੪. ਅਧਿਕਰਣਪਚ੍ਚਯਾਪਤ੍ਤਿ

੩੪੪. ਵਿਵਾਦਾਧਿਕਰਣਂ ਆਪਤ੍ਤਾਨਾਪਤ੍ਤੀਤਿ? ਵਿਵਾਦਾਧਿਕਰਣਂ ਨ ਆਪਤ੍ਤਿ. ਕਿਂ ਪਨ ਵਿਵਾਦਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ? ਆਮ, ਵਿਵਾਦਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯ. ਵਿਵਾਦਾਧਿਕਰਣਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਵਿਵਾਦਾਧਿਕਰਣਪਚ੍ਚਯਾ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ. ਉਪਸਮ੍ਪਨ੍ਨਂ ਓਮਸਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ; ਅਨੁਪਸਮ੍ਪਨ੍ਨਂ ਓਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ – ਵਿਵਾਦਾਧਿਕਰਣਪਚ੍ਚਯਾ ਇਮਾ ਦ੍ਵੇ ਆਪਤ੍ਤਿਯੋ ਆਪਜ੍ਜਤਿ.

ਤਾ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਕਤਿ ਵਿਪਤ੍ਤਿਯੋ ਭਜਨ੍ਤਿ? ਚਤੁਨ੍ਨਂ ਅਧਿਕਰਣਾਨਂ ਕਤਮਂ ਅਧਿਕਰਣਂ? ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਕਤਿਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ? ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਕਤਿਹਿ ਸਮੁਟ੍ਠਾਨੇਹਿ ਸਮੁਟ੍ਠਨ੍ਤਿ? ਕਤਿਹਿ ਅਧਿਕਰਣੇਹਿ ਕਤਿਸੁ ਠਾਨੇਸੁ ਕਤਿਹਿ ਸਮਥੇਹਿ ਸਮ੍ਮਨ੍ਤਿ?

ਤਾ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਏਕਂ ਵਿਪਤ੍ਤਿਂ ਭਜਨ੍ਤਿ – ਆਚਾਰਵਿਪਤ੍ਤਿਂ. ਚਤੁਨ੍ਨਂ ਅਧਿਕਰਣਾਨਂ, ਆਪਤ੍ਤਾਧਿਕਰਣਂ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਦ੍ਵੀਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ – ਸਿਯਾ ਪਾਚਿਤ੍ਤਿਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਦੁਕ੍ਕਟਾਪਤ੍ਤਿਕ੍ਖਨ੍ਧੇਨ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਨ੍ਤਿ. ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਤੀਸੁ ਠਾਨੇਸੁ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ; ਤੀਹਿ ਸਮਥੇਹਿ ਸਮ੍ਮਨ੍ਤਿ – ਸਿਯਾ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ, ਸਿਯਾ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ.

੩੪੫. ਅਨੁਵਾਦਾਧਿਕਰਣਂ ਆਪਤ੍ਤਾਨਾਪਤ੍ਤੀਤਿ? ਅਨੁਵਾਦਾਧਿਕਰਣਂ ਨ ਆਪਤ੍ਤਿ. ਕਿਂ ਪਨ ਅਨੁਵਾਦਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ? ਆਮ, ਅਨੁਵਾਦਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯ. ਅਨੁਵਾਦਾਧਿਕਰਣਪਚ੍ਚਯਾ, ਕਤਿ ਆਪਤ੍ਤਿਯੋ ਆਪਜ੍ਜਤਿ? ਅਨੁਵਾਦਾਧਿਕਰਣਪਚ੍ਚਯਾ ਤਿਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਭਿਕ੍ਖੁਂ ਅਮੂਲਕੇਨ ਪਾਰਾਜਿਕੇਨ ਧਮ੍ਮੇਨ ਅਨੁਦ੍ਧਂਸੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ; ਅਮੂਲਕੇਨ ਸਙ੍ਘਾਦਿਸੇਸੇਨ ਅਨੁਦ੍ਧਂਸੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ; ਅਮੂਲਿਕਾਯ ਆਚਾਰਵਿਪਤ੍ਤਿਯਾ ਅਨੁਦ੍ਧਂਸੇਤਿ, ਆਪਤ੍ਤਿ ਦੁਕ੍ਕਟਸ੍ਸ – ਅਨੁਵਾਦਾਧਿਕਰਣਪਚ੍ਚਯਾ ਇਮਾ ਤਿਸ੍ਸੋ ਆਪਤ੍ਤਿਯੋ ਆਪਜ੍ਜਤਿ.

ਤਾ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਦ੍ਵੇ ਵਿਪਤ੍ਤਿਯੋ ਭਜਨ੍ਤਿ – ਸਿਯਾ ਸੀਲਵਿਪਤ੍ਤਿਂ, ਸਿਯਾ ਆਚਾਰਵਿਪਤ੍ਤਿਂ. ਚਤੁਨ੍ਨਂ ਅਧਿਕਰਣਾਨਂ, ਆਪਤ੍ਤਾਧਿਕਰਣਂ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਤੀਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ – ਸਿਯਾ ਸਙ੍ਘਾਦਿਸੇਸਾਪਤ੍ਤਿਕ੍ਖਨ੍ਧੇਨ, ਸਿਯਾ ਪਾਚਿਤ੍ਤਿਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਦੁਕ੍ਕਟਾਪਤ੍ਤਿਕ੍ਖਨ੍ਧੇਨ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਤੀਹਿ ਸਮੁਟ੍ਠਾਨੇਹਿ ਸਮੁਟ੍ਠਨ੍ਤਿ. ਯਾ ਤਾ ਆਪਤ੍ਤਿਯੋ ਗਰੁਕਾ ਤਾ ਆਪਤ੍ਤਿਯੋ ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਏਕਮ੍ਹਿ ਠਾਨੇ – ਸਙ੍ਘਮਜ੍ਝੇ; ਦ੍ਵੀਹਿ ਸਮਥੇਹਿ ਸਮ੍ਮਨ੍ਤਿ – ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ. ਯਾ ਤਾ ਆਪਤ੍ਤਿਯੋ ਲਹੁਕਾ ਤਾ ਆਪਤ੍ਤਿਯੋ ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਤੀਸੁ ਠਾਨੇਸੁ – ਸਙ੍ਘਮਜ੍ਝੇ ਗਣਮਜ੍ਝੇ ਪੁਗ੍ਗਲਸ੍ਸ ਸਨ੍ਤਿਕੇ; ਤੀਹਿ ਸਮਥੇਹਿ ਸਮ੍ਮਨ੍ਤਿ – ਸਿਯਾ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ, ਸਿਯਾ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ.

੩੪੬. ਆਪਤ੍ਤਾਧਿਕਰਣਂ ਆਪਤ੍ਤਾਨਾਪਤ੍ਤੀਤਿ? ਆਪਤ੍ਤਾਧਿਕਰਣਂ ਆਪਤ੍ਤਿ. ਕਿਂ ਪਨ ਆਪਤ੍ਤਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ? ਆਮ, ਆਪਤ੍ਤਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯ. ਆਪਤ੍ਤਾਧਿਕਰਣਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਆਪਤ੍ਤਾਧਿਕਰਣਪਚ੍ਚਯਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ. ਭਿਕ੍ਖੁਨੀ ਜਾਨਂ ਪਾਰਾਜਿਕਂ ਧਮ੍ਮਂ [ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨਂ (ਸ੍ਯਾ.)] ਪਟਿਚ੍ਛਾਦੇਤਿ, ਆਪਤ੍ਤਿ ਪਾਰਾਜਿਕਸ੍ਸ; ਵੇਮਤਿਕਾ ਪਟਿਚ੍ਛਾਦੇਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ; ਭਿਕ੍ਖੁ ਸਙ੍ਘਾਦਿਸੇਸਂ ਪਟਿਚ੍ਛਾਦੇਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ; ਆਚਾਰਵਿਪਤ੍ਤਿਂ ਪਟਿਚ੍ਛਾਦੇਤਿ, ਆਪਤ੍ਤਿ ਦੁਕ੍ਕਟਸ੍ਸ – ਆਪਤ੍ਤਾਧਿਕਰਣਪਚ੍ਚਯਾ ਇਮਾ ਚਤਸ੍ਸੋ ਆਪਤ੍ਤਿਯੋ ਆਪਜ੍ਜਤਿ.

ਤਾ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਦ੍ਵੇ ਵਿਪਤ੍ਤਿਯੋ ਭਜਨ੍ਤਿ – ਸਿਯਾ ਸੀਲਵਿਪਤ੍ਤਿਂ ਸਿਯਾ ਆਚਾਰਵਿਪਤ੍ਤਿਂ. ਚਤੁਨ੍ਨਂ ਅਧਿਕਰਣਾਨਂ – ਆਪਤ੍ਤਾਧਿਕਰਣਂ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਚਤੂਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ – ਸਿਯਾ ਪਾਰਾਜਿਕਾਪਤ੍ਤਿਕ੍ਖਨ੍ਧੇਨ, ਸਿਯਾ ਥੁਲ੍ਲਚ੍ਚਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਪਾਚਿਤ੍ਤਿਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਦੁਕ੍ਕਟਾਪਤ੍ਤਿਕ੍ਖਨ੍ਧੇਨ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਨ੍ਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ. ਯਾ ਸਾ ਆਪਤ੍ਤਿ ਅਨਵਸੇਸਾ ਸਾ ਆਪਤ੍ਤਿ ਨ ਕਤਮੇਨ ਅਧਿਕਰਣੇਨ, ਨ ਕਤਮਮ੍ਹਿ ਠਾਨੇ, ਨ ਕਤਮੇਨ ਸਮਥੇਨ ਸਮ੍ਮਤਿ. ਯਾ ਤਾ ਆਪਤ੍ਤਿਯੋ ਲਹੁਕਾ ਤਾ ਆਪਤ੍ਤਿਯੋ ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਤੀਸੁ ਠਾਨੇਸੁ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ; ਤੀਹਿ ਸਮਥੇਹਿ ਸਮ੍ਮਨ੍ਤਿ – ਸਿਯਾ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ, ਸਿਯਾ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ.

੩੪੭. ਕਿਚ੍ਚਾਧਿਕਰਣਂ ਆਪਤ੍ਤਾਨਾਪਤ੍ਤੀਤਿ? ਕਿਚ੍ਚਾਧਿਕਰਣਂ ਨ ਆਪਤ੍ਤਿ. ਕਿਂ ਪਨ ਕਿਚ੍ਚਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ? ਆਮ, ਕਿਚ੍ਚਾਧਿਕਰਣਪਚ੍ਚਯਾ ਆਪਤ੍ਤਿਂ ਆਪਜ੍ਜੇਯ੍ਯ. ਕਿਚ੍ਚਾਧਿਕਰਣਪਚ੍ਚਯਾ ਕਤਿ ਆਪਤ੍ਤਿਯੋ ਆਪਜ੍ਜਤਿ? ਕਿਚ੍ਚਾਧਿਕਰਣਪਚ੍ਚਯਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ. ਉਕ੍ਖਿਤ੍ਤਾਨੁਵਤ੍ਤਿਕਾ ਭਿਕ੍ਖੁਨੀ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਤਿ, ਞਤ੍ਤਿਯਾ ਦੁਕ੍ਕਟਂ; ਦ੍ਵੀਹਿ ਕਮ੍ਮਵਾਚਾਹਿ ਥੁਲ੍ਲਚ੍ਚਯਾ; ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿ ਪਾਰਾਜਿਕਸ੍ਸ; ਭੇਦਕਾਨੁਵਤ੍ਤਕਾ ਭਿਕ੍ਖੂ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ; ਪਾਪਿਕਾਯ ਦਿਟ੍ਠਿਯਾ ਯਾਵਤਤਿਯਂ ਸਮਨੁਭਾਸਨਾਯ ਨ ਪਟਿਨਿਸ੍ਸਜ੍ਜਨ੍ਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸ – ਕਿਚ੍ਚਾਧਿਕਰਣਪਚ੍ਚਯਾ ਇਮਾ ਪਞ੍ਚ ਆਪਤ੍ਤਿਯੋ ਆਪਜ੍ਜਤਿ.

ਤਾ ਆਪਤ੍ਤਿਯੋ ਚਤੁਨ੍ਨਂ ਵਿਪਤ੍ਤੀਨਂ ਦ੍ਵੇ ਵਿਪਤ੍ਤਿਯੋ ਭਜਨ੍ਤਿ – ਸਿਯਾ ਸੀਲਵਿਪਤ੍ਤਿਂ ਸਿਯਾ ਆਚਾਰਵਿਪਤ੍ਤਿਂ. ਚਤੁਨ੍ਨਂ ਅਧਿਕਰਣਾਨਂ – ਆਪਤ੍ਤਾਧਿਕਰਣਂ. ਸਤ੍ਤਨ੍ਨਂ ਆਪਤ੍ਤਿਕ੍ਖਨ੍ਧਾਨਂ ਪਞ੍ਚਹਿ ਆਪਤ੍ਤਿਕ੍ਖਨ੍ਧੇਹਿ ਸਙ੍ਗਹਿਤਾ – ਸਿਯਾ ਪਾਰਾਜਿਕਾਪਤ੍ਤਿਕ੍ਖਨ੍ਧੇਨ, ਸਿਯਾ ਸਙ੍ਘਾਦਿਸੇਸਾਪਤ੍ਤਿਕ੍ਖਨ੍ਧੇਨ, ਸਿਯਾ ਥੁਲ੍ਲਚ੍ਚਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਪਾਚਿਤ੍ਤਿਯਾਪਤ੍ਤਿਕ੍ਖਨ੍ਧੇਨ, ਸਿਯਾ ਦੁਕ੍ਕਟਾਪਤ੍ਤਿਕ੍ਖਨ੍ਧੇਨ. ਛਨ੍ਨਂ ਆਪਤ੍ਤਿਸਮੁਟ੍ਠਾਨਾਨਂ ਏਕੇਨ ਸਮੁਟ੍ਠਾਨੇਨ ਸਮੁਟ੍ਠਨ੍ਤਿ – ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ. ਯਾ ਸਾ ਆਪਤ੍ਤਿ ਅਨਵਸੇਸਾ ਸਾ ਆਪਤ੍ਤਿ ਨ ਕਤਮੇਨ ਅਧਿਕਰਣੇਨ, ਨ ਕਤਮਮ੍ਹਿ ਠਾਨੇ, ਨ ਕਤਮੇਨ ਸਮਥੇਨ ਸਮ੍ਮਤਿ. ਯਾ ਸਾ ਆਪਤ੍ਤਿ ਗਰੁਕਾ ਸਾ ਆਪਤ੍ਤਿ ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਏਕਮ੍ਹਿ ਠਾਨੇ – ਸਙ੍ਘਮਜ੍ਝੇ; ਦ੍ਵੀਹਿ ਸਮਥੇਹਿ ਸਮ੍ਮਤਿ – ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ. ਯਾ ਤਾ ਆਪਤ੍ਤਿਯੋ ਲਹੁਕਾ ਤਾ ਆਪਤ੍ਤਿਯੋ ਏਕੇਨ ਅਧਿਕਰਣੇਨ – ਕਿਚ੍ਚਾਧਿਕਰਣੇਨ; ਤੀਸੁ ਠਾਨੇਸੁ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ; ਤੀਹਿ ਸਮਥੇਹਿ ਸਮ੍ਮਨ੍ਤਿ – ਸਿਯਾ ਸਮ੍ਮੁਖਾਵਿਨਯੇਨ ਚ ਪਟਿਞ੍ਞਾਤਕਰਣੇਨ ਚ, ਸਿਯਾ ਸਮ੍ਮੁਖਾਵਿਨਯੇਨ ਚ ਤਿਣਵਤ੍ਥਾਰਕੇਨ ਚ.