꧒. ꦱꦴꦫꦟꦷꦪꦮꦒ꧀ꦒꦺꦴ

꧑. ꦥꦜꦩꦱꦴꦫꦟꦷꦪꦱꦸꦠ꧀ꦠꦁ

꧑꧑. ‘‘ꦖꦪꦶꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦴꦫꦟꦷꦪꦴ [ꦱꦴꦫꦴꦟꦷꦪꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)]. ꦏꦠꦩꦺ ꦖ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦩꦺꦠ꧀ꦠꦁ ꦏꦴꦪꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦩꦺꦠ꧀ꦠꦁ ꦮꦕꦷꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦩꦺꦠ꧀ꦠꦁ ꦩꦤꦺꦴꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦪꦺ ꦠꦺ ꦭꦴꦨꦴ ꦣꦩ꧀ꦩꦶꦏꦴ ꦣꦩ꧀ꦩꦭꦢ꧀ꦣꦴ ꦄꦤ꧀ꦠꦩꦱꦺꦴ ꦥꦠ꧀ꦠꦥꦫꦶꦪꦴꦥꦤ꧀ꦤꦩꦠ꧀ꦠꦩ꧀ꦥꦶ ꦠꦡꦴꦫꦹꦥꦺꦲꦶ ꦭꦴꦨꦺꦲꦶ ꦄꦥ꧀ꦥꦛꦶꦮꦶꦨꦠ꧀ꦠꦨꦺꦴꦒꦷ ꦲꦺꦴꦠꦶ ꦱꦷꦭꦮꦤ꧀ꦠꦺꦲꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦱꦴꦣꦴꦫꦟꦨꦺꦴꦒꦷ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦪꦴꦤꦶ ꦠꦴꦤꦶ ꦱꦷꦭꦴꦤꦶ ꦄꦑꦟ꧀ꦝꦴꦤꦶ ꦄꦕ꧀ꦖꦶꦢ꧀ꦢꦴꦤꦶ ꦄꦱꦧꦭꦴꦤꦶ ꦄꦏꦩ꧀ꦩꦴꦱꦴꦤꦶ ꦨꦸꦗꦶꦱ꧀ꦱꦴꦤꦶ ꦮꦶꦚ꧀ꦚꦸꦥ꧀ꦥꦱꦠ꧀ꦡꦴꦤꦶ ꦄꦥꦫꦴꦩꦛ꧀ꦜꦴꦤꦶ ꦱꦩꦴꦣꦶꦱꦁꦮꦠ꧀ꦠꦤꦶꦏꦴꦤꦶ ꦠꦡꦴꦫꦹꦥꦺꦲꦶ ꦱꦷꦭꦺꦲꦶ ꦱꦷꦭꦱꦴꦩꦚ꧀ꦚꦒꦠꦺꦴ ꦮꦶꦲꦫꦠꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ.

꧒. ꦢꦸꦠꦶꦪꦱꦴꦫꦟꦷꦪꦱꦸꦠ꧀ꦠꦁ

꧑꧒. ‘‘ꦖꦪꦶꦩꦺ, ꦨꦶꦏ꧀ꦑꦮꦺ, ꦣꦩ꧀ꦩꦴ ꦱꦴꦫꦟꦷꦪꦴ ꦥꦶꦪꦏꦫꦟꦴ ꦒꦫꦸꦏꦫꦟꦴ ꦱꦔ꧀ꦒꦲꦴꦪ ꦄꦮꦶꦮꦴꦢꦴꦪ ꦱꦴꦩꦒ꧀ꦒꦶꦪꦴ ꦌꦏꦷꦨꦴꦮꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦖ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦩꦺꦠ꧀ꦠꦁ ꦏꦴꦪꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ ꦥꦶꦪꦏꦫꦟꦺꦴ ꦒꦫꦸꦏꦫꦟꦺꦴ ꦱꦔ꧀ꦒꦲꦴꦪ ꦄꦮꦶꦮꦴꦢꦴꦪ ꦱꦴꦩꦒ꧀ꦒꦶꦪꦴ ꦌꦏꦷꦨꦴꦮꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦩꦺꦠ꧀ꦠꦁ ꦮꦕꦷꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ…ꦥꦺ… ꦩꦺꦠ꧀ꦠꦁ ꦩꦤꦺꦴꦏꦩ꧀ꦩꦁ ꦥꦕ꧀ꦕꦸꦥꦛ꧀ꦜꦶꦠꦁ ꦲꦺꦴꦠꦶ ꦱꦧ꧀ꦫꦲ꧀ꦩꦕꦴꦫꦷꦱꦸ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ ꦥꦶꦪꦏꦫꦟꦺꦴ ꦒꦫꦸꦏꦫꦟꦺꦴ ꦱꦔ꧀ꦒꦲꦴꦪ ꦄꦮꦶꦮꦴꦢꦴꦪ ꦱꦴꦩꦒ꧀ꦒꦶꦪꦴ ꦌꦏꦷꦨꦴꦮꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦪꦴꦪꦁ ꦢꦶꦛ꧀ꦜꦶ ꦄꦫꦶꦪꦴ ꦤꦶꦪ꧀ꦪꦴꦤꦶꦏꦴ ꦤꦶꦪ꧀ꦪꦴꦠꦶ ꦠꦏ꧀ꦏꦫꦱ꧀ꦱ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦴꦪ ꦠꦡꦴꦫꦹꦥꦴꦪ ꦢꦶꦛ꧀ꦜꦶꦪꦴ ꦢꦶꦛ꧀ꦜꦶꦱꦴꦩꦚ꧀ꦚꦒꦠꦺꦴ ꦮꦶꦲꦫꦠꦶ ꦱꦧ꧀ꦫꦲ꧀ꦩꦕꦴꦫꦷꦲꦶ ꦄꦴꦮꦶ ꦕꦺꦮ ꦫꦲꦺꦴ ꦕ, ꦄꦪꦩ꧀ꦥꦶ ꦣꦩ꧀ꦩꦺꦴ ꦱꦴꦫꦟꦷꦪꦺꦴ ꦥꦶꦪꦏꦫꦟꦺꦴ ꦒꦫꦸꦏꦫꦟꦺꦴ ꦱꦔ꧀ꦒꦲꦴꦪ ꦄꦮꦶꦮꦴꦢꦴꦪ ꦱꦴꦩꦒ꧀ꦒꦶꦪꦴ ꦌꦏꦷꦨꦴꦮꦴꦪ ꦱꦁꦮꦠ꧀ꦠꦠꦶ. ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦖ ꦣꦩ꧀ꦩꦴ ꦱꦴꦫꦟꦷꦪꦴ ꦥꦶꦪꦏꦫꦟꦴ ꦒꦫꦸꦏꦫꦟꦴ ꦱꦔ꧀ꦒꦲꦴꦪ ꦄꦮꦶꦮꦴꦢꦴꦪ ꦱꦴꦩꦒ꧀ꦒꦶꦪꦴ ꦌꦏꦷꦨꦴꦮꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ. ꦢꦸꦠꦶꦪꦁ.

꧓. ꦤꦶꦱ꧀ꦱꦴꦫꦟꦷꦪꦱꦸꦠ꧀ꦠꦁ

꧑꧓. ‘‘ꦖꦪꦶꦩꦴ, ꦨꦶꦏ꧀ꦑꦮꦺ, ꦤꦶꦱ꧀ꦱꦴꦫꦟꦷꦪꦴ ꦣꦴꦠꦸꦪꦺꦴ. ꦏꦠꦩꦴ ꦖ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦩꦺꦠ꧀ꦠꦴ ꦲꦶ ꦑꦺꦴ ꦩꦺ ꦕꦺꦠꦺꦴꦮꦶꦩꦸꦠ꧀ꦠꦶ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ; ꦄꦡ ꦕ ꦥꦤ ꦩꦺ ꦧ꧀ꦪꦴꦥꦴꦢꦺꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦩꦺꦠ꧀ꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦨꦴꦮꦶꦠꦴꦪ ꦧꦲꦸꦭꦷꦏꦠꦴꦪ ꦪꦴꦤꦷꦏꦠꦴꦪ ꦮꦠ꧀ꦡꦸꦏꦠꦴꦪ ꦄꦤꦸꦛ꧀ꦜꦶꦠꦴꦪ ꦥꦫꦶꦕꦶꦠꦴꦪ ꦱꦸꦱꦩꦴꦫꦢ꧀ꦣꦴꦪ; ꦄꦡ ꦕ ꦥꦤꦱ꧀ꦱ ꦧ꧀ꦪꦴꦥꦴꦢꦺꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦜꦱ꧀ꦱꦠꦶ [ꦜꦱ꧀ꦱꦠꦷꦠꦶ (ꦱꦧ꧀ꦧꦠ꧀ꦡ) ꦢꦷ. ꦤꦶ. ꧓.꧓꧒꧖ ꦥꦱ꧀ꦱꦶꦠꦧ꧀ꦧꦁ], ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦧ꧀ꦪꦴꦥꦴꦢꦱ꧀ꦱ ꦪꦢꦶꦢꦁ ꦩꦺꦠ꧀ꦠꦴꦕꦺꦠꦺꦴꦮꦶꦩꦸꦠ꧀ꦠꦷ’’’ꦠꦶ [ꦩꦺꦠ꧀ꦠꦴꦕꦺꦠꦺꦴꦮꦶꦩꦸꦠ꧀ꦠꦶ (ꦱꦧ꧀ꦧꦠ꧀ꦡ)].

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦏꦫꦸꦟꦴ ꦲꦶ ꦑꦺꦴ ꦩꦺ ꦕꦺꦠꦺꦴꦮꦶꦩꦸꦠ꧀ꦠꦶ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ; ꦄꦡ ꦕ ꦥꦤ ꦩꦺ ꦮꦶꦲꦺꦱꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦏꦫꦸꦟꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦨꦴꦮꦶꦠꦴꦪ ꦧꦲꦸꦭꦷꦏꦠꦴꦪ ꦪꦴꦤꦷꦏꦠꦴꦪ ꦮꦠ꧀ꦡꦸꦏꦠꦴꦪ ꦄꦤꦸꦛ꧀ꦜꦶꦠꦴꦪ ꦥꦫꦶꦕꦶꦠꦴꦪ ꦱꦸꦱꦩꦴꦫꦢ꧀ꦣꦴꦪ; ꦄꦡ ꦕ ꦥꦤꦱ꧀ꦱ ꦮꦶꦲꦺꦱꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦜꦱ꧀ꦱꦠꦶ, ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦮꦶꦲꦺꦱꦴꦪ ꦪꦢꦶꦢꦁ ꦏꦫꦸꦟꦴꦕꦺꦠꦺꦴꦮꦶꦩꦸꦠ꧀ꦠꦷ’’’ꦠꦶ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦩꦸꦢꦶꦠꦴ ꦲꦶ ꦑꦺꦴ ꦩꦺ ꦕꦺꦠꦺꦴꦮꦶꦩꦸꦠ꧀ꦠꦶ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ; ꦄꦡ ꦕ ꦥꦤ ꦩꦺ ꦄꦫꦠꦶ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦩꦸꦢꦶꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦨꦴꦮꦶꦠꦴꦪ ꦧꦲꦸꦭꦷꦏꦠꦴꦪ ꦪꦴꦤꦷꦏꦠꦴꦪ ꦮꦠ꧀ꦡꦸꦏꦠꦴꦪ ꦄꦤꦸꦛ꧀ꦜꦶꦠꦴꦪ ꦥꦫꦶꦕꦶꦠꦴꦪ ꦱꦸꦱꦩꦴꦫꦢ꧀ꦣꦴꦪ; ꦄꦡ ꦕ ꦥꦤꦱ꧀ꦱ ꦄꦫꦠꦶ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦜꦱ꧀ꦱꦠꦶ, ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦄꦫꦠꦶꦪꦴ ꦪꦢꦶꦢꦁ ꦩꦸꦢꦶꦠꦴꦕꦺꦠꦺꦴꦮꦶꦩꦸꦠ꧀ꦠꦷ’’’ꦠꦶ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦈꦥꦺꦏ꧀ꦑꦴ ꦲꦶ ꦑꦺꦴ ꦩꦺ ꦕꦺꦠꦺꦴꦮꦶꦩꦸꦠ꧀ꦠꦶ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ; ꦄꦡ ꦕ ꦥꦤ ꦩꦺ ꦫꦴꦒꦺꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦈꦥꦺꦏ꧀ꦑꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦨꦴꦮꦶꦠꦴꦪ ꦧꦲꦸꦭꦷꦏꦠꦴꦪ ꦪꦴꦤꦷꦏꦠꦴꦪ ꦮꦠ꧀ꦡꦸꦏꦠꦴꦪ ꦄꦤꦸꦛ꧀ꦜꦶꦠꦴꦪ ꦥꦫꦶꦕꦶꦠꦴꦪ ꦱꦸꦱꦩꦴꦫꦢ꧀ꦣꦴꦪ; ꦄꦡ ꦕ ꦥꦤꦱ꧀ꦱ ꦫꦴꦒꦺꦴ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦜꦱ꧀ꦱꦠꦶ, ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦫꦴꦒꦱ꧀ꦱ ꦪꦢꦶꦢꦁ ꦈꦥꦺꦏ꧀ꦑꦴꦕꦺꦠꦺꦴꦮꦶꦩꦸꦠ꧀ꦠꦷ’’’ꦠꦶ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦄꦤꦶꦩꦶꦠ꧀ꦠꦴ ꦲꦶ ꦑꦺꦴ ꦩꦺ ꦕꦺꦠꦺꦴꦮꦶꦩꦸꦠ꧀ꦠꦶ ꦨꦴꦮꦶꦠꦴ ꦧꦲꦸꦭꦷꦏꦠꦴ ꦪꦴꦤꦷꦏꦠꦴ ꦮꦠ꧀ꦡꦸꦏꦠꦴ ꦄꦤꦸꦛ꧀ꦜꦶꦠꦴ ꦥꦫꦶꦕꦶꦠꦴ ꦱꦸꦱꦩꦴꦫꦢ꧀ꦣꦴ; ꦄꦡ ꦕ ꦥꦤ ꦩꦺ ꦤꦶꦩꦶꦠ꧀ꦠꦴꦤꦸꦱꦴꦫꦶ ꦮꦶꦚ꧀ꦚꦴꦟꦁ ꦲꦺꦴꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦄꦤꦶꦩꦶꦠ꧀ꦠꦴꦪ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦨꦴꦮꦶꦠꦴꦪ ꦧꦲꦸꦭꦷꦏꦠꦴꦪ ꦪꦴꦤꦷꦏꦠꦴꦪ ꦮꦠ꧀ꦡꦸꦏꦠꦴꦪ ꦄꦤꦸꦛ꧀ꦜꦶꦠꦴꦪ ꦥꦫꦶꦕꦶꦠꦴꦪ ꦱꦸꦱꦩꦴꦫꦢ꧀ꦣꦴꦪ; ꦄꦡ ꦕ ꦥꦤꦱ꧀ꦱ ꦤꦶꦩꦶꦠ꧀ꦠꦴꦤꦸꦱꦴꦫꦶ ꦮꦶꦚ꧀ꦚꦴꦟꦁ ꦨꦮꦶꦱ꧀ꦱꦠꦶ, ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦱꦧ꧀ꦧꦤꦶꦩꦶꦠ꧀ꦠꦴꦤꦁ ꦪꦢꦶꦢꦁ ꦄꦤꦶꦩꦶꦠ꧀ꦠꦴꦕꦺꦠꦺꦴꦮꦶꦩꦸꦠ꧀ꦠꦷ’’’ꦠꦶ.

‘‘ꦆꦣ ꦥꦤ ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦮꦢꦺꦪ꧀ꦪ – ‘ꦄꦱ꧀ꦩꦷꦠꦶ ꦑꦺꦴ ꦩꦺ ꦮꦶꦒꦠꦁ [ꦮꦶꦒꦠꦺ (ꦱ꧀ꦪꦴ.)], ꦄꦪꦩꦲꦩꦱ꧀ꦩꦷꦠꦶ ꦕ [ꦄꦪꦁ ꦕꦏꦴꦫꦺꦴ ꦢꦷ. ꦤꦶ. ꧓.꧓꧒꧖ ꦤꦠ꧀ꦡꦶ] ꦤ ꦱꦩꦤꦸꦥꦱ꧀ꦱꦴꦩꦶ; ꦄꦡ ꦕ ꦥꦤ ꦩꦺ ꦮꦶꦕꦶꦏꦶꦕ꧀ꦖꦴꦏꦡꦁꦏꦡꦴꦱꦭ꧀ꦭꦁ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦠꦶꦛ꧀ꦜꦠꦷ’ꦠꦶ. ꦱꦺꦴ ‘ꦩꦴ ꦲꦺꦮ’ꦤ꧀ꦠꦶꦱ꧀ꦱ ꦮꦕꦤꦷꦪꦺꦴ – ‘ꦩꦴꦪꦱ꧀ꦩꦴ, ꦌꦮꦁ ꦄꦮꦕ; ꦩꦴ ꦨꦒꦮꦤ꧀ꦠꦁ ꦄꦧ꧀ꦨꦴꦕꦶꦏ꧀ꦑꦶ, ꦤ ꦲꦶ ꦱꦴꦣꦸ ꦨꦒꦮꦠꦺꦴ ꦄꦧ꧀ꦨꦏ꧀ꦑꦴꦤꦁ, ꦤ ꦲꦶ ꦨꦒꦮꦴ ꦌꦮꦁ ꦮꦢꦺꦪ꧀ꦪ. ꦄꦛ꧀ꦜꦴꦤꦩꦺꦠꦁ, ꦄꦴꦮꦸꦱꦺꦴ, ꦄꦤꦮꦏꦴꦱꦺꦴ ꦪꦁ ꦄꦱ꧀ꦩꦷꦠꦶ ꦮꦶꦒꦠꦺ ꦄꦪꦩꦲꦩꦱ꧀ꦩꦷꦠꦶ ꦕ ꦤ ꦱꦩꦤꦸꦥꦱ꧀ꦱꦠꦺꦴ; ꦄꦡ ꦕ ꦥꦤꦱ꧀ꦱ ꦮꦶꦕꦶꦏꦶꦕ꧀ꦖꦴꦏꦡꦁꦏꦡꦴꦱꦭ꧀ꦭꦁ ꦕꦶꦠ꧀ꦠꦁ ꦥꦫꦶꦪꦴꦢꦴꦪ ꦜꦱ꧀ꦱꦠꦶ, ꦤꦺꦠꦁ ꦜꦴꦤꦁ ꦮꦶꦗ꧀ꦗꦠꦶ. ꦤꦶꦱ꧀ꦱꦫꦟꦚ꧀ꦲꦺꦠꦁ, ꦄꦴꦮꦸꦱꦺꦴ, ꦮꦶꦕꦶꦏꦶꦕ꧀ꦖꦴꦏꦡꦁꦏꦡꦴꦱꦭ꧀ꦭꦱ꧀ꦱ ꦪꦢꦶꦢꦁ ꦄꦱ꧀ꦩꦷꦠꦶ ꦩꦴꦤꦱꦩꦸꦒ꧀ꦓꦴꦠꦺꦴ’ꦠꦶ. ꦆꦩꦴ ꦑꦺꦴ, ꦨꦶꦏ꧀ꦑꦮꦺ, ꦖ ꦤꦶꦱ꧀ꦱꦴꦫꦟꦷꦪꦴ ꦣꦴꦠꦸꦪꦺꦴ’’ꦠꦶ. ꦠꦠꦶꦪꦁ.

꧔. ꦨꦢ꧀ꦢꦏꦱꦸꦠ꧀ꦠꦁ

꧑꧔. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦮꦸꦱꦺꦴ, ꦨꦶꦏ꧀ꦑꦮꦺꦴ’’ꦠꦶ. ‘‘ꦄꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦌꦠꦢꦮꦺꦴꦕ –

‘‘ꦠꦡꦴ ꦠꦡꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ [ꦏꦴꦭꦁꦏꦶꦫꦶꦪꦴ (ꦏ.) ꦄ. ꦤꦶ. ꧓.꧑꧑꧐]. ꦏꦡꦚ꧀ꦕꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ?

‘‘ꦆꦣꦴꦮꦸꦱꦺꦴ, ꦨꦶꦏ꧀ꦑꦸ ꦏꦩ꧀ꦩꦴꦫꦴꦩꦺꦴ ꦲꦺꦴꦠꦶ ꦏꦩ꧀ꦩꦫꦠꦺꦴ ꦏꦩ꧀ꦩꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦨꦱ꧀ꦱꦴꦫꦴꦩꦺꦴ ꦲꦺꦴꦠꦶ ꦨꦱ꧀ꦱꦫꦠꦺꦴ ꦨꦱ꧀ꦱꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤꦶꦢ꧀ꦢꦴꦫꦴꦩꦺꦴ ꦲꦺꦴꦠꦶ ꦤꦶꦢ꧀ꦢꦴꦫꦠꦺꦴ ꦤꦶꦢ꧀ꦢꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦱꦔ꧀ꦒꦟꦶꦏꦴꦫꦴꦩꦺꦴ ꦲꦺꦴꦠꦶ ꦱꦔ꧀ꦒꦟꦶꦏꦫꦠꦺꦴ ꦱꦔ꧀ꦒꦟꦶꦏꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦱꦁꦱꦒ꧀ꦒꦴꦫꦴꦩꦺꦴ ꦲꦺꦴꦠꦶ ꦱꦁꦱꦒ꧀ꦒꦫꦠꦺꦴ ꦱꦁꦱꦒ꧀ꦒꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦥꦥꦚ꧀ꦕꦴꦫꦴꦩꦺꦴ ꦲꦺꦴꦠꦶ ꦥꦥꦚ꧀ꦕꦫꦠꦺꦴ ꦥꦥꦚ꧀ꦕꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ. ꦌꦮꦁ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦤ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦤ ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ – ‘ꦨꦶꦏ꧀ꦑꦸ ꦱꦏ꧀ꦏꦴꦪꦴꦨꦶꦫꦠꦺꦴ ꦤꦥ꧀ꦥꦗꦲꦴꦱꦶ [ꦤ ꦥꦲꦴꦱꦶ (ꦱꦷ. ꦱ꧀ꦪꦴ. ꦏꦁ. ꦥꦷ.)] ꦱꦏ꧀ꦏꦴꦪꦁ ꦱꦩ꧀ꦩꦴ ꦢꦸꦏ꧀ꦑꦱ꧀ꦱ ꦄꦤ꧀ꦠꦏꦶꦫꦶꦪꦴꦪ’’’.

‘‘ꦠꦡꦴ ꦠꦡꦴꦮꦸꦱꦺꦴ, ꦨꦶꦏ꧀ꦑꦸ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ. ꦏꦡꦚ꧀ꦕꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ?

‘‘ꦆꦣꦴꦮꦸꦱꦺꦴ, ꦨꦶꦏ꧀ꦑꦸ ꦤ ꦏꦩ꧀ꦩꦴꦫꦴꦩꦺꦴ ꦲꦺꦴꦠꦶ ꦤ ꦏꦩ꧀ꦩꦫꦠꦺꦴ ꦤ ꦏꦩ꧀ꦩꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦨꦱ꧀ꦱꦴꦫꦴꦩꦺꦴ ꦲꦺꦴꦠꦶ ꦤ ꦨꦱ꧀ꦱꦫꦠꦺꦴ ꦤ ꦨꦱ꧀ꦱꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦤꦶꦢ꧀ꦢꦴꦫꦴꦩꦺꦴ ꦲꦺꦴꦠꦶ ꦤ ꦤꦶꦢ꧀ꦢꦴꦫꦠꦺꦴ ꦤꦶꦢ꧀ꦢꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦱꦔ꧀ꦒꦟꦶꦏꦴꦫꦴꦩꦺꦴ ꦲꦺꦴꦠꦶ ꦤ ꦱꦔ꧀ꦒꦟꦶꦏꦫꦠꦺꦴ ꦤ ꦱꦔ꧀ꦒꦟꦶꦏꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦱꦁꦱꦒ꧀ꦒꦴꦫꦴꦩꦺꦴ ꦲꦺꦴꦠꦶ ꦤ ꦱꦁꦱꦒ꧀ꦒꦫꦠꦺꦴ ꦤ ꦱꦁꦱꦒ꧀ꦒꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦥꦥꦚ꧀ꦕꦴꦫꦴꦩꦺꦴ ꦲꦺꦴꦠꦶ ꦤ ꦥꦥꦚ꧀ꦕꦫꦠꦺꦴ ꦤ ꦥꦥꦚ꧀ꦕꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ. ꦌꦮꦁ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦨꦢ꧀ꦢꦏꦁ ꦩꦫꦟꦁ ꦲꦺꦴꦠꦶ, ꦨꦢ꧀ꦢꦶꦏꦴ ꦏꦴꦭꦏꦶꦫꦶꦪꦴ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ – ‘ꦨꦶꦏ꧀ꦑꦸ ꦤꦶꦧ꧀ꦧꦴꦤꦴꦨꦶꦫꦠꦺꦴ ꦥꦗꦲꦴꦱꦶ ꦱꦏ꧀ꦏꦴꦪꦁ ꦱꦩ꧀ꦩꦴ ꦢꦸꦏ꧀ꦑꦱ꧀ꦱ ꦄꦤ꧀ꦠꦏꦶꦫꦶꦪꦴꦪꦴ’’’ꦠꦶ.

‘‘ꦪꦺꦴ ꦥꦥꦚ꧀ꦕꦩꦤꦸꦪꦸꦠ꧀ꦠꦺꦴ, ꦥꦥꦚ꧀ꦕꦴꦨꦶꦫꦠꦺꦴ ꦩꦒꦺꦴ;

ꦮꦶꦫꦴꦣꦪꦷ ꦱꦺꦴ ꦤꦶꦧ꧀ꦧꦴꦤꦁ, ꦪꦺꦴꦒꦏ꧀ꦑꦺꦩꦁ ꦄꦤꦸꦠ꧀ꦠꦫꦁ.

‘‘ꦪꦺꦴ ꦕ ꦥꦥꦚ꧀ꦕꦁ ꦲꦶꦠ꧀ꦮꦴꦤ, ꦤꦶꦥ꧀ꦥꦥꦚ꧀ꦕꦥꦢꦺ ꦫꦠꦺꦴ;

ꦄꦴꦫꦴꦣꦪꦷ ꦱꦺꦴ ꦤꦶꦧ꧀ꦧꦴꦤꦁ, ꦪꦺꦴꦒꦏ꧀ꦑꦺꦩꦁ ꦄꦤꦸꦠ꧀ꦠꦫ’’ꦤ꧀ꦠꦶ. ꦕꦠꦸꦠ꧀ꦡꦁ;

꧕. ꦄꦤꦸꦠꦥ꧀ꦥꦶꦪꦱꦸꦠ꧀ꦠꦁ

꧑꧕. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦡꦴ ꦠꦡꦴꦮꦸꦱꦺꦴ, ꦨꦶꦏ꧀ꦑꦸ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦸꦠꦥ꧀ꦥꦴ ꦲꦺꦴꦠꦶ. ꦏꦡꦚ꧀ꦕꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦸꦠꦥ꧀ꦥꦴ ꦲꦺꦴꦠꦶ?

‘‘ꦆꦣꦴꦮꦸꦱꦺꦴ, ꦨꦶꦏ꧀ꦑꦸ ꦏꦩ꧀ꦩꦴꦫꦴꦩꦺꦴ ꦲꦺꦴꦠꦶ ꦏꦩ꧀ꦩꦫꦠꦺꦴ ꦏꦩ꧀ꦩꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦨꦱ꧀ꦱꦴꦫꦴꦩꦺꦴ ꦲꦺꦴꦠꦶ…ꦥꦺ… ꦤꦶꦢ꧀ꦢꦴꦫꦴꦩꦺꦴ ꦲꦺꦴꦠꦶ… ꦱꦔ꧀ꦒꦟꦶꦏꦴꦫꦴꦩꦺꦴ ꦲꦺꦴꦠꦶ… ꦱꦁꦱꦒ꧀ꦒꦴꦫꦴꦩꦺꦴ ꦲꦺꦴꦠꦶ… ꦥꦥꦚ꧀ꦕꦴꦫꦴꦩꦺꦴ ꦲꦺꦴꦠꦶ ꦥꦥꦚ꧀ꦕꦫꦠꦺꦴ ꦥꦥꦚ꧀ꦕꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ. ꦌꦮꦁ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦸꦠꦥ꧀ꦥꦴ ꦲꦺꦴꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ – ‘ꦨꦶꦏ꧀ꦑꦸ ꦱꦏ꧀ꦏꦴꦪꦴꦨꦶꦫꦠꦺꦴ ꦤꦥ꧀ꦥꦗꦲꦴꦱꦶ ꦱꦏ꧀ꦏꦴꦪꦁ ꦱꦩ꧀ꦩꦴ ꦢꦸꦏ꧀ꦑꦱ꧀ꦱ ꦄꦤ꧀ꦠꦏꦶꦫꦶꦪꦴꦪ’’’.

‘‘ꦠꦡꦴ ꦠꦡꦴꦮꦸꦱꦺꦴ, ꦨꦶꦏ꧀ꦑꦸ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦤꦸꦠꦥ꧀ꦥꦴ ꦲꦺꦴꦠꦶ. ꦏꦡꦚ꧀ꦕꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦤꦸꦠꦥ꧀ꦥꦴ ꦲꦺꦴꦠꦶ?

‘‘ꦆꦣꦴꦮꦸꦱꦺꦴ, ꦨꦶꦏ꧀ꦑꦸ ꦤ ꦏꦩ꧀ꦩꦴꦫꦴꦩꦺꦴ ꦲꦺꦴꦠꦶ ꦤ ꦏꦩ꧀ꦩꦫꦠꦺꦴ ꦤ ꦏꦩ꧀ꦩꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ, ꦤ ꦨꦱ꧀ꦱꦴꦫꦴꦩꦺꦴ ꦲꦺꦴꦠꦶ…ꦥꦺ… ꦤ ꦤꦶꦢ꧀ꦢꦴꦫꦴꦩꦺꦴ ꦲꦺꦴꦠꦶ… ꦤ ꦱꦔ꧀ꦒꦟꦶꦏꦴꦫꦴꦩꦺꦴ ꦲꦺꦴꦠꦶ… ꦤ ꦱꦁꦱꦒ꧀ꦒꦴꦫꦴꦩꦺꦴ ꦲꦺꦴꦠꦶ… ꦤ ꦥꦥꦚ꧀ꦕꦴꦫꦴꦩꦺꦴ ꦲꦺꦴꦠꦶ ꦤ ꦥꦥꦚ꧀ꦕꦫꦠꦺꦴ ꦤ ꦥꦥꦚ꧀ꦕꦴꦫꦴꦩꦠꦁ ꦄꦤꦸꦪꦸꦠ꧀ꦠꦺꦴ. ꦌꦮꦁ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦠꦡꦴ ꦠꦡꦴ ꦮꦶꦲꦴꦫꦁ ꦏꦥ꧀ꦥꦺꦠꦶ ꦪꦡꦴ ꦪꦡꦴꦱ꧀ꦱ ꦮꦶꦲꦴꦫꦁ ꦏꦥ꧀ꦥꦪꦠꦺꦴ ꦏꦴꦭꦏꦶꦫꦶꦪꦴ ꦄꦤꦤꦸꦠꦥ꧀ꦥꦴ ꦲꦺꦴꦠꦶ. ꦄꦪꦁ ꦮꦸꦕ꧀ꦕꦠꦴꦮꦸꦱꦺꦴ – ‘ꦨꦶꦏ꧀ꦑꦸ ꦤꦶꦧ꧀ꦧꦴꦤꦴꦨꦶꦫꦠꦺꦴ ꦥꦗꦲꦴꦱꦶ ꦱꦏ꧀ꦏꦴꦪꦁ ꦱꦩ꧀ꦩꦴ ꦢꦸꦏ꧀ꦑꦱ꧀ꦱ ꦄꦤ꧀ꦠꦏꦶꦫꦶꦪꦴꦪꦴ’’’ꦠꦶ.

‘‘ꦪꦺꦴ ꦥꦥꦚ꧀ꦕꦩꦤꦸꦪꦸꦠ꧀ꦠꦺꦴ, ꦥꦥꦚ꧀ꦕꦴꦨꦶꦫꦠꦺꦴ ꦩꦒꦺꦴ;

ꦮꦶꦫꦴꦣꦪꦷ ꦱꦺꦴ ꦤꦶꦧ꧀ꦧꦴꦤꦁ, ꦪꦺꦴꦒꦏ꧀ꦑꦺꦩꦁ ꦄꦤꦸꦠ꧀ꦠꦫꦁ.

‘‘ꦪꦺꦴ ꦕ ꦥꦥꦚ꧀ꦕꦁ ꦲꦶꦠ꧀ꦮꦴꦤ, ꦤꦶꦥ꧀ꦥꦥꦚ꧀ꦕꦥꦢꦺ ꦫꦠꦺꦴ;

ꦄꦴꦫꦴꦣꦪꦷ ꦱꦺꦴ ꦤꦶꦧ꧀ꦧꦴꦤꦁ, ꦪꦺꦴꦒꦏ꧀ꦑꦺꦩꦁ ꦄꦤꦸꦠ꧀ꦠꦫ’’ꦤ꧀ꦠꦶ. ꦥꦚ꧀ꦕꦩꦁ;

꧖. ꦤꦏꦸꦭꦥꦶꦠꦸꦱꦸꦠ꧀ꦠꦁ

꧑꧖. ꦌꦏꦁ ꦱꦩꦪꦁ ꦨꦒꦮꦴ ꦨꦒ꧀ꦒꦺꦱꦸ ꦮꦶꦲꦫꦠꦶ ꦱꦸꦱꦸꦩꦴꦫꦒꦶꦫꦺ [ꦱꦸꦁꦱꦸꦩꦴꦫꦒꦶꦫꦺ (ꦱꦷ. ꦥꦷ.), ꦱꦁꦱꦸꦩꦴꦫꦒꦶꦫꦺ (ꦏꦠ꧀ꦡꦕꦶ)] ꦨꦺꦱꦏꦭ꦳ꦴꦮꦤꦺ ꦩꦶꦒꦢꦴꦪꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦤꦏꦸꦭꦥꦶꦠꦴ ꦒꦲꦥꦠꦶ ꦄꦴꦧꦴꦣꦶꦏꦺꦴ ꦲꦺꦴꦠꦶ ꦢꦸꦏ꧀ꦑꦶꦠꦺꦴ ꦧꦴꦭ꦳꧀ꦲꦒꦶꦭꦴꦤꦺꦴ. ꦄꦡ ꦑꦺꦴ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦤꦏꦸꦭꦥꦶꦠꦫꦁ ꦒꦲꦥꦠꦶꦁ ꦌꦠꦢꦮꦺꦴꦕ –

‘‘ꦩꦴ ꦑꦺꦴ ꦠ꧀ꦮꦁ, ꦒꦲꦥꦠꦶ, ꦱꦴꦥꦺꦏ꧀ꦑꦺꦴ [ꦱꦴꦥꦺꦑꦺꦴ (ꦥꦷ. ꦏ.)] ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ. ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦩꦩꦕ꧀ꦕꦪꦺꦤ ꦱꦏ꧀ꦑꦶꦱ꧀ꦱꦠꦶ [ꦤ ꦱꦏ꧀ꦑꦶꦱ꧀ꦱꦠꦶ (ꦱꦷ. ꦱ꧀ꦪꦴ. ꦏꦁ.), ꦱꦏ꧀ꦏꦺꦴꦠꦶ (ꦥꦷ. ꦏ.)] ꦢꦴꦫꦏꦺ ꦥꦺꦴꦱꦺꦠꦸꦁ, ꦓꦫꦴꦮꦴꦱꦁ ꦱꦤ꧀ꦣꦫꦶꦠꦸ’ꦤ꧀ꦠꦶ [ꦱꦤ꧀ꦣꦫꦶꦠꦸꦤ꧀ꦠꦶ (ꦏ.), ꦱꦟ꧀ꦜꦫꦶꦠꦸꦁ (ꦱ꧀ꦪꦴ.)]. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦏꦸꦱꦭꦴꦲꦁ, ꦒꦲꦥꦠꦶ, ꦏꦥ꧀ꦥꦴꦱꦁ ꦏꦤ꧀ꦠꦶꦠꦸꦁ ꦮꦺꦟꦶꦁ ꦎꦭꦶꦑꦶꦠꦸꦁ. ꦱꦏ꧀ꦏꦺꦴꦩꦲꦁ, ꦒꦲꦥꦠꦶ, ꦠꦮꦕ꧀ꦕꦪꦺꦤ ꦢꦴꦫꦏꦺ ꦥꦺꦴꦱꦺꦠꦸꦁ, ꦓꦫꦴꦮꦴꦱꦁ ꦱꦤ꧀ꦣꦫꦶꦠꦸꦁ. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ.

‘‘ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦩꦩꦕ꧀ꦕꦪꦺꦤ ꦄꦚ꧀ꦚꦁ ꦓꦫꦁ [ꦨꦠ꧀ꦠꦴꦫꦁ (ꦱ꧀ꦪꦴ. ꦏꦁ.), ꦮꦷꦫꦁ (ꦱꦷ.)] ꦒꦩꦶꦱ꧀ꦱꦠꦷ’ꦠꦶ. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦠ꧀ꦮꦚ꧀ꦕꦺꦮ ꦑꦺꦴ, ꦒꦲꦥꦠꦶ, ꦗꦴꦤꦴꦱꦶ ꦄꦲꦚ꧀ꦕ, ꦪꦁ ꦤꦺꦴ [ꦪꦢꦴ ꦠꦺ (ꦱꦷ.), ꦪꦡꦴ (ꦱ꧀ꦪꦴ.), ꦪꦡꦴ ꦤꦺꦴ (ꦥꦷ.)] ꦱꦺꦴꦭ꦳ꦱꦮꦱ꧀ꦱꦴꦤꦶ ꦒꦲꦛ꧀ꦜꦏꦁ ꦧ꧀ꦫꦲ꧀ꦩꦕꦫꦶꦪꦁ ꦱꦩꦴꦕꦶꦟ꧀ꦟꦁ [ꦱꦩꦴꦢꦶꦤ꧀ꦤꦁ (ꦱꦷ.)]. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ.

‘‘ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦩꦩꦕ꧀ꦕꦪꦺꦤ ꦤ ꦢꦱ꧀ꦱꦤꦏꦴꦩꦴ ꦨꦮꦶꦱ꧀ꦱꦠꦶ ꦨꦒꦮꦠꦺꦴ ꦤ ꦢꦱ꧀ꦱꦤꦏꦴꦩꦴ ꦨꦶꦏ꧀ꦑꦸꦱꦔ꧀ꦓꦱ꧀ꦱꦴ’ꦠꦶ. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦄꦲꦚ꧀ꦲꦶ, ꦒꦲꦥꦠꦶ, ꦠꦮꦕ꧀ꦕꦪꦺꦤ ꦢꦱ꧀ꦱꦤꦏꦴꦩꦠꦫꦴ ꦕꦺꦮ ꦨꦮꦶꦱ꧀ꦱꦴꦩꦶ ꦨꦒꦮꦠꦺꦴ, ꦢꦱ꧀ꦱꦤꦏꦴꦩꦠꦫꦴ ꦕ ꦨꦶꦏ꧀ꦑꦸꦱꦔ꧀ꦓꦱ꧀ꦱ. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ.

‘‘ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦩꦩꦕ꧀ꦕꦪꦺꦤ ꦱꦷꦭꦺꦱꦸ [ꦤꦏꦸꦭꦩꦴꦠꦴ… ꦤ ꦱꦷꦭꦺꦱꦸ (ꦱꦷ. ꦥꦷ.)] ꦥꦫꦶꦥꦹꦫꦏꦴꦫꦶꦤꦷ’ꦠꦶ. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦠꦱ꧀ꦱ ꦨꦒꦮꦠꦺꦴ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦶꦤꦶꦪꦺꦴ, ꦄꦲꦁ ꦠꦴꦱꦁ ꦄꦚ꧀ꦚꦠꦫꦴ. ꦪꦱ꧀ꦱ ꦑꦺꦴ ꦥꦤꦱ꧀ꦱ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ – ꦄꦪꦁ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦒ꧀ꦒꦺꦱꦸ ꦮꦶꦲꦫꦠꦶ ꦱꦸꦱꦸꦩꦴꦫꦒꦶꦫꦺ ꦨꦺꦱꦏꦭ꦳ꦴꦮꦤꦺ ꦩꦶꦒꦢꦴꦪꦺ – ꦠꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦠꦸ. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ.

‘‘ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦭꦴꦨꦶꦤꦷ [ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦤ ꦭꦴꦨꦶꦤꦷ (ꦥꦷ.)] ꦄꦗ꧀ꦙꦠ꧀ꦠꦁ ꦕꦺꦠꦺꦴꦱꦩꦡꦱ꧀ꦱꦴ’ꦠꦶ. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦠꦱ꧀ꦱ ꦨꦒꦮꦠꦺꦴ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦭꦴꦨꦶꦤꦶꦪꦺꦴ ꦄꦗ꧀ꦙꦠ꧀ꦠꦁ ꦕꦺꦠꦺꦴꦱꦩꦡꦱ꧀ꦱ, ꦄꦲꦁ ꦠꦴꦱꦁ ꦄꦚ꧀ꦚꦠꦫꦴ. ꦪꦱ꧀ꦱ ꦑꦺꦴ ꦥꦤꦱ꧀ꦱ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ – ꦄꦪꦁ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦒ꧀ꦒꦺꦱꦸ ꦮꦶꦲꦫꦠꦶ ꦱꦸꦱꦸꦩꦴꦫꦒꦶꦫꦺ ꦨꦺꦱꦏꦭ꦳ꦴꦮꦤꦺ ꦩꦶꦒꦢꦴꦪꦺ – ꦠꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦠꦸ. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ, ꦒꦲꦥꦠꦶ, ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ.

‘‘ꦱꦶꦪꦴ ꦑꦺꦴ ꦥꦤ ꦠꦺ, ꦒꦲꦥꦠꦶ, ꦌꦮꦩꦱ꧀ꦱ – ‘ꦤ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦎꦒꦴꦣꦥ꧀ꦥꦠ꧀ꦠꦴ ꦥꦠꦶꦒꦴꦣꦥ꧀ꦥꦠ꧀ꦠꦴ ꦄꦱ꧀ꦱꦴꦱꦥ꧀ꦥꦠ꧀ꦠꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦠꦷ’ꦠꦶ. ꦤ ꦑꦺꦴ ꦥꦤꦺꦠꦁ, ꦒꦲꦥꦠꦶ, ꦌꦮꦁ ꦢꦛ꧀ꦜꦧ꧀ꦧꦁ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦠꦱ꧀ꦱ ꦨꦒꦮꦠꦺꦴ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦎꦒꦴꦣꦥ꧀ꦥꦠ꧀ꦠꦴ ꦥꦠꦶꦒꦴꦣꦥ꧀ꦥꦠ꧀ꦠꦴ ꦄꦱ꧀ꦱꦴꦱꦥ꧀ꦥꦠ꧀ꦠꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦤ꧀ꦠꦶ, ꦄꦲꦁ ꦠꦴꦱꦁ ꦄꦚ꧀ꦚꦠꦫꦴ. ꦪꦱ꧀ꦱ ꦑꦺꦴ ꦥꦤꦱ꧀ꦱ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ – ꦄꦪꦁ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦒ꧀ꦒꦺꦱꦸ ꦮꦶꦲꦫꦠꦶ ꦱꦸꦱꦸꦩꦴꦫꦒꦶꦫꦺ ꦨꦺꦱꦏꦭ꦳ꦴꦮꦤꦺ ꦩꦶꦒꦢꦴꦪꦺ – ꦠꦁ ꦨꦒꦮꦤ꧀ꦠꦁ ꦈꦥꦱꦔ꧀ꦏꦩꦶꦠ꧀ꦮꦴ ꦥꦸꦕ꧀ꦖꦠꦸ. ꦠꦱ꧀ꦩꦴꦠꦶꦲ ꦠ꧀ꦮꦁ, ꦒꦲꦥꦠꦶ, ꦩꦴ ꦱꦴꦥꦺꦏ꧀ꦑꦺꦴ ꦏꦴꦭꦩꦏꦴꦱꦶ. ꦢꦸꦏ꧀ꦑꦴ ꦒꦲꦥꦠꦶ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ; ꦒꦫꦲꦶꦠꦴ ꦕ ꦨꦒꦮꦠꦴ ꦱꦴꦥꦺꦏ꧀ꦑꦱ꧀ꦱ ꦏꦴꦭꦏꦶꦫꦶꦪꦴ’’ꦠꦶ.

ꦄꦡ ꦑꦺꦴ ꦤꦏꦸꦭꦥꦶꦠꦸꦤꦺꦴ ꦒꦲꦥꦠꦶꦱ꧀ꦱ ꦤꦏꦸꦭꦩꦴꦠꦫꦴ [ꦤꦏꦸꦭꦩꦴꦠꦴꦪ (ꦱꦷ. ꦱ꧀ꦪꦴ.), ꦤꦏꦸꦭꦩꦴꦠꦸꦪꦴ (ꦏ.)] ꦒꦲꦥꦠꦴꦤꦶꦪꦴ ꦆꦩꦶꦤꦴ ꦎꦮꦴꦢꦺꦤ ꦎꦮꦢꦶꦪꦩꦴꦤꦱ꧀ꦱ ꦱꦺꦴ ꦄꦴꦧꦴꦣꦺꦴ ꦜꦴꦤꦱꦺꦴ ꦥꦛꦶꦥ꧀ꦥꦱ꧀ꦱꦩ꧀ꦨꦶ. ꦮꦸꦛ꧀ꦜꦲꦶ [ꦮꦸꦛ꧀ꦜꦴꦠꦶ (ꦏ.)] ꦕ ꦤꦏꦸꦭꦥꦶꦠꦴ ꦒꦲꦥꦠꦶ ꦠꦩ꧀ꦲꦴ ꦄꦴꦧꦴꦣꦴ; ꦠꦡꦴ ꦥꦲꦷꦤꦺꦴ ꦕ ꦥꦤ ꦤꦏꦸꦭꦥꦶꦠꦸꦤꦺꦴ ꦒꦲꦥꦠꦶꦱ꧀ꦱ ꦱꦺꦴ ꦄꦴꦧꦴꦣꦺꦴ ꦄꦲꦺꦴꦱꦶ. ꦄꦡ ꦑꦺꦴ ꦤꦏꦸꦭꦥꦶꦠꦴ ꦒꦲꦥꦠꦶ ꦒꦶꦭꦴꦤꦴ ꦮꦸꦛ꧀ꦜꦶꦠꦺꦴ [‘‘ꦒꦶꦭꦴꦤꦨꦴꦮꦠꦺꦴ ꦮꦸꦛ꧀ꦜꦴꦪ ꦜꦶꦠꦺꦴ, ꦨꦴꦮꦥ꧀ꦥꦣꦴꦤꦺꦴ ꦲꦶ ꦄꦪꦁ ꦤꦶꦢ꧀ꦢꦺꦱꦺꦴ’’ꦠꦶ ꦛꦷꦏꦴꦱꦁꦮꦟ꧀ꦟꦤꦴ] ꦄꦕꦶꦫꦮꦸꦛ꧀ꦜꦶꦠꦺꦴ ꦒꦺꦭꦚ꧀ꦚꦴ ꦢꦟ꧀ꦝꦩꦺꦴꦭꦸꦧ꧀ꦨ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦁ ꦑꦺꦴ ꦤꦏꦸꦭꦥꦶꦠꦫꦁ ꦒꦲꦥꦠꦶꦁ ꦨꦒꦮꦴ ꦌꦠꦢꦮꦺꦴꦕ –

‘‘ꦭꦴꦨꦴ ꦠꦺ, ꦒꦲꦥꦠꦶ, ꦱꦸꦭꦢ꧀ꦣꦁ ꦠꦺ, ꦒꦲꦥꦠꦶ! ꦪꦱ꧀ꦱ ꦠꦺ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦄꦤꦸꦏꦩ꧀ꦥꦶꦏꦴ ꦄꦠ꧀ꦡꦏꦴꦩꦴ ꦎꦮꦴꦢꦶꦏꦴ ꦄꦤꦸꦱꦴꦱꦶꦏꦴ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦩꦩ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦱꦷꦭꦺꦱꦸ ꦥꦫꦶꦥꦹꦫꦏꦴꦫꦶꦤꦶꦪꦺꦴ, ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦠꦴꦱꦁ ꦄꦚ꧀ꦚꦠꦫꦴ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦩꦩ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦭꦴꦨꦶꦤꦶꦪꦺꦴ ꦄꦗ꧀ꦙꦠ꧀ꦠꦁ ꦕꦺꦠꦺꦴꦱꦩꦡꦱ꧀ꦱ, ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦠꦴꦱꦁ ꦄꦚ꧀ꦚꦠꦫꦴ. ꦪꦴꦮꦠꦴ ꦑꦺꦴ, ꦒꦲꦥꦠꦶ, ꦩꦩ ꦱꦴꦮꦶꦏꦴ ꦒꦶꦲꦷ ꦎꦢꦴꦠꦮꦱꦤꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦎꦒꦴꦣꦥ꧀ꦥꦠ꧀ꦠꦴ ꦥꦠꦶꦒꦴꦣꦥ꧀ꦥꦠ꧀ꦠꦴ ꦄꦱ꧀ꦱꦴꦱꦥ꧀ꦥꦠ꧀ꦠꦴ ꦠꦶꦟ꧀ꦟꦮꦶꦕꦶꦏꦶꦕ꧀ꦖꦴ ꦮꦶꦒꦠꦏꦡꦁꦏꦡꦴ ꦮꦺꦱꦴꦫꦗ꧀ꦗꦥ꧀ꦥꦠ꧀ꦠꦴ ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦮꦶꦲꦫꦤ꧀ꦠꦶ, ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦠꦴꦱꦁ ꦄꦚ꧀ꦚꦠꦫꦴ. ꦭꦴꦨꦴ ꦠꦺ, ꦒꦲꦥꦠꦶ, ꦱꦸꦭꦢ꧀ꦣꦁ ꦠꦺ, ꦒꦲꦥꦠꦶ! ꦪꦱ꧀ꦱ ꦠꦺ ꦤꦏꦸꦭꦩꦴꦠꦴ ꦒꦲꦥꦠꦴꦤꦷ ꦄꦤꦸꦏꦩ꧀ꦥꦶꦏꦴ ꦄꦠ꧀ꦡꦏꦴꦩꦴ ꦎꦮꦴꦢꦶꦏꦴ ꦄꦤꦸꦱꦴꦱꦶꦏꦴ’’ꦠꦶ. ꦖꦛ꧀ꦜꦁ.

꧗. ꦱꦺꦴꦥ꧀ꦥꦱꦸꦠ꧀ꦠꦁ

꧑꧗. ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦨꦒꦮꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤꦸꦥꦛ꧀ꦜꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦄꦴꦪꦱ꧀ꦩꦴꦥꦶ ꦑꦺꦴ ꦱꦴꦫꦶꦥꦸꦠ꧀ꦠꦺꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤꦸꦥꦛ꧀ꦜꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ…ꦥꦺ… ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦏꦱ꧀ꦱꦥꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦏꦕ꧀ꦕꦴꦪꦤꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦏꦺꦴꦛ꧀ꦜꦶꦏꦺꦴ [ꦩꦲꦴꦏꦺꦴꦛ꧀ꦜꦶꦠꦺꦴ (ꦱꦷ. ꦥꦷ.)] … ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦕꦸꦤ꧀ꦢꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦩꦲꦴꦏꦥ꧀ꦥꦶꦤꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦄꦤꦸꦫꦸꦢ꧀ꦣꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦫꦺꦮꦠꦺꦴ… ꦄꦴꦪꦱ꧀ꦩꦴꦥꦶ ꦑꦺꦴ ꦄꦴꦤꦤ꧀ꦢꦺꦴ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦪꦺꦤꦸꦥꦛ꧀ꦜꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦄꦡ ꦑꦺꦴ ꦨꦒꦮꦴ ꦧꦲꦸꦢꦺꦮ ꦫꦠ꧀ꦠꦶꦁ ꦤꦶꦱꦗ꧀ꦗꦴꦪ ꦮꦷꦠꦶꦤꦴꦩꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦮꦶꦲꦴꦫꦁ ꦥꦴꦮꦶꦱꦶ. ꦠꦺꦥꦶ ꦑꦺꦴ ꦄꦴꦪꦱ꧀ꦩꦤ꧀ꦠꦺꦴ ꦄꦕꦶꦫꦥꦏ꧀ꦏꦤ꧀ꦠꦱ꧀ꦱ ꦨꦒꦮꦠꦺꦴ ꦈꦛ꧀ꦜꦴꦪꦴꦱꦤꦴ ꦪꦡꦴꦮꦶꦲꦴꦫꦁ ꦄꦒꦩꦁꦱꦸ. ꦪꦺ ꦥꦤ ꦠꦠ꧀ꦡ ꦨꦶꦏ꧀ꦑꦹ ꦤꦮꦴ ꦄꦕꦶꦫꦥꦧ꧀ꦧꦗꦶꦠꦴ ꦄꦣꦸꦤꦴꦒꦠꦴ ꦆꦩꦁ ꦣꦩ꧀ꦩꦮꦶꦤꦪꦁ ꦠꦺ ꦪꦴꦮ ꦱꦹꦫꦶꦪꦸꦒ꧀ꦒꦩꦤꦴ ꦏꦴꦏꦕ꧀ꦖꦩꦴꦤꦴ ꦱꦸꦥꦶꦁꦱꦸ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦮꦶꦱꦸꦢ꧀ꦣꦺꦤ ꦄꦠꦶꦏ꧀ꦏꦤ꧀ꦠꦩꦴꦤꦸꦱꦏꦺꦤ ꦠꦺ ꦨꦶꦏ꧀ꦑꦹ ꦪꦴꦮ ꦱꦹꦫꦶꦪꦸꦒ꧀ꦒꦩꦤꦴ ꦏꦴꦏꦕ꧀ꦖꦩꦴꦤꦺ ꦱꦸꦥꦤ꧀ꦠꦺ. ꦢꦶꦱ꧀ꦮꦴ ꦪꦺꦤꦸꦥꦛ꧀ꦜꦴꦤꦱꦴꦭꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦤꦶꦱꦗ꧀ꦗ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ –

‘‘ꦏꦲꦁ ꦤꦸ ꦑꦺꦴ, ꦨꦶꦏ꧀ꦑꦮꦺ, ꦱꦴꦫꦶꦥꦸꦠ꧀ꦠꦺꦴ? ꦏꦲꦁ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ? ꦏꦲꦁ ꦩꦲꦴꦏꦱ꧀ꦱꦥꦺꦴ? ꦏꦲꦁ ꦩꦲꦴꦏꦕ꧀ꦕꦴꦪꦤꦺꦴ? ꦏꦲꦁ ꦩꦲꦴꦏꦺꦴꦛ꧀ꦜꦶꦏꦺꦴ? ꦏꦲꦁ ꦩꦲꦴꦕꦸꦤ꧀ꦢꦺꦴ? ꦏꦲꦁ ꦩꦲꦴꦏꦥ꧀ꦥꦶꦤꦺꦴ? ꦏꦲꦁ ꦄꦤꦸꦫꦸꦢ꧀ꦣꦺꦴ? ꦏꦲꦁ ꦫꦺꦮꦠꦺꦴ? ꦏꦲꦁ ꦄꦴꦤꦤ꧀ꦢꦺꦴ? ꦏꦲꦁ ꦤꦸ ꦑꦺꦴ ꦠꦺ, ꦨꦶꦏ꧀ꦑꦮꦺ, ꦡꦺꦫꦴ ꦱꦴꦮꦏꦴ ꦒꦠꦴ’’ꦠꦶ? ‘‘ꦠꦺꦥꦶ ꦑꦺꦴ, ꦨꦤ꧀ꦠꦺ, ꦄꦴꦪꦱ꧀ꦩꦤ꧀ꦠꦺꦴ ꦄꦕꦶꦫꦥꦏ꧀ꦏꦤ꧀ꦠꦱ꧀ꦱ ꦨꦒꦮꦠꦺꦴ ꦈꦛ꧀ꦜꦴꦪꦴꦱꦤꦴ ꦪꦡꦴꦮꦶꦲꦴꦫꦁ ꦄꦒꦩꦁꦱꦹ’’ꦠꦶ. ‘‘ꦏꦺꦤ ꦤꦺꦴ [ꦏꦺꦤ ꦤꦺꦴ (ꦏ.), ꦏꦺ ꦤꦸ (ꦏꦠ꧀ꦡꦕꦶ)] ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦡꦺꦫꦴ ꦨꦶꦏ꧀ꦑꦹ ꦤꦴꦒꦠꦴꦠꦶ [ꦨꦶꦏ꧀ꦑꦹ ꦤꦮꦴ (ꦱꦷ. ꦱ꧀ꦪꦴ. ꦏꦁ. ꦥꦷ.), ꦨꦶꦏ꧀ꦑꦹ ꦒꦠꦴꦠꦶ (?)] ꦪꦴꦮ ꦱꦹꦫꦶꦪꦸꦒ꧀ꦒꦩꦤꦴ ꦏꦴꦏꦕ꧀ꦖꦩꦴꦤꦴ ꦱꦸꦥꦡ? ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦫꦴꦗꦴ ꦑꦠ꧀ꦠꦶꦪꦺꦴ ꦩꦸꦢ꧀ꦣꦴꦨꦶꦱꦶꦠ꧀ꦠꦺꦴ [ꦩꦸꦢ꧀ꦣꦴꦨꦶꦱꦶꦠ꧀ꦠꦺꦴ (ꦏ.)] ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦪꦴꦮꦗꦷꦮꦁ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦗꦤꦥꦢꦱ꧀ꦱ ꦮꦴ ꦥꦶꦪꦺꦴ ꦩꦤꦴꦥꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦫꦴꦗꦴ ꦑꦠ꧀ꦠꦶꦪꦺꦴ ꦩꦸꦢ꧀ꦣꦴꦨꦶꦱꦶꦠ꧀ꦠꦺꦴ ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦪꦴꦮꦗꦷꦮꦁ ꦫꦗ꧀ꦗꦁ ꦏꦴꦫꦺꦤ꧀ꦠꦺꦴ ꦗꦤꦥꦢꦱ꧀ꦱ ꦮꦴ ꦥꦶꦪꦺꦴ ꦩꦤꦴꦥꦺꦴ’’’ꦠꦶ.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦫꦛ꧀ꦜꦶꦏꦺꦴ…ꦥꦺ… ꦥꦺꦠ꧀ꦠꦟꦶꦏꦺꦴ… ꦱꦺꦤꦴꦥꦠꦶꦏꦺꦴ… ꦒꦴꦩꦒꦴꦩꦟꦶꦏꦺꦴ [ꦒꦴꦩꦒꦴꦩꦶꦏꦺꦴ (ꦱꦷ. ꦥꦷ.)] … ꦥꦹꦒꦒꦴꦩꦟꦶꦏꦺꦴ ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦪꦴꦮꦗꦷꦮꦁ ꦥꦹꦒꦒꦴꦩꦟꦶꦏꦠ꧀ꦠꦁ ꦏꦴꦫꦺꦤ꧀ꦠꦺꦴ ꦥꦹꦒꦱ꧀ꦱ ꦮꦴ ꦥꦶꦪꦺꦴ ꦩꦤꦴꦥꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦥꦹꦒꦒꦴꦩꦟꦶꦏꦺꦴ ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦤ꧀ꦠꦺꦴ ꦪꦴꦮꦗꦷꦮꦁ ꦥꦹꦒꦒꦴꦩꦟꦶꦏꦠ꧀ꦠꦁ ꦮꦴ ꦏꦴꦫꦺꦤ꧀ꦠꦺꦴ ꦥꦹꦒꦱ꧀ꦱ ꦮꦴ ꦥꦶꦪꦺꦴ ꦩꦤꦴꦥꦺꦴ’’’ꦠꦶ.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦺꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦹ ꦗꦴꦒꦫꦶꦪꦁ ꦄꦤꦤꦸꦪꦸꦠ꧀ꦠꦺꦴ ꦄꦮꦶꦥꦱ꧀ꦱꦏꦺꦴ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦸꦧ꧀ꦧꦫꦠ꧀ꦠꦴꦥꦫꦫꦠ꧀ꦠꦁ ꦧꦺꦴꦣꦶꦥꦏ꧀ꦑꦶꦪꦴꦤꦁ [ꦧꦺꦴꦣꦥꦏ꧀ꦑꦶꦪꦴꦤꦁ (ꦱꦷ.), ꦧꦺꦴꦣꦥꦏ꧀ꦑꦶꦏꦴꦤꦁ (ꦥꦷ.)] ꦣꦩ꧀ꦩꦴꦤꦁ ꦨꦴꦮꦤꦴꦤꦸꦪꦺꦴꦒꦁ ꦄꦤꦤꦸꦪꦸꦠ꧀ꦠꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦪꦴꦮꦢꦠ꧀ꦡꦁ ꦱꦺꦪ꧀ꦪꦱꦸꦑꦁ ꦥꦱ꧀ꦱꦱꦸꦑꦁ ꦩꦶꦢ꧀ꦣꦱꦸꦑꦁ ꦄꦤꦸꦪꦸꦠ꧀ꦠꦺꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦺꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦹ ꦗꦴꦒꦫꦶꦪꦁ ꦄꦤꦤꦸꦪꦸꦠ꧀ꦠꦺꦴ ꦄꦮꦶꦥꦱ꧀ꦱꦏꦺꦴ ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦸꦧ꧀ꦧꦫꦠ꧀ꦠꦴꦥꦫꦫꦠ꧀ꦠꦁ ꦧꦺꦴꦣꦶꦥꦏ꧀ꦑꦶꦪꦴꦤꦁ ꦣꦩ꧀ꦩꦴꦤꦁ ꦨꦴꦮꦤꦴꦤꦸꦪꦺꦴꦒꦁ ꦄꦤꦤꦸꦪꦸꦠ꧀ꦠꦺꦴ ꦄꦴꦱꦮꦴꦤꦁ ꦑꦪꦴ ꦄꦤꦴꦱꦮꦁ ꦕꦺꦠꦺꦴꦮꦶꦩꦸꦠ꧀ꦠꦶꦁ ꦥꦚ꧀ꦚꦴꦮꦶꦩꦸꦠ꧀ꦠꦶꦁ ꦢꦶꦛ꧀ꦜꦺꦮ ꦣꦩ꧀ꦩꦺ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦈꦥꦱꦩ꧀ꦥꦗ꧀ꦗ ꦮꦶꦲꦫꦤ꧀ꦠꦺꦴ’’’ꦠꦶ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ‘ꦆꦤ꧀ꦢ꧀ꦫꦶꦪꦺꦱꦸ ꦒꦸꦠ꧀ꦠꦢ꧀ꦮꦴꦫꦴ ꦨꦮꦶꦱ꧀ꦱꦴꦩ, ꦨꦺꦴꦗꦤꦺ ꦩꦠ꧀ꦠꦚ꧀ꦚꦸꦤꦺꦴ, ꦗꦴꦒꦫꦶꦪꦁ ꦄꦤꦸꦪꦸꦠ꧀ꦠꦴ, ꦮꦶꦥꦱ꧀ꦱꦏꦴ ꦏꦸꦱꦭꦴꦤꦁ ꦣꦩ꧀ꦩꦴꦤꦁ, ꦥꦸꦧ꧀ꦧꦫꦠ꧀ꦠꦴꦥꦫꦫꦠ꧀ꦠꦁ ꦧꦺꦴꦣꦶꦥꦏ꧀ꦑꦶꦪꦴꦤꦁ ꦣꦩ꧀ꦩꦴꦤꦁ, ꦨꦴꦮꦤꦴꦤꦸꦪꦺꦴꦒꦩꦤꦸꦪꦸꦠ꧀ꦠꦴ ꦮꦶꦲꦫꦶꦱ꧀ꦱꦴꦩꦴ’ꦠꦶ. ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦱꦠ꧀ꦠꦩꦁ.

꧘. ꦩꦕ꧀ꦖꦧꦤ꧀ꦣꦱꦸꦠ꧀ꦠꦁ

꧑꧘. ꦌꦏꦁ ꦱꦩꦪꦁ ꦨꦒꦮꦴ ꦏꦺꦴꦱꦭꦺꦱꦸ ꦕꦴꦫꦶꦏꦁ ꦕꦫꦠꦶ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦄꦚ꧀ꦚꦠꦫꦱ꧀ꦩꦶꦁ ꦥꦢꦺꦱꦺ ꦩꦕ꧀ꦖꦶꦏꦁ ꦩꦕ꧀ꦖꦧꦤ꧀ꦣꦁ ꦩꦕ꧀ꦖꦺ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦁ. ꦢꦶꦱ꧀ꦮꦴ ꦩꦒ꧀ꦒꦴ ꦎꦏ꧀ꦏꦩ꧀ꦩ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ. ꦤꦶꦱꦗ꧀ꦗ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦥꦱ꧀ꦱꦡ ꦤꦺꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦄꦩꦸꦁ ꦩꦕ꧀ꦖꦶꦏꦁ ꦩꦕ꧀ꦖꦧꦤ꧀ꦣꦁ ꦩꦕ꧀ꦖꦺ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤ’’ꦤ꧀ꦠꦶ? ‘‘ꦌꦮꦁ, ꦨꦤ꧀ꦠꦺ’’.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦩꦕ꧀ꦖꦶꦏꦺꦴ ꦩꦕ꧀ꦖꦧꦤ꧀ꦣꦺꦴ ꦩꦕ꧀ꦖꦺ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦩꦕ꧀ꦖꦶꦏꦺꦴ ꦩꦕ꧀ꦖꦧꦤ꧀ꦣꦺꦴ ꦩꦕ꧀ꦖꦺ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦺ ꦲꦶ ꦱꦺꦴ, ꦨꦶꦏ꧀ꦑꦮꦺ, ꦩꦕ꧀ꦖꦺ ꦮꦗ꧀ꦙꦺ ꦮꦣꦴꦪꦸꦥꦤꦷꦠꦺ [ꦮꦣꦴꦪꦴꦤꦷꦠꦺ (ꦱ꧀ꦪꦴ. ꦏꦁ.), ꦮꦣꦴꦪ ꦤꦷꦠꦺ (ꦏ.)] ꦥꦴꦥꦏꦺꦤ ꦩꦤꦱꦴꦤꦸꦥꦺꦏ꧀ꦑꦠꦶ, ꦠꦱ꧀ꦩꦴ ꦱꦺꦴ ꦤꦺꦮ ꦲꦠ꧀ꦡꦶꦪꦴꦪꦷ ꦲꦺꦴꦠꦶ ꦤ ꦄꦱ꧀ꦱꦪꦴꦪꦷ ꦤ ꦫꦡꦪꦴꦪꦷ ꦤ ꦪꦴꦤꦪꦴꦪꦷ ꦤ ꦨꦺꦴꦒꦨꦺꦴꦒꦷ, ꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦠꦶ.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦒꦺꦴꦓꦴꦠꦏꦺꦴ ꦒꦴꦮꦺꦴ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦒꦺꦴꦓꦴꦠꦏꦺꦴ ꦒꦴꦮꦺꦴ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦺ ꦲꦶ ꦱꦺꦴ, ꦨꦶꦏ꧀ꦑꦮꦺ, ꦒꦴꦮꦺꦴ ꦮꦗ꧀ꦙꦺ ꦮꦣꦴꦪꦸꦥꦤꦷꦠꦺ ꦥꦴꦥꦏꦺꦤ ꦩꦤꦱꦴꦤꦸꦥꦺꦏ꧀ꦑꦠꦶ, ꦠꦱ꧀ꦩꦴ ꦱꦺꦴ ꦤꦺꦮ ꦲꦠ꧀ꦡꦶꦪꦴꦪꦷ ꦲꦺꦴꦠꦶ ꦤ ꦄꦱ꧀ꦱꦪꦴꦪꦷ ꦤ ꦫꦡꦪꦴꦪꦷ ꦤ ꦪꦴꦤꦪꦴꦪꦷ ꦤ ꦨꦺꦴꦒꦨꦺꦴꦒꦷ, ꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦠꦶ’’.

‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ, ꦄꦥꦶ ꦤꦸ ꦠꦸꦩ꧀ꦲꦺꦲꦶ ꦢꦶꦛ꧀ꦜꦁ ꦮꦴ ꦱꦸꦠꦁ ꦮꦴ – ‘ꦎꦫꦧ꧀ꦨꦶꦏꦺꦴ…ꦥꦺ… ꦱꦹꦏꦫꦶꦏꦺꦴ [ꦱꦺꦴꦏꦫꦶꦏꦺꦴ (ꦱ꧀ꦪꦴ.)] …ꦥꦺ… ꦱꦴꦏꦸꦟꦶꦏꦺꦴ…ꦥꦺ… ꦩꦴꦒꦮꦶꦏꦺꦴ ꦩꦒꦺ [ꦩꦶꦒꦺ (ꦱ꧀ꦪꦴ. ꦏꦁ.)] ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’’’ꦠꦶ? ‘‘ꦤꦺꦴ ꦲꦺꦠꦁ, ꦨꦤ꧀ꦠꦺ’’. ‘‘ꦱꦴꦣꦸ, ꦨꦶꦏ꧀ꦑꦮꦺ! ꦩꦪꦴꦥꦶ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦤꦺꦮ ꦢꦶꦛ꧀ꦜꦁ ꦤ ꦱꦸꦠꦁ – ‘ꦩꦴꦒꦮꦶꦏꦺꦴ ꦩꦒꦺ ꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦮꦶꦏ꧀ꦏꦶꦟꦩꦴꦤꦺꦴ ꦠꦺꦤ ꦏꦩ꧀ꦩꦺꦤ ꦠꦺꦤ ꦄꦴꦗꦷꦮꦺꦤ ꦲꦠ꧀ꦡꦶꦪꦴꦪꦷ ꦮꦴ ꦄꦱ꧀ꦱꦪꦴꦪꦷ ꦮꦴ ꦫꦡꦪꦴꦪꦷ ꦮꦴ ꦪꦴꦤꦪꦴꦪꦷ ꦮꦴ ꦨꦺꦴꦒꦨꦺꦴꦒꦷ ꦮꦴ ꦩꦲꦤ꧀ꦠꦁ ꦮꦴ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦤ꧀ꦠꦺꦴ’ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦠꦺ ꦲꦶ ꦱꦺꦴ, ꦨꦶꦏ꧀ꦑꦮꦺ, ꦩꦒꦺ ꦮꦗ꧀ꦙꦺ ꦮꦣꦴꦪꦸꦥꦤꦷꦠꦺ ꦥꦴꦥꦏꦺꦤ ꦩꦤꦱꦴꦤꦸꦥꦺꦏ꧀ꦑꦠꦶ, ꦠꦱ꧀ꦩꦴ ꦱꦺꦴ ꦤꦺꦮ ꦲꦠ꧀ꦡꦶꦪꦴꦪꦷ ꦲꦺꦴꦠꦶ ꦤ ꦄꦱ꧀ꦱꦪꦴꦪꦷ ꦤ ꦫꦡꦪꦴꦪꦷ ꦤ ꦪꦴꦤꦪꦴꦪꦷ ꦤ ꦨꦺꦴꦒꦨꦺꦴꦒꦷ, ꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦠꦶ. ꦠꦺ ꦲꦶ (ꦤꦴꦩ) [( ) ꦧꦲꦹꦱꦸ ꦤꦠ꧀ꦡꦶ] ꦱꦺꦴ, ꦨꦶꦏ꧀ꦑꦮꦺ, ꦠꦶꦫꦕ꧀ꦖꦴꦤꦒꦠꦺ ꦥꦴꦟꦺ ꦮꦗ꧀ꦙꦺ ꦮꦣꦴꦪꦸꦥꦤꦷꦠꦺ ꦥꦴꦥꦏꦺꦤ ꦩꦤꦱꦴꦤꦸꦥꦺꦏ꧀ꦑꦩꦴꦤꦺꦴ [ꦩꦤꦱꦴꦤꦸꦥꦺꦏ꧀ꦑꦠꦶ, ꦠꦱ꧀ꦩꦴ ꦱꦺꦴ (ꦱ꧀ꦪꦴ. ꦏ.)] ꦤꦺꦮ ꦲꦠ꧀ꦡꦶꦪꦴꦪꦷ ꦨꦮꦶꦱ꧀ꦱꦠꦶ [ꦲꦺꦴꦠꦶ (ꦱ꧀ꦪꦴ. ꦏ.)] ꦤ ꦄꦱ꧀ꦱꦪꦴꦪꦷ ꦤ ꦫꦡꦪꦴꦪꦷ ꦤ ꦪꦴꦤꦪꦴꦪꦷ ꦤ ꦨꦺꦴꦒꦨꦺꦴꦒꦷ, ꦤ ꦩꦲꦤ꧀ꦠꦁ ꦨꦺꦴꦒꦏ꧀ꦑꦤ꧀ꦣꦁ ꦄꦗ꧀ꦙꦴꦮꦱꦶꦱ꧀ꦱꦠꦶ [ꦄꦗ꧀ꦙꦴꦮꦱꦠꦶ (ꦱ꧀ꦪꦴ. ꦏ.)]. ꦏꦺꦴ ꦥꦤ ꦮꦴꦢꦺꦴ ꦪꦁ ꦩꦤꦸꦱ꧀ꦱꦨꦹꦠꦁ ꦮꦗ꧀ꦙꦁ ꦮꦣꦴꦪꦸꦥꦤꦷꦠꦁ ꦥꦴꦥꦏꦺꦤ ꦩꦤꦱꦴꦤꦸꦥꦺꦏ꧀ꦑꦠꦶ! ꦠꦚ꧀ꦲꦶ ꦠꦱ꧀ꦱ [ꦠꦁ ꦲꦶꦱ꧀ꦱ (ꦥꦷ. ꦏ.)], ꦨꦶꦏ꧀ꦑꦮꦺ, ꦲꦺꦴꦠꦶ ꦢꦷꦓꦫꦠ꧀ꦠꦁ ꦄꦲꦶꦠꦴꦪ ꦢꦸꦏ꧀ꦑꦴꦪ. ꦏꦴꦪꦱ꧀ꦱ ꦨꦺꦢꦴ ꦥꦫꦁ ꦩꦫꦟꦴ ꦄꦥꦴꦪꦁ ꦢꦸꦒ꧀ꦒꦠꦶꦁ ꦮꦶꦤꦶꦥꦴꦠꦁ ꦤꦶꦫꦪꦁ ꦈꦥꦥꦗ꧀ꦗꦠꦷ’’ꦠꦶ. ꦄꦛ꧀ꦜꦩꦁ.

꧙. ꦥꦜꦩꦩꦫꦟꦱ꧀ꦱꦠꦶꦱꦸꦠ꧀ꦠꦁ

꧑꧙. ꦌꦏꦁ ꦱꦩꦪꦁ ꦨꦒꦮꦴ ꦤꦴꦠꦶꦏꦺ [ꦤꦴꦢꦶꦏꦺ (ꦱꦷ. ꦱ꧀ꦪꦴ. ꦏꦁ. ꦥꦷ.) ꦄ. ꦤꦶ. ꧘.꧗꧓] ꦮꦶꦲꦫꦠꦶ ꦒꦶꦚ꧀ꦗꦏꦴꦮꦱꦡꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦨꦶꦏ꧀ꦑꦮꦺꦴ’’ꦠꦶ. ‘‘ꦨꦢꦤ꧀ꦠꦺ’’ꦠꦶ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ – ‘‘ꦩꦫꦟꦱ꧀ꦱꦠꦶ, ꦨꦶꦏ꧀ꦑꦮꦺ, ꦨꦴꦮꦶꦠꦴ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ ꦄꦩꦠꦺꦴꦒꦣꦴ ꦄꦩꦠꦥꦫꦶꦪꦺꦴꦱꦴꦤꦴ. ꦨꦴꦮꦺꦡ ꦤꦺꦴ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦩꦫꦟꦱ꧀ꦱꦠꦶ’’ꦤ꧀ꦠꦶ?

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦫꦠ꧀ꦠꦶꦤ꧀ꦢꦶꦮꦁ ꦗꦷꦮꦺꦪ꧀ꦪꦁ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦄꦚ꧀ꦚꦠꦫꦺꦴꦥꦶ ꦑꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦩ꧀ꦥꦶ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦢꦶꦮꦱꦁ ꦗꦷꦮꦺꦪ꧀ꦪꦁ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦄꦚ꧀ꦚꦠꦫꦺꦴꦥꦶ ꦑꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦩ꧀ꦥꦶ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦌꦏꦥꦶꦟ꧀ꦝꦥꦴꦠꦁ ꦨꦸꦚ꧀ꦗꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦄꦚ꧀ꦚꦠꦫꦺꦴꦥꦶ ꦑꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦩ꧀ꦥꦶ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦕꦠ꧀ꦠꦴꦫꦺꦴ ꦥꦚ꧀ꦕ ꦄꦴꦭꦺꦴꦥꦺ ꦱꦔ꧀ꦑꦴꦢꦶꦠ꧀ꦮꦴ [ꦱꦔ꧀ꦑꦫꦶꦠ꧀ꦮꦴ (ꦏ.)] ꦄꦗ꧀ꦙꦺꦴꦲꦫꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦄꦚ꧀ꦚꦠꦫꦺꦴꦥꦶ ꦑꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦩ꧀ꦥꦶ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦌꦏꦁ ꦄꦴꦭꦺꦴꦥꦁ ꦱꦔ꧀ꦑꦴꦢꦶꦠ꧀ꦮꦴ [ꦱꦁꦲꦫꦶꦠ꧀ꦮꦴ (ꦏ.)] ꦄꦗ꧀ꦙꦺꦴꦲꦫꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦄꦚ꧀ꦚꦠꦫꦺꦴꦥꦶ ꦑꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦲꦩ꧀ꦥꦶ ꦑꦺꦴ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ. ‘‘ꦪꦡꦴ ꦏꦡꦁ ꦥꦤ ꦠ꧀ꦮꦁ, ꦨꦶꦏ꧀ꦑꦸ, ꦨꦴꦮꦺꦱꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ? ‘‘ꦆꦣ ꦩꦪ꧀ꦲꦁ, ꦨꦤ꧀ꦠꦺ, ꦌꦮꦁ ꦲꦺꦴꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦄꦱ꧀ꦱꦱꦶꦠ꧀ꦮꦴ ꦮꦴ ꦥꦱ꧀ꦱꦱꦴꦩꦶ ꦥꦱ꧀ꦱꦱꦶꦠ꧀ꦮꦴ ꦮꦴ ꦄꦱ꧀ꦱꦱꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦌꦮꦁ ꦑꦺꦴ ꦄꦲꦁ, ꦨꦤ꧀ꦠꦺ, ꦨꦴꦮꦺꦩꦶ ꦩꦫꦟꦱ꧀ꦱꦠꦶ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦨꦒꦮꦴ ꦠꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦪꦺꦴ ꦕꦴꦪꦁ [ꦪ꧀ꦮꦴꦪꦁ (ꦥꦷ. ꦏ.)], ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦫꦠ꧀ꦠꦶꦤ꧀ꦢꦶꦮꦁ ꦗꦷꦮꦺꦪ꧀ꦪꦁ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’’’ꦠꦶ.

‘‘ꦪꦺꦴ ꦕꦴꦪꦁ [ꦪꦺꦴꦥꦴꦪꦁ (ꦏ.)], ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦢꦶꦮꦱꦁ ꦗꦷꦮꦺꦪ꧀ꦪꦁ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’’’ꦠꦶ.

‘‘ꦪꦺꦴ ꦕꦴꦪꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦌꦏꦥꦶꦟ꧀ꦝꦥꦴꦠꦁ ꦨꦸꦚ꧀ꦗꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’’’ꦠꦶ.

‘‘ꦪꦺꦴ ꦕꦴꦪꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦕꦠ꧀ꦠꦴꦫꦺꦴ ꦥꦚ꧀ꦕ ꦄꦴꦭꦺꦴꦥꦺ ꦱꦔ꧀ꦑꦴꦢꦶꦠ꧀ꦮꦴ ꦄꦗ꧀ꦙꦺꦴꦲꦫꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦥꦩꦠ꧀ꦠꦴ ꦮꦶꦲꦫꦤ꧀ꦠꦶ ꦢꦤ꧀ꦣꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦤ꧀ꦠꦶ ꦄꦴꦱꦮꦴꦤꦁ ꦑꦪꦴꦪ.

‘‘ꦪꦺꦴ ꦕ ꦑ꧀ꦮꦴꦪꦁ [ꦪꦺꦴꦥꦴꦪꦁ (ꦏ.)], ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦌꦏꦁ ꦄꦴꦭꦺꦴꦥꦁ ꦱꦔ꧀ꦑꦴꦢꦶꦠ꧀ꦮꦴ ꦄꦗ꧀ꦙꦺꦴꦲꦫꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’’’ꦠꦶ.

‘‘ꦪꦺꦴ ꦕꦴꦪꦁ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦌꦮꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦠꦶ – ‘ꦄꦲꦺꦴ ꦮꦠꦴꦲꦁ ꦠꦢꦤ꧀ꦠꦫꦁ ꦗꦷꦮꦺꦪ꧀ꦪꦁ ꦪꦢꦤ꧀ꦠꦫꦁ ꦄꦱ꧀ꦱꦱꦶꦠ꧀ꦮꦴ ꦮꦴ ꦥꦱ꧀ꦱꦱꦴꦩꦶ ꦥꦱ꧀ꦱꦱꦶꦠ꧀ꦮꦴ ꦮꦴ ꦄꦱ꧀ꦱꦱꦴꦩꦶ, ꦨꦒꦮꦠꦺꦴ ꦱꦴꦱꦤꦁ ꦩꦤꦱꦶ ꦏꦫꦺꦪ꧀ꦪꦁ, ꦧꦲꦸ ꦮꦠ ꦩꦺ ꦏꦠꦁ ꦄꦱ꧀ꦱꦴ’ꦠꦶ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦄꦥ꧀ꦥꦩꦠ꧀ꦠꦴ ꦮꦶꦲꦫꦤ꧀ꦠꦶ ꦠꦶꦏ꧀ꦑꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦤ꧀ꦠꦶ ꦄꦴꦱꦮꦴꦤꦁ ꦑꦪꦴꦪ.

‘‘ꦠꦱ꧀ꦩꦴꦠꦶꦲ, ꦨꦶꦏ꧀ꦑꦮꦺ, ꦌꦮꦁ ꦱꦶꦏ꧀ꦑꦶꦠꦧ꧀ꦧꦁ – ‘ꦄꦥ꧀ꦥꦩꦠ꧀ꦠꦴ ꦮꦶꦲꦫꦶꦱ꧀ꦱꦴꦩ, ꦠꦶꦏ꧀ꦑꦁ ꦩꦫꦟꦱ꧀ꦱꦠꦶꦁ ꦨꦴꦮꦺꦱ꧀ꦱꦴꦩ ꦄꦴꦱꦮꦴꦤꦁ ꦑꦪꦴꦪꦴ’ꦠꦶ. ꦌꦮꦚ꧀ꦲꦶ ꦮꦺꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦶꦠꦧ꧀ꦧ’’ꦤ꧀ꦠꦶ. ꦤꦮꦩꦁ.

꧑꧐. ꦢꦸꦠꦶꦪꦩꦫꦟꦱ꧀ꦱꦠꦶꦱꦸꦠ꧀ꦠꦁ

꧒꧐. ꦌꦏꦁ ꦱꦩꦪꦁ ꦨꦒꦮꦴ ꦤꦴꦠꦶꦏꦺ ꦮꦶꦲꦫꦠꦶ ꦒꦶꦚ꧀ꦗꦏꦴꦮꦱꦡꦺ. ꦠꦠ꧀ꦫ ꦑꦺꦴ ꦨꦒꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦩꦫꦟꦱ꧀ꦱꦠꦶ, ꦨꦶꦏ꧀ꦑꦮꦺ, ꦨꦴꦮꦶꦠꦴ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ ꦄꦩꦠꦺꦴꦒꦣꦴ ꦄꦩꦠꦥꦫꦶꦪꦺꦴꦱꦴꦤꦴ. ꦏꦡꦁ ꦨꦴꦮꦶꦠꦴ ꦕ, ꦨꦶꦏ꧀ꦑꦮꦺ, ꦩꦫꦟꦱ꧀ꦱꦠꦶ ꦏꦡꦁ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ ꦄꦩꦠꦺꦴꦒꦣꦴ ꦄꦩꦠꦥꦫꦶꦪꦺꦴꦱꦴꦤꦴ?

‘‘ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦢꦶꦮꦱꦺ ꦤꦶꦏ꧀ꦑꦤ꧀ꦠꦺ ꦫꦠ꧀ꦠꦶꦪꦴ ꦥꦠꦶꦲꦶꦠꦴꦪ [ꦥꦛꦶꦒꦠꦴꦪ (ꦏ.) ꦄ. ꦤꦶ. ꧘.꧗꧔] ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦧꦲꦸꦏꦴ ꦑꦺꦴ ꦩꦺ ꦥꦕ꧀ꦕꦪꦴ ꦩꦫꦟꦱ꧀ꦱ – ꦄꦲꦶ ꦮꦴ ꦩꦁ ꦝꦁꦱꦺꦪ꧀ꦪ, ꦮꦶꦕ꧀ꦖꦶꦏꦺꦴ ꦮꦴ ꦩꦁ ꦝꦁꦱꦺꦪ꧀ꦪ, ꦱꦠꦥꦢꦷ ꦮꦴ ꦩꦁ ꦝꦁꦱꦺꦪ꧀ꦪ; ꦠꦺꦤ ꦩꦺ ꦄꦱ꧀ꦱ ꦏꦴꦭꦏꦶꦫꦶꦪꦴ, ꦱꦺꦴ ꦩꦩꦱ꧀ꦱ ꦄꦤ꧀ꦠꦫꦴꦪꦺꦴ. ꦈꦥꦏ꧀ꦑꦭꦶꦠ꧀ꦮꦴ ꦮꦴ ꦥꦥꦠꦺꦪ꧀ꦪꦁ, ꦨꦠ꧀ꦠꦁ ꦮꦴ ꦩꦺ ꦨꦸꦠ꧀ꦠꦁ ꦧ꧀ꦪꦴꦥꦗ꧀ꦗꦺꦪ꧀ꦪ, ꦥꦶꦠ꧀ꦠꦁ ꦮꦴ ꦩꦺ ꦏꦸꦥ꧀ꦥꦺꦪ꧀ꦪ, ꦱꦺꦩ꧀ꦲꦁ ꦮꦴ ꦩꦺ ꦏꦸꦥ꧀ꦥꦺꦪ꧀ꦪ, ꦱꦠ꧀ꦡꦏꦴ ꦮꦴ ꦩꦺ ꦮꦴꦠꦴ ꦏꦸꦥ꧀ꦥꦺꦪ꧀ꦪꦸꦁ; ꦠꦺꦤ ꦩꦺ ꦄꦱ꧀ꦱ ꦏꦴꦭꦏꦶꦫꦶꦪꦴ, ꦱꦺꦴ ꦩꦩꦱ꧀ꦱ ꦄꦤ꧀ꦠꦫꦴꦪꦺꦴ’ꦠꦶ. ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦶꦠꦧ꧀ꦧꦁ – ‘ꦄꦠ꧀ꦡꦶ ꦤꦸ ꦑꦺꦴ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦫꦠ꧀ꦠꦶꦁ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’’’ꦠꦶ.

‘‘ꦱꦕꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦗꦴꦤꦴꦠꦶ – ‘ꦄꦠ꧀ꦡꦶ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦫꦠ꧀ꦠꦶꦁ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’ꦠꦶ, ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦠꦺꦱꦁꦪꦺꦮ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦄꦣꦶꦩꦠ꧀ꦠꦺꦴ ꦖꦤ꧀ꦢꦺꦴ ꦕ ꦮꦴꦪꦴꦩꦺꦴ ꦕ ꦈꦱ꧀ꦱꦴꦲꦺꦴ ꦕ ꦈꦱ꧀ꦱꦺꦴꦭ꦳꧀ꦲꦷ ꦕ ꦄꦥ꧀ꦥꦛꦶꦮꦴꦤꦷ ꦕ ꦱꦠꦶ ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦟꦷꦪꦁ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦴꦢꦶꦠ꧀ꦠꦕꦺꦭꦺꦴ ꦮꦴ ꦄꦴꦢꦶꦠ꧀ꦠꦱꦷꦱꦺꦴ ꦮꦴ ꦠꦱ꧀ꦱꦺꦮ ꦕꦺꦭꦱ꧀ꦱ ꦮꦴ ꦱꦷꦱꦱ꧀ꦱ ꦮꦴ ꦤꦶꦧ꧀ꦧꦴꦥꦤꦴꦪ ꦄꦣꦶꦩꦠ꧀ꦠꦁ ꦖꦤ꧀ꦢꦚ꧀ꦕ ꦮꦴꦪꦴꦩꦚ꧀ꦕ ꦈꦱ꧀ꦱꦴꦲꦚ꧀ꦕ ꦈꦱ꧀ꦱꦺꦴꦭ꦳꧀ꦲꦶꦚ꧀ꦕ ꦄꦥ꧀ꦥꦛꦶꦮꦴꦤꦶꦚ꧀ꦕ ꦱꦠꦶꦚ꧀ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦺꦪ꧀ꦪ; ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦠꦺꦤ ꦨꦶꦏ꧀ꦑꦸꦤꦴ ꦠꦺꦱꦁꦪꦺꦮ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦄꦣꦶꦩꦠ꧀ꦠꦺꦴ ꦖꦤ꧀ꦢꦺꦴ ꦕ ꦮꦴꦪꦴꦩꦺꦴ ꦕ ꦈꦱ꧀ꦱꦴꦲꦺꦴ ꦕ ꦈꦱ꧀ꦱꦺꦴꦭ꦳꧀ꦲꦷ ꦕ ꦄꦥ꧀ꦥꦛꦶꦮꦴꦤꦷ ꦕ ꦱꦠꦶ ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦟꦷꦪꦁ.

‘‘ꦱꦕꦺ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦗꦴꦤꦴꦠꦶ – ‘ꦤꦠ꧀ꦡꦶ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦫꦠ꧀ꦠꦶꦁ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’ꦠꦶ, ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦠꦺꦤꦺꦮ ꦥꦷꦠꦶꦥꦴꦩꦺꦴꦗ꧀ꦗꦺꦤ ꦮꦶꦲꦴꦠꦧ꧀ꦧꦁ ꦄꦲꦺꦴꦫꦠ꧀ꦠꦴꦤꦸꦱꦶꦏ꧀ꦑꦶꦤꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦸ.

‘‘ꦆꦣ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦫꦠ꧀ꦠꦶꦪꦴ ꦤꦶꦏ꧀ꦑꦤ꧀ꦠꦴꦪ ꦢꦶꦮꦱꦺ ꦥꦠꦶꦲꦶꦠꦺ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦠꦶ – ‘ꦧꦲꦸꦏꦴ ꦑꦺꦴ ꦩꦺ ꦥꦕ꧀ꦕꦪꦴ ꦩꦫꦟꦱ꧀ꦱ – ꦄꦲꦶ ꦮꦴ ꦩꦁ ꦝꦁꦱꦺꦪ꧀ꦪ, ꦮꦶꦕ꧀ꦖꦶꦏꦺꦴ ꦮꦴ ꦩꦁ ꦝꦁꦱꦺꦪ꧀ꦪ, ꦱꦠꦥꦢꦷ ꦮꦴ ꦩꦁ ꦝꦁꦱꦺꦪ꧀ꦪ; ꦠꦺꦤ ꦩꦺ ꦄꦱ꧀ꦱ ꦏꦴꦭꦏꦶꦫꦶꦪꦴ ꦱꦺꦴ ꦩꦩꦱ꧀ꦱ ꦄꦤ꧀ꦠꦫꦴꦪꦺꦴ. ꦈꦥꦏ꧀ꦑꦭꦶꦠ꧀ꦮꦴ ꦮꦴ ꦥꦥꦠꦺꦪ꧀ꦪꦁ, ꦨꦠ꧀ꦠꦁ ꦮꦴ ꦩꦺ ꦨꦸꦠ꧀ꦠꦁ ꦧ꧀ꦪꦴꦥꦗ꧀ꦗꦺꦪ꧀ꦪ, ꦥꦶꦠ꧀ꦠꦁ ꦮꦴ ꦩꦺ ꦏꦸꦥ꧀ꦥꦺꦪ꧀ꦪ, ꦱꦺꦩ꧀ꦲꦁ ꦮꦴ ꦩꦺ ꦏꦸꦥ꧀ꦥꦺꦪ꧀ꦪ, ꦱꦠ꧀ꦡꦏꦴ ꦮꦴ ꦩꦺ ꦮꦴꦠꦴ ꦏꦸꦥ꧀ꦥꦺꦪ꧀ꦪꦸꦁ; ꦠꦺꦤ ꦩꦺ ꦄꦱ꧀ꦱ ꦏꦴꦭꦏꦶꦫꦶꦪꦴ ꦱꦺꦴ ꦩꦩꦱ꧀ꦱ ꦄꦤ꧀ꦠꦫꦴꦪꦺꦴ’ꦠꦶ. ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦆꦠꦶ ꦥꦛꦶꦱꦚ꧀ꦕꦶꦏ꧀ꦑꦶꦠꦧ꧀ꦧꦁ – ‘ꦄꦠ꧀ꦡꦶ ꦤꦸ ꦑꦺꦴ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦢꦶꦮꦴ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’’’ꦠꦶ.

‘‘ꦱꦕꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦗꦴꦤꦴꦠꦶ – ‘ꦄꦠ꧀ꦡꦶ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦢꦶꦮꦴ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’ꦠꦶ, ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦠꦺꦱꦁꦪꦺꦮ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦄꦣꦶꦩꦠ꧀ꦠꦺꦴ ꦖꦤ꧀ꦢꦺꦴ ꦕ ꦮꦴꦪꦴꦩꦺꦴ ꦕ ꦈꦱ꧀ꦱꦴꦲꦺꦴ ꦕ ꦈꦱ꧀ꦱꦺꦴꦭ꦳꧀ꦲꦷ ꦕ ꦄꦥ꧀ꦥꦛꦶꦮꦴꦤꦷ ꦕ ꦱꦠꦶ ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦟꦷꦪꦁ. ꦱꦺꦪ꧀ꦪꦡꦴꦥꦶ, ꦨꦶꦏ꧀ꦑꦮꦺ, ꦄꦴꦢꦶꦠ꧀ꦠꦕꦺꦭꦺꦴ ꦮꦴ ꦄꦴꦢꦶꦠ꧀ꦠꦱꦷꦱꦺꦴ ꦮꦴ ꦠꦱ꧀ꦱꦺꦮ ꦕꦺꦭꦱ꧀ꦱ ꦮꦴ ꦱꦷꦱꦱ꧀ꦱ ꦮꦴ ꦤꦶꦧ꧀ꦧꦴꦥꦤꦴꦪ ꦄꦣꦶꦩꦠ꧀ꦠꦁ ꦖꦤ꧀ꦢꦚ꧀ꦕ ꦮꦴꦪꦴꦩꦚ꧀ꦕ ꦈꦱ꧀ꦱꦴꦲꦚ꧀ꦕ ꦈꦱ꧀ꦱꦺꦴꦭ꦳꧀ꦲꦶꦚ꧀ꦕ ꦄꦥ꧀ꦥꦛꦶꦮꦴꦤꦶꦚ꧀ꦕ ꦱꦠꦶꦚ꧀ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦺꦪ꧀ꦪ; ꦌꦮꦩꦺꦮꦁ ꦑꦺꦴ, ꦨꦶꦏ꧀ꦑꦮꦺ, ꦠꦺꦤ ꦨꦶꦏ꧀ꦑꦸꦤꦴ ꦠꦺꦱꦁꦪꦺꦮ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦄꦣꦶꦩꦠ꧀ꦠꦺꦴ ꦖꦤ꧀ꦢꦺꦴ ꦕ ꦮꦴꦪꦴꦩꦺꦴ ꦕ ꦈꦱ꧀ꦱꦴꦲꦺꦴ ꦕ ꦈꦱ꧀ꦱꦺꦴꦭ꦳꧀ꦲꦷ ꦕ ꦄꦥ꧀ꦥꦛꦶꦮꦴꦤꦷ ꦕ ꦱꦠꦶ ꦕ ꦱꦩ꧀ꦥꦗꦚ꧀ꦚꦚ꧀ꦕ ꦏꦫꦟꦷꦪꦁ.

‘‘ꦱꦕꦺ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦥꦕ꧀ꦕꦮꦺꦏ꧀ꦑꦩꦴꦤꦺꦴ ꦌꦮꦁ ꦗꦴꦤꦴꦠꦶ – ‘ꦤꦠ꧀ꦡꦶ ꦩꦺ ꦥꦴꦥꦏꦴ ꦄꦏꦸꦱꦭꦴ ꦣꦩ꧀ꦩꦴ ꦄꦥ꧀ꦥꦲꦷꦤꦴ, ꦪꦺ ꦩꦺ ꦄꦱ꧀ꦱꦸ ꦢꦶꦮꦴ ꦏꦴꦭꦁ ꦏꦫꦺꦴꦤ꧀ꦠꦱ꧀ꦱ ꦄꦤ꧀ꦠꦫꦴꦪꦴꦪꦴ’ꦠꦶ, ꦠꦺꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦴ ꦠꦺꦤꦺꦮ ꦥꦷꦠꦶꦥꦴꦩꦺꦴꦗ꧀ꦗꦺꦤ ꦮꦶꦲꦴꦠꦧ꧀ꦧꦁ ꦄꦲꦺꦴꦫꦠ꧀ꦠꦴꦤꦸꦱꦶꦏ꧀ꦑꦶꦤꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦸ. ꦌꦮꦁ ꦨꦴꦮꦶꦠꦴ ꦑꦺꦴ, ꦨꦶꦏ꧀ꦑꦮꦺ, ꦩꦫꦟꦱ꧀ꦱꦠꦶ ꦌꦮꦁ ꦧꦲꦸꦭꦷꦏꦠꦴ ꦩꦲꦥ꧀ꦦꦭꦴ ꦲꦺꦴꦠꦶ ꦩꦲꦴꦤꦶꦱꦁꦱꦴ ꦄꦩꦠꦺꦴꦒꦣꦴ ꦄꦩꦠꦥꦫꦶꦪꦺꦴꦱꦴꦤꦴ’’ꦠꦶ. ꦢꦱꦩꦁ.

ꦱꦴꦫꦟꦷꦪꦮꦒ꧀ꦒꦺꦴ ꦢꦸꦠꦶꦪꦺꦴ.