꧗. ꦥꦜꦩꦩꦲꦴꦥꦚ꧀ꦲꦴꦱꦸꦠ꧀ꦠꦁ

꧒꧗. ꦌꦏꦁ ꦱꦩꦪꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦨꦶꦏ꧀ꦑꦹ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦮꦶꦱꦶꦁꦱꦸ. ꦄꦡ ꦑꦺꦴ ꦠꦺꦱꦁ ꦨꦶꦏ꧀ꦑꦹꦤꦁ ꦌꦠꦢꦲꦺꦴꦱꦶ – ‘‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠꦸꦁ; ꦪꦁꦤꦹꦤ ꦩꦪꦁ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪꦴꦩꦴ’’ꦠꦶ.

ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦲꦶ ꦄꦚ꧀ꦚꦠꦶꦠ꧀ꦡꦶꦪꦺꦲꦶ ꦥꦫꦶꦧ꧀ꦧꦴꦗꦏꦺꦲꦶ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦁꦱꦸ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺ ꦑꦺꦴ ꦠꦺ ꦨꦶꦏ꧀ꦑꦹ ꦠꦺ ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦠꦢꦮꦺꦴꦕꦸꦁ –

‘‘ꦱꦩꦟꦺꦴ, ꦄꦴꦮꦸꦱꦺꦴ, ꦒꦺꦴꦠꦩꦺꦴ ꦱꦴꦮꦏꦴꦤꦁ ꦌꦮꦁ ꦣꦩ꧀ꦩꦁ ꦢꦺꦱꦺꦠꦶ – ‘ꦌꦡ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦗꦴꦤꦴꦡ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦚ꧀ꦚꦴꦪ ꦮꦶꦲꦫꦡꦴ’ꦠꦶ; ꦩꦪꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦱꦴꦮꦏꦴꦤꦁ ꦌꦮꦁ ꦣꦩ꧀ꦩꦁ ꦢꦺꦱꦺꦩ – ‘ꦌꦡ ꦠꦸꦩ꧀ꦲꦺ, ꦄꦴꦮꦸꦱꦺꦴ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦗꦴꦤꦴꦡ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦚ꧀ꦚꦴꦪ ꦮꦶꦲꦫꦡꦴ’ꦠꦶ. ꦆꦣ ꦤꦺꦴ, ꦄꦴꦮꦸꦱꦺꦴ, ꦏꦺꦴ ꦮꦶꦱꦺꦱꦺꦴ ꦏꦺꦴ ꦄꦣꦶꦥ꧀ꦥꦪꦴꦱꦺꦴ ꦏꦶꦁ ꦤꦴꦤꦴꦏꦫꦟꦁ ꦱꦩꦟꦱ꧀ꦱ ꦮꦴ ꦒꦺꦴꦠꦩꦱ꧀ꦱ ꦄꦩ꧀ꦲꦴꦏꦁ ꦮꦴ, ꦪꦢꦶꦢꦁ ꦣꦩ꧀ꦩꦢꦺꦱꦤꦴꦪ ꦮꦴ ꦣꦩ꧀ꦩꦢꦺꦱꦤꦁ ꦄꦤꦸꦱꦴꦱꦤꦶꦪꦴ ꦮꦴ ꦄꦤꦸꦱꦴꦱꦤꦶ’’ꦤ꧀ꦠꦶ?

ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦨꦴꦱꦶꦠꦁ ꦤꦺꦮ ꦄꦨꦶꦤꦤ꧀ꦢꦶꦁꦱꦸ ꦤꦥ꧀ꦥꦛꦶꦏ꧀ꦏꦺꦴꦱꦶꦁꦱꦸ. ꦄꦤꦨꦶꦤꦤ꧀ꦢꦶꦠ꧀ꦮꦴ ꦄꦥ꧀ꦥꦛꦶꦏ꧀ꦏꦺꦴꦱꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦩꦶꦁꦱꦸ – ‘‘ꦨꦒꦮꦠꦺꦴ ꦱꦤ꧀ꦠꦶꦏꦺ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦶꦱ꧀ꦱꦴꦩꦴ’’ꦠꦶ.

ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥꦛꦶꦏ꧀ꦏꦤ꧀ꦠꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ –

‘‘ꦆꦣ ꦩꦪꦁ, ꦨꦤ꧀ꦠꦺ, ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦮꦶꦱꦶꦩ꧀ꦲꦴ. ꦠꦺꦱꦁ ꦤꦺꦴ, ꦨꦤ꧀ꦠꦺ, ꦄꦩ꧀ꦲꦴꦏꦁ ꦌꦠꦢꦲꦺꦴꦱꦶ – ‘ꦄꦠꦶꦥ꧀ꦥꦒꦺꦴ ꦑꦺꦴ ꦠꦴꦮ ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠꦸꦁ; ꦪꦁꦤꦹꦤ ꦩꦪꦁ ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦺꦪ꧀ꦪꦴꦩꦴ’ꦠꦶ. ꦄꦡ ꦑꦺꦴ ꦩꦪꦁ, ꦨꦤ꧀ꦠꦺ, ꦪꦺꦤ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦄꦴꦫꦴꦩꦺꦴ ꦠꦺꦤꦸꦥꦱꦔ꧀ꦏꦩꦶꦩ꧀ꦲꦴ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦺꦲꦶ ꦄꦚ꧀ꦚꦠꦶꦠ꧀ꦡꦶꦪꦺꦲꦶ ꦥꦫꦶꦧ꧀ꦧꦴꦗꦏꦺꦲꦶ ꦱꦢ꧀ꦣꦶꦁ ꦱꦩ꧀ꦩꦺꦴꦢꦶꦩ꧀ꦲꦴ. ꦱꦩ꧀ꦩꦺꦴꦢꦤꦷꦪꦁ ꦏꦡꦁ ꦱꦴꦫꦟꦷꦪꦁ ꦮꦷꦠꦶꦱꦴꦫꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦩ꧀ꦲꦴ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺ ꦑꦺꦴ, ꦨꦤ꧀ꦠꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦄꦩ꧀ꦲꦺ ꦌꦠꦢꦮꦺꦴꦕꦸꦁ –

‘ꦱꦩꦟꦺꦴ, ꦄꦴꦮꦸꦱꦺꦴ, ꦒꦺꦴꦠꦩꦺꦴ ꦱꦴꦮꦏꦴꦤꦁ ꦌꦮꦁ ꦣꦩ꧀ꦩꦁ ꦢꦺꦱꦺꦠꦶ – ꦌꦡ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦗꦴꦤꦴꦡ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦚ꧀ꦚꦴꦪ ꦮꦶꦲꦫꦡꦴꦠꦶ; ꦩꦪꦩ꧀ꦥꦶ ꦑꦺꦴ, ꦄꦴꦮꦸꦱꦺꦴ, ꦱꦴꦮꦏꦴꦤꦁ ꦌꦮꦁ ꦣꦩ꧀ꦩꦁ ꦢꦺꦱꦺꦩ – ꦌꦡ ꦠꦸꦩ꧀ꦲꦺ, ꦄꦴꦮꦸꦱꦺꦴ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦗꦴꦤꦴꦡ, ꦱꦧ꧀ꦧꦁ ꦣꦩ꧀ꦩꦁ ꦄꦨꦶꦚ꧀ꦚꦴꦪ ꦮꦶꦲꦫꦡꦴꦠꦶ. ꦆꦣ ꦤꦺꦴ, ꦄꦴꦮꦸꦱꦺꦴ, ꦏꦺꦴ ꦮꦶꦱꦺꦱꦺꦴ ꦏꦺꦴ ꦄꦣꦶꦥ꧀ꦥꦪꦴꦱꦺꦴ ꦏꦶꦁ ꦤꦴꦤꦴꦏꦫꦟꦁ ꦱꦩꦟꦱ꧀ꦱ ꦮꦴ ꦒꦺꦴꦠꦩꦱ꧀ꦱ ꦄꦩ꧀ꦲꦴꦏꦁ ꦮꦴ, ꦪꦢꦶꦢꦁ ꦣꦩ꧀ꦩꦢꦺꦱꦤꦴꦪ ꦮꦴ ꦣꦩ꧀ꦩꦢꦺꦱꦤꦁ ꦄꦤꦸꦱꦴꦱꦤꦶꦪꦴ ꦮꦴ ꦄꦤꦸꦱꦴꦱꦤꦶ’ꦤ꧀ꦠꦶ?

‘‘ꦄꦡ ꦑꦺꦴ ꦩꦪꦁ, ꦨꦤ꧀ꦠꦺ, ꦠꦺꦱꦁ ꦄꦚ꧀ꦚꦠꦶꦠ꧀ꦡꦶꦪꦴꦤꦁ ꦥꦫꦶꦧ꧀ꦧꦴꦗꦏꦴꦤꦁ ꦨꦴꦱꦶꦠꦁ ꦤꦺꦮ ꦄꦨꦶꦤꦤ꧀ꦢꦶꦩ꧀ꦲꦴ ꦤꦥ꧀ꦥꦛꦶꦏ꧀ꦏꦺꦴꦱꦶꦩ꧀ꦲꦴ. ꦄꦤꦨꦶꦤꦤ꧀ꦢꦶꦠ꧀ꦮꦴ ꦄꦥ꧀ꦥꦛꦶꦏ꧀ꦏꦺꦴꦱꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦩꦶꦩ꧀ꦲꦴ – ‘ꦨꦒꦮꦠꦺꦴ ꦱꦤ꧀ꦠꦶꦏꦺ ꦌꦠꦱ꧀ꦱ ꦨꦴꦱꦶꦠꦱ꧀ꦱ ꦄꦠ꧀ꦡꦁ ꦄꦴꦗꦴꦤꦶꦱ꧀ꦱꦴꦩꦴ’’’ꦠꦶ.

‘‘ꦌꦮꦁꦮꦴꦢꦶꦤꦺꦴ, ꦨꦶꦏ꧀ꦑꦮꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦌꦮꦩꦱ꧀ꦱꦸ ꦮꦕꦤꦷꦪꦴ – ‘ꦌꦏꦺꦴ, ꦄꦴꦮꦸꦱꦺꦴ, ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟꦁ, ꦢ꧀ꦮꦺ ꦥꦚ꧀ꦲꦴ ꦢ꧀ꦮꦺ ꦈꦢ꧀ꦢꦺꦱꦴ ꦢ꧀ꦮꦺ ꦮꦺꦪ꧀ꦪꦴꦏꦫꦟꦴꦤꦶ, ꦠꦪꦺꦴ ꦥꦚ꧀ꦲꦴ ꦠꦪꦺꦴ ꦈꦢ꧀ꦢꦺꦱꦴ ꦠꦷꦟꦶ ꦮꦺꦪ꧀ꦪꦴꦏꦫꦟꦴꦤꦶ, ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦶ, ꦥꦚ꧀ꦕ ꦥꦚ꧀ꦲꦴ ꦥꦚ꧀ꦕꦸꦢ꧀ꦢꦺꦱꦴ ꦥꦚ꧀ꦕ ꦮꦺꦪ꧀ꦪꦴꦏꦫꦟꦴꦤꦶ, ꦖ ꦥꦚ꧀ꦲꦴ ꦖ ꦈꦢ꧀ꦢꦺꦱꦴ ꦖ ꦮꦺꦪ꧀ꦪꦴꦏꦫꦟꦴꦤꦶ, ꦱꦠ꧀ꦠ ꦥꦚ꧀ꦲꦴ ꦱꦠ꧀ꦠꦸꦢ꧀ꦢꦺꦱꦴ ꦱꦠ꧀ꦠ ꦮꦺꦪ꧀ꦪꦴꦏꦫꦟꦴꦤꦶ, ꦄꦛ꧀ꦜ ꦥꦚ꧀ꦲꦴ ꦄꦛ꧀ꦜꦸꦢ꧀ꦢꦺꦱꦴ ꦄꦛ꧀ꦜ ꦮꦺꦪ꧀ꦪꦴꦏꦫꦟꦴꦤꦶ, ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦶ, ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ. ꦌꦮꦁ ꦥꦸꦛ꧀ꦜꦴ, ꦨꦶꦏ꧀ꦑꦮꦺ, ꦄꦚ꧀ꦚꦠꦶꦠ꧀ꦡꦶꦪꦴ ꦥꦫꦶꦧ꧀ꦧꦴꦗꦏꦴ ꦤ ꦕꦺꦮ ꦱꦩ꧀ꦥꦴꦪꦶꦱ꧀ꦱꦤ꧀ꦠꦶ, ꦈꦠ꧀ꦠꦫꦶ ꦕ ꦮꦶꦓꦴꦠꦁ ꦄꦴꦥꦗ꧀ꦗꦶꦱ꧀ꦱꦤ꧀ꦠꦶ. ꦠꦁ ꦏꦶꦱ꧀ꦱ ꦲꦺꦠꦸ? ꦪꦡꦴ ꦠꦁ, ꦨꦶꦏ꧀ꦑꦮꦺ, ꦄꦮꦶꦱꦪꦱ꧀ꦩꦶꦁ. ꦤꦴꦲꦁ ꦠꦁ, ꦨꦶꦏ꧀ꦑꦮꦺ, ꦥꦱ꧀ꦱꦴꦩꦶ ꦱꦢꦺꦮꦏꦺ ꦭꦺꦴꦏꦺ ꦱꦩꦴꦫꦏꦺ ꦱꦧ꧀ꦫꦲ꧀ꦩꦏꦺ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦪꦴ ꦥꦗꦴꦪ ꦱꦢꦺꦮꦩꦤꦸꦱ꧀ꦱꦴꦪ ꦪꦺꦴ ꦆꦩꦺꦱꦁ ꦥꦚ꧀ꦲꦴꦤꦁ ꦮꦺꦪ꧀ꦪꦴꦏꦫꦟꦺꦤ ꦕꦶꦠ꧀ꦠꦁ ꦄꦴꦫꦴꦣꦺꦪ꧀ꦪ, ꦄꦚ꧀ꦚꦠ꧀ꦫ ꦠꦡꦴꦒꦠꦺꦤ ꦮꦴ ꦠꦡꦴꦒꦠꦱꦴꦮꦏꦺꦤ ꦮꦴ ꦆꦠꦺꦴ ꦮꦴ ꦥꦤ ꦱꦸꦠ꧀ꦮꦴ.

‘‘‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟ’ꦤ꧀ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦌꦏꦣꦩ꧀ꦩꦺ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦱ꧀ꦩꦶꦁ ꦌꦏꦣꦩ꧀ꦩꦺ? ‘ꦱꦧ꧀ꦧꦺ ꦱꦠ꧀ꦠꦴ ꦄꦴꦲꦴꦫꦛ꧀ꦜꦶꦠꦶꦏꦴ’ – ꦆꦩꦱ꧀ꦩꦶꦁ ꦑꦺꦴ, ꦨꦶꦏ꧀ꦑꦮꦺ, ꦌꦏꦣꦩ꧀ꦩꦺ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟ’ꦤ꧀ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦢ꧀ꦮꦺ ꦥꦚ꧀ꦲꦴ ꦢ꧀ꦮꦺ ꦈꦢ꧀ꦢꦺꦱꦴ ꦢ꧀ꦮꦺ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦢ꧀ꦮꦷꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦢ꧀ꦮꦷꦱꦸ? ꦤꦴꦩꦺ ꦕ ꦫꦹꦥꦺ ꦕ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦢ꧀ꦮꦷꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦢ꧀ꦮꦺ ꦥꦚ꧀ꦲꦴ ꦢ꧀ꦮꦺ ꦈꦢ꧀ꦢꦺꦱꦴ ꦢ꧀ꦮꦺ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦠꦪꦺꦴ ꦥꦚ꧀ꦲꦴ ꦠꦪꦺꦴ ꦈꦢ꧀ꦢꦺꦱꦴ ꦠꦷꦟꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦠꦷꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦠꦷꦱꦸ? ꦠꦷꦱꦸ ꦮꦺꦢꦤꦴꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦠꦷꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦠꦪꦺꦴ ꦥꦚ꧀ꦲꦴ ꦠꦪꦺꦴ ꦈꦢ꧀ꦢꦺꦱꦴ ꦠꦷꦟꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦕꦠꦹꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦕꦠꦹꦱꦸ? ꦕꦠꦹꦱꦸ ꦄꦴꦲꦴꦫꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦕꦠꦹꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦥꦚ꧀ꦕ ꦥꦚ꧀ꦲꦴ ꦥꦚ꧀ꦕꦸꦢ꧀ꦢꦺꦱꦴ ꦥꦚ꧀ꦕ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦥꦚ꧀ꦕꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦥꦚ꧀ꦕꦱꦸ? ꦥꦚ꧀ꦕꦱꦸ ꦈꦥꦴꦢꦴꦤꦏ꧀ꦑꦤ꧀ꦣꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦥꦚ꧀ꦕ ꦥꦚ꧀ꦲꦴ ꦥꦚ꧀ꦕꦸꦢ꧀ꦢꦺꦱꦴ ꦥꦚ꧀ꦕ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦖ ꦥꦚ꧀ꦲꦴ ꦖ ꦈꦢ꧀ꦢꦺꦱꦴ ꦖ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦖꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦖꦱꦸ? ꦖꦱꦸ ꦄꦗ꧀ꦙꦠ꧀ꦠꦶꦏꦺꦱꦸ ꦄꦴꦪꦠꦤꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦖꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦖ ꦥꦚ꧀ꦲꦴ ꦖ ꦈꦢ꧀ꦢꦺꦱꦴ ꦖ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦱꦠ꧀ꦠ ꦥꦚ꧀ꦲꦴ ꦱꦠ꧀ꦠꦸꦢ꧀ꦢꦺꦱꦴ ꦱꦠ꧀ꦠ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦱꦠ꧀ꦠꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦱꦠ꧀ꦠꦱꦸ? ꦱꦠ꧀ꦠꦱꦸ ꦮꦶꦚ꧀ꦚꦴꦟꦛ꧀ꦜꦶꦠꦷꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦱꦠ꧀ꦠ ꦥꦚ꧀ꦲꦴ ꦱꦠ꧀ꦠꦸꦢ꧀ꦢꦺꦱꦴ ꦱꦠ꧀ꦠ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦄꦛ꧀ꦜ ꦥꦚ꧀ꦲꦴ ꦄꦛ꧀ꦜꦸꦢ꧀ꦢꦺꦱꦴ ꦄꦛ꧀ꦜ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦄꦛ꧀ꦜꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦄꦛ꧀ꦜꦱꦸ? ꦄꦛ꧀ꦜꦱꦸ ꦭꦺꦴꦏꦣꦩ꧀ꦩꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦄꦛ꧀ꦜꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ…ꦥꦺ… ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦄꦛ꧀ꦜ ꦥꦚ꧀ꦲꦴ ꦄꦛ꧀ꦜꦸꦢ꧀ꦢꦺꦱꦴ ꦄꦛ꧀ꦜ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦤꦮꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦤꦮꦱꦸ? ꦤꦮꦱꦸ ꦱꦠ꧀ꦠꦴꦮꦴꦱꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦤꦮꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦢꦱꦱꦸ, ꦨꦶꦏ꧀ꦑꦮꦺ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦢꦱꦱꦸ? ꦢꦱꦱꦸ ꦄꦏꦸꦱꦭꦺꦱꦸ ꦏꦩ꧀ꦩꦥꦡꦺꦱꦸ – ꦆꦩꦺꦱꦸ ꦑꦺꦴ, ꦨꦶꦏ꧀ꦑꦮꦺ, ꦢꦱꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠ’’ꦤ꧀ꦠꦶ. ꦱꦠ꧀ꦠꦩꦁ.