲꦶ ꦩꦲꦴꦫꦟꦁ;

ꦏꦠ꧀ꦮꦴ ꦥꦫꦴꦗꦶꦠꦴ ꦨꦷꦠꦴ, ꦥꦮꦶꦱ꧀ꦱ ꦤꦒꦫꦁ ꦱꦏꦁ.

꧕꧓. ꦒꦸꦠ꧀ꦠꦴ ꦱꦺꦱꦥꦸꦫꦢ꧀ꦮꦴꦫꦴ, ꦒꦺꦴꦥꦸꦫꦛ꧀ꦛꦴꦭꦤꦶꦱ꧀ꦱꦶꦠꦴ;

ꦩꦲꦴꦲꦮꦁ ꦧꦲꦸꦱ꧀ꦱꦴꦲꦴ, ꦥꦮꦠ꧀ꦠꦺꦱꦸꦁ ꦨꦪꦴꦮꦲꦁ.

꧕꧔. ꦢꦶꦪꦝ꧀ꦞꦩꦴꦱꦁ ꦪꦸꦗ꧀ꦙꦤ꧀ꦠꦶ, ꦤꦒꦫꦁ ꦠꦩꦸꦥꦫꦸꦤ꧀ꦣꦶꦪ;

ꦱꦴꦣꦺꦠꦸꦁ ꦤꦺꦮꦱꦴ’ꦱꦏ꧀ꦑꦶ, ꦨꦹꦥꦴꦭꦱ꧀ꦱ ꦩꦲꦴꦕꦩꦹ.

꧕꧕. ꦩꦲꦴꦫꦚ꧀ꦚꦺꦴ ꦩꦲꦴꦮꦷꦫꦴ, ꦩꦲꦴꦱꦹꦫꦴ ꦩꦲꦧ꧀ꦧꦭꦴ;

ꦩꦲꦴꦨꦛꦴ ꦩꦲꦴꦩꦴꦤꦴ, ꦫꦮꦶꦢꦺꦮꦕꦭꦴꦢꦪꦺꦴ.

꧕꧖. ꦈꦭ꧀ꦭꦔ꧀ꦓꦶꦠ꧀ꦮꦴꦤ ꦥꦴꦏꦴꦫꦁ, ꦥꦮꦶꦱ꧀ꦱ ꦱꦲꦱꦴ ꦥꦸꦫꦁ;

ꦑꦟꦺꦤ ꦢꦩꦶꦭ꦳ꦺ ꦱꦧ꧀ꦧꦺ, ꦩꦹꦭꦓꦕ꧀ꦕꦩꦓꦴꦠꦪꦸꦁ.

꧕꧗. ꦌꦮꦁ ꦭꦢ꧀ꦣꦗꦪꦺꦴ ꦫꦴꦗꦴ, ꦠꦢꦴ ꦮꦶꦗꦪꦧꦴꦲꦸꦱꦺꦴ;

ꦕꦫꦴꦥꦺꦱꦶ ꦤꦶꦗꦴꦟꦴꦪ, ꦨꦺꦫꦶꦁ ꦨꦹꦫꦶꦩꦠꦶꦥꦸꦫꦺ.

꧕꧘. ꦠꦁ ꦱꦸꦠ꧀ꦮꦴ ꦱꦏꦱꦺꦤꦴꦪ, ꦮꦶꦤꦴꦱꦁ ꦕꦺꦴꦭ꦳ꦨꦹꦥꦠꦶ;

ꦱꦷꦲꦭ꦳ꦴ ꦧꦭꦮꦤ꧀ꦠꦺꦴꦠꦶ, ꦨꦶꦪ꧀ꦪꦺꦴ ꦱꦺꦤꦁ ꦤ ꦥꦴꦲꦶꦟꦶ.

꧕꧙. ꦮꦷꦫꦺꦴ ꦄꦱꦺꦱꦤꦶꦲꦠꦸꦢ꧀ꦣꦛ ꦕꦺꦴꦭ꦳ꦱꦺꦛ꧀ꦜꦺꦴ;

ꦮꦶꦚ꧀ꦚꦹ ꦱꦸꦱꦴꦣꦸꦛ꧀ꦜꦥꦶꦠꦴꦑꦶꦭꦫꦴꦗꦫꦛ꧀ꦜꦺꦴ;

ꦆꦛ꧀ꦜꦤ꧀ꦤꦸꦫꦴꦣꦥꦸꦫꦱꦺꦛ꧀ꦜꦩꦠꦷꦮ ꦲꦛ꧀ꦜꦺꦴ;

ꦮꦱ꧀ꦱꦩ꧀ꦲꦶ ꦥꦚ꧀ꦕꦢꦱꦩꦺ ꦒꦩꦶ ꦫꦴꦗꦱꦺꦛ꧀ꦜꦺꦴ.

ꦱꦸꦗꦤꦥ꧀ꦥꦱꦴꦢꦱꦁꦮꦺꦒꦠ꧀ꦡꦴꦪ ꦏꦠꦺ ꦩꦲꦴꦮꦁꦱꦺ

ꦄꦤꦸꦫꦴꦣꦥꦸꦫꦴꦨꦶꦒꦩꦤꦺꦴ ꦤꦴꦩ

ꦖꦥ꧀ꦥꦚ꧀ꦚꦴꦱꦠꦶꦩꦺꦴ ꦥꦫꦶꦕ꧀ꦖꦺꦢꦺꦴ