੫. ਪਾਰਾਜਿਕਾਦਿਆਪਤ੍ਤਿ

੩੩੯. ‘ਪਾਰਾਜਿਕ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਚੁਤੋ ਪਰਦ੍ਧੋ ਭਟ੍ਠੋ ਚ, ਸਦ੍ਧਮ੍ਮਾ ਹਿ ਨਿਰਙ੍ਕਤੋ;

ਸਂਵਾਸੋਪਿ ਤਹਿਂ ਨਤ੍ਥਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਸਙ੍ਘਾਦਿਸੇਸੋ’ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਸਙ੍ਘੋਵ ਦੇਤਿ ਪਰਿਵਾਸਂ, ਮੂਲਾਯ ਪਟਿਕਸ੍ਸਤਿ;

ਮਾਨਤ੍ਤਂ ਦੇਤਿ ਅਬ੍ਭੇਤਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਅਨਿਯਤੋ’ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਅਨਿਯਤੋ ਨ ਨਿਯਤੋ, ਅਨੇਕਂਸਿਕਤਂ ਪਦਂ;

ਤਿਣ੍ਣਮਞ੍ਞਤਰਂ ਠਾਨਂ, ‘ਅਨਿਯਤੋ’ਤਿ ਪਵੁਚ੍ਚਤਿ.

‘ਥੁਲ੍ਲਚ੍ਚਯ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਏਕਸ੍ਸ ਮੂਲੇ ਯੋ ਦੇਸੇਤਿ, ਯੋ ਚ ਤਂ ਪਟਿਗਣ੍ਹਤਿ;

ਅਚ੍ਚਯੋ ਤੇਨ ਸਮੋ ਨਤ੍ਥਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਨਿਸ੍ਸਗ੍ਗਿਯ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਸਙ੍ਘਮਜ੍ਝੇ ਗਣਮਜ੍ਝੇ, ਏਕਸ੍ਸੇਵ ਚ ਏਕਤੋ;

ਨਿਸ੍ਸਜ੍ਜਿਤ੍ਵਾਨ ਦੇਸੇਤਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਪਾਚਿਤ੍ਤਿਯ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਪਾਤੇਤਿ ਕੁਸਲਂ ਧਮ੍ਮਂ, ਅਰਿਯਮਗ੍ਗਂ ਅਪਰਜ੍ਝਤਿ;

ਚਿਤ੍ਤਸਂਮੋਹਨਟ੍ਠਾਨਂ, ਤੇਨੇਤਂ ਇਤਿ ਵੁਚ੍ਚਤਿ.

‘ਪਾਟਿਦੇਸਨੀਯ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਭਿਕ੍ਖੁ ਅਞ੍ਞਾਤਕੋ ਸਨ੍ਤੋ, ਕਿਚ੍ਛਾ ਲਦ੍ਧਾਯ ਭੋਜਨਂ;

ਸਾਮਂ ਗਹੇਤ੍ਵਾ ਭੁਞ੍ਜੇਯ੍ਯ, ‘ਗਾਰਯ੍ਹ’ਨ੍ਤਿ ਪਵੁਚ੍ਚਤਿ.

ਨਿਮਨ੍ਤਨਾਸੁ ਭੁਞ੍ਜਨ੍ਤਾ ਛਨ੍ਦਾਯ, ਵੋਸਾਸਤਿ ਤਤ੍ਥ ਭਿਕ੍ਖੁਨਿਂ;

ਅਨਿਵਾਰੇਤ੍ਵਾ ਤਹਿਂ ਭੁਞ੍ਜੇ, ਗਾਰਯ੍ਹਨ੍ਤਿ ਪਵੁਚ੍ਚਤਿ.

ਸਦ੍ਧਾਚਿਤ੍ਤਂ ਕੁਲਂ ਗਨ੍ਤ੍ਵਾ, ਅਪ੍ਪਭੋਗਂ ਅਨਾਲ਼ਿਯਂ [ਅਨਾਲ਼੍ਹਿਯਂ (ਸੀ. ਸ੍ਯਾ.)];

ਅਗਿਲਾਨੋ ਤਹਿਂ ਭੁਞ੍ਜੇ, ਗਾਰਯ੍ਹਨ੍ਤਿ ਪਵੁਚ੍ਚਤਿ.

ਯੋ ਚੇ ਅਰਞ੍ਞੇ ਵਿਹਰਨ੍ਤੋ, ਸਾਸਙ੍ਕੇ ਸਭਯਾਨਕੇ;

ਅਵਿਦਿਤਂ ਤਹਿਂ ਭੁਞ੍ਜੇ, ਗਾਰਯ੍ਹਨ੍ਤਿ ਪਵੁਚ੍ਚਤਿ.

ਭਿਕ੍ਖੁਨੀ ਅਞ੍ਞਾਤਿਕਾ ਸਨ੍ਤਾ, ਯਂ ਪਰੇਸਂ ਮਮਾਯਿਤਂ;

ਸਪ੍ਪਿ ਤੇਲਂ ਮਧੁਂ ਫਾਣਿਤਂ, ਮਚ੍ਛਮਂਸਂ ਅਥੋ ਖੀਰਂ;

ਦਧਿਂ ਸਯਂ ਵਿਞ੍ਞਾਪੇਯ੍ਯ ਭਿਕ੍ਖੁਨੀ, ਗਾਰਯ੍ਹਪਤ੍ਤਾ ਸੁਗਤਸ੍ਸ ਸਾਸਨੇ.

‘ਦੁਕ੍ਕਟ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਅਪਰਦ੍ਧਂ ਵਿਰਦ੍ਧਞ੍ਚ, ਖਲਿਤਂ ਯਞ੍ਚ ਦੁਕ੍ਕਟਂ.

ਯਂ ਮਨੁਸ੍ਸੋ ਕਰੇ ਪਾਪਂ, ਆਵਿ ਵਾ ਯਦਿ ਵਾ ਰਹੋ;

‘ਦੁਕ੍ਕਟ’ਨ੍ਤਿ ਪਵੇਦੇਨ੍ਤਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਦੁਬ੍ਭਾਸਿਤ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਦੁਬ੍ਭਾਸਿਤਂ ਦੁਰਾਭਟ੍ਠਂ, ਸਂਕਿਲਿਟ੍ਠਞ੍ਚ ਯਂ ਪਦਂ;

ਯਞ੍ਚ ਵਿਞ੍ਞੂ ਗਰਹਨ੍ਤਿ, ਤੇਨੇਤਂ ਇਤਿ ਵੁਚ੍ਚਤਿ.

‘ਸੇਖਿਯ’ਨ੍ਤਿ ਯਂ ਵੁਤ੍ਤਂ, ਤਂ ਸੁਣੋਹਿ ਯਥਾਤਥਂ;

ਸੇਕ੍ਖਸ੍ਸ ਸਿਕ੍ਖਮਾਨਸ੍ਸ, ਉਜੁਮਗ੍ਗਾਨੁਸਾਰਿਨੋ.

ਆਦਿ ਚੇਤਂ ਚਰਣਞ੍ਚ, ਮੁਖਂ ਸਞ੍ਞਮਸਂਵਰੋ;

ਸਿਕ੍ਖਾ ਏਤਾਦਿਸੀ ਨਤ੍ਥਿ, ਤੇਨੇਤਂ ਇਤਿ ਵੁਚ੍ਚਤਿ.

[ਉਦਾ. ੪੫ ਉਦਾਨੇਪਿ] ਛਨ੍ਨਮਤਿਵਸ੍ਸਤਿ, ਵਿਵਟਂ ਨਾਤਿਵਸ੍ਸਤਿ;

ਤਸ੍ਮਾ ਛਨ੍ਨਂ ਵਿਵਰੇਥ, ਏਵਂ ਤਂ ਨਾਤਿਵਸ੍ਸਤਿ.

ਗਤਿ ਮਿਗਾਨਂ ਪਵਨਂ, ਆਕਾਸੋ ਪਕ੍ਖਿਨਂ ਗਤਿ;

ਵਿਭਵੋ ਗਤਿ ਧਮ੍ਮਾਨਂ, ਨਿਬ੍ਬਾਨਂ ਅਰਹਤੋ ਗਤੀਤਿ.

ਗਾਥਾਸਙ੍ਗਣਿਕਂ.

ਤਸ੍ਸੁਦ੍ਦਾਨਂ –

ਸਤ੍ਤਨਗਰੇਸੁ ਪਞ੍ਞਤ੍ਤਾ, ਵਿਪਤ੍ਤਿ ਚਤੁਰੋਪਿ ਚ;

ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ, ਸਾਧਾਰਣਾ ਅਸਾਧਾਰਣਾ;

ਸਾਸਨਂ ਅਨੁਗ੍ਗਹਾਯ, ਗਾਥਾਸਙ੍ਗਣਿਕਂ ਇਦਨ੍ਤਿ.

ਗਾਥਾਸਙ੍ਗਣਿਕਂ ਨਿਟ੍ਠਿਤਂ.