꧗. ꦭꦺꦴꦏꦴꦪꦠꦶꦏꦱꦸꦠ꧀ꦠꦁ

꧓꧘. ꦄꦡ ꦑꦺꦴ ꦢ꧀ꦮꦺ ꦭꦺꦴꦏꦴꦪꦠꦶꦏꦴ ꦧ꧀ꦫꦴꦲ꧀ꦩꦟꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦠꦴ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁꦱꦸ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦧ꧀ꦫꦴꦲ꧀ꦩꦟꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ –

‘‘ꦥꦹꦫꦟꦺꦴ, ꦨꦺꦴ ꦒꦺꦴꦠꦩ, ꦏꦱ꧀ꦱꦥꦺꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ – ‘ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ. ꦱꦺꦴ ꦌꦮꦩꦴꦲ – ‘ꦄꦲꦁ ꦄꦤꦤ꧀ꦠꦺꦤ ꦚꦴꦟꦺꦤ ꦄꦤꦤ꧀ꦠꦁ ꦭꦺꦴꦏꦁ ꦗꦴꦤꦁ ꦥꦱ꧀ꦱꦁ ꦮꦶꦲꦫꦴꦩꦷ’ꦠꦶ. ꦄꦪꦩ꧀ꦥꦶ [ꦄꦪꦩ꧀ꦥꦶ ꦲꦶ (ꦱ꧀ꦪꦴ. ꦏ.)], ꦨꦺꦴ ꦒꦺꦴꦠꦩ, ꦤꦶꦒꦟ꧀ꦜꦺꦴ ꦤꦴꦛꦥꦸꦠ꧀ꦠꦺꦴ ꦱꦧ꧀ꦧꦚ꧀ꦚꦹ ꦱꦧ꧀ꦧꦢꦱ꧀ꦱꦴꦮꦷ ꦄꦥꦫꦶꦱꦺꦱꦁ ꦚꦴꦟꦢꦱ꧀ꦱꦤꦁ ꦥꦛꦶꦗꦴꦤꦴꦠꦶ – ‘ꦕꦫꦠꦺꦴ ꦕ ꦩꦺ ꦠꦶꦛ꧀ꦜꦠꦺꦴ ꦕ ꦱꦸꦠ꧀ꦠꦱ꧀ꦱ ꦕ ꦗꦴꦒꦫꦱ꧀ꦱ ꦕ ꦱꦠꦠꦁ ꦱꦩꦶꦠꦁ ꦚꦴꦟꦢꦱ꧀ꦱꦤꦁ ꦥꦕ꧀ꦕꦸꦥꦛ꧀ꦜꦶꦠ’ꦤ꧀ꦠꦶ. ꦱꦺꦴ [ꦱꦺꦴꦥꦶ (?)] ꦌꦮꦩꦴꦲ – ‘ꦄꦲꦁ ꦄꦤꦤ꧀ꦠꦺꦤ ꦚꦴꦟꦺꦤ ꦄꦤꦤ꧀ꦠꦁ ꦭꦺꦴꦏꦁ ꦗꦴꦤꦁ ꦥꦱ꧀ꦱꦁ ꦮꦶꦲꦫꦴꦩꦷ’ꦠꦶ. ꦆꦩꦺꦱꦁ, ꦨꦺꦴ ꦒꦺꦴꦠꦩ, ꦈꦨꦶꦤ꧀ꦤꦁ ꦚꦴꦟꦮꦴꦢꦴꦤꦁ ꦈꦨꦶꦤ꧀ꦤꦁ ꦄꦚ꧀ꦚꦩꦚ꧀ꦚꦁ ꦮꦶꦥꦕ꧀ꦕꦤꦷꦏꦮꦴꦢꦴꦤꦁ ꦏꦺꦴ ꦱꦕ꧀ꦕꦁ ꦄꦴꦲ ꦏꦺꦴ ꦩꦸꦱꦴ’’ꦠꦶ?

‘‘ꦄꦭꦁ, ꦧ꧀ꦫꦴꦲ꧀ꦩꦟꦴ! ꦠꦶꦛ꧀ꦜꦠꦺꦠꦁ – ‘ꦆꦩꦺꦱꦁ ꦈꦨꦶꦤ꧀ꦤꦁ ꦚꦴꦟꦮꦴꦢꦴꦤꦁ ꦈꦨꦶꦤ꧀ꦤꦁ ꦄꦚ꧀ꦚꦩꦚ꧀ꦚꦁ ꦮꦶꦥꦕ꧀ꦕꦤꦷꦏꦮꦴꦢꦴꦤꦁ ꦏꦺꦴ ꦱꦕ꧀ꦕꦁ ꦄꦴꦲ ꦏꦺꦴ ꦩꦸꦱꦴ’ꦠꦶ. ꦣꦩ꧀ꦩꦁ ꦮꦺꦴ, ꦧ꧀ꦫꦴꦲ꧀ꦩꦟꦴ, ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ; ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦺꦴ’’ꦠꦶ ꦑꦺꦴ ꦠꦺ ꦧ꧀ꦫꦴꦲ꧀ꦩꦟꦴ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ –

‘‘ꦱꦺꦪ꧀ꦪꦡꦴꦥꦶ, ꦧ꧀ꦫꦴꦲ꧀ꦩꦟꦴ, ꦕꦠ꧀ꦠꦴꦫꦺꦴ ꦥꦸꦫꦶꦱꦴ ꦕꦠꦸꦢ꧀ꦢꦶꦱꦴ ꦜꦶꦠꦴ ꦥꦫꦩꦺꦤ ꦗꦮꦺꦤ ꦕ ꦱꦩꦤ꧀ꦤꦴꦒꦠꦴ ꦥꦫꦩꦺꦤ ꦕ ꦥꦢꦮꦷꦠꦶꦲꦴꦫꦺꦤ. ꦠꦺ ꦌꦮꦫꦹꦥꦺꦤ ꦗꦮꦺꦤ ꦱꦩꦤ꧀ꦤꦴꦒꦠꦴ ꦄꦱ꧀ꦱꦸ, ꦱꦺꦪ꧀ꦪꦡꦴꦥꦶ ꦤꦴꦩ ꦢꦭ꦳꧀ꦲꦣꦩ꧀ꦩꦴ [ꦢꦭ꦳꧀ꦲꦣꦩ꧀ꦩꦺꦴ (ꦱꦧ꧀ꦧꦠ꧀ꦡ) ꦄ. ꦤꦶ. ꧔.꧔꧕; ꦩ. ꦤꦶ. ꧑.꧑꧑꧖ ꦕ, ꦠꦁꦱꦁꦮꦟ꧀ꦟꦤꦴꦛꦷꦏꦴꦪꦺꦴ ꦕ ꦩꦺꦴꦒ꧀ꦒꦭ꧀ꦭꦴꦤꦧ꧀ꦪꦴꦏꦫꦟꦚ꧀ꦕ ꦎꦭꦺꦴꦏꦺꦠꦧ꧀ꦧꦴ] ꦣꦤꦸꦒ꧀ꦒꦲꦺꦴ ꦱꦶꦏ꧀ꦑꦶꦠꦺꦴ ꦏꦠꦲꦠ꧀ꦡꦺꦴ ꦏꦠꦹꦥꦴꦱꦤꦺꦴ ꦭꦲꦸꦏꦺꦤ ꦄꦱꦤꦺꦤ ꦄꦥ꧀ꦥꦏꦱꦶꦫꦺꦤ ꦠꦶꦫꦶꦪꦁ ꦠꦴꦭꦕ꧀ꦖꦴꦪꦁ [ꦠꦴꦭꦕ꧀ꦖꦴꦠꦶꦁ (ꦱꦷ. ꦱ꧀ꦪꦴ. ꦥꦷ.), ꦠꦴꦭꦕ꧀ꦖꦴꦢꦶꦁ (ꦏ.) ꦄ. ꦤꦶ. ꧔.꧔꧕; ꦩ. ꦤꦶ. ꧑.꧑꧖꧑ ꦥꦱ꧀ꦱꦶꦠꦧ꧀ꦧꦁ] ꦄꦠꦶꦥꦴꦠꦺꦪ꧀ꦪ; ꦌꦮꦫꦹꦥꦺꦤ ꦕ ꦥꦢꦮꦷꦠꦶꦲꦴꦫꦺꦤ, ꦱꦺꦪ꧀ꦪꦡꦴꦥꦶ ꦤꦴꦩ ꦥꦸꦫꦠ꧀ꦡꦶꦩꦴ ꦱꦩꦸꦢ꧀ꦢꦴ ꦥꦕ꧀ꦖꦶꦩꦺꦴ ꦱꦩꦸꦢ꧀ꦢꦺꦴ ꦄꦡ ꦥꦸꦫꦠ꧀ꦡꦶꦩꦴꦪ ꦢꦶꦱꦴꦪ ꦜꦶꦠꦺꦴ ꦥꦸꦫꦶꦱꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦒꦩꦤꦺꦤ ꦭꦺꦴꦏꦱ꧀ꦱ ꦄꦤ꧀ꦠꦁ ꦥꦴꦥꦸꦟꦶꦱ꧀ꦱꦴꦩꦷ’ꦠꦶ. ꦱꦺꦴ ꦄꦚ꧀ꦚꦠ꧀ꦫꦺꦮ ꦄꦱꦶꦠꦥꦷꦠꦑꦴꦪꦶꦠꦱꦴꦪꦶꦠꦴ ꦄꦚ꧀ꦚꦠ꧀ꦫ ꦈꦕ꧀ꦕꦴꦫꦥꦱ꧀ꦱꦴꦮꦏꦩ꧀ꦩꦴ ꦄꦚ꧀ꦚꦠ꧀ꦫ ꦤꦶꦢ꧀ꦢꦴꦏꦶꦭꦩꦡꦥꦛꦶꦮꦶꦤꦺꦴꦢꦤꦴ ꦮꦱ꧀ꦱꦱꦠꦴꦪꦸꦏꦺꦴ ꦮꦱ꧀ꦱꦱꦠꦗꦷꦮꦷ ꦮꦱ꧀ꦱꦱꦠꦁ ꦒꦤ꧀ꦠ꧀ꦮꦴ ꦄꦥ꧀ꦥꦠ꧀ꦮꦴꦮ ꦭꦺꦴꦏꦱ꧀ꦱ ꦄꦤ꧀ꦠꦁ ꦄꦤ꧀ꦠꦫꦴ ꦏꦴꦭꦁ ꦏꦫꦺꦪ꧀ꦪ. ꦄꦡ ꦥꦕ꧀ꦖꦶꦩꦴꦪ ꦢꦶꦱꦴꦪ…ꦥꦺ… ꦄꦡ ꦈꦠ꧀ꦠꦫꦴꦪ ꦢꦶꦱꦴꦪ… ꦄꦡ ꦢꦏ꧀ꦑꦶꦟꦴꦪ ꦢꦶꦱꦴꦪ ꦜꦶꦠꦺꦴ ꦥꦸꦫꦶꦱꦺꦴ ꦌꦮꦁ ꦮꦢꦺꦪ꧀ꦪ – ‘ꦄꦲꦁ ꦒꦩꦤꦺꦤ ꦭꦺꦴꦏꦱ꧀ꦱ ꦄꦤ꧀ꦠꦁ ꦥꦴꦥꦸꦟꦶꦱ꧀ꦱꦴꦩꦷ’ꦠꦶ. ꦱꦺꦴ ꦄꦚ꧀ꦚꦠ꧀ꦫꦺꦮ ꦄꦱꦶꦠꦥꦷꦠꦑꦴꦪꦶꦠꦱꦴꦪꦶꦠꦴ ꦄꦚ꧀ꦚꦠ꧀ꦫ ꦈꦕ꧀ꦕꦴꦫꦥꦱ꧀ꦱꦴꦮꦏꦩ꧀ꦩꦴ ꦄꦚ꧀ꦚꦠ꧀ꦫ ꦤꦶꦢ꧀ꦢꦴꦏꦶꦭꦩꦡꦥꦛꦶꦮꦶꦤꦺꦴꦢꦤꦴ ꦮꦱ꧀ꦱꦱꦠꦴꦪꦸꦏꦺꦴ ꦮꦱ꧀ꦱꦱꦠꦗꦷꦮꦷ ꦮꦱ꧀ꦱꦱꦠꦁ ꦒꦤ꧀ꦠ꧀ꦮꦴ ꦄꦥ꧀ꦥꦠ꧀ꦮꦴꦮ ꦭꦺꦴꦏꦱ꧀ꦱ ꦄꦤ꧀ꦠꦁ ꦄꦤ꧀ꦠꦫꦴ ꦏꦴꦭꦁ ꦏꦫꦺꦪ꧀ꦪ. ꦠꦁ ꦏꦶꦱ꧀ꦱ ꦲꦺꦠꦸ? ꦤꦴꦲꦁ, ꦧ꧀ꦫꦴꦲ꧀ꦩꦟꦴ, ꦌꦮꦫꦹꦥꦴꦪ ꦱꦤ꧀ꦣꦴꦮꦤꦶꦏꦴꦪ ꦭꦺꦴꦏꦱ꧀ꦱ ꦄꦤ꧀ꦠꦁ ꦚꦴꦠꦺꦪ꧀ꦪꦁ ꦢꦛ꧀ꦜꦺꦪ꧀ꦪꦁ ꦥꦠ꧀ꦠꦺꦪ꧀ꦪꦤ꧀ꦠꦶ ꦮꦢꦴꦩꦶ. ꦤ ꦕꦴꦲꦁ, ꦧ꧀ꦫꦴꦲ꧀ꦩꦟꦴ, ꦄꦥ꧀ꦥꦠ꧀ꦮꦴꦮ ꦭꦺꦴꦏꦱ꧀ꦱ ꦄꦤ꧀ꦠꦁ ꦢꦸꦏ꧀ꦑꦱ꧀ꦱ ꦄꦤ꧀ꦠꦏꦶꦫꦶꦪꦁ ꦮꦢꦴꦩꦶ.

‘‘ꦥꦚ꧀ꦕꦶꦩꦺ, ꦧ꧀ꦫꦴꦲ꧀ꦩꦟꦴ, ꦏꦴꦩꦒꦸꦟꦴ ꦄꦫꦶꦪꦱ꧀ꦱ ꦮꦶꦤꦪꦺ ꦭꦺꦴꦏꦺꦴꦠꦶ ꦮꦸꦕ꧀ꦕꦠꦶ. ꦏꦠꦩꦺ ꦥꦚ꧀ꦕ? ꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦴ ꦫꦹꦥꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ; ꦱꦺꦴꦠꦮꦶꦚ꧀ꦚꦺꦪ꧀ꦪꦴ ꦱꦢ꧀ꦢꦴ…ꦥꦺ… ꦓꦴꦤꦮꦶꦚ꧀ꦚꦺꦪ꧀ꦪꦴ ꦒꦤ꧀ꦣꦴ… ꦗꦶꦮ꧀ꦲꦴꦮꦶꦚ꧀ꦚꦺꦪ꧀ꦪꦴ ꦫꦱꦴ… ꦏꦴꦪꦮꦶꦚ꧀ꦚꦺꦪ꧀ꦪꦴ ꦦꦺꦴꦛ꧀ꦜꦧ꧀ꦧꦴ ꦆꦛ꧀ꦜꦴ ꦏꦤ꧀ꦠꦴ ꦩꦤꦴꦥꦴ ꦥꦶꦪꦫꦹꦥꦴ ꦏꦴꦩꦹꦥꦱꦁꦲꦶꦠꦴ ꦫꦗꦤꦷꦪꦴ; ꦆꦩꦺ ꦑꦺꦴ, ꦧ꧀ꦫꦴꦲ꧀ꦩꦟꦴ, ꦥꦚ꧀ꦕ ꦏꦴꦩꦒꦸꦟꦴ ꦄꦫꦶꦪꦱ꧀ꦱ ꦮꦶꦤꦪꦺ ꦭꦺꦴꦏꦺꦴꦠꦶ ꦮꦸꦕ꧀ꦕꦠꦶ.

‘‘ꦆꦣ, ꦧ꧀ꦫꦴꦲ꧀ꦩꦟꦴ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ ꦮꦶꦮꦶꦕ꧀ꦕ ꦄꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦱꦮꦶꦠꦏ꧀ꦏꦁ ꦱꦮꦶꦕꦴꦫꦁ ꦮꦶꦮꦺꦏꦗꦁ ꦥꦷꦠꦶꦱꦸꦑꦁ ꦥꦜꦩꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦧ꧀ꦫꦴꦲ꧀ꦩꦟꦴ, ‘ꦨꦶꦏ꧀ꦑꦸ ꦭꦺꦴꦏꦱ꧀ꦱ ꦄꦤ꧀ꦠꦩꦴꦒꦩ꧀ꦩ, ꦭꦺꦴꦏꦱ꧀ꦱ ꦄꦤ꧀ꦠꦺ ꦮꦶꦲꦫꦠꦶ’. ꦠꦩꦚ꧀ꦚꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’ꦠꦶ. ꦄꦲꦩ꧀ꦥꦶ ꦲꦶ [ꦄꦲꦩ꧀ꦥꦶ (ꦱꦷ. ꦥꦷ.)], ꦧ꧀ꦫꦴꦲ꧀ꦩꦟꦴ, ꦌꦮꦁ ꦮꦢꦴꦩꦶ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’’’ꦠꦶ.

‘‘ꦥꦸꦤ ꦕꦥꦫꦁ, ꦧ꧀ꦫꦴꦲ꧀ꦩꦟꦴ, ꦨꦶꦏ꧀ꦑꦸ ꦮꦶꦠꦏ꧀ꦏꦮꦶꦕꦴꦫꦴꦤꦁ ꦮꦹꦥꦱꦩꦴ…ꦥꦺ… ꦢꦸꦠꦶꦪꦁ ꦙꦴꦤꦁ… ꦠꦠꦶꦪꦁ ꦙꦴꦤꦁ… ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦧ꧀ꦫꦴꦲ꧀ꦩꦟꦴ, ‘ꦨꦶꦏ꧀ꦑꦸ ꦭꦺꦴꦏꦱ꧀ꦱ ꦄꦤ꧀ꦠꦩꦴꦒꦩ꧀ꦩ ꦭꦺꦴꦏꦱ꧀ꦱ ꦄꦤ꧀ꦠꦺ ꦮꦶꦲꦫꦠꦶ’. ꦠꦩꦚ꧀ꦚꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’ꦠꦶ. ꦄꦲꦩ꧀ꦥꦶ ꦲꦶ, ꦧ꧀ꦫꦴꦲ꧀ꦩꦟꦴ, ꦌꦮꦁ ꦮꦢꦴꦩꦶ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’’’ꦠꦶ.

‘‘ꦥꦸꦤ ꦕꦥꦫꦁ, ꦧ꧀ꦫꦴꦲ꧀ꦩꦟꦴ, ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦫꦹꦥꦱꦚ꧀ꦚꦴꦤꦁ ꦱꦩꦠꦶꦏ꧀ꦏꦩꦴ ꦥꦛꦶꦓꦱꦚ꧀ꦚꦴꦤꦁ ꦄꦠ꧀ꦡꦔ꧀ꦒꦩꦴ ꦤꦴꦤꦠ꧀ꦠꦱꦚ꧀ꦚꦴꦤꦁ ꦄꦩꦤꦱꦶꦏꦴꦫꦴ ‘ꦄꦤꦤ꧀ꦠꦺꦴ ꦄꦴꦏꦴꦱꦺꦴ’ꦠꦶ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦧ꧀ꦫꦴꦲ꧀ꦩꦟꦴ, ‘ꦨꦶꦏ꧀ꦑꦸ ꦭꦺꦴꦏꦱ꧀ꦱ ꦄꦤ꧀ꦠꦩꦴꦒꦩ꧀ꦩ ꦭꦺꦴꦏꦱ꧀ꦱ ꦄꦤ꧀ꦠꦺ ꦮꦶꦲꦫꦠꦶ’. ꦠꦩꦚ꧀ꦚꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’ꦠꦶ. ꦄꦲꦩ꧀ꦥꦶ ꦲꦶ, ꦧ꧀ꦫꦴꦲ꧀ꦩꦟꦴ, ꦌꦮꦁ ꦮꦢꦴꦩꦶ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’’’ꦠꦶ.

‘‘ꦥꦸꦤ ꦕꦥꦫꦁ, ꦧ꧀ꦫꦴꦲ꧀ꦩꦟꦴ, ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦄꦴꦏꦴꦱꦴꦤꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ‘ꦄꦤꦤ꧀ꦠꦁ ꦮꦶꦚ꧀ꦚꦴꦟ’ꦤ꧀ꦠꦶ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ…ꦥꦺ… ꦱꦧ꧀ꦧꦱꦺꦴ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ‘ꦤꦠ꧀ꦡꦶ ꦏꦶꦚ꧀ꦕꦷ’ꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ…ꦥꦺ… ꦱꦧ꧀ꦧꦱꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦄꦪꦁ ꦮꦸꦕ꧀ꦕꦠꦶ, ꦧ꧀ꦫꦴꦲ꧀ꦩꦟꦴ, ‘ꦨꦶꦏ꧀ꦑꦸ ꦭꦺꦴꦏꦱ꧀ꦱ ꦄꦤ꧀ꦠꦩꦴꦒꦩ꧀ꦩ ꦭꦺꦴꦏꦱ꧀ꦱ ꦄꦤ꧀ꦠꦺ ꦮꦶꦲꦫꦠꦶ’. ꦠꦩꦚ꧀ꦚꦺ ꦌꦮꦩꦴꦲꦁꦱꦸ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’ꦠꦶ. ꦄꦲꦩ꧀ꦥꦶ ꦲꦶ, ꦧ꧀ꦫꦴꦲ꧀ꦩꦟꦴ, ꦌꦮꦁ ꦮꦢꦴꦩꦶ – ‘ꦄꦪꦩ꧀ꦥꦶ ꦭꦺꦴꦏꦥꦫꦶꦪꦴꦥꦤ꧀ꦤꦺꦴ, ꦄꦪꦩ꧀ꦥꦶ ꦄꦤꦶꦱ꧀ꦱꦛꦺꦴ ꦭꦺꦴꦏꦩ꧀ꦲꦴ’’’ꦠꦶ.

‘‘ꦥꦸꦤ ꦕꦥꦫꦁ, ꦧ꧀ꦫꦴꦲ꧀ꦩꦟꦴ, ꦨꦶꦏ꧀ꦑꦸ ꦱꦧ꧀ꦧꦱꦺꦴ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦱꦩꦠꦶꦏ꧀ꦏꦩ꧀ꦩ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ, ꦥꦚ꧀ꦚꦴꦪ ꦕꦱ꧀ꦱ ꦢꦶꦱ꧀ꦮꦴ ꦄꦴꦱꦮꦴ ꦥꦫꦶꦏ꧀ꦑꦷꦟꦴ ꦲꦺꦴꦤ꧀ꦠꦶ. ꦄꦪꦁ ꦮꦸꦕ꧀ꦕꦠꦶ, ꦧ꧀ꦫꦴꦲ꧀ꦩꦟꦴ, ‘ꦨꦶꦏ꧀ꦑꦸ ꦭꦺꦴꦏꦱ꧀ꦱ ꦄꦤ꧀ꦠꦩꦴꦒꦩ꧀ꦩ ꦭꦺꦴꦏꦱ꧀ꦱ ꦄꦤ꧀ꦠꦺ ꦮꦶꦲꦫꦠꦶ ꦠꦶꦟ꧀ꦟꦺꦴ ꦭꦺꦴꦏꦺ ꦮꦶꦱꦠ꧀ꦠꦶꦏ’’’ꦤ꧀ꦠꦶ. ꦱꦠ꧀ꦠꦩꦁ.