꧘. ꦢꦸꦠꦶꦪꦩꦲꦴꦥꦚ꧀ꦲꦴꦱꦸꦠ꧀ꦠꦁ

꧒꧘. ꦌꦏꦁ ꦱꦩꦪꦁ ꦨꦒꦮꦴ ꦏꦗꦔ꧀ꦒꦭꦴꦪꦁ ꦮꦶꦲꦫꦠꦶ ꦮꦺꦭ꦳ꦸꦮꦤꦺ. ꦄꦡ ꦑꦺꦴ ꦱꦩ꧀ꦧꦲꦸꦭꦴ ꦏꦗꦔ꧀ꦒꦭꦏꦴ ꦈꦥꦴꦱꦏꦴ ꦪꦺꦤ ꦏꦗꦔ꧀ꦒꦭꦶꦏꦴ ꦨꦶꦏ꧀ꦑꦸꦤꦷ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦏꦗꦔ꧀ꦒꦭꦶꦏꦁ ꦨꦶꦏ꧀ꦑꦸꦤꦶꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦏꦗꦔ꧀ꦒꦭꦏꦴ ꦈꦥꦴꦱꦏꦴ ꦏꦗꦔ꧀ꦒꦭꦶꦏꦁ ꦨꦶꦏ꧀ꦑꦸꦤꦶꦁ ꦌꦠꦢꦮꦺꦴꦕꦸꦁ –

‘‘ꦮꦸꦠ꧀ꦠꦩꦶꦢꦁ, ꦄꦪ꧀ꦪꦺ, ꦨꦒꦮꦠꦴ ꦩꦲꦴꦥꦚ꧀ꦲꦺꦱꦸ – ‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟꦁ, ꦢ꧀ꦮꦺ ꦥꦚ꧀ꦲꦴ ꦢ꧀ꦮꦺ ꦈꦢ꧀ꦢꦺꦱꦴ ꦢ꧀ꦮꦺ ꦮꦺꦪ꧀ꦪꦴꦏꦫꦟꦴꦤꦶ, ꦠꦪꦺꦴ ꦥꦚ꧀ꦲꦴ ꦠꦪꦺꦴ ꦈꦢ꧀ꦢꦺꦱꦴ ꦠꦷꦟꦶ ꦮꦺꦪ꧀ꦪꦴꦏꦫꦟꦴꦤꦶ, ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦶ, ꦥꦚ꧀ꦕ ꦥꦚ꧀ꦲꦴ ꦥꦚ꧀ꦕꦸꦢ꧀ꦢꦺꦱꦴ ꦥꦚ꧀ꦕ ꦮꦺꦪ꧀ꦪꦴꦏꦫꦟꦴꦤꦶ, ꦖ ꦥꦚ꧀ꦲꦴ ꦖ ꦈꦢ꧀ꦢꦺꦱꦴ ꦖ ꦮꦺꦪ꧀ꦪꦴꦏꦫꦟꦴꦤꦶ, ꦱꦠ꧀ꦠ ꦥꦚ꧀ꦲꦴ ꦱꦠ꧀ꦠꦸꦢ꧀ꦢꦺꦱꦴ ꦱꦠ꧀ꦠ ꦮꦺꦪ꧀ꦪꦴꦏꦫꦟꦴꦤꦶ, ꦄꦛ꧀ꦜ ꦥꦚ꧀ꦲꦴ ꦄꦛ꧀ꦜꦸꦢ꧀ꦢꦺꦱꦴ ꦄꦛ꧀ꦜ ꦮꦺꦪ꧀ꦪꦴꦏꦫꦟꦴꦤꦶ, ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦶ, ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ. ꦆꦩꦱ꧀ꦱ ꦤꦸ ꦑꦺꦴ, ꦄꦪ꧀ꦪꦺ, ꦨꦒꦮꦠꦴ ꦱꦁꦑꦶꦠ꧀ꦠꦺꦤ ꦨꦴꦱꦶꦠꦱ꧀ꦱ ꦏꦡꦁ ꦮꦶꦠ꧀ꦡꦴꦫꦺꦤ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ’’ꦠꦶ?

‘‘ꦤ ꦑꦺꦴ ꦥꦤꦺꦠꦁ, ꦄꦴꦮꦸꦱꦺꦴ, ꦨꦒꦮꦠꦺꦴ ꦱꦩ꧀ꦩꦸꦑꦴ ꦱꦸꦠꦁ ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦁ, ꦤꦥꦶ ꦩꦤꦺꦴꦨꦴꦮꦤꦷꦪꦴꦤꦁ ꦨꦶꦏ꧀ꦑꦹꦤꦁ ꦱꦩ꧀ꦩꦸꦑꦴ ꦱꦸꦠꦁ ꦱꦩ꧀ꦩꦸꦑꦴ ꦥꦛꦶꦒ꧀ꦒꦲꦶꦠꦁ; ꦄꦥꦶ ꦕ, ꦪꦡꦴ ꦩꦺꦠ꧀ꦡ ꦑꦴꦪꦠꦶ ꦠꦁ ꦱꦸꦟꦴꦡ, ꦱꦴꦣꦸꦏꦁ ꦩꦤꦱꦶ ꦏꦫꦺꦴꦡ, ꦨꦴꦱꦶꦱ꧀ꦱꦴꦩꦷ’’ꦠꦶ. ‘‘ꦌꦮꦁ, ꦄꦪ꧀ꦪꦺ’’ꦠꦶ, ꦑꦺꦴ ꦏꦗꦔ꧀ꦒꦭꦏꦴ ꦈꦥꦴꦱꦏꦴ ꦏꦗꦔ꧀ꦒꦭꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦥꦕ꧀ꦕꦱ꧀ꦱꦺꦴꦱꦸꦁ. ꦏꦗꦔ꧀ꦒꦭꦶꦏꦴ ꦨꦶꦏ꧀ꦑꦸꦤꦷ ꦌꦠꦢꦮꦺꦴꦕ –

‘‘‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟ’ꦤ꧀ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦌꦏꦣꦩ꧀ꦩꦺ, ꦄꦴꦮꦸꦱꦺꦴ, ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦱ꧀ꦩꦶꦁ ꦌꦏꦣꦩ꧀ꦩꦺ? ꦱꦧ꧀ꦧꦺ ꦱꦠ꧀ꦠꦴ ꦄꦴꦲꦴꦫꦛ꧀ꦜꦶꦠꦶꦏꦴ – ꦆꦩꦱ꧀ꦩꦶꦁ ꦑꦺꦴ, ꦄꦴꦮꦸꦱꦺꦴ, ꦌꦏꦣꦩ꧀ꦩꦺ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟꦤ꧀ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦢ꧀ꦮꦺ ꦥꦚ꧀ꦲꦴ ꦢ꧀ꦮꦺ ꦈꦢ꧀ꦢꦺꦱꦴ ꦢ꧀ꦮꦺ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ ꦆꦠꦶ, ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦢ꧀ꦮꦷꦱꦸ, ꦄꦴꦮꦸꦱꦺꦴ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦢ꧀ꦮꦷꦱꦸ? ꦤꦴꦩꦺ ꦕ ꦫꦹꦥꦺ ꦕ…ꦥꦺ… ꦏꦠꦩꦺꦱꦸ ꦠꦷꦱꦸ? ꦠꦷꦱꦸ ꦮꦺꦢꦤꦴꦱꦸ – ꦆꦩꦺꦱꦸ ꦑꦺꦴ, ꦄꦴꦮꦸꦱꦺꦴ, ꦠꦷꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦠꦪꦺꦴ ꦥꦚ꧀ꦲꦴ ꦠꦪꦺꦴ ꦈꦢ꧀ꦢꦺꦱꦴ ꦠꦷꦟꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦕꦠꦹꦱꦸ, ꦄꦴꦮꦸꦱꦺꦴ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦕꦠꦹꦱꦸ? ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦸ – ꦆꦩꦺꦱꦸ ꦑꦺꦴ, ꦄꦴꦮꦸꦱꦺꦴ, ꦕꦠꦹꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦕꦠ꧀ꦠꦴꦫꦺꦴ ꦥꦚ꧀ꦲꦴ ꦕꦠ꧀ꦠꦴꦫꦺꦴ ꦈꦢ꧀ꦢꦺꦱꦴ ꦕꦠ꧀ꦠꦴꦫꦶ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦥꦚ꧀ꦕ ꦥꦚ꧀ꦲꦴ ꦥꦚ꧀ꦕꦸꦢ꧀ꦢꦺꦱꦴ ꦥꦚ꧀ꦕ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦥꦚ꧀ꦕꦱꦸ, ꦄꦴꦮꦸꦱꦺꦴ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦥꦚ꧀ꦕꦱꦸ? ꦥꦚ꧀ꦕꦱꦸ ꦆꦤ꧀ꦢ꧀ꦫꦶꦪꦺꦱꦸ…ꦥꦺ… ꦏꦠꦩꦺꦱꦸ ꦖꦱꦸ? ꦖꦱꦸ ꦤꦶꦱ꧀ꦱꦫꦟꦷꦪꦴꦱꦸ ꦣꦴꦠꦹꦱꦸ…ꦥꦺ… ꦏꦠꦩꦺꦱꦸ ꦱꦠ꧀ꦠꦱꦸ? ꦱꦠ꧀ꦠꦱꦸ ꦧꦺꦴꦗ꧀ꦙꦔ꧀ꦒꦺꦱꦸ…ꦥꦺ… ꦏꦠꦩꦺꦱꦸ ꦄꦛ꧀ꦜꦱꦸ? ꦄꦛ꧀ꦜꦱꦸ ꦄꦫꦶꦪꦄꦛ꧀ꦜꦔ꧀ꦒꦶꦏꦩꦒ꧀ꦒꦺꦱꦸ – ꦆꦩꦺꦱꦸ ꦑꦺꦴ, ꦄꦴꦮꦸꦱꦺꦴ, ꦄꦛ꧀ꦜꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦄꦛ꧀ꦜ ꦥꦚ꧀ꦲꦴ ꦄꦛ꧀ꦜꦸꦢ꧀ꦢꦺꦱꦴ ꦄꦛ꧀ꦜ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦤꦮꦱꦸ, ꦄꦴꦮꦸꦱꦺꦴ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦤꦮꦱꦸ? ꦤꦮꦱꦸ ꦱꦠ꧀ꦠꦴꦮꦴꦱꦺꦱꦸ – ꦆꦩꦺꦱꦸ ꦑꦺꦴ, ꦄꦴꦮꦸꦱꦺꦴ, ꦤꦮꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦤꦶꦧ꧀ꦧꦶꦤ꧀ꦢꦩꦴꦤꦺꦴ ꦱꦩ꧀ꦩꦴ ꦮꦶꦫꦗ꧀ꦗꦩꦴꦤꦺꦴ ꦱꦩ꧀ꦩꦴ ꦮꦶꦩꦸꦕ꧀ꦕꦩꦴꦤꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦤꦮ ꦥꦚ꧀ꦲꦴ ꦤꦮꦸꦢ꧀ꦢꦺꦱꦴ ꦤꦮ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘‘ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦑꦺꦴ ꦥꦤꦺꦠꦁ ꦮꦸꦠ꧀ꦠꦁ ꦨꦒꦮꦠꦴ. ꦏꦶꦚ꧀ꦕꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ? ꦢꦱꦱꦸ, ꦄꦴꦮꦸꦱꦺꦴ, ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ꦏꦠꦩꦺꦱꦸ ꦢꦱꦱꦸ? ꦢꦱꦱꦸ ꦏꦸꦱꦭꦺꦱꦸ ꦏꦩ꧀ꦩꦥꦡꦺꦱꦸ – ꦆꦩꦺꦱꦸ ꦑꦺꦴ, ꦄꦴꦮꦸꦱꦺꦴ, ꦢꦱꦱꦸ ꦣꦩ꧀ꦩꦺꦱꦸ ꦨꦶꦏ꧀ꦑꦸ ꦱꦩ꧀ꦩꦴ ꦱꦸꦨꦴꦮꦶꦠꦕꦶꦠ꧀ꦠꦺꦴ ꦱꦩ꧀ꦩꦴ ꦥꦫꦶꦪꦤ꧀ꦠꦢꦱ꧀ꦱꦴꦮꦷ ꦱꦩ꧀ꦩꦢꦠ꧀ꦡꦁ ꦄꦨꦶꦱꦩꦺꦕ꧀ꦕ ꦢꦶꦛ꧀ꦜꦺꦮ ꦣꦩ꧀ꦩꦺ ꦢꦸꦏ꧀ꦑꦱ꧀ꦱꦤ꧀ꦠꦏꦫꦺꦴ ꦲꦺꦴꦠꦶ. ‘ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦠꦶ ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦆꦢꦩꦺꦠꦁ ꦥꦛꦶꦕ꧀ꦕ ꦮꦸꦠ꧀ꦠꦁ.

‘‘ꦆꦠꦶ ꦑꦺꦴ, ꦄꦴꦮꦸꦱꦺꦴ, ꦪꦁ ꦠꦁ ꦮꦸꦠ꧀ꦠꦁ ꦨꦒꦮꦠꦴ ꦱꦁꦑꦶꦠ꧀ꦠꦺꦤ ꦨꦴꦱꦶꦠꦴꦱꦸ ꦩꦲꦴꦥꦚ꧀ꦲꦴꦱꦸ – ‘ꦌꦏꦺꦴ ꦥꦚ꧀ꦲꦺꦴ ꦌꦏꦺꦴ ꦈꦢ꧀ꦢꦺꦱꦺꦴ ꦌꦏꦁ ꦮꦺꦪ꧀ꦪꦴꦏꦫꦟꦁ…ꦥꦺ… ꦢꦱ ꦥꦚ꧀ꦲꦴ ꦢꦱꦸꦢ꧀ꦢꦺꦱꦴ ꦢꦱ ꦮꦺꦪ꧀ꦪꦴꦏꦫꦟꦴꦤꦷ’ꦠꦶ, ꦆꦩꦱ꧀ꦱ ꦑꦺꦴ ꦄꦲꦁ, ꦄꦴꦮꦸꦱꦺꦴ, ꦨꦒꦮꦠꦴ ꦱꦁꦑꦶꦠ꧀ꦠꦺꦤ ꦨꦴꦱꦶꦠꦱ꧀ꦱ ꦌꦮꦁ ꦮꦶꦠ꧀ꦡꦴꦫꦺꦤ ꦄꦠ꧀ꦡꦁ ꦄꦴꦗꦴꦤꦴꦩꦶ. ꦄꦴꦏꦔ꧀ꦑꦩꦴꦤꦴ ꦕ ꦥꦤ ꦠꦸꦩ꧀ꦲꦺ, ꦄꦴꦮꦸꦱꦺꦴ, ꦨꦒꦮꦤ꧀ꦠꦚ꧀ꦚꦺꦮ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦩꦠ꧀ꦡꦁ ꦥꦛꦶꦥꦸꦕ꧀ꦖꦺꦪ꧀ꦪꦴꦡ. ꦪꦡꦴ ꦮꦺꦴ [ꦪꦡꦴ ꦑꦺꦴ (ꦏ.), ꦪꦡꦴ ꦤꦺꦴ (ꦧꦲꦹꦱꦸ) ꦄ. ꦤꦶ. ꧑꧐.꧑꧑꧕, ꧑꧗꧒ ꦥꦤ ꦥꦴꦜꦨꦺꦢꦺꦴ ꦤꦠ꧀ꦡꦶ] ꦨꦒꦮꦴ ꦧ꧀ꦪꦴꦏꦫꦺꦴꦠꦶ ꦠꦡꦴ ꦤꦁ ꦣꦴꦫꦺꦪ꧀ꦪꦴꦡꦴ’’ꦠꦶ. ‘‘ꦌꦮꦁ, ꦄꦪ꧀ꦪꦺ’’ꦠꦶ ꦑꦺꦴ ꦏꦗꦔ꧀ꦒꦭꦏꦴ ꦈꦥꦴꦱꦏꦴ ꦏꦗꦔ꧀ꦒꦭꦶꦏꦴꦪ ꦑꦺꦴ ꦨꦶꦏ꧀ꦑꦸꦤꦶꦪꦴ ꦨꦴꦱꦶꦠꦁ ꦄꦨꦶꦤꦤ꧀ꦢꦶꦠ꧀ꦮꦴ ꦄꦤꦸꦩꦺꦴꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦏꦗꦔ꧀ꦒꦭꦶꦏꦁ ꦨꦶꦏ꧀ꦑꦸꦤꦶꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦴ ꦑꦺꦴ ꦏꦗꦔ꧀ꦒꦭꦏꦴ ꦈꦥꦴꦱꦏꦴ ꦪꦴꦮꦠꦏꦺꦴ ꦄꦲꦺꦴꦱꦶ ꦏꦗꦔ꧀ꦒꦭꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦱꦢ꧀ꦣꦶꦁ ꦏꦡꦴꦱꦭ꧀ꦭꦴꦥꦺꦴ, ꦠꦁ ꦱꦧ꧀ꦧꦁ ꦨꦒꦮꦠꦺꦴ ꦄꦴꦫꦺꦴꦕꦺꦱꦸꦁ.

‘‘ꦱꦴꦣꦸ ꦱꦴꦣꦸ, ꦒꦲꦥꦠꦪꦺꦴ! ꦥꦟ꧀ꦝꦶꦠꦴ, ꦒꦲꦥꦠꦪꦺꦴ, ꦏꦗꦔ꧀ꦒꦭꦶꦏꦴ ꦨꦶꦏ꧀ꦑꦸꦤꦷ. ꦩꦲꦴꦥꦚ꧀ꦚꦴ, ꦒꦲꦥꦠꦪꦺꦴ, ꦏꦗꦔ꧀ꦒꦭꦶꦏꦴ ꦨꦶꦏ꧀ꦑꦸꦤꦷ. ꦩꦚ꧀ꦕꦺꦥꦶ ꦠꦸꦩ꧀ꦲꦺ, ꦒꦲꦥꦠꦪꦺꦴ, ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦩꦠ꧀ꦡꦁ ꦥꦛꦶꦥꦸꦕ꧀ꦖꦺꦪ꧀ꦪꦴꦡ, ꦄꦲꦩ꧀ꦥꦶ ꦕꦺꦠꦁ ꦌꦮꦩꦺꦮꦁ [ꦌꦮꦩꦺꦮ (ꦏ.) ꦩ. ꦤꦶ. ꧑.꧒꧐꧕ ꦥꦱ꧀ꦱꦶꦠꦧ꧀ꦧꦁ] ꦧ꧀ꦪꦴꦏꦫꦺꦪ꧀ꦪꦁ ꦪꦡꦴ ꦠꦁ ꦏꦗꦔ꧀ꦒꦭꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦧ꧀ꦪꦴꦏꦠꦁ. ꦌꦱꦺꦴ ꦕꦺꦮ ꦠꦱ꧀ꦱ [ꦌꦱꦺꦴ ꦕꦺꦮꦺꦠꦱ꧀ꦱ (ꦩ. ꦤꦶ. ꧑.꧒꧐꧕)] ꦄꦠ꧀ꦡꦺꦴ. ꦌꦮꦚ꧀ꦕ ꦤꦁ ꦣꦴꦫꦺꦪ꧀ꦪꦴꦡꦴ’’ꦠꦶ. ꦄꦛ꧀ꦜꦩꦁ.