꧓. ꦄꦤꦸꦠ꧀ꦠꦫꦶꦪꦮꦒ꧀ꦒꦺꦴ

꧑. ꦱꦴꦩꦏꦱꦸꦠ꧀ꦠꦁ

꧒꧑. ꦌꦏꦁ ꦱꦩꦪꦁ ꦨꦒꦮꦴ ꦱꦏ꧀ꦏꦺꦱꦸ ꦮꦶꦲꦫꦠꦶ ꦱꦴꦩꦒꦴꦩꦏꦺ ꦥꦺꦴꦏ꧀ꦑꦫꦟꦶꦪꦴꦪꦁ. ꦄꦡ ꦑꦺꦴ ꦄꦚ꧀ꦚꦠꦫꦴ ꦢꦺꦮꦠꦴ ꦄꦨꦶꦏ꧀ꦏꦤ꧀ꦠꦴꦪ ꦫꦠ꧀ꦠꦶꦪꦴ ꦄꦨꦶꦏ꧀ꦏꦤ꧀ꦠꦮꦟ꧀ꦟꦴ ꦏꦺꦮꦭꦏꦥ꧀ꦥꦁ ꦥꦺꦴꦏ꧀ꦑꦫꦟꦶꦪꦁ ꦎꦨꦴꦱꦺꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ ꦱꦴ ꦢꦺꦮꦠꦴ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘ꦠꦪꦺꦴꦩꦺ, ꦨꦤ꧀ꦠꦺ, ꦣꦩ꧀ꦩꦴ ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦠꦪꦺꦴ? ꦏꦩ꧀ꦩꦴꦫꦴꦩꦠꦴ, ꦨꦱ꧀ꦱꦴꦫꦴꦩꦠꦴ, ꦤꦶꦢ꧀ꦢꦴꦫꦴꦩꦠꦴ – ꦆꦩꦺ ꦑꦺꦴ, ꦨꦤ꧀ꦠꦺ, ꦠꦪꦺꦴ ꦣꦩ꧀ꦩꦴ ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦷ’’ꦠꦶ. ꦆꦢꦩꦮꦺꦴꦕ ꦱꦴ ꦢꦺꦮꦠꦴ. ꦱꦩꦤꦸꦚ꧀ꦚꦺꦴ ꦱꦠ꧀ꦡꦴ ꦄꦲꦺꦴꦱꦶ. ꦄꦡ ꦑꦺꦴ ꦱꦴ ꦢꦺꦮꦠꦴ ‘‘ꦱꦩꦤꦸꦚ꧀ꦚꦺꦴ ꦩꦺ ꦱꦠ꧀ꦡꦴ’’ꦠꦶ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦠꦠ꧀ꦡꦺꦮꦤ꧀ꦠꦫꦣꦴꦪꦶ.

ꦄꦡ ꦑꦺꦴ ꦨꦒꦮꦴ ꦠꦱ꧀ꦱꦴ ꦫꦠ꧀ꦠꦶꦪꦴ ꦄꦕ꧀ꦕꦪꦺꦤ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦆꦩꦁ, ꦨꦶꦏ꧀ꦑꦮꦺ, ꦫꦠ꧀ꦠꦶꦁ ꦄꦚ꧀ꦚꦠꦫꦴ ꦢꦺꦮꦠꦴ ꦄꦨꦶꦏ꧀ꦏꦤ꧀ꦠꦴꦪ ꦫꦠ꧀ꦠꦶꦪꦴ ꦄꦨꦶꦏ꧀ꦏꦤ꧀ꦠꦮꦟ꧀ꦟꦴ ꦏꦺꦮꦭꦏꦥ꧀ꦥꦁ ꦥꦺꦴꦏ꧀ꦑꦫꦟꦶꦪꦁ ꦎꦨꦴꦱꦺꦠ꧀ꦮꦴ ꦪꦺꦤꦴꦲꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦩꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦄꦛ꧀ꦜꦴꦱꦶ. ꦌꦏꦩꦤ꧀ꦠꦁ ꦜꦶꦠꦴ ꦑꦺꦴ, ꦨꦶꦏ꧀ꦑꦮꦺ, ꦱꦴ ꦢꦺꦮꦠꦴ ꦩꦁ ꦌꦠꦢꦮꦺꦴꦕ – ‘ꦠꦪꦺꦴꦩꦺ, ꦨꦤ꧀ꦠꦺ, ꦣꦩ꧀ꦩꦴ ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦶ. ꦏꦠꦩꦺ ꦠꦪꦺꦴ? ꦏꦩ꧀ꦩꦴꦫꦴꦩꦠꦴ, ꦨꦱ꧀ꦱꦴꦫꦴꦩꦠꦴ, ꦤꦶꦢ꧀ꦢꦴꦫꦴꦩꦠꦴ – ꦆꦩꦺ ꦑꦺꦴ, ꦨꦤ꧀ꦠꦺ, ꦠꦪꦺꦴ ꦣꦩ꧀ꦩꦴ ꦨꦶꦏ꧀ꦑꦸꦤꦺꦴ ꦥꦫꦶꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦷ’ꦠꦶ. ꦆꦢꦩꦮꦺꦴꦕ, ꦨꦶꦏ꧀ꦑꦮꦺ, ꦱꦴ ꦢꦺꦮꦠꦴ. ꦆꦢꦁ ꦮꦠ꧀ꦮꦴ ꦩꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦠꦠ꧀ꦡꦺꦮꦤ꧀ꦠꦫꦣꦴꦪꦶ. ꦠꦺꦱꦁ ꦮꦺꦴ [ꦑꦺꦴ (ꦏ.)], ꦨꦶꦏ꧀ꦑꦮꦺ, ꦄꦭꦴꦨꦴ ꦠꦺꦱꦁ ꦢꦸꦭ꧀ꦭꦢ꧀ꦣꦁ, ꦪꦺ ꦮꦺꦴ ꦢꦺꦮꦠꦴꦥꦶ ꦗꦴꦤꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ ꦥꦫꦶꦲꦴꦪꦩꦴꦤꦺ’’.

‘‘ꦄꦥꦫꦺꦥꦶ, ꦨꦶꦏ꧀ꦑꦮꦺ, ꦠꦪꦺꦴ ꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ. ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ; ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦨꦒꦮꦴ ꦌꦠꦢꦮꦺꦴꦕ – ‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦠꦪꦺꦴ ꦥꦫꦶꦲꦴꦤꦶꦪꦴ ꦣꦩ꧀ꦩꦴ? ꦱꦔ꧀ꦒꦟꦶꦏꦴꦫꦴꦩꦠꦴ, ꦢꦺꦴꦮꦕꦱ꧀ꦱꦠꦴ, ꦥꦴꦥꦩꦶꦠ꧀ꦠꦠꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦠꦪꦺꦴ ꦥꦫꦶꦲꦴꦤꦶꦪꦴ ꦣꦩ꧀ꦩꦴ’’.

‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦄꦠꦷꦠꦩꦢ꧀ꦣꦴꦤꦁ ꦥꦫꦶꦲꦴꦪꦶꦁꦱꦸ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦥꦫꦶꦲꦴꦪꦶꦁꦱꦸ ꦏꦸꦱꦭꦺꦲꦶ ꦣꦩ꧀ꦩꦺꦲꦶ. ꦪꦺꦥꦶ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦄꦤꦴꦒꦠꦩꦢ꧀ꦣꦴꦤꦁ ꦥꦫꦶꦲꦴꦪꦶꦱ꧀ꦱꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦥꦫꦶꦲꦴꦪꦶꦱ꧀ꦱꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ. ꦪꦺꦥꦶ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦌꦠꦫꦲꦶ ꦥꦫꦶꦲꦴꦪꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦥꦫꦶꦲꦴꦪꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦷ’’ꦠꦶ. ꦥꦜꦩꦁ.

꧒. ꦄꦥꦫꦶꦲꦴꦤꦶꦪꦱꦸꦠ꧀ꦠꦁ

꧒꧒. ‘‘ꦖꦪꦶꦩꦺ, ꦨꦶꦏ꧀ꦑꦮꦺ, ꦄꦥꦫꦶꦲꦴꦤꦶꦪꦺ ꦣꦩ꧀ꦩꦺ ꦢꦺꦱꦺꦱ꧀ꦱꦴꦩꦶ, ꦠꦁ ꦱꦸꦟꦴꦡ…ꦥꦺ… ꦏꦠꦩꦺ ꦕ, ꦨꦶꦏ꧀ꦑꦮꦺ, ꦖ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ? ꦤ ꦏꦩ꧀ꦩꦴꦫꦴꦩꦠꦴ, ꦤ ꦨꦱ꧀ꦱꦴꦫꦴꦩꦠꦴ, ꦤ ꦤꦶꦢ꧀ꦢꦴꦫꦴꦩꦠꦴ, ꦤ ꦱꦔ꧀ꦒꦟꦶꦏꦴꦫꦴꦩꦠꦴ, ꦱꦺꦴꦮꦕꦱ꧀ꦱꦠꦴ, ꦏꦭ꧀ꦪꦴꦟꦩꦶꦠ꧀ꦠꦠꦴ – ꦆꦩꦺ ꦑꦺꦴ, ꦨꦶꦏ꧀ꦑꦮꦺ, ꦖ ꦄꦥꦫꦶꦲꦴꦤꦶꦪꦴ ꦣꦩ꧀ꦩꦴ.

‘‘ꦪꦺ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦄꦠꦷꦠꦩꦢ꧀ꦣꦴꦤꦁ ꦤ ꦥꦫꦶꦲꦴꦪꦶꦁꦱꦸ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦤ ꦥꦫꦶꦲꦴꦪꦶꦁꦱꦸ ꦏꦸꦱꦭꦺꦲꦶ ꦣꦩ꧀ꦩꦺꦲꦶ. ꦪꦺꦥꦶ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦄꦤꦴꦒꦠꦩꦢ꧀ꦣꦴꦤꦁ ꦤ ꦥꦫꦶꦲꦴꦪꦶꦱ꧀ꦱꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦤ ꦥꦫꦶꦲꦴꦪꦶꦱ꧀ꦱꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ. ꦪꦺꦥꦶ ꦲꦶ ꦏꦺꦕꦶ, ꦨꦶꦏ꧀ꦑꦮꦺ, ꦌꦠꦫꦲꦶ ꦤ ꦥꦫꦶꦲꦴꦪꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦶ, ꦱꦧ꧀ꦧꦺꦠꦺ ꦆꦩꦺꦲꦺꦮ ꦖꦲꦶ ꦣꦩ꧀ꦩꦺꦲꦶ ꦤ ꦥꦫꦶꦲꦴꦪꦤ꧀ꦠꦶ ꦏꦸꦱꦭꦺꦲꦶ ꦣꦩ꧀ꦩꦺꦲꦷ’’ꦠꦶ. ꦢꦸꦠꦶꦪꦁ.

꧓. ꦨꦪꦱꦸꦠ꧀ꦠꦁ

꧒꧓. ‘‘‘ꦨꦪ’ꦤ꧀ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ; ‘ꦢꦸꦏ꧀ꦑ’ꦤ꧀ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ; ‘ꦫꦺꦴꦒꦺꦴ’ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ; ‘ꦒꦟ꧀ꦝꦺꦴ’ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ; ‘ꦱꦔ꧀ꦒꦺꦴ’ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ; ‘ꦥꦔ꧀ꦏꦺꦴ’ꦠꦶ, ꦨꦶꦏ꧀ꦑꦮꦺ, ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ.

‘‘ꦏꦱ꧀ꦩꦴ ꦕ, ꦨꦶꦏ꧀ꦑꦮꦺ, ‘ꦨꦪ’ꦤ꧀ꦠꦶ ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ? ꦏꦴꦩꦫꦴꦒꦫꦠ꧀ꦠꦴꦪꦁ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦮꦶꦤꦶꦧꦢ꧀ꦣꦺꦴ ꦢꦶꦛ꧀ꦜꦣꦩ꧀ꦩꦶꦏꦴꦥꦶ ꦨꦪꦴ ꦤ ꦥꦫꦶꦩꦸꦕ꧀ꦕꦠꦶ, ꦱꦩ꧀ꦥꦫꦴꦪꦶꦏꦴꦥꦶ ꦨꦪꦴ ꦤ ꦥꦫꦶꦩꦸꦕ꧀ꦕꦠꦶ, ꦠꦱ꧀ꦩꦴ ‘ꦨꦪ’ꦤ꧀ꦠꦶ ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ. ꦏꦱ꧀ꦩꦴ ꦕ, ꦨꦶꦏ꧀ꦑꦮꦺ, ꦢꦸꦏ꧀ꦑꦤ꧀ꦠꦶ…ꦥꦺ… ꦫꦺꦴꦒꦺꦴꦠꦶ… ꦒꦟ꧀ꦝꦺꦴꦠꦶ… ꦱꦔ꧀ꦒꦺꦴꦠꦶ… ꦥꦔ꧀ꦏꦺꦴꦠꦶ ꦏꦴꦩꦴꦤꦩꦺꦠꦁ ꦄꦣꦶꦮꦕꦤꦁ? ꦏꦴꦩꦫꦴꦒꦫꦠ꧀ꦠꦴꦪꦁ, ꦨꦶꦏ꧀ꦑꦮꦺ, ꦖꦤ꧀ꦢꦫꦴꦒꦮꦶꦤꦶꦧꦢ꧀ꦣꦺꦴ ꦢꦶꦛ꧀ꦜꦣꦩ꧀ꦩꦶꦏꦴꦥꦶ ꦥꦔ꧀ꦏꦴ ꦤ ꦥꦫꦶꦩꦸꦕ꧀ꦕꦠꦶ, ꦱꦩ꧀ꦥꦫꦴꦪꦶꦏꦴꦥꦶ ꦥꦔ꧀ꦏꦴ ꦤ ꦥꦫꦶꦩꦸꦕ꧀ꦕꦠꦶ, ꦠꦱ꧀ꦩꦴ ‘ꦥꦔ꧀ꦏꦺꦴ’ꦠꦶ ꦏꦴꦩꦴꦤꦩꦺꦠꦁ ꦄꦣꦶꦮꦕꦤ’’ꦤ꧀ꦠꦶ.

‘‘ꦨꦪꦁ ꦢꦸꦏ꧀ꦑꦁ ꦫꦺꦴꦒꦺꦴ ꦒꦟ꧀ꦝꦺꦴ, ꦱꦔ꧀ꦒꦺꦴ ꦥꦔ꧀ꦏꦺꦴ ꦕ ꦈꦨꦪꦁ;

ꦌꦠꦺ ꦏꦴꦩꦴ ꦥꦮꦸꦕ꧀ꦕꦤ꧀ꦠꦶ, ꦪꦠ꧀ꦡ ꦱꦠ꧀ꦠꦺꦴ ꦥꦸꦡꦸꦗ꧀ꦗꦤꦺꦴ.

‘‘ꦈꦥꦴꦢꦴꦤꦺ ꦨꦪꦁ ꦢꦶꦱ꧀ꦮꦴ, ꦗꦴꦠꦶꦩꦫꦟꦱꦩ꧀ꦨꦮꦺ;

ꦄꦤꦸꦥꦴꦢꦴ ꦮꦶꦩꦸꦕ꧀ꦕꦤ꧀ꦠꦶ, ꦗꦴꦠꦶꦩꦫꦟꦱꦔ꧀ꦑꦪꦺ.

‘‘ꦠꦺ ꦑꦺꦩꦥ꧀ꦥꦠ꧀ꦠꦴ ꦱꦸꦑꦶꦤꦺꦴ, ꦢꦶꦛ꧀ꦜꦣꦩ꧀ꦩꦴꦨꦶꦤꦶꦧ꧀ꦧꦸꦠꦴ;

ꦱꦧ꧀ꦧꦮꦺꦫꦨꦪꦴꦠꦷꦠꦴ [ꦱꦧ꧀ꦧꦺ ꦮꦺꦫꦨꦪꦴꦠꦷꦠꦴ (ꦱ꧀ꦪꦴ.)], ꦱꦧ꧀ꦧꦢꦸꦏ꧀ꦑꦁ ꦈꦥꦕ꧀ꦕꦒꦸ’’ꦤ꧀ꦠꦶ. ꦠꦠꦶꦪꦁ;

꧔. ꦲꦶꦩꦮꦤ꧀ꦠꦱꦸꦠ꧀ꦠꦁ

꧒꧔. ‘‘ꦖꦲꦶ, ꦨꦶꦏ꧀ꦑꦮꦺ, ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦸ ꦲꦶꦩꦮꦤ꧀ꦠꦁ ꦥꦧ꧀ꦧꦠꦫꦴꦗꦁ ꦥꦢꦴꦭꦺꦪ꧀ꦪ, ꦏꦺꦴ ꦥꦤ ꦮꦴꦢꦺꦴ ꦖꦮꦴꦪ ꦄꦮꦶꦗ꧀ꦗꦴꦪ! ꦏꦠꦩꦺꦲꦶ ꦖꦲꦶ? ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩꦴꦣꦶꦱ꧀ꦱ ꦱꦩꦴꦥꦠ꧀ꦠꦶꦏꦸꦱꦭꦺꦴ ꦲꦺꦴꦠꦶ, ꦱꦩꦴꦣꦶꦱ꧀ꦱ ꦜꦶꦠꦶꦏꦸꦱꦭꦺꦴ ꦲꦺꦴꦠꦶ, ꦱꦩꦴꦣꦶꦱ꧀ꦱ ꦮꦸꦛ꧀ꦜꦴꦤꦏꦸꦱꦭꦺꦴ ꦲꦺꦴꦠꦶ, ꦱꦩꦴꦣꦶꦱ꧀ꦱ ꦏꦭ꧀ꦭꦶꦠꦏꦸꦱꦭꦺꦴ [ꦏꦭ꧀ꦭꦠꦴꦏꦸꦱꦭꦺꦴ (ꦱ꧀ꦪꦴ. ꦏꦁ. ꦏ.) ꦱꦁ. ꦤꦶ. ꧓.꧖꧖꧕ ꦥꦱ꧀ꦱꦶꦠꦧ꧀ꦧꦁ] ꦲꦺꦴꦠꦶ, ꦱꦩꦴꦣꦶꦱ꧀ꦱ ꦒꦺꦴꦕꦫꦏꦸꦱꦭꦺꦴ ꦲꦺꦴꦠꦶ, ꦱꦩꦴꦣꦶꦱ꧀ꦱ ꦄꦨꦶꦤꦷꦲꦴꦫꦏꦸꦱꦭꦺꦴ ꦲꦺꦴꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦖꦲꦶ ꦣꦩ꧀ꦩꦺꦲꦶ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦸ ꦲꦶꦩꦮꦤ꧀ꦠꦁ ꦥꦧ꧀ꦧꦠꦫꦴꦗꦁ ꦥꦢꦴꦭꦺꦪ꧀ꦪ, ꦏꦺꦴ ꦥꦤ ꦮꦴꦢꦺꦴ ꦖꦮꦴꦪ ꦄꦮꦶꦗ꧀ꦗꦴꦪꦴ’’ꦠꦶ! ꦕꦠꦸꦠ꧀ꦡꦁ.

꧕. ꦄꦤꦸꦱ꧀ꦱꦠꦶꦛ꧀ꦜꦴꦤꦱꦸꦠ꧀ꦠꦁ

꧒꧕. ‘‘ꦖꦪꦶꦩꦴꦤꦶ, ꦨꦶꦏ꧀ꦑꦮꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦶ. ꦏꦠꦩꦴꦤꦶ ꦖ? ꦆꦣ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ – ‘ꦆꦠꦶꦥꦶ ꦱꦺꦴ ꦨꦒꦮꦴ…ꦥꦺ… ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ. ꦪꦱ꧀ꦩꦶꦁ, ꦨꦶꦏ꧀ꦑꦮꦺ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦆꦢꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦣꦩ꧀ꦩꦁ ꦄꦤꦸꦱ꧀ꦱꦫꦠꦶ – ‘ꦱ꧀ꦮꦴꦏ꧀ꦑꦴꦠꦺꦴ ꦨꦒꦮꦠꦴ ꦣꦩ꧀ꦩꦺꦴ…ꦥꦺ… ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦺꦴ ꦮꦶꦚ꧀ꦚꦹꦲꦷ’ꦠꦶ. ꦪꦱ꧀ꦩꦶꦁ, ꦨꦶꦏ꧀ꦑꦮꦺ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦣꦩ꧀ꦩꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦆꦢꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦱꦔ꧀ꦓꦁ ꦄꦤꦸꦱ꧀ꦱꦫꦠꦶ – ‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ…ꦥꦺ… ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴ’ꦠꦶ. ꦪꦱ꧀ꦩꦶꦁ, ꦨꦶꦏ꧀ꦑꦮꦺ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦱꦔ꧀ꦓꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦆꦢꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦱꦷꦭꦴꦤꦶ ꦄꦤꦸꦱ꧀ꦱꦫꦠꦶ ꦄꦑꦟ꧀ꦝꦴꦤꦶ…ꦥꦺ… ꦱꦩꦴꦣꦶꦱꦁꦮꦠ꧀ꦠꦤꦶꦏꦴꦤꦶ. ꦪꦱ꧀ꦩꦶꦁ, ꦨꦶꦏ꧀ꦑꦮꦺ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦱꦷꦭꦁ ꦄꦤꦸꦱ꧀ꦱꦫꦠꦶ, ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦆꦢꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦕꦴꦒꦁ ꦄꦤꦸꦱ꧀ꦱꦫꦠꦶ – ‘ꦭꦴꦨꦴ ꦮꦠ ꦩꦺ! ꦱꦸꦭꦢ꧀ꦣꦁ ꦮꦠ ꦩꦺ…ꦥꦺ… ꦪꦴꦕꦪꦺꦴꦒꦺꦴ ꦢꦴꦤꦱꦁꦮꦶꦨꦴꦒꦫꦠꦺꦴ’ꦠꦶ. ꦪꦱ꧀ꦩꦶꦁ…ꦥꦺ… ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦮꦺ, ꦄꦫꦶꦪꦱꦴꦮꦏꦺꦴ ꦢꦺꦮꦠꦴ ꦄꦤꦸꦱ꧀ꦱꦫꦠꦶ – ‘ꦱꦤ꧀ꦠꦶ ꦢꦺꦮꦴ ꦕꦴꦠꦸꦩꦲꦴꦫꦴꦗꦶꦏꦴ, ꦱꦤ꧀ꦠꦶ ꦢꦺꦮꦴ ꦠꦴꦮꦠꦶꦁꦱꦴ, ꦱꦤ꧀ꦠꦶ ꦢꦺꦮꦴ ꦪꦴꦩꦴ, ꦱꦤ꧀ꦠꦶ ꦢꦺꦮꦴ ꦠꦸꦱꦶꦠꦴ, ꦱꦤ꧀ꦠꦶ ꦢꦺꦮꦴ ꦤꦶꦩ꧀ꦩꦴꦤꦫꦠꦶꦤꦺꦴ, ꦱꦤ꧀ꦠꦶ ꦢꦺꦮꦴ ꦥꦫꦤꦶꦩ꧀ꦩꦶꦠꦮꦱꦮꦠ꧀ꦠꦶꦤꦺꦴ, ꦱꦤ꧀ꦠꦶ ꦢꦺꦮꦴ ꦧ꧀ꦫꦲ꧀ꦩꦏꦴꦪꦶꦏꦴ, ꦱꦤ꧀ꦠꦶ ꦢꦺꦮꦴ ꦠꦠꦸꦠ꧀ꦠꦫꦶ. ꦪꦡꦴꦫꦹꦥꦴꦪ ꦱꦢ꧀ꦣꦴꦪ ꦱꦩꦤ꧀ꦤꦴꦒꦠꦴ ꦠꦴ ꦢꦺꦮꦠꦴ ꦆꦠꦺꦴ ꦕꦸꦠꦴ ꦠꦠ꧀ꦡ ꦈꦥꦥꦤ꧀ꦤꦴ; ꦩꦪ꧀ꦲꦩ꧀ꦥꦶ ꦠꦡꦴꦫꦹꦥꦴ ꦱꦢ꧀ꦣꦴ ꦱꦁꦮꦶꦗ꧀ꦗꦠꦶ. ꦪꦡꦴꦫꦹꦥꦺꦤ ꦱꦷꦭꦺꦤ… ꦱꦸꦠꦺꦤ… ꦕꦴꦒꦺꦤ… ꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦴ ꦠꦴ ꦢꦺꦮꦠꦴ ꦆꦠꦺꦴ ꦕꦸꦠꦴ ꦠꦠ꧀ꦡ ꦈꦥꦥꦤ꧀ꦤꦴ; ꦩꦪ꧀ꦲꦩ꧀ꦥꦶ ꦠꦡꦴꦫꦹꦥꦴ ꦥꦚ꧀ꦚꦴ ꦱꦁꦮꦶꦗ꧀ꦗꦠꦷ’’’ ꦠꦶ.

‘‘ꦪꦱ꧀ꦩꦶꦁ, ꦨꦶꦏ꧀ꦑꦮꦺ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦕ ꦠꦴꦱꦚ꧀ꦕ ꦢꦺꦮꦠꦴꦤꦁ ꦱꦢ꧀ꦣꦚ꧀ꦕ ꦱꦷꦭꦚ꧀ꦕ ꦱꦸꦠꦚ꧀ꦕ ꦕꦴꦒꦚ꧀ꦕ ꦥꦚ꧀ꦚꦚ꧀ꦕ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦆꦢꦩ꧀ꦥꦶ ꦑꦺꦴ, ꦨꦶꦏ꧀ꦑꦮꦺ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦗ꧀ꦙꦤ꧀ꦠꦶ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦖ ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ. ꦥꦚ꧀ꦕꦩꦁ.

꧖. ꦩꦲꦴꦏꦕ꧀ꦕꦴꦤꦱꦸꦠ꧀ꦠꦁ

꧒꧖. ꦠꦠ꧀ꦫ ꦑꦺꦴ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦴꦮꦸꦱꦺꦴ ꦨꦶꦏ꧀ꦑꦮꦺ’’ꦠꦶ. ‘‘ꦄꦴꦮꦸꦱꦺꦴ’’ꦠꦶ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦠꦺꦴ ꦩꦲꦴꦏꦕ꧀ꦕꦴꦤꦱ꧀ꦱ ꦥꦕ꧀ꦕꦱ꧀ꦱꦺꦴꦱꦸꦁ. ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦌꦠꦢꦮꦺꦴꦕ – ‘‘ꦄꦕ꧀ꦖꦫꦶꦪꦁ, ꦄꦴꦮꦸꦱꦺꦴ; ꦄꦧ꧀ꦨꦸꦠꦁ, ꦄꦴꦮꦸꦱꦺꦴ! ꦪꦴꦮꦚ꧀ꦕꦶꦢꦁ ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦱꦩ꧀ꦧꦴꦣꦺ ꦎꦏꦴꦱꦴꦣꦶꦒꦩꦺꦴ ꦄꦤꦸꦧꦸꦢ꧀ꦣꦺꦴ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦖ ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦶ.

‘‘ꦏꦠꦩꦴꦤꦶ ꦖ? ꦆꦣꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ – ‘ꦆꦠꦶꦥꦶ ꦱꦺꦴ ꦨꦒꦮꦴ …ꦥꦺ… ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ꦠꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦁ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦣꦩ꧀ꦩꦁ ꦄꦤꦸꦱ꧀ꦱꦫꦠꦶ – ‘ꦱ꧀ꦮꦴꦏ꧀ꦑꦴꦠꦺꦴ ꦨꦒꦮꦠꦴ ꦣꦩ꧀ꦩꦺꦴ…ꦥꦺ… ꦥꦕ꧀ꦕꦠ꧀ꦠꦁ ꦮꦺꦢꦶꦠꦧ꧀ꦧꦺꦴ ꦮꦶꦚ꧀ꦚꦹꦲꦷ’ꦠꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦣꦩ꧀ꦩꦁ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦔ꧀ꦓꦁ ꦄꦤꦸꦱ꧀ꦱꦫꦠꦶ – ‘ꦱꦸꦥ꧀ꦥꦛꦶꦥꦤ꧀ꦤꦺꦴ ꦨꦒꦮꦠꦺꦴ ꦱꦴꦮꦏꦱꦔ꧀ꦓꦺꦴ…ꦥꦺ… ꦄꦤꦸꦠ꧀ꦠꦫꦁ ꦥꦸꦚ꧀ꦚꦏ꧀ꦑꦺꦠ꧀ꦠꦁ ꦭꦺꦴꦏꦱ꧀ꦱꦴ’ꦠꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦱꦔ꧀ꦓꦁ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦱꦷꦭꦴꦤꦶ ꦄꦤꦸꦱ꧀ꦱꦫꦠꦶ ꦄꦑꦟ꧀ꦝꦴꦤꦶ…ꦥꦺ… ꦱꦩꦴꦣꦶꦱꦁꦮꦠ꧀ꦠꦤꦶꦏꦴꦤꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦱꦷꦭꦁ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦕꦴꦒꦁ ꦄꦤꦸꦱ꧀ꦱꦫꦠꦶ – ‘ꦭꦴꦨꦴ ꦮꦠ ꦩꦺ, ꦱꦸꦭꦢ꧀ꦣꦁ ꦮꦠ ꦩꦺ…ꦥꦺ… ꦪꦴꦕꦪꦺꦴꦒꦺꦴ ꦢꦴꦤꦱꦁꦮꦶꦨꦴꦒꦫꦠꦺꦴ’ꦠꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦕꦴꦒꦁ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦥꦸꦤ ꦕꦥꦫꦁ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦢꦺꦮꦠꦴ ꦄꦤꦸꦱ꧀ꦱꦫꦠꦶ – ‘ꦱꦤ꧀ꦠꦶ ꦢꦺꦮꦴ ꦕꦴꦠꦸꦩꦲꦴꦫꦴꦗꦶꦏꦴ, ꦱꦤ꧀ꦠꦶ ꦢꦺꦮꦴ…ꦥꦺ… ꦠꦠꦸꦠ꧀ꦠꦫꦶ. ꦪꦡꦴꦫꦹꦥꦴꦪ ꦱꦢ꧀ꦣꦴꦪ ꦱꦩꦤ꧀ꦤꦴꦒꦠꦴ ꦠꦴ ꦢꦺꦮꦠꦴ ꦆꦠꦺꦴ ꦕꦸꦠꦴ ꦠꦠ꧀ꦡ ꦈꦥꦥꦤ꧀ꦤꦴ; ꦩꦪ꧀ꦲꦩ꧀ꦥꦶ ꦠꦡꦴꦫꦹꦥꦴ ꦱꦢ꧀ꦣꦴ ꦱꦁꦮꦶꦗ꧀ꦗꦠꦶ. ꦪꦡꦴꦫꦹꦥꦺꦤ ꦱꦷꦭꦺꦤ…ꦥꦺ… ꦱꦸꦠꦺꦤ… ꦕꦴꦒꦺꦤ… ꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦴ ꦠꦴ ꦢꦺꦮꦠꦴ ꦆꦠꦺꦴ ꦕꦸꦠꦴ ꦠꦠ꧀ꦡ ꦈꦥꦥꦤ꧀ꦤꦴ; ꦩꦪ꧀ꦲꦩ꧀ꦥꦶ ꦠꦡꦴꦫꦹꦥꦴ ꦥꦚ꧀ꦚꦴ ꦱꦁꦮꦶꦗ꧀ꦗꦠꦷ’ꦠꦶ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦄꦫꦶꦪꦱꦴꦮꦏꦺꦴ ꦄꦠ꧀ꦠꦤꦺꦴ ꦕ ꦠꦴꦱꦚ꧀ꦕ ꦢꦺꦮꦠꦴꦤꦁ ꦱꦢ꧀ꦣꦚ꧀ꦕ ꦱꦷꦭꦚ꧀ꦕ ꦱꦸꦠꦚ꧀ꦕ ꦕꦴꦒꦚ꧀ꦕ ꦥꦚ꧀ꦚꦚ꧀ꦕ ꦄꦤꦸꦱ꧀ꦱꦫꦠꦶ ꦤꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦫꦴꦒꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦢꦺꦴꦱꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ, ꦤ ꦩꦺꦴꦲꦥꦫꦶꦪꦸꦛ꧀ꦜꦶꦠꦁ ꦕꦶꦠ꧀ꦠꦁ ꦲꦺꦴꦠꦶ; ꦈꦗꦸꦒꦠꦩꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦕꦶꦠ꧀ꦠꦁ ꦲꦺꦴꦠꦶ, ꦤꦶꦏ꧀ꦑꦤ꧀ꦠꦁ ꦩꦸꦠ꧀ꦠꦁ ꦮꦸꦛ꧀ꦜꦶꦠꦁ ꦒꦺꦣꦩ꧀ꦲꦴ. ‘ꦒꦺꦣꦺꦴ’ꦠꦶ ꦑꦺꦴ, ꦄꦴꦮꦸꦱꦺꦴ, ꦥꦚ꧀ꦕꦤ꧀ꦤꦺꦠꦁ ꦏꦴꦩꦒꦸꦟꦴꦤꦁ ꦄꦣꦶꦮꦕꦤꦁ. ꦱ ꦑꦺꦴ ꦱꦺꦴ, ꦄꦴꦮꦸꦱꦺꦴ, ꦄꦫꦶꦪꦱꦴꦮꦏꦺꦴ ꦱꦧ꧀ꦧꦱꦺꦴ ꦄꦴꦏꦴꦱꦱꦩꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦄꦥ꧀ꦥꦩꦴꦟꦺꦤ ꦄꦮꦺꦫꦺꦤ ꦄꦧ꧀ꦪꦴꦥꦗ꧀ꦗꦺꦤ. ꦆꦢꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦌꦮꦩꦶꦣꦺꦏꦕ꧀ꦕꦺ ꦱꦠ꧀ꦠꦴ ꦮꦶꦱꦸꦢ꧀ꦣꦶꦣꦩ꧀ꦩꦴ ꦨꦮꦤ꧀ꦠꦶ.

‘‘ꦄꦕ꧀ꦖꦫꦶꦪꦁ, ꦄꦴꦮꦸꦱꦺꦴ; ꦄꦧ꧀ꦨꦸꦠꦁ, ꦄꦴꦮꦸꦱꦺꦴ! ꦪꦴꦮꦚ꧀ꦕꦶꦢꦁ ꦠꦺꦤ ꦨꦒꦮꦠꦴ ꦗꦴꦤꦠꦴ ꦥꦱ꧀ꦱꦠꦴ ꦄꦫꦲꦠꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦤ ꦱꦩ꧀ꦧꦴꦣꦺ ꦎꦏꦴꦱꦴꦣꦶꦒꦩꦺꦴ ꦄꦤꦸꦧꦸꦢ꧀ꦣꦺꦴ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦖ ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ. ꦖꦛ꧀ꦜꦁ.

꧗. ꦥꦜꦩꦱꦩꦪꦱꦸꦠ꧀ꦠꦁ

꧒꧗. ꦄꦡ ꦑꦺꦴ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦏꦠꦶ ꦤꦸ ꦑꦺꦴ, ꦨꦤ꧀ꦠꦺ, ꦱꦩꦪꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ? ‘‘ꦖꦪꦶꦩꦺ, ꦨꦶꦏ꧀ꦑꦸ, ꦱꦩꦪꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ’’.

‘‘ꦏꦠꦩꦺ ꦖ? ꦆꦣ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦏꦴꦩꦫꦴꦒꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦏꦴꦩꦫꦴꦒꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦏꦴꦩꦫꦴꦒꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦏꦴꦩꦫꦴꦒꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦏꦴꦩꦫꦴꦒꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦏꦴꦩꦫꦴꦒꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦏꦴꦩꦫꦴꦒꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦏꦴꦩꦫꦴꦒꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦥꦜꦩꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦧ꧀ꦪꦴꦥꦴꦢꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦧ꧀ꦪꦴꦥꦴꦢꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦧ꧀ꦪꦴꦥꦴꦢꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦧ꧀ꦪꦴꦥꦴꦢꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦧ꧀ꦪꦴꦥꦴꦢꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦧ꧀ꦪꦴꦥꦴꦢꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦧ꧀ꦪꦴꦥꦴꦢꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦧ꧀ꦪꦴꦥꦴꦢꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦢꦸꦠꦶꦪꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦡꦶꦤꦩꦶꦢ꧀ꦣꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦡꦶꦤꦩꦶꦢ꧀ꦣꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦡꦶꦤꦩꦶꦢ꧀ꦣꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦡꦶꦤꦩꦶꦢ꧀ꦣꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦡꦶꦤꦩꦶꦢ꧀ꦣꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦡꦶꦤꦩꦶꦢ꧀ꦣꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦡꦶꦤꦩꦶꦢ꧀ꦣꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦡꦶꦤꦩꦶꦢ꧀ꦣꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦠꦠꦶꦪꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦕꦠꦸꦠ꧀ꦡꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦮꦶꦕꦶꦏꦶꦕ꧀ꦖꦴꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦮꦶꦕꦶꦏꦶꦕ꧀ꦖꦴꦥꦫꦺꦠꦺꦤ, ꦈꦥ꧀ꦥꦤ꧀ꦤꦴꦪ ꦕ ꦮꦶꦕꦶꦏꦶꦕ꧀ꦖꦴꦪ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ, ꦄꦴꦮꦸꦱꦺꦴ, ꦮꦶꦕꦶꦏꦶꦕ꧀ꦖꦴꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦮꦶꦕꦶꦏꦶꦕ꧀ꦖꦴꦥꦫꦺꦠꦺꦤ, ꦈꦥ꧀ꦥꦤ꧀ꦤꦴꦪ ꦕ ꦮꦶꦕꦶꦏꦶꦕ꧀ꦖꦴꦪ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦮꦶꦕꦶꦏꦶꦕ꧀ꦖꦴꦪ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦮꦶꦕꦶꦏꦶꦕ꧀ꦖꦴꦪ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦥꦚ꧀ꦕꦩꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦪꦁ ꦤꦶꦩꦶꦠ꧀ꦠꦁ ꦄꦴꦒꦩ꧀ꦩ ꦪꦁ ꦤꦶꦩꦶꦠ꧀ꦠꦁ ꦩꦤꦱꦶꦏꦫꦺꦴꦠꦺꦴ ꦄꦤꦤ꧀ꦠꦫꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦶ ꦠꦁ ꦤꦶꦩꦶꦠ꧀ꦠꦁ ꦤꦥ꧀ꦥꦗꦴꦤꦴꦠꦶ ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦪꦁ ꦤꦶꦩꦶꦠ꧀ꦠꦁ ꦄꦴꦒꦩ꧀ꦩ ꦪꦁ ꦤꦶꦩꦶꦠ꧀ꦠꦁ ꦩꦤꦱꦶꦏꦫꦺꦴꦠꦺꦴ ꦄꦤꦤ꧀ꦠꦫꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦶ, ꦠꦁ ꦤꦶꦩꦶꦠ꧀ꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ, ꦄꦴꦪꦱ꧀ꦩꦴ, ꦄꦴꦱꦮꦴꦤꦁ ꦑꦪꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦖꦛ꧀ꦜꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦆꦩꦺ ꦑꦺꦴ, ꦨꦶꦏ꧀ꦑꦸ, ꦖ ꦱꦩꦪꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ. ꦱꦠ꧀ꦠꦩꦁ.

꧘. ꦢꦸꦠꦶꦪꦱꦩꦪꦱꦸꦠ꧀ꦠꦁ

꧒꧘. ꦌꦏꦁ ꦱꦩꦪꦁ ꦱꦩ꧀ꦧꦲꦸꦭꦴ ꦡꦺꦫꦴ ꦨꦶꦏ꧀ꦑꦹ ꦧꦴꦫꦴꦟꦱꦶꦪꦁ ꦮꦶꦲꦫꦤ꧀ꦠꦶ ꦆꦱꦶꦥꦠꦤꦺ ꦩꦶꦒꦢꦴꦪꦺ. ꦄꦡ ꦑꦺꦴ ꦠꦺꦱꦁ ꦡꦺꦫꦴꦤꦁ ꦨꦶꦏ꧀ꦑꦹꦤꦁ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦴꦤꦁ ꦩꦟ꧀ꦝꦭꦩꦴꦭ꦳ꦺ ꦱꦤ꧀ꦤꦶꦱꦶꦤ꧀ꦤꦴꦤꦁ ꦱꦤ꧀ꦤꦶꦥꦠꦶꦠꦴꦤꦁ ꦄꦪꦩꦤ꧀ꦠꦫꦴꦏꦡꦴ ꦈꦢꦥꦴꦢꦶ – ‘‘ꦏꦺꦴ ꦤꦸ ꦑꦺꦴ, ꦄꦴꦮꦸꦱꦺꦴ, ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ?

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦡꦺꦫꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕ – ‘‘ꦤ ꦑꦺꦴ, ꦄꦴꦮꦸꦱꦺꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦺꦴ ꦥꦴꦢꦺ ꦥꦏ꧀ꦑꦴꦭꦺꦠ꧀ꦮꦴ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦕꦴꦫꦶꦠ꧀ꦠꦏꦶꦭꦩꦡꦺꦴꦥꦶꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦄꦥ꧀ꦥꦛꦶꦥ꧀ꦥꦱ꧀ꦱꦢ꧀ꦣꦺꦴ ꦲꦺꦴꦠꦶ, ꦨꦠ꧀ꦠꦏꦶꦭꦩꦡꦺꦴꦥꦶꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦄꦥ꧀ꦥꦛꦶꦥ꧀ꦥꦱ꧀ꦱꦢ꧀ꦣꦺꦴ ꦲꦺꦴꦠꦶ. ꦠꦱ꧀ꦩꦴ ꦱꦺꦴ ꦄꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦮꦶꦲꦴꦫꦥꦕ꧀ꦖꦴꦪꦴꦪꦁ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕ – ‘‘ꦤ ꦑꦺꦴ, ꦄꦴꦮꦸꦱꦺꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦱꦴꦪꦤ꧀ꦲꦱꦩꦪꦁ ꦥꦛꦶꦱꦭ꧀ꦭꦴꦤꦴ ꦮꦸꦛ꧀ꦜꦶꦠꦺꦴ ꦮꦶꦲꦴꦫꦥꦕ꧀ꦖꦴꦪꦴꦪꦁ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦪꦢꦺꦮꦱ꧀ꦱ ꦢꦶꦮꦴ ꦱꦩꦴꦣꦶꦤꦶꦩꦶꦠ꧀ꦠꦁ ꦩꦤꦱꦶꦏꦠꦁ ꦲꦺꦴꦠꦶ ꦠꦢꦺꦮꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦱꦩꦸꦢꦴꦕꦫꦠꦶ. ꦠꦱ꧀ꦩꦴ ꦱꦺꦴ ꦄꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦫꦠ꧀ꦠꦶꦪꦴ ꦥꦕ꧀ꦕꦹꦱꦱꦩꦪꦁ ꦥꦕ꧀ꦕꦸꦛ꧀ꦜꦴꦪ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕ – ‘‘ꦤ ꦑꦺꦴ, ꦄꦴꦮꦸꦱꦺꦴ, ꦱꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ. ꦪꦱ꧀ꦩꦶꦁ, ꦄꦴꦮꦸꦱꦺꦴ, ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦫꦠ꧀ꦠꦶꦪꦴ ꦥꦕ꧀ꦕꦹꦱꦱꦩꦪꦁ ꦥꦕ꧀ꦕꦸꦛ꧀ꦜꦴꦪ ꦤꦶꦱꦶꦤ꧀ꦤꦺꦴ ꦲꦺꦴꦠꦶ ꦥꦭ꧀ꦭꦔ꧀ꦏꦁ ꦄꦴꦨꦸꦗꦶꦠ꧀ꦮꦴ ꦈꦗꦸꦁ ꦏꦴꦪꦁ ꦥꦟꦶꦣꦴꦪ ꦥꦫꦶꦩꦸꦑꦁ ꦱꦠꦶꦁ ꦈꦥꦛ꧀ꦜꦥꦺꦠ꧀ꦮꦴ, ꦎꦗꦛ꧀ꦜꦴꦪꦶꦱ꧀ꦱ ꦠꦱ꧀ꦩꦶꦁ ꦱꦩꦪꦺ ꦏꦴꦪꦺꦴ ꦲꦺꦴꦠꦶ ꦦꦴꦱꦸꦱ꧀ꦱ ꦲꦺꦴꦠꦶ ꦧꦸꦢ꧀ꦣꦴꦤꦁ ꦱꦴꦱꦤꦁ ꦩꦤꦱꦶ ꦏꦴꦠꦸꦁ. ꦠꦱ꧀ꦩꦴ ꦱꦺꦴ ꦄꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’ꦤ꧀ꦠꦶ.

ꦌꦮꦁ ꦮꦸꦠ꧀ꦠꦺ ꦄꦴꦪꦱ꧀ꦩꦴ ꦩꦲꦴꦏꦕ꧀ꦕꦴꦤꦺꦴ ꦡꦺꦫꦺ ꦨꦶꦏ꧀ꦑꦹ ꦌꦠꦢꦮꦺꦴꦕ – ‘‘ꦱꦩ꧀ꦩꦸꦑꦴ ꦩꦺꦠꦁ, ꦄꦴꦮꦸꦱꦺꦴ, ꦨꦒꦮꦠꦺꦴ ꦱꦸꦠꦁ ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦁ – ‘ꦖꦪꦶꦩꦺ, ꦨꦶꦏ꧀ꦑꦸ, ꦱꦩꦪꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ’’’.

‘‘ꦏꦠꦩꦺ ꦖ? ꦆꦣ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦏꦴꦩꦫꦴꦒꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ ꦏꦴꦩꦫꦴꦒꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦏꦴꦩꦫꦴꦒꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦠꦶ, ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦏꦴꦩꦫꦴꦒꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦴꦩꦶ ꦏꦴꦩꦫꦴꦒꦥꦫꦺꦠꦺꦤ, ꦈꦥ꧀ꦥꦤ꧀ꦤꦱ꧀ꦱ ꦕ ꦏꦴꦩꦫꦴꦒꦱ꧀ꦱ ꦤꦶꦱ꧀ꦱꦫꦟꦁ ꦪꦡꦴꦨꦹꦠꦁ ꦤꦥ꧀ꦥꦗꦴꦤꦴꦩꦶ. ꦱꦴꦣꦸ ꦮꦠ ꦩꦺ ꦄꦴꦪꦱ꧀ꦩꦴ ꦏꦴꦩꦫꦴꦒꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦏꦴꦩꦫꦴꦒꦱ꧀ꦱ ꦥꦲꦴꦤꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦥꦜꦩꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦥꦸꦤ ꦕꦥꦫꦁ, ꦨꦶꦏ꧀ꦑꦸ, ꦪꦱ꧀ꦩꦶꦁ ꦱꦩꦪꦺ ꦨꦶꦏ꧀ꦑꦸ ꦧ꧀ꦪꦴꦥꦴꦢꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ…ꦥꦺ… ꦡꦶꦤꦩꦶꦢ꧀ꦣꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ… ꦈꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ… ꦮꦶꦕꦶꦏꦶꦕ꧀ꦖꦴꦥꦫꦶꦪꦸꦛ꧀ꦜꦶꦠꦺꦤ ꦕꦺꦠꦱꦴ ꦮꦶꦲꦫꦠꦶ… ꦪꦁ ꦤꦶꦩꦶꦠ꧀ꦠꦁ ꦄꦴꦒꦩ꧀ꦩ ꦪꦁ ꦤꦶꦩꦶꦠ꧀ꦠꦁ ꦩꦤꦱꦶꦏꦫꦺꦴꦠꦺꦴ ꦄꦤꦤ꧀ꦠꦫꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦶ, ꦠꦁ ꦤꦶꦩꦶꦠ꧀ꦠꦁ ꦤ ꦗꦴꦤꦴꦠꦶ ꦤ ꦥꦱ꧀ꦱꦠꦶ, ꦠꦱ꧀ꦩꦶꦁ ꦱꦩꦪꦺ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦈꦥꦱꦔ꧀ꦏꦩꦶꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ‘ꦄꦲꦁ ꦑꦺꦴ, ꦄꦴꦮꦸꦱꦺꦴ, ꦪꦁ ꦤꦶꦩꦶꦠ꧀ꦠꦁ ꦄꦴꦒꦩ꧀ꦩ ꦪꦁ ꦤꦶꦩꦶꦠ꧀ꦠꦁ ꦩꦤꦱꦶꦏꦫꦺꦴꦠꦺꦴ ꦄꦤꦤ꧀ꦠꦫꦴ ꦄꦴꦱꦮꦴꦤꦁ ꦑꦪꦺꦴ ꦲꦺꦴꦠꦶ ꦠꦁ ꦤꦶꦩꦶꦠ꧀ꦠꦁ ꦤ ꦗꦴꦤꦴꦩꦶ ꦤ ꦥꦱ꧀ꦱꦴꦩꦶ. ꦱꦴꦣꦸ ꦮꦠ ꦩꦺ ꦄꦴꦪꦱ꧀ꦩꦴ ꦄꦴꦱꦮꦴꦤꦁ ꦑꦪꦴꦪ ꦣꦩ꧀ꦩꦁ ꦢꦺꦱꦺꦠꦹ’ꦠꦶ. ꦠꦱ꧀ꦱ ꦩꦤꦺꦴꦨꦴꦮꦤꦷꦪꦺꦴ ꦨꦶꦏ꧀ꦑꦸ ꦄꦴꦱꦮꦴꦤꦁ ꦑꦪꦴꦪ ꦣꦩ꧀ꦩꦁ ꦢꦺꦱꦺꦠꦶ. ꦄꦪꦁ, ꦨꦶꦏ꧀ꦑꦸ, ꦖꦛ꧀ꦜꦺꦴ ꦱꦩꦪꦺꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸꦁ.

‘‘ꦱꦩ꧀ꦩꦸꦑꦴ ꦩꦺꦠꦁ, ꦄꦴꦮꦸꦱꦺꦴ, ꦨꦒꦮꦠꦺꦴ ꦱꦸꦠꦁ ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦁ – ‘ꦆꦩꦺ ꦑꦺꦴ, ꦨꦶꦏ꧀ꦑꦸ, ꦖ ꦱꦩꦪꦴ ꦩꦤꦺꦴꦨꦴꦮꦤꦷꦪꦱ꧀ꦱ ꦨꦶꦏ꧀ꦑꦸꦤꦺꦴ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦠꦸ’’’ꦤ꧀ꦠꦶ. ꦄꦛ꧀ꦜꦩꦁ.

꧙. ꦈꦢꦴꦪꦷꦱꦸꦠ꧀ꦠꦁ

꧒꧙. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦄꦴꦩꦤ꧀ꦠꦺꦱꦶ – ‘‘ꦏꦠꦶ ꦤꦸ ꦑꦺꦴ, ꦈꦢꦴꦪꦶ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ? ꦌꦮꦁ ꦮꦸꦠ꧀ꦠꦺ ꦄꦴꦪꦱ꧀ꦩꦴ ꦈꦢꦴꦪꦷ ꦠꦸꦟ꧀ꦲꦷ ꦄꦲꦺꦴꦱꦶ. ꦢꦸꦠꦶꦪꦩ꧀ꦥꦶ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦄꦴꦩꦤ꧀ꦠꦺꦱꦶ – ‘‘ꦏꦠꦶ ꦤꦸ ꦑꦺꦴ, ꦈꦢꦴꦪꦶ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ? ꦢꦸꦠꦶꦪꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦈꦢꦴꦪꦷ ꦠꦸꦟ꧀ꦲꦷ ꦄꦲꦺꦴꦱꦶ. ꦠꦠꦶꦪꦩ꧀ꦥꦶ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦄꦴꦩꦤ꧀ꦠꦺꦱꦶ – ‘‘ꦏꦠꦶ ꦤꦸ ꦑꦺꦴ, ꦈꦢꦴꦪꦶ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ? ꦠꦠꦶꦪꦩ꧀ꦥꦶ ꦑꦺꦴ ꦄꦴꦪꦱ꧀ꦩꦴ ꦈꦢꦴꦪꦷ ꦠꦸꦟ꧀ꦲꦷ ꦄꦲꦺꦴꦱꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦌꦠꦢꦮꦺꦴꦕ – ‘‘ꦱꦠ꧀ꦡꦴ ꦠꦁ, ꦄꦴꦮꦸꦱꦺꦴ ꦈꦢꦴꦪꦶ, ꦄꦴꦩꦤ꧀ꦠꦺꦱꦷ’’ꦠꦶ. ‘‘ꦱꦸꦟꦺꦴꦩꦲꦁ, ꦄꦴꦮꦸꦱꦺꦴ ꦄꦴꦤꦤ꧀ꦢ, ꦨꦒꦮꦠꦺꦴ. ꦆꦣ, ꦨꦤ꧀ꦠꦺ, ꦨꦶꦏ꧀ꦑꦸ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ – ꦱꦺꦪ꧀ꦪꦡꦶꦢꦁ ꦌꦏꦩ꧀ꦥꦶ ꦗꦴꦠꦶꦁ ꦢ꧀ꦮꦺꦥꦶ ꦗꦴꦠꦶꦪꦺꦴ…ꦥꦺ…. ꦆꦠꦶ ꦱꦴꦏꦴꦫꦁ ꦱꦈꦢ꧀ꦢꦺꦱꦁ ꦄꦤꦺꦏꦮꦶꦲꦶꦠꦁ ꦥꦸꦧ꧀ꦧꦺꦤꦶꦮꦴꦱꦁ ꦄꦤꦸꦱ꧀ꦱꦫꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤ’’ꦤ꧀ꦠꦶ.

ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦄꦚ꧀ꦚꦴꦱꦶꦁ ꦑꦺꦴ ꦄꦲꦁ, ꦄꦴꦤꦤ꧀ꦢ – ‘ꦤꦺꦮꦴꦪꦁ ꦈꦢꦴꦪꦷ ꦩꦺꦴꦓꦥꦸꦫꦶꦱꦺꦴ ꦄꦣꦶꦕꦶꦠ꧀ꦠꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦠꦷ’ꦠꦶ. ꦏꦠꦶ ꦤꦸ ꦑꦺꦴ, ꦄꦴꦤꦤ꧀ꦢ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ?

‘‘ꦥꦚ꧀ꦕ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦶ. ꦏꦠꦩꦴꦤꦶ ꦥꦚ꧀ꦕ? ꦆꦣ, ꦨꦤ꧀ꦠꦺ, ꦨꦶꦏ꧀ꦑꦸ ꦮꦶꦮꦶꦕ꧀ꦕꦺꦮ ꦏꦴꦩꦺꦲꦶ…ꦥꦺ… ꦠꦠꦶꦪꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦢꦶꦛ꧀ꦜꦣꦩ꧀ꦩꦱꦸꦑꦮꦶꦲꦴꦫꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦶꦏ꧀ꦑꦸ ꦄꦴꦭꦺꦴꦏꦱꦚ꧀ꦚꦁ ꦩꦤꦱꦶ ꦏꦫꦺꦴꦠꦶ, ꦢꦶꦮꦴ ꦱꦚ꧀ꦚꦁ ꦄꦣꦶꦛ꧀ꦜꦴꦠꦶ, ꦪꦡꦴ ꦢꦶꦮꦴ ꦠꦡꦴ ꦫꦠ꧀ꦠꦶꦁ, ꦪꦡꦴ ꦫꦠ꧀ꦠꦶꦁ ꦠꦡꦴ ꦢꦶꦮꦴ; ꦆꦠꦶ ꦮꦶꦮꦛꦺꦤ ꦕꦺꦠꦱꦴ ꦄꦥꦫꦶꦪꦺꦴꦤꦢ꧀ꦣꦺꦤ ꦱꦥ꧀ꦥꦨꦴꦱꦁ ꦕꦶꦠ꧀ꦠꦁ ꦨꦴꦮꦺꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦚꦴꦟꦢꦱ꧀ꦱꦤꦥ꧀ꦥꦛꦶꦭꦴꦨꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦶꦏ꧀ꦑꦸ ꦆꦩꦩꦺꦮ ꦏꦴꦪꦁ ꦈꦢ꧀ꦣꦁ ꦥꦴꦢꦠꦭꦴ ꦄꦣꦺꦴ ꦏꦺꦱꦩꦠ꧀ꦡꦏꦴ ꦠꦕꦥꦫꦶꦪꦤ꧀ꦠꦁ ꦥꦹꦫꦁ ꦤꦴꦤꦥ꧀ꦥꦏꦴꦫꦱ꧀ꦱ ꦄꦱꦸꦕꦶꦤꦺꦴ ꦥꦕ꧀ꦕꦮꦺꦏ꧀ꦑꦠꦶ – ‘ꦄꦠ꧀ꦡꦶ ꦆꦩꦱ꧀ꦩꦶꦁ ꦏꦴꦪꦺ ꦏꦺꦱꦴ ꦭꦺꦴꦩꦴ ꦤꦑꦴ ꦢꦤ꧀ꦠꦴ ꦠꦕꦺꦴ ꦩꦁꦱꦁ ꦤ꧀ꦲꦴꦫꦸ [ꦤꦲꦴꦫꦸ (ꦱꦷ. ꦥꦷ.) ꦢꦷ. ꦤꦶ. ꧒.꧓꧗꧗; ꦩ. ꦤꦶ. ꧑.꧑꧑꧐] ꦄꦛ꧀ꦜꦶ ꦄꦛ꧀ꦜꦶꦩꦶꦚ꧀ꦗꦁ ꦮꦏ꧀ꦏꦁ ꦲꦢꦪꦁ ꦪꦏꦤꦁ ꦏꦶꦭꦺꦴꦩꦏꦁ ꦥꦶꦲꦏꦁ ꦥꦥ꧀ꦦꦴꦱꦁ ꦄꦤ꧀ꦠꦁ ꦄꦤ꧀ꦠꦒꦸꦟꦁ ꦈꦢꦫꦶꦪꦁ ꦏꦫꦷꦱꦁ ꦥꦶꦠ꧀ꦠꦁ ꦱꦺꦩ꧀ꦲꦁ ꦥꦸꦧ꧀ꦧꦺꦴ ꦭꦺꦴꦲꦶꦠꦁ ꦱꦺꦢꦺꦴ ꦩꦺꦢꦺꦴ ꦄꦱ꧀ꦱꦸ ꦮꦱꦴ ꦑꦺꦭ꦳ꦺꦴ ꦱꦶꦔ꧀ꦓꦴꦟꦶꦏꦴ ꦭꦱꦶꦏꦴ ꦩꦸꦠ꧀ꦠ’ꦤ꧀ꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦏꦴꦩꦫꦴꦒꦥ꧀ꦥꦲꦴꦤꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦶꦏ꧀ꦑꦸ ꦱꦺꦪ꧀ꦪꦡꦴꦥꦶ ꦥꦱ꧀ꦱꦺꦪ꧀ꦪ ꦱꦫꦷꦫꦁ ꦱꦷꦮꦡꦶꦏꦴꦪ ꦖꦝ꧀ꦝꦶꦠꦁ [ꦖꦝ꧀ꦝꦶꦠꦁ (ꦱꦷ. ꦱ꧀ꦪꦴ. ꦥꦷ.)] ꦌꦏꦴꦲꦩꦠꦁ ꦮꦴ ꦢ꧀ꦮꦷꦲꦩꦠꦁ ꦮꦴ ꦠꦷꦲꦩꦠꦁ ꦮꦴ ꦈꦢ꧀ꦣꦸꦩꦴꦠꦏꦁ ꦮꦶꦤꦷꦭꦏꦁ ꦮꦶꦥꦸꦧ꧀ꦧꦏꦗꦴꦠꦁ. ꦱꦺꦴ ꦆꦩꦩꦺꦮ ꦏꦴꦪꦁ ꦌꦮꦁ [ꦌꦮꦤ꧀ꦠꦶ ꦆꦢꦁ ꦱꦠꦶꦥꦛ꧀ꦜꦴꦤꦱꦸꦠ꧀ꦠꦴꦢꦷꦱꦸ ꦤꦠ꧀ꦡꦶ] ꦈꦥꦱꦁꦲꦫꦠꦶ – ‘ꦄꦪꦩ꧀ꦥꦶ ꦑꦺꦴ ꦏꦴꦪꦺꦴ ꦌꦮꦁꦣꦩ꧀ꦩꦺꦴ ꦌꦮꦁꦨꦴꦮꦷ ꦌꦮꦁꦄꦤꦠꦷꦠꦺꦴ’’’ꦠꦶ [ꦌꦠꦁ ꦄꦤꦠꦷꦠꦺꦴꦠꦶ (ꦱꦷ.)].

‘‘ꦱꦺꦪ꧀ꦪꦡꦴꦥꦶ ꦮꦴ ꦥꦤ [ꦱꦺꦪ꧀ꦪꦡꦴ ꦮꦴ ꦥꦤ (ꦱ꧀ꦪꦴ.)] ꦥꦱ꧀ꦱꦺꦪ꧀ꦪ ꦱꦫꦷꦫꦁ ꦱꦷꦮꦡꦶꦏꦴꦪ ꦖꦝ꧀ꦝꦶꦠꦁ ꦏꦴꦏꦺꦲꦶ ꦮꦴ ꦑꦗ꧀ꦗꦩꦴꦤꦁ ꦏꦸꦭꦭꦺꦲꦶ ꦮꦴ ꦑꦗ꧀ꦗꦩꦴꦤꦁ ꦒꦶꦗ꧀ꦙꦺꦲꦶ ꦮꦴ ꦑꦗ꧀ꦗꦩꦴꦤꦁ ꦱꦸꦤꦑꦺꦲꦶ ꦮꦴ ꦑꦗ꧀ꦗꦩꦴꦤꦁ ꦱꦶꦔ꧀ꦒꦴꦭꦺꦲꦶ [ꦱꦶꦒꦴꦭꦺꦲꦶ (ꦱꦷ.)] ꦮꦴ ꦑꦗ꧀ꦗꦩꦴꦤꦁ ꦮꦶꦮꦶꦣꦺꦲꦶ ꦮꦴ ꦥꦴꦟꦏꦗꦴꦠꦺꦲꦶ ꦑꦗ꧀ꦗꦩꦴꦤꦁ. ꦱꦺꦴ ꦆꦩꦩꦺꦮ ꦏꦴꦪꦁ ꦌꦮꦁ ꦈꦥꦱꦁꦲꦫꦠꦶ – ‘ꦄꦪꦩ꧀ꦥꦶ ꦑꦺꦴ ꦏꦴꦪꦺꦴ ꦌꦮꦁꦣꦩ꧀ꦩꦺꦴ ꦌꦮꦁꦨꦴꦮꦷ ꦌꦮꦁꦄꦤꦠꦷꦠꦺꦴ’’’ꦠꦶ.

‘‘ꦱꦺꦪ꧀ꦪꦡꦴꦥꦶ ꦮꦴ ꦥꦤ ꦥꦱ꧀ꦱꦺꦪ꧀ꦪ ꦱꦫꦷꦫꦁ ꦱꦷꦮꦡꦶꦏꦴꦪ ꦖꦝ꧀ꦝꦶꦠꦁ ꦄꦛ꧀ꦜꦶꦏꦱꦔ꧀ꦑꦭꦶꦏꦁ ꦱꦩꦁꦱꦭꦺꦴꦲꦶꦠꦁ ꦤ꧀ꦲꦴꦫꦸꦱꦩ꧀ꦧꦤ꧀ꦣꦁ…ꦥꦺ… ꦄꦛ꧀ꦜꦶꦏꦱꦔ꧀ꦑꦭꦶꦏꦁ ꦤꦶꦩ꧀ꦩꦁꦱꦭꦺꦴꦲꦶꦠꦩꦏ꧀ꦑꦶꦠꦁ ꦤ꧀ꦲꦴꦫꦸꦱꦩ꧀ꦧꦤ꧀ꦣꦁ… ꦄꦛ꧀ꦜꦶꦏꦱꦔ꧀ꦑꦭꦶꦏꦁ ꦄꦥꦒꦠꦩꦁꦱꦭꦺꦴꦲꦶꦠꦁ ꦤ꧀ꦲꦴꦫꦸꦱꦩ꧀ꦧꦤ꧀ꦣꦁ. ꦄꦛ꧀ꦜꦶꦏꦴꦤꦶ ꦄꦥꦒꦠꦱꦩ꧀ꦧꦤ꧀ꦣꦴꦤꦶ ꦢꦶꦱꦴꦮꦶꦢꦶꦱꦴꦮꦶꦏ꧀ꦑꦶꦠ꧀ꦠꦴꦤꦶ [ꦢꦶꦱꦴꦮꦶꦢꦶꦱꦴꦱꦸ ꦮꦶꦏ꧀ꦑꦶꦠ꧀ꦠꦴꦤꦶ (ꦱꦷ.)], ꦄꦚ꧀ꦚꦺꦤ ꦲꦠ꧀ꦡꦛ꧀ꦜꦶꦏꦁ ꦄꦚ꧀ꦚꦺꦤ ꦥꦴꦢꦛ꧀ꦜꦶꦏꦁ ꦄꦚ꧀ꦚꦺꦤ ꦗꦔ꧀ꦓꦛ꧀ꦜꦶꦏꦁ ꦄꦚ꧀ꦚꦺꦤ ꦈꦴꦫꦸꦛ꧀ꦜꦶꦏꦁ ꦄꦚ꧀ꦚꦺꦤ ꦏꦛꦶꦛ꧀ꦜꦶꦏꦁ [ꦏꦛꦛ꧀ꦜꦶꦏꦁ (ꦱꦷ.)] ꦄꦚ꧀ꦚꦺꦤ [ꦥꦶꦛ꧀ꦜꦶꦏꦟ꧀ꦝꦏꦁ ꦄꦚ꧀ꦚꦺꦤ ꦱꦷꦱꦏꦛꦴꦲꦁ (ꦱꦷ. ꦥꦷ.), ꦥꦶꦛ꧀ꦜꦶꦏꦟ꧀ꦝꦏꦛ꧀ꦜꦶꦏꦁ ꦄꦚ꧀ꦚꦺꦤ ꦱꦷꦱꦏꦛꦴꦲꦁ (ꦱ꧀ꦪꦴ. ꦏꦁ.)] ꦦꦴꦱꦸꦏꦛ꧀ꦜꦶꦏꦁ ꦄꦚ꧀ꦚꦺꦤ ꦥꦶꦛ꧀ꦜꦶꦏꦟ꧀ꦛꦏꦛ꧀ꦜꦶꦏꦁ ꦄꦚ꧀ꦚꦺꦤ ꦑꦤ꧀ꦣꦛ꧀ꦜꦶꦏꦁ ꦄꦚ꧀ꦚꦺꦤ ꦒꦷꦮꦛ꧀ꦜꦶꦏꦁ ꦄꦚ꧀ꦚꦺꦤ ꦲꦤꦸꦏꦛ꧀ꦜꦶꦏꦁ ꦄꦚ꧀ꦚꦺꦤ ꦢꦤ꧀ꦠꦏꦛ꧀ꦜꦶꦏꦁ ꦄꦚ꧀ꦚꦺꦤ ꦱꦷꦱꦏꦛꦴꦲꦁ [ꦥꦶꦛ꧀ꦜꦶꦏꦟ꧀ꦝꦏꦁ ꦄꦚ꧀ꦚꦺꦤ ꦱꦷꦱꦏꦛꦴꦲꦁ (ꦱꦷ. ꦥꦷ.), ꦥꦶꦛ꧀ꦜꦶꦏꦟ꧀ꦝꦏꦛ꧀ꦜꦶꦏꦁ ꦄꦚ꧀ꦚꦺꦤ ꦱꦷꦱꦏꦛꦴꦲꦁ (ꦱ꧀ꦪꦴ. ꦏꦁ.)], ꦄꦛ꧀ꦜꦶꦏꦴꦤꦶ ꦱꦺꦠꦴꦤꦶ ꦱꦔ꧀ꦑꦮꦟ꧀ꦟꦥ꧀ꦥꦛꦶꦨꦴꦒꦴꦤꦶ [ꦱꦔ꧀ꦑꦮꦟ꧀ꦟꦹꦥꦤꦶꦨꦴꦤꦶ (ꦱꦷ. ꦱ꧀ꦪꦴ. ꦥꦷ.)] ꦄꦛ꧀ꦜꦶꦏꦴꦤꦶ ꦥꦸꦚ꧀ꦗꦏꦶꦠꦴꦤꦶ [ꦥꦸꦚ꧀ꦗꦏꦠꦴꦤꦶ (ꦥꦷ.)] ꦠꦺꦫꦺꦴꦮꦱ꧀ꦱꦶꦏꦴꦤꦶ ꦄꦛ꧀ꦜꦶꦏꦴꦤꦶ ꦥꦹꦠꦷꦤꦶ ꦕꦸꦟ꧀ꦟꦏꦗꦴꦠꦴꦤꦶ. ꦱꦺꦴ ꦆꦩꦩꦺꦮ ꦏꦴꦪꦁ ꦌꦮꦁ ꦈꦥꦱꦁꦲꦫꦠꦶ – ‘ꦄꦪꦩ꧀ꦥꦶ ꦑꦺꦴ ꦏꦴꦪꦺꦴ ꦌꦮꦁꦣꦩ꧀ꦩꦺꦴ ꦌꦮꦁꦨꦴꦮꦷ ꦌꦮꦁꦄꦤꦠꦷꦠꦺꦴ’ꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦄꦱ꧀ꦩꦶꦩꦴꦤꦱꦩꦸꦒ꧀ꦓꦴꦠꦴꦪ ꦱꦁꦮꦠ꧀ꦠꦠꦶ.

‘‘ꦥꦸꦤ ꦕꦥꦫꦁ, ꦨꦤ꧀ꦠꦺ, ꦨꦶꦏ꧀ꦑꦸ ꦱꦸꦑꦱ꧀ꦱ ꦕ ꦥꦲꦴꦤꦴ…ꦥꦺ… ꦕꦠꦸꦠ꧀ꦡꦁ ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦶ. ꦆꦢꦁ, ꦨꦤ꧀ꦠꦺ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦄꦤꦺꦏꦣꦴꦠꦸꦥꦛꦶꦮꦺꦣꦴꦪ ꦱꦁꦮꦠ꧀ꦠꦠꦶ. ꦆꦩꦴꦤꦶ ꦑꦺꦴ, ꦨꦤ꧀ꦠꦺ, ꦥꦚ꧀ꦕ ꦄꦤꦸꦱ꧀ꦱꦠꦶꦛ꧀ꦜꦴꦤꦴꦤꦷ’’ꦠꦶ.

‘‘ꦱꦴꦣꦸ, ꦱꦴꦣꦸ, ꦄꦴꦤꦤ꧀ꦢ! ꦠꦺꦤ ꦲꦶ ꦠ꧀ꦮꦁ, ꦄꦴꦤꦤ꧀ꦢ, ꦆꦢꦩ꧀ꦥꦶ ꦖꦛ꧀ꦜꦁ ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦣꦴꦫꦺꦲꦶ. ꦆꦣꦴꦤꦤ꧀ꦢ, ꦨꦶꦏ꧀ꦑꦸ ꦱꦠꦺꦴꦮ ꦄꦨꦶꦏ꧀ꦏꦩꦠꦶ ꦱꦠꦺꦴꦮ ꦥꦛꦶꦏ꧀ꦏꦩꦠꦶ ꦱꦠꦺꦴꦮ ꦠꦶꦛ꧀ꦜꦠꦶ ꦱꦠꦺꦴꦮ ꦤꦶꦱꦷꦢꦠꦶ ꦱꦠꦺꦴꦮ ꦱꦺꦪ꧀ꦪꦁ ꦏꦥ꧀ꦥꦺꦠꦶ ꦱꦠꦺꦴꦮ ꦏꦩ꧀ꦩꦁ ꦄꦣꦶꦛ꧀ꦜꦴꦠꦶ. ꦆꦢꦁ, ꦄꦴꦤꦤ꧀ꦢ, ꦄꦤꦸꦱ꧀ꦱꦠꦶꦛ꧀ꦜꦴꦤꦁ ꦌꦮꦁ ꦨꦴꦮꦶꦠꦁ ꦌꦮꦁ ꦧꦲꦸꦭꦷꦏꦠꦁ ꦱꦠꦶꦱꦩ꧀ꦥꦗꦚ꧀ꦚꦴꦪ ꦱꦁꦮꦠ꧀ꦠꦠꦷ’’ꦠꦶ. ꦤꦮꦩꦁ.

꧑꧐. ꦄꦤꦸꦠ꧀ꦠꦫꦶꦪꦱꦸꦠ꧀ꦠꦁ

꧓꧐. ‘‘ꦖꦪꦶꦩꦴꦤꦶ, ꦨꦶꦏ꧀ꦑꦮꦺ, ꦄꦤꦸꦠ꧀ꦠꦫꦶꦪꦴꦤꦶ. ꦏꦠꦩꦴꦤꦶ ꦖ? ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ, ꦱꦮꦤꦴꦤꦸꦠ꧀ꦠꦫꦶꦪꦁ, ꦭꦴꦨꦴꦤꦸꦠ꧀ꦠꦫꦶꦪꦁ, ꦱꦶꦏ꧀ꦑꦴꦤꦸꦠ꧀ꦠꦫꦶꦪꦁ, ꦥꦴꦫꦶꦕꦫꦶꦪꦴꦤꦸꦠ꧀ꦠꦫꦶꦪꦁ, ꦄꦤꦸꦱ꧀ꦱꦠꦴꦤꦸꦠ꧀ꦠꦫꦶꦪꦤ꧀ꦠꦶ.

‘‘ꦏꦠꦩꦚ꧀ꦕ, ꦨꦶꦏ꧀ꦑꦮꦺ, ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦲꦠ꧀ꦡꦶꦫꦠꦤꦩ꧀ꦥꦶ ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦄꦱ꧀ꦱꦫꦠꦤꦩ꧀ꦥꦶ ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦩꦟꦶꦫꦠꦤꦩ꧀ꦥꦶ ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦱꦩꦟꦁ ꦮꦴ ꦧ꧀ꦫꦴꦲ꧀ꦩꦟꦁ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦁ ꦩꦶꦕ꧀ꦖꦴꦥꦛꦶꦥꦤ꧀ꦤꦁ ꦢꦱ꧀ꦱꦤꦴꦪ ꦒꦕ꧀ꦖꦠꦶ. ꦄꦠ꧀ꦡꦺꦠꦁ, ꦨꦶꦏ꧀ꦑꦮꦺ, ꦢꦱ꧀ꦱꦤꦁ; ꦤꦺꦠꦁ ꦤꦠ꧀ꦡꦷꦠꦶ ꦮꦢꦴꦩꦶ. ꦠꦚ꧀ꦕ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦢꦱ꧀ꦱꦤꦁ ꦲꦷꦤꦁ ꦒꦩ꧀ꦩꦁ ꦥꦺꦴꦡꦸꦗ꧀ꦗꦤꦶꦏꦁ ꦄꦤꦫꦶꦪꦁ ꦄꦤꦠ꧀ꦡꦱꦁꦲꦶꦠꦁ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦢꦱ꧀ꦱꦤꦴꦪ ꦒꦕ꧀ꦖꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦢꦱ꧀ꦱꦤꦴꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ [ꦱꦺꦴꦏꦥꦫꦶꦢ꧀ꦢꦮꦴꦤꦁ (ꦱꦷ.)] ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ [ꦄꦠ꧀ꦡꦒꦩꦴꦪ (ꦱꦷ.)] ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦢꦱ꧀ꦱꦤꦴꦪ ꦒꦕ꧀ꦖꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ. ꦆꦠꦶ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ.

‘‘ꦱꦮꦤꦴꦤꦸꦠ꧀ꦠꦫꦶꦪꦚ꧀ꦕ ꦏꦡꦁ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦨꦺꦫꦶꦱꦢ꧀ꦢꦩ꧀ꦥꦶ [ꦨꦺꦫꦶꦱꦢ꧀ꦢꦱ꧀ꦱꦥꦶ (ꦏ.) ꦌꦮꦁ ꦮꦷꦟꦴꦱꦢ꧀ꦢꦩ꧀ꦥꦶꦆꦕ꧀ꦕꦴꦢꦷꦱꦸꦥꦶ] ꦱꦮꦤꦴꦪ ꦒꦕ꧀ꦖꦠꦶ, ꦮꦷꦟꦴꦱꦢ꧀ꦢꦩ꧀ꦥꦶ ꦱꦮꦤꦴꦪ ꦒꦕ꧀ꦖꦠꦶ, ꦒꦷꦠꦱꦢ꧀ꦢꦩ꧀ꦥꦶ ꦱꦮꦤꦴꦪ ꦒꦕ꧀ꦖꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦱꦮꦤꦴꦪ ꦒꦕ꧀ꦖꦠꦶ, ꦱꦩꦟꦱ꧀ꦱ ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦱ꧀ꦱ ꦩꦶꦕ꧀ꦖꦴꦥꦛꦶꦥꦤ꧀ꦤꦱ꧀ꦱ ꦣꦩ꧀ꦩꦱ꧀ꦱꦮꦤꦴꦪ ꦒꦕ꧀ꦖꦠꦶ. ꦄꦠ꧀ꦡꦺꦠꦁ, ꦨꦶꦏ꧀ꦑꦮꦺ, ꦱꦮꦤꦁ; ꦤꦺꦠꦁ ꦤꦠ꧀ꦡꦷꦠꦶ ꦮꦢꦴꦩꦶ. ꦠꦚ꧀ꦕ ꦑꦺꦴ ꦌꦠꦁ, ꦨꦶꦏ꧀ꦑꦮꦺ, ꦱꦮꦤꦁ ꦲꦷꦤꦁ ꦒꦩ꧀ꦩꦁ ꦥꦺꦴꦡꦸꦗ꧀ꦗꦤꦶꦏꦁ ꦄꦤꦫꦶꦪꦁ ꦄꦤꦠ꧀ꦡꦱꦁꦲꦶꦠꦁ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦱ꧀ꦱ ꦮꦴ ꦠꦡꦴꦒꦠꦱꦴꦮꦏꦱ꧀ꦱ ꦮꦴ ꦣꦩ꧀ꦩꦱ꧀ꦱꦮꦤꦴꦪ ꦒꦕ꧀ꦖꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦱꦮꦤꦴꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦱ꧀ꦱ ꦮꦴ ꦠꦡꦴꦒꦠꦱꦴꦮꦏꦱ꧀ꦱ ꦮꦴ ꦣꦩ꧀ꦩꦱ꧀ꦱꦮꦤꦴꦪ ꦒꦕ꧀ꦖꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦮꦤꦴꦤꦸꦠ꧀ꦠꦫꦶꦪꦁ. ꦆꦠꦶ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ, ꦱꦮꦤꦴꦤꦸꦠ꧀ꦠꦫꦶꦪꦁ.

‘‘ꦭꦴꦨꦴꦤꦸꦠ꧀ꦠꦫꦶꦪꦚ꧀ꦕ ꦏꦡꦁ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦥꦸꦠ꧀ꦠꦭꦴꦨꦩ꧀ꦥꦶ ꦭꦨꦠꦶ, ꦢꦴꦫꦭꦴꦨꦩ꧀ꦥꦶ ꦭꦨꦠꦶ, ꦣꦤꦭꦴꦨꦩ꧀ꦥꦶ ꦭꦨꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦭꦴꦨꦁ ꦭꦨꦠꦶ, ꦱꦩꦟꦺ ꦮꦴ ꦧ꧀ꦫꦴꦲ꧀ꦩꦟꦺ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦺ ꦩꦶꦕ꧀ꦖꦴꦥꦛꦶꦥꦤ꧀ꦤꦺ ꦱꦢ꧀ꦣꦁ ꦥꦛꦶꦭꦨꦠꦶ. ꦄꦠ꧀ꦡꦺꦱꦺꦴ, ꦨꦶꦏ꧀ꦑꦮꦺ, ꦭꦴꦨꦺꦴ; ꦤꦺꦱꦺꦴ ꦤꦠ꧀ꦡꦷꦠꦶ ꦮꦢꦴꦩꦶ. ꦱꦺꦴ ꦕ ꦑꦺꦴ ꦌꦱꦺꦴ, ꦨꦶꦏ꧀ꦑꦮꦺ, ꦭꦴꦨꦺꦴ ꦲꦷꦤꦺꦴ ꦒꦩ꧀ꦩꦺꦴ ꦥꦺꦴꦡꦸꦗ꧀ꦗꦤꦶꦏꦺꦴ ꦄꦤꦫꦶꦪꦺꦴ ꦄꦤꦠ꧀ꦡꦱꦁꦲꦶꦠꦺꦴ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦺ ꦮꦴ ꦠꦡꦴꦒꦠꦱꦴꦮꦏꦺ ꦮꦴ ꦱꦢ꧀ꦣꦁ ꦥꦛꦶꦭꦨꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦭꦴꦨꦴꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦺ ꦮꦴ ꦠꦡꦴꦒꦠꦱꦴꦮꦏꦺ ꦮꦴ ꦱꦢ꧀ꦣꦁ ꦥꦛꦶꦭꦨꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦭꦴꦨꦴꦤꦸꦠ꧀ꦠꦫꦶꦪꦁ. ꦆꦠꦶ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ, ꦱꦮꦤꦴꦤꦸꦠ꧀ꦠꦫꦶꦪꦁ, ꦭꦴꦨꦴꦤꦸꦠ꧀ꦠꦫꦶꦪꦁ.

‘‘ꦱꦶꦏ꧀ꦑꦴꦤꦸꦠ꧀ꦠꦫꦶꦪꦚ꧀ꦕ ꦏꦡꦁ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦲꦠ꧀ꦡꦶꦱ꧀ꦩꦶꦩ꧀ꦥꦶ ꦱꦶꦏ꧀ꦑꦠꦶ, ꦄꦱ꧀ꦱꦱ꧀ꦩꦶꦩ꧀ꦥꦶ ꦱꦶꦏ꧀ꦑꦠꦶ, ꦫꦡꦱ꧀ꦩꦶꦩ꧀ꦥꦶ ꦱꦶꦏ꧀ꦑꦠꦶ, ꦣꦤꦸꦱ꧀ꦩꦶꦩ꧀ꦥꦶ ꦱꦶꦏ꧀ꦑꦠꦶ, ꦡꦫꦸꦱ꧀ꦩꦶꦩ꧀ꦥꦶ ꦱꦶꦏ꧀ꦑꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦱꦶꦏ꧀ꦑꦠꦶ, ꦱꦩꦟꦱ꧀ꦱ ꦮꦴ ꦧ꧀ꦫꦴꦲ꧀ꦩꦟꦱ꧀ꦱ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦱ꧀ꦱ ꦩꦶꦕ꧀ꦖꦴꦥꦛꦶꦥꦤ꧀ꦤꦱ꧀ꦱ [ꦩꦶꦕ꧀ꦖꦴꦥꦛꦶꦥꦠ꧀ꦠꦶꦁ (ꦏ.)] ꦱꦶꦏ꧀ꦑꦠꦶ. ꦄꦠ꧀ꦡꦺꦱꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦴ; ꦤꦺꦱꦴ ꦤꦠ꧀ꦡꦷꦠꦶ ꦮꦢꦴꦩꦶ. ꦱꦴ ꦕ ꦑꦺꦴ ꦌꦱꦴ, ꦨꦶꦏ꧀ꦑꦮꦺ, ꦱꦶꦏ꧀ꦑꦴ ꦲꦷꦤꦴ ꦒꦩ꧀ꦩꦴ ꦥꦺꦴꦡꦸꦗ꧀ꦗꦤꦶꦏꦴ ꦄꦤꦫꦶꦪꦴ ꦄꦤꦠ꧀ꦡꦱꦁꦲꦶꦠꦴ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦥ꧀ꦥꦮꦺꦢꦶꦠꦺ ꦣꦩ꧀ꦩꦮꦶꦤꦪꦺ ꦄꦣꦶꦱꦷꦭꦩ꧀ꦥꦶ ꦱꦶꦏ꧀ꦑꦠꦶ, ꦄꦣꦶꦕꦶꦠ꧀ꦠꦩ꧀ꦥꦶ ꦱꦶꦏ꧀ꦑꦠꦶ, ꦄꦣꦶꦥꦚ꧀ꦚꦩ꧀ꦥꦶ ꦱꦶꦏ꧀ꦑꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦱꦶꦏ꧀ꦑꦴꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦥ꧀ꦥꦮꦺꦢꦶꦠꦺ ꦣꦩ꧀ꦩꦮꦶꦤꦪꦺ ꦄꦣꦶꦱꦷꦭꦩ꧀ꦥꦶ ꦱꦶꦏ꧀ꦑꦠꦶ, ꦄꦣꦶꦕꦶꦠ꧀ꦠꦩ꧀ꦥꦶ ꦱꦶꦏ꧀ꦑꦠꦶ, ꦄꦣꦶꦥꦚ꧀ꦚꦩ꧀ꦥꦶ ꦱꦶꦏ꧀ꦑꦠꦶ, ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦱꦶꦏ꧀ꦑꦴꦤꦸꦠ꧀ꦠꦫꦶꦪꦁ. ꦆꦠꦶ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ, ꦱꦮꦤꦴꦤꦸꦠ꧀ꦠꦫꦶꦪꦁ, ꦭꦴꦨꦴꦤꦸꦠ꧀ꦠꦫꦶꦪꦁ, ꦱꦶꦏ꧀ꦑꦴꦤꦸꦠ꧀ꦠꦫꦶꦪꦁ.

‘‘ꦥꦴꦫꦶꦕꦫꦶꦪꦴꦤꦸꦠ꧀ꦠꦫꦶꦪꦚ꧀ꦕ ꦏꦡꦁ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦑꦠ꧀ꦠꦶꦪꦩ꧀ꦥꦶ ꦥꦫꦶꦕꦫꦠꦶ, ꦧ꧀ꦫꦴꦲ꧀ꦩꦟꦩ꧀ꦥꦶ ꦥꦫꦶꦕꦫꦠꦶ, ꦒꦲꦥꦠꦶꦩ꧀ꦥꦶ ꦥꦫꦶꦕꦫꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦥꦫꦶꦕꦫꦠꦶ, ꦱꦩꦟꦁ ꦮꦴ ꦧ꧀ꦫꦴꦲ꧀ꦩꦟꦁ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦁ ꦩꦶꦕ꧀ꦖꦴꦥꦛꦶꦥꦤ꧀ꦤꦁ ꦥꦫꦶꦕꦫꦠꦶ. ꦄꦠ꧀ꦡꦺꦱꦴ, ꦨꦶꦏ꧀ꦑꦮꦺ, ꦥꦴꦫꦶꦕꦫꦶꦪꦴ; ꦤꦺꦱꦴ ꦤꦠ꧀ꦡꦷꦠꦶ ꦮꦢꦴꦩꦶ. ꦱꦴ ꦕ ꦑꦺꦴ ꦌꦱꦴ, ꦨꦶꦏ꧀ꦑꦮꦺ, ꦥꦴꦫꦶꦕꦫꦶꦪꦴ ꦲꦷꦤꦴ ꦒꦩ꧀ꦩꦴ ꦥꦺꦴꦡꦸꦗ꧀ꦗꦤꦶꦏꦴ ꦄꦤꦫꦶꦪꦴ ꦄꦤꦠ꧀ꦡꦱꦁꦲꦶꦠꦴ, ꦤ ꦤꦶꦧ꧀ꦧꦶꦢꦴꦪ…ꦥꦺ… ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦥꦫꦶꦕꦫꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦥꦴꦫꦶꦕꦫꦶꦪꦴꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦥꦫꦶꦕꦫꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦥꦴꦫꦶꦕꦫꦶꦪꦴꦤꦸꦠ꧀ꦠꦫꦶꦪꦁ. ꦆꦠꦶ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ, ꦱꦮꦤꦴꦤꦸꦠ꧀ꦠꦫꦶꦪꦁ, ꦭꦴꦨꦴꦤꦸꦠ꧀ꦠꦫꦶꦪꦁ, ꦱꦶꦏ꧀ꦑꦴꦤꦸꦠ꧀ꦠꦫꦶꦪꦁ, ꦥꦴꦫꦶꦕꦫꦶꦪꦴꦤꦸꦠ꧀ꦠꦫꦶꦪꦁ.

‘‘ꦄꦤꦸꦱ꧀ꦱꦠꦴꦤꦸꦠ꧀ꦠꦫꦶꦪꦚ꧀ꦕ ꦏꦡꦁ ꦲꦺꦴꦠꦶ? ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ ꦥꦸꦠ꧀ꦠꦭꦴꦨꦩ꧀ꦥꦶ ꦄꦤꦸꦱ꧀ꦱꦫꦠꦶ, ꦢꦴꦫꦭꦴꦨꦩ꧀ꦥꦶ ꦄꦤꦸꦱ꧀ꦱꦫꦠꦶ, ꦣꦤꦭꦴꦨꦩ꧀ꦥꦶ ꦄꦤꦸꦱ꧀ꦱꦫꦠꦶ, ꦈꦕ꧀ꦕꦴꦮꦕꦁ ꦮꦴ ꦥꦤ ꦭꦴꦨꦁ ꦄꦤꦸꦱ꧀ꦱꦫꦠꦶ, ꦱꦩꦟꦁ ꦮꦴ ꦧ꧀ꦫꦴꦲ꧀ꦩꦟꦁ ꦮꦴ ꦩꦶꦕ꧀ꦖꦴꦢꦶꦛ꧀ꦜꦶꦏꦁ ꦩꦶꦕ꧀ꦖꦴꦥꦛꦶꦥꦤ꧀ꦤꦁ ꦄꦤꦸꦱ꧀ꦱꦫꦠꦶ. ꦄꦠ꧀ꦡꦺꦱꦴ, ꦨꦶꦏ꧀ꦑꦮꦺ, ꦄꦤꦸꦱ꧀ꦱꦠꦶ; ꦤꦺꦱꦴ ꦤꦠ꧀ꦡꦷꦠꦶ ꦮꦢꦴꦩꦶ. ꦱꦴ ꦕ ꦑꦺꦴ ꦌꦱꦴ, ꦨꦶꦏ꧀ꦑꦮꦺ, ꦄꦤꦸꦱ꧀ꦱꦠꦶ ꦲꦷꦤꦴ ꦒꦩ꧀ꦩꦴ ꦥꦺꦴꦡꦸꦗ꧀ꦗꦤꦶꦏꦴ ꦄꦤꦫꦶꦪꦴ ꦄꦤꦠ꧀ꦡꦱꦁꦲꦶꦠꦴ, ꦤ ꦤꦶꦧ꧀ꦧꦶꦢꦴꦪ ꦤ ꦮꦶꦫꦴꦒꦴꦪ ꦤ ꦤꦶꦫꦺꦴꦣꦴꦪ ꦤ ꦈꦥꦱꦩꦴꦪ ꦤ ꦄꦨꦶꦚ꧀ꦚꦴꦪ ꦤ ꦱꦩ꧀ꦧꦺꦴꦣꦴꦪ ꦤ ꦤꦶꦧ꧀ꦧꦴꦤꦴꦪ ꦱꦁꦮꦠ꧀ꦠꦠꦶ. ꦪꦺꦴ ꦕ ꦑꦺꦴ, ꦨꦶꦏ꧀ꦑꦮꦺ, ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦄꦤꦸꦱ꧀ꦱꦫꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦌꦠꦢꦴꦤꦸꦠ꧀ꦠꦫꦶꦪꦁ, ꦨꦶꦏ꧀ꦑꦮꦺ, ꦄꦤꦸꦱ꧀ꦱꦠꦷꦤꦁ ꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦪꦴ ꦱꦺꦴꦏꦥꦫꦶꦢꦺꦮꦴꦤꦁ ꦱꦩꦠꦶꦏ꧀ꦏꦩꦴꦪ ꦢꦸꦏ꧀ꦑꦢꦺꦴꦩꦤꦱ꧀ꦱꦴꦤꦁ ꦄꦠ꧀ꦡꦔ꧀ꦒꦩꦴꦪ ꦚꦴꦪꦱ꧀ꦱ ꦄꦣꦶꦒꦩꦴꦪ ꦤꦶꦧ꧀ꦧꦴꦤꦱ꧀ꦱ ꦱꦕ꧀ꦖꦶꦏꦶꦫꦶꦪꦴꦪ, ꦪꦢꦶꦢꦁ ꦠꦡꦴꦒꦠꦁ ꦮꦴ ꦠꦡꦴꦒꦠꦱꦴꦮꦏꦁ ꦮꦴ ꦄꦤꦸꦱ꧀ꦱꦫꦠꦶ ꦤꦶꦮꦶꦛ꧀ꦜꦱꦢ꧀ꦣꦺꦴ ꦤꦶꦮꦶꦛ꧀ꦜꦥꦺꦩꦺꦴ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ. ꦆꦢꦁ ꦮꦸꦕ꧀ꦕꦠꦶ, ꦨꦶꦏ꧀ꦑꦮꦺ, ꦄꦤꦸꦱ꧀ꦱꦠꦴꦤꦸꦠ꧀ꦠꦫꦶꦪꦁ. ꦆꦩꦴꦤꦶ ꦑꦺꦴ, ꦨꦶꦏ꧀ꦑꦮꦺ, ꦖ ꦄꦤꦸꦠ꧀ꦠꦫꦶꦪꦴꦤꦷ’’ꦠꦶ.

‘‘ꦪꦺ ꦢꦱ꧀ꦱꦤꦴꦤꦸꦠ꧀ꦠꦫꦁ ꦭꦢ꧀ꦣꦴ [ꦪꦺ ꦢꦱ꧀ꦱꦤꦮꦫꦁ ꦭꦢ꧀ꦣꦴ (ꦱꦷ. ꦥꦷ.), ꦢꦱ꧀ꦱꦤꦴꦤꦸꦠ꧀ꦠꦫꦶꦪꦁ ꦭꦢ꧀ꦣꦴ (ꦱ꧀ꦪꦴ. ꦏꦁ.)], ꦱꦮꦤꦚ꧀ꦕ ꦄꦤꦸꦠ꧀ꦠꦫꦁ;

ꦭꦴꦨꦴꦤꦸꦠ꧀ꦠꦫꦶꦪꦁ ꦭꦢ꧀ꦣꦴ, ꦱꦶꦏ꧀ꦑꦴꦤꦸꦠ꧀ꦠꦫꦶꦪꦺ ꦫꦠꦴ [ꦄꦤꦸꦠ꧀ꦠꦫꦶꦪꦁ ꦠꦡꦴ (ꦏ.)].

‘‘ꦈꦥꦛ꧀ꦜꦶꦠꦴ ꦥꦴꦫꦶꦕꦫꦶꦪꦴ, ꦨꦴꦮꦪꦤ꧀ꦠꦶ ꦄꦤꦸꦱ꧀ꦱꦠꦶꦁ;

ꦮꦶꦮꦺꦏꦥ꧀ꦥꦛꦶꦱꦁꦪꦸꦠ꧀ꦠꦁ, ꦑꦺꦩꦁ ꦄꦩꦠꦒꦴꦩꦶꦤꦶꦁ.

‘‘ꦄꦥ꧀ꦥꦩꦴꦢꦺ ꦥꦩꦸꦢꦶꦠꦴ, ꦤꦶꦥꦏꦴ ꦱꦷꦭꦱꦁꦮꦸꦠꦴ;

ꦠꦺ ꦮꦺ ꦏꦴꦭꦺꦤ ꦥꦕ꧀ꦕꦺꦤ꧀ꦠꦶ [ꦥꦕ꧀ꦕꦤ꧀ꦠꦶ (ꦱ꧀ꦪꦴ. ꦏ.)], ꦪꦠ꧀ꦡ ꦢꦸꦏ꧀ꦑꦁ ꦤꦶꦫꦸꦗ꧀ꦙꦠꦷ’’ꦠꦶ. ꦢꦱꦩꦁ;

ꦄꦤꦸꦠ꧀ꦠꦫꦶꦪꦮꦒ꧀ꦒꦺꦴ [ꦱꦴꦩꦏꦮꦒ꧀ꦒꦺꦴ (ꦏ.)] ꦠꦠꦶꦪꦺꦴ.