੫. ਅਧਿਕਰਣਾਧਿਪ੍ਪਾਯੋ
੩੪੮. ਵਿਵਾਦਾਧਿਕਰਣਂ ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ. ਵਿਵਾਦਾਧਿਕਰਣਂ ਨ ਹੋਤਿ ਅਨੁਵਾਦਾਧਿਕਰਣਂ, ਨ ਹੋਤਿ ਆਪਤ੍ਤਾਧਿਕਰਣਂ, ਨ ਹੋਤਿ ਕਿਚ੍ਚਾਧਿਕਰਣਂ; ਅਪਿ ਚ, ਵਿਵਾਦਾਧਿਕਰਣਪਚ੍ਚਯਾ ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ. ਯਥਾ ਕਥਂ ਵਿਯ? [ਚੂਲ਼ਵ. ੨੧੫; ਪਰਿ. ੩੧੪] ਇਧ ਭਿਕ੍ਖੂ ਵਿਵਦਨ੍ਤਿ – ਧਮ੍ਮੋਤਿ ਵਾ ਅਧਮ੍ਮੋਤਿ ਵਾ ਦੁਟ੍ਠੁਲ੍ਲਾਪਤ੍ਤੀਤਿ ਵਾ ਅਦੁਟ੍ਠੁਲ੍ਲਾਪਤ੍ਤੀਤਿ ਵਾ. ਯਂ ਤਤ੍ਥ ਭਣ੍ਡਨਂ ਕਲਹੋ ਵਿਗ੍ਗਹੋ ਵਿਵਾਦੋ ਨਾਨਾਵਾਦੋ ਅਞ੍ਞਥਾਵਾਦੋ ਵਿਪਚ੍ਚਤਾਯ ਵੋਹਾਰੋ ਮੇਧਕਂ, ਇਦਂ ਵੁਚ੍ਚਤਿ ਵਿਵਾਦਾਧਿਕਰਣਂ. ਵਿਵਾਦਾਧਿਕਰਣੇ ਸਙ੍ਘੋ ਵਿਵਦਤਿ ਵਿਵਾਦਾਧਿਕਰਣਂ. ਵਿਵਦਮਾਨੋ ਅਨੁਵਦਤਿ ਅਨੁਵਾਦਾਧਿਕਰਣਂ. ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਵਿਵਾਦਾਧਿਕਰਣਪਚ੍ਚਯਾ ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ.
ਅਨੁਵਾਦਾਧਿਕਰਣਂ ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ. ਅਨੁਵਾਦਾਧਿਕਰਣਂ ਨ ਹੋਤਿ ਆਪਤ੍ਤਾਧਿਕਰਣਂ, ਨ ਹੋਤਿ ਕਿਚ੍ਚਾਧਿਕਰਣਂ, ਨ ਹੋਤਿ ਵਿਵਾਦਾਧਿਕਰਣਂ; ਅਪਿ ਚ, ਅਨੁਵਾਦਾਧਿਕਰਣਪਚ੍ਚਯਾ ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ. ਯਥਾ ਕਥਂ ਵਿਯ? ਇਧ ਭਿਕ੍ਖੂ ਭਿਕ੍ਖੁਂ ਅਨੁਵਦਨ੍ਤਿ ਸੀਲਵਿਪਤ੍ਤਿਯਾ ਵਾ ਆਚਾਰਵਿਪਤ੍ਤਿਯਾ ਵਾ ਦਿਟ੍ਠਿਵਿਪਤ੍ਤਿਯਾ ਵਾ ਆਜੀਵਵਿਪਤ੍ਤਿਯਾ ਵਾ. ਯੋ ਤਤ੍ਥ ਅਨੁਵਾਦੋ ਅਨੁਵਦਨਾ ਅਨੁਲ੍ਲਪਨਾ ਅਨੁਭਣਨਾ ਅਨੁਸਮ੍ਪਵਙ੍ਕਤਾ ਅਬ੍ਭੁਸ੍ਸਹਨਤਾ ਅਨੁਬਲਪ੍ਪਦਾਨਂ, ਇਦਂ ਵੁਚ੍ਚਤਿ ਅਨੁਵਾਦਾਧਿਕਰਣਂ. ਅਨੁਵਾਦਾਧਿਕਰਣੇ ਸਙ੍ਘੋ ਵਿਵਦਤਿ, ਵਿਵਾਦਾਧਿਕਰਣਂ. ਵਿਵਦਮਾਨੋ ਅਨੁਵਦਤਿ, ਅਨੁਵਾਦਾਧਿਕਰਣਂ. ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ, ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ, ਕਿਚ੍ਚਾਧਿਕਰਣਂ. ਏਵਂ ਅਨੁਵਾਦਾਧਿਕਰਣਪਚ੍ਚਯਾ ਹੋਤਿ ਆਪਤ੍ਤਾਧਿਕਰਣਂ, ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ.
ਆਪਤ੍ਤਾਧਿਕਰਣਂ ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ. ਆਪਤ੍ਤਾਧਿਕਰਣਂ ਨ ਹੋਤਿ ਕਿਚ੍ਚਾਧਿਕਰਣਂ, ਨ ਹੋਤਿ ਵਿਵਾਦਾਧਿਕਰਣਂ, ਨ ਹੋਤਿ ਅਨੁਵਾਦਾਧਿਕਰਣਂ; ਅਪਿ ਚ, ਆਪਤ੍ਤਾਧਿਕਰਣਪਚ੍ਚਯਾ ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ. ਯਥਾ ਕਥਂ ਵਿਯ? [ਚੂਲ਼ਵ. ੨੧੫; ਪਰਿ. ੩੪੮] ਪਞ੍ਚਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਸਤ੍ਤਪਿ ਆਪਤ੍ਤਿਕ੍ਖਨ੍ਧਾ ਆਪਤ੍ਤਾਧਿਕਰਣਂ, ਇਦਂ ਵੁਚ੍ਚਤਿ ਆਪਤ੍ਤਾਧਿਕਰਣਂ. ਆਪਤ੍ਤਾਧਿਕਰਣੇ ਸਙ੍ਘੋ ਵਿਵਦਤਿ ਵਿਵਾਦਾਧਿਕਰਣਂ. ਵਿਵਦਮਾਨੋ ਅਨੁਵਦਤਿ ਅਨੁਵਾਦਾਧਿਕਰਣਂ. ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਆਪਤ੍ਤਾਧਿਕਰਣਪਚ੍ਚਯਾ ਹੋਤਿ ਕਿਚ੍ਚਾਧਿਕਰਣਂ, ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ.
ਕਿਚ੍ਚਾਧਿਕਰਣਂ ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ. ਕਿਚ੍ਚਾਧਿਕਰਣਂ ਨ ਹੋਤਿ ਵਿਵਾਦਾਧਿਕਰਣਂ, ਨ ਹੋਤਿ ਅਨੁਵਾਦਾਧਿਕਰਣਂ, ਨ ਹੋਤਿ ਆਪਤ੍ਤਾਧਿਕਰਣਂ; ਅਪਿ ਚ, ਕਿਚ੍ਚਾਧਿਕਰਣਪਚ੍ਚਯਾ ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ. ਯਥਾ ਕਥਂ ਵਿਯ? ਯਾ ਸਙ੍ਘਸ੍ਸ ਕਿਚ੍ਚਯਤਾ ਕਰਣੀਯਤਾ ਅਪਲੋਕਨਕਮ੍ਮਂ ਞਤ੍ਤਿਕਮ੍ਮਂ ਞਤ੍ਤਿਦੁਤਿਯਕਮ੍ਮਂ ਞਤ੍ਤਿਚਤੁਤ੍ਥਕਮ੍ਮਂ, ਇਦਂ ਵੁਚ੍ਚਤਿ ਕਿਚ੍ਚਾਧਿਕਰਣਂ. ਕਿਚ੍ਚਾਧਿਕਰਣੇ ਸਙ੍ਘੋ ਵਿਵਦਤਿ ਵਿਵਾਦਾਧਿਕਰਣਂ. ਵਿਵਦਮਾਨੋ ਅਨੁਵਦਤਿ ਅਨੁਵਾਦਾਧਿਕਰਣਂ. ਅਨੁਵਦਮਾਨੋ ਆਪਤ੍ਤਿਂ ਆਪਜ੍ਜਤਿ ਆਪਤ੍ਤਾਧਿਕਰਣਂ. ਤਾਯ ਆਪਤ੍ਤਿਯਾ ਸਙ੍ਘੋ ਕਮ੍ਮਂ ਕਰੋਤਿ ਕਿਚ੍ਚਾਧਿਕਰਣਂ. ਏਵਂ ਕਿਚ੍ਚਾਧਿਕਰਣਪਚ੍ਚਯਾ ਹੋਤਿ ਵਿਵਾਦਾਧਿਕਰਣਂ, ਹੋਤਿ ਅਨੁਵਾਦਾਧਿਕਰਣਂ, ਹੋਤਿ ਆਪਤ੍ਤਾਧਿਕਰਣਂ.